ᒐᕙᒪᑐᖃᒃᑯᑦ ᓄᓇᕗᒥᑦ ᑐᓂᓯᕗᑦ ᑮᓇᐅᔭᓂ ᐃᑲᔪᕈᑎᐅᓂᐊᕐᑐᓂᒃ ᐊᕐᓇᓂᒃ ᓯᕗᓕᐅᕐᑎᐅᓕᖅᑎᑦᑎᔪᓐᓇᕐᓂᕐᒥᒃ ᐱᓕᕆᐊᑎᒍᑦ

“ᐅᑯᐊ ᐱᓕᕆᐊᒃᓴᐃᑦ ᐃᑲᔪᕈᑎᐅᓂᐊᖅᑐᑦ ᐊᕐᓇᐃᑦ ᐊᖑᑏᓪᓗ ᐊᔾᔨᒌᒍᓐᓂᕐᓂᖏᓐᓂᒃ ᐱᓕᕆᐊᑎᒍᑦ ᐊᒻᒪ ᓯᕗᓕᐅᕐᑎᐅᓕᖅᑎᑦᑎᔪᓐᓇᕐᓂᕐᒥᒃ ᐱᓕᕆᐊᖃᕐᓂᒃᑯᑦ ᑕᒪᐃᓐᓂ ᓄᓇᕗᑦ ᓄᓇᓕᖏᓐᓂᒃ”

ᐃᓕᓴᐱ ᓯᐅᑎᐊᐱᒃ, ᓄᓇᕗᑦ ᒥᓂᔅᑕᖓ ᐃᓚᒌᒃᑐᓕᕆᓂᕐᒧᑦ ᐊᒻᒪ ᐊᕐᓇᓄᑦ, ᐅᕙᓃᑦᑐᖅ ᓄᓇᕗᑦ ᒪᓕᒐᓕᐅᕐᕕᖓᓂᒃ, ᐅᖃᓚᐅᕐᑐᖅ ᓄᑖᑦ ᒐᕙᒪᑐᖃᒃᑯᓐᓂᑦ ᐃᑲᔫᑎᖃᕐᓂᒃᑯᑦ ᐱᓕᕆᐊᒃᓴᐃᑦ ᐃᑲᔪᕈᑎᐅᓂᐊᕐᓂᖓᓂᒃ ᐊᕐᓇᓂᒃ ᓄᓇᕗᒥᑦ ᐱᓕᕆᔨᒻᒪᕆᐅᓕᕆᓐᓇᕐᓂᕐᒥᒃ ᐊᒻᒪ “ᐃᑲᔫᑎᖃᕐᓂᐊᕐᓗᓂ ᐊᕐᓇᐃᑦ ᐊᖑᑏᓪᓗ ᐊᔾᔨᒌᒍᓐᓇᕐᓂᖏᓐᓂᒃ ᐊᒻᒪ ᓯᕗᓕᐅᕐᑎᐅᔪᓐᓇᕐᓂᕐᒥᒃ ᐱᕈᖅᑎᑦᑎᕚᓪᓕᕐᓗᓂ ᑕᒪᐃᓐᓂ ᓄᓇᕗᑦ ᓄᓇᓕᖏᓐᓂᒃ.” (ᐊᔾᔨᙳᐊᖁᑎᒋᔭᐅᔪᖅ)

By ᔭᐃᓐ ᔪᐊᔾ

For an English version of this story, see Feds give Nunavut money to build leadership among girls and women

ᓄᓇᕗᑦ ᒐᕙᒪᒃᑯᑦ ᐱᓕᕆᐊᖓ ᓯᕗᓕᐅᕐᑎᐅᔪᓐᓇᕐᓂᕐᒧᑦ ᐊᔪᕈᓐᓃᖅᓴᖅᑎᑦᑎᓂᖅ ᓄᓇᕗᒥᑦ ᐊᕐᓇᓂᒃ ᖃᖓᑦᑎᐊᓵᖅ ᑐᓂᔭᐅᓚᐅᕐᐳᑦ ᐊᖏᐸᓗᒃᑐᕈᓗᖕᒥᑦ ᐃᑲᔫᑎᒃᓴᓂᒃ ᐋᑐᕚᒥ.

ᓄᓇᕗᑦ ᒐᕙᒪᒃᑯᑦ ᑐᓂᔭᐅᓂᐊᖅᑐᑦ $600,000-ᓂᒃ ᓴᙱᒃᑎᒋᐊᖅᑎᑦᑎᑲᓐᓂᕈᑎᒃᓴᓂᒃ ᐃᓄᖕᓂ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᓯᕗᓕᐅᖅᑎᐅᔪᓐᓇᕈᑎᒃᓴᓄᑦ, ᒐᕙᒪᑐᖃᒃᑯᑦ ᐊᒻᒪ ᓄᓇᕗᑦ ᐱᓕᕆᔨᒻᒪᕆᖏᑦ ᑐᓴᖅᑎᑦᑎᓚᐅᕐᑐᑦ ᐋᒐᓯ 8-ᒥ ᔭᓗᓇᐃᒥ.

ᐅᓇ ᐃᓚᒋᔭᐅᔪᖅ $1 ᒥᓕᐊᓐ ᑖᓚᓂ ᑐᕌᖓᑎᑕᐅᔪᓂᒃ ᓯᕗᓕᐅᖅᑎᐅᓕᕈᓐᓇᕐᓂᕐᒧᑦ ᐊᕐᓇᓄᑦ ᓄᓇᑦᓯᐊᕐᒥ ᐊᒻᒪ ᓄᓇᕗᒥ.

ᑐᓴᒐᒃᓴᕆᔭᐅᔪᑎᒍᓪᓕ, ᓄᓇᕗᒥ, ᑮᓇᐅᔭᐃᑦ ᐊᑐᖅᑕᐅᓂᐊᖅᑐᑦ ᓄᓇᓖᑦ ᐃᓚᐅᑎᑕᐅᓗᑎᒃ, ᐊᕕᒃᑐᖅᓯᒪᓂᒃᑯᑦ ᐊᒻᒪ ᓄᓇᕗᒥ ᑎᒍᒥᐊᖅᑎᓂᒃ ᐋᕿᒃᓱᐃᕙᓪᓕᐊᓂᕐᒥᒃ ᐊᕐᓇᐃᑦ ᐊᒻᒪ ᓂᕕᐊᕐᓵᑦ ᓯᕗᓕᐅᕐᑎᐅᓂᕐᒧᑦ ᐊᒻᒪ ᐊᐅᓚᑦᑎᒍᑎᒃᓴᓄᑦ, ᐊᒻᒪᓗ ᐃᓕᓐᓂᐊᕈᑎᐅᖃᑦᑕᕐᓂᐊᖅᑐᓂᒃ ᑕᒪᐅᖓ.

ᐃᓕᓴᐱ ᓯᐅᑎᐊᐱᒃ, ᓄᓇᕗᑦ ᒥᓂᔅᑕᖓ ᐃᓚᒌᒃᑐᓕᕆᓂᕐᒧᑦ ᐊᒻᒪ ᐊᕐᓇᓄᑦ, ᑐᙵᓱᒃᑎᑦᑎᓚᐅᕐᑐᖅ ᑐᓴᒐᒃᓴᐅᔪᒥᒃ.

“ᐱᓕᕆᐊᒃᓴᑦ ᑐᕌᖓᔪᑦ ᐋᕿᒃᓱᐃᕙᓪᓕᐊᓂᕐᒥ ᐊᕐᓇᓄᑦ ᐊᒻᒪ ᓂᕕᐊᕐᓵᓄᑦ ᓯᕗᓕᐅᕐᑎᐅᓕᕈᓐᓇᕐᓂᕐᒧᑦ ᐊᒻᒪ ᐊᐅᓚᑦᑎᓂᐅᓂᐊᖅᑐᖅ ᐱᔭᐅᔭᕆᐊᖃᒻᒪᕆᖕᒪᑦ ᓄᓇᕗᒥᑦ,” ᓯᐅᑎᐊᐱᒃ ᐅᖃᖅᑐᖅ.

“ᑐᙵᓱᒃᑎᑦᑎᐊᖅᐸᒃᑲ ᐊᕐᓇᐃᑦ ᓂᕕᐊᕐᓵᓪᓗ ᖃᔅᓯᑐᐃᓐᓇᕐᓂ ᐅᑭᐅᖃᖅᑐᑦ ᐃᓚᐅᓕᖁᓪᓗᒋᑦ, ᐊᖓᔪᖅᑳᖑᒍᓐᓇᕐᓯᓂᕐᒥᒃ, ᐊᒻᒪᓗ ᓄᓇᓕᖕᓂ ᐱᓕᕆᖃᑎᖃᕈᓐᓇᕐᓗᑎᒃ, ᐊᕕᒃᑐᖅᓯᒪᓂᒃᑯᑦ ᐊᒻᒪ ᓄᓇᕗᒥᑦ ᑎᒍᒥᐊᖅᑎᓂᒃ. ᓇᓗᓇᙱᓚᕐᓕ ᑕᒪᒃᑯᐊ ᐱᓕᕆᐊᒃᓴᐃ ᐃᑲᔫᑎᒻᒪᕆᐅᓂᐊᖅᑐᑦ ᐊᔾᔨᒌᒍᓐᓇᕐᓂᕐᒥᒃ ᐊᒻᒪ ᐱᕈᖅᑎᑦᑎᕚᓪᓕᕐᓂᕐᒥᒃ ᓯᕗᓕᐅᖅᑎᐅᔪᓐᓇᕐᓂᕐᒥᒃ ᓄᓇᕗᑦ ᓄᓇᓕᖏᓐᓂᒃ.”

‘ᐊᕐᓇᐃᑦ ᓂᐱᖏᑕ’ ᐊᕐᓇᓄᑦ ᓯᕗᓕᐅᕐᑎᓂ ᑲᑎᒪᓂᕐᔪᐊᒥᑦ, 2010-ᖑᑎᓪᓗᒍ, ᓯᕗᓪᓕᐅᓪᓗᓂ ᐱᒋᐊᕈᑎᐅᓇᓱᓚᐅᕐᓯᒪᔪᖅ ᓄᐊᑦᑎᒐᓱᒃᖢᑎᒃ, ᑲᑎᑎᑦᑎᓇᓱᒃᖢᑎᒃ ᐊᒻᒪ ᐋᕿᒃᓱᐃᒐᓱᒃᖢᑎᒃ ᐊᕐᓇᐃᑦ ᓂᐱᖏᓐᓂᒃ ᓄᓇᕗᒥ, ᑐᕌᒐᖃᕋᓱᒃᖢᑎᒃ ᐊᕐᓇᓂᒃ ᓯᕗᓕᐅᕐᑎᐅᔪᓐᓇᕐᓯᑎᑦᑎᓂᕐᒥᒃ ᓄᓇᕗᒥ.

ᐃᓱᒪᓕᐊᕆᔭᖏᑦ ᐃᓚᖏᑦ ᐃᒪᐃᖁᔨᓯᒪᔪᑦ:

  • ᐃᑲᔫᑎᖃᒃᑲᓐᓂᕐᓗᑎᒃ ᐊᕐᓇᓄᑦ ᐱᓕᕆᐊᖃᖅᑐᓂᒃ ᓄᓇᓕᖕᓂᒃ.
  • ᓈᒻᒪᒃᑐᓂᒃ, ᐊᑐᐃᓐᓇᐅᔪᓂᒃ ᐊᒻᒪ ᐊᑭᓕᒐᕐᓂᖅᑐᓂᒃ ᐸᐃᕆᕝᕕᐅᔪᓐᓇᖅᑐᓂᒃ ᐊᑐᐃᓐᓇᖃᕐᓗᑎᒃ ᓄᓇᓖᑦ.
  • ᐃᑲᔫᑎᒃᓴᖅᑖᒃᑲᓐᓂᕐᓗᑎᒃ, ᐃᕐᓂᓱᒃᓰᔨᓂᒃ, ᑕᒪᒃᑯᐊ ᐊᕐᓇᐃᑦ ᓄᓇᖏᓐᓂ ᐊᐅᓪᓚᕆᐊᖃᖃᑦᑕᕋᔭᙱᒻᒪᑕ.
  • ᐅᓄᕐᓯᒋᐊᕐᓗᒋ ᓄᓇᓕᖕᓂ ᐊᒻᒪ ᓄᓇᕗᒥᑦ ᐃᓕᓴᕆᓯᒪᔾᔪᑎᐅᔪᑦ ᐊᕐᓇᓂᒃ ᐃᑲᔪᖅᑐᐃᒍᑎᓂᒃ ᓯᕗᓕᐅᕐᑎᐅᓂᕐᒧᑦ ᐃᖅᑲᓇᐃᔮᑎᒍᑦ ᐅᕝᕙᓘᓐᓃᑦ ᓯᕗᓕᐅᕐᑎᐅᓂᕐᒧᑦ ᐊᔪᕈᓐᓃᕐᓴᕆᐊᖃᕐᓂᖅ.
  • ᓈᒻᒪᒃᑐᓂᒃ ᐃᑲᔫᑎᑕᖃᕈᓐᓇᕐᓗᓂ ᓄᓇᓕᖕᓂ.
  • ᓄᓇᓕᖕᓂ ᐃᓕᓐᓂᐊᖅᑎᑕᐅᕙᒡᓗᑎᒃ ᓄᓇᕗᑦ ᓯᓚᑦᑐᖅᓴᕐᕕᒃᑯ ᐅᕝᕙᓘᓐᓃᑦ ᐱᓕᕆᖃᑎᖃᕐᓂᒃᑯᑦ ᐊᓯᖏᓐᓂᒃ ᑲᑐᔾᔨᖃᑎᒌᓂᒃ ᐱᓕᕆᖃᑎᒌᖕᓂᒡᓗ ᓯᕗᓕᐅᕐᑎᐅᓂᕐᒧᑦ ᐊᔪᕈᓐᓂᕈᑎᓂᒃ.
Share This Story

(0) Comments

Join the Conversation

Your email address will not be published. Required fields are marked *

*