ᒐᕙᓇ ᔭᓄᕈᓪ ᓄᓇᕕᒃᒧᑦ ᐳᓛᑎᓪᓗᒍ ᐅᖃᐅᓯᖃᓚᐅᕐᑐᖅ ᓇᖕᒥᓂᖅ ᒐᕙᒪᖃᕐᓂᖅ ᐱᒻᒪᕆᐊᓘᓂᖓᓂ

For English version, see Governor general uses Nunavik trip to highlight importance of self-government

ᒐᕙᒪ ᔭᓄᕈᓪ ᒥᐊᓕ ᓴᐃᒪᓐ ᐱᓇᓱᐊᕈᓯᐅᓚᐅᕐᑐᒥ ᓄᓇᕕᒃᒧᑦ ᐳᓛᖅᑎᓪᓗᒍ ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒋᑦ, ᓯᕗᓕᐅᕐᑎᓄᑦ ᐅᖃᓪᓚᑲᑕᓚᐅᕐᑐᖅ ᓇᖕᒥᓂᖅ ᒐᕙᒪᖃᕋᓱᖕᓂᕐᒧᑦ ᐋᔩᖃᑎᖃᑲᑕᖁᔨᓪᓗᓂ.

ᓴᐃᒪᓐ, ᑰᔾᔪᐊᖅᒥᐅᑕᖅ ᐊᒻᒪᓗ ᐊᖓᔪᖅᑳᖑᓚᐅᕐᓯᒪᓪᓗᓂ ᒪᑭᕕᒃᑯᓐᓄᑦ, ᐱᓕᕆᐊᖃᓕᒪᖕᒪᑦ ᐋᔩᖅᑎᐅᕙᖕᓂᕐᒥᒃ ᓄᓇᕕᒃᒥ ᓇᖕᒥᓂᖅ ᐱᓇᓱᐊᒐᖃᖅᑎᓪᓗᒋᑦ.

ᓯᕗᓪᓕᖅᐹᖓᓂ ᐅᓪᓗᕐᒥ ᑕᒫᓃᓕᖅᑎᓪᓗᒍ ᐅᖃᐅᓯᖃᓚᐅᕐᑐᖅ ᑕᒪᑐᒪ ᒥᒃᓵᓄᑦ ᒪᑭᕕᒃᑯᓐᓂ ᑲᑎᒪᖃᑕᐅᓪᓗᓂ ᐊᒻᒪᓗ ᐊᓯᖏᓐᓂᒃ ᓄᓇᕕᒃᒥᑦ ᐃᓄᐃᑦ ᑲᑐᔾᔨᖃᑎᒌᑦ ᑭᒡᒐᖅᑐᐃᔨᖏᓐᓂᒃ, ᐅᖃᐅᓯᖃᖅᖢᓂ ᓄᑖᓄᑦ ᐊᖏᕈᑎᒃᓴᓂᒃ ᐋᔩᖃᑎᖃᕆᐊᖃᕐᓂᖏᓐᓂᒃ ᑯᐸᐃᒃ ᒐᕙᒪᒃᑯᖏᓐᓂᒃ.

ᐅᖃᓪᓚᖃᑎᖃᕐᓯᒪᖕᒥᔪᖅ ᑯᐸᐃᒃ ᓯᕗᓕᐅᕐᑎᖓᓂᒃ ᕗᕌᓐᓱᐊ ᓕᒎᒥ ᐋᔩᖅᑎᒋᔭᐅᓂᐊᕐᑐᒥᒃ ᑎᒃᑯᐊᕐᓯᖁᔨᓪᓗᓂ. ᑲᑎᒪᖃᑎᖃᖅᓗᓂ ᒪᑭᕕᒃᒧᑦ ᓯᕗᓕᐅᖅᑎᓂᒃ ᒪᐃ 9-ᒥ, ᐅᖃᓚᐅᕐᑐᖅ ᑕᒪᓐᓇ ᐱᒋᐊᕐᓂᐊᓕᕐᓂᖓᓂᒃ.

“ᓕᒎ ᑲᑎᒪᖃᑎᒋᓪᓗᒍ ᐅᖃᓚᐅᕐᑐᖅ ᑎᒃᑯᐊᕐᓯᓂᐊᕐᓂᕋᖅᖢᓂ ᐋᔩᖅᑎᒋᔭᐅᓂᐊᕐᑐᒥᒃ,” ᐅᖃᕐᑐᖅ. “ᑕᒪᑐᒥᖓ ᒪᕐᕈᐃᕐᓗᓂ ᐅᖃᖁᒻᒪᕆᓚᐅᕐᑕᕋ ᓇᓗᓇᐃᕐᓯᒪᓂᐊᕐᒪᑦ ᐅᖃᕐᓯᒪᓂᖓᓂᒃ ᑕᐃᒪᐃᓕᑎᓪᓗᒍ.”

ᓴᐃᒪᓐ ᐅᖃᓪᓚᖃᑎᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᓄᓇᕕᒃᒥ ᐅᓪᓗᓂ ᑕᓪᓕᒪᓂᒃ ᐳᓚᕋᖅᑎᓪᓗᒍ, ᐅᖃᐅᓯᖃᖅᖢᑎᒃ ᖃᓄᐃᒻᒪ ᓇᖕᒥᓂᖅ ᒐᕙᒪᖃᕐᓂᖅ ᓄᓇᕕᒃᒥ ᑖᔅᓱᒧᖓ ᐱᒻᒪᕆᐊᓘᖕᒪᖔᑦ.

“ᐱᔾᔪᑎᐅᔪᕐᓕ ᐋᔩᕈᑎᖃᕐᓂᖅ ᓇᖕᒥᓂᖅ ᐱᓇᓱᖕᓂᕐᒧᑦ ᐅᕝᕙᓘᓐᓃᑦ ᓇᖕᒥᓂᖅ ᒐᕙᒪᖃᕐᓂᕐᒧᑦ ᐊᖏᕈᑎᓄᑦ, ᐃᓱᒪᔪᖓᓕ, ᑕᒪᕐᒥ ᑲᓇᑕᒥᐅᑕ, ᓄᓇᖃᖅᑳᖅᑐᑦ ᓄᓇᓕᖏ ᐅᑎᖅᑎᑦᑎᓗᑎᒃ ᐱᔪᓐᓇᐅᑎᒋᓚᐅᕐᓯᒪᔭᖏᓐᓂᒃ ᐃᓄᒋᐊᒃᑐᓃᑎᑕᐅᓚᐅᙱᓐᓂᖏᑦᑎᑐ,” ᐅᖃᕐᑐᖅ.

ᓴᐃᒪᓐ ᐅᖃᓚᐅᕐᑐᖅ ᐃᓱᒪᒋᔭᖃᕐᓂᕋᖅᖢᓂ ᐃᓄᐃᑦ ᐱᓇᓱᒍᓐᓇᕐᓂᖏᓐᓂ ᐃᒪᓐᓇ ᐃᒡᓗᖃᐅᕐᓂᖅ ᐊᒻᒪ ᐃᓄᓕᕆᓂᒃᑯᑦ ᐱᕙᓪᓕᐊᔪᓕᕆᓂᖅ ᐅᑭᐅᕐᑕᖅᑐᕐᒥ ᐊᔾᔨᖃᕆᐊᖃᕐᓂᕋᖅᖢᓂᐅᒃ ᐊᓯᖏᓐᓃᑦᑐᓂᒃ ᑲᓇᑕᒥ ᐱᕙᓪᓕᐊᔾᔪᑎᖏᓐᓂ.

ᑭᓯᐊᓂᓕ ᐅᖃᒪᐅᕐᑐᖅ ᓄᓇᕕᒃᒥ ᐱᕙᓪᓕᐊᔾᔪᑎᐅᔪᑦ ᐊᐅᓚᑕᐅᔭᕆᐊᖃᕐᓂᖏᓐᓂᒃ ᑲᒪᒋᔭᐅᓗᑎᒡᓗ ᐃᓄᖕᓄᑦ ᑕᒫᓂᕐᒥᐅᑕᓄᑦ.

“ᐃᓄᖕᓄᑦ ᐱᒻᒪᕆᐅᖕᒪᑦ ᐊᔾᔨᒌᙱᒻᒪᑕ ᖃᓄᖅ ᐃᒡᓗᓕᐅᕐᓂᖅ ᐱᓕᕆᐊᖑᓇᔭᕆᐊᒃᓴᖓᓂᒃ ᐊᒻᒪᓗ ᑖᒃᑯᐊ ᐃᒡᓗᐃᑦ ᐃᑲᔪᕈᑎᐅᔪᓐᓇᕋᔭᕐᒪᑕ ᐊᔾᔨᒌᙱᑦᑐᓄᑦ ᒪᑯᑎᑐᓇᖅ ᐃᓕᓐᓂᐊᖅᑐᓕᕆᓂᒃᑯᑦ, ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ, ᓄᓇᓕᖕᓂ ᐱᔨᑦᑎᕋᐅᑎᓕᕆᓂᕐᒧ,” ᐅᖃᕐᑐᖅ.

“ᐅᑯᐊ ᐊᔾᔨᒌᙱᑦᑑᑎᑦ ᐱᔨᑦᑎᕋᐅᑎᑦ ᓄᓇᓕᖕᓂ ᑲᒪᒋᔭᐅᓕᕋᔭᕐᒪᑕ ᓇᖕᒥᓂᖅ ᒐᕙᒪᖃᕐᓂᒃᑯᑦ ᐋᖅᑭᒃᓯᒪᔪᓂᒃ, ᑕᒪᒃᑯᐊᓕ ᖃᓄᖅ ᐊᓯᙳᖅᐸᓪᓕᐊᓇᔭᕐᒪᖔᑕ ᐃᓱᒪᒋᔭᕆᐊᖃᕐᑐᑦ ᐋᔩᕈᑎᖃᕋᓱᒡᓗᓂ ᓇᖕᒥᓂᖅ ᒐᕙᒪᖃᕋᓱᖕᓂᕐᒥ.”

ᐃᓚᖓᒍᑦ ᓄᓇᕕᒻᒥᐅᑦ ᑕᒪᑐᒥᖓ ᓯᕗᒧᑦ ᐱᓇᓱᒃᑐᖃᕐᒪᑦ ᒪᐅᓇ ᐱᓕᕆᐊᑎᒍᑦ ᐃᓄᓕᕆᓂᕐᒨᖓᔪᓄᑦ ᐅᑯᑎᒎᓇᖅ ᐃᓱᐊᕐᓯᕕᒃ ᒪᒥᓴᕐᒥᒃ ᑰᔾᔪᐊᖅᒥ ᐊᒻᒪᓗ ᐅᓈᖅ ᐊᖑᑎᑦ ᑲᑐᔾᔨᖃᑎᒌᖏᑦ ᐃᓄᒃᔪᐊᒃᒥ.

“ᖁᕕᐊᓱᑦᑎᐊᒻᒪᕆᒃᑐᖓ ᐃᓄᖕᓂ ᖃᓄᐃᓕᐅᕈᑎᖏᓐᓂᒃ ᓄᓇᖏᓐᓂ ᑐᓴᑲᑕᖅᖢᖓ, ᐊᒻᒪᓗ ᖁᕕᐊᓱᒃᑐᖓ ᐊᓂᒍᐃᔾᔪᑎᕕᓂᕐᓂ ᑐᓴᖅᑎᑕᐅᑲᑕᒃᖢᖓ, ᑕᐃᒪᓕ ᑕᒪᒃᑯᐊ ᐅᓄᕐᓂᕐᓴᓄᑦ ᑐᓴᐅᒪᔭᐅᑎᑦᑐᒪᔭᒃᑯ ᑲᓇᑕᒥ,” ᓴᐃᒪᓐ ᐅᖃᕐᑐᖅ ᑲᑎᖃᑎᑳᓪᓚᓚᐅᖅᖢᓂ ᑭᒡᒐᖅᑐᐃᔨᓂᒃ ᑖᒃᑯᓇᙶᖅᑐᓂᒃ.

“ᓄᓇᓖᓪᓕ, ᑭᓯᐊᓂ ᐃᓅᖃᑎᒌᖕᓂᒃᑯᑦ ᓈᒻᒪᙱᓕᐅᕈᑎᖃᐅᕐᒪᑕ, ᑭᓯᐊᓂᑦᑕᐅᖅ ᐱᓇᓱᒃᐸᓪᓕᐊᔪᐃᑦ, ᐅᖃᐅᓯᖏᓐᓂᒃ ᐅᖃᓪᓚᒃᐸᒃᑐᑦ, ᐃᓕᖅᑯᓯᖏᓐᓂ ᐊᑐᕐᐸᒃᑐᑦ ᐊᒻᒪᓗ ᐃᓚᖏᓐᓂᒃ ᐃᓕᓐᓂᐊᕖᑦ ᐅᐸᒃᑕᑦᑎᓐᓂ ᐃᓕᓐᓂᐊᕐᕕᒃᒥ ᐃᖅᑲᓇᐃᔭᕐᑐᑦ ᐃᓕᓐᓂᐊᖅᑐᓄᑦ ᐃᓄᒃᑎᑐᑦ ᐅᖃᓪᓚᖃᑦᑕᖅᑐ.”

ᓴᐃᒪᓐ ᓄᓇᕕᒃᒥ ᐳᓛᓚᐅᕐᒥᔪᖅ ᑰᔾᔪᐊᖅᒧᑦ, ᑲᖏᖅᓱᐊᓗᔾᔪᐊᖅᒧᑦ ᐊᒻᒪ ᐃᓄᒃᔪᐊᒃᒧᑦ. ᑲᖏᖅᓱᔾᔪᐊᖅᒧᑦ ᐳᓛᕐᓂᐊᓚᐅᖅᑑᒐᓗᐊᖅ ᑭᓯᐊᓂᓕ ᖃᖓᑕᓲᒧ ᓯᓚ ᓈᒻᒪᓚᐅᙱᓐᓂᖓᓄᑦ ᑕᐃᑯᙵᕈᓐᓃᓚᐅᕐᑐᖅ ᑖᓐᓇᓗ ᓴᐃᒪᓐ ᐅᖄᓚᕝᕕᒋᓪᓗᓂᒋᑦ ᓯᕗᓕᐅᖅᑎᒐᓚᐃᑦ ᒪᒥᐊᕝᕕᒋᓪᓗᓂᒋ ᐊᒻᒪᓗ ᖃᑯᒍᒃᑲᓐᓂᖅ ᑕᐃᑯᙵᐅᓛᕐᓂᕋᖅᖢᓂ.

ᐅᖃᓚᐅᕐᑐᖅ ᓄᓇᕕᒃᒧ ᐳᓛᕐᓂᖓ “ᐃᖢᐊᑦᑎᐊᖅᑐᖅ” ᐊᒻᒪ “ᖁᕕᐊᓇᑦᑎᐊᖅᖢᓂ.”

ᒐᕙᓇ ᔭᓄᕈᐃᑦ ᐊᕐᕌᒍᓂ ᑕᓪᓕᒪᓂ ᐃᓂᖏᓐᓃᖃᑦᑕᕐᒪᑕ. ᑖᒃᑯᓇᓂᓕ ᐊᕐᕌᒍᓂ ᑎᓴᒪᓂ ᐊᒥᐊᒃᑯᖏᓐᓂᒃ ᓴᐃᒪᓐ ᐃᓂᖓᓂ, ᐅᖃᓚᐅᕐᑐᖅ ᐳᓛᕈᓐᓇᕈᒪᓪᓗᓂ ᑕᒪᐃᓐᓂ ᓄᓇᕕᒃᒥ ᓄᓇᓕᖕᓂ ᐊᒻᒪᓗ ᓄᓇᕗᒻᒦᑦᑐᓂᒡᓗ, ᓄᓇᑦᓯᐊᕐᒥᓪᓗ ᐊᒻᒪᓗ ᔫᑳᒦᑦᑐᓂ.

“ᓇᒧᙵᐅᕈᓘᔭᕆᐊᖃᕋᒪ,” ᐅᖃᕐᑐᖅ.

ᑕᐃᒪᓕ ᓴᐃᒪᓐ ᓄᓇᕕᒃᒧ ᐅᐸᒃᑯᓂ ᑐᙵᓱᒃᑎᑕᐅᑦᑎᐊᕋᔭᖅᑐᖅ, ᐅᖃᕐᑐᖅ ᒥᐊᓕ ᔪᐊᓇᔅ, ᑰᔾᔪᐊᖅᒥ ᒪᐃᔭ ᐊᒻᒪᓗ ᓴᐃᒪᓐ ᐃᓚᖏᓐᓄᑦ ᐃᓚᒋᔭᐅᓪᓗᓂ.

“ᐅᓇ ᐅᕙᑦᑎᓐᓄ ᖁᕕᐊᓇᑦᑎᐊᓚᐅᕐᑐᖅ, ᓄᓇᑦᑎᓐᓄ, ᐊᒻᒪ ᐊᖏᕐᕋᖓᓄ ᑐᙵᓱᒃᑎᖢᑎᒍ,” ᔪᐊᓇᔅ ᐅᖃᕐᑐᖅ. “ᑕᒪᓐᓇ ᐱᓇᓱᐊᕈᓯᖅ ᐅᕙᑦᑎᓐᓄ ᐱᒻᒪᕆᐊᓘᓚᐅᕐᑐᖅ ᐊᒻᒪᓗ ᑕᑯᒃᑲᓐᓂᓛᕈᒪᓪᓗᑎᒍ.”

ᓴᐃᒪᓐ ᓄᓇᕕᒃᒥ ᐳᓚᕌᓂᓚᐅᕐᑐᖅ ᒪᐃ 13-ᒥ.