ᒥᐊᓕ ᓴᐃᒪᓐ ᐃᓂᒋᓂᐊᖅᑕᖓᓄᐊᓕᕈᓂ ᐊᑐᕐᓂᐊᖅᑕᖏᓐᓂᒃ ᓴᓇᑲᐅᖅᑐᕋᓱᖕᓂᖅ

ᓄᓇᕕᒻᒥᐅᑖᒃ ᕕᒃᑑᕆᐊ ᐅᒃᐱᒃ ᐊᒻᒪ ᔫᓕ ᒍᕆᓂᐃ ᐱᓕᕆᖃᑎᒌᖕᓂᖏᓐᓂᒃ

ᔫᓕ ᒍᕆᓂᐃ (ᓴᐅᒥᐊᓂᒃ) ᐊᒻᒪ ᕕᒃᑑᕆᐊ ᐅᒃᐱᒃ ᑕᑯᔪᓐᓇᕐᓯᓚᐅᕐᑑᒃ ᓴᓇᔭᖓ ᓴᖅᑭᔮᖅᑐᒦᑎᓪᓗᒍ ᓇᒐᔾᔭᐅᓚᐅᕐᓯᒪᔪᒥᒃ ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ (ᕿᑎᐊᓃᑦᑐᖅ) ᑖᔅᓱᒥᖓ ᐊᑐᖅᑎᓪᓗᒍ ᖁᕕᐊᓲᑎᖃᖅᑎᓪᓗᒋᑦ ᔪᓚᐃ 26-ᒥ. (ᐊᔾᔨᙳᐊᖅ ᐅᕙᙵᑦ ᕕᒃᑑᕆᐊ ᐅᒃᐱᒃ)

By ᒥᓚᓂ ᐅᕆᑦᓵᑦ

ᐱᓇᓱᐊᕈᓯᕐᓂ ᐅᓄᙱᑦᑐᓂᒃ ᐋᖅᑭᒃᓱᐃᔭᕆᐊᖃᓚᐅᕐᑑᒃ ᖃᓄᐃᓕᖓᓂᐊᕐᓂᖓᓂᒃ ᐊᒻᒪ ᒥᕐᓱᕆᐊᖃᖅᖢᒍ ᐊᑕᔪᓕᐊᕆᔭᖓᓂ ᐊᒻᒪ ᓴᐃᔭᑲᓕᐊᕆᔭᖓᓂᒃ ᓴᐸᒐᓕᖅᓱᓚᐅᙱᓐᓂᖓᓂᒃ. ᐊᒻᒪᓗ ᐃᓚᖃᓚᐅᕆᓪᓗᓂ ᐃᑲᕐᕋᓂ 13-ᓂ ᐋᖅᑭᒃᓱᐃᒃᑲᓐᓂᑲᑕᒃᖢᑎᒃ. ᑕᐃᒪᓐᓇᓕ ᑖᒃᑯᐊᒃ ᐃᓅᒃ ᓴᓇᕙᒃᑑᒃ ᐋᖅᑭᒃᓱᐃᓚᐅᕐᑑᒃ ᒥᐊᓕ ᓴᐃᒪᓐ ᐊᑐᕐᓂᐊᖅᑕᖓᓂᒃ ᑲᓇᑕᒥ ᒐᕙᓇ ᔭᓄᕈᙳᖅᑎᑕᐅᓕᕈᓂ.

ᓴᐃᒪᓐ ᓯᕗᓪᓕᖅᐹᖑᔪᖅ ᓄᓇᖃᖅᑳᖅᑐᓂ ᑖᔅᓱᒥᖓ ᐱᓕᕆᐊᖃᓕᖅᖢᓂ, ᐊᒻᒪᓗ ᑖᒃᑯᐊ ᐊᑐᖅᑕᖏᑦ ᖁᕕᐊᓲᑎᒋᔭᐅᑎᓪᓗᒍ ᔪᓚᐃ 26-ᒥᑦ ᓇᓗᓇᐃᖅᓯᓯᒪᒻᒪᕆᓚᐅᕐᐳᖅ.

ᕕᒃᑑᕆᐊ ᐅᒃᐱᒃ, ᐃᓅᓂᑯ ᖁᐊᕐᑕᖅᒥᓐ, ᓴᐃᒪᓐ ᐊᑕᔪᖓᓂᒃ ᔭᐃᑲᖓᓂᒡᓗ ᓴᓇᔨᐅᓚᐅᕐᑐᖅ, ᑖᓐᓇᓕ ᑰᔾᔪᐊᖅᒥᐅᑕᖅ ᔫᓕ ᒍᕆᓂᐄ ᓴᐸᖓᓕᕐᓱᖅᖢᓂᐅᒃ ᖁᖓᓯᐊᑕ ᐊᑎᑦᑎᐊᖓᒍᑦ.

ᐊᑕᔪᖅ ᐊᑐᓚᐅᖅᑕᖓ ᒥᐊᓕ ᓴᐃᒪᓐ ᑲᓇᑕᒧᑦ ᒐᕙᓇ ᔭᓄᕈᙳᖅᑎᑕᐅᑎᓪᓗᒍ ᓴᐸᖓᓕᕐᓯᒪᓪᓗᓂ ᖁᖓᓯᐊᒍᑦ ᐆᒧᖓ ᔫᓕ ᒍᕆᓂᐄᒧᑦ. (ᐊᔾᔨᙳᐊᖅ ᐅᕙᙵᑦ ᔫᓕ ᒍᕆᓂᐄ)

“ᐊᒃᓱᐊᓗᒃ ᐱᒃᑯᓕᓚᐅᕐᑐᖓ ᐃᓚᐅᖃᑕᐅᔪᓐᓇᕋᒪ ᑖᔅᓱᒥᖓ ᐱᒻᒪᕆᐊᓗᖕᒥ ᖃᓄᐃᓕᐅᕐᓇᒥ,” ᐅᖃᖅᑐᖅ ᐅᒃᐱᒃ.

“ᐅᓇ ᐊᒃᓱᕈᕐᓇᒃᑲᓐᓂᐅᔭᓚᐅᕐᑐᖅ ᓴᓇᓇᓱᒃᖢᓂ ᑕᐃᒪᓐᓇ ᐱᒻᒪᕆᐊᓘᑎᒋᔪᒥᒃ,” ᐅᖃᖅᑐᖅ, “ᑭᓯᐊᓂᓕ ᖁᕕᐊᒋᑦᑎᐊᓚᐅᖅᑕᕋ.”

ᐅᖃᓚᐅᕐᑐᖅ ᓴᐃᒪᓐ ᐊᑕᔪᖓ ᐃᓄᖕᓂ ᓴᖅᑭᔮᖅᑎᑦᑎᔾᔪᑎᐅᓚᐅᕐᑐᑦ ᐊᑯᖃᖅᑐᓂᒃ — ᐊᑰᔭᖃᖅᖢᓂ — ᒥᕐᓱᖅᓯᒪᓂᖓ ᐊᒪᐅᑎᑎᑐᑦ ᒥᕐᓱᖅᓯᒪᓪᓗᓂ.

ᓴᖅᑭᔮᖅᑎᑦᑎᓯᒪᓚᐅᕐᒥᔪᖅ ᐊᓪᓚᖓᔪᓂᒃ ᐊᒻᒪ ᓄᓇᖃᖅᑳᖅᑐᓂᒃ ᐊᓪᓚᓂᒃ ᒪᐅᓇ ᓴᐸᖓᓕᐊᕆᔭᐅᓯᒪᓂᖓᒍᑦ.

ᓴᐃᒪᓐ ᐊᐱᕆᑎᓪᓗᒍ ᐅᒃᐱᒃ ᓴᓇᔪᓐᓇᕆᐊᒃᓴᖓᓂᒃ ᐊᑐᕐᓂᐊᖅᑕᖏᓐᓂᒃ ᐱᓇᓱᐊᕈᓯᕐᓂ ᐱᖓᓱᓂ ᓯᕗᓂᐊᓂᒃ ᖁᕕᐊᓱᖕᓇᐅᑉ, ᐅᒃᐱᒃ ᐊᖏᑲᐅᑎᒋᒪᐅᕐᑐᖅ.

ᓯᕗᓪᓕᕐᒥ, ᐅᒃᐱᒃ ᐱᖓᓱᓂᒃ ᐊᔾᔨᒌᙱᑦᑑᑎᓂᒃ ᖃᓄᐃᓕᖓᓂᐊᕐᓂᖏᓐᓂᒃ ᑕᑯᑎᑦᑎᓪᓗᓂ ᓴᐃᒪᓐᒥ ᓂᕈᐊᕐᕕᒋᓂᐊᖅᑕᖏᓐᓂᒃ ᐊᒻᒪᓗ ᐋᖅᑭᒋᐊᒃᑲᓐᓂᖁᓇᔭᖅᑕᖏᓪᓕᒃ.

ᑭᖑᓂᐊᓂᓪᓕ ᓴᐃᒪᓐ ᓂᕈᐊᓚᐅᕐᑐᖅ ᑐᖑᔪᖅᑐᒥ ᕿᓐᓈᖓᓪᓗᓂ ᑕᕐᓴᕆᓂᐊᕐᓗᓂᐅ ᑕᒪᐃᓐᓄ ᐊᑕᔪᕐᒧᑦ ᐊᒻᒪ ᔭᐃᑲᒃᒧᑦ, ᑖᓐᓇᓗ ᐅᒃᐱᒃ ᕿᓂᓕᓚᐅᕐᓯᒪᔪᖅ ᓴᓇᓂᐊᖅᑕᖓᓂᒃ ᖃᓪᓗᓈᖅᑕᓂ, ᐊᔾᔨᙳᐊᓂ ᓇᒡᓯᐅᔾᔨᕙᒃᖢᓂ ᓴᐃᒪᓐ ᐸᓂᖓᓄᑦ ᑭᐅᕈᒧ ᖃᐅᔨᒋᐊᕐᕕᒋᑲᑕᒃᖢᓂᐅᒃ.

ᓴᓇᔭᐅᓂᐊᖅᑐᒥ ᓂᕈᐊᓚᐅᖅᖢᑎᒃ ᐅᒃᐱᒃ ᓴᓇᓯᒋᐊᓚᐅᕐᑐᖅ ᐅᒃᑑᑎᒋᓂᐊᖅᑕᒥᓂᒃ.

“ᖃᐅᔨᒪᔪᖓ ᐊᑯᓂᐅᒃᑲᓐᓂᕐᓂᐊᕐᓂᖓᓂᒃ ᓴᐸᖓᓕᖅᓱᖅᑕᐅᔭᕆᐊᖃᕐᓂᖓᓄᑦ ᑕᐃᒪᓕ ᓴᐸᖓᓕᖅᓱᕐᕕᒋᓂᐊᖅᑕᖓᓂᒃ ᑐᓂᓪᓗᒍ (ᒍᕆᓂᐄ) ᐱᓕᕆᐊᖃᓯᒋᐊᕐᓂᐊᕐᒪᓐ,” ᐅᖃᖅᑐᖅ.

ᔪᓚᐃ 24-ᒥᑦ, ᐅᓪᓘᒃ ᒪᕐᕉᒃ ᓯᕗᓂᐊᓂ ᖁᕕᐊᓱᕕᒡᔪᐊᕐᓇᐅᑉ, ᓴᐃᒪᓐ ᐊᑎᙳᐊᖅᓯᔪᓐᓇᖅᓯᓚᐅᕐᑐᖅ ᐊᒻᒪᓗ ᑕᑯᔭᕆᐅᖅᖢᓂᐅᒃ ᐅᐸᒃᓯᒪᓪᓗᓂ.

ᐊᑕᔪᖅ ᓈᒻᒪᑦᑎᐊᖅᖢᓂ ᑭᓯᐊᓂᓕ ᔭᐃᑲᒃ ᑕᐃᒪᓐᓇᐅᓚᐅᙱᒻᒥᔪᖅ.

ᑲᓇᑕᒧ ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ (ᕿᑎᐊᓃᑦᑐᖅ) ᐃᓂᒋᔭᖓᓄᐊᖅᑕᐅᔭᖅᑐᖅᖢᓂ ᓇᒡᒐᔾᔭᐅᒥᑦ ᐊᑐᖅᖢᓂ ᐊᑕᔪᖅ ᐊᒻᒪ ᔭᐃᑲᒃ ᓴᓇᔭᐅᓂᑯ ᕕᒃᑑᕆᐊ ᐅᒃᐱᒃᒧᑦ ᐊᒻᒪ ᓴᐸᖓᓕᖅᓱᖅᓯᒪᓪᓗᓂ ᐆᒪᙵᑦ ᔫᓕ ᒍᕆᓂᐄ. (ᐊᔾᔨᙳᐊᖁᑎᒋᔭᐅᔪᖅ ᒪᐃᒃ ᑲᕈᓯᑎ)

“ᔭᐃᑲᒃ ᐱᓕᕆᐊᕆᒃᑲᓐᓂᓚᐅᕐᑕᕋ ᐃᑲᕐᕋᒃᑲᓐᓂᕐᓂᒃ 13-ᓂᒃ,” ᐅᒃᐱᒃ ᐅᖃᖅᑐᖅ. “ᑭᓗᐊᖅᑎᑦᑎᐊᖅᖢᒍ ᐊᒻᒪᓗ ᐱᓕᕆᐊᕆᒃᑲᓐᓂᓕᖅᖢᒍ ᐆᒃᑐᕋᖅᓯᒪᔪᑦ ᒪᓕᒃᖢᒋᑦ.”

“ᑕᑯᔪᓐᓇᕋᔭᓚᐅᕐᑐᑎᑦ ᖃᓄᑎᒋ ᐊᒃᓱᕈᕐᓇᖅᑐᒦᓐᓂᓐᓂ,” ᐅᖃᖅᑐᖅ ᐃᒡᓚᖅᓯᓪᓗᓂ .

ᐅᒃᐱᒃ ᐅᖃᓚᐅᕐᑐᖅ ᐋᖅᑭᒋᐊᖅᓯᑲᑕᖕᓂᐊᕆᐊᒃᓴᖓᓂ ᐅᓄᕐᓱᐃᕐᓗᓂ ᐋᑐᕚᒥ, ᑭᓯᐊᓂᓕ ᒥᕐᓲᑎᒥᓂ ᓇᒃᓴᓚᐅᕐᑐᖅ ᐋᖅᑭᒋᐊᖅᓯᒋᐊᖃᕋᔭᕐᒪᖔᑦ.

“ᖁᕕᐊᓱᒻᒪᓕᓚᐅᕐᐳᖓ ᓇᒃᓴᓚᐅᕋᒃᑯ,” ᐅᖃᖅᑐᖅ.

ᐊᓂᖓᑕ ᐃᒡᓗᖓᓂ ᒥᕐᓱᕐᕕᓕᐅᒪᐅᕐᑐᖅ ᐊᒻᒪ ᐅᓪᓘᖕᓂ ᒪᕐᕉᖕᓂ ᒥᒃᓱᒃᑲᓐᓂᖅᖢᓂ ᑖᓐᓇᓗ ᐱᐊᓂᒃᑲᒥᐅᒃ ᐊᒡᔭᖅᖢᓂᐅᒃ 5:30-ᒥᑦ ᐅᓐᓄᒃᑲᓐᓂᐅᓕᖅᐸᓪᓗ ᖁᕕᐊᓱᒍᑎᐅᓂᐊᖅᖢᓂ.

ᑕᒪᓐᓇᓕ ᓴᐸᖓᓕᖅᓱᐃᕆᓂᖅ ᐱᓕᕆᐊᖃᕐᓇᒻᒪᕆᓚᐅᕐᒥᔪᖅ.

ᖃᓄᖅ ᐊᖅᑭᒃᓯᒪᓂᐊᕐᓂᖓᓂᒃ ᐱᓕᕆᕙᓪᓕᐊᓕᖅᑎᓪᓗᒋᑦ, ᓴᐃᒪᓐ ᓴᐸᖓᕐᓂ ᖁᖓᓯᕐᒥᐅᑕᖃᕈᒪᓚᐅᕐᑐᖅ ᑖᓐᓇ ᐊᑕᔪᖅ ᐊᑐᓕᖅᐸᒍ, ᑭᓯᐊᓂᓕ ᐅᒃᐱᒃ ᐊᒻᒪ ᓴᐃᒪᓐ ᐃᓱᒪᓕᓚᐅᕐᑑ ᐊᑕᔫᑉ ᖁᖓᓯᐊᒍᑦ ᓴᐸᖓᖃᖔᕐᓗᓂ, ᐅᒃᐱᒃ ᐅᖃᖅᑐᖅ.

ᐅᒃᐱᒃᓕ ᒍᕆᓂᐄᒧ ᐃᑲᔪᖅᑕᐅᔪᒪᓕᓚᐅᕐᑐᖅ ᑕᕝᕙᙵ ᓂᐅᕕᓚᐅᕐᓯᒪᓂᖓᓄᑦ ᐊᒻᒪᓗ ᒍᕆᓂᐄ ᖁᕕᐊᓱᑐᐃᓐᓇᖅᖢᓂ ᐃᑲᔪᕈᒪᓪᓗᓂ.

ᒍᕆᓂᐄ ᐱᒻᒪᕆᐅᓛᖑᓂᕋᓚᐅᕐᑕᖓᓂ ᐅᒃᐱᕆᔭᐅᔪᓐᓇᕐᓂᖓᓂᒃ ᑖᔅᓱᒥᖓ ᐱᓕᕆᐊᖃᕈᓐᓇᕐᓂᕐᒥᒃ.

ᖃᓄᖅ ᑕᕐᓴᖃᕐᓂᐊᕆᐊᒃᓴᖓᓂ ᐃᓱᒪᖅᓱᖅᖢᓂ ᐊᒻᒪ ᖃᓄᐃᓕᖓᓂᐊᕐᓂᖓᓂᒃ, ᓴᓇᓚᐅᕐᑐᖅ ᐋᖅᑭᒃᓱᐃᔪᓐᓇᕐᓂᖓᒍᑦ.

“ᐋᖅᑭᒃᓱᐃᕙᓪᓕᐊᑲᑕᑐᐃᓐᓇᓚᐅᕐᑐᖓ ᐊᔾᔨᒌᙱᑐᓂ ᑕᕐᓴᓕᑲᑕᒃᖢᒍ,” ᐅᖃᖅᑐᖅ. “ᐃᓱᒪᖅᓱᑐᐃᓐᓇᓚᐅᕋᒪ.”

“ᓴᐸᖓᓕᕆᑎᓪᓗᖓ ᐃᓱᒪᒌᓐᓇᖃᑦᑕᓚᐅᕐᑕᕋ ᒥᐊᓕ ᐊᒻᒪᓗ ᖃᓄᖅ ᐃᓅᓯᖃᕐᓂᖓᓂᒃ.”

ᒍᕆᓂᐄ ᐊᒻᒪ ᓴᐃᒪᓐ ᐊᑯᓂᐊᓗᒃ ᖃᐅᔨᒪᖃᑦᑕᐅᑎᖕᒪᑎᒃ — ᑕᒪᕐᒥᒃ ᐱᕈᖅᓴᖅᓯᒪᓪᓗᑎᒃ ᑰᔾᔪᐊᖅᒥ, ᓴᐃᒪᓐᑯᑦ ᒍᕆᓂᐄ ᐊᓈᓇᑦᑎᐊᒃᑯᖏᑦᑕ ᐊᑭᑦᑎᐊᖓᓂ ᐃᒡᓗᖃᖅᖢᑎᒃ.

ᑖᒃᑯᐊᒃ ᐊᐴᑎᖃᑦᑕᐃᓐᓇᖅᓯᒪᔫᒃ ᐊᕐᕌᒍᒐᓴᒻᒪᕆᐅᓕᕐᑐᓂᒃ ᒍᕆᓂᐄ ᐃᖅᑲᓇᐃᔮᖓᒍᑦ ᑐᑭᒧᐊᖅᑎᑦᑎᔨᐅᓪᓗᓂ ᑕᕐᕋᒥᐅᑦ ᓂᐱᖓᓂ ᐊᒻᒪᓗ ᐃᒃᓯᕙᐅᑕᕆᔭᐅᓪᓗᓂ ᓄᓇᖃᖅᑳᖅᑐᑦ ᑕᓚᕖᓴᖁᑎᖓᓂᒃ APTN-ᑯᓐᓂᒃ.

ᑯᕆᓂᐄ ᓴᐸᖓᓕᕆᓕᓚᐅᕐᑐᖅ ᐅᒃᐱᐅᑉ ᑐᓂᓯᒪᔭᖓᓂᒃ ᖁᖓᓯᐊᓄᑦ ᔪᓚᐃ 20-ᒥᑦ ᐊᒻᒪᓗ ᐃᑲᕐᕋᓂᒃ 55-ᓂ ᐱᓕᕆᐊᕆᓪᓗᓂᐅᒃ ᐅᓪᓗᓂ ᑕᓪᓕᒪᓂᒃ ᐱᐊᓂᒐᓱᒃᖢᓂᐅᒃ.

ᐅᑯᐊ ᓴᐸᖓᐃᑦ ᓴᓇᓯᒪᔪᑦ ᖁᖓᓯᐊᓂᒃ ᒥᐊᓕ ᓴᐃᒪᓐ ᐊᑕᔪᖓᑕ ᐃᑲᕐᕋᓂᒃ 55-ᓂ ᓴᓇᔭᐅᓚᐅᕐᑐᑦ. (ᐊᔾᔨᙳᐊᖅ ᐅᕙᙵᑦ ᔫᓕ ᒍᕆᓂᐄᑦ)

ᐅᖃᓚᐅᕐᑐᖅ ᑕᕐᓴᓕᐊᖓ ᓄᓇᒥᙶᖅᑐᓂᙶᓂᕋᖅᖢᓂᐅᒃ.

“ᐅᖓᓯᒃᑐᒥ ᑕᑯᓗᒍ ᐃᒪᓐᓇ ᑕᑯᓐᓇᖅᖢᓂ ᑭᓯᐊᓂᓕ ᖃᓂᒡᓕᒋᐊᖅᖢᒍ ᓴᖅᑭᔮᑦᑎᐊᒃᑲᓐᓂᖅᑐᒥ ᑕᑯᔪᓐᓇᖅᖢᓂ,” ᐅᖃᖅᑐᖅ.

“ᒪᑯᑎᑐᓇ ᒥᑭᑦᑑᑎᕈᓗᒃᑎᑐᑦ ᐱᕈᖅᑐᑎᑐ ᓄᓇᐃᓐᓇᕐᒥ.”

ᑐᖑᔪᕈᔪᖕᓂᖏ ᐊᔾᔨᒌᙱᖢᑎᒃ ᐊᒻᒪ ᓄᓇᕋᙳᐊᖃᐅᖅᖢᓂ, ᒍᕆᓂᐄ ᐅᖃᓚᐅᕐᑐᖅ ᑖᒃᑯᐊ ᐱᕈᖅᑐᑦ ᓴᖅᑭᑎᑦᑎᓯᒪᓂᖏᓐᓂᒃ “ᑭᓱᓂ ᐅᕙᑦᑎᓐᓂᒃ ᑲᑎᖃᑎᒌᒍᑎᖃᕐᓂᑦᑎᓐᓂᒃ ᑕᐅᕙᙵᑦ ᓯᒡᔭᒥ ᑕᒪᐅᖓ.”

ᑖᒃᑯᐊ ᓴᐸᖓᐅᔭᑦ ᓄᓇᕋᙳᐊᓂᒃ, ᒍᕆᓂᐄ ᓄᓇᕋᖑᐊᓂᒃ ᑰᔾᔪᐊᕐᒥ ᐱᕈᖅᐸᒃᑐᓂ ᐱᑕᖃᖅᑎᑦᑎᓚᐅᕐᒥᔪᖅ.

ᑕᑯᑕᐃᓐᓇᕋᒥᐅᒃ ᐱᓕᕆᐊᖓ ᐊᑐᓕᕐᑎᓪᓗᓂᐅᒃ ᓴᐃᒪᓐ ᓇᒡᒐᔭᐅᒥ ᐊᒻᒪ ᐅᖃᐅᓯᖃᖅᖢᑎᒃ ᑖᔅᓱᒥᖓ, ᒍᕆᓂᐄ ᐅᖃᓚᐅᕐᑐᖅ ᑖᓐᓇ ᐃᒃᐱᖕᓇᓗᐊᓚᐅᕐᓂᖓᓂᒃ ᐱᒋᐊᕐᓂᖓᓂᒃ ᐱᐊᓂᖕᓂᖓᓄᑦ.

“ᓱᓕ ᑕᒪᓐᓇ ᐅᒃᐱᕆᓗᐊᒻᒪᕆᐊᓗᙱᑕᕋ ᕿᓚᒥᐊᓗᒃ ᐱᓕᕆᐊᕆᑲᐅᕐᑐᓗᐊᒧᑦ.”

“ᐊᒃᓱᐊᓗ ᐃᒃᐱᒋᕙᕋ ᑕᒪᓐᓇ.”

ᒍᕆᓂᐄ ᓴᐸᖓᓕᕆᖃᑦᑕᖅᓯᒪᔪᖅ ᑕᐃᒪᙵᑦ 7-ᓂ ᐅᑭᐅᖃᓕᒪᐅᕐᓯᒪᒐᒥ ᐊᒻᒪᓗ ᓴᓇᐅᒐᖏᓐᓂᒃ ᓴᖅᑭᑎᑦᑎᕙᒃᖢᓂ ᐃᓐᔅᑕᒍᕌᒻᑯᑦ, ᐅᓇᓕ ᐅᒃᐱᒃ ᐅᑯᓄᖓ ᓴᓇᐅᒐᓕᐅᕐᑎᒻᒪᕆᒃ ᐅᒃᐱᒃ ᓴᓇᐅᒐᖏᓐᓂᒃ (Okpik Designs).

ᑕᒪᓐᓇ ᓯᕗᓪᓕᖅᐹᖑᓪᓗᓂ ᐱᓕᕆᖃᑎᒌᖕᓂᖏᓐᓂᒃ, ᒍᕆᓂᐄ ᐅᖃᓚᐅᕐᑐᖅ “ᐃᓱᒪᔪᖓᓕ ᑕᒪᓐᓇ ᑭᖑᓪᓕᖅᐹᖑᔾᔮᙱᓐᓂᖓᓂᒃ.”

Share This Story

(0) Comments

Join the Conversation

Your email address will not be published. Required fields are marked *

*