ᒥᑦᑎᒪᑕᓕᒃᒥᓐ ᑐᔪᕐᒥᕕᒃᒥᑦ ᓴᓇᔭᐅᓂᖓ ᐱᔭᕆᑐᒍᑎᐅᕗᖅ ᑭᖑᓪᓕᖅᐹᓂ ᖃᐅᔨᒐᓱᖕᓂᕐᒥ ᓄᓘᔮᑉᓂ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ
ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᒃᑯᑦ ᐃᖅᑲᓇᐃᔭᖅᑎᖏᑦ ᓯᓂᒃᑕᑐᐃᓐᓇᕆᐊᖃᖅᐳᑦ ᐃᒃᐱᐊᕐᔪᒃᒥᑦ, ᐊᓯᖏᑦ ᐅᔭᕋᒃᓯᐅᕐᕕᒃᒥᑦ ᓯᓂᒃᑕᑐᐃᓐᓇᕆᐊᖃᖅᖢᑎᒃ
ᐅᓇ ᓄᓇᙳᐊᖅ ᓴᕿᑎᑦᑎᓯᒪᔪᖅ ᐹᕕᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃ ᑯᐊᐳᕇᓴᐅᑉ ᐸᕐᓇᐅᑎᖏᓐᓂᒃ ᓴᓇᔪᒪᓂᕐᒥᒃ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥ ᓴᕕᕋᔭᒃᓴᓂᒃ ᐊᒡᔭᖅᓯᒍᑎᐅᓇᔭᖅᑐᓂᒃ ᓄᓘᔮᓂ ᐅᔭᕋᒃᓯᐅᕐᕕᒃᒥᑦ ᕿᑭᖅᑖᓘᑉ ᐅᐊᖕᓇᖅᐸᓯᐊᓂ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Pond Inlet hotel renovations complicate final hearing on Mary River expansion
ᓴᓇᔭᐅᓂᖓ ᓴᐅᓂᖅ ᑐᔪᕐᒥᕕᒃᒥᑦ ᒥᑦᑎᒪᑕᓕᒃᒥᑦ ᓈᒻᒪᙱᓕᐅᕈᑎᐅᕗᖅ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓂᒃᓴᓕᐅᕋᓱᒃᑎᓪᓗᒋᑦ ᑭᒃᑯᓕᒫᓂᒃ ᑲᑎᒪᑎᑦᑎᓂᐊᕐᓂᕐᒥᒃ ᐹᕕᓐᓛᓐ ᓴᕕᕋᔭᒃᓴᒧᑦ ᐅᔭᕋᒃᓯᐅᕐᕕᒃ ᑯᐊᐳᕇᓴᒃᑯᑦ ᐊᖏᒡᓕᒋᐊᖅᑎᑦᑎᔪᒪᓂᖏᓐᓂᒃ ᓄᓘᔮᖕᓂᑦ ᐅᔭᕋᒃᓯᐅᕐᕕᒃᒥᑦ.
ᒥᑦᑎᒪᑕᓕᒃ ᓄᓇᓕᖕᓂᑦ ᐊᒃᑐᖅᑕᐅᓛᖑᓇᔭᕐᒪᑦ ᓄᓘᔮᑦ ᐊᖏᒡᓕᒋᐊᖅᑎᑕᐅᔪᒪᓂᖓ ᐊᖏᖅᑕᐅᒍᓂ.
ᑭᓯᐊᓂᓕ ᑐᔪᕐᒥᕕᒃ ᓴᓇᔭᐅᓂᖓ ᐊᔪᕐᓴᕈᑎᐅᑲᑕᒃᐳᖅ ᖃᓄᖅ ᑲᑎᒪᔭᖅᑐᖃᑕᐅᔪᑦ ᐃᓂᖃᕋᔭᕆᐊᒃᓴᖏᓐᓂᒃ ᒥᑦᑎᒪᑕᓕᒃᒥᑦ.
ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᖑᓕᖅᐹᒥ ᑲᑎᒪᓂᕆᓂᐊᕐᑕᖓ ᒪᕐᕈᐃᓕᖓᓗᒍ ᐱᓕᕆᐊᖑᔪᒪᓚᐅᕐᑑᒐᓗᐊᖅ: ᒥᑦᑎᒪᑕᓕᒃᒥᑦ ᓯᑎᐱᕆ 23-ᒥᑦ ᓯᑎᐱᕆ 27-ᒧᑦ ᐊᒻᒪ ᐃᖃᓗᖕᓂᑦ ᓯᑎᐱᕆ 30-ᒥᑦ ᐅᒃᑑᐱᕆ 4-ᒧᑦ.
ᑭᓯᐊᓂᓕ ᑕᖅᑭᖅ ᐱᒋᐊᓕᓵᕐᓯᒪᑎᓪᓗᒍ, ᐹᕕᓐᓛᓐ ᐱᕕᖃᒃᑲᓐᓂᕈᒪᓚᐅᕐᒪᑕ ᑐᓴᐅᒪᑎᑦᑎᔭᕆᐊᖃᕐᓂᖏᓐᓂᒃ ᕿᑭᖅᑖᓘᑉ ᐅᐊᖕᓇᖓᓂ ᓄᓇᓕᖕᓂᑦ ᐊᒻᒪᓗ ᐅᑯᓂᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᒃ.
ᑕᒪᓐᓇ ᑕᐃᒪᐃᑎᓐᓂᐊᕐᓗᒍ, ᑲᒻᐸᓂᐅᔪᑦ ᐃᓱᒪᓕᐅᕆᓚᐅᕐᑐᑦ ᐅᓪᓗᓂᒃ 6-ᓂᒃ ᑐᓴᐅᒪᑎᑦᑎᓂᕐᒧ ᑲᑎᒪᑎᑦᑎᔪᒪᓪᓗᑎᒃ ᒥᑦᑎᒪᑕᓕᒃᒥᑦ, ᐱᒋᐊᕐᓗᑎᒃ ᓄᕕᐱᕆ 4.
ᒥᑦᑎᒪᑕᓕᒃ ᐊᖑᓇᓱᒃᑎᓕᕆᔨᖏᑦ, ᑖᒃᑯᐊ ᐱᓕᕆᐊᖃᖅᑎᒻᒪᕆᐅᔪᑦ ᐊᕙᑎᒋᔭᒥᑦ ᕿᒥᕐᕈᐊᕐᓂᕐᒥᑦ ᐆᒧᖓ ᓄᓘᔮᑦ ᐊᖏᒡᓕᒋᐊᖅᑕᐅᔪᒪᓂᖓᓄᑦ, ᐅᖃᓚᐅᕐᑐᑦ ᐃᑲᔪᖅᑐᐃᓂᖏᓐᓂᒃ ᑭᖑᕙᕆᐊᕈᒪᔾᔪᑎᖏᓐᓂᒃ ᐹᕕᓐᓛᓐᑯᑦ.
ᑭᓯᐊᓂᓕ ᓈᒻᒪᒃᓴᙱᑦᑐᑦ ᑲᑎᒪᓂᖅ ᒥᑦᑎᒪᑕᓕᖕᒥᑐᐃᓐᓇᐅᓂᐊᕐᓂᖓᓂᒃ, ᒪᑯᐊ ᑲᒪᒋᔭᖃᖃᑕᐅᔪᑦ ᐱᓕᕆᔾᔪᑎᓄᑦ ᐃᑲᔪᖅᑕᐅᔪᒪᓇᔭᕆᐊᒃᓴᖏᓐᓂᒃ.
“ᐊᖏᕐᐳᒍᑦ ᐱᒻᒪᕆᐅᓂᖓᓂᒃ ᐃᓂᖃᖅᑎᑦᑎᓂᕐᒥᒃ ᓄᓇᓕᖕᓂ ᐃᓚᐅᔪᓂᒃ, ᑭᓯᐊᓂᓕ ᐱᓕᕆᑎᑦᑎᓂᖅ ᐊᔾᔨᒌᙱᑦᑐᓂᒃ ᐅᓪᓗᓂ—ᐊᑕᐅᓯᖅ ᒥᑦᑎᒪᑕᓕᖕᒥ ᓄᓇᓕᖕᓃᑦᑐᓂᒃ ᑐᓴᕋᓱᖕᓂᕐᒧᑦ, ᐊᒻᒪ ᐊᐃᑉᐸᖓ ᐃᖃᓗᖕᓂ ᐱᓕᕆᔾᔪᑎᓕᕆᓂᓪᓚᕆᖕᒨᖓᓂᕐᒧᑦ—ᐱᐅᓂᖅᐹᖑᓕᕋᔭᕐᑐᖅ ᑕᒪᓐᓇ ᐱᓇᓱᒃᑎᐊᕐᓗᒍ,” ᐊᖑᓇᓱᒃᑎᓕᕆᔨᒃᑯᑦ ᐅᖃᕐᓯᒪᓚᐅᕐᑐᑦ ᑎᑎᖃᓂᒃ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.
ᑕᐃᒪᓕ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᑎᑦᑎᓂᐊᕈᒪᔪᑦ ᑭᖑᕙᕆᐊᕐᓯᒪᓗᓂ, ᐊᕕᒃᓯᒪᓗᑎᒃ ᐃᒪᓐᓇ:
- ᐱᓕᕆᔾᔪᑎᓕᕆᓂᕐᒥᒃ ᓴᕿᑎᑦᑎᓂᖅ, ᐃᖃᓗᐃᑦ ᑲᑕᑦ ᕼᐋᓪ: ᓄᕕᐱᕆ 2-4.
- ᓄᓇᓕᖕᓂ ᑲᑎᒪᑎᑦᑎᓂᖅ, ᐃᖃᓗᐃᑦ ᑲᑕᑦ ᕼᐋᓪ: ᓄᕕᐱᕆ 5-6.
- ᑭᒃᑯᓕᒫᓂᒃ ᑲᑎᒪᑎᑦᑎᓂᖅ, ᒥᑦᑎᒪᑕᓕᒃᒥᑦ ᐱᙳᐊᕐᕕᒃᒥᑦ: ᓄᕕᐱᕆ 8-9.
ᐃᓂᒃᓴᖃᖅᑎᑕᐅᓂᕐᒥᓪᓕ ᐅᓪᓘᖕᓂ ᒪᕐᕉᖕᓂ ᒥᑦᑎᒪᑕᓕᒃᒥᑦ, ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐃᖅᑲᓇᐃᔭᖅᑎᐅᔪᑦ ᐊᒻᒪ ᑲᑎᒪᔩᑦ ᓯᓂᒃᑕᕋᔭᖅᑐᑦ ᐃᒃᐱᐊᕐᔪᒃᒥ.
ᐊᓯᖏᓪᓕ ᒥᑦᑎᒪᑕᓕᒃᒧᑦ ᑲᑎᒪᔭᖅᑐᖅᑐᑦ ᓄᓘᔮᑦ ᐅᔭᕋᒃᓯᐅᕐᕕᐊᓃᓐᓂᐊᕐᑐᑦ.
ᐅᑯᐊᓕ ᓄᓇᕗᒥᑦ ᐃᒪᓕᕆᔨᒃᑯᑦ ᑲᑎᒪᔨᖏᑦ, ᑖᒃᑯᐊᓗ ᐱᓕᕆᖃᑎᖃᖅᖢᑎᒃ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ ᐋᕿᒃᓱᐃᕙᓪᓕᐊᓂᕐᒥᒃ ᐊᕙᑎᓕᕆᓂᕐᒧᑦ ᖃᐅᔨᓴᕈᑎᓂᒃ, ᐊᓯᐊᒍᖔᖅ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᕐᒥ ᐱᓇᓱᒍᒪᔪᑦ ᓄᕕᐱᕆᒥ ᐊᒻᒪ ᑲᑎᒪᑎᑦᑎᓗᑎᒃ ᕕᕝᕗᐊᕆᒥ.
“ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᖃᑎᖃᕐᓂᐊᖅᑐᑦ ᐹᕕᓐᓛᑯᓐᓂᒃ ᐋᕿᒃᓱᐃᓗᑎᒃ ᑲᑎᒪᔭᖅᑐᖅᑐᑦ ᐃᓂᒃᓴᕆᓂᐊᖅᑕᖏᓐᓂᒃ ᐊᒻᒪ ᖃᓄᖅ ᓄᓘᔮᖕᓂ ᒥᑦᑎᑕᒪᓕᖕᒧᐊᖃᑦᑕᕐᓂᐊᕐᓂᖏᓐᓂᒃ ᓄᕕᐱᕆ 8 ᐊᒻᒪ 9-ᒥ ᑲᑎᒪᔭᖅᑐᕆᐊᑎᓪᓗᒋᑦ,” ᐊᕙᑎᓕᕆᔨᒃᑯᑦ ᐊᐅᓚᑦᑎᔨᖓ, ᐅᕋᐃᐊᓐ ᐱᐅᕆ, ᐊᒻᒪᓗ ᓄᓇᕗᒥᑦ ᐃᒪᓕᕆᔨᑦ ᑲᑎᒪᔨᖏᓐᓄᑦ ᐊᐅᓚᑦᑎᔨᐅᑲᐃᓐᓇᖅᑐᖅ, ᑭᐅᕋᓐ ᑲᕋᑎᐊᓐ, ᐅᖃᓚᐅᕐᑐᑦ ᑎᑎᖃᑎᒍᑦ.
ᑖᓐᓇ ᓄᑖᖅ ᐋᕿᒃᑕᐅᔪᒪᔪᖅ ᐱᕕᖃᕈᑎᐅᔪᖅ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑭᖑᓪᓕᖅᐹᒥᑦ ᐅᓂᒃᑳᓕᐅᕈᓐᓇᕐᓗᑎᒃ ᒐᕙᒪᑐᖃᒃᑯᓐᓄᑦ ᑎᓯᐱᕆ 24 ᑐᖔᓂᒃ, ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐅᖃᓚᐅᕐᑐᑦ.
ᑭᓯᐊᓂᓕ ᓄᑖᖅ ᐋᕿᒃᓱᖅᑕᐅᔪᖅ ᐱᐊᓂᒃᑕᐅᕌᓂᙱᑦᑐᖅ—ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᒻᒪ ᓄᓇᕗᒥᑦ ᐃᒪᓕᕆᔨᒃᑯᑦ ᑲᑎᒪᔨᖏᑦ ᐅᑕᕿᓕᕐᒪᑕ ᒐᕙᒪᑐᖃᒃᑯᓐᓂ ᑐᓴᖅᑎᑕᐅᓂᐊᕐᒪᑕ ᐋᑐᕚ ᐊᑭᓕᕋᔭᕆᐊᒃᓴᖓᓂᒃ ᐊᑭᓕᐅᑎᒃᓴᐅᓇᔭᖅᑐᓂᒃ ᓄᑖᒥ ᑲᑎᒪᓂᒃᓴᐅᓂᐊᖅᑐᒥᑦ.
“ᐊᑐᐃᓐᓇᐅᔪᑦ ᑐᔪᕐᒥᕕᒃ ᐊᒻᒪ ᑲᑎᒪᕝᕕᐅᕙᒃᑐᑦ ᐃᓂᒃᓴᓕᐅᕐᑕᐅᕌᓂᒃᑎᓪᓗᒋᑦ, ᐃᑲᔫᑎᒃᓴᑦ ᐊᖏᖅᑕᐅᓯᒪᔪᑦ ᒐᕙᒪᑐᖃᒃᑯᓐᓄᑦ-ᓄᓇᖃᖅᑳᖅᑐᓄᓪᓗ ᐱᓕᕆᖃᑎᒌᖕᓂᖅ ᐊᒻᒪ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ (CIRNAC) ᐋᕿᒋᐊᖅᓯᒍᑎᒃᓴᑦ ᐱᔭᐅᔭᕆᐊᖃᕐᒪᑕ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᑐᒃᓯᕋᐅᑎᒋᔭᐅᓂᐊᖅᖢᑎᒃ ᐊᔪᕈᓐᓃᑐᐊᕈᑎᒃ,” ᓄᓇᕗᒥᑦ ᐊᕙᑎᓕᕆᔨᒃᑯᑦ ᐊᒻᒪ ᓄᓇᕗᒥᑦ ᐃᒪᓕᕆᔨᒃᑯᑦ ᑲᑎᒪᔨᖏᓐᓂᒃ ᑎᑎᖃᑦ ᐅᖃᕐᓯᒪᔪᑦ.
ᐱᓕᕆᓂᖅ 2-ᒥ ᑐᒃᓯᕋᐅᑎᓂᒃ, ᐹᕕᓐᓛᓐᑯᑦ ᓴᓇᔪᒪᖕᒪᑕ 110 ᑭᓛᒥᑕᓂ ᑕᑭᓂᓕᖕᒥᑦ ᓄᓇᓯᐅᑎᑯᑖᒧᑦ ᐊᖅᑯᑎᐅᓇᔭᖅᑐᒥᒃ ᓄᓘᔮᑦ ᑭᙳᐊᓂᑦ ᓅᓘᔭᖕᓄᑦ, ᒫᓐᓇ ᐅᓯᔭᐅᕙᒃᑐᒥᑦ ᒪᕐᕈᐃᕐᓗᒍ ᐊᖏᒡᓕᒋᐊᖅᑎᑦᑎᓗᑎᒃ ᑎᑭᓪᓗᒍ 12 ᒥᓕᐊᓐ ᑕᓐᔅ ᐊᕐᕌᒍᒥ ᐊᒻᒪ ᐅᓯᑲᖅᑕᕐᓂᕆᕙᒃᑕᖓᑦ ᐅᖓᕙᕆᐊᖅᑕᐅᓗᒥ ᔪᓚᐃ 1-ᒥᑦ ᓄᕕᐱᕆ 15-ᒧᑦ 175 ᐅᒥᐊᕐᔪᐊᑦ ᐊᖏᔪᓂᒃ ᓴᕕᕋᔭᒃᓴᓂᒃ ᐅᓯᑲᖅᑕᖅᐸᒃᑐᑦ ᐅᓯᔪᐃᓐᓇᐅᔪᓐᓇᖁᓪᓗᒋᑦ.
ᓄᓇᓯᐅᑎᑯᑖᒧᑦ ᐊᖅᑯᑎ ᐅᐊᖕᓇᖓᓄᖓᐅᔪᖅ ᓄᓘᔮᑦ ᐊᑐᕈᑎᐅᓇᔭᖅᑐᒃᓴᐅᔪᖅ ᑕᓪᓕᒪᓂᒃ ᐊᐅᓚᐅᑎᓕᖕᓂ ᐊᒻᒪ 200-ᓂ ᐅᓂᐊᖅᑕᐅᔪᓂᒃ. ᓴᓇᔭᐅᓂᖓ ᐊᒥᓱᓂᒃ ᐃᓗᑦᑐᕐᓯᒪᔪᓂᒃ ᐱᑕᖃᕆᐊᖃᕋᔭᕐᓇᖅᑐᖅ ᐊᒻᒪᓗ ᒫᓂ 12.7 ᒥᓕᐊᓐ ᑭᐅᐱᒃ ᒦᑕᔅᓂᒃ ᐅᔭᕋᖕᓂᒃ.
ᑲᒻᐸᓂᐅᔪᖅ ᐱᓕᕆᐊᒧᑦ ᐱᔪᓐᓇᐅᑎᑖᕌᓂᒃᓯᒪᔪᖅ, ᐱᔭᐅᓂᑯ 2012-ᒥᑦ, ᐱᕕᖃᖅᑎᑦᑎᓪᓗᓂ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥᑦ ᓂᒋᐊᓄᙵᐅᔪᒥᑦ ᓯᑏᓐᔅᐱ ᐃᓐᓚᑦᒧᑦ.
ᑕᒪᓐᓇ ᑐᑭᓕᒃ ᖃᖓᒃᑲᓐᓂᐅᓕᕐᐸᑦ, ᐹᕕᓐᓛᓐ ᓴᕕᕋᔭᒃᓴᒥᑦ ᓴᕿᑎᑦᑎᕙᓪᓕᐊᓂᖓ ᓄᓘᔮᖕᓂ ᑎᑭᐅᑎᓛᖅᑐᒃᓴᐅᓂᖓᓂ 30 ᒥᓕᐊᓐ ᑕᓐᔅ ᐊᕐᕌᒍᒧᑦ.
(0) Comments