ᒥᑦᑎᒪᑕᓕᖕᒥ ᑲᑎᒪᔨᕐᔪᐊᖏᑦ ᐅᐱᒍᓱᒃᐳᑦ ᑲᑎᒪᔨᒃᑯᑦ ᐹᕙᓐᓛᓐᑯᓐᓄᑦ ᐊᑐᖁᓇᔭᖅᑕᖏᓐᓂ

For English version, see Pond Inlet politicians applaud board’s Baffinland recommendation

ᒥᑦᑎᒪᑕᓕᒃ ᑮᓇᐅᔾᔭᒃᓴᓂᕐᒧᑦ ᐱᕙᓪᓕᐊᑎᑦᑎᓂᖃᕈᒪᒐᓗᐊᖅᑎᓪᓗᒍ, ᓄᓇᒥ ᐊᒻᒪ ᐆᒪᔪᓂ ᖃᓄᐃᙱᑦᑎᐊᖅᑎᑦᑎᓂᕐᒥ ᓯᕗᓪᓕᖅᐸᐅᓪᓗᓂ ᓯᕗᓪᓕᐅᔾᔭᐅᖁᔭᐅᕗᖅ, ᐅᖃᖅᐳᖅ ᒪᐃᔭ ᔮᓱᐊ ᐋᕆᐊᖅ .

“ᐅᒃᐱᕈᓱᒃᐳᖓ ᐊᑐᓂ ᓄᓇᓕᒃ, ᕼᐋᒻᓚᓕᒫᑦ, ᑕᐅᑐᙳᐊᓲᖑᕗᑦ ᐱᕈᕐᓂᕐᒥ, ᓇᒥᑐᐃᓐᓇᖅ, ᐱᔪᓐᓇᕐᓂᓕᒫᖓᓂ ᓄᓇᓕᖕᓂ ᐱᕚᓪᓕᕈᓐᓇᕐᓂᖓᓂ,” ᐋᕆᐊᖅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᑦ ᐅᕙᓃᓐᓂᐊᖅᐳᑦ, ᑎᑭᑉᐸᓪᓗᑎᒃ ᐊᐅᓪᓚᕐᓗᑎᒡᓗ, ᑭᓯᐊᓂ ᒫᓃᖏᓐᓇᐅᔭᕐᓂᐊᖅᐳᒍᑦ. ᑕᐃᒫᒃ, ᐃᑲᔪᖅᓱᐃᕗᒍᑦ ᐊᕙᑎᑦᑎᓐᓂ, ᐆᒪᔪᖁᑎᑦᑎᓐᓂ, ᐊᖑᓇᓱᓲᕆᒐᑦᑎᒍᑦ ᓂᕿᒃᓴᑦᑎᓐᓂ.”

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑐᓂᓯᓚᐅᖅᐳᑦ ᐊᑐᖁᓇᔭᖅᑕᒥᓂ ᐹᕙᓐᓛᓐᑯᑦ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᖓᓂ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ ᐊᖏᒡᓕᒋᐊᖅᑕᐅᓂᖓᓂ ᒪᐃ 13−ᒥ, ᒪᓕᒃᑐᒥ ᐊᕐᕌᒍᓄᑦ−ᑎᓴᒪᓄᑦ ᐃᓄᓕᒫᓄᑦ ᑐᓵᑎᑕᐅᓂᐅᔪᓂ ᑐᓴᓚᐅᖅᑐᓂ ᑲᒻᐸᓂᒃᑯᓐᓂ ᐃᒻᒥᖕᓂᒃ, ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒻᒥ ᐱᓕᕆᕝᕕᖕᓂ, ᕼᐋᒻᓚᐅᔪᓂ ᐊᒻᒪ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᕐᓂᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ.

ᑲᑎᒪᔨᒃᑯᑦ ᐃᒪᐃᖁᔨᓚᐅᖅᐳᑦ ᐊᖏᙱᓐᓂᖏᓐᓂ ᑲᒻᐸᓂᐅᑉ ᐸᕐᓇᐅᑎᖏᓐᓂ ᓴᓇᓂᕐᒧᑦ 110-ᑭᓛᒥᑐᒥ ᓄᓇᓯᐅᑎᑯᑖᑉ ᐊᖅᑯᑎᖓᓂ ᓄᓘᔭᕐᓂ ᐅᔭᕋᖕᓂᐊᕐᕕᖕᒥ ᕿᙳᐊᓄᑦ, ᖄᒃᑲᓐᓂᐊᒍᑦ ᑐᓚᒃᑕᕐᕕᖕᒥ ᑐᓚᒃᑕᕐᕕᖕᒥ, ᐊᒻᒪᓗ ᒪᕐᕈᐃᓪᓗᐊᖅᑐᒥ ᐊᖏᒡᓕᒋᐊᖅᑎᑦᑎᔪᒥ ᐊᓂᐊᑎᑦᑎᓂᐅᔪᒥ 6−ᓂ 12 ᒥᓕᐊᓐ ᑕᓐᓂ ᓴᕕᕋᔭᒃᓴᒥ ᐊᕐᕌᒍᑕᒫᒥ ᑕᓪᓗᕈᑎᐅᑉ ᐃᒪᖓᒍᑦ ᑕᕆᐅᕐᒥ ᐸᐸᑦᑏᓐᓇᕐᓂᕐᒧᑦ ᐃᓂᐅᔪᒥ.

ᑲᑎᒪᔨᒃᑯᑦ ᐃᓱᒪᓕᐅᕆᓚᐅᖅᐳᑦ ᑐᒃᓯᕋᐅᑕᐅᔪᖅ “ᖃᐅᔨᓴᖅᑕᐅᓂᐅᔪᒥ ᑲᔪᓯᔪᓐᓇᙱᓚᖅ ᐱᓕᕆᓂᐅᔪᒥ ᓴᐳᔾᔨᓯᒪᓂᐊᖅᑐᒥ ᐆᒪᔪᐃᑦ ᓂᖅᑭᐅᕐᕕᖓᑕ ᓱᓕᑦᑎᐊᕈᓐᓇᕐᓂᖓᓂ [ᓄᓇᕗᒻᒥ] ᐊᒻᒪ ᓴᐳᔾᔨᓯᒪᓗᓂ ᐊᒻᒪ ᖁᕝᕙᖅᓴᐃᓗᓂ ᐱᑕᖃᖅᐸᒌᖅᑐᒥ ᐊᒻᒪ ᓯᕗᓂᒃᓴᒧᑦ ᖃᓄᐃᙱᑦᑎᐊᕐᓂᐅᔪᒥ ᓄᓇᖃᖅᑎᐅᔪᓂ.”

ᐅᖃᖅᓯᒪᕗᖅ ᐹᕙᓐᓛᓐᑯᑦ ᐸᕐᓇᐅᑎᖏᑦ ᒥᒃᖠᒋᐊᖅᑎᑦᑎᓂᕐᒥ ᐊᒃᑐᐃᓂᐅᔪᓂ ᐆᒪᔪᓄᑦ, ᓲᕐᓗ ᐊᓪᓚᙳᐊᓂ ᕿᓚᓗᒐᕐᓂ ᐊᒻᒪ ᑐᒃᑐᓂ, ᐊᑑᑎᖃᕋᔭᙱᓐᓂᖓᓂ.

ᐹᕙᓐᓛᓐ ᐅᖃᓚᐅᖅᐳᑦ ᑕᐃᑲᓂᓗᒃᑖᖅ ᑐᓵᓂᐅᔪᓂ ᕿᓚᒻᒥᐅᔪᒥ ᒪᑐᓯᓚᐅᑲᑐᐃᓐᓇᕆᐊᖃᖅᐳᑦ ᐅᔭᕋᖕᓂᐊᕐᕕᖕᒥ ᒐᕙᒪᑐᖃᒃᑯᑦ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᖓ ᑖᓂᐅᓪ ᕚᓐᑎᐅᓪ ᐊᖏᙱᒃᑯᓂ ᐊᖏᒡᓕᒋᐊᖅᑕᐅᓂᖓᓂ.

ᕚᓐᑎᐅᓪ ᑭᖑᓪᓕᖅᐹᖓᓂ ᐃᓱᒪᓕᐊᖓ ᓂᕆᐅᒋᔭᐅᕗᖅ ᖃᖓᒃᑲᓐᓂᖅ ᐊᐅᔭᐅᔪᒥ.

ᐋᕆᐊᖅ ᑕᐃᓯᓚᐅᖅᐳᖅ ᐊᑐᖁᔭᐅᓇᔭᖅᑐᒥ “ᐃᓱᒪᓕᐅᖅᑕᐅᑦᑎᐊᕐᓂᐅᔪᒥ,” ᕼᐋᒻᓚᒃᑯᑦ ᒥᑦᑎᒪᑕᓕᖕᒥ ᓴᖅᑭᑎᑦᑎᓂᖏᓐᓂ ᑎᑎᖅᑲᒥ ᐃᑲᔪᖅᓱᐃᓂᕐᒧᑦ ᐊᖏᒡᓕᒋᐊᖅᑕᐅᓂᖓᓄᑦ ᔭᓄᐊᕆᒥ. ᐹᕙᓐᓛᓐᑯᑦ ᑐᒃᓯᕋᐅᑎᖓ ᐊᖏᖅᑕᐅᙱᑉᐸᑦ, ᐅᖃᓚᐅᖅᐳᖅ, ᐃᓅᓯᕐᒥ ᐃᓄᖕᓄᑦ ᐱᑕᖃᐃᓐᓇᕐᓂᐊᖅᐳᖅ.

“ᖃᓄᐃᓕᐅᕆᐊᖃᕐᓂᐊᖅᐳᒍᑦ ᐱᓕᕆᐊᖑᔭᕆᐊᓕᖕᒥ, ᐹᕙᓐᓛᓐᑕᖃᙱᒃᑯᓂᓘᓐᓃᑦ ᑕᐃᒪᐃᓐᓇᔭᖅᐸᑦ. ᑕᐃᒫᒃ ᐆᒪᓂᐊᖅᐳᒍᑦ, ᓅᔾᔮᙱᑦᑐᒍᑦ,” ᐅᖃᓚᐅᖅᐳᖅ.

ᑐᓄᓂᕐᒥ ᒪᓕᒐᓕᐅᖅᑎ ᑭᐊᕆᓐ ᓄᑕᕋᖅ ᐅᖃᓚᐅᙱᓚᖅ ᖃᓄᖅ ᐃᒃᐱᒍᓱᖕᓂᖓᓂ ᑲᑎᒪᔨᒃᑯᑦ ᐊᑐᖁᓇᔭᖅᑕᖓᓂ, ᑭᓯᐊᓂ ᐅᖃᓚᐅᖅᐳᖅ ᖁᕕᐊᓐᓂᖓᓂ ᓈᓚᓚᐅᕐᓂᖏᓐᓂ ᓄᓇᓕᖓᓐᓂ.

“ᐊᒥᓱᐊᖅᓱᖅᖢᓂ, ᐃᓄᐃᑦ ᑐᓴᖅᑕᐅᔪᓐᓇᙱᓚᑦ. ᓄᓇᕘᑉ ᓂᐱᖓ ᑐᓴᖅᑕᐅᒐᔪᙱᓚᖅ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᐹᕙᓐᓛᓐᑯᑦ ᓱᓕ ᑎᑭᐅᑎᓯᒪᙱᓚᑦ ᐃᓄᖕᓄᑦ ᐃᖅᑲᓇᐃᔮᖃᖅᑎᑦᑎᓂᕐᒥ ᑐᕌᒐᒃᓴᖏᓐᓂ, ᓄᑕᕋᖅ ᖃᐅᔨᒪᕗᖅ ᐃᓄᒃᑐᖃᕐᓂᖓᓂ ᓄᓇᓕᖓᓐᓂ ᐃᖅᑲᓇᐃᔭᖅᑐᓂ ᓄᓘᔭᕐᓂ, ᐃᓚᖃᖅᑐᒥ ᐃᓚᖏᓐᓂ ᐊᖓᔪᖅᑳᖑᔪᓂ ᐃᓂᐅᔪᓂᑦ.

ᐃᓱᒫᓗᒃᐳᖅ ᖃᓄᐃᓐᓇᔭᕐᓂᖓᓂ ᑲᒻᐸᓂ ᒪᑐᓯᓐᓂᕈᓂ ᐅᔭᕋᖕᓂᐊᕐᕕᖕᒥ ᕚᓐᑎᐅᓪ ᐊᖏᙱᒃᑯᓂ ᐊᖏᒡᓕᒋᐊᖅᑕᐅᓂᖓᓂ ᐸᕐᓇᐅᑎᒥᒃ, ᑭᓯᐊᓂ ᐅᖃᐅᓯᖃᓚᐅᖅᐳᖅ “ᑲᑉᐱᐊᓵᕆᓂᐅᔪᒥ’ ᑲᒻᐸᓂᒃᑯᓐᓂ ᐊᕕᑎᑦᑎᓯᒪᓂᖓᓂ ᓄᓇᓕᖕᓂ.

“ᓲᕐᓗ ᐊᓯᐅᔨᕗᒍᑦ ᑐᙵᕕᕆᔭᑦᑎᓐᓂ ᓄᓇᓕᖕᓂ,” ᐅᖃᓚᐅᖅᐳᖅ.

ᓄᑕᕋᖅ ᐅᖃᓚᐅᖅᐳᖅ ᑕᑯᔪᒪᓇᔭᖅᐳᖅ ᑲᒻᐸᓂᒃᑯᓐᓂ ᐊᑐᕐᓂᖅᓴᐅᓂᖏᓐᓂ ᐃᓄᖕᓄᑦ ᐱᖅᑯᓯᑐᖃᖅᑎᒍᑦ ᖃᐅᔨᒪᓂᐅᔪᓂ, ᐅᕝᕙᓘᓐᓃᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ, ᐸᕐᓇᐅᑎᖏᓐᓂ ᐱᓕᕆᐊᒃᓴᒧᑦ ᐊᒻᒪ ᐱᐅᓂᖅᓴᐅᔪᒥ ᒥᒃᖠᒋᐊᖅᑎᑦᑎᓂᐅᔪᓂ ᐊᒃᑐᐃᓂᐅᔪᓂ ᐊᕙᑎᒧᑦ ᓯᕗᓂᐊᓂ ᐊᖏᒡᓕᒋᐊᖅᑕᐅᓂᖓᓂ ᐅᔭᕋᖕᓂᐊᕐᕕᖓᓂ, ᐊᖏᖅᑕᐅᒍᓂ.

ᐊᖏᒡᓕᒋᐊᖅᑕᐅᓂᖓ ᓂᕆᐅᒋᔭᐅᕗᖅ ᓇᒃᓴᕐᓂᖓᓂ 127−ᓂ ᓄᑖᓂ ᐃᖅᑲᓇᐃᔮᒃᓴᓂ ᒥᑦᑎᒪᑕᓕᖕᒧᑦ ᐊᕐᕌᒍᓂ ᐱᖓᓱᓂ, ᐅᖃᓚᐅᖅᐳᖅ ᐹᕙᓐᓛᓐᑯᑦ ᐅᖃᖅᑎᖓ ᐲᑕ ᐊᒃᒪᓐ. ᑕᒪᐃᑎᒍᑦ, ᑲᒻᐸᓂ ᓇᓚᐅᑦᑖᕆᕗᑦ 300−ᓂ ᐃᓄᖕᓂ ᐃᖅᑲᓇᐃᔮᖃᕐᓂᐊᖅᐳᑦ ᑲᑎᓪᓗᒍ 2,100−ᓂ ᐃᖅᑲᓇᐃᔭᖅᑎᓂ.

ᐊᐃᑉᕆᓕᒥ, ᑲᒻᐸᓂ ᑎᑭᐅᑎᓯᒪᕗᖅ 18 ᐳᓴᓐᑎᒧᑦ ᐃᓄᖕᓂ ᐃᖅᑲᓇᐃᔮᖃᖅᑐᓂ. ᑐᕌᒐᒃᓴᖓ, ᐋᔩᖃᑎᒋᔭᐅᔪᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂ, 24 ᐳᓴᓐᑎᒥ, ᐋᒃᒥᓐ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᐹᕙᓐᓛᓐᑯᑦ ᐊᖏᖅᓯᒪᓂᖃᕆᕗᑦ ᐱᕈᖅᓴᐃᓂᕐᒥ $10-ᒥᓕᐊᓐᓂ ᐃᓄᖕᓄᑦ ᐱᓕᒻᒪᒃᓴᕐᕕᖕᒥ ᐊᖏᒡᓕᒋᐊᖅᑕᐅᓂᖅ ᐊᖏᖅᑕᐅᒍᓂ.

ᐋᒃᒥᓐ ᐅᖃᓚᐅᖅᐳᖅ ᑲᒻᐸᓂ ᐃᓚᓕᐅᔾᔨᓂᖓᓂ ᐱᖅᑯᓯᑐᖃᖅᑎᒍᑦ ᖃᐅᔨᒪᓂᐅᔪᒥ ᑐᒃᓯᕋᐅᑎᖓᓐᓂ ᐱᓂᒃᑯᑦ ᑐᓴᒐᒃᓴᓂ ᐃᓕᓐᓂᐊᕐᓂᐅᔪᓂ ᖃᓄᖅ ᓄᓇ ᐊᑐᖅᑕᐅᓂᖓᓂ ᐊᒻᒪᓗᑦᑕᐅᖅ ᐊᕙᑎᒥ ᐊᐅᓚᑕᐅᓂᖓᓂ.

“ᐹᕙᓐᓛᓐᑯᑦ ᐃᓕᓴᖅᓯᕗᖅ ᐃᓗᐃᑦᑐᙳᖅᑎᑕᐅᓂᖓᓂ ᐊᑐᕐᓂᖓᓂ [ᐃᓄᐃᑦ ᖃᐅᔨᒪᔭᑐᖃᖏᓐᓂ],” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐅᓄᕐᓂᖅᓴᓂ ᐃᓄᖕᓂ−ᐊᐅᓚᑕᐅᔪᓂ ᓇᐅᑦᑎᖅᓱᕐᓂᕐᒧᑦ ᐊᒻᒪ ᐃᓱᒪᓕᐅᕆᓂᐅᔪᒥ ᐃᓅᓯᓗᒃᑖᖓᓂ ᐅᔭᕋᖕᓂᐊᕐᕕᖕᒥ.

ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᖅᓂᐊᖅᑎᒃᑯᓪᓗ ᑲᑐᔾᔨᖃᑎᒌᒃᑯᓐᓂ ᐃᒃᓯᕙᐅᓴᖓ ᑕᐃᕕᑦ ᖃᒪᓂᖅ ᐊᖏᓚᐅᙱᓚᖅ ᐊᐱᖅᓱᖅᑕᐅᔪᒪᓂᕐᒧᑦ ᑐᒃᓯᕋᕐᓂᐅᔪᒥ.