ᒪᐃᑯᓵᕝ ᐃᓚᓯᕗᖅ ᐃᓄᐃᑦ ᐅᖃᐅᓯᖓᓂᒃ ᑐᑭᓕᐅᕈᑎᒧᑦ ᐃᓕᔭᒃᓴᒧᑦ
ᐃᓄᒃᑐᑦ ᐅᖃᕈᓐᓇᕐᑐᑦ ᐃᑲᔪᕐᐳᑦ ᑕᒻᒪᕐᑕᖅᓯᒪᙱᒃᑲᓗᐊᕆᐊᒃᓴᖓᓂ
ᒪᐃᑯᓵᕝ ᑐᑭᓕᐅᕈᑎ ᐃᓕᔭᒃᓴᖅ ᑐᑭᓕᐅᕆᔪᓐᓇᕐᓯᔪᖅ 70 ᐅᖃᐅᓰᑦ ᐅᖓᑖᓂᒃ ᐃᓄᒃᑐᑦ ᑎᑎᕋᕐᓯᒪᔪᓂᒃ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Microsoft adds Inuit language to translation app
ᐃᓄᐃᑦ ᐅᖃᐅᓯᖓ ᐊᑐᒐᒃᓴᐅᓂᕐᓴᐅᓕᕐᐳᖅ
ᒪᐃᑯᓵᕝ (Microsoft) ᑐᓴᖅᑎᑦᑎᓚᐅᕐᑐᑦ ᐅᓇ ᐱᖁᑎᖓᑦ ᒪᐃᑯᓵᕝ ᑐᑭᓕᐅᕈᑎ ᐃᓕᔭᒃᓴᖅ ᐃᑲᔪᕈᓐᓇᕐᓯᓂᖓᓂᒃ ᐃᓄᒃᑐᑦ. ᑕᐃᒪᓕ ᑖᔅᓱᒥᖓ ᐃᓕᔭᒃᓴᒥᑦ ᐊᑐᕐᓗᓂ ᑐᑭᓕᐅᕆᔪᓐᓇᕐᓯᓂᐊᕐᑐᖅ 70 ᐅᖓᑖᓂᒃ ᐅᖃᐅᓯᕐᓂᒃ ᐃᓄᒃᑎᑐᑦ ᑐᑭᓕᐅᕆᓗᓂ ᐅᕝᕙᓘᓐᓃᑦ ᐃᓄᒃᑎᑐᑦ ᐅᖃᐅᓯᕐᓄᑦ ᑐᑭᓕᐅᕐᑕᐅᓗᑎᒃ.
“ᖃᓄᐃᑦᑐᑐᐃᓐᓇᐃᑦ ᐱᓕᕆᔾᔪᑎ ᐅᖃᐅᓯᕐᒥ ᐊᑐᕈᑎᒃᓴᐃᑦ ᐊᒻᒪ ᐃᓕᓐᓂᐊᕈᑎᒃᓴᑦ, ᐱᓗᐊᕐᑐᒥ ᐃᓄᒃᑎᑐᑦ ᑎᑎᕋᕐᓯᒪᔪᑦ, ᑐᙵᓱᒃᑎᑕᐅᖏᓐᓇᐅᔭᕐᑐᑦ,” ᑳᓖᓐ ᐋᕆᐊᒃ, ᓄᓇᕗᒥᑦ ᐅᖃᐅᓯᕐᓄᑦ ᑲᒥᓯᓇ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
ᐋᕆᐊᒃ ᑖᔅᓱᒥᖓ ᐃᓕᔭᒃᓴᒥ ᐃᓱᒪᔪᖅ ᐱᒋᐊᕈᑎᑦᑎᐊᕙᐅᓂᖓᓂᒃ ᒐᕙᒪᐅᔪᓄᑦ, ᓄᓇᕗᒥᑦ ᐅᐸᒃᓯᒪᕝᕕᖕᓄᑦ, ᕼᐋᒻᒪᓚᓄᑦ ᐊᒻᒪ ᓇᖕᒥᓂᖃᖅᑐᓄᑦ ᒪᓕᒋᐊᖃᕐᓂᖏᓐᓄᑦ ᓄᓇᕗᒥᑦ ᐅᖃᐅᓯᓕᕆᓂᐅᑉ ᐱᖁᔭᖓᓂᒃ.
ᓄᓇᕗᒥᑦ ᒐᕙᒪᒃᑯ ᐱᓕᕆᖃᑎᖃᕐᓯᒪᔪᑦ ᒪᐃᑯᓵᕝᑯᓐᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ ᖃᕋᓴᐅᔭᓄᑦ ᐃᓚᒃᓴᓂᒃ, ᑖᒃᑯᓂᖓ ᑐᓂᓯᑲᑕᒃᖢᑎᒃ ᐊᑐᕋᔭᕐᑐᓂᒃ ᐅᖃᐅᓯᕐᓂ ᑲᑎᑕᐅᓯᒪᔪᓂᒃ. ᐃᓄᒃᑐᑦ ᐅᖃᕈᓐᓇᕐᑐᑦ ᐃᑲᔪᕈᒪᓯᒪᓚᐅᕐᑐᑦ ᑕᒪᒃᑯᐊ ᑐᑭᓕᐅᕆᔭᐅᓯᒪᔪᓂᒃ ᑕᒻᒪᕐᓯᒪᙱᒃᑲᓗᐊᕆᐊᒃᓴᖏᓐᓂᒃ ᖃᐅᔨᓴᑲᑕᒃᑐᓂᒃ.
“ᐱᒃᑯᓕᒻᒪᕆᒃᑐᒍᑦ ᐱᓕᕆᖃᑎᖃᕈᓐᓇᕋᑦᑕ ᓄᓇᕗᒥᑦ ᒐᕙᒪᒃᑯᓐᓂᒃ ᐊᒻᒪ ᐊᔪᕈᓐᓃᕐᐹᓪᓕᖅᖢᑕ ᐃᓄᒃᑐᑦ ᐅᖃᕈᓐᓇᕐᓂᕐᒥᒃ,” ᐅᖃᖅᑐᖅ ᑭᐊᕕᓐ ᐲᔅᑲ, ᐊᖓᔪᖅᑳᖅ ᒪᐃᑯᓵᕝ ᑲᓇᑕᒥ, ᑐᓴᒐᒃᓴᓕᐅᖅᑎᓪᓗᒋᑦ.
“ᐅᒃᐱᕈᓱᒃᑲᑦᑕ ᒪᑯᐊ ᐱᓕᕆᔾᔪᑎᐅᔪᑦ ᐃᑲᔪᕈᓐᓇᕐᓂᖏᓐᓂᒃ ᓴᐳᑎᓯᒪᓂᕐᒥᒃ ᐃᓕᖅᑯᓯᑐᖃᑦᑎᓐᓂᒃ ᐊᒻᒪ ᐅᖃᐅᓯᕐᒥ ᐊᓯᐅᑎᑦᑎᑦᑕᐃᓕᓂᕐᒧᑦ.”
ᐊᒻᒪᓗ ᐃᓚᒋᔭᐅᓪᓗᓂ ᒪᐃᑯᓵᕝᑯᑦ ᑐᑭᓕᐅᕈᑎᖓᓄᑦ ᐃᓕᔭᒃᓴᒧᑦ, ᐃᓄᒃᑎᑐᑦ ᐊᑐᐃᓐᓇᐅᓕᕐᒥᔪᖅ ᐱᖁᑎᖓᒍ ᐅᕘᓇ Microsoft Office software (ᒪᐃᑯᓵᕝ ᐋᕕᔅ ᐃᓚᒃᓴᖏᓐᓂ), ᐊᒻᒪᓗ ᑐᑭᓕᐅᕈᑎᒃᑯᑦ ᐅᑯᓄᙵᑦ Bing (ᐱᖕ).
ᐃᓄᒃᑎᑐᑦ ᐃᓚᔭᐅᓚᐅᕐᒥᔪᖅ ᒪᐃᑯᓵᕝᑯᑦ ᐱᖁᑎᖓᓄᑦ Azure Cognitive Services Translator (ᐊᔫ ᑲᒡᓂᑎᕝ ᐱᔨᑦᑎᕋᐅᑎᑦ ᑐᑭᓕᐅᕈᑎᖓ) ᐊᒻᒪᓗ ᐆᒧᖓ Azure Cognitive Services Speech (ᐊᔫ ᑲᒡᓂᑎᕝ ᐱᔨᑦᑎᕋᐅᑎᑦ ᐅᖃᕈᓐᓇᕈᑎᓄᑦ), ᑕᐃᒪᓐᓇᓗ ᑖᓐᓇ ᑐᑭᓕᐅᕈᑎ ᐊᓯᖏᓐᓄᑦ ᐃᓕᔭᒃᓴᓄᑦ ᒪᓂᒪᑎᑕᐅᓂᐊᖅᖢᓂ, ᐱᓕᕆᔾᔪᑎᓄᑦ ᐊᒻᒪ ᖃᕋᓴᐅᔭᒃᑯᑦ ᓴᖅᑭᔮᒐᓄᑦ.
“ᐊᕐᕌᒍᒐᓴᒻᒪᕆᐊᓗᖕᓂ ᑕᐅᓴᑲᓪᓚᖕᓂ, ᐃᓄᐃᑦ ᐅᖃᓪᓚᖃᑦᑕᕐᓯᒪᖕᒪᑕ ᐃᓄᒃᑐᑦ ᓄᓇᕐᔪᐊᓕᒫᒥᑦ. ᑲᒪᓇᒻᒪᕆᒃᑐᖅ ᐃᓄᒃᑐᑦ ᓴᙱᑏᓐᓇᕋᑦᑎᒍᑦ ᐊᓯᙳᖅᐸᓪᓕᐊᔪᓂᒃ ᐊᑐᖅᐸᓪᓕᐊᓂᒃᑯᑦ ᐃᓕᖅᑯᓯᑦᑎᒍᑦ,” ᐅᖃᖅᑐᖅ ᒫᒍᕆ ᓇᑲᓱᒃ, ᓄᓇᕗᒥᑦ ᐃᓕᖅᑯᓯᓕᕆᔨᒃᑯᓐᓄᑦ ᒥᓂᔅᑕ ᑐᓴᒐᒃᓴᓕᐅᕐᓂᒃᑯᑦ.
“ᓄᑖᓂᒃ ᐱᓕᕆᔾᔪᑎᓂᒃ ᐊᑐᓕᖃᑦᑕᕈᓐᓇᕐᓂᕗᑦ ᓇᓗᓇᙱᓚᖅ ᐱᓇᓱᐃᓐᓇᕈᓐᓇᕐᓂᑦᑎᓐᓂᒃ.”
ᔭᓄᐊᕆ 27-ᒥᑦ ᑐᓴᒐᒃᓴᓕᐅᓚᐅᕐᑐᑦ ᓯᕗᓂᑦᑎᐊᖓᓂᒃ ᐃᓄᒃᑐᑦ ᐅᖃᐅᓯᐅᑉ ᑕᖅᑭᖓᓂᒃ, ᐅᕝᕙᓘᓐᓃᑦ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ, ᑖᓐᓇᓗ ᐱᒋᐊᓚᐅᕐᖢᓂ ᕕᕝᕗᐊᕆ 1-ᒥᑦ.
(0) Comments