ᒪᑭᕝᕕᒃ ᐊᑦᑎᖅᓯᕗᖅ ᒪᕐᕉᖕᓂ ᓄᓇᕕᖕᒥ ᐃᓄᖕᓄᑦ ᓇᖕᒥᓂᖅ−ᐃᓱᒪᓕᐅᕆᓂᕐᒥ ᐋᔩᖃᑎᒌᒃᑎᐅᔪᓂ
ᑰᔾᔪᐊᒡᕋᐱᒃ ᒪᐃᔭᖓ ᐋᓐᑐᓂ ᐃᑦᑐᓴᑦ, ᑰᔾᔪᐊᕐᒥ ᒪᐃᔭᐅᓚᐅᖅᑐᖅ ᑐᓄ ᓇᐹᖅᑐᖅ ᑐᕌᖅᑎᑦᑎᓂᐊᖅᐳᑦ ᐅᖃᓪᓚᖕᓂᐅᔪᓂ
ᒪᑭᕝᕕᒃ ᑎᒥᖁᑕᐅᔪᖅ ᐊᑦᑎᖅᓯᒪᕗᑦ ᒪᕐᕉᖕᓂ ᐋᔩᖃᑎᒌᒃᑎᐅᔪᓂ ᑐᕌᖅᑎᑦᑎᓂᕐᒧᑦ ᓄᓇᕕᖕᒥ ᐃᓄᖕᓄᑦ ᓇᖕᒥᓂᖅ−ᐃᓱᒪᓕᐅᕆᓂᕐᒥ ᐅᖃᓪᓚᖕᓂᐅᔪᓂ ᑯᐸᐃᖕᒥ ᐊᒻᒪ ᑲᓇᑕᒥ. (ᑎᑎᖅᑲᖁᑕᐅᔪᒥ ᐊᔾᔨᖁᑎᖓ ᔨᐊᕝ ᐱᓚᑦᑎᐊᐃᒧᑦ)
For English version, see Makivvik names two Nunavik Inuit self-determination negotiators
ᒪᑭᕝᕕᒃ ᑎᒥᖁᑕᐅᔪᖅ ᐊᑦᑎᖅᓯᒪᕗᑦ ᒪᕐᕉᖕᓂ ᐋᔩᖃᑎᒌᒃᑎᐅᔪᓂ ᑐᕌᖅᑎᑦᑎᓂᕐᒧᑦ ᓇᖕᒥᓂᖅ−ᐃᓱᒪᓕᐅᕆᓂᕐᒥ ᐅᖃᓪᓚᖕᓂᐅᔪᓂ ᑭᒡᒐᖅᑐᐃᓗᑎᒃ ᓄᓇᕕᖕᒥ ᐃᓄᖕᓂ ᑲᓇᑕᒥ ᒐᕙᒪᐅᔪᓂ ᐊᒻᒪ ᑯᐸᐃᖕᒥ.
ᑐᓴᒐᒃᓴᓕᐊᖑᔪᒥ ᕕᕗᐊᕆ 24−ᒥ, ᑎᒥᖁᑕᐅᔪᑦ ᐅᖃᐅᓯᖃᓚᐅᖅᐳᑦ ᓄᓇᓕᖕᓂ ᓯᕗᓕᐅᖅᑎᐅᔪᓂ ᐋᓐᑐᓂ ᐃᑦᑐᓴᑦ ᐊᒻᒪ ᑐᓄ ᓇᐹᖅᑐᖅ ᐃᓐᓄᒃᓯᓂᐊᖅᐳᑦ ᐃᓂᐅᔪᓂ ᐅᓂᒃᑳᕆᔭᐅᓚᐅᖅᑎᓪᓗᒍ “ᐱᕐᔪᐊᖑᔪᒥ” ᐊᐱᖅᓱᖅᑕᐅᓂᕐᒥ ᐱᓕᕆᓂᐅᔪᒥ.
ᐃᑦᑐᓴᑦ ᒫᓐᓇᐅᔪᒥ ᒪᐃᔭᐅᕗᖅ ᑰᔾᔪᐊᕌᐱᖕᒥ. ᓯᕗᓂᐊᓂ, ᐱᔨᑦᑎᕋᓚᐅᖅᐳᖅ ᒪᑭᕝᕕᒃᑯᑦ ᐃᓱᒻᒥᖅᑐᐃᔨᐅᔪᓂ ᑮᓇᐅᔭᓕᕆᔨᐅᓪᓗᓂ.
ᓇᐹᖅᑐᖅ ᒪᐃᔭᐅᓚᐅᖅᐳᖅ ᑰᔾᔪᐊᕐᒥ ᐊᕐᕌᒍᓄᑦ 6−ᓄᑦ ᐊᒻᒪ ᒫᓐᓇᐅᔪᒥ ᐱᔨᑦᑎᕋᖅᐳᖅ ᑲᑎᒪᔨᐅᔪᒥ ᓇᒡᓕᒍᓱᖕᓂᐅᔪᒥ ᐊᒻᒪ ᐃᓚᒋᐊᕈᑕᐅᔪᓂ ᐱᔨᑦᑎᕋᕐᓂᐅᔪᒥ ᑲᑎᕕᒃ ᐃᓕᓴᕐᓂᓕᕆᓂᖅ ᐃᓕᓐᓂᐊᕐᕕᖕᒥ ᑲᑎᒪᔨᐅᔪᓄᑦ, ᓇᐹᖅᑐᖅ ᐱᓇᓱᐊᓚᐅᖅᐳᖅ ᓕᐳᕈᒃᑯᓐᓄᑦ ᓂᕈᐊᒐᒃᓴᐅᔪᓂ ᐅᖓᕙ ᓂᕈᐊᖅᑕᐅᔪᒃᓴᓄᑦ 2022−ᒥ ᑯᐸᐃᖕᒥ ᓂᕈᐊᕐᓂᐅᔪᒥ, ᐱᖓᔪᒋᔭᐅᓪᓗᓂ.
“ᒪᑭᕝᕕᒃ ᖁᕕᐊᑉᐳᑦ ᓂᕈᐊᖅᓯᓯᒪᓂᖏᓐᓂ ᒪᕐᕉᖕᓂ ᑲᒪᓇᖅᑐᓂ ᓯᕗᓕᐊᖅᑎᐅᔪᓂ ᑲᑎᙵᓂᐅᔪᒥ ᐃᓕᓯᒪᓂᖏᓐᓂ ᐊᒻᒪ ᐋᔩᖃᑎᒌᖕᓂᐅᔪᒥ ᐊᑐᕐᓂᑯᖏᓐᓂ ᐱᕚᓪᓕᕈᑎᖃᑐᐃᓐᓇᕈᓐᓇᕐᓂᖏᓐᓂ ᐊᒃᓱᕈᕐᓂᑦᑎᓐᓂ,” ᐅᖃᓚᐅᖅᐳᖅ ᒪᑭᕝᕕᒃᑯᑦ ᐊᖓᒧᖅᑳᖓ ᐲᑕ ᐋᑕᒥ ᑐᓴᒐᒃᓴᓕᐊᖑᔪᒥ.
“ᐅᒃᐱᕈᓱᑦᑎᐊᖅᐳᖓ ᖃᐅᔨᒪᓂᕐᔪᐊᖏᑦ, ᑐᕌᖓᓂᖃᕐᓂᖏᑦ, ᐊᒻᒪ ᐊᓕᐊᓇᐃᒋᔭᖃᕐᓂᖏᓐᓂ ᐃᓄᖕᓄᑦ ᐱᔪᓐᓇᕐᓂᐅᔪᓄᑦ ᐅᕙᑦᑎᓐᓂ ᐃᑲᔪᕐᓂᐊᕐᓂᖏᓐᓂ ᑎᑭᐅᑎᓂᕐᒥ ᑐᑭᖃᑦᑎᐊᖅᑐᒥ ᐃᖏᕐᕋᓂᐅᔪᒥ ᐱᓇᓱᐊᕐᓂᑦᑎᓐᓂ ᓇᖕᒥᓂᖅ−ᐃᓱᒪᓕᐅᕆᓂᕐᒥ.”
ᓄᑖᖑᔪᒥ ᓇᖕᒥᓂᖅ−ᐃᓱᒪᓕᐅᕆᓂᕐᒥ ᐊᖏᕈᑕᐅᔪᒥ ᓄᓇᕕᖕᒧᑦ ᒪᑭᕝᕕᒃᑯᑦ ᐱᓕᕆᐊᒃᓴᓃᓯᒪᕗᖅ ᖃᔅᓯᒐᓚᖕᓄᑦ ᐊᕐᕌᒍᓄᑦ.
2019−ᒥ, ᑕᐃᔅᓱᒪᓂ ᐊᖓᒧᖅᑳᖑᓚᐅᖅᑐᖅ ᓵᓕ ᐅᐊᑦ ᐊᒻᒪ ᑕᐃᖦᓱᒪᓂ ᒥᓂᔅᑕᐅᓚᐅᖅᑐᖅ ᑯᐃᓐᒧᑦ−ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᒥ ᑳᓚᐃᓐ ᐸᓂᑦ ᐊᑎᓕᐅᕆᓚᐅᖅᓯᒪᕗᑦ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᕈᒻᒥ ᓴᖅᑭᑎᑦᑎᓂᕐᒧᑦ ᐋᖅᑭᒃᑕᐅᓯᒪᓂᖓᓂ ᓯᕗᓂᒃᓴᒧᑦ ᓇᖕᒥᓂᖅ−ᒐᕙᒪᖃᕐᓂᕐᒥ ᐋᔩᖃᑎᒌᖕᓂᐅᔪᒥ.
ᐅᑎᖅᓯᒪᓚᐅᑲᖕᓂᖓᓂ ᓄᓇᕕᖕᒧᑦ ᒪᐃᖑᓚᐅᖅᑐᒥ, ᑭᖕ ᑭᒡᒐᖅᑐᐃᔨᖓ ᒥᐊᕆ ᓴᐃᒪᒻ ᐅᖃᐅᔾᔨᓚᐅᖅᐳᖅ ᐋᑕᒥᒥ ᐊᔭᐅᕆᓚᐅᕐᓂᖓᓂ ᑯᐸᐃᖕᒥ ᓯᕗᓕᖅᑎᖓᓂ ᔪᕌᓐᓱᐊ ᓚᒑᓪᒥ ᑎᒃᑯᐊᖅᓯᓂᖓᓐᓂ ᐋᔩᖃᑎᒌᒃᑎᐅᔪᒥ ᓇᖕᒥᓂᖅ−ᐃᓱᒪᓕᐅᕆᓂᕐᒥ ᐅᖃᓪᓚᖕᓂᐅᔪᓄᑦ.
“ᑐᕌᖅᑕᐅᓇᓱᐊᖅᑐᑦ ᐋᔩᖃᑎᒌᖕᓂᕐᒥ ᓇᖕᒥᓂᖅ−ᐃᓱᒪᓕᐅᕆᓂᕐᒥ ᐅᕝᕙᓘᓐᓃᑦ ᓇᖕᒥᓂᖅ−ᒐᕙᒪᖃᕐᓂᕐᒥ ᐊᖏᕈᑕᐅᔪᓂ ᐅᓪ, ᐃᓱᒪᕗᖓ, ᑕᒪᒃᑭᑦ ᐃᓚᖏᓐᓂ ᑲᓇᑕᒥ, ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓂ, ᐅᑎᖅᑎᕆᓂᕐᒥ ᐱᔪᓐᓇᕐᓂᐅᔪᒥ ᐱᓯᒪᓚᐅᖅᑕᑦᑎᓐᓂ ᓯᕗᓂᐊᓂ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ,” ᓴᐃᒪᓐ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐊᐱᖅᓱᖅᑕᐅᓂᐅᔪᒥ ᑰᔾᔪᐊᕐᒥ ᑕᐃᔅᓱᒪᓂ.
ᐊᑦᑎᖅᑕᐅᓚᐅᖅᑳᕋᓂ ᑯᐃᓐᒧᑦ ᑭᒡᒐᖅᑐᐃᔨᖓᓄᑦ, ᓴᐃᒪᓐ ᐱᔨᑦᑎᕋᓚᐅᖅᐳᖅ ᑐᕌᖅᑎᑦᑎᔨᐅᓪᓗᓂ ᐋᔩᖃᑎᒌᒃᑎᐅᓂᕐᒥ ᓄᓇᕕᖕᒧᑦ.
ᑲᑎᒪᓂᐅᔪᒥ ᐅᑯᓇᓂ ᑯᐸᐃᖕᒥ ᐊᒻᒪ ᓄᓇᕕᖕᒥ ᐱᓕᕆᔨᕐᔪᐊᖑᔪᓂ ᐱᓕᕆᐊᖑᓂᐊᖅᐳᖅ ᖃᖓᒃᑲᓐᓂᖅ ᐊᕐᕌᒎᔪᒥ, ᐄᐊᓐ ᓚᕗᕆᓂᐅᕐ, ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᒥᓂᔅᑕᖓ ᑲᒪᒋᔭᖃᖅᑐᒥ ᐊᓪᓚᓄᑦ ᐊᒻᒪ ᐃᓄᖕᓄᑦ ᐱᓕᕆᓂᐅᔪᓂ, ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᔭᓄᐊᕆᒥ.
ᐊᐱᖅᓱᖅᑕᐅᓂᐅᔪᒥ ᕕᕗᐊᕆ 24−ᒥ, ᓇᐹᖅᑐᖅ ᐅᖃᓚᐅᖅᐳᖅ ᖁᕕᐊᓐᓂᖓᓂ ᐱᓕᕆᓂᐊᕐᓂᖓᓂ ᐊᒃᓱᕈᕐᓇᕐᓂᐅᔪᒥ ᑐᕌᖅᑎᑦᑎᓂᕐᒥ ᓇᖕᒥᓂᖅ−ᐃᓱᒪᓕᐅᕆᓂᕐᒥ ᐋᔩᖃᑎᒌᖕᓂᐅᔪᒥ ᓴᓂᓕᐊᓂ ᐃᑦᑐᓴᑦᒥ.
ᐊᐱᖅᓱᖅᑕᐅᓂᖃᓚᐅᖅᑎᓪᓗᒍ ᐃᓂᒃᓴᐅᔪᒧᑦ ᔭᓄᐊᕆᒥ, ᓇᐹᖅᑐᖅ ᐅᖃᓚᐅᖅᐳᖅ ᕿᓄᐃᓵᖅᖢᓂ ᐅᑕᖅᑭᓚᐅᖅᐳᖅ ᖃᐅᔨᓂᐊᕐᓂᕐᒥ ᓂᕈᐊᖅᑕᐅᓚᐅᕐᒪᖔᑦ. ᐃᓕᑦᑎᑕᐃᓐᓇᓚᐅᖅᖢᓂ ᐅᓪᓗᕈᒻᒥᓴᒐᓚᖕᒥ ᕕᕗᐊᕆ 24−ᒥ, ᓱᓕ ᐅᖃᐅᓯᒃᓴᓂ ᕿᓂᖅᐳᖅ ᐅᓂᒃᑳᕆᓂᕐᒥ ᖃᓄᖅ ᑐᑭᖃᕐᓂᖓᓂ.
“ᐃᕐᙳᑕᖃᓕᖅᐳᖓ ᒫᓐᓇ, ᒫᓐᓇᕋᑖᖅ 50−ᖑᓚᐅᖅᐳᖓ, ᐊᒻᒪ ᑕᑯᓯᒪᕗᖓ ᐊᓯᔾᔨᕐᓂᐅᔪᓂ ᐊᒻᒪ ᑕᑯᓯᒪᕗᖓ ᐃᓂᐅᔪᓂ ᐱᐅᓯᒋᐊᖅᑕᐅᔭᕆᐊᓕᖕᓂ ᐃᓅᖃᑎᒌᓐᓄᑦ ᓄᓇᕕᖕᒥ,” ᓇᐹᖅᑐᖅ ᐅᖃᓚᐅᖅᐳᖅ.
“ᐃᓚᒋᔭᐅᖃᑕᐅᓂᕐᒥ ᐱᓕᕆᓂᐅᔪᒥ ᐃᑲᔪᕈᓐᓇᖅᑐᒥ ᓴᖅᑭᑎᑦᑎᓂᕐᒥ ᓇᖕᒥᓂᖅ−ᒐᕙᒪᖃᕐᓂᕐᒥ ᐃᓄᖕᓄᑦ ᓄᓇᕕᖕᒥ, ᐱᔾᔪᑎᖃᓪᓗᐊᑕᖅᐳᖅ ᓯᕗᓂᒃᓴᑦᑎᓐᓂ, ᕿᑐᕐᙵᑦᑎᓐᓂ, ᐃᕐᙳᑕᑦᑎᓐᓂ ᐊᒻᒪ ᐅᖓᑖᓄᑦ.”
ᐊᒥᓱᓂ ᐊᒃᓱᕈᕐᓇᖅᑐᓂ ᓯᕗᓂᑦᑎᓐᓃᖅᐳᑦ, ᓇᐹᖅᑐᖅ ᐅᖃᓚᐅᖅᐳᖅ, ᑭᓯᐊᓂ ᖁᕕᐊᑉᐳᖅ ᐱᓕᕆᖃᑎᖃᕐᓂᐊᕐᓂᖓᓂ ᐅᖃᐅᔾᔨᔨᐅᔪᓂ ᐊᒻᒪ ᑲᑐᔾᔨᖃᑎᒌᖑᔪᓂ ᐱᕙᒃᑐᓂ ᐱᐅᓂᖅᐹᒥ ᖃᓄᐃᓕᖓᓂᐅᔪᒥ ᐱᔪᓐᓇᖅᑐᒥ ᐊᕕᒃᑐᖅᓯᒪᓂᐅᔪᒧᑦ.
“ᐊᔪᕐᓇᙱᑦᑐᑯᓘᓗᓂ ᐱᓕᕆᓂᐅᔾᔮᙱᓚᖅ, ᑭᓯᐊᓂ ᐱᕕᒃᓴᖃᖅᐳᖅ ᐅᖃᓪᓚᖕᓂᐅᔪᒥ ᐊᒻᒪᓗ ᓇᒃᓴᕋᓱᐊᕐᓂᕐᒥ ᐱᔪᒪᓂᐅᔪᓂ ᐃᓄᖕᓂ ᓄᓇᕕᖕᒥ ᐊᒻᒪᓗᑦᑕᐅᖅ ᐊᕕᒃᑐᖅᓯᒪᓂᐅᔪᒥ ᑲᑐᔾᔨᖃᑎᒌᖑᔪᓂ,” ᐅᖃᓚᐅᖅᐳᖅ.
“ᐱᒻᒪᕆᕐᔪᐊᖑᓗᓂ ᐃᓚᒋᔭᐅᓂᐊᖅᐳᖅ ᐱᓕᕆᓂᐅᔪᒥ, ᑐᓂᓯᓂᕐᒥ ᑐᑭᓯᐅᒪᓂᕐᒥ ᐊᒻᒪ ᒪᒥᓴᕐᓂᕐᒥ ᒫᓐᓇᓕᓴᐅᔪᒥ ᐊᑐᕐᓕᑯᑦᑎᓐᓂ ᐊᒻᒪ ᐊᓂᓗᑕ ᑲᑎᙵᓂᐅᓗᑕ ᐃᓄᖕᓂ ᑯᐸᐃᒃ ᐃᓗᐊᓂ, ᑲᓇᑕᐅᑉ ᐃᓗᐊᓂ, ᓇᖏᕐᓗᑕ ᐅᐱᐅᖅᑲᓂᖅᓴᐅᓗᑕ ᑭᓇᐅᓂᑦᑎᓐᓂ.”
ᐃᑦᑐᓴᑦ ᐅᖃᐅᓯᖃᓚᐅᕆᕗᖅ ᐊᔾᔨᐸᓗᐊᓂ ᐅᖃᐅᓯᖃᕐᓂᐅᔪᒥ.
ᐊᐱᖅᓱᖅᑕᐅᓂᐅᔪᒥ, ᐅᖃᓚᐅᖅᐳᖅ ᒪᓕᒃᑐᒥ ᐱᓕᕆᓂᐅᔪᒥ ᒪᑭᕝᕕᒃᑯᑦ ᐃᓱᒻᒥᖅᑐᐃᔨᖏᓐᓄᑦ ᑐᓂᔭᐅᓂᖏᓐᓂ ᐱᓕᕆᐊᒃᓴᕆᔭᖏᓐᓂ.
“ᓲᖃᐃᒻᒪ, ᐃᓱᐊᓂ ᑐᕌᒐᒃᓴᕗᑦ ᐱᓕᕆᑦᑎᐊᕐᓂᐅᔪᒥ, ᓇᖕᒥᓂᖅᓱᕈᓐᓇᕐᓂᑦᑎᓐᓂ, ᐃᓱᒪᓕᐅᖅᑎᐅᓗᑕ ᓇᖕᒥᓂᖅ ᓯᕗᓂᒃᓴᑦᑎᓐᓂ,” ᐃᑦᑐᓴᑦ ᐅᖃᓚᐅᖅᐳᖅ.
“ᐊᖏᔪᒻᒪᕆᐊᓘᓪᓗᓂ ᐊᒃᓱᕈᕈᑕᐅᓂᐊᖅᐳᖅ ᐅᕙᓐᓄᑦ ᑐᓂᔭᐅᔪᒥ, ᐊᒻᒪ ᖁᔭᓕᕐᔪᐊᖅᐳᖓ ᐅᒃᐱᕆᔭᐅᓂᐅᔪᒥ ᑕᑯᒃᓴᐅᑎᑕᐅᓂᐅᔪᒥ ᒪᑭᕝᕕᒃᑯᑦ ᑲᑎᒪᔨᖏᓐᓂ ᐆᒧᖓ ᐊᖏᔪᒻᒪᕆᐊᓗᖕᒥ ᐱᓕᕆᐊᖑᓂᐅᔪᒥ.”
It is an uphill path to the self-government goal, difficult at best; And then there is the required involvement of citizens at large to keep things in good order. We are today not doing so well because there is no effective organization to respond to the wealth that seeks out and exploits weakness in democracy, that cut into our freedom to secure their importance – to gain more wealth and power. Regionally it has not been all that apparent but that could change much sooner than we’d anticipate. When working well the government and us have to be known and understood as operating on our behalf, as ours.