ᒪᓐᑐᕆᐊᒥ ᐊᕐᓇᐃᑦ ᐅᐸᒡᕕᖓ ᑐᓴᖅᑎᑦᑎᕗᑦ ᐸᕐᓇᐅᑎᓂᒃ ᑐᐊᕕᕐᓇᕐᑐᓄᑦ ᐅᓐᓄᒃᑯᑦ ᐅᐸᒡᕕᒃᓴᒥ
ᐃᓄᐃᑦ ᐊᕐᓇᐃᑦ 15 ᐳᓴᓐᑎᒋᔭᐅᔪᑦ ᐅᐸᒃᐸᒃᑐᓂᑦ ᐅᕗᖓ ᐊᕐᓇᓄᑦ ᐅᐸᒡᕕᒃᒧᑦ
ᒧᕇᓇ ᐳᓗ-ᕗᐃᓐᑕᓐ, ᐊᐅᓚᑦᑎᔨ ᐆᒥᖓ ᐊᕐᓇᓄᑦ ᐅᐸᒡᕕᒃ (Chez Doris), ᐊᕐᓇᓄᑦ ᐅᐸᒡᕕᒃ ᐊᒻᒪ ᑳᑎ ᕗᐊᖕ, ᓄᓇᓕᐸᐅᔭᓄᑦ ᑲᑎᒪᔨ ᑭᒡᒐᖅᑐᐃᓪᓗᓂ ᐲᑕ-ᒪᒋᐅ ᓄᓇᓂ ᐊᒻᒪ ᐅᖃᓪᓚᒃᑎᐅᓪᓗᓂ ᒪᓐᑐᕆᐊᒥ ᓄᓇᓕᐸᐅᔭᓄᑦ ᑲᑎᒪᔨᓄᑦ, ᐅᖃᐅᓯᖃᓚᐅᕐᐴᒃ ᐸᕐᓇᐅᑎᓂᒃ ᐆᒧᖓ 22-ᓂ ᐃᒡᓕᖃᕐᓗᓂ ᐊᕐᓇᓄᑦ ᐊᖏᕐᕋᖃᙱᑦᑐᓄᑦ ᒪᓐᑐᕆᐊᑉ ᑕᐅᓐᑕᐅᖓᓂ ᐅᒃᑑᐱᕆ 16-ᖑᑎᓪᓗᒍ ᑐᓴᒐᒃᓴᓕᐅᖅᑎᓪᓗᒋ ᐊᕐᓇᓄᑦ ᐅᐸᒡᕕᒃᒥᑦ. (ᐊᔾᔨᙳᐊᖅ ᒪᓐᑐᕆᐊᑉ ᓄᓇᓕᐸᐅᔭᖓᓂᑦ)
For an English version of this story, see Montreal women’s shelter announces plans for new emergency night shelter
ᓄᓇᖃᖅᑎᐅᔪᑦ ᐃᓱᒪᓕᐊᖓ, ᑐᓴᖅᑎᑦᑎᒍᑎᐅᔪᖅ ᐱᖓᑦᓯᖅ, ᐅᒃᑑᐱᕆ 16-ᖑᑎᓪᓗᒍ, ᐱᕕᖃᕈᑎᐅᓕᕐᓂᐊᖅᑐᖅ ᐋᖅᑭᒃᓱᐃᓂᕐᒥᑦ ᓄᑖᒥ ᐃᒡᓗᒥ ᑖᔅᓱᒪ ᐅᐸᒡᕕᖕᒧᑦ ᐅᖓᓯᓗᐊᖏᑦᑐᒥ, ᑕᐃᒪᓕ ᑖᓐᓇ ᑐᐊᕕᕐᓇᖅᑐᒧᑦ ᐅᓐᓄᒃᑯᑦ ᐊᕐᓇᓄᑦ ᐅᐸᒡᕕᐅᓕᕐᓂᐊᖅᖢᓂ.
ᐊᕐᓇᓄᑦ ᐅᐸᒡᕕᒃ ᒫᓐᓇ ᐅᕙᓃᑦᑐᑦ ᓴᒥᑏ ᐊᑐᕆᐊᒥᓐ, ᐅᖓᓯᓗᐊᙱᖢᓂ ᐋᑦᕗᐊᑐ ᐊᑐᕆᐊᒧᑦ ᐊᒻᒪ ᑲᐳ ᓯᑯᐃᐊᒧᑦ, ᑲᑎᖃᑎᒌᒃᕕᒃ ᐃᓄᖕᓄᑦ ᑕᐅᓐᑕᐅᓐᒥᓐ.
ᐊᕐᓇᓄᑦ ᐅᐸᒡᕕᒃ ᐊᒥᓱᓄᑦ ᐃᓄᖕᓄᑦ ᐊᕐᓇᓄᑦ ᖃᐅᔨᒪᔭᐅᑦᑎᐊᕐᑐᖅ, ᑖᒃᑯᐊᓗ 15 ᐳᓴᓐᑎᒋᔭᐅᓪᓗᑎᒃ ᐅᐸᒡᕕᖕᒧᐊᖅᐸᒃᑐᓂ.
ᐋᖅᑭᒃᑕᐅᓯᒪᓪᓗᓂ ᒪᑐᐃᕐᓂᐊᕐᓂᖓ 2021 ᐅᑭᐅᖓᓂ, ᐅᓇ ᐃᒡᓗ ᑐᐊᕕᕐᓇᖅᑐᓄᑦ ᐅᓐᓄᒃᑯᑦ ᐅᐸᒡᕕᒃᓴᖅ ᓂᐅᕕᕐᑕᐅᓚᐅᕐᓯᒪᔪᖅ ᐃᑲᔫᓯᐊᖅᑖᕈᑎᕕᓂᕐᒥᑦ $1 ᒥᓕᐊᓐᑖᓚᓂ ᒪᓐᑐᕆᐊᒥ ᓇᖕᒥᓂᖅ ᐱᓕᕆᐊᖃᖅᑎᐅᔪᒧᑦ ᐋᓐᑐᕉ ᕼᐋᐳ ᐅᑯᑎᒎᓇ ᔪᐃᔅ ᓄᓇᓖᑦ ᑐᙵᕕᖓᓐᓂ ᒪᓐᑐᕆᐊᒥ.
“ᖁᔭᓐᓇᒦ ᓄᑖᕐᒥ ᐃᒡᓗᖃᓕᕐᑐᒍᑦ, ᐃᓂᖃᖅᑎᑦᑎᔪᓐᓇᕐᓂᐊᓕᕐᑐᒍᑦ 22-ᓂ ᐃᒡᓕᕐᓂ ᐊᕐᓇᓄᑦ ᐊᖏᕐᕋᖃᙱᑦᑐᓄᑦ,” ᐅᖃᖅᑐᖅ ᒧᕇᓇ ᐳᓗ-ᕗᐃᓐᑕᓐ, ᐊᐅᓚᑦᑎᔨᒋᔭᐅᔪᖅ ᓯᐊᔾ ᑰᕆᔅᒥ, ᐅᖃᓚᐅᕐᑐᖅ ᑐᓴᒐᒃᓴᓕᐊᑎᒍᑦ ᖃᓄᐃᓕᐅᕐᓇᖃᓚᐅᕐᑎᓪᓗᒍ ᐊᕐᓇᓄᑦ ᐅᐸᒡᕕᒃᒥ ᐅᐸᒡᕕᒃᒥᓐ.
“ᒫᓐᓇ, ᐊᕐᓇᐃᑦ 25 ᐳᓴᓐᑎᒋᔭᐅᖕᒪᑕ ᐊᖏᕐᕋᖃᙱᑦᑐᓂᒃ ᒪᓐᑐᕆᐊᒥᓐ, ᑭᓯᐊᓂᓕ ᐃᑲᔫᑎᐅᔪᓐᓇᖅᑐᑦ ᐊᕐᓇᓄᑦ ᓈᒻᒪᙱᓗᐊᖃᑦᑕᕐᒪᑕ. ᐅᓇ ᐱᓕᕆᐊᒃᓴᖅ ᓈᒻᒪᑐᒧᑦ ᐱᒋᐊᕈᑎᐅᔪᖅ.”
ᐊᕐᓇᓄᑦ ᐅᐸᒡᕕᒃ, ᐊᕐᓇᓄᑦ ᐅᓪᓗᒃᑯ ᐅᐸᒃᓯᒪᒡᕕᒃ ᐅᕙᓂ 1430 ᓴᒥᑏ ᐊᑐᕆᐊᒥᓐ ᒪᓐᑐᕆᐊᒥ, ᒪᑐᐃᖓᕙᒃᑐᖅ ᖃᐅᑕᒫᓐ ᐱᓇᓱᐊᕈᓯᓕᒫᒥᑦ ᐊᕐᓇᓄᑦ ᐃᑲᔪᖅᑕᐅᔭᕆᐊᓕᖕᓄᑦ. ᐊᒥᓱᑦ ᐃᓅᕙᒃᑐᑦ. (ᐊᔾᔨᙳᐊᖁᑎᒋᔭᐅᔪᖅ)
ᐅᓇ ᑐᓴᕐᓂᖅᑐᖅ ᐅᐸᒡᕕᐅᑉ ᐊᖏᒡᓕᒋᐊᖅᑕᐅᓂᖓ ᑐᓴᕈᑎᐅᓕᓚᐅᕐᑐᖅ ᐱᓇᓱᐊᕈᓯᐅᖏᑦᑐᕐᓘᓐᓃᑦ ᐊᓂᒍᖅᑎᓪᓗᒍ ᐅᓇ ᐃᓄᒃ ᐅᐸᒡᕕᖕᒦᖃᑦᑕᕐᑐᖅ, ᑭᓕᐅᕋ ᐅᒃᑯᐊᑦᓯᐊᔪᐊᒃ, ᓄᓇᑦᓯᐅᕗᒥᐅᑕᐅᓂᑯ, ᐃᓅᔪᓐᓃᓚᐅᕐᑎᓪᓗᒍ ᐅᒃᑑᐱᕆ 11-ᒥ ᐋᓐᓂᐊᕕᐊᓗᖕᒥᓐ. ᐴᓗ-ᕗᐃᓐᑕᓐ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᓇ ᐅᒃᑯᐊᑦᓯᐊᔪᐊᒃ ᐸᓂᖓ ᐃᒻᒦᓃᓚᐅᕐᑎᓪᓗᒍ ᑎᒍᔭᐅᓯᒪᑎᓪᓗᒍ ᐋᓐᓂᐊᕈᔪᐃᓐᓇᓕᓚᐅᕐᓂᖓᓂᒃ.
ᐊᒥᓲᓂᕐᓴᑦ ᐅᐸᒡᕕᖕᒧᐊᖅᐸᒃᑐᑦ ᐃᓄᐃᑦ ᓄᓇᓕᐸᐅᔭᓄᐊᓕᖃᑦᑕᖅᑐᑦ ᐃᒡᓗᑭᒃᓴᕐᓂᕐᒧᑦ ᐊᒻᒪ ᒪᓕᒐᓕᕆᓂᒃᑯᑦ ᓈᒻᒪᙱᓕᐅᕈᑎᓄᑦ, ᐴᓗ-ᕗᐃᓐᑕᓐ ᐅᖃᖅᑐᖅ.
ᐊᒥᓱᑦ ᑕᕝᕗᖓ ᐊᕐᓇᓄᑦ ᐅᐸᒡᕕᒃᒧ ᓯᓂᒋᐊᖅᑐᓚᐅᖃᑦᑕᖅᑐᑦ ᐅᓪᓗᒃᑯᑦ ᑕᕝᕙᓂ 6-ᓂ ᐃᒡᓕᖅᑕᖃᕐᒪᑦ, ᑕᕝᕙᓂ ᐊᒥᓲᙱᑦᑐᓂ ᐃᑲᕐᕋᓂ ᓯᓂᓚᐅᑲᒃᖢᑎᒃ ᐊᒻᒪ ᐅᓐᓄᒃᑯᑦ ᓯᓚᒦᑐᐃᓐᓇᓕᖅᐸᒃᖢᑎᒃ.
ᑕᒪᓐᓇᓕ ᐊᓯᙳᕐᓂᐊᓯᔪᖅ ᐅᓐᓄᒃᑯᑦ ᓯᓂᒡᕕᒃᓴᖅᑕᖃᕐᓂᐊᓕᕐᓂᖓᓂ ᓄᑖᒥᓐ.
ᒫᓐᓇᓕ, ᐊᕐᓇᓄᑦ ᐅᐸᒡᕕᒃ, ᒫᓂ 100-ᖏᓐᓂ ᐊᕐᓇᓂ ᐅᐸᒃᑕᐅᕙᒃᑐᖅ ᖃᐅᑕᒫᑦ, ᐱᔨᑦᑎᕋᐅᑎᖃᖅᖢᑎᒃ ᐊᒻᒪ ᖃᓄᐃᓕᐅᒐᒃᓴᖃᖅᐸᒃᖢᑎᒃ ᐊᕐᓇᓅᖓᔪᓂᒃ ᐱᔭᕆᐊᖃᖅᑕᖏᓐᓄᑦ ᐊᖏᕐᕋᖃᙱᓐᓂᕐᒧᑦ, ᓂᕆᔭᒃᓴᖃᙱᓗᐊᕐᓂᕐᒧᑦ, ᐃᓱᒪᒃᑯᑦ ᐋᓐᓂᐊᖃᕐᓂᕐᒧᑦ ᐊᒻᒪ ᐊᑐᓗᐊᔭᓐᓂᕐᒧᑦ ᐋᖓᔮᕐᓇᖅᑐᓂᒃ.
ᐴᓗ-ᕗᐃᓐᑕᓐ ᐅᖃᓚᐅᕐᑐᑦ ᐃᓄᐃᑦ ᐊᕐᓇᐃᑦ ᖃᔅᓯᐅᓂᖏᑦ ᑕᕝᕗᙵᖅᐸᒃᑐᑦ ᓱᖁᓯᕐᓯᒪᓗᐊᙱᑦᑐ ᑕᐃᒪᙵ 2018-ᒥᑦ.
“ᑭᓯᐊᓂ, ᑕᓯᒪᓕᕐᑐᒍᑦ ᐊᕐᓇᓂ ᐃᓄᖕᓂ ᐃᑲᔪᖅᑕᐅᓂᕐᓴᐅᔭᕆᐊᓕᖕᓂᑦ ᐱᔭᕆᐊᖃᒻᒪᕆᒃᑕᖏᓐᓂᒃ ᒪᑯᓂᖓ ᐊᓐᓄᕌᓂᒃ ᐊᒻᒪ ᐅᕕᓂᖕᓂᐊᕐᕕᒃᓂᑦ,” ᐅᖃᖅᑐᖅ.
ᐅᓇ ᐊᕐᓇᓄᑦ ᐅᓪᓗᒃᑯᑦ ᐅᐸᒃᕕᒃᓴᑐᐊᖑᓪᓗᓂ ᒪᓐᑐᕆᐊᒥ, ᓯᐊᔾ ᑑᕆᔅ ᐊᕐᓇᓄᑦ ᐅᐸᒡᕕᒃ ᒪᑐᐃᖓᖃᑦᑕᓕᖅᑐᖅ ᐅᓪᓗᓂ 7-ᒥ ᐱᓇᓱᐊᕈᓯᕐᒥ 8:30-ᒥ ᐅᓪᓛᒃᑯᑦ 3:00-ᒧᑦ ᐅᓪᓗᒃᑯᑦ.
ᐃᑲᔫᓯᐊᓄᑦ ᐱᓕᕆᐊᖏᓐᓂ ᐊᐅᓚᑦᑎᔪᓐᓇᖃᑦᑕᕐᓂᖏᓐᓄᑦ, ᐊᕐᓇᓄᑦ ᐅᐸᒡᕕᒃ ᓄᖅᑲᖓᓚᐅᕐᓯᒪᔪᖅ ᐱᓇᓱᐊᕈᓯᐅᑉ ᓄᙳᐊᓂᒃ ᐱᔨᑦᑎᕋᐃᕙᙱᖢᑎᒃ ᑕᖅᑭᓂᒃ 6-ᓂ 2014-ᖑᑎᓪᓗᒍ ᑮᓇᐅᔭᖃᙱᓗᐊᒧᑦ.
“ᐃᓱᒪᒐᓗᐊᖅᑐᒍᑦ ᑮᓇᐅᔭᑎᒍᑦ ᐃᑲᔫᑎᑖᕋᔭᕆᐊᒃᓴᑦᑎᓐᓂᒃ ᒪᑭᕕᒃᑯᓐᓂᑦ, ᑭᓯᐊᓂᓕ ᖃᐅᔨᒪᙱᑦᑐᒍᑦ ᑕᒪᑐᒪᓂ ᐱᓂᐊᕋᓗᐊᕆᐊᒃᓴᑦᑎᓐᓂᑦ,” ᐅᖃᖅᑐᖅ ᐴᓗ-ᕗᐃᓐᑕᓐ.
ᐊᕐᓇᓄ ᐅᐸᒡᕕᒃ ᐊᐅᓚᑦᑎᕙᖕᒥᔪᖅ ᐃᓄᖕᓄᑦ ᐃᑲᔫᑎᒃᓴᓕᕆᓂᕐᒥᒃ—ᑭᓯᐊᓂᓕ ᐊᕐᓇᓄᑦ ᐅᐸᒡᕕᒃ ᑮᓇᐅᔭᓂ ᐱᕈᖅᑎᑦᑎᓇᓱᒃᐸᒃᑐᑦ ᑖᔅᓱᒥᖓ ᐱᓕᕆᐊᖃᕈᓐᓇᕐᓂᐊᕐᒪᑕ, ᑕᐃᒪᐃᖃᑦᑕᕐᒪᑕ 70 ᐳᓴᓐᑎᓪᓗᐊᖏᓐᓂᒃ ᐊᐅᓚᑦᑎᔾᔪᑎᒋᕙᒃᑕᖏᓐᓂᒃ ᐅᕙᙵᑦ $1.7 ᒥᓕᐊᓐᑖᓚᓂ ᐊᕐᕌᒍᒧᑦ.
ᑳᑎ ᕗᐊᖕ, ᓄᓇᓕᐸᐅᔭᓄᑦ ᑲᑎᒪᔨ ᐅᑯᓂᖓ ᑭᒡᒐᖅᑐᐃᓪᓗᓂ ᐲᑕ-ᒪᒋᐅᓪ ᓄᓇᖓᓂ ᐊᒻᒪᓗ ᐅᖃᖅᑎᐅᓪᓗᓂ ᒪᓐᑐᕆᐊᒥ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ, ᐅᖃᓚᐅᕐᑐᖅ ᑐᓴᖅᑎᑦᑎᑎᓪᓗᒋᑦ ᓄᑖᒥᑦ ᐅᓐᓄᒃᑯᑦ ᐅᐸᒡᕕᐅᔪᓐᓇᕐᓂᐊᓕᖅᑐᒥ ᐊᒻᒪᓗ ᐊᕐᓇᓂ ᐊᑐᐃᓐᓇᖃᖅᑎᑦᑎᓂᕐᓴᐅᓗᓂ “ᐱᔨᑦᑎᕋᐅᑎᓂᒃ ᒪᓂᒪᑎᑕᐅᔪᓂᒃ ᐃᓄᖕᓂᑦ ᑖᒃᑯᓂᖓ ᖃᓄᐃᖁᔨᙱᑦᑐᓂᒃ ᐊᒻᒪ ᖁᐊᕐᓵᕐᓇᖅᑐᒦᖁᓇᒋᑦ.”
(0) Comments