ᒪᓕᒐᓕᐅᕐᑎ ᐃᒃᐱᖕᓇᖅᑐᐊᓗᖕᒥ ᐃᖃᐅᒪᔾᔪᑎᖃᖅᑐᖅ ᒪᓕᒐᓕᕆᔨᒃᑯᑦ ᐅᑎᕐᓯᒪᓕᖅᑎᓪᓗᒋᑦ

For English version, see MLA offers emotional eulogy to son as legislature returns

ᐃᒃᐱᖕᓇᖅᑐᐊᓗᖕᒥ ᐃᖅᑲᐅᒪᔾᔪᑎᖃᖅᖢᓂ ᐅᓇ ᐃᖃᓗᐃᑦ-ᓯᓈᒧᑦ ᒪᓕᒐᓕᐅᕐᑎ ᔮᓇᑦ ᐱᑦᓯᐅᓛᖅ ᐳᕉᔅᑐ ᐅᖃᐅᓯᖃᓚᐅᕐᑐᖅ ᐃᕐᓂᕆᓚᐅᕐᑕᒥᓂ ᔭᐃᑯ ᕗᐃᐊᓴᓐ ᒍᕆᒡ ᓚᐃᐅᓪ-ᐅᕆᑦᓯᒥ ᒪᓕᒐᓕᕆᕝᕕᒃᒥ ᑲᑎᒪᓂᖅ ᐱᒋᐊᖅᑎᓪᓗᒍ ᓄᓇᕗᒥᑦ ᐱᓇᓱᐊᕈᓯᐅᓚᐅᕐᑐᒥ.

ᓚᐃᐅᓪ-ᐅᕆᑦᓯ ᐃᓅᔪᓐᓃᓚᐅᕐᓯᒪᖕᒪᑦ ᐃᒻᒥᓃᖅᖢᓂ ᒫᔅᓯ 13ᒥ, ᒪᓕᒐᓕᕆᔩᑦ ᑲᑎᒪᓂᖓ ᐃᓱᓕᑦᑎᐊᖅᑎᓪᓗᒋ ᑕᒪᑐᒪᓂ ᐊᕐᕌᒍᒥ. 20 ᐅᖓᑖᓂ ᐊᕐᕌᒍᖃᓚᐅᕐᑐᖅ.

ᐊᓯᖏᑦ ᒪᓕᒐᓕᐅᖅᑎᑦ ᐅᖃᐅᓯᖃᑲᑕᒃᑎᓪᓗᒋ ᒪᐃ 24ᖑᑎᓪᓗᒍ ᖃᓄᐃᓕᐅᕐᓂᖏᓐᓂᒃ ᓄᓇᖏᓐᓂᒃ, ᐳᕉᔅᑐ ᐅᖃᓪᓚᒍᓐᓇᕐᕕᖕᒥᓂᒃ ᐊᑐᓚᐅᕐᑐᖅ ᓄᖃᑲᐃᓐᓇᖁᔨᓪᓗᓂ ᐊᒻᒪ ᐃᖅᑲᐅᒪᖁᔨᓪᓗᓂ ᓚᐃᐅᓪ-ᐅᕆᑦᓯᒥ, ᐅᖃᐅᓯᕆᓪᓗᓂᐅᒃ ᐊᓯᒥᓂᒃ ᐃᓱᒪᒋᔭᖃᖃᑦᑕᑦᑎᐊᓚᐅᕐᓂᖓᓂᒃ ᑭᓯᐊᓂᑦᑕᐅᖅ ᓈᒻᒪᙱᓕᐅᕈᑎᖃᔭᓪᖢᓂ.

“ᓈᒻᒪᙱᓕᐅᕈᑎᖃᕋᓗᐊᖅᖢᓂ ᐃᓱᒪᒋᔭᖃᐃᓐᓇᓚᐅᕐᓯᒪᔪᖅ, ᐃᓱᒪᒋᔭᖃᑦᑎᐊᖅᖢᓂ, ᑲᒪᒋᔭᖃᑦᑎᐊᖅᖢᓂ ᐃᓚᒥᓂᒃ ᐊᒻᒪ ᐃᓅᖃᑎᒋᕙᒃᑕᖏᓐᓂᒃ, ᐊᒻᒪᓗ ᐊᓯᒥᓂᒃ ᖁᕝᕙᖅᐹᓪᓕᖅᑎᑦᑎᔪᓐᓇᓚᐅᕆᓪᓗᓂ ᖃᓂᒋᔭᖏᓐᓂᒃ,” ᐅᖃᕐᑐᖅ.

2018ᖑᑎᓪᓗᒍ ᐳᕉᔅᑐ ᐊᒻᒪ ᓚᐃᐅᓪ-ᐅᕆᑦᓯ ᐅᖃᓪᓚᓚᐅᕐᓯᒪᖕᒪᑎᑦ ᑲᓇᑕᒥ ᖃᐅᔨᓇᓱᒃᑐᓂᒃ ᔭᒐᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ.

ᐅᖃᓪᓚᒃᑎᓪᓗᒍ ᐳᕉᔅᓱ ᐅᖃᐅᓯᖃᓚᐅᕐᓯᒪᔪᑦ ᐊᑦᑕᒋᓚᐅᕐᓯᒪᔭᖓᓂᒃ, ᓚᐃᐅᓪ-ᐅᕆᑦᓯᐅᑉ ᐊᓈᓇᖓ ᓯᐊᕕᐊ ᓚᐃᐅᓪᒥ, ᑖᓐᓇᓕ ᑐᖁᑕᐅᓚᐅᕐᓯᒪᖕᒪᓐ ᐊᑯᓂᐊᓗᒃ ᐊᐃᑉᐸᕆᔭᖓᓄᑦ 2004ᒥ ᐅᓇ ᓚᐃᐅᓪ-ᐅᕆᑦᓯ 9ᓂ ᐊᕐᕌᒍᖃᖅᑎᓪᓗᒍ.

ᐳᕉᔅᑐ ᓚᐃᐅᓪ-ᐅᕆᑦᓯᒥ ᐱᓯᒪᓕᓚᐅᕐᓯᒪᔪᖅ ᐊᒻᒪ ᐱᕈᖅᑎᓪᖢᓂᐅᒃ ᐊᓈᓇᖓ ᐃᓅᔪᓐᓃᓚᐅᕐᓯᒪᑎᓪᓗᒍ.

ᓚᐃᐅᓪ-ᐅᕆᑦᓯ ᐅᖃᓪᓚᒃᑎᓪᓗᒍ ᐅᖃᓚᐅᕐᓯᒪᔪᖅ ᐋᓐᓂᕐᓱᐃᕆᕙᓚᐅᕐᓂᖓᓂᒃ ᐊᕐᓇᓂᒃ, ᑭᓯᐊᓂᓕ ᐅᖃᒃᑲᓐᓂᖅᖢᓂ ᑕᐃᒪᐃᑦᑐᓐᓃᕐᓂᕋᖅᖢᓂ.

ᐳᕉᔅᑐ ᑕᒪᑐᒥᖓ ᐅᖃᐅᓯᖃᓚᐅᕐᒥᔪᖅ ᓚᐃᐅᓪ-ᐅᕆᑦᓯ ᐅᖃᓯᕆᔭᖏᓐᓂᒃ.

“ᐅᕙᑦᑎᑐᑦ ᐊᒥᓱᑎᒍᑦ ᑕᒻᒪᐅᑎᒋᓚᐅᖅᑕᑦᑎᓐᓂ ᐊᑐᓚᐅᕐᒥᔪᖅ ᐊᒻᒪᓗ ᐅᐊᑲᓪᓚᓗᐊᖑᖅᑰᔨᓪᓗᓂ ᐊᑐᕐᓂᖏᓐᓂᒃ ᐊᒻᒪᓗ ᐊᕐᕌᒍᒐᓴᖕᓂ ᐃᓐᓇᕈᕋᓱᒃᐸᓪᓕᐊᑎᓪᓗᒍ,” ᐅᖃᕐᑐᖅ.

“ᐊᒻᒪᓗ ᓈᒻᒪᙱᓕᐅᕈᑎᓕᐅᕐᓂᕌᖓ ᐅᖃᕈᓐᓇᑦᑎᐊᓚᐅᖅᖢᓂ ᑭᓇᑐᐃᓐᓇᕐᒧᑦ, ᐃᓱᒪᒋᔭᖃᕐᓂᕐᓴᐅᓪᓗᖏ ᐃᓱᒪᒋᒻᒪᕆᒃᐸᒃᑕᖏᓐᓂᒃ: ᖁᕝᕙᖅᐹᓪᓕᖅᑎᑦᑎᓇᓱᖕᓂᕐᒥᒃ ᐋᓐᓂᖅᓱᖅᑕᐅᕙᒃᑐᓂᒃ, ᐱᓗᐊᖅᑐᒥ ᐊᕐᓇᓂᒃ.

“ᐅᖃᕈᓐᓇᓚᐅᕐᒪᑦ ᓈᒻᒪᙱᓕᐅᕈᑎᒧᑦ ᐃᓚᒋᔭᐅᓂᕐᒥᓂᒃ.”

ᐳᕉᔅᑐ ᖁᔭᓕᓚᐅᕐᒥᔪᖅ ᐃᕐᓂᖓᑕ ᐱᖃᓐᓇᕆᔭᖏᓐᓂᒃ ᐊᒻᒪ ᐃᓚᖏᓐᓂᒃ ᐊᒻᒪᓗ ᖁᔭᒋᓪᓗᓂᒋᑦ ᒪᓕᒐᓕᐅᖅᑎᐅᖃᑎᖏᓐᓂᒃ ᐃᑲᔪᖅᑐᐃᓯᒪᓚᐅᕐᓂᖏᓐᓂᒃ ᐊᒃᓱᕈᕐᓇᖅᑐᖅᓯᐅᖅᑎᓪᓗᒍ.

ᑐᓴᒐᒃᓴᖃᓚᐅᕐᒥᔪᖅ ᒪᑯᓂᖓ ᐅᓄᒻᒪᕆᒃᑐᓂᒃ ᐃᒻᒥᓃᕐᓯᒪᓕᖅᑐᓂᒃ ᓄᓇᕗᒥᑦ.

“ᖃᐅᔨᒪᔪᖓ ᑕᒪᐃᓐᓂ ᓄᓇᖃᖅᑐᑦ ᐅᖃᐅᓯᖃᕈᓐᓇᖃᑦᑕᙱᓐᓂᖏᓐᓂᒃ ᐃᓄᒋᐊᓄᑦ ᐊᓯᐅᔨᓯᒪᔭᖏᓐᓂᒃ ᐃᓄᐊᕐᓂᕐᒧᑦ ᐃᓚᖏᓐᓂᒃ,” ᐅᖃᕐᑐᖅ.

“ᖃᐅᔨᒪᖁᕙᒃᑲ ᑕᒪᕐᒥ ᕿᒃᓵᖅᓯᒪᔪᑦ ᐃᓚᒋᔭᐅᔪᑦ ᓄᓇᓖᓪᓗ ᐅᕙᓂ ᓇᖏᕐᓂᓐᓂ ᑲᔪᓯᓂᐊᕐᓗᖓ ᖃᓄᐃᓕᐅᕈᑎᐅᔪᓐᓇᖅᑐᓄᑦ ᐃᑲᔪᕈᑎᒃᓴᓂᒃ ᕿᒪᒃᑕᐅᔪᕕᓂᕐᒧᑦ ᐊᒻᒪᓗ ᓯᕗᓕᐅᖅᑎᕗᑦ ᐱᓕᕆᖃᑎᒋᓗᖏᑦ ᖃᓄᐃᓕᐅᕈᑎᒃᓴᐅᔪᓐᓇᖅᑐᓂᒃ ᐃᓚᒋᔭᐅᔪᑦ ᓄᓇᓖᓪᓗ ᑕᒪᑐᒧᖓ ᐋᓐᓂᙱᓐᓂᕐᓴᐅᔪᓐᓇᓕᖁᓪᓗᒋᑦ ᐊᓯᐅᔨᓂᕐᒧᑦ.”

ᐅᑯᐊ ᐃᓄᖕᓄᑦ ᐊᒃᓱᕈᓗᐊᖅᑐᓄᑦ ᐊᒻᒪ ᐅᖃᖃᑎᖃᕆᐊᖃᖅᑐᓄᑦ ᐃᑲᔪᕈᑎᒃᓴᐃᑦ:

ᑲᒪᑦᓯᐊᖅᑐᑦ ᐃᑲᔪᖅᑕᐅᕝᕕᒃ ᓄᓇᕗᒨᖓᔪᖅ ᐊᒻᒪ ᐱᔨᑦᑎᕋᐅᑎᖃᖅᖢᑎᒃ ᐃᓄᒃᑎᑐᑦ. ᐅᖄᓚᐅᑎᖓ 979-3333 ᐃᖃᓗᖕᓂ ᓄᓇᖃᖅᑐᓄᑦ ᐊᒻᒪ ᐆᒥᖓ 1-800-265-3333 ᐊᓯᖏᓐᓄᑦ ᓄᓇᕗᒥᐅᑕᓄᑦ.

ᓄᓇᖃᖅᑳᖅᑐᑦ ᐊᒻᒪ ᐃᓄᐃᑦ ᓂᕆᐅᕐᓂᖅ ᖃᓄᐃᑦᑕᐃᓕᒪᓂᕐᒧᑦ ᐃᑲᔪᖅᑕᐅᕝᕕᒃ: 1-855-242-3310 ᐅᕝᕙᓘᓐᓃᑦ ᐃᑭᐊᖅᑭᕕᒃᑯᑦ ᐅᖃᓪᓚᖃᑎᖃᕐᓗᓂ ᐅᕘᓇ hopeforwellness.ca.