ᒪᓕᒐᓕᐅᕐᑎ ᐊᐱᕐᓱᓚᐅᕐᑐᑦ ᒥᓂᔅᑕᓄᑦ ᐆᒥᖓ $80 ᒥᓕᐊᓐᑖᓚᒥ ᐊᖏᒡᓕᒋᐊᖅᑕᐅᓂᖓᓂᒃ ᕙᐃᐳ ᐋᑉᑎᒃᒧᑦ ᐊᖅᑯᑎᒃᓴᒧᑦ ᐱᓕᕆᐊᒃᓴᒥᑦ
“ᐱᓕᕆᖃᑎᒃᑲ ᑕᑯᓪᓗᒋ ᐃᓱᒪᓕᐅᕆᔪᓐᓇᑦᑎᐊᖅᑐᒍᑦ $80 ᒥᓕᐊᓐᑖᓚᒧᑦ ᐊᑐᖅᑕᐅᔪᓐᓇᖅᑐᓂᒃ”
ᔪᐃᓕ ᖃᐃᕐᓂᖅ, ᒪᓕᒐᓕᐅᕐᑎ ᐊᒥᑦᑐᕐᒧ, ᐃᓚᒋᔭᐅᓚᐅᕐᑐᖅ ᒪᓕᒐᓕᐅᕐᑎᓂᒃ ᓄᓇᕗᑦ ᒪᓕᒐᓕᕆᕕᒡᔪᐊᖓᓂᒃ ᐊᐱᖅᓱᖅᑐᓂᒃ ᒐᕙᒪᒃᑯᓐᓂᑦ ᐆᒥᖓ $80 ᒥᓕᐊᓐᑖᓚᓂ ᐊᖏᒡᓕᒋᐊᖅᑕᐅᓂᐅᔪᒥ ᐃᖃᓗᐃᑦ-ᓅᒃᓗ ᐊᑯᓐᓂᐊᓂ ᕙᐃᐳ ᐋᑉᑎᒃᓕᕆᓂᕐᒧᑦ ᐱᓕᕆᐊᒧᑦ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)
For an English version of this story, see MLAs question ministers on $80M increase to fibre optic line project
ᐋᒐᓯᐅᓚᐅᕐᑐᒥ, ᒐᕙᒪᑐᖃᒃᑯᑦ ᑐᓂᓯᓂᐊᕐᓂᕋᓚᐅᕐᒪᑕ $151 ᒥᓕᐊᓐᑖᓚᓂ ᐱᓕᕆᐊᒨᖓᔪᓄᑦ, ᐅᑯᓄᖓ ᑐᕌᖓᑎᑕᐅᓪᓗᓂ 1,700 ᑭᓛᒥᑕᔅᓂ ᑕᑭᓂᓕᒃ ᕙᐃᐳ ᐋᑉᑎᒃ ᓅᒃ, ᑲᓛᖡᑦ ᓄᓇᖓᓂᑦ ᒪᐅᓈᕐᓗᓂ ᕿᑭᖅᑖᓘᒃ ᐃᑭᖓᒍᑦ ᐃᖃᓗᖕᓄᑦ. ᑕᕝᕙᙵᓪᓕ ᑕᒪᓐᓇ ᑭᒻᒥᕈᒻᒧᑦ ᑎᑭᑎᑕᐅᓕᕋᔭᖅᖢᓂ.
ᓄᓇᕗᑦ ᒐᕙᒪᒃᑯᑦ ᐋᖅᑭᒃᓱᐃᓂᐊᕐᑐᑦ ᖃᓄᐃᓕᖓᓂᐊᕐᓂᖓᓂᒃ ᐊᒻᒪ ᐱᓕᕆᐊᒃᓴᖅ ᐱᒋᐊᖅᑕᐅᑎᓪᓗᓂᔾᔪᑦ, ᑖᓐᓇᓗ ᐱᐊᓂᒃᑕᐅᓇᔭᖅᖢᓂ 2023.
ᐊᕐᕌᓂᓕ, ᒪᓕᒐᓕᐅᖅᑎᑦ ᑖᔅᓱᒥᖓ ᐱᓕᕆᐊᒃᓴᒥᑦ ᐊᖏᓚᐅᕐᓯᒪᔪᑦ, ᑖᓐᓇᓗ ᐊᑭᖃᕐᓂᐊᓚᐅᕐᓯᒪᓪᓗᓂ $126 ᒥᓕᐊᓐ ᑖᓚᓂ.
“ᑕᒪᓐᓇ ᐊᕐᕌᒍ ᐊᓂᒍᖅᑎᓪᓗᒍ, ᑐᓴᖅᑎᑕᐅᓕᓚᐅᕐᓯᒪᔪᒍᑦ ᐱᓕᕆᐊᒃᓴᐅᑉ ᐊᑭᖓ ᖁᕝᕙᖅᐹᓪᓕᕐᓂᖓᓂ ᒪᓕᒃᑎᑕᐅᓂᖓᓄᑦ ᐊᑭᑦᑐᖅᐹᓪᓕᕈᑎᐅᔪᓄᑦ ᐊᒻᒪᓗ ᐃᓱᒪᒋᔭᐅᓕᕐᖢᓂ ᒫᓃᓕᕐᓂᖓᓂᒃ $209 ᒥᓕᐊᓐᑖᓚᓂ,” ᔮᓐ ᒪᐃᓐ, ᒪᓕᒐᓕᐅᕐᑎ ᐊᕐᕕᐊᑦ ᐅᐊᖕᓇᖓᓄᑦ–ᑎᑭᕋᕐᔪᐊᕐᒧᑦ, ᐅᖃᓚᐅᕐᑐᖅ ᐃᓚᒋᔭᐅᓂᕐᒧᑦ ᐅᖃᐅᓯᖃᓕᕐᑎᓪᓗᒍ ᐱᖓᑦᓯᖅ, ᐅᒃᑑᐱᕆ 23-ᒥ.
ᐅᓇᓕ $80 ᒥᓕᐊᓐᑖᓚᓂ ᐊᔾᔨᒌᙱᓐᓂᖃᖅᑐᖅ, ᒪᐃᓐ ᐅᖃᖅᑐᖅ.
“ᐱᓕᕆᖃᑎᒃᑲ ᑕᑯᓪᓗᒋ ᐃᓱᒪᓕᐅᕆᔪᓐᓇᑦᑎᐊᖅᑐᒍᑦ ᐊᑑᑎᐅᔪᓐᓇᖅᑐᓂᒃ $80 ᒥᓕᐊᓐᑖᓚᓂᒃ,” ᒪᐃᓐ ᐅᖃᖅᑐᖅ.
ᒐᕙᒪᑐᖃᒃᑯᑦ ᐃᑲᔫᑎᖏᑦ ᐅᕙᙶᖅᑐᑦ ᓄᓇᓕᕋᓛᓄᑦ ᐊᒻᒪ ᐅᑭᐅᕐᑕᖅᑐᕐᒧᑦ ᓄᓇᓕᖕᓂ ᐱᓕᕆᕝᕕᒃᓴᓄᑦ ᐆᒧᖓ Investing in Canada Plan (ᑲᓇᑕᒧᑦ ᐃᑲᔫᑎᒃᓴᓂᒃ ᐸᕐᓇᐅᑎᓂᒃ).
ᐱᓕᕆᐊᒃᓴᖅ ᒫᓐᓇ ᒪᓕᒐᓕᕆᔨᕐᔪᐊᑦ ᑲᑎᒪᔨᖏᓐᓃᓕᕐᑐᖅ ᕿᒥᕐᕈᐊᖅᑎᓪᓗᒋ ᑮᓇᐅᔭᖅᑐᔪᓄᑦ ᐊᑐᖅᑕᐅᓇᔭᖅᑐᓂᒃ 2020/21-ᒧᑦ.
ᐅᓪᓗᑲᓐᓂᐅᓕᕐᑎᓪᓗᒍ ᐊᐱᕐᓱᕐᓇᖅᑎᓪᓗᒍ, ᔪᐃᓕ ᖃᐃᕐᓂᖅ, ᒪᓕᒐᓕᐅᕐᑎ ᐊᒥᑦᑐᕐᒧ ᐊᐱᕆᓚᐅᕐᑐᖅ ᖁᐊᓴ ᑯᓱᒐᕐᒧᑦ, ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ, ᐅᓇ $80 ᒥᓕᐊᓐᑖᓚᒥ ᐊᖏᒡᓕᒋᐊᖅᑎᑦᑎᓂᐅᔪᖅ ᒐᕙᒪᒃᑯᑦ ᐸᕐᓇᐅᓯᐅᕐᓂᐊᓵᕐᓂᖏᓐᓂᒃ ᐱᓕᕆᓂᕐᒨᖓᔭᕆᐊᒃᓴᖓᓂᒃ.
ᑖᓐᓇ ᐱᓕᕆᕙᓪᓕᐊᓂᖅ, ᓇᓗᓇᐃᖅᑕᐅᓂᖓᒍᑦ ᐅᕙᓂ ᓄᓇᕗᑦ ᒐᕙᒪᒃᑯᑦ ᑮᓇᐅᔭᖅᑐᔪᓄᑦ ᐸᕐᓇᐅᓯᐅᖅᐸᓪᓕᐊᓂᕐᒧᑦ ᐃᑲᔪᕈᑎᓂᒃ, “ᑐᕌᖓᔪᖅ ᑖᓐᓇ ᐱᓕᕆᐊᒃᓴᖅ ᓱᖅᑯᐃᓇᑦᑎᐊᖅᑐᒥ ᑐᑭᓕᐅᕆᓯᒪᒐᓗᐊᕆᐊᒃᓴᖓᓂᒃ, ᐊᒻᒪᓗ ᑐᓴᖅᑕᐅᔪᒪᓇᔭᖅᑐᓄᑦ ᑐᓴᒐᒃᓴᓂᒃ ᐊᑐᐃᓐᓇᖃᕆᐊᒃᓴᖏᓐᓂᒃ ᐱᕙᓪᓕᐊᓂᕐᒨᖓᔪᓂᒃ, ᓈᒻᒪᓈᕐᓯᒪᔪᒥ ᐊᑭᒋᓇᔭᖅᑕᖏᓐᓄᑦ ᓇᓗᓇᐃᔭᕐᓯᒪᔪᓂᒃ ᐊᒻᒪ ᖃᖓ ᐱᓕᕆᐊᖑᓇᔭᕆᐊᒃᓴᖓᓂᒃ, ᓯᕗᓂᐊᒍᑦ ᐱᒋᐊᓕᓚᐅᖅᑎᓐᓇᒋᑦ ᑮᓇᐅᔭᖅᑐᔪᓂᒃ ᐸᕐᓇᐅᓯᐅᕐᓂᕐᒥᒃ.”
“ᐸᕐᓇᐅᓯᐅᖅᑕᐅᓂᐊᓵᕐᓂᖓᓂᒃ ᐱᓕᕆᐊᖑᓂᑰᕚ, ᐃᓘᓐᓃᑦ ᐋᑲᓘᓐᓃᑦ?” ᖃᐃᕐᓂᖅ ᐊᐱᕆᔪᖅ ᑯᓱᒐᕐᒧ.
“ᐸᕐᓇᐅᓯᐅᕐᓂᖅ ᐱᐊᓂᒃᑕᐅᓯᒪᔪᖅ ᐊᒻᒪᓗ ᖃᔅᓯᑐᕋᔭᕐᓂᖓᓂᒃ ᓱᓕ ᖃᐅᔨᓇᓱᒃᑐᒃ. ᑐᓴᖅᑎᑕᐅᒐᑦᑕ, ᖃᐅᔨᓕᓚᐅᕐᑐᒍᑦ ᐊᑭᑐᓂᕐᓴᒻᒪᕆᐅᓂᐊᕐᓂᖓᓂᒃ,” ᑯᓱᒐᖅ ᐅᖃᖅᑐᖅ.
ᒪᐃᓐ, ᖃᐃᕐᓂᐅᑉ ᓴᓂᑦᑎᐊᖓᓂ ᐃᒃᓯᕙᐅᑕᓕᒃ ᒪᓕᒐᓕᕆᕕᒡᔪᐊᒥᑦ, ᓇᖏᕐᓯᕗᖅ ᐊᐱᓱᒃᑲᓐᓂᕈᒪᓪᓗᓂ ᑯᓱᒐᕐᒥ.
“ᒥᓂᔅᑕ ᐅᖃᕈᓐᓇᖅᐸ ᖃᓄᖅ ᑖᓐᓇ ᐊᖏᔪᒻᒪᕆᐊᓗᒃ ᐱᓕᕆᐊᒃᓴᖅ ᐊᑭᖓᒍᑦ ᖁᕝᕙᖅᐹᓪᓕᕐᓂᖓᓂ ᐊᕐᕌᒎᑉ ᐃᓗᐊᓂ?”
ᑯᓱᒐᖅ ᐅᖃᒃᑲᓐᓂᕐᖢᓂ ᑖᔅᓱᒧᖓ ᑮᓇᐅᔭᐃᑦ ᐱᔭᐅᔪᒪᓯᒪᔪᑦ ᐊᖏᖅᑕᐅᓚᐅᕐᑎᓪᓗᒋᑦ ᐊᕐᕌᓂ, ᐱᓕᕆᕝᕕᐅᔪᖅ ᕿᒥᕐᕈᐊᒃᑲᓐᓂᓕᓚᐅᕐᒪᑕ ᐱᓕᕆᐊᒃᓴᒥ ᐊᒻᒪ ᐊᑭᒋᓇᔭᖅᑕᖓ ᐊᖏᒡᓕᕚᓪᓕᖅᖢᓂ ᕿᒥᕐᕈᐊᓚᐅᖅᑎᓪᓗᒋᑦ.
ᑯᓱᒐᖅ ᐅᖃᒃᑲᓐᓂᓚᐅᕐᑐᖅ ᐃᒪᓐᓇ, ᒪᐃ 2019-ᒥ ᐱᓕᕆᕝᕕᖏᑦ ᐃᓱᒪᓚᐅᕐᓯᒪᖕᒪᑕ ᑮᓇᐅᔭᓂ ᐃᑲᔫᑎᒃᓴᓂ ᑐᒃᓯᕋᐅᑎᖓ ᐊᖏᒡᓕᒋᐊᖃᕐᓂᕐᓗᓂ ᒪᐅᖓ $201.6 ᒥᓕᐊᓐᑖᓚᓄ “ᐊᖏᓂᖅᐹᒃᑯᑦ ᒐᕙᒪᑐᖃᒃᑯᓐᓂ ᐃᑲᔫᑎᑖᕈᑎᐅᔪᓐᓇᖅᑐᓂᒃ ᐊᑐᐃᓐᓇᐅᑎᓐᓇᓱᒃᖢᒍ ᐱᓕᕆᐊᒧᑦ ᐊᑐᖅᑕᐅᒋᐊᖃᕈᓂ.”
ᖃᐅᒃᐸᙳᖅᑎᓪᓗᒍ, ᐅᒃᑑᐱᕆ 24-ᒥ, ᒪᐃᓐ ᓇᖏᕐᓯᒃᑲᓐᓂᓚᐅᕐᑐᖅ ᐊᐱᕐᓱᕐᓇᒥ ᖃᐅᔨᓇᓱᒃᑲᓐᓂᖅᖢᓂ ᑮᓇᐅᔭᓕᕆᓂᕐᒧᑦ ᒥᓂᔅᑕᒧᑦ ᔪᐊᔾ ᕼᐃᒃᔅ ᑖᔅᓱᒧᖓᑦᑕᐃᓐᓇᖅ.
“ᐅᑯᑎᒎᓇᕐᓕ ᑮᓇᐅᔭᓕᕆᓂᕐᒥ ᐊᐅᓚᑦᑎᔨᓄᑦ ᑲᑎᒪᔨᑎᒍᑦ, ᖃᓄᐃᑦᑐᓂᒃ ᐱᓕᕆᕙᓪᓕᐊᒍᑎᖃᓚᐅᕐᐸᑦ ᐊᒻᒪ ᖃᓄᐃᓕᐅᓚᐅᕐᐸᑦ ᖃᐅᔨᑎᑕᐅᑎᓪᓗᒋᑦ ᐱᓕᕆᕝᕕᒃᒥᑦ $80 ᒥᓕᐊᓐᑖᓚᓂ ᐊᑭᖏᑦ ᖁᕝᕙᖅᐹᓪᓕᕐᓂᖓᓄᑦ ᐆᒧᖓ ᑮᓇᐅᔭᖅᑐᔪᒥᑦ ᐱᓕᕆᐊᖑᕙᓪᓕᐊᔪᒥ?” ᒪᐃᓐ ᐊᐱᕆᔪᖅ.
ᕼᐃᒃᔅ ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐃᑲᔫᑎᒃᓴᓂᒃ ᐊᖏᒡᓕᒋᐊᖅᑎᑦᑎᓂᖏᖏᓐᓄᑦ ᐱᓕᕆᐊᒃᓴᒧᑦ, ᐊᒻᒪ ᐃᓚᖃᖅᖢᓂ ᐃᑲᔫᑎᖃᑦᑎᐊᖅᑐᒥᑦ ᐃᒪᕐᒥᐅᑕᓂᑦ ᖃᐅᔨᓴᕐᓂᕐᒧᑦ ᐱᓕᕆᕝᕕᐅᔪᒪᔪᒥ, ᓄᓇᕗᑦ ᒐᕙᒪᒃᑯᑦ ᐊᖏᒡᓕᒋᐊᖅᑎᑦᑎᓚᐅᕐᒥᔪᑦ ᐃᑲᔫᑎᖏᓐᓂᒃ.
“ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑐᓂᒃᑲᓐᓂᓚᐅᕐᓯᒪᖕᒪᒍ ᑮᓇᐅᔭᓕᕆᓂᕐᒥ ᐊᐅᓚᑦᑎᔨᓄᑦ ᑲᑎᒪᔨᓄᑦ ᐅᓇ ᐱᔾᔪᑎᒋᓪᓗᒍ ᖃᐅᔨᒐᒥᒃ ᐊᑭᓕᐅᑎᒃᓴᐅᓇᔭᖅᑐᑦ ᑐᖓᐅᑦᑎᓯᒪᓗᐊᕐᓂᖏᓐᓂᒃ.”
ᕼᐃᒃᔅ ᐅᖃᓚᐅᕐᒥᔪᖅ ᓄᓇᕗᑦ ᒐᕙᒪᒃᑯᑦ ᓇᑉᐸᖓᑕ ᓇᑉᐸᖓᓂ (25 ᐳᓴᓐᑎ) ᐃᑲᔫᑎᖃᕐᓂᖏᓐᓂᒃ ᐱᓕᕆᐊᒧᑦ, ᐅᑯᐊᓕ ᒐᕙᒪᑐᖃᒃᑯᑦ 75 ᐳᓴᓐᑎᒥ ᐃᑲᔫᑎᖃᖅᖢᑎᒃ.
“ᓄᓇᕗᒧᑦ ᒐᕙᒪᐅᓪᓗᑎ, $80 ᒥᓕᐊᓐᑖᓚᓕᒫᒥᑦ ᐊᑭᓕᕆᐊᖃᙱᑦᑐᒍᑦ, ᐊᑭᓕᕆᐊᖃᕋᔭᖅᑐᒍᓪᓗ ᑖᔅᓱᒪ 25 ᐳᓴᓐᑎᖓᓂᒃ. ᑕᐃᒪᓕ ᕿᓂᕋᓱᖕᓂᐊᖅᑐᒍᑦ…ᖃᑯᒍᒃᑲᓐᓂ ᐊᕐᕌᒍᓂ ᐊᑐᕐᓂᐊᖅᑐᓂᒃ … ᒪᑯᓂᖓ ᐃᑲᔫᑎᒃᑲᓐᓂᐅᕋᔭᖅᑐᓂᒃ ᑖᔅᓱᒥᖓ ᐱᐊᓂᒍᑎᐅᓂᐊᖅᑐᒥ ᐱᓕᕆᐊᒥ,” ᐅᖃᒃᑲᓐᓂᖅᑐᖅ.
(0) Comments