ᒪᓕᒐᓕᐅᖅᑎ ᐅᖃᕐᑐᖅ ᑭᕗᕙᕈᔾᔨᑐᐃᓐᓇᕆᐊᓕᖕᓂ ᐃᑲᔫᑎᒃᓴᖏᓐᓂᒃ

ᓇᑦᓯᓕ ᒪᓕᒐᓕᐅᖅᑎ ᔫᓴᕝ ᖁᕿᐊᖅ ᐅᖃᓚᐅᕐᑐᖅ ᓄᓇᓖᑦ ᑭᒡᒐᖅᑐᖅᑕᖏ ᐊᑯᓂᐊᓗᒃ ᐅᑕᕿᓕᕐᓂᕋᖅᖢᓂᒋ ᐃᑲᔫᓯᐊᖅᑖᕈᑎᖏᓐᓂᒃ.

ᐊᐱᕐᓱᖅᑕᐅᓐᓇᖅᑎᓪᓗᒍ ᒪᓕᒐᓕᕆᕕᒡᔪᐊᕐᒥ ᐅᒃᑑᐱᕆ 25ᒥ, ᐅᖃᓚᐅᕐᑐᖅ ᐃᓚᖓ ᑭᒡᒐᖅᑐᖅᑕᖓ ᐃᑲᔫᓯᐊᖅᑖᖅᑎᑕᐅᔪᓐᓇᓚᐅᙱᓐᓂᖓᓂ ᓄᓇᕗᒥᑦ ᒐᕙᒪᒃᑯᓐᓂ ᑕᖅᑭᓂᒃ ᐱᖓᓱᓂ ᑎᓴᒪᓂᓪᓗᑭᐊᖅ ᓲᖃᐃᒻᒪ ᓇᓗᓇᐃᒃᑯᑎᖃᑦᑎᐊᓚᐅᙱᒻᒪᑦ.

ᐃᑲᔫᓯᐊᒃᓴᐃᑦ ᓄᓇᕗᒥᑦ ᖃᓄᐃᓕᐅᕈᑎᓄᑦ ᐊᒻᒪ ᐃᓄᖕᓄᑦ ᐃᑲᔫᑎᑖᕈᑎᐅᕙᖕᒪᑕ ᐊᑐᕆᐊᖃᖅᑕᖏᓐᓄᑦ ᑕᖅᑭᕐᒧᑦ.

“ᓄᓇᖃᖅᑐᐃᑦ ᐊᒃᓱᕈᓯᒪᔭᕇᖃᑦᑕᕐᒪᑕ ᑭᓱᖃᕋᓱᒃᖢᑎᒃ, ᑕᐃᒪᓕ ᐅᓇ ᒐᕙᒪᓕᕆᔨᓄᑦ ᑭᐅᔭᐅᓯᒪᖅᑰᔨᒻᒪᕆᒃᑐᖅ, ᓂᕈᐊᖅᑕᐅᓯᒪᙱᑦᑐᓄᑦ,” ᖁᕿᐊᖅ ᐅᖃᕐᑐᖅ ᐅᖃᐅᓯᖃᖅᖢᓂ ᐃᑲᔫᑎᑖᖅᑎᑕᐅᔪᓐᓇᓚᐅᙱᑦᑐᒥᒃ.

“ᐅᖃᕈᓐᓇᖅᐸᓵᖅᑐᖓᓘᓐᓃᑦ ᑕᒪᓐᓇ ᓈᒻᒪᙱᓗᐊᕐᓂᖓᓂᒃ.”

ᖁᕿᐊᖅ ᐅᖃᓚᐅᕐᑐᖅ ᓇᓗᓇᐃᒃᑯᑎᓂ ᓈᒻᒪᒋᔭᐅᔪᓂᒃ ᐊᔪᕐᓇᖃᑦᑕᕐᒪᑦ ᓄᓇᓕᖕᓂ ᒥᑭᑦᑐᓂᒃ ᐆᑐᓇᖅ ᑕᓗᕐᔪᐊᖅᑎᑐᑦ.

ᐊᐱᕆᓚᐅᕐᑐᖅ ᐃᓄᓕᕆᔨᒃᑯᑦ ᒥᓂᔅᑕᖓᓄᑦ ᒫᒍᕆᑦ ᓇᑲᓱᒃᒧ ᖃᓄᐃᒻᒪ ᓄᓇᓕᖕᓂ ᐃᖅᑲᓇᐃᔭᖅᑎᒋᔭᐅᔪᖅ ᐊᖏᕋᔭᙱᒻᒪᖔᑦ ᓄᓇᖃᖅᑐᒥᒃ ᐃᑲᔪᖅᑕᐅᔪᒪᑎᓪᓗᒍ, ᐃᑲᔪᕋᓱᙱᖔᖅᖢᓂᐅᒃ ᑎᑎᖃᓂᒃ ᓈᒻᒪᒃᑐᓂᒃ ᐱᓇᓱᒃᑎᓪᓗᒍ.

ᓇᑲᓱᒃ ᐅᖃᓚᐅᕐᑐᖅ ᑐᓴᐅᒪᙱᓐᓂᕋᖅᖢᓂ ᓄᓇᖃᖅᑐᓂ ᐊᖏᖅᑕᐅᓯᒪᙱᑦᑐᓂᒃ ᑕᖅᑭᑦ ᑎᓴᒪᑦ ᐊᓂᒍᓵᖅᑐᑦ ᐊᑐᖅᑎᓪᓗᒋ ᑭᓯᐊᓂᓕ ᑮᓇᐅᔭᓕᐊᕕᓂᖓ ᖁᑦᑎᓗᐊᕐᓂᖅᐸᑦ ᐃᑲᔫᑎᑖᕆᐊᒃᓴᖅ.

ᐅᖃᓚᐅᕐᑐᖅ ᐃᓄᐃᑦ ᓈᒻᒪᙱᓕᐅᕈᑎᖃᓕᕌᖓᑕ ᐃᑲᔫᑎᑖᕋᓱᒃᑎᓪᓗᒋ ᑕᐃᒪᓕ ᓄᓇᓕᖕᓂ ᐱᓕᕆᔨᒋᔭᐅᔪᒧᑐᐊᖅ ᐅᖃᑦᑕᙱᑉᐸ ᑭᓯᐊᓂᓕ ᕿᒥᕐᕈᐊᖅᑕᐅᖁᔨᒻᒪᕆᒡᓗᓂ ᓄᓇᕗᒥᑦ ᒐᕙᒪᒃᑯᑎᒍᑦ.

ᓇᑲᓱᒃ ᐅᖃᒃᑲᓐᓂᓚᐅᕐᑐᖅ ᓄᓇᓕᖕᓂ ᐱᓕᕆᔨᒋᔭᐅᔪᑦ ᒐᕙᒪᒃᑯᓐᓄᑦ ᐃᑲᔪᕋᓱᒻᒪᕆᖃᑦᑕᕐᒪᑕ ᐃᓄᖕᓂ ᑎᑎᖃᓂᒃ ᐱᓇᓱᒋᐊᖃᓕᕌᖓᑕ.

ᖁᕿᐊᖅ ᐅᖃᓚᐅᕐᑐᖅ ᓄᓇᖃᖅᑐᑦ ᐅᖃᖃᑦᑕᕐᒪᑕ ᐃᓛᓐᓂ ᐅᓪᓘᖕᓂ ᒪᕐᕉᖕᓂ ᐅᑕᖅᑭᔭᕆᐊᖃᖅᐸᒃᖢᑎᒃ ᐃᑲᔫᑎᑖᕈᑎᖏᓐᓂᒃ, ᐊᒻᒪᓗ ᐅᖄᓚᓕᖅᐸᒃᖢᑎᒃ ᐃᖃᓗᒃᑑᑦᑎᐊᕐᒥ ᒐᕙᒪᒃᑯᓐᓄᑦ ᖃᓄᐃᒻᒪ ᐃᑲᔫᑎᒃᓴᐃᑦ ᑭᖑᕙᓯᖕᒪᖔᑕ.

ᓇᑲᓱᒃ ᐅᖃᓚᐅᕐᑐᖅ ᓈᒻᒪᒋᓕᐅᕈᑎᐅᕙᒃᑐᑦ ᐃᓚᖏᑦ ᐃᑲᔫᑎᑖᕋᓱᒃᑐᓄᑦ ᒪᑯᐊ ᑎᑎᖃᓂ ᐱᔭᐅᔭᕆᐊᓕᖕᓂ ᐱᓯᒪᙱᓐᓂᖏᓐᓄᑦ ᐅᕝᕙᓘᓐᓃᑦ ᑮᓇᐅᔭᖃᕐᕕᖏᑦ ᐃᓕᔭᐅᔫᒐᓗᐊᓂᒃ ᑭᖑᕙᓯᒃᑎᑦᑎᖃᑦᑕᕐᒪᑕ ᐅᓪᓘᓅᒃ ᒪᕐᕉᖕᓄᑦ.

ᐃᑲᔫᑎᒃᓴᐃᑦ ᐱᒻᒪᕆᐊᓘᖕᒪᑕ ᓄᓇᓕᖕᓃᑦᑐᓄᑦ ᒥᑭᓐᓂᕐᓴᓄᑦ ᐃᖅᑲᓇᐃᔮᒃᓴᖃᓗᐊᖃᑦᑕᙱᑦᑐᓂᒃ, ᖁᑭᐊᖅ ᐅᖃᕐᑐᖅ. ᐅᖃᖅᖢᓂ ᑕᒪᒃᑯᐊ ᐱᔭᐅᖃᑦᑕᕆᐊᖃᕐᓂᖏᓐᓂᒃ ᓂᕿᓄᑦ ᐊᒻᒪ ᐊᑭᓕᐅᑎᒃᓴᓄᑦ ᐃᓅᓯᕐᒧᑦ ᐊᑐᕆᐊᓖᑦ ᐊᑭᑦᑐᕆᐊᖏᓐᓇᖅᑎᓪᓗᒋᑦ.

ᖁᕿᐊᖅ ᐊᐱᕆᑎᓪᓗᒍ ᓄᓇᕗᒥᑦ ᒐᕙᒪᒃᑯᑦ ᖃᓄᐃᓕᐅᕐᒪᖔᑕ ᐊᑭᑦᑐᕆᐊᖅᐸᓪᓕᐊᔪᓂᒃ ᐅᑯᓄᖓ ᐃᑲᔫᑎᑖᖃᑦᑕᖅᑐᓄᑦ, ᓇᑲᓱᒃ ᑭᐅᓚᐅᕐᑐᖅ ᐃᑲᔫᑎᑖᕈᑎ ᖃᖓᑦᑎᐊᓵᖅ ᖁᕝᕙᕆᐊᖅᑕᐅᓚᐅᕐᓂᕋᖅᖢᓂᒋᑦ 34 ᐳᓴᓐᑎᒥᒃ.

ᖁᕝᕙᕆᐊᕈᑎᑎᒍᓪᓕ ᐃᓚᒌᒃᑐᑦ ᐃᒡᓗᒥ 6-ᖑᒍᑎ ᑕᓗᕐᔪᐊᖅ ᑕᐃᒪᓕ ᐱᑖᖃᑦᑕᖅᑐᑦ $2,731 ᑕᖅᑭᕐᒧᑦ. ᐊᑕᐅᓯᖅ ᑕᓗᕐᔪᐊᖅᒥᐅᑕᖅ ᐃᒡᓗᖃᖅᑐᑐᐊᖅ ᐱᑖᖅᐸᒃᖢᓂ $992 ᑕᖅᑭᕐᒧᑦ.

ᓄᓇᕗᓕᒫᒥᓪᓕ ᐃᑲᔫᑎᑖᕈᑎᑦ ᐊᑕᐅᓯᕐᒧ ᐃᓄᑐᐊᕐᒧᑦ ᒫᓃᑉᐸᒃᑐᖅ $914ᓗ $1,048ᓗ ᐊᑯᓐᓂᖓᓂᒃ, ᒪᓕᒃᖢᑎ ᓇᓕᐊᓐᓂ ᓄᓇᖃᕐᓂᖏᓐᓂᒃ, ᐅᓇ ᐋᖅᑭᒃᑕᐅᓯᒪᔪᖅ ᐱᓕᕆᕝᕕᖕᓄᑦ ᐄᐳᕈᒥ ᓴᖅᑭᑕᐅᓚᐅᕐᓯᒪᔪᓂᒃ ᓄᑖᑦ ᐊᑭᓕᖅᑕᐅᔾᔪᑎᑦ ᐊᑐᖅᑎᑕᐅᓕᖅᑎᓪᓗᒋᑦ.

ᖁᕿᐊᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ “ᑕᑯᔪᒪᔪᖓ ᑐᐊᕕᕐᓇᖅᑐᓄᑦ ᐃᑲᔫᑎᒃᓴᓂᒃ ᓇᓗᓇᐃᒃᑯᑎᖃᙱᑦᑐᓄᑦ.

“ᑖᓐᓇ ᐃᑲᔪᕋᔭᒻᒪᕆᖕᒪᑦ.”