ᒪᓕᒐᓕᕆᕕᒡᔪᐊᕐᒥ ᐊᐅᐸᔮᖅᑐᓂ ᐊᑐᖅᑳᑎᒋᔪᑦ

ᐋᑐᕚ — ᐅᓄᕈᓘᔭᖅᑐᑦ ᐊᐅᐸᔮᖅᑐᒥ ᐅᕕᓂᕐᕈᖅᓯᒪᔪᑦ ᒪᓕᒐᓕᕆᕕᒡᔪᐊᑉ ᓵᑦᑎᐊᖓᓃᓚᐅᕐᑐᑦ ᓈᑦᑏᖑᔭᓛᕐᓂᐊᖅᒥᓐ ᒫᓂ 500 ᐅᖓᑖᓃᑦᑐᓂᒃ ᐅᐸᒍᑎᔪᑦ ᑲᑎᑎᓪᓗᒋ ᐆᒧᖓ ᓂᐅ ᑎᒧᑯᕌᑎᒃ ᐹᑎᒃᑯᑦ ᐋᖅᑭᒃᑕᖓᓄᑦ ᐆᒧᖓ ᓱᓕᓂᕐᒧᑦ ᐊᒻᒪ ᒪᓕᒐᓕᕆᓂᕐᒧ.

ᐊᐅᐸᔮᖅᑐᑦ ᐅᕕᓂᕈᐃᑦ ᓇᓗᓴᐃᒃᑯᑎᒋᔭᐅᓯᒪᓕᕐᒪᑦ ᒪᓕᒐᓕᕆᓂᒃᑯᑦ ᐱᓕᕆᐊᖑᔭᕆᐊᖃᕐᓂᖏᑦ ᑲᓇᑕᒥ ᐃᓕᓐᓂᐊᕆᐊᖅᕕᕕᓂᕐᓄᑦ ᓈᒻᒪᙱᓕᐅᕈᑎᖃᖅᑐᕕᓂᕐᓄᑦ, ᑖᒃᑯᓇᓂ ᐊᕐᕌᒍᒐᓴᒻᒪᕆᐊᓗᖕᓂ ᓄᓇᖃᖅᑳᖅᑐᑦ ᕿᑐᕐᖓᖏᑦ ᐱᑦᑎᐊᖅᑕᐅᖃᑦᑕᙱᓯᒪᕐᔪᐊᖅᑐᑦ ᐃᓕᓴᐃᔨᖏᓐᓄᑦ ᐊᒻᒪᓗ ᑐᒃᓯᐊᕐᕕᓕᕆᔨᓄᑦ.

ᐋᖅᑭᒃᑕᐅᓯᒪᓪᓗᓂ ᓄᓇᕗᒧᑦ ᒪᓕᒐᓕᐅᖅᑎ ᒪᒥᓛᖅ ᖃᖅᑲᖅᒧᑦ ᐊᒻᒪ ᓂᐅ ᑎᒧᑯᕌᑎᒃ ᐹᑎᐅᖃᑎᖓᓄᑦ ᒪᓕᒐᓕᐅᖅᑎ ᓵᓕ ᐋᙵᔅᒧᑦ, ᑲᑎᖃᑎᒌᖕᓂᖅ ᐊᑐᖅᑕᐅᓕᓚᐅᖅᑐᖅ ᒪᓕᒐᓕᐅᖅᑎ ᔪᓚᐃ ᐱᒋᐊᓕᓵᖅᑎᓪᓗᒍ ᑖᒃᑯᐊ ᒐᕙᒪᑐᖃᒃᑯᓐᓂ ᐃᖅᑲᖅᑐᐃᕕᒃᑎᒍᑦ ᖃᐅᔨᓴᖁᔨᓪᓗᑎᒃ ᐱᕋᔭᒍᑎᐅᓂᑯᐊᓗᖕᓂ ᐅᑯᓄᖓ ᓄᓇᖃᖅᑳᖅᑐᓄᑦ ᐅᑯᓇᓂ ᐃᓕᓐᓂᐊᕆᐊᖅᕕᕕᓂᕐᓂᒃ.

ᑕᖅᑭᐅᓕᕐᑐᓂ ᐊᓂᒍᖅᐸᓪᓕᐊᓵᕐᓂᑯᓂᒃ ᑲᓇᑕᒥᐅᑕᑦ ᖃᐅᔨᕙᓪᓕᐊᑲᑕᓕᓚᐅᕐᒪᑕ ᓄᓇᖃᖅᑳᖅᑐᑦ ᓄᑕᕋᖏᑦ ᐱᑦᑎᐊᖅᑕᐅᕙᓚᐅᖅᓯᒪᙱᓐᓂᖏᓐᓂᒃ ᐃᓕᓐᓂᐊᕆᐊᖅᕕᐅᖃᑦᑕᓚᐅᖅᓯᒪᔪᓂᒃ ᓇᓂᓯᑲᑕᓕᖅᑎᓪᓗᒋᑦ ᓇᓗᓇᐃᖅᓯᒪᙱᑦᑐᓂᒃ ᐃᓗᕕᖕᓂ ᐃᓕᓐᓂᐊᕆᐊᖅᕕᐅᖃᑦᑕᓚᐅᖅᓯᒪᔪᓂᒃ ᑕᒪᒃᑯᐊᓗ ᑭᖑᓪᓕᖅᐹᖏᑦ ᒪᑐᔭᐅᓚᐅᖅᓯᒪᓪᓗᑎᒃ 1996-ᒥ

“ᖁᔭᓐᓇᒦᒃ ᐃᒃᐱᒍᓱᑦᑎᐊᕋᔅᓯ,” ᖃᖅᑲᖅ ᐅᖃᖅᑐᖅ ᐃᓄᒋᐊᓄᑦ, ᓴᖅᑭᖢᓂᓗ ᐃᒃᐱᒍᓱᖕᓂᖓ. “ᐱᔾᔪᑎᒋᓗᐊᖅᑕᕗᓪᓕ ᑕᕝᕙᓃᓐᓂᑦᑎᓐᓂᒃ ᑕᐃᑯᐊ ᓄᑕᕋᐃᑦ ᐃᓱᒪᒋᓪᓗᒋᑦ.”

ᖃᖅᑲᖅ ᒐᕙᒪᒃᑯᑦ ᓯᕗᓕᐅᖅᑎᖏᓐᓂᒃ ᓈᒻᒪᒃᓴᙱᖢᓂ ᐅᖃᓪᓚᓚᐅᖅᑐᖅ ᐱᓕᕆᑦᑎᐊᙱᓗᐊᕐᓂᖏᓐᓂᒃ ᓱᓕᔪᓂᒃ ᐊᒻᒪ ᐋᖅᑭᒋᐊᒃᑲᓐᓂᕋᓱᖕᓂᕐᒥᒃ. ᓂᐅ ᑎᒧᑯᕌᑎᒃᑯᓐᓄᑦ ᐃᓚᒋᔭᐅᔪᖅᑐᓴᖅᑎᑦᑎᓚᐅᕐᓯᒪᖕᒪᑦ ᒪᐃᒥ ᓂᕈᐊᒐᒃᓴᐅᔾᔮᔪᓐᓃᕐᓂᕋᖅᖢᓂ ᓄᓇᕗᒧᑦ ᒪᓕᒐᓕᐅᖅᑎᐅᓂᕐᒧᑦ ᑭᖑᓪᓕᕐᒥ ᒐᕙᒪᑐᖃᒃᑯᑦ ᓂᕈᐊᕐᓇᐅᓛᖅᑐᒥ ᑐᓴᖅᑎᑦᑎᑲᓐᓂᖅᐸᑕ — ᑕᒪᓐᓇ ᐱᓇᓱᐊᕈᓯᕐᓂ ᐊᒡᒋᖅᑐᓂ ᐊᑐᖅᑕᐅᑐᐃᓐᓇᕆᐊᖃᖅᖢᓂ.

“ᒐᕙᒪᑐᖃᒃᑯᑦ ᐱᓕᕆᑦᑎᐊᙱᓗᐊᖅᑐᐊᓘᖕᒪᑕ ᑕᒪᒃᑯᓂᖓ ᓱᓕᔪᓂᒃ ᑐᓴᐅᒪᑎᑦᑎᙱᓗᐊᖅᖢᑎᒃ. ᖃᐅᔨᒪᔪᖓ ᖃᐅᔨᒪᓂᔅᓯᓐᓄᑦ ᑲᓇᑕᒥᐅᑕ ᐅᔾᔨᕈᓱᒃᑲᓐᓂᖅᐸᓪᓕᐊᔪᑦ ᒪᓕᒐᖅᑎᒍᑦ ᓈᒻᒪᙱᓗᐊᖅᑐᐊᓘᕙᖕᓂᖓᓂᒃ ᐊᒻᒪ ᐊᔾᔨᒌᒃᑎᑦᑎᙱᓗᐊᕌᓗᒃᖢᑎᒃ ᑲᓇᑕᒥ,” ᐅᖃᖅᑐᖅ.

ᓄᓇᖃᖅᑳᖅᑐᑦ ᐃᓐᓇᑐᖃᖏᑦ ᒪᓕᒐᓕᕆᕕᒡᔪᐊᒥᒃ ᐱᓱᒃᑐᓂ ᓯᕗᓪᓕᐅᓯᒪᓚᐅᕐᑐᑦ ᐅᕗᖓ ᒪᓕᒐᓕᕆᔨᒃᑯᑦ ᐱᓕᕆᕝᕕᖓᓄᑦ — ᑕᐅᓐᑕᐅᓐ ᐋᑐᕚᒦᑦᑐᒧᑦ — ᑕᒪᒃᑯᐊ ᐃᓚᐅᔪᑦ ᐅᖃᑲᑕᒃᖢᑎᒃ “ᐱᖁᔭᖅᑕᖃᙱᑉᐸᑦ ᓴᐃᒪᓂᖅᑕᖃᔾᔮᙱᑦᑐᖅ” ᐊᒻᒪᓗ ᓴᐃᒪᑎᓂᒃ ᑎᒍᒥᐊᖅᖢᑎᒃ ᐊᒻᒪ ᑎᑎᕋᖅᓯᒪᔪᓂ ᑕᒪᑐᒥᖓ ᐱᓕᕆᐊᖃᖅᓯᒪᓂᕐᒥ ᐅᖃᖁᔨᓯᒪᔪᓂᒃ.

ᓵᓐ ᕗᕋᓐᔅ, ᐊᓪᓚ ᐅᕙᓂ ᓄᓇᖃᕐᓂᑯ ᑲᓇᕗᐊᑭ ᒧᕼᐋᒃ ᐊᓪᓚᐃᑦ ᓄᓇᖓᓂ, ᐃᓚᐅᓚᐅᕐᒥᔪᖅ ᐱᓱᒃᑐᓂᒃ ᐊᒻᒪ ᐅᖃᖅᖢᓂ ᐱᓕᕆᖃᑕᐅᔪᒥᓇᕐᓯᓯᒪᓂᕋᖅᖢᓂᐅᒃ ᖃᖅᑲᐅᑉ ᐱᓕᕆᐊᕆᔭᖓ ᐅᓇ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᐱᓇᓱᐊᒻᒪᕆᒃᑎᓪᓗᒍ

“ᐃᓄᖁᑎᕗᑦ ᐊᓈᓇᖏᓐᓂᒃ ᐱᒻᒪᕆᐅᑎᑦᑎᓂᕐᓴᐅᕙᖕᒪᑕ ᐊᒻᒪᓗ ᓄᓇᖃᖅᑳᖅᑐᑦ ᐊᕐᓇᖏᑦ ᐱᓕᕆᔨᒻᒪᕆᐅᕙᖕᒪᑕ ᐃᓱᒪᒃᑯᑦ ᐆᒻᒪᑎᒃᑯᓪᓗ,” ᐅᖃᖅᑐᖅ. “ᑕᒪᓐᓇ ᐱᓕᕆᓂᐅᔪᖅ ᐱᓕᕆᐊᖑᔭᕆᐊᖃᕐᒪᑦ. ᐱᓇᓱᒋᐊᖃᒻᒪᕆᒃᑲᑦᑕ ᐆᒻᒪᑎᑦᑎᒍᑦ ᐊᒻᒪ ᐃᓱᒪᑦᑎᒍᑦ ᑐᑭᓯᑎᓐᓇᓱᒡᓗᒋᑦ ᓇᐅᒃᑯᑦ ᓈᒻᒪᙱᒃᑐᖃᓗᐊᖅᑐᐊᓘᓂᖓᓂᒃ ᖃᓄᐃᓕᐅᖅᐸᓪᓕᐅᒍᑎᐅᓯᒪᔪᓂᒃ.”

ᐹᓪ ᕼᐊᓐᓄᕆ ᐱᑕᕗᐊᕗᐊᒥᐅᑕᖅ, ᐋᑐᕚ ᒥᒃᓵᓂᒃ ᓄᓇᓕᖕᓂ, ᐃᓚᐅᓚᐅᕐᒥᔪᖅ ᐃᓱᒪᒋᓪᓗᓂᐅᒃ ᔭᓂᕗ ᓯᐸᓐᔅ, ᑖᓐᓇ ᓴᐃᓐ ᐋᓐ ᐃᓕᓐᓂᐊᖅᕕᓕᐊᕆᐊᖅᐸᓚᐅᕐᓯᒪᔪᖅ ᕗᐊᑦ ᐋᐸᓂ ᓄᓇᖃᖅᑳᖅᑐᓄᑦ ᐋᓐᑎᐅᓂᐅᑉ ᐅᐊᖕᓇᖅᐸᓯᐊᓂᒃ ᓄᑕᕋᐅᑎᓪᓗᒍ.

“ᑕᒪᑐᒧᖓ ᒪᓕᒐᓕᕆᓂᒃᑯᑦ ᐱᓕᕆᓂᖅᑕᖃᕆᐊᓕᒃ ᐅᕝᕙᓘᓐᓃᑦ ᑐᖁᕋᐃᔨᑕᓕᐊᓘᖕᒪᑦ ᑲᓇᑕᒥ,” ᐅᖃᖅᑐᖅ. “ᐊᐃᑦᑖᖑᒐᓗᐊᖅ ᑕᕝᕙᓂ ᐲᔅ ᑕᐅᕙᐅᑉ ᓵᖓᓂ ᐃᓕᓴᖅᓯᓯᒪᓂᕐᒧᑦ ᓄᑕᕋᕐᓂ ᒪᓕᒐᓕᕆᓂᒃᑯᑦ ᐱᓕᕆᐊᖑᓯᒪᙱᑦᑐᓂᒃ ᐃᓱᒪᒋᔭᖃᕋᑦᑕ ᑖᒃᑯᐊᑐᐊᕐᓗ ᓇᓗᓇᐃᖅᑕᐅᓯᒪᓪᓗᑎᒃ,” ᐅᖃᒃᑲᓐᓂᖅᑐᖅ.

ᐅᑯᐊ ᖃᖅᑲᖅ ᐊᒻᒪ ᐋᙵᔅ ᐋᖅᑭᒃᓱᐃᓯᒪᒐᓗᐊᖅᑎᓪᓗᒋᑦ ᐊᓯᖏᓐᓂᒃᑕᐅᖅ ᐅᖃᓪᓚᒃᑎᖃᑲᑕᓚᐅᕐᒥᔪᑦ ᐅᑯᐊ ᐃᓚᐅᓪᓗᑎᒃ ᐊᓕᖃ ᐃᓪᓚᐅᖅ, ᑖᓐᓇ ᑐᓴᖅᑎᑦᑎᓵᓚᐅᕐᑐᖅ ᓂᐅ ᑎᒧᑯᕌᑎᒃ ᐹᑎᑯᓐᓄᑦ ᓂᕈᐊᒐᒃᓴᐅᓂᐊᕐᓂᕐᒥᓂᒃ ᓄᓇᕗᒧᑦ ᐊᒻᒪᓗ ᐊᓯᖏᓐᓂᒃ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓂᕐᓂᒃ.

ᐲᑕ ᐃᕐᓂᖅ, ᓄᓇᕗᒧᑦ ᑲᒥᓯᓇᐅᓚᐅᖅᓯᒪᔪᖅ ᐅᖃᓪᓚᓚᐅᕐᒥᔪᖅ ᐃᓄᒋᐊᓄᑦ ᐅᖃᐅᓯᖃᖅᖢᓂ ᐊᑐᖃᑦᑕᕐᓂᑯᖏᓐᓂᒃ ᐃᒡᓗᓕᒑᕐᔪᒃᒥᑦ ᐃᓕᓐᓂᐊᕆᐊᖃᑦᑕᖅᑎᓪᓗᒍ ᐅᕗᖓ ᓲ ᔫᓴᕝ ᐴᓂᐃᑦ ᒐᕙᒪᑐᖃᒃᑯᑦ ᐃᓕᓐᓂᐊᖅᕕᒃᒧᑦ.

“ᐱᑦᑎᐊᖅᑕᐅᕙᓚᐅᖅᓯᒪᙱᑦᑐᒍᑦ ᖃᓄᑐᐃᓐᓇᑦᑎᐊᖅ, ᐃᖅᑲᓇᐃᔭᖅᑎᓄᑦ, ᑐᒃᓯᐊᑦᑐᓕᕆᔨᓄᑦ,” ᐅᖃᖅᑐᖅ. “ᐃᓕᖅᑯᓯᑦᑎᓐᓂᒃ ᐊᓯᐅᔨᑎᑕᐅᓚᐅᖅᑐᒍᑦ. ᐅᖃᐅᓯᑦᑎᓐᓂᒃ ᐊᓯᐅᔨᑎᑕᐅᓚᐅᖅᑐᒍᑦ. ᐃᓕᖅᑯᓯᒃᑯᑦ ᐅᒃᐱᕆᔭᐅᔪᓂᒃ ᐊᓯᐅᔨᓪᓗᑕ ᒪᑯᑎᑐᓇᖅ ᐊᖓᒃᑯᓕᕆᓂᕐᒥᒃ ᐊᒻᒪᓗ ᐊᖓᔪᖅᑳᖑᔪᓐᓇᕐᓂᖅᒥᒃ.”

ᐅᓄᕐᑐᒻᒪᕆᐊᓗᐃᑦ ᐃᓗᕖᑦ ᓇᓗᓇᐃᒃᑯᑎᖃᙱᑦᑐᑦ ᓇᓂᔭᐅᕙᓪᓕᐊᑎᓪᓗᒋᑦ ᐃᓕᓐᓂᐊᕆᐊᖅᕕᕕᓂᕐᓂᒃ, ᐅᐸᒍᑎᓯᒪᔪᑦ ᓇᓗᓇᐃᕐᓯᒃᑲᓐᓂᓚᐅᕐᒥᔪᑦ ᑖᒃᑯᐊ ᐃᓅᔪᓐᓃᖅᑐᕕᓂᑯᓗᐃᑦ ᐃᓱᒪᒋᔭᐅᖁᔭᐅᓪᓗᑎᒃ.

“ᐃᓗᕕᖅᑕᐅᓚᐅᕐᓯᒪᖕᒪᑕ ᐳᐃᒍᖅᑕᐅᓂᐊᕐᒪᑕ, ᑭᓯᐊᓂᓕ ᐳᐃᒍᖅᑕᐅᓯᒪᙱᑦᑐᑦ,” ᐅᖃᖅᑐᖅ ᓴᐃᑐᑭ ᔫᒥ ᐃᖃᓗᖕᓂ ᓄᓇᓕᒃ. “ᓱᓕᔪᒥᓐ ᓴᖅᑭᑦᑐᖃᒻᒪᕆᒃᐳᑦ ᐊᒻᒪᓗ ᑖᒃᑯᓄᖓ ᓱᕈᓯᕐᓄᑦ ᐃᑲᔪᕈᑎᒻᒪᕆᐅᓂᐊᖅᖢᓂ. ᑖᒃᑯᐊ ᒪᓕᒐᖅᑎᒍᑦ ᐱᓕᕆᔾᔪᑎᐅᓚᐅᖅᑎᓪᓗᒋᑦ ᑕᕐᓂᖏᑦ ᐃᓱᒪᕐᓱᓕᕐᓂᐊᕐᑐᑦ.”