ᒪᓕᒡᓗᒋ ᓘᒃᑖᑉ ᐊᑐᖁᔭᖏᑦ, ᓄᓇᕗᑦ ᒪᓕᒐᓕᐅᕐᑎᖓ ᐅᖃᐅᔾᔨᔪᖅ ᓄᓇᖃᖅᑐᓂᒃ
“ᑕᒪᕐᒥ ᖃᓄᐃᓕᐅᕆᐊᓕᖕᓂ ᐊᑐᕐᓗᑎᒃ ᑭᓇᑐᐃᓐᓇᖅ ᖁᐊᕐᓵᕐᓇᖅᑐᒦᖁᓇᒍ ᐊᒻᒪ ᐋᓐᓂᐊᖁᓇᒍ”
ᒪᒥᓛᖅ ᖃᖅᑲᖅ, ᒪᓕᒐᓕᐅᖅᑎ ᓄᓇᕗᒧᑦ, ᑭᒡᒐᖅᑐᖅᑕᖏᓐᓂᒃ ᒪᓕᖁᔨᔪᖅ ᐊᑐᖁᔭᐅᔪᓂᒃ ᓄᓇᕗᒥᑦ ᐊᖓᔪᖅᑳᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ. ᖃᖅᑲᖅ ᐅᖃᓚᐅᕐᒥᔪᖅ ᐱᓕᕆᐊᖃᕐᓂᖓᓂᒃ ᑐᓴᐅᒪᔾᔪᑎᒃᓴᓂᒃ ᑭᒡᒐᖅᑐᖅᑕᖏ ᒐᕙᒪᑐᖃᒃᑯᓐᓂᒃ ᐃᑲᔫᑎᑖᕈᑎᒃᓴᖏᓐᓂᒃ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᐅᑎᓪᓗᒍ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Follow chief public health officer’s orders, Nunavut’s MP tells residents
ᓄᓇᕗᒧᑦ ᒪᓕᒐᓕᐅᖅᑎᐅᖃᑕᐅᔪᖅ ᒪᓕᒐᓕᕆᔨᕐᔪᐊᓂᒃ ᐅᖃᐅᔾᔨᔪᖅ ᓄᓇᖃᖅᑐᓂᒃ ᒪᓕᖁᔨᓪᓗᓂ ᓄᓇᕗᒥᑦ ᐊᖓᔪᖅᑳᒥ ᐋᓐᓂᐊᖃᕐᓇᙱᑦᑐᓕᕆᔨᒥ ᓄᕙᒡᔪᐊᕐᓇᖅ-19 (Covid-19) ᐋᓐᓂᐊᕕᔾᔪᐊᕐᓇᐅᓂᖓᓂᒃ.
ᓄᓇᕗᒥᑦ, ᓄᕙᒡᔪᐊᖅ-19 ᐊᒃᑐᐃᓂᖓ ᐱᓗᐊᖅᑐᐊᓘᑐᐃᓐᓇᕆᐊᖃᕐᒪᑦ, ᒪᒥᓛᖅ ᖃᖅᑲᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᑕᐅᑐᒃᖢᒋ ᐳᕙᒡᓗᒃᑐᑦ ᐅᓄᕐᓂᖏᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᐅᑎᖃᙱᓗᐊᕐᑐᑦ, ᐃᒡᓗᑖᕆᐊᖃᕐᓂᖅ, ᐊᑭᓕᕐᓱᒐᕐᓂᖅᑐᓂᒃ ᐃᓅᓯᖃᕆᐊᖃᕋᓱᖕᓂᖅ…ᑕᐃᒪᓐᓇᓗ ᐅᓄᕐᑐᒻᒪᕆᐊᓗᖕᓂᒃ ᐃᓄᖕᓂ ᐊᓯᐅᔨᓇᔭᖅᑐᒍᑦ ᓲᖃᐃᒻᒪ ᑭᓇᑐᐃᓐᓇᕐᒧᓐ ᐱᔭᐅᔭᕆᐊᖃᖅᑐᑦ ᐊᑯᑦᑐᔫᑎᐅᓂᖏᓐᓄᑦ. ᐅᓄᕐᓯᒋᐊᖅᑎᑦᑎᓂᖅ ᖃᐅᔨᓴᕈᑎᓂᒃ, ᐅᓄᕐᓯᒋᐊᖅᑎᑦᑎᓗᑎᒃ ᓇᖕᒥᓂᖅ ᓴᐳᑎᓯᒪᒍᑎᓂᒃ ᐱᖁᑎᓂᒃ, ᐊᓂᖅᓵᖅᑑᑎᒃᓴᓂᒃ ᓄᓇᓕᖕᓄᐊᖅᑎᑦᑎᓂᖅ, ᐅᐊᓴᐅᑎᑖᖅᑎᑦᑎᒃᑲᓐᓂᕐᓂᖅ, ᓴᓗᒻᒪᖅᓴᐅᑎᑖᒃᑲᓐᓂᕐᓂᖅ. ᑕᒪᔾᔭ ᐱᔭᕆᐊᖃᖅᑕᕗᑦ ᒫᓐᓇ,” ᐅᖃᖅᑐᖅ ᐊᓐᑏᐲᑯᑦ (NDP) ᒪᓕᒐᓕᐅᖅᑎᖓ, ᑖᓐᓇ ᓂᕈᐊᕆᔭᐅᓚᐅᕐᓯᒪᔪᖅ ᐅᒃᑑᐱᕆᐅᓚᐅᕐᓯᒪᔪᒥᑦ.
ᓄᓇᕗᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᒥ ᓇᓂᓯᓚᐅᙱᑦᑐᑦ ᑎᑭᖢᒍ ᐄᐳᕈᓪ 20, ᐊᒻᒪᓗ ᓄᓇᕗᑦ ᐊᐅᓪᓚᑲᑕᕐᓂᒃᑯᑦ ᐱᖁᔭᖏᑦ ᒪᓕᒋᐊᖃᓪᓚᕆᒃᓯᒪᓪᓗᑎᒃ.
“ᒫᓐᓇ ᐋᓐᓂᐊᖃᖅᑐᖃᙱᓯᒪᔪᖅ ᑕᒪᑐᒥᖓ. ᑭᓯᐊᓂᓕ ᑖᒪᓂ ᐋᓐᓂᐊᕆᔭᐅᓕᕐᐸᑦ ᑕᒪᓐᓇ ᕿᓚᒥᐊᓗ ᐊᐃᑦᑑᑎᐅᑲᑕᒐᔭᕐᒪᓐ,” ᖃᖅᑲᖅ ᐅᖃᖅᑐᖅ.
ᖃᖅᑲᖅ ᐅᖃᓚᐅᕐᒥᔪᖅ ᐃᑲᔪᖅᑐᐃᓯᒪᓂᖓᓂᒃ ᐃᓱᒪᓕᐅᕆᔭᐅᔪᓂᒃ ᓄᓇᕗᒥᑦ ᐊᖓᔪᖅᑳᒧᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᓘᒃᑖᖅ ᒪᐃᑯᓪ ᐹᑐᓴᓐ.
“ᐅᓇ ᓘᒃᑖᖅ ᐹᑐᓴᓐ ᐱᓕᕆᓯᒪᑦᑎᐊᖅᑐᐊᓘᖕᒪᑦ. ᑕᒪᓐᓇ ᑲᒪᒋᔭᖃᕆᐊᖃᕈᓘᔭᕐᓇᕐᒪ, ᐊᒻᒪ ᐊᒃᓱᕈᕐᓇᖅᑐᐊᓘᓪᓗᓂ. ᐃᓱᒪᓕᐅᕆᓂᐅᖕᒪᑦ ᒪᓂᓯᒪᑐᐃᓐᓇᖅᑐᓄᑦ ᐃᓄᖕᓄᑦ, ᐃᓄᒋᐊᒃᑐᓃᒃᑲᓗᐊᕈᑎᒃ ᐅᕝᕙᓘᓐᓃᑦ ᖃᓪᓗᓈᓃᒃᑲᓗᐊᕈᑎ ᐃᓄᒋᐊᒃᑐᒦᑦᑕᐃᓕᓪᓗᑎᒃ. ᖁᔭᓐᓇᒦᑦ ᑖᓐᓇ ᒫᓐᓇ ᐋᓐᓂᐊᖅᑐᖃᙱᒻᒪᑦ ᓱᓕ.” ᐅᖃᖅᑐᖅ.
“ᐃᓱᒪᔪᖓᓕ ᖃᓄᐃᑦᑕᐃᓕᒪᓂᓕᕆᓂᖅ ᐋᖅᑭᒃᓱᖅᑕᐅᓯᒪᔪᑦ ᐅᕘᓇ ᓘᒃᑖᖅ ᐹᑐᓴᓐᑯ ᐊᒻᒪ ᓄᓇᕗᑦ ᒐᕙᒪᑯᑦ ᐊᑐᖅᑕᐅᔭᕆᐊᖃᓪᓚᕆᖕᓂᖏᓐᓂᒃ ᐊᒻᒪᓗ ᑕᒪᒃᑯᐊ ᐅᕙᑦᑎᓐᓂ ᐅᓗᕆᐊᓇᙱᑦᑐᒦᑎᑦᑎᓯᒪᓪᓗᑎᒃ.”
ᖃᖅᑲᖅ, ᒫᓐᓇ ᐋᑐᕚᒦᑦᑐᖅ, ᐅᖃᓚᐅᕐᑐᖅ ᑲᑎᒪᖃᑎᖃᖃᑦᑕᕐᓂᕐᒥᓂᒃ ᓄᓇᕗᑦ ᓯᕗᓕᐅᕐᑎᖓᓂᒃ ᔫ ᓴᕕᑲᑖᖅᒥᑦ, ᓄᓇᕗᑦ ᑐᙵᕕᒃᑯᓐᓂᒃ ᐊᒻᒪᓗ ᐃᓄᐃᑦ ᑕᐲᕆᑦ ᑲᓇᑕᒥ ᐅᖃᐅᓯᖃᖅᖢᑎᒃ ᓄᓇᕗᑦ ᖃᓄᐃᓕᐅᕈᑎᒋᓯᒪᔭᖏᓐᓂᒃ ᐋᓐᓂᐊᕕᔾᔪᐊᕐᓇᒧᑦ.
“ᓘᒃᑖᖅ ᐹᑐᓴᓐᑐᑦᑕᐅᖅ ᐅᖃᓪᓚᖃᑎᖃᖃᑦᑕᕐᒥᔪᖓ ᐊᒻᒪ ᑐᑭᓯᓇᓱᒃᓯᒪᓪᓗᖓ ᑕᒪᑐᒧᖓ ᖃᓄᐃᓕᐅᕆᐊᖃᕐᓂᕐᒥᒃ ᐊᒻᒪ ᖃᓄᖅ ᐱᕙᓪᓕᐊᓂᖓᓂᒃ ᐊᒻᒪ ᐱᕙᓪᓕᐊᓂᖓ ᖃᓄᐃᑉᐸᓪᓕᐊᓂᖓᓂᒃ. ᐱᓕᕆᐊᖃᕋᓱᒃᑐᖓ ᖃᓄᖅ ᐱᐅᓂᖅᐹᒃᑯᑦ ᑕᒪᑐᒥᖓ ᑐᓴᕋᓱᖕᓂ ᐊᔪᕐᓇᙱᑎᓐᓇᓱᒃᖢᒍ,” ᖃᖅᑲᖅ ᐅᖃᖅᑐᖅ.
ᖃᖅᑲᖅ ᐊᒻᒪ ᑎᑎᕋᕐᕕᖓᓃᑦᑐᑦ ᐋᖅᑭᒃᓱᐃᕙᓪᓕᐊᔪᑦ ᐅᖃᓕᒫᒐᒃᓴᓂᒃ ᑐᓴᐅᒪᒍᑎᐅᓂᐊᖅᑐᓂᒃ ᓄᓇᕗᒻᒥᐅᓄᑦ ᒪᑯᓄᖓ ᐱᓇᓱᒐᓱᖕᓂᕐᒥ ᒐᕙᒪᑐᖃᒃᑯᑦ ᐃᑲᔫᓯᐊᒃᓴᖏᓐᓂᒃ ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ. ᐅᑯᐊ ᐅᖃᓕᒫᒐᒃᓴᑦ ᓄᓇᓕᖕᓄᑦ ᑐᓂᐅᖃᖅᑕᐅᓇᔭᖅᑐᑦ ᐊᒻᒪ ᑐᓴᐅᒪᔾᔪᑎᓕᕆᓂᒃᑯᑦ ᓴᖅᑭᔮᖅᑎᑕᐅᓗᑎᒃ.
“ᐅᓇ ᓱᕈᓯᕐᓯᐅᑎᑖᕈᑎ ᐊᖏᒡᓕᒋᐊᖅᑎᑕᐅᓪᓗᓂ, ᑕᐃᒪᓕ ᑕᒪᓐᓇ ᖃᓄᖅ ᑐᑭᖃᖅᐸ? ᑕᒪᒃᑯᓂᖓ ᑐᓴᒐᒃᓴᓂᒃ ᑐᑭᓯᓇᖅᑐᓂᒃ ᐱᑕᖃᕐᓗᓂ…ᓴᖅᑭᔮᕐᓗᑎᒃ ᑎᑎᖃᓂᒃ ᐊᒻᒪᓗ ᖃᓄᖅ ᐃᑲᔫᑎᒃᓴᓂᒃ ᐱᓇᓱᒍᓐᓇᕐᒪᖔᑦ,” ᐅᖃᖅᑐᖅ ᖃᖅᑲᖅ.
“ᐃᓱᒫᓗᖕᓇᕐᒪᓐ ᒫᓐᓇ ᐊᒻᒪᓗ ᐃᓄᐃᑦ ᖃᐅᔨᓇᓱᒃᖢᑎᒃ ᖃᓄᐃᒻᒪᖔᑦ ᒫᓐᓇ ᐊᒻᒪ ᖃᓄᖅ ᑐᑭᖃᕐᒪᖔᑦ, ᑕᐃᒪᓕ ᐋᖅᑭᒃᓱᐃᒐᓱᒃᑲᑦᑕᖅ ᐅᖃᓕᒫᒐᒃᓴᓂᒃ ᐃᓄᖕᓄᑦ ᑐᑭᓯᔭᐅᔪᓐᓇᖅᑐᓂᒃ, ᐊᒻᒪ….ᐃᓄᐃᑦ ᐱᔪᓐᓇᕈᓐᓇᖅᑎᓪᓗᒋᑦ ᐊᔪᕐᓇᙱᓪᓗᓂ. ᓇᓗᓇᕐᓯᕈᓘᔭᖃᑦᑕᕐᒪᓐ ᐊᒻᒪ ᓈᒻᒪᒍᓐᓃᔭᖢᓂ ᒪᑯᓄᖓ ᒪᓕᒐᓕᕆᓂᒃᑯᑦ ᐅᖃᐅᓯᐅᕙᒃᑐᓄᑦ ᐊᒻᒪ ᐊᑐᖅᑕᐅᕙᓪᓕᐊᓂᕐᒧᑦ ᐅᖃᐅᓯᕐᓄᑦ.”
ᒫᓐᓇᓕ ᐱᐅᓂᖅᐹᖑᖕᒪᑦ ᑐᓴᒐᒃᓴᓕᐅᕐᓂᒃᑯᑦ ᐊᒻᒪ ᖃᕋᓴᐅᔭᒃᑯᑦ ᑎᑎᕋᑲᑕᖕᓂᒃᑯᑦ ᐃᓄᖕᓂ ᐅᖃᕐᓯᐅᔪᒪᒍᓂ, ᖃᖅᑲᖅ ᐅᖃᕐᒥᔪᖅ. ᐃᖅᑲᓇᐃᔭᖅᑎᖃᓂᓕᕋᓗᐊᖅᖢᓂ, ᐅᖄᓚᐅᑎᖏ ᓱᓕ ᐋᖅᑭᒃᓯᒪᓚᐅᙱᒻᒪᑕ ᐋᓐᓂᐊᕕᒡᔪᐊᕐᓇᖅ ᐱᒋᐊᓚᐅᖅᑎᓐᓇᒍ.
“ᐃᓄᖕᓂ ᐅᕙᓐᓄᑦ ᐅᖃᓪᓚᖃᑦᑕᖁᔨᒐᒪ ᓲᖃᐃᒻᒪ ᐃᑲᔫᑎᒋᖕᒥᒐᒃᑯ ᐊᐱᖅᑯᑎᓂᒃ ᑭᐅᔪᓐᓇᖅᖢᖓ ᐊᒻᒪ ᐊᐱᕐᓱᕈᓐᓇᖅᖢᖓ. ᐊᒻᒪᓗ ᒫᓐᓇ ᖃᓄᐃᓕᐅᕐᓇᐅᔪᖅ ᐅᖃᐅᓯᕆᔪᓐᓇᖅᖢᒍ ᒐᕙᒪᑐᖃᒃᑯᓐᓂᙶᕐᓗᖓ. ᐊᔪᕐᓇᕐᓂᕐᓴᐅᖕᒪᑦ ᐃᓄᐃᑦ ᑕᐃᒪᐃᙱᑉᐸᑕ ᓲᖃᐃᒻᒪ ᐅᖃᓪᓚᑐᐃᓐᓇᓕᕆᐊᖃᕋᒪ ᑕᒪᐅᓇᒥᐊᖅ ᐅᕝᕙᓘᓐᓃᑦ ᓈᒻᒪᒃᓴᖅᑎᑦᑎᒍᓐᓃᖅᑎᑦᑎᓗᖓ ᑭᓱᒧᑭᐊᖅ…ᐊᔪᕐᓇᕐᓂᕐᓴᐅᕙᖕᒪᑦ ᐅᖃᐅᓯᕆᔭᐅᔪᓂᒃ ᐱᓕᕆᐊᖃᕆᐊᒃᓴᖅ ᐅᕙᓐᓄᓪᓚᕆᒃ ᑐᓴᐅᒪᑎᑕᐅᙱᒃᑯᑎᒃ,” ᐅᖃᖅᑐᖅ.
ᖃᖅᑲᖅ ᐅᖃᒃᑲᓐᓂᓚᐅᕐᑐᖅ ᐱᒻᒪᕆᐊᓘᓂᖓ ᐃᓱᒪᒃᑯᑦ ᐋᓐᓂᐊᖃᕐᓂᖅ ᒫᓐᓇ ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ.
“ᓯᓚᒦᓚᐅᕐᐸᒡᓗᓯ, ᐅᖄᓚᐅᑎᓯ ᕿᒪᒃᓯᒪᓚᐅᑲᒡᓗᒍ. ᐱᓕᕆᐊᖃᕐᓗᓯ ᒥᕐᓱᒐᒃᓴᓂᒃ, ᓯᑭᑑ ᓴᓇᓗᒍᓘᓐᓃᑦ. ᐱᐅᒐᓗᐊᕐᑎᓪᓗᒍ ᑎᒍᒥᐊᒐᕐᓃᒃᑲᓗᐊᕐᓗᑎ, ᐱᒻᒪᕆᐊᓘᕗᖅ ᐅᖓᓯᒌᖃᑦᑕᐅᑎᓂᖅ. ᐱᐅᒻᒪᕆᒃᑐᖅ ᐱᓱᑲᑕᖕᓂᐊᕐᓗᓂ, ᑭᓯᐊᓂᓕ ᖁᓕ ᐅᖓᑖᓂ ᐊᑕᐅᑦᑎᒃᑰᕆᐊᖃᙱᑦᑐᑦ,” ᐅᖃᖅᑐᖅ.
“ᐊᑕᐅᑦᑎᒃᑯ ᐱᓕᕆᐊᖃᒌᒃᑯᑦᑕ ᐊᒻᒪ ᐊᑐᖁᔭᐅᔪᑦ ᖃᓄᐃᑦᑕᐃᓕᓂᕐᒧᑦ ᒪᓕᒃᑯᑦᑎᒍᑦ, ᖃᓄᐃᙱᑦᑐᓐᓇᖅᑐᒍᑦ ᑕᒪᑐᒧᖓ. ᐃᓱᒪᔪᖓᓕ ᐃᓄᐃᑦ ᐅᖓᓯᒌᑲᑕᒋᐊᖃᕐᓂᕐᒥ ᐱᓕᕆᐊᖃᕈᓐᓇᖅᑐᑦ ᑕᐃᒪᐃᒃᑲᓗᐊᕈᑎ ᐃᖕᒥᖕᓄ ᐅᖃᖃᑎᒋᒍᓐᓇᖅᓗᑎᒃ. ᐃᓱᒪᔪᖓᓕ ᖃᓄᐃᙱᒻᒪᖔ ᐃᓄᐃᑦ ᑲᑉᐱᐊᓱᒃᑲᓗᐊᕈᑎᒃ ᐃᓱᒫᓘᑎᖃᓗᐊᕈᑎᒡᓘᓐᓃᑦ. ᑕᒪᑦᑕ ᖃᓄᐃᓕᐅᕈᐊᓕᖕᓂ ᐱᓕᕆᐊᖃᕆᐊᖃᕋᑦᑕ ᑭᒃᑯᓕᒫᓂ ᖁᐊᕐᓵᕐᓇᖅᑐᒦᑎᑦᑎᔪᒪᙱᓐᓂᕐᒧᑦ ᐊᒻᒪ ᐋᓐᓂᐊᖁᔨᙱᓐᓂᕐᒧᑦ.”
(0) Comments