ᒪᕐᕉᒃ ᓄᓇᕗᒥᑦ ᐃᓕᓴᐃᔩᑦ ᐃᓕᓐᓂᐊᖅᑐᓕᕆᓂᕐᒧᑦ ᐃᓕᓴᕆᔭᐅᔾᔪᑎᑖᖅᑑᒃ

For English version, see 2 Nunavut teachers earn education awards

ᒪᕐᕉᒃ ᐃᓕᓴᐃᔩᒃ ᓄᓇᕗᒥ ᑐᓐᓂᖅᑯᓯᐊᕐᓂᐊᖅᑑᒃ ᐃᓐᑎᔅᐸᐃᔭᒥ ᐱᓕᕆᐊᖏᓐᓄᑦ ᐃᓄᐃᑦ ᐅᖃᐅᓯᖏᓐᓂᒃ ᐊᒻᒪ ᐃᓕᖅᑯᓯᖏᓐᓂᒃ ᓴᖅᑭᑎᑦᑎᓯᒪᓂᖏᓐᓄᑦ.

ᒫᓂᑲ ᐃᑦᑐᒃᓵᕐᔪᐊᑦ ᐃᖃᓗᖕᓂ ᓄᓇᖃᕐᑐᖅ ᐊᒻᒪ ᑲᖏᖅᖠᓂᕐᒥᐅᑕᖅ ᓈᑎᐊ ᓴᒻᒧᕐᑐᖅ ᐊᑐᓂ ᑐᓂᔭᐅᓚᐅᕐᒪᑎᒃ ‘ᓇᒧᙵᐅᕙᓪᓕᐊᓂᕐᒧᑦ ᑐᑭᒧᐊᖅᑎᑦᑎᓂᖅᒧᑦ: ᓄᓇᖃᖅᑳᖅᑐᑦ ᐃᓕᓐᓂᐊᖅᑎᓄᑦ ᐃᓕᓴᕆᔭᐅᔾᔪᑎᑦ ᐃᓐᑎᔅᐸᐃᔭᒥ ᐅᕙᓂ ᑲᓇᑕᒥ ᑲᑎᖃᑎᒌᖕᓂᕐᒥ ᓄᓇᖃᖅᑳᖅᑐᓂᒃ ᐃᓕᓐᓂᐊᖅᑎᑦᑎᓂᕐᒥ ᒪᓐᑐᕆᐊᒥᑦ ᓄᕕᐱᕆ   15-ᒥ.

ᐃᓕᓴᕆᔭᐅᔾᔪᑎ ᑐᕌᖓᔪᑦ ᓄᓇᖃᖅᑳᖅᑐᓂᒃ ᐃᓕᓴᐃᔨᓄᑦ, ᐊᑕᐅᓯᕐᒧᑦ ᓄᖃᑲᖅᑳᖅᑐᑦ ᑲᑐᔾᔨᖃᑎᒌᖏᓐᓄᑦ ᐊᒻᒪ ᐊᑕᐅᓯᖅ ᓄᓇᖃᖅᑳᑐᓂᙶᙱᑦᑐᖅ ᐃᓕᓴᐃᔨᒧᑦ ᐃᑲᔪᕐᓯᒪᔪᒧᑦ ᓄᓇᓕᖕᓂ ᐃᓕᓐᓂᐊᖅᑎᑦᑎᓂᒃᑯᑦ ᐊᒻᒪᓗ ᓄᓇᖃᖅᑳᖅᑐ ᐱᒻᒪᕆᖏᓐᓂᒃ ᐃᓱᒪᒋᔭᖃᑦᑎᐊᕐᓯᒪᔪᒧᑦ, ᐅᖃᕐᓯᒪᓚᐅᕐᑐᖅ ᐃᓐᑎᔅᐸᐃᔭᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ.

ᐃᑦᑐᒃᓵᕐᔪᐊᑦ, ᐃᓄᒃᑎᑐᑦ ᐅᖃᐅᓯᕐᒥ ᖃᐅᔨᒪᔨᒻᒪᕆᒃ ᐊᒻᒪᓗ ᐃᓄᒃᑎᑐᑦ ᐅᖃᐅᓯᕐᓂ ᐋᖅᑭᒃᓱᐃᔨ ᐅᑯᓇᓂ ᐃᓐᕼᐊᐱᑦ ᐃᓕᓐᓂᐊᑦᑐᓂᕆᒥᒃᑯᒻᒥ ᐃᖃᓗᖕᓂ ᐃᓕᓴᐃᓚᐅᕐᓯᒪᖕᒪᑦ ᐃᓕᓐᓂᐊᖅᑐᓂ ᐊᒻᒪ ᐃᓕᓐᓂᐊᕐᕕᐊᓗᖕᓂ ᐊᒻᒪᓗ ᓄᓇᕗᒥᑦ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᖅᑎᑦᑎᔨᓄᑦ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ.

ᐱᓕᕆᓯᒪᖕᒥᔪᖅ ᓄᓇᕗᑦ ᓯᓚᑦᑐᖅᓴᕐᕕᒃᒥ ᐃᓄᒃᑎᑑᓕᕆᕝᕕᒃᒥ ᐃᓄᒃᑎᑐᑦ ᐃᓕᓴᐃᔨᐅᓂᕐᒥ ᑐᓵᔨ/ᑐᑭᓕᐅᕆᓂᕐᒧᑦ ᐊᒻᒪ ᐃᓄᐃᑦ ᒥᒃᓵᓄᑦ ᐃᓕᓐᓂᐊᒐᒃᓴᓂᒃ ᐊᒻᒪᓗ ᐱᓕᕆᓚᐅᕐᓯᒪᓪᓗᓂ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᓄᑦ ᐃᓄᒃᑐᑦ ᐅᖃᐅᓯᕐᒥ ᑎᑎᕋᐅᓯᓕᕆᓂᕐᒥᒃ.

ᐅᖃᓚᐅᕐᑐᖅ ᓵᓚᒃᓴᐅᓯᐊᖅᖢᓂ “ᓇᓗᖅᑯᑎᓐᓇᕐᓂᕋᖅᖢᓂᐅᒃ.”

“ᐊᒃᓱᐊᓗᒃ ᖁᕕᐊᓱᑦᑎᐊᓚᐅᕐᑐᖓ ᐃᓕᓴᕆᔭᐅᔾᔪᑎᑖᕋᒪ,” ᐅᖃᓚᐅᕐᑐᖅ, ᐅᖄᓚᐅᑎᒃᑯᑦ ᒪᓐᑐᕆᐊᒦᖢᓂ.

ᐅᖃᐅᓯᖃᖅᖢᓂ ᐊᑯᓂᕈᓗᒃ ᐃᓕᓐᓂᐊᖅᑐᓕᕆᓂᕐᒥ ᐱᓕᕆᐊᖃᕐᓯᒪᓂᖓᓂᒃ, ᐃᑦᑐᒃᓵᕐᔪᐊᑦ ᐅᖃᓚᐅᕐᑐᖅ ᐃᖅᑲᐃᓚᐅᕐᓂᕋᖅᖢᓂ ᐃᓕᓐᓂᐊᖅᑐᒥ ᐃᓄᒃᑎᑐᑦ ᐊᐅᔭᒃᑯᑦ ᐅᕙᓂ ᓄᓇᕗᑦ ᓯᓚᑦᑐᖅᓴᕐᕕᒃᒥ. ᐃᓕᓐᓂᐊᕐᑎ ᐊᓂᒍᐃᓯᒪᙱᖢᓂ ᐃᓕᓐᓂᐊᕐᕕᐊᓗᖏᒥ ᐊᒻᒪᓗ ᐊᒃᓱᕈᖅᖢᓂ ᐃᑦᑐᒃᓵᕐᔪᐊᑉ ᑎᑎᕋᐅᓯᖏᓐᓂᒃ ᐃᓕᓐᓂᐊᒐᒃᓴᓂ ᐊᒻᒪᓗ ᓄᖅᑲᑲᓴᑦᑎᐊᖅᖢᓂ ᐃᓕᓐᓂᐊᖅᑕᒥᓂ. ᐃᑦᑐᒃᓵᕐᔪᐊᑦ ᐅᖃᓚᐅᕐᑐᖅ ᐃᓕᓐᓂᐊᖅᑐᒥ ᐱᓕᕆᖃᑎᖃᓚᐅᕐᓂᖓᓂ ᑐᑭᓯᓇᓱᒃᖢᓂ ᐊᒃᓱᕈᕈᑎᒋᓗᐊᖅᑕᖏᓐᓂᒃ ᐊᒻᒪᓗ ᖃᓄᖅ ᐃᓱᒪᑲᑕᖕᒪᖔᑦ.

“ᐅᓇ ᖃᐅᔨᕚᓪᓕᕈᑎᒋᓚᐅᕐᑕᕋ. ᑕᐃᒪᓕ ᐊᓂᒍᐃᓕᓚᐅᕐᓯᒪᔪᖅ ᐃᓕᓐᓂᐊᒐᒃᓴᒥᓂᒃ ᐊᒻᒪᓗ ᑎᑎᕋᖃᑦᑕᓕᖅᖢᓂ ᓱᕈᓯᕐᓄᑦ ᐅᖃᓕᒫᒐᒃᓴᓂᒃ. ᐅᓇ ᐅᕙᓐᓄ ᐃᒃᐱᖕᓇᕐᔪᐊᕐᒪᑦ,” ᐅᖃᕐᑐᖅ.

ᐅᖃᒃᑲᓐᓂᖅᖢᓂ ᐃᓕᓐᓂᐊᖅᑎ ᐃᓕᓴᐃᖃᑦᑕᓕᓚᐅᕐᓂᖓᓂᒃ ᓯᓚᑦᑐᖅᓴᕐᕕᒃᒥ.

“ᖁᔭᒋᔭᒃᑲ ᐃᓕᓐᓂᐊᖅᑎᖃᑦᑕᓚᐅᖅᑕᒃᑲ ᐃᓕᓐᓂᐊᕐᕕᒃᒥ, ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ, ᑐᓵᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ ᐊᒻᒪᓗ ᐃᓄᒃᑎᑐᑦ ᐃᓕᓐᓂᐊᒐᒃᓴᓂᒃ ᐃᓕᓐᓂᐊᖅᑎᓯᒪᔭᓐᓂᒃ, ᖁᔭᓐᓇᒦᑦ ᖃᓄᐃᓕᐅᕈᓘᔭᕈᓐᓇᖅᑎᑕᐅᓚᐅᕋᒪ,” ᐃᑦᑐᒃᓵᕐᔪᐊᑦ ᐅᖃᕐᑐᖅ.

ᐃᓕᓴᕆᔭᐅᔾᔪᑎᑖᕐᒥᔪᖅ ᓴᒻᒧᕐᑐᖅ ᐅᖃᓕᒫᒐᓕᐅᕐᓯᒪᔪᖅ ᐊᒻᒪᓗ ᑎᑎᕋᕐᓯᒪᕈᓘᔭᖅᖢᓂ ᐅᓄᕐᑐᓂᒃ ᓱᕈᓯᕐᓄᑦ ᐅᖃᓕᒫᒐᓂᒃ ᐃᓄᐃᑦ ᐃᓕᖅᑯᓯᖏᓐᓅᖓᔪᓂᒃ ᐊᒻᒪ ᐃᓄᐃᑦ ᐃᓅᓯᖏᓐᓄᑦ ᐱᒻᒪᕆᒋᔭᐅᔪᓂᒃ.

ᐃᑲᔪᕐᓯᒪᖕᒥᔪᖅ ᐅᓄᕐᑐᓂ ᐊᔾᔨᒌᙱᑦᑐᓂᒃ ᐃᓄᖕᓄᑦ ᐊᒻᒪ ᐃᓄᒃᑎᑑᖓᔪᓂᒃ ᐃᑲᔪᕈᑎᒃᓴᓂ ᐊᑐᖅᑕᐅᔪᓂᒃ ᓄᓇᕗᒥᑦ ᐃᓕᓐᓂᐊᕐᕕᖕᓂ.

ᐊᓯᖏᑦ ᓂᕈᐊᒐᒃᓴᐅᓚᐅᕐᒥᔪᑦ ᐃᓕᓴᕆᔭᐅᔾᔪᑎᒧᑦ ᐅᑯᐊᖑᓚᐅᕐᑐᑦ ᓖᓴ ᒥᑳᓄᒡ-ᑰᓯᓂ ᐅᑯᓇᙵᑦ ᐲᑎᒐᓐ ᓕᔅᓈᐸᒡ ᓄᓇᖃᖅᑳᖅᑐᓂᒃ (Biigtigong Nishnaabeg First Nation) ᐋᓐᑎᐅᕆᐅᒥ; ᓘᕆᑕ ᑕᐃᑲᓐ ᑖᒻᓴᓐ ᒫᓂᑑᐸᒥ; ᐊᒻᒪ ᕗᐊᑦ ᓯᐱᕗᐊᐃᔭᓐ ᓄᓇᓕᖕᓂ ᐃᓕᓐᓂᐊᕐᕕᐊᓗᒃᒥ ᐋᐴᑕᒥ.

ᐃᓕᓴᕆᔭᐅᔾᔪᑎᑖᕐᑐᑦ ᑐᓂᔭᐅᓚᐅᕐᒥᔪᑦ $1,000-ᓂ ᐊᑐᕐᓂᐊᖅᑐᓂᒃ ᐃᓕᓐᓂᐊᖅᕕᒃᒥ ᐱᔭᐅᔭᕆᐊᓕᖕᓄᑦ ᐊᒻᒪᓗ ᐊᑭᓕᖅᑕᐅᓪᓗᑎᒃ ᐃᓕᓴᕆᔭᐅᔾᔪᑎᓄᙵᐅᔾᔪᑎᖏᑦ ᒪᓐᑐᕆᐊᒥ.

ᐅᓇ ᐅᕇᑑ ᕼᐋᓪ ᑐᙵᕕᒃ (Rideau Hall Foundation) ᐃᑲᔪᓚᐅᕐᒥᔪᑦ 100-ᓂ ᐃᓕᓐᓂᐊᕐᑎᓂᒃ ᐃᓕᓐᓂᐊᒃᑲᓐᓂᕐᕕᖕᓂ ᑲᓇᑕᒥ ᐊᔾᔨᒌᙱᑦᑐᓂᒃ ᐅᐸᒃᑎᑦᑎᓪᓗᑎᒃ ᑲᓇᑕᒥ ᑲᑎᑎᑦᑎᓂᕐᒧᑦ, ᐃᓚᖃᖅᖢᑎᒃ ᓄᓇᕗᑦ ᓯᓚᑦᑐᖅᓴᕐᕕᒃᒥ ᐃᓕᓐᓂᐊᖅᑎᒥᒃ ᒍᓘᕆᐊ ᐃᓱᒪᑕᕐᔪᐊᖅ ᒥᑦᑎᒪᑕᓕᒃᒥᐅᑕᕐᒥ.