ᒪᕐᕉᒃ ᖁᕕᐊᓲᑎᒋᔭᐅᕘᒃ ᐸᐅᒃᑑᑎᒃᑯᑦ ᐊᕐᓇᐃ ᐊᕐᕌᒍᒧᑦ ᐃᓕᓴᕆᔭᐅᔾᔪᑎᖓᓄᑦ

For English version, see Pair honoured as Pauktuutit’s women of the year

ᐃᓅᓱᒃᑐᖅ ᖃᐅᔨᓴᖅᑎ ᒥᕐᖑᐃᕐᓯᖅᕕᓕᕆᔨᒃᑯᓐᓂᒃ ᑲᓇᑕᒥ ᐊᒻᒪᓗ ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐅᐃᓂᐱᒡᒦᑦᑐᒥᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᓂᕈᐊᖅᑕᐅᓚᐅᖅᑑᒃ ᐸᐅᒃᑑᑎᒃᑯᑦ ᐃᓄᐃᑦ ᐊᕐᓇᐃᑦ ᐊᕐᕌᒍᒧᑦ ᐃᓕᓴᕆᔭᐅᔾᔪᑎᒧᑦ.

ᐸᐅᒃᑑᑎᑦ ᐊᖓᔪᖅᑳᖓ ᔨᐅᕆ ᓵᑉ ᐅᖃᓚᐅᕐᑐᖅ ᓵᓚᒃᓴᖅᑐᑦ ᓂᕈᐊᕆᔭᐅᓚᐅᕐᓂᖏᑦ ᐅᕙᓂ ᑲᓇᑕᒥ ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᑦ ᑭᖑᓪᓕᖅᐹᖓ ᐊᕐᕌᒍᒧᑦ ᑲᑎᒪᕕᒡᔪᐊᖅᑎᓪᓗᒋᑦ.

“ᐅᑯᐊ ᑐᓐᓂᖅᑯᓯᐊᑦ ᐃᓕᓴᕆᔭᐅᔾᔪᑎᑦ ᐱᒻᒪᕆᐊᓗᖕᓂ ᐱᓕᕆᐊᖃᕐᓂᖏᓐᓂᒃ ᓄᓇᖏᓐᓂᒃ ᐊᒻᒪᓗ ᐊᓯᖏᓐᓄᑦ ᐊᕐᓇᓄᑦ ᐃᓄᖕᓄᑦ ᐱᓇᓱᒍᒪᓂᕐᓴᐅᓐᓇᖅᖢᑎᒃ,” ᓵᑉ ᐅᖃᓚᐅᕐᑐᖅ ᑐᓴᒐᓴᑎᒍᑦ ᕕᕝᕗᐊᕆ 24-ᒥ.

ᓂᑭ ᑯᒪᒃᓯᐅᑎᒃᓴᖅ ᓵᓚᒃᓴᓚᐅᕐᑐᖅ ᐃᓄᒃ ᐊᕐᓇᖅ ᐊᕐᕌᒍᒧᑦ ᐃᓕᓴᕆᔭᐅᔾᔪᑎᒥᒃ ᐱᓕᕆᐊᖓᓄᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐅᑯᓄᖓ ‘ᑐᙵᓱᒋᑦ’, ᐃᑲᔪᕈᑎᒃᓴᓕᕆᕝᕕᒃ ᐃᓄᖕᓄᑦ ᐅᐃᓂᐱᒡ, ᒫᓂᑑᐸᒥ.

ᑯᒪᒃᓯᐅᑎᒃᓴᖅ, ᐃᒡᓗᓕᒑᕐᔪᒃᒥᐅᑕᕕᓂᖅ, ᑲᑕᔾᔭᖃᑦᑕᕐᒥᔪᖅ ᐊᒻᒪᓗ ᐃᓄᐃᑦ ᐊᑐᖅᐸᓪᓕᐊᓂᑯᖏᓐᓂᒃ ᐊᒻᒪ ᐃᓕᖅᑯᓯᓕᕆᓂᕐᒥᒃ ᐃᓕᓴᐃᔨᐅᓪᓗᓂ. ᑭᒡᒐᖅᑐᐃᖃᑦᑕᖅᓯᒪᔪᖅ ᐃᓄᖕᓂ ᖁᙱᐊᖅᑕᐅᕙᒃᖢᓂ, ᑭᖑᖅᓕᖅᐹᒥᓪᓕ ᐅᕙᓂ ᓄᓇᖃᖅᑳᖅᑐ ᑎᑕᐅᑎᓕᕆᓂᕐᒧᑦ ᐃᓕᓴᕆᔭᐅᔾᔪᑎᖏᓐᓂᒃ 2015-ᖑᑎᓪᓗᒍ.

ᒪᓚᐃᔭ ᐱᓴᑉ ᓵᓚᒃᓴᓚᐅᕐᑐᖅ ᐃᓅᓱᒃᑐᖅ ᐃᓄᒃ ᐊᕐᓇᖅ ᐊᕐᕌᒍᒧᑦ ᐃᓕᓴᕆᔭᐅᔾᔪᑎᒥᒃ ᐱᓕᕆᐊᖓᓄᑦ ᐃᒪᐅᑉ ᐊᑖᒍᑦ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᔾᔪᑎᓕᕆᔨᐅᓪᓗᓂ ᒥᕐᖑᐃᕐᓯᖅᕕᓕᕆᔨᒃᑯᓐᓂᒃ ᑲᓇᑕᒥ.

ᐱᓕᕆᐊᖃᖃᑦᑕᖅᑐᖅ ᐅᖅᓱᖅᑑᑉ ᒥᕐᓵᓂᒃ ᖃᐅᔨᓴᖃᑦᑕᖅᑐᓂᒃ ᐅᒥᐊᕐᔪᐊᖑᓚᐅᕐᓯᒪᔪᓂᒃ HMS ᐃᕇᐸᔅ ᐊᒻᒪ HMS ᑎᐅᕈᓪ ᐃᓂᖏᓐᓄᑦ, ᐱᓕᕆᐊᖃᕐᓂᕐᓴᐅᓪᓗᓂ ᓄᓇᖃᖅᑐᑦ ᐃᓄᐃᑦ ᑕᒪᒃᑯᓄᖓ ᐃᓱᒪᓕᐅᕆᖃᑕᐅᑎᑦᑎᕙᒃᖢᓂ.

ᐱᓴᑉ ᐃᓕᓐᓂᐊᕌᓂᒃᓯᒪᔪᖅ ᖃᓄᐃᓕᐅᕈᑎᓄᑦ (master’s degree in the arts) ᐊᒻᒪᓗ ᐊᖅᑲᐅᒪᔪᓐᓇᕐᓂᕐᒧᑦ ᓇᓗᓇᐃᒃᑯᑎᖃᖅᖢᓂ ᐊᒻᒪ ᐃᓕᓐᓂᐊᕐᕕᖕᓂ ᐃᓕᓐᓂᐊᖅᑎᑦᑎᕙᒃᖢᓂ ᐃᒪᐅᑉ ᐊᑖ ᖃᓄᐃᓕᖓᕙᖕᓂᖓᓂᒃ, ᐅᖃᕐᓯᒪᓚᐅᕐᑐᑦ ᐸᐅᒃᑑᑎᒃᑯᑦ ᑐᓴᒐᒃᓴᓕᐊᖏᑦ.

ᐃᑲᔪᖅᑐᐃᔨᐅᕙᒃᑐᖅ ᐊᖅᑲᐅᒪᖃᑦᑕᕐᓂᕐᒥᒃ ᓄᓇᕗᙵ ᑖᓐᓇ ᐱᓕᕆᐊᒃᓴᑦᑎᐊᕙᐅᓂᖓᓄᑦ.

ᐸᐅᒃᑑᑎᒃᑯᑦ ᑲᓇᑕᒥ ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᖑᔪᑦ ᑭᒡᒐᖅᑐᐃᓪᓗᑎᒃ ᐊᕐᓇᓂᒃ ᐃᓄᖕᓂ ᑲᓇᑕᒥ.

ᐊᕐᕌᓂ ᓵᓚᒃᓴᓚᐅᕐᑐᑦ ᐅᑯᐊ ᓂᐅᒥ ᑖᑎ ᐃᑲᔪᕐᓯᒪᓂᖓᓂᒃ ᐃᓄᖕᓂ ᐃᓚᒌᓂᒃ ᑭᓱᖃᙱᓗᐊᖅᑐᓂᒃ ᑲᓇᑕᒥ, ᐊᒻᒪᓗ ᐃᒥᓕᐊ ᐊᕐᓇᑐᒃ, ᓇᖕᒥᓂ ᐱᓕᕆᐊᒥᔪᑦ ᐊᒻᒪᓗ ᐊᒃᑐᐊᓪᓚᕆᖕᓂᖓᓄᑦ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᐊᑐᖅᐸᒃᑕᖏᓐᓂᒃ.