ᒪᙳᒃᐸᓪᓕᐊᓂᐊᓗᒃ

ᐅᓇ ᐊᕐᓇᕐᓗᒃ ᑐᖑᔪᖅᑐᖅ ᑎᖕᒥᐊᖅ, ᑐᕐᓲᕆᔭᐅᔪᒥᒃ ᒥᓯᒪᔪᒻ ᑲᖏᖅᖠᓂᖅᒥᑦ ᐋᒐᓯ 2018-ᖑᑎᓪᓗᒍ, ᐃᓚᒋᔭᐅᔪᖅ ᐊᒥᓱᓄᑦ ᑲᓇᖕᓇᕐᒥᐅᓂᒃ ᑎᖕᒥᐊᓂᒃ ᑕᒪᐅᙵᑲᑕᓕᖅᑐᓂᒃ ᓄᓇᕗᒧᑦ. (ᐊᔾᔨᙳᐊᖅ ᐳᑐᓕᒃ ᐊᔾᔨᓕᐅᕆᔨᓂᑦ)

ᓯᕗᓪᓕᖅᐹᑦ ᓇᓗᓇᐃᒃᑯᑎᐅᓇᔭᖅᑐ ᓄᓇᕗᑦ ᓯᓚᖓ ᐊᓯᔾᔨᕈᑎᒻᒪᕆᐅᓇᔭᖅᑐᓄᑦ ᑕᑯᔭᐅᓕᓚᐅᕐᑐᖅ ᐄᐳᕈᓪ 1999 ᖁᕕᐊᓲᑎᐅᑲᑕᒻᒪᕆᓚᐅᕐᓯᒪᑎᓪᓗᒍ ᓄᓇᕗᑦ ᐱᒋᐊᓕᕐᓂᖓᓄᑦ.

ᑕᐃᔅᓱᒪᓂ ᒪᑯᐊ ᑲᔫᔭᐃᑦ ᐅᕌᐱᓐᔅ (robins) ᑕᑯᔭᐅᓚᐅᕐᓯᒪᔪᖅ ᓯᕗᓕᖅᐹᒥᑦ ᕼᐋᐱ ᕚᓕᒥ ᐃᖃᓗᖕᓂ. ᑖᒃᑯᐊ ᐅᕌᐱᓐ, ᐅᖓᓯᒋᔭᖓᓃᒻᒪᕆᒃᑐᑦ ᐃᓂᒋᕙᒃᑕᖏᓐᓂ ᒪᕐᕉᒃ ᐃᓐᓇᐅᓪᓗᑎᒃ ᐊᒻᒪ ᐃᓐᓇᐅᙱᑦᑐᖅ, ᑕᑯᔭᐅᖃᑦᑕᓚᐅᕐᑐᑦ ᐊᒥᓲᖅᑕᐅᓪᓗᑎᒃ ᐃᖃᓗᐃᑦ ᐃᒡᓗᕕᖃᕐᕕᐊᓂ ᐊᒻᒪ ᓂᐊᖁᙴᒧᑦ ᐱᓱᒡᕕᒃᑯᑦ.

2013-ᖑᕐᑎᓪᓗᒋ, ᐅᕌᐱᓐᔅ ᑕᐅᔭᐅᓂᕋᖅᑕᐅᖃᑦᑕᓚᐅᕐᒥᔪᑦ ᐅᖓᓯᒃᑐᓂᒃ ᓄᓇᓕᖕᓂ ᐅᑯᓇᓂ ᖃᒪᓂᑦᑐᐊᖅ, ᑲᖏᖅᖠᓂᖅ, ᐊᕐᕕᐊᑦ, ᐃᖃᓗᒃᑑᑦᑎᐊᖅ ᐊᒻᒪ ᖁᒡᓗᖅᑑᒥᑦ.

ᐅᑯᐊ ᐊᐅᐸᖅᑐᓂ ᓴᒡᕕᓖᑦ ᑎᖕᒥᐊᑦ, ᐅᐱᕐᙶᙳᕐᓂᖓᓂ ᓂᒋᕐᒥ ᖃᐅᔨᑎᑦᑎᔩᑦ, ᑎᑭᓯᒪᔪᑐᐊᙳᙱᑦᑐᑦ ᑕᑯᔭᐅᓯᒪᔪᓂᒃ ᓄᓇᕗᒥᑦ ᑕᐃᒪᙵᑦ 1999-ᖑᓚᐅᕐᑎᓪᓗᒍ, ᑕᑯᓯᒪᔪᖃᕆᓪᓗᓂ ᒪᑯᓂᖓ ᖃᖃᓃᓲᑦ ᑐᒍᔪᕐᑐᑦ ᑎᖕᒥᐊᑦ (mountain blue bird), ᑭᖕ ᕕᓱ (kingfisher), ᑎᑕᓲᑦ ᓯᐱᐅᕈᔅ (song sparrows) ᐊᒻᒪᓗ ᐊᒥᐊᓕᑲᓐ ᑰᑦ (American coot) ᐅᖃᐅᓯᐅᓯᒪᖕᒥᔪᑦ.

ᑕᐃᒪᐃᑎᓪᓗᒍ, ᐊᕐᕌᒍ 20 ᐊᑐᕐᓯᒪᔪᓂᒃ, ᐃᓚᖏᑦ ᓄᓇᕗᒧᐊᖅᐸᒃᑐᑦ ᐅᓄᕈᓐᓃᕐᓯᒪᓂᕐᓴᐅᓕᕐᑐᑦ: ᓯᒡᔭᒥᐅᑕᑦ ᐅᑯᑎᑐᓇᖅ ᓯᒡᔭᕆᐊᖅᔪᒃᑎᑐᑦ, ᖃᐅᔨᔭᐅᓯᒪᓕᕐᑐᑦ ᐃᓂᒋᕙᒃᑕᖏ ᒥᒃᖠᕚᓪᓕᕐᓯᒪᓂᖏᓐᓂᒃ ᐊᔾᔨᒋᑲᑕᙱᓐᓂᖓᓄᑦ ᓯᓚᐅᑉ ᐅᖂᓯᕙᖕᓂᖓ, ᓄᑖᓄᑦ ᐱᕈᖅᐸᓪᓕᐊᔪᓄᑦ ᐊᒻᒪᓗ ᐅᓄᕐᓂᕐᓴᐅᓕᕐᑐᓄᑦ ᓂᕿᑐᖅᑎᓄᑦ—ᐃᓚᖃᖅᖢᑎᒃ ᓇᓄᕐᓂᒃ.

ᐆᓇᕐᓯᕙᓪᓕᐊᓂᖓ ᑕᕆᐅᑉ ᐅᖂᓂᖓ ᑕᒪᐅᙵᕈᑎᐅᓯᒪᖕᒥᔪᖅ ᒪᑯᓂᖓ ᐋᕐᓗᒃᓂᒃ ᐊᒻᒪ ᐃᖃᓗᖕᓂᒃ ᓵᒪᓐᓂᒃ ᓄᓇᕗᑦ ᐃᒪᖏᓐᓄᑦ. ᐊᒻᒪᓗ ᓇᓄᐃᑦ ᐊᔾᔨᙳᐊᖏᑦ ᐊᑭᓐᓇᕐᒥᐅᑕᐅᓕᖅᖢᑎᒃ ᓇᓗᓇᐃᒃᑯᑎᐅᓪᓗᑎᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᐅᓇ ᐃᓱᒫᓘᑎᒋᓪᓗᒍ ᐊᒥᓱᑦ ᐆᒪᔪᐃᑦ ᐊᔾᔨᒌᙱᑦᑐᑦ ᐱᑕᖃᕈᓐᓃᕐᓯᒪᓂᖏᓐᓂᒃ ᑕᕆᐅᑉ ᓯᑯᖏ ᑖᒃᑯᓄᖓ ᐃᓂᒋᔭᐅᓚᐅᕐᐸᖕᓂᖏᓐᓄᑦ ᐆᒪᓇᓱᖕᓂᒃᑯᑦ.

ᓄᓇᕗᒻᒥᐅᑦ ᐊᕙᑎᓕᕆᔨᐅᕙᒃᑐᓂᒃ ᐊᖏᖃᑎᖃᐃᓐᓇᙱᓯᒪᔪᑦ ᐊᒻᒪ ᖃᐅᔨᓴᖅᑎᓂᒃ ᖃᓄᖅ ᓇᓄᐃᑦ ᐅᑭᐅᕐᑕᖅᑐᒥᑦ ᖃᓄᐃᓯᒪᓂᖏᓐᓂᒃ ᐅᖂᓂᕐᓴᐅᓕᖅᑐᒥᑦ ᐅᑭᐅᕐᑕᖅᑐᕐᒥᑦ. ᐊᒥᓱᑦ ᐃᓄᐃᑦ ᐅᖃᕐᓯᒪᔪᑦ ᓄᓇᕗᑦ ᓇᓄᖏᑦ ᖃᓄᐃᙱᓐᓂᖏᓐᓂᒃ ᐊᒻᒪ ᖃᓄᐃᔾᔮᙱᓐᓂᖏᓐᓂᒃ, ᓯᑯᐃᑦ ᒥᒃᖠᕙᓪᓕᐊᒐᓗᐊᖅᑎᓪᓗᒋᑦ. ᐅᖃᐅᓯᖃᖅᑐᑦ ᐅᓄᕐᓂᓴᓂᒃ ᓇᓄᕐᓂ ᓄᓇᓖᑦ ᖃᓂᒋᔭᖏᓐᓂᒃ ᓄᓇᓕᖕᓂᓪᓗ ᑕᑯᓂᕐᓴᐅᓕᕐᓂᖏᓐᓂᒃ, ᐊᒻᒪᓗ ᐅᓗᕆᐊᓇᓕᖅᐸᒃᖢᑎᒃ ᐃᓄᖕᓄᑦ ᐊᖅᑯᑎᖏᓐᓃᑦᑐᓄᑦ.

ᓰᓚ ᕗᐊᑦ-ᑯᓘᑎᐃ, ᐃᓄᒃ ᖃᓄᐃᓕᐅᕐᑎᒻᒪᕆᒃ, ᓄᐱᐅᓪ ᐲᔅ ᓵᓚᒃᓴᐅᓯᐊᒧᑦ ᓂᕈᐊᒐᒃᓴᖅ ᐊᒻᒪ ᐅᖃᓕᒫᓂ ᑎᑎᕋᖅᑎ, ᓴᕿᑎᑦᑎᔨᐅᓯᒪᔪᖅ ᐃᓄᐃᑦ “ᐱᕕᖃᕐᒪᑕ ᓂᒡᓚᓱᒃᑐᒦᓐᓂᕐᒥᒃ,” ᐅᖃᐅᓯᖃᖅᑐᖅ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐱᖃᑎᖃᖅᖢᓂ ᒪᓕᓇ ᐃᐳᓴᓐ, ᑲᓚᖡᑦ ᓄᓇᖓᓂ ᒪᓕᒐᓕᕆᔨᐅᓂᑯᑦ ᐊᒻᒪ ᒪᓕᒐᓕᕆᔨᐅᓪᓗᓂ ᐅᑯᓄᖓ ‘ᐃᓄᐃᑦ ᐊᑕᖃᑎᒌᑦ’, 2009-ᖑᑎᓪᓗᒍ ᔫᓇᐃᑕᑦ ᓇᐃᓴᓐᔅ ᓯᓚᐅᑉ ᐊᓯᙳᖅᐸᓪᓕᐊᓂᖓᓂ ᐅᖃᐅᓯᖃᑲᑕᒃᑎᓪᓗᒋᑦ ᑰᐸᓐᕼᐊᐃᒐᓐᒥ, ᑕᕝᕙᓂᓗ ᐃᓄᐃᑦ ᐅᑭᐅᕐᑕᖅᑐᕐᒥᑦ ᐃᓱᒪᒋᔭᐅᓛᙳᖅᑎᑦᑎᓇᓱᒃᖢᑎᒃ. (ᐊᔾᔨᓕᐅᕆᔨ ᔭᐃᓐ ᔪᐊᔾ)

ᐅᖂᓂᕐᓴᖅ, ᖃᐅᔨᒪᓇᙱᓐᓂᕐᓴᐅᓕᕐᑐᖅ ᐅᑭᐅᕐᑕᖅᑐᖅ

ᑭᓯᐊᓂᓕ ᓄᓇᓖ ᖃᐅᔨᒪᖕᒪᑕ ᐆᒥᖓ ᓯᓚᐅᑉ ᐊᓯᙳᖅᐸᓪᓕᐊᓂᖓ ᐱᒻᒪᕆᐅᓂᖓᓂᒃ. ᓯᓚᐅᑉ ᐅᖂᓂᖓ ᐆᓇᕐᓂᕐᓴᐅᓕᕐᒪᑦ ᐊᕐᕌᒎ ᐃᓗᐊᒍᑦ. ᓯᓚᐅᑉ ᖃᓄᐃᓐᓂᐊᕐᓂᖓ ᓇᓗᓇᕐᓂᕐᓴᐅᓕᕐᑐᖅ, ᐊᓄᕌᕌᓗᐃᑦ ᓴᕿᑉᐸᓕᖅᖢᑎ ᓂᕆᐅᒋᔭᐅᙱᑎᓪᓗᒋ. ᐃᒪᐅᑉ ᐃᒪᖃᕐᓂᖏᑦ ᐊᑐᖅᑕᐅᔪᓐᓇᐃᓪᓕᔪᖅ ᐃᓚᖏᒍᑦ. ᓄᓇ ᐸᓂᕐᓂᕐᓴᐅᓕᕐᑐᖅ. ᐊᒻᒪᓗ ᓯᑯ ᓵᓐᓂᕐᓴᐅᓕᖅᖢᓂ, ᖁᐊᕐᓇᓵᕐᓂᕐᓴᐅᕙᓕᖅᖢᓂ ᐊᒻᒪ ᐊᐅᒃᓵᓕᓂᕐᓴᐅᕙᓕᖅᖢᓂ.

ᒥᒃᖠᕙᓪᓕᐊᔪᖅ ᑕᕆᐅᑉ ᓯᑯᖓ ᑲᔪᓰᓐᓇᖅᑐᖅ ᐱᕙᓪᓕᐊᓂᖓᒍᑦ ᐊᐅᒃᐸᓪᓕᐊᙱᓐᓇᕐᓂᖏᓐᓂᒃ ᐊᐅᔭᒃᑯᑦ. ᖃᐅᔨᓴᕐᑎᐅᔪᓪᓗ ᐅᖃᕐᓯᒪᓪᓗᑎᒃ ᓄᓇᐅᑉ ᐊᑖᓂ ᐊᐅᔪᐃᑦᑐᖅ ᐅᑭᐅᕐᑕᖅᑐᕐᒥᑦ ᓴᕿᑎᑦᑎᕙᓪᓕᐊᑐᐃᓐᓇᕆᐊᖃᖅᖢᑎ ᓯᓚᒧᑦ ᐅᖂᓯᒃᑲᓐᓂᕈᑎᐅᔪᓐᓇᖅᑐᓂᒃ ᒑᓯᓂᒃ ᐳᔪᕐᓂᒃ ᓯᓚᐃᓐᓇᕐᒧᑦ ᐊᒻᒪᓗ ᖁᐊᕐᓵᕐᓇᖅᑐᓂᒃ ᒪᑯᑎᑐᓇᖅ ᒨᑯᕆᑎᑐᑦ.

ᐱᕕᖃᕐᒪᑕ ᓂᒡᓚᓱᒃᑐᒦᓐᓂᕐᒥᒃ

2005, ᐃᓄᒃ ᐊᕙᑎᓕᕆᓂᕐᒧᑦ ᐱᓕᕆᔨᒻᒪᕆᐅᔪᖅ ᓰᓚ ᕗᐊᑦ-ᑯᓘᑎᐃ ᐱᒋᐊᖅᑎᑦᑎᓚᐅᕐᓯᒪᔪᖅ ᓄᓇᕐᔪᐊᕐᒥᑦ ᐃᖅᑲᖅᑐᐃᕕᒃᑰᖅᑎᑦᑎᓂᕐᒥᒃ ᓯᓚᐅᑉ ᐊᓯᙳᕐᓂᖓᓄᒃ: ᐱᖁᔨᒍᑎ, ᐊᑎᓕᐅᖅᑕᐅᓯᒪᓚᐅᕐᑐᖅ 62-ᓂ ᐃᓄᖕᓂᒃ ᐊᖑᓇᓱᒃᑎᓄᑦ ᐊᒻᒪᓗ ᐃᓐᓇᑐᖃᕐᓂ ᓄᓇᓕᖕᓂᑦ ᑲᓇᑕᒥ ᐊᒻᒪ ᐊᓛᔅᑲᒥ, ᐅᑯᓄᖓ Inter-American Commission-ᑯᓐᓂᑦ ᐆᒧᖓ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ.

ᐱᖁᔨᒍᑎ ᐅᖃᕐᓯᒪᖕᒪᑦ ᖃᐅᔨᓴᖅᑕᐅᓯᒪᙱᑦᑐᓂᒃ ᓯᓚᐃᓐᓇᕐᒧᙵᐅᕙᓪᓕᐊᔪᓂᒃ ᐊᑐᖅᑕᐅᔪᓄᑦ ᐳᔪᕆᔭᐅᔪᓂᒃ ᐊᒥᐊᓕᑲᒥ ᓱᕋᓯᒍᑎᐅᖕᒪᑦ ᐃᓄᐃᑦ ᐃᓕᖁᓯᖏᑦᑎᒍᑦ ᐊᒻᒪ ᐊᕙᑎᓕᕆᓂᒃᑯ ᑭᒃᑯᑐᐃᓐᓇᑦ ᐱᔪᓐᓇᐅᑎᖏᓐᓂᒃ ᐅᖃᕐᓯᒪᓂᖓᒍᑦ 1948-ᒥᑦ ᐊᒥᐊᓕᑲᒥ ᐱᖁᔭᖅᔪᐊᖏᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐱᔭᒃᓴᖏᓐᓄᑦ ᐆᒪᔫᑉ (1948 American Declaration of the Rights and Duties of Man).

ᕗᐊᑦ-ᑯᓘᑎᐃ ᐱᓕᕆᐊᕆᓇᓱᒃᑕᖓ ᐊᓂᒍᓚᐅᙱᓚᖅ, ᑭᓯᐊᓂᓕ ᐊᓱᕈᕐᓂᖓ, ᐃᑲᔪᕈᑎᐅᕚᓪᓕᓚᐅᕐᑐᖅ ᓄᐱᐅᓪ ᐲᔅ ᓵᓚᒃᓴᐅᓯᐊᕈᑎᒧᑦ ᓂᕈᐊᒐᒃᓴᐅᓂᕐᒧᑦ, ᐊᒻᒪᓗ ᓄᓇᕐᔪᐊᓕᒫᒥᑦ ᐅᔾᔨᕈᓱᓕᕈᑎᐅᓪᓗᓂ ᓯᓚᐅᑉ ᐊᓯᙳᖅᐸᓪᓕᐊᓂᖓ ᐅᑭᐅᕐᑕᖅᑐᕐᒥᑦ.

ᓄᓇᐅᓪᓗ ᓯᓚᐅᓪᓗ ᑲᑎᓐᓂᖓ: 2018-ᒥᑦ ᓯᕿᓂᖅ ᓴᕿᓪᓗᐊᓚᐅᙱᑦᑑᒐᓗᐊᖅ ᒥᑦᑎᒪᑕᓕᒃᒥᑦ, ᒫᓃᑦᑐᖅ ᑐᑭᒧᑦ 72.6 ᑎᒍᕇᔅᒥᑦ, ᑭᓯᐊᓂ ᔭᓄᐊᕆ 29-ᙳᖅᐸᑦ. ᑭᓯᐊᓂᓕ ᓴᕿᓚᐅᕐᑐᖅ. ᐅᓇ ᓄᑖᖅ ᖃᐅᒪᓂᖅ ᑕᕐᕆᐊᒃᓲᖂᔨᓪᓗᓂ ᑕᕐᕋᕆᔭᐅᓪᓗᑎᒃ ᒪᕐᕈᐃᓂ ᐅᖂᓂᕐᒧᑦ ᐊᒻᒪ ᓂᒡᒐᓱᖕᓂᖅ ᑲᑎᖢᑎᒃ. (ᐊᔾᔨᓕᐅᕆᔨ ᓰᓚ ᑲᑦᓴᒃ)

ᑕᐃᒪᐃᑎᓪᓗᒍ, ᓄᓇᕗᑦ ᒐᕙᒪᒃᑯᑦ ᓵᙵᓚᐅᕆᕗᑦ ᓈᒻᒪᒋᔭᐅᙱᖢᑎᒃ ᐅᖃᐅᓯᖃᙱᓗᐊᕐᓂᖏᓐᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ.

ᐅᓂᒃᑳᑦ ᑲᓇᑕᒥ ᐊᑐᖅᑐᕕᓂᕐᓂᒃ ᖃᐅᔨᓴᖅᑎ ᖃᐅᔨᓚᐅᕐᑐᖅ 2018-ᒥᑦ ᓈᒻᒪᒃᑐᒃᑯᑦ ᖃᐅᔨᓴᓚᐅᙱᒻᒪᑕ ᐊᒻᒪ ᐱᓕᕆᓕᕆᐊᕐᓯᒪᙱᓐᓂᖏᓐᓂᒃ ᐊᒃᑐᐃᒍᑎᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᓄᓇᕗᒥᑦ.

ᐊᓯᖏᓪᓕ ᐱᓕᕆᓂᐅᔪᑦ ᓴᐳᔾᔨᓯᒪᓂᕐᒥ ᐅᑭᐅᕐᑕᖅᑐᕐᒥᑦ ᐊᑑᑎᖃᕐᓂᕐᓴᐅᖂᔨᕗᑦ. ᐊᖏᖃᑎᒌᒍᑎᒧᑦ ᐊᑎᓕᐅᖅᑕᐅᓚᐅᕐᑐᖅ ᐅᒃᑑᐱᕆᐅᓚᐅᕐᑐᒥ ᑲᓛᖡᑦ ᓄᓇᖓᓂ, ᓲᕐᓗ, ᐱᔾᔪᑎᖃᖅᑐᖅ ᓴᐳᔾᔨᓯᒪᓇᓱᖕᓂᕐᒥᑦ ᐃᖃᓗᒐᓱᖕᓂᕐᒥᒃ ᐅᑭᐅᕐᑕᖅᑑᑉ ᑕᕆᐅᖏᓐᓂᒃ.

ᑖᓐᓇ ᐊᖏᕈᑎ, ᐊᑎᓕᐅᕐᑕᐅᓚᐅᕐᑐᖅ ᐅᕙᓂ ᐃᓗᓕᓵᑦ, ᖃᓛᖡᑦ ᓄᓇᖓᓂ, ᒪᑯᓇᙵᑦ ᑭᒡᒐᖅᑐᐃᔨᓂᒃ ᐅᑭᐅᕐᑕᖅᑐᕐᒥᑦ ᓄᓇᓕᕐᔪᐊᓂᒃ ᐊᒻᒪ ᐊᓯᖏᓐᓂᒃ, ᑮᓇᐅᔭᓕᐅᕋᓱᖕᓂᕐᒧᑦ ᐃᖃᓗᒐᓱᖕᓂᑦ ᕿᑎᖅᐸᓯᐊᓂᒃ ᐅᑭᐅᕐᑕᖅᑑᑉ ᑕᕆᐅᖓᑕ ᓄᖃᖅᑎᑕᐅᓯᒪᓂᐊᕐᓗᓂ ᐊᕐᕌᒍᓂᒃ 16-ᓂᒃ ᐊᒡᒋᖅᑐᓂᒃ, ᑕᒪᒃᑯᐊ ᖃᐅᔨᓴᖅᑎᐅᔪᑦ ᑐᑭᓯᓇᓱᒍᓐᓇᕐᓂᐊᕐᒪᑕ ᖃᓄᖅ ᐅᓄᕐᓂᖃᕐᒪᖔᑕ ᐊᒻᒪ ᖃᓄᐃᙱᑎᒋᖕᒪᖔᑕᓗ ᐅᓄᖕᓂᖏᑦ ᐃᖃᓗᐃᑦ.

ᐋᒐᓯ 2017-ᒥ, ᒐᕙᒪᑐᖃᒃᑯᑦ ᐋᕿᒃᓯᓚᐅᕐᑐᑦ ‘ᑕᓪᓗᕈᑎᐅᑉ ᐃᒪᖓ’, ᖃᓪᓗᓈᑐᑦ ᐊᑎᖃᖅᑎᑕᐅᔪᖅ ᓛᓐᑳᔅᑐ ᓴᐅᓐ, ᐊᖏᓂᖅᐹᖅ ᑕᕆᐅᕐᒥᐅᑕᓄᑦ ᓴᐳᔾᔨᓯᒪᕝᕕᒃᒥᑦ ᑲᓇᑕᒥ.

ᐋᑐᕚᒥ ᑮᓇᐅᔭᓂ ᐃᑲᔫᑎᖃᕐᓯᒪᔪᑦ $200 ᒥᓕᐊᓐ ᑖᓚᐃᑦ ᐅᖓᑖᓂᒃ ᐅᕗᖓ ᓄᑖᒧᑦ ᑲᓇᑕᐅᑉ ᖁᑦᑎᒃᑐᖓᓂᒃ ᖃᐅᔨᓴᕐᕕᒃᒧᑦ ᐃᖃᓗᒃᑑᑦᑎᐊᕐᒥᒃ, ᑖᓐᓇ, ᐱᐊᓂᒃᑕᐅᒍᓂ, ᐃᓱᒪᒋᔭᐅᔪᖅ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐱᓕᕆᐊᖃᕐᓂᐊᕋᓱᒋᔭᐅᓪᓗᓂ.

ᐊᒻᒪᓗ ᐃᓄᐃᑦ ᓄᓇᕐᔪᐊᕐᒥᑦ ᐅᑭᐅᕐᑕᖅᑐᕐᒥᐅᑕᑦ ᑲᑎᒪᔨᕐᔪᐊᖓ ᐱᓕᕆᓯᒪᒋᕗᑦ ᐅᖃᐅᓯᖃᑲᑕᒃᖢᑎᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐅᑭᐅᕐᑕᖅᑐᕐᒥᑦ ᓄᓇᕐᔪᐊᕐᒥ ᐅᖃᐅᓯᖃᑲᑕᒃᑎᓪᓗᒋᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ.

ᓄᖃᖅᑎᑦᑎᕚᓪᓕᕈᒪᓪᓗᑎᒃ ᐃᓚᒋᔭᐅᓗᐊᖅᑐᓂᒃ ᐅᖂᓯᕙᓪᓕᐊᓂᖓᓄᑦ ᓄᓇᕗᑦ ᐊᒻᒪᓗ ᐅᑭᐅᕐᑕᖅᑐᕐᒥᐅᑕᑦ, ᓄᓇᕐᔪᐊᕐᒥᑦ ᐃᒪᕐᓄᑦ ᐊᒃᑐᐊᔪᓂᒃ ᑲᑐᔾᔨᖃᑎᒌᖑᔪᑦ ᓄᖃᖅᑎᑦᑎᓯᒪᖁᔨᒻᒪᕆᓕᕐᐳᑦ ᐅᕐᓱᐊᓗᓕᕆᓂᕐᒥᒃ ᐅᑭᐅᕐᑕᖅᑐᕐᒥᑦ.

ᐅᑭᐅᕐᑕᖅᑐᕐᒥᑦ ᒪᓕᒐᓕᕆᔨᕐᔪᐊᖑᔪᑦ ᐊᒻᒪᓗ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᑦ ᐱᓕᕆᖕᒥᔪᑦ ᐊᖏᖃᑎᒌᒍᑎᒃᓴᐅᓂᐊᖅᑐᒥ ᐃᓱᖃᖅᑎᑦᑎᒍᑎᒃᓴᒥᑦ ᐳᔪᕐᓂ ᓯᓚᐃᓐᓇᕐᒧᐊᖅᑎᑦᑎᔪᓐᓇᕐᓂᕐᒥ, ᐅᕝᕙᓘᓐᓃᑦ ᕿᕐᓂᖅᑕᖅ ᐳᔪᕆᔭᐅᔪᓂᙶᕐᓯᒪᔪ ᐅᑭᐅᕐᑕᖅᑐᕐᒥ.

ᓴᕕᕋᔭᒃ ᐃᒡᓗᐃᑦ ᖄᖓᓄᑦ ᐋᕿᒃᓯᒪᔪᑦ ᓄᓇᓕᐸᔭᑦ ᕿᑎᖓᓂ ᑲᑎᖓᔪᑦ ᑕᓪᓕᕐᒥᖅ, ᐅᒃᑑᐱᕆ 5-ᒥ, ᐅᓐᓄᐊᒃᑯᑦ ᐱᕐᓯᖅᑐᐊᓘᕌᓪᓚᓚᐅᕐᑎᓪᓗᒍ ᓱᑲᓂᖓ ᐊᓄᕆᐅᑉ ᑎᑭᑦᑕᖅᖢᓂ 114 ᑭᓛᒥᑕᔅᓄ ᐃᑲᕐᕋᒧᑦ. (ᐊᔾᔨᓕᐅᕆᔨ ᐱᐊᑦ ᐳᕋᐅᓐ)

ᓯᓚᐅᑉ ᐊᓯᙳᕈᑎᖓ ᐃᑲᔫᑎᐅᓂᐊᕈᓂ ᓄᓇᕗᒧᑦ, ᐊᔪᕐᓇᙱᓐᓂᕐᓴᐅᓇᔭᕐᑐᖅ ᑕᒥᐅᕐᒥᑦ ᖃᓂᒋᔭᖃᖅᑐᓄᑦ. ᑕᒪᓐᓇ ᑮᓇᐅᔭᓕᐅᕈᑎᖃᒃᑲᓐᓂᕈᓐᓇᖅᖢᓂ, ᐊᑐᒃᑲᓐᓂᕈᓐᓇᖅᑐᓕᕆᔨᓄᑦ, ᐃᖏᕐᕋᔾᔪᑎᓕᕆᓂᕐᒧᑦ ᐱᓕᕆᐊᖃᖅᑐᓄᑦ ᐊᒻᒪᓗ ᐊᐅᓚᑦᑎᔨᓄᑦ ᐅᒥᐊᕐᔪᐊᓂᒃ ᐃᓄᖕᓂ ᐅᓯᑲᖅᑕᖅᑎᐅᕙᒃᑐᓂᒃ ᐆᑐᓇ ᑯᕆᔅᑐᓪ ᓱᕇᓂᑎ, ᑖᓐᓇᓕ 2017-ᒥ ᐊᖏᓂᖅᐹᖑᓚᐅᕐᓯᒪᔪᖅ ᐃᓄᖕᓂ ᐅᓯᑲᖅᑕᖅᑎᓂᒃ ᐊᖅᑯᓵᖅᓯᒪᔪᓂᒃ ᐅᑭᐅᕐᑕᖅᑐᕐᒥ ᐅᐊᓕᓂᕐᒥᒃ ᕿᑭᖅᑖᓗᒃᒧᑦ ᐊᖅᑯᑎᒃᑯᑦ.

ᐋᑐᕚᒥ ᔫᓂᕘᓯᑎᒥ ᖃᐅᔨᓴᖅᑎᐅᔪᖅ ᔮᑭ ᑖᓴᓐ ᐅᖃᕐᓯᒪᔪᖅ ᖃᓄᑐᐃᓐᓇᖅ ᐊᐅᓪᓚᖅᑎᑦᑎᔪᓐᓇᕐᓯᓂᖅ ᑕᒪᐅᖓ ᐱᕈᖅᐸᓪᓕᐊᓂᐊᕐᒪᑦ.

“ᐊᕐᕌᒍᑦ 20-ᓂ ᖁᕝᕙᖅᐹᓪᓕᔾᔮᙱᑦᑐᒃᓴᐅᔪᖅ, ᑭᓯᐊᓂᓕ 20 ᐅᑭᐅᑦ ᐊᑯᓂᐊᓘᙱᒻᒪᑕ,” ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. “ᖁᕝᕙᖅᐹᓪᓕᒻᒪᕆᖕᓂᐊᖅᑐᖅ 100-ᓄᑦ, ᑭᓯᐊᓂ ᖃᓄᐃᓕᐅᕐᔪᐊᖅᑐᖃᑳᓪᓚᒃᐸᑦ, ᓯᓚᐅᑉ ᖃᓄᐃᓐᓂᖓᒍᑦ. ᐊᒻᒪᓗ ᑕᐅᕗᖓ ᑎᑭᐅᑎᒍᑦᑕ, ᑕᑯᓕᕋᔭᖅᑐᒍᑦ ᓂᐅᕕᖃᑦᑕᐅᑎᓕᕆᓂᕐᒥᒃ ᐅᑭᐅᕐᑕᖅᑐᒃᑰᖅᑐᓂᒃ.”

ᔭᐃᓐ ᔪᐊᔾ ᐊᖏᔪᒃᖠᖅ ᐅᓂᒃᑳᓕᐅᖅᑎᐅᕗᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. ᔪᐊᔾ, ᐱᕙᓪᓕᐊᔪᓄᑦ ᐃᖅᑲᓇᐃᔭᕐᓯᒪᔪᖅ 1997-ᒥ ᐱᒋᐊᖅᖢᓂ, ᑎᑎᕋᐅᓯᖃᕈᓘᔭᕐᓯᒪᕗᖅ ᖃᓄᐃᓕᐅᕈᑎᐅᕙᓪᓕᐊᔪᓂᒃ ᓄᓇᕗᒥᑦ, ᓄᓇᕕᒥᒃ ᐊᒻᒪᓗ ᐅᑭᐅᕐᑕᖅᑐᕐᒥᐅᑕᓕᒫᓂᒃ.

ᑎᑎᖃᖁᑎᒋᔭᐅᔪᓂ ᐅᓂᒃᑲᐅᓯᕕᓂᕐᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᑖᒃᑯᐊᓗ, 2006-ᒥ ᒥᕈᐊᒐᒃᓴᐅᓚᐅᕐᓯᒪᓪᓗᑎ ᐆᒧᖓ ᒥᓯᓄ ᐃᓕᓴᕆᔭᐅᔾᔪᑎᒧ ᑭᒃᑯᓕᒫᓄᑦ ᐱᔨᑦᑎᕋᐅᑎᖃᕐᓂᕐᒥᑦ ᑎᑎᕋᐅᓯᓕᕆᓂᒃᑯᑦ ᐅᓂᒃᑳᓕᐅᕐᓯᒪᓂᖏᓐᓄᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ.