ᓂᕈᐊᕐᑕᐅᑎᐊᒻᒪᕆᒡᓗᓃ ᓄᓇᕗᑦ ᓯᕗᓕᐅᕐᑎᖓ? ᑕᑯᒋᐊᖅᑳᕐᓗᓯ ᕿᒡᒋᓚᐅᙱᓐᓂᔅᓯᓐᓂ

ᐃᓚᖏᑦ ᐃᓄᐃᑦ ᐅᒃᐱᕈᓱᖕᒪᑕ ᐱᐅᓯᕚᓪᓕᕋᔭᕐᓂᖓ ᓄᓇᕗᑦ ᒐᕙᒪᒃᑯᑦ ᖃᓄᐃᓕᐅᕐᓂᖏᑦᑎᒍᑦ ᓄᓇᕗᑦ ᐊᑐᓕᖅᐸᑦ ᑭᒃᑯᓕᒫᓂᒃ ᓂᕈᐊᖅᑎᑦᑎᓂᒃᑯᑦ ᓯᕗᓕᐅᖅᑎᒃᓴᒥᑦ.

ᐅᓇᓕ ᐃᓚᒋᔭᐅᔪᖅ ᐊᒡᒍᒧᑦ ᒪᓕᒐᓕᐅᕐᑎ ᐹᓪ ᖁᐊᓴ. ᓄᓇᕗᑦ ᒪᓕᒐᓕᐅᕐᑎᖏᑦ ᑖᔅᓱᒥᖓ ᓯᕗᓕᐅᕐᑎᙳᖅᑎᑦᑎᓚᐅᕐᓯᒪᔪᑦ ᓄᕕᐱᕆ 17, 2017-ᒥ. ᑕᖅᑭᓂᒃ 7-ᑐᐃᓐᓇᕐᓂᒃ, ᔫᓂ 14, 2018-ᒥᑦ, ᑖᒃᑯᐊᑦᑕᐃᓐᓇᖅ ᒪᓕᒐᓕᐅᖅᑎᐅᔪᑦ ᐱᓕᕆᐊᖓᓂᒃ ᐲᕐᓯᓕᓚᐅᕐᓯᒪᔪᑦ.

ᒫᓐᓇᓕ, ᖁᐊᓴ ᑐᒃᓯᕋᐅᓯᐅᕋᓱᓕᕐᑐᖅ ᐱᔪᓐᓇᕐᓂᖃᕈᓐᓃᖅᑎᑦᑎᔪᓐᓇᖅᑐᒥᑦ ᒪᓕᒐᓕᐅᖅᑎᓂᒃ ᐊᒻᒪᓗ ᐊᔪᕐᓇᕐᓂᕐᓴᐅᒻᒪᕆᓕᕐᓗᓂ, ᐃᒻᒪᖄᓪᓘᓐᓃᑦ ᐊᔪᕐᓇᒻᒪᕆᓕᕐᓗᓂ, ᑖᒃᑯᐊ ᓯᕗᓕᐅᕐᑎᒥᒃ ᐲᕐᓯᔪᓐᓇᙱᓪᓗᑎᒃ ᓯᕗᓂᑦᑎᓐᓂ.

ᖃᐅᔨᑎᑦᑎᓚᐅᕐᒪᑦ ᐅᑭᐊᒃᓵᖑᓂᐊᕐᑐᒥᑦ, ᐃᓱᒪᓂᕋᖅᖢᓂ ᐊᐱᕆᔪᒪᓗᓂᒋᑦ ᑖᒃᑯᐊᑦᑕᐃᓐᓇᖅ ᒪᓕᒐᓕᐅᕐᑎᐅᔪᑦ ᐲᕐᓯᓚᐅᕐᑐᑦ ᓯᕗᓕᐅᕐᑎᐅᓂᖓᓂᒃ ᐃᑲᔪᖁᓪᓗᓂᒋᑦ ᓄᓇᕗᓕᒫᒥᑦ ᐊᐱᕐᓱᕈᒪᓂᕋᖅᖢᓂ ᓄᓇᕗᑦ ᓯᕗᓕᐅᕐᑎᖓ ᓂᕈᐊᖅᑕᐅᖃᑦᑕᖁᔭᐅᖕᒪᖔᑦ ᓄᓇᕗᒥᐅᓄᑦ.

ᑖᓐᓇ ᐃᓱᒪᒋᔭᖓ ᐃᑲᔪᕈᑎᖃᖅᑎᖢᓂᐅᒃ, ᖁᐊᓴ ᓴᖅᑭᒋᐊᖅᑎᑦᑎᓚᐅᕐᑐᖅ ᓄᓇᕗᒥᑦ ᐊᑐᓕᖅᑎᑕᐅᕙᓪᓕᐊᔪᓂᒃ ᖃᐅᔨᓴᖅᑎᑦ ᐱᓕᕆᓂᕆᓚᐅᕐᓯᒪᔭᖓᑦ 1990-ᖏᑦᑕ ᕿᑎᐸᓗᖏᓐᓂᒃ. ᐅᓇ ᐳᐃᒍᖅᑕᐅᓯᒪᔪᑐᖃᐅᓕᕐᑐᖅ ᖁᓕᐅᓪᓗᑎᒃ ᑎᒥᐅᔪᑦ ᐋᕿᒃᓯᓚᐅᕐᓯᒪᓂᑯᑦ ᓯᕗᓕᖅᐹᓂᒃ ᖃᓄᐃᓕᖓᓂᕆᓇᔭᖅᑕᖓᓂ ᑭᒃᑯᓕᒫᓄᑦ ᒐᕙᒪᒋᓇᔭᖅᑕᖓᓄᑦ, ᐅᕘᓈᖓᓪᓗᑎᒃ ᐳᐃᒍᖅᑕᐅᓯᒪᔪᑐᖃᐅᓕᕐᒥᔪᓂᒃ ᐊᖏᕈᑎᓂᒃ ᑕᐃᔭᐅᔪᑦ ᓄᓇᕗᒥᑦ ᒪᓕᒐᓕᕆᓂᕐᒧᑦ ᐱᔪᓐᓇᐅᑎᓕᕆᔨᑦ. 1996-ᒥᑦ, ᐃᓱᒪᓕᐅᕆᓚᐅᕐᓯᒪᖕᒪᑕ ᓄᓇᕗᑦ ᓯᕗᓕᐅᕐᑎᖓ ᓂᕈᐊᕆᔭᐅᔪᓐᓇᕐᓗᓂ ᓄᓇᕗᒥᐅᑕᓕᒫᓂᒃ ᒪᓕᒐᓕᕆᔨᒃᑯᑦ ᓂᕈᐊᖅᑕᐅᓚᐅᕐᑎᓐᓇᒋᑦ, ᐊᒻᒪᓗ ᑖᓐᓇ ᓯᕗᓕᐅᕐᑎᒃᓴᖅ ᐱᔪᓐᓇᐅᑎᖃᕐᓗᓂ ᒥᓂᔅᑕᐅᓇᔭᖅᑐᓂᒃ ᓂᕈᐊᖅᐸᒡᓗᓂ ᐊᒻᒪ ᐊᓂᑦᑎᔪᓐᓇᕐᓗᓂ.

ᑕᐃᒪᓕ ᖁᐊᓴ ᑕᒻᒪᙱᑦᑐᖅ. ᓄᓇᕗᑦ ᑲᒥᓴᓐᑯᑦ ᐱᓕᕆᕈᓘᔭᓚᐅᕐᓯᒪᖕᒪᑕ ᖃᓄᐃᓕᖓᔭᕆᐊᒃᓴᖓᓂᒃ ᓂᕈᐊᖅᑕᐅᑦᑎᐊᒻᒪᕆᒃᑐᒥᒃ ᓯᕗᓕᐅᕐᑎᒃᓴᒥᒃ. ᑖᓐᓇ ᓂᕈᐊᕐᓯᒪᓂᕐᓴᖓᑦ ᐱᔭᐅᓂᑯ 12-ᙶᖅᑐᓂᒃ ᐊᑐᖅᑕᐅᔪᓐᓇᕋᔭᖅᑐᓂᒃ.

ᑲᒥᓴᓐᑯᑦ ᑕᐃᒪᐃᓕᐅᓚᐅᕐᓯᒪᔪᑦ ᓲᖃᐃᒻᒪ, ᑕᐃᔅᓱᒪᓂ, ᓈᒻᒪᒃᓴᙱᔾᔪᑎᑕᖃᐅᒻᒪᕆᓚᐅᕐᓯᒪᖕᒪᑎ ᒐᕙᒪᐅᔪᓂᒃ ᓄᓇᑦᓯᐊᕐᒥᒃ, ᐃᓚᐅᓪᓗᑎᒃ ᐱᖓᓱᑦ ᐊᕕᒃᑐᖅᓯᒪᓂᐅᔪᑦ ᑭᖑᓂᐊᒍᑦ ᓄᓇᕗᒧᑦ ᐃᓚᒋᔭᐅᓚᐅᕐᑐᑦ. ᓂᕈᐊᖅᑕᐅᓯᒪᔪᑦ ᖁᑦᑎᓂᖏᑦ ᓇᓃᑐᐃᓐᓇᕋᓗᐊᕐᐸᑦ, ᐃᓚᐅᓪᓗᑎᒃ ᒪᓕᒐᓕᐅᕐᑎᑦ, ᑎᐅᕆᑑᕆᓄᑦ ᒥᓂᔅᑕᐅᔪᑦ ᐊᒻᒪ ᐱᓕᕆᔨᒻᒪᕆᐅᔪᑦ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓂᒃ, ᓴᖅᑭᑎᑦᑎᑲᑕᓕᓚᐅᕐᒪᑕ ᓈᒻᒪᒃᓴᙱᔾᔪᑎᒻᒪᕆᖕᓂᒃ, ᐱᕋᔭᒃᓯᑲᑕᖕᓂᕐᓂᒃ ᐊᒻᒪ ᓂᙵᑲᑕᖕᓇᕈᓘᔭᕐᓂᒃ, ᐊᒥᓱᑦ ᐊᒃᑐᐊᓪᓗᑎᒃ ᐱᑦᑎᐊᖃᑦᑕᐅᑎᕙᙱᓐᓂᕐᒥᒃ, ᐃᒥᐊᓗᓗᐊᖃᑦᑕᕐᓂᕐᒥᒃ ᐊᒻᒪᓗ ᐱᑦᑎᐊᖃᑦᑕᙱᓐᓂᕐᒥ ᐊᕐᓇᓂᒃ ᓱᕈᓯᕐᓂᒡᓗ.

ᓂᕈᐊᕈᓐᓇᖅᑐᐃᑦ ᑕᒪᐃᓐᓃᑦᑐᑦ ᐊᕕᒃᑐᕐᓯᒪᓂᕐᒥ ᓴᐱᓕᕐᓯᒪᖕᒪᕆᓕᓚᐅᕐᑐᑦ. ᑕᒪᓐᓇ ᓂᕈᐊᕐᓯᒪᖏᓐᓂᖅ ᓇᐅᒃᑯᑦ ᒐᕙᒪᓕᕆᓂᐅᔪᖅ ᖃᓄᖅ ᓈᒻᒪᙱᒃᓴᕐᓂᕐᒥᑦ ᓴᕿᑎᑦᑎᔪᓐᓇᕈᑎᐅᓚᐅᙱᒻᒪ ᓂᕈᐊᕐᓇᖅᑎᒍᑦ.

ᑭᓯᐊᓂᓕ ᐱᖓᓱᑦ ᐱᓕᕆᐊᖃᖅᑐᑦ ᐅᑯᓄᖓ ᓄᓇᕗᒥᑦ ᒪᓕᒐᓕᕆᓂᕐᒧ ᐱᔪᓐᓇᐅᑎᓕᕆᔨᒃᑯᓐᓄᑦ—ᓄᓇᕗᑦ ᑐᙵᕕᒃᑯᑦ ᐊᒻᒪ ᑲᓇᑕᐅᑉ ᒐᕙᒪᖓ ᐊᒻᒪᓗ ᓄᓇᑦᓯᐊᖅ—ᐃᓱᒪᒋᔭᐅᔪᒥ ᒪᓕᓚᐅᙱᑦᑐ ᒐᕙᒪᒃᑯᓐᓄᑦ ᓯᕗᓕᐅᖅᑎᐅᓂᐊᕐᑐᒥᒃ ᓂᕈᐊᖅᑎᑦᑎᓂᕐᒥᒃ ᐊᒻᒪᓗ ᑕᒪᓐᓇ ᓄᓇᕗᒥᑦ ᒪᓕᒐᓕᕆᔨᐅᓂᐊᖅᑐᓄᑦ ᐱᓕᕆᐊᖑᓂᐊᕐᓗᓂ.

ᐊᑯᓂᐅᙱᑦᑐᖅ ᓄᓇᕗᑦ ᓯᕗᓪᓕᖅᐹᖏᑦ ᒪᓕᒐᓕᐅᕐᑎᖏᑦ ᐃᓱᒪᓕᐅᕆᓚᐅᕐᓯᒪᔪᑦ. ᒫᑦᓯ 1999-ᒥᑦ, ᓂᕈᐊᓚᐅᕐᓯᒪᔪᑦ ᓯᕗᓕᐅᕐᑎᒃᓴᒥᒃ ᐊᒻᒪ ᒥᓂᔅᑕᐅᓂᐊᖅᑐᓂᒃ ᐃᖕᒥᖕᓂᙶᖅᑐᓂᒃ.

ᐊᒻᒪᓗ ᔫᓂ 1999-ᒥᑦ, ᒪᓕᒐᓕᕆᔨᐅᔪᑦ ᑲᑎᖃᑎᒌᒃᑎᓪᓗᒋᑦ ᖃᒪᓂᖅᑐᐊᕐᒥᓐ, ᒪᓕᒐᓕᐅᖅᑎᐅᔪᑦ ᑖᔅᓱᒥᖓ ᐊᑐᖃᑦᑕᕈᒪᓚᐅᕐᓯᒪᔪᑦ.

<i>”ᑳᑎᒪᔪᑦ ᐊᖏᕐᑐᑦ ᒫᓐᓇ ᓂᕈᐊᖅᖠᓂᐅᕙᒃᑐᖅ ᓯᕗᓕᐅᕐᑎᒥᒃ ᑕᐃᒪᓐᓇ ᐊᑐᖅᑕᐅᖃᑦᑕᕐᓂᐊᖅᑐᖅ ᑖᓐᓇ ᑭᐅᔨᐅᔪᓐᓇᐃᓐᓇᐅᔭᕐᓗᓂ ᓂᕈᐊᖅᑕᐅᓯᒪᔪᓂᑲᑎᒪᔨᓄᑦ ᒪᓕᒐᓕᕆᕝᕕᒃᒥᑦ,”i> ᐅᖃᓚᐅᕐᓯᒪᔪᑦ ᑐᓴᒐᒃᓴᑎᒍᑦ ᔫᓂ 17, 1999-ᒥᑦ. (ᓴᖑᖓᔪᑦ ᐅᕙᑦᑎᓐᓂᙶᖅᑐᑦ.)

ᑕᒪᓐᓇ ᑲᒪᓇᙱᓚᖅ. ᑕᒪᐃᓐᓂᑦ ᓄᓇᕗᑦ ᑲᒥᓇᓴᓐᑯᑦ 12 ᐃᓱᒪᒃᓴᖅᓯᐅᕈᑎᒃᓴᒃᑲᓐᓂᖏᑦ ᐃᒪᐃᑎᑦᑎᓇᔭᓚᐅᕐᒪᑕ ᒪᓕᒐᓕᕆᔨᑐᐃᓐᓇᐃᑦ ᓴᙱᓂᖃᕈᓐᓃᕐᓗᑎᒃ ᐊᒻᒪ ᐅᖃᖅᑕᖏᑦ ᐃᓱᒪᒋᔭᐅᓗᐊᕈᓐᓃᕐᓗᑎᒃ.

ᐄᓛᒃ, ᐊᓯᒎᖅᕕᒃᓴᖅᑕᖃᕋᔭᙱᒻᒪᑦ ᓂᕈᐊᖅᑕᐅᓪᓚᕆᒃᓯᒪᔪᒥᑦ ᓯᕗᓕᐅᕐᑎᒧᑦ ᒪᑯᐊ ᒪᓕᒐᓕᐅᕐᑎᑐᐃᓐᓇᐃᑦ—ᐊᒻᒪ ᑕᒪᒃᑯᐊ ᒥᑭᑦᑐᐃᑦ ᓄᓇᕗᑦ ᓄᓇᓕᖏᑦ ᐊᒻᒪ ᐊᕕᒃᑐᕐᓯᒪᓂᐅᔪᑦ ᑖᒃᑯᓇᙵᑦ ᑭᒡᒐᖅᑐᖅᑕᐅᓯᒪᔪᖅ—ᐊᓯᐅᔨᓇᔭᙱᒻᒪᑕ ᐱᔪᓐᓇᕐᓂᖏᓐᓂᒃ ᐊᒻᒪ ᐅᖃᖅᑕᖏᑦ ᑐᓴᖅᑕᐅᕙᖕᓂᖏᓐᓂᒃ.

ᑕᒪᓐᓇᓕ ᐅᓪᓗᒥᒧᑦ ᑎᑭᐅᑎᒍᑎᒋᕙᕗᑦ. ᑕᖅᑭᐅᓵᓚᐅᕐᑐᒥᑦ, ᒪᓕᒐᓕᐅᖅᑎᑐᐃᓐᓇᐃᑦ ᐱᒋᐊᓪᓚᒃᑲᓐᓂᕈᑎᖃᓚᐅᕐᒪᑕ ᐱᒻᒪᕆᐅᒋᔭᐅᔪᓂᒃ ᓯᕗᓪᓕᖏᑦᑕ ᐊᑐᖅᑕᐃᓕᒪᓚᐅᕐᑕᖓᓂᒃ 1999-ᒥᑦ, ᐅᖃᖅᖢᑎᒃ ᓯᕗᓕᐅᕐᑎ ᐊᒻᒪ ᒥᓂᔅᑕᐃᑦ ᑭᒃᑯᑐᐃᓐᓇᕐᓄᑦ ᑭᐅᔨᐅᔭᕆᐊᖃᕐᓂᖏᓐᓂ ᒪᐅᓇ ᑭᓯᐊᓂ ᒪᓕᒐᓕᕆᔨᑐᐃᓐᓇᐃᑦ ᐱᓕᕆᐊᖏᑦᑎᒍᑦ.

“ᒪᓕᒐᓕᕆᔨᑐᐃᓐᓇᐃᑦ ᑲᒪᒋᔭᖃᕐᒪᑕ ᐊᑑᑎᖃᖅᑐᒃᑯᑦ ᒐᕙᒪᒃᑯᓐᓂᒃ ᑭᐅᔨᐅᑎᑦᑎᔨᐅᖕᒪᑕ ᓄᓇᕗᑦ ᐃᓄᖏᓐᓄᑦ ᒪᐅᓇ ᖃᓄᐃᓕᐅᕈᓯᕆᕙᒃᑕᑦᑎᒍᑦ ᐊᐅᓚᔾᔪᑎᒃᓴᓕᕆᓂᒃᑯᑦ, ᐱᓕᕆᐊᒃᓴᓄᑦ ᐸᕐᓇᐅᑎᑎᒍᑦ, ᒪᓕᒐᓕᕆᓂᒃᑯᑦ ᐊᒻᒪ ᐊᑐᐊᒐᓕᕆᓂᒃᑯᑦ,” ᐅᖃᖅᑐᑦ, ᑎᑎᖃᑎᒍᑦ ᐊᑎᓕᐅᕐᑕᐅᓯᒪᔪᒥᒃ ᔮᓐ ᒪᐃᓐᒧᑦ, ᐃᒃᓯᕙᐅᑕᕆᔭᐅᔪᖅ ᑲᑎᒪᔨᕐᔪᐊᑐᐃᓐᓇᐃᑦ ᑲᑎᒪᔨᖏᓐᓄᑦ.

ᐅᓇ ᐅᖃᕐᓯᒪᔪᖅ ᐱᓕᕆᖃᑎᒋᔭᖏᓐᓄᑦ ᐃᑲᔪᖅᑕᐅᓂᐊᕈᒪᒍᑎ ᓂᕈᐊᕈᓐᓇᕐᓂᕐᒥᒃ ᓯᕗᓕᐅᕐᑎᒃᓴᒥᑦ, ᖁᐊᓴ ᒪᔪᕋᖅᑐᔪᒥᑦ ᓯᕗᓂᒃᓴᖃᖅᐳᖅ. ᐅᓇᓘᓐᓃᑦ ᓯᕗᓕᐅᕐᑎ ᔫ ᓴᕕᑲᑖᖅ ᐅᖃᓚᐅᕐᑐᖅ ᑕᒪᑐᒥᖓ ᐱᐅᒃᓴᙱᓐᓂᕋᖅᖢᓂ.

ᐅᓇ ᖃᓄᐃᓐᓂᖓᓂ ᐱᔾᔪᑎᖃᕈᑎᐅᙱᑦᑐᖅ ᖁᐊᓴᐅᑉ ᖃᓄᐃᓕᐅᕈᒪᓂᖓᓂᒃ, ᑕᐃᒪᐃᓕᓚᐅᖅᑎᓪᓗᒍᓗ, ᓇᓗᓇᙱᓚᖅ, ᐱᓪᓚᕆᒃᖢᓂ. ᑐᑭᖃᖅᑐᕐᓕ ᒪᓕᒐᓕᕆᓂᒃᑯᓪᓕ ᐱᓕᕆᓂᐅᕙᒃᑐᑎᒍᑦ ᑕᐃᒪᓐᓇ ᐱᔪᒪᓂᖅ ᐊᑐᖅᑕᐅᑎᑕᐅᓇᔭᙱᓐᓂᖓᓂᒃ ᖃᖓᑐᐃᓐᓇᖅ.

ᑭᓯᐊᓂᓕ, ᑕᒪᒃᑯᐊ ᒪᓕᒐᓕᐅᕐᑎᐅᔪᑦ, ᒥᓂᔅᑕᐃᓪᓘᓐᓃᑦ, ᐃᓱᒪᓕᑳᓪᓚᒃᑯᑎᒃ ᐊᑎᓕᐅᖅᑎᑦᑎᑲᑕᖕᓂᕐᒥᒃ ᐆᒥᖓ ᐊᐱᖅᑯᑎᒋᔭᐅᔪᒥᑦ ᓂᕈᐊᖃᑦᑕᕈᒪᓇᔭᕐᓂᕐᒥᒃ ᓯᕗᓕᐅᕐᑎᒃᓴᒥᒃ, ᑕᐃᒪᐃᓕᐅᕆᐊᖃᖅᑐᑦ ᐅᔾᔨᕆᑦᑎᐊᕐᓯᒪᓪᓚᕆᒡᓗᑎᒃ.

ᐊᒻᒪᓗ ᑭᒃᑯᓕᒫᓂᒃ ᓇᓗᓇᐃᔭᕐᓯᒪᑦᑎᐊᖅᑐᓂᒃ ᑐᒃᓯᕋᐅᑎᓂᒃ ᖃᓄᖅ ᑕᒪᓐᓇ ᐱᓕᕆᓂᐅᔪᖅ ᐱᓕᕆᐊᖑᖃᑦᑕᕋᔭᕐᓂᖓᓂᒃ. ᐊᐱᕆᑐᐃᓐᓇᕐᓗᓂ ᐃᓄᖕᓂ ᓂᕈᐊᕈᒪᓇᔭᕆᐊᒃᓴᖏᓐᓂᒃ ᐋᑲᓘᓐᓃᑦ ᓇᒻᒪᒐᔭᙱᒻᒪᑦ.

ᓲᖃᐃᒻᒪ ᖁᐊᕐᓵᕐᓇᓛᖑᓇᔭᕐᑐᕐᓕ ᓂᕈᐊᖅᑕᐅᓯᒪᓪᓚᕆᒃᑐᖅ ᒐᕙᒪᒃᑯᑦ ᓯᕗᓕᐅᕐᑎᖓ ᐃᒻᒪᓐᓇ, ᐅᔾᔨᕆᓗᐊᑦᑎᐊᑲᑕᙱᓪᓗᓂ, ᐱᓕᕆᔾᔪᓯᐅᔪᖅ ᐋᕿᒃᓯᒍᑎᐅᑐᐃᓐᓇᕆᐊᖃᕋᔭᕐᒪᑦ ᑎᓴᒪᓄᑦ ᐊᕐᕌᒍᓄᑦ ᐊᖓᔪᖅᑳᖃᕐᓂᕐᒥᒃ ᑭᓇᒧᑦ ᑭᐅᔨᐅᙱᓪᓗᓂ, ᐱᔭᐅᔪᒪᑐᐃᓐᓇᕐᑐᓂᒡᓕ ᐱᓕᕆᐊᖃᕐᓗᓂ.

ᑕᐃᒪᓕ ᑕᒪᒃᑯᓄᖓ ᐅᔾᔨᕐᓴᕈᑎᐅᔭᕆᐊᓖᑦ, ᒪᑯᑎᒎᓇᖅ ᓇᓗᓇᐃᔭᕐᓯᒪᑦᑎᐊᖅᑐᒃᑯᑦ ᑐᒃᓯᕋᐅᓯᐅᕐᓂᒃᑯᑦ, ᐋᕿᒃᓱᖅᑕᐅᔭᕆᐊᖃᕐᒪᑦ ᐱᓕᕆᐊᕆᔪᒪᔭᒧᑦ ᐊᐱᖅᑯᑎᐅᔪᒥᒃ.

ᖃᐅᔨᒪᒋᑦᑎ ᑖᓐᓇ ᓵᓚᒃᓴᖅᑐᖅ ᓂᕈᐊᖅᑕᐅᓂᒃᑯᑦ “ᓯᕗᓕᐅᖅᑎᓪᓚᕆᐅᒍᓐᓃᕋᔭᕐᒪᑦ.” ᑕᐃᒪᓐᓇ ᐱᓕᕆᔾᔪᓯ ᐋᕿᒃᓯᒍᑎᐅᓇᔭᕐᒪᑦ ᓄᑖᒥᑦ ᐃᓂᒋᔭᐅᓇᔭᖅᑐᒥᒃ, ᐊᔾᔨᐸᓗᖓᓂᒃ ᐊᒥᐊᓕᑲᒥᑦ ᒐᕙᓇᕆᔭᐅᔪᑎᑐᑦ, ᐅᓇ ᓄᓇᕗᑦ ᐱᓕᕆᐊᖑᕙᓪᓕᐊᓕᕐᓗᓂ ᐃᓄᖕᓂᑦ ᐊᒻᒪ ᑭᒡᒐᖅᑐᐃᔨᖏᓐᓂᒃ. ᑕᐃᑲᓂᓕ, ᐊᖓᔪᖅᑳᕆᔭᐅᔪᑦ ᐊᐅᓚᑦᑎᓂᕐᒥᒃ ᒐᕙᒪᒃᑯᓐᓂ—ᐅᓇ ᒐᕙᓇᐅᔪᖅ ᐊᒻᒪ ᒥᓂᔅᑕᖏᑦ—ᐃᒃᓯᕚᖃᑕᐅᕙᙱᒻᒪᑕ ᒪᓕᒐᓕᕆᕕᔨᔪᐊᕐᒥᓐ.

ᓴᕿᑎᑦᑎᒍᑎᐅᓇᔭᖅᑐᒃᓴᐅᔪᖅ ᓴᙱᓂᕐᓴᐅᔪᓂᒃ ᐊᐅᓚᑦᑎᔨᓕᕆᓂᕐᒥᒃ, ᒥᓂᔅᑕᓂᒃ ᐱᓂᕐᓴᓂᒃ, ᒥᓂᔅᑕᐅᑉ ᑐᒡᓕᖏᓐᓂᒃ ᐊᒻᒪ ᐊᓯᖏᓐᓂ ᒪᓕᒐᓕᕆᔨᕈᔪᖕᓂᒃ. ᑕᒪᐅᓇᑦᑕᐃᓐᓇᖅ, ᓴᙲᒃᑎᑦᑎᕚᓪᓕᕋᔭᕐᒪᑕ ᒪᓕᒐᓕᐅᕐᑎᓂᒃ ᐊᒻᒪᓗ ᒪᓕᒐᓕᕆᕝᕕᒃᒧᑦ ᑲᑎᒪᔨᕋᓛᓂᒃ.

ᐅᓇ ᑕᐅᑐᒃᖢᒍ ᓂᕈᐊᕈᒻᒪᐃᑦ ᕿᑭᖅᑖᓗᒃᒥᑦ ᓄᓇᕗᓕᒫᒥᒃ ᓂᕈᐊᖅᑎᑦᑎᓂᖃᑐᐃᓐᓇᕆᐊᖃᕋᔭᖅᑐᖅ, ᐅᓇ ᐃᓱᒪᒋᓪᓗᒍ ᓴᙲᒡᓕᕚᓪᓕᖅᑎᑦᑎᑐᐃᓐᓇᕐᓗᓂ ᐊᒻᒪ ᐊᔾᔨᒌᙱᑎᑦᑎᓂᖃᓕᕐᓗᑎᒃ ᒥᑭᓐᓂᕐᓴᓂᒃ ᐊᕕᒃᑐᕐᓯᒪᓂᒃᑰᖓᔪᓂᒃ ᐅᑯᑎᑐᓇᖅ ᕿᑎᕐᒥᐅᑎᑐᑦ. ᑕᐃᒪᓐᓇᖃᐃ ᓄᓇᕗᒻᒥᐅ ᐱᔪᒪᓪᓚᕆᖕᒪᑕ?

ᐊᒻᒪᓗ ᑭᓇ ᐱᔪᓐᓇᕐᓂᖃᕋᔭᕐᒪᑦ ᓯᕗᓕᐅᕐᑎᙳᕋᓱᒍᓐᓇᕐᓂᕐᒥᓐ? ᐃᓐᓇᑐᐃᓐᓇᖅ ᓄᓇᖃᖅᑑᕐ? ᒪᓕᒐᓕᐅᖅᑎᑐᐃᓐᓇᐃᑦ? ᐅᓇ ᐱᓂᖅᐹᖑᓪᓗᓂ, ᖃᓄᕐᓕ ᒪᓕᒐᓕᐅᕐᑎᐅᔪᑦ ᓂᕈᐊᖅᑕᐅᓯᒪᓪᓚᕆᒃᑐᒥᑦ ᓯᕗᓕᐅᕐᑎᒥᑦ ᐃᓂᒥᓄᑦ ᓈᒻᒪᙱᓕᐅᕈᑎᖃᓕᕐᓂᕈᓂ?

ᐊᒻᒪᓗ ᖃᖓᒃᑯᓪᓕ ᓂᕈᐊᕐᓇᐅᖃᑦᑕᕋᔭᕐᒪᓐ ᓯᕗᓕᐅᕐᑎᒃᓴᒧᓐ? ᒪᐅᓇᖃᐃᑦ ᓯᕗᓂᐊᒍᑦ ᒪᓕᒐᓕᐅᕐᑎᒃᓴᑦ ᓂᕈᐊᖅᑕᐅᓚᐅᙱᓐᓂᖏᓐᓂᒃ? ᓂᕈᐊᕐᓇᖅᑕᖃᓚᐅᕐᑎᓪᓗᒍ?

ᐊᒻᒪᓗ, ᐱᒻᒪᕆᐅᒋᓪᓗᓂ ᑕᐃᒪᓐᓇ ᐱᓕᕆᔾᔪᓯ ᐊᐃᑉᐸᖓᒍᑦ ᓂᕈᐊᕐᓂᖅᑕᖃᒃᑲᓐᓂᕐᒥᓗᓂ ᖁᑦᑎᓛᒥᒃ ᓂᕈᐊᖅᑕᐅᓂᑰᖕᓂ ᑖᒃᑯᐊ ᓂᕈᐊᒐᒃᓴᐅᔫᑦ ᐊᒃᓱᓪᓘᓐᓃᑦ ᓇᑉᐸᖓᓂᒃ ᓂᕈᐊᖅᑕᐅᔪᓐᓇᕐᓂᐊᕐᒪ ᐱᖃᑎᖓ ᓵᒪᖃᕐᓂᕋᖅᑕᐅᓕᕐᓗᓂ ᓯᕗᓕᐅᖅᑎᙳᓚᐅᙱᓐᓂᖓᓂᒃ.

ᒪᓕᒐᓕᕆᔨᕐᔪᐊᒃᑯᑦ ᑕᒪᒃᑯᓂᖓ ᐊᐱᖅᑯᑎᐅᔪᓂᒃ ᑭᐅᔪᓐᓇᙱᒃᑯᑎᒃ ᐊᑎᓕᐅᖅᑎᑦᑎᓚᐅᙱᓐᓂᖏᓐᓂᒃ ᑕᐃᒪᐃᓕᐅᕋᓱᓪᓗᐊᙱᑦᑐᑦ.

ᑕᐃᒪᐃᒃᑲᓗᐊᕐᑎᓪᓗᒍ, ᐊᔪᕐᓇᙱᓐᓂᕐᓴᒥᒡᓗ ᑭᐅᔾᔪᑎᑕᖃᕈᓐᓇᖅᑐᖅ ᐊᐱᖅᑯᑎᒧᑦ ᖃᓄᖅ ᓂᕈᐊᕈᓐᓇᕆᐊᒃᓴᖏᓐᓂ ᓯᕗᓕᐅᕐᑎᒃᓴᒥ ᓄᓇᕗᒥᐅᓕᒫᑦ ᐃᓚᐅᑎᑕᐅᓗᑎᒃ. ᐅᕝᕙᓕ ᒫᓐᓇ ᓇᓕᐊᒃᑯᑦ ᒐᕙᒪᓕᕆᔾᔪᓯᐅᔪᒥᑦ ᐊᑐᖅᑕᖓᓂ ᐊᑐᕈᓐᓃᕐᓗᑎᒃ ᐊᒻᒪᓗ ᑐᕌᒐᕆᔭᖃᖅᑐᑎᑐᑦ ᐱᓕᕆᐊᖃᖔᓕᕐᓗᑎᒃ.

ᑭᓯᐊᓂᓕᑦᑕᐅᖅ ᑕᐃᒪᓐᓇ ᓈᒻᒪᙱᑐᐃᓐᓇᕆᐊᖃᕐᒥᔪᖅ ᓄᓇᕗᒧᑦ. ᑕᑯᒋᐊᓚᐅᕐᐸᔅᓗᓯ ᑕᒪᑐᒪ ᒥᒃᓵᓄᑦ ᑎᑎᕋᖅᑎᒥᙶᖅᑐᒥᓐ ᖃᓂᑦᑐᒃᑯᑦ.