ᓄᑕᖅ ᐅᑭᐅᖅ ᓄᑖᓂᒃ ᐸᓖᓯᓂᒃ ᐊᒻᒪ ᐱᓕᕆᔾᔪᑎᓂᒃ ᑕᑯᓐᓇᕐᓂᐊᖅᑐᖅ ᓄᓇᕕᒃ ᐸᓖᓯᖏᓐᓂᒃ

ᐸᓖᓯᒃᑯᑦ ᐊᖓᔪᖅᑳᖓᑦ ᔮᓐ-ᐱᐊ ᓚᕉᔅ ᑲᑎᒪᔨᓂᒃ ᑐᓴᖅᑎᑦᑎᔭᖅᑐᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᑲᑎᒪᑎᓪᓗᒋᑦ ᓄᕕᐱᕆ 26-ᒥᑦ ᖃᓄᐃᑉᐸᓪᓕᐊᓂᖏᓐᓂᒃ ᒫᓐᓇᒧᑦ. ᐅᓇ ᐃᓚᖃᓚᐅᕐᑐᖅ ᐊᓂᒍᐃᓂᑯᓂᒃ ᖁᓕᓂᒃ ᓄᑖᓂ ᑲᑎᕕᒃ ᓄᓇᓕᓕᒫᑦ ᐸᓖᓯᑯᓐᓂ ᐅᕙᙵᑦ ᐋᓐᑎᐅᕆᐅᒥ ᐸᓖᓯᓄᑦ ᓯᓚᑦᑐᕐᓴᕐᕕᒃᒥᑦ ᐱᓇᓱᐊᕈᓯᕐᒥ ᑕᕝᕙᓂᑦᑕᐃᓐᓇᖅ.

ᐃᖅᑲᓇᐃᔮᖅᑖᖅᑎᑦᑎᕙᓪᓕᐊᓂᖅ ᐃᓚᖃᓚᐅᕐᒥᔪᖅ ᐃᖅᑲᓇᐃᔭᖅᑐᕕᓂᕐᓂᒃ ᐃᓐᓇᐅᓂᕐᒧᑦ ᓄᖅᑲᕐᓂᑯᓂᒃ ᐅᖃᓪᓚᖃᑎᖃᕈᓐᓇᖅᑎᑕᐅᓪᓗᑎᒃ ᐃᖅᑲᓇᐃᔮᖃᕐᓂᕐᒥᒃ ᑲᑎᕕᒃᒥᑦ.

ᐃᖅᑲᓇᐃᔭᖅᑎᑖᑦᑎᐊᕈᓐᓇᙱᓐᓂᕐᒧᑦ, ᑲᑎᕕᒃ ᓄᓇᓕᓕᒫᑦ ᐸᓖᓯᒃᑯᑦ ᐸᓖᓯᖃᕐᓯᒪᔪᑦ ᑯᐸᐃᒃᒥᑦ ᐸᓖᓯᒃᑯᓐᓂᒃ, ᐅᑯᓇᙵᑦ Sûreté du Québec, ᐃᓇᙱᖅᑎᐅᖃᑦᑕᖅᑐᓂᒃ. ᓯᑎᐱᕆᒥᑦ, 20 ᑯᐸᐃᒃ ᐸᓖᓯᖏᓐᓂᒃ ᐸᓖᓯᑕᖃᓚᐅᕐᑐᖅ ᓄᓇᕕᒃᒥᑦ.

ᑯᐸᐃᒃ ᐸᓖᓯᖏᑦ ᐅᓄᕈᓐᓃᖅᐸᓪᓕᐊᓯᒪᔪᑦ ᓱᒃᑲᐃᑦᑐᒥᒃ ᐅᑯᐊ ᑲᑎᕕᒃ ᓄᓇᓕᓕᒫᑦ ᐸᓖᓯᖏᑦ ᐸᓖᓯᑖᕋᓱᖕᓂᖏᓐᓂᒃ, ᐊᒻᒪᓗ ᓚᕉᔅ ᐅᖃᓚᐅᖅᖢᓂ 2020 ᐱᒋᐊᓕᓵᕐᓂᖓᓂᒃ ᑯᐸᐃᒃ ᐸᓖᓯᖏᓐᓂᒃ ᐊᑐᕈᓐᓃᑐᐃᓐᓇᕆᐊᖃᖅᖢᑎᒃ.

ᐃᓕᖁᓯᕐᓂᒃ ᖃᐅᔨᕚᓪᓕᕐᓂᕐᒧᑦ ᐊᔪᕈᓐᓃᕐᓴᕈᑏᑦ ᐱᒋᐊᖅᐳᑦ

ᐃᓄᐃᑦ ᐃᓕᖁᓯᖏᓐᓂᒃ ᖃᐅᔨᕚᓪᓕᕐᓂᕐᒧᑦ ᐊᔪᕈᓐᓃᕐᓴᕈᑎᒃᓴᑦ ᑲᑎᕕᒃ ᓄᓇᓕᓕᒫᑦ ᐸᓖᓯᓄᑦ ᖃᕋᓴᐅᔭᒃᑯᑦ ᓴᖅᑭᔮᓕᓚᐅᕐᒥᔪᖅ ᓄᕕᐱᕆ 18-ᒥᑦ. ᐊᔪᕈᓐᓃᕐᓴᕐᓂᖅ ᐋᖅᑭᒃᓱᖅᑕᐅᓚᐅᕐᑐᑦ ᑲᑎᕕᒃ ᓄᓇᓕᓕᒫᑦ ᐸᓖᓯᑯᓐᓂᒃ ᐊᒻᒪ ᓚᕚᓪ ᓯᓚᑦᑐᖅᓴᕐᕕᒡᔪᐊᒥᑦ ᐊᒻᒪ ᐃᓚᖃᖅᖢᓂ ᑐᓴᒐᒃᓴᐅᔭᕆᐊᓕᖕᓂᒃ ᓄᓇᕕᒃ ᒥᓵᓅᖓᔪᓂᒃ, ᐃᓄᐃᑦ, ᐃᓕᖁᓯᖏᑦ, ᐊᒻᒪᓗ ᐸᓖᓯᓕᕆᓂᖅ ᖃᓄᐃᑉᐸᓪᓕᐊᒍᓯᖏᓐᓂᒃ ᑕᒫᓂ ᓄᓇᕕᒃᒥᑦ.

ᐅᓇ ᐃᑲᕐᕋᓂ ᐱᖓᓱᓂᒃ ᐊᔪᕈᓐᓃᕐᓴᕐᓇᖅᑐᖅ ᐊᒻᒪ ᐱᐊᓂᒃᑯᓂ ᖃᐅᔨᓴᖅᑕᐅᓐᓇᖅᖢᓂ ᐊᔪᕈᓐᓃᕐᓴᖅᑕᐅᓵᖅᑐᓂᒃ, ᑖᓐᓇᓗ ᓇᓗᓇᐃᕐᑕᐅᓯᒪᓪᓗᓂ ᐃᖅᑲᓇᐃᔮᒧᑦ ᐱᓇᓱᒃᑎᓪᓗᒋᑦ. “ᐅᓇ ᐊᔪᕈᓐᓃᕐᓴᕈᑎ ᐃᑲᔪᕈᑎᐅᓇᓱᒃᑐᖅ ᑲᑎᕕᒃ ᓄᓇᓕᓕᒫᑦ ᐸᓖᓯᖏᑦ ᓂᕈᐊᕋᓱᒃᑎᓪᓗᒋᑦ ᐃᓕᖁᓯᕐᒥᒃ ᖃᓄᖅ ᐃᓱᒪᒋᔭᖃᕐᓂᖏᓐᓄᑦ,” ᓚᕉᔅ ᐅᖃᖅᑐᖅ.

ᐊᐃᑉᐸᖓᓕ ᐊᔪᕈᓐᓃᕐᓴᕈᑎᒃᓴᖅ ᐃᑲᕐᕋᓂᒃ 9-ᓂ ᑕᑭᓂᖃᖅᖢᓂ ᐊᒻᒪᓗ ᑕᒪᐃᓐᓄᑦ ᐸᓖᓯᓂᑦ ᐊᔪᕈᓐᓃᕐᓴᐅᑎᐅᔭᕆᐊᖃᖅᖢᓂ, ᐅᖃᖅᑐᖅ ᓚᕉᔅ. ᑖᓐᓇᓕ ᐱᐊᓂᒃᑕᐅᓂᐊᕋᓱᒋᔭᐅᔪᖅ ᓄᑖᖅ ᐅᑭᐅᖅ ᐱᒋᐊᓯᒪᓕᕐᐸᑦ.

ᐊᔾᔨᓕᐅᕈᑎᑦ ᐊᑐᖅᑕᐅᔭᕆᐊᖃᕐᓂᐊᖅᑐᑦ ᐸᓖᓯᓄᑦ

ᐊᓯᑲᓐᓂᖓ ᐃᓚᒋᐊᕈᑎᒋᔭᐅᓚᐅᕐᑐᖅ ᐸᓖᓯᒃᑯᓐᓂᒃ ᐊᒻᒪ ᖁᕕᐊᒋᔭᐅᓪᓗᓂ ᑲᑎᒪᔨᓄᑦ ᐅᓇ ᐊᔾᔨᓕᐅᕈᑎᖃᖃᑦᑕᕆᐊᖃᕐᓂᖏᑦ ᐸᓖᓯᑦ ᐃᖅᑲᓇᐃᔭᕐᓂᖏᓐᓂᒃ. ᐅᓇ ᖃᐅᔨᓴᕈᑎᐅᓇᓱᒃᑐᖅ ᐊᒻᒪᓗ 6-ᓂ ᐊᔾᔨᓕᐅᕈᑎᓂᒃ ᐊᑐᖢᑎᒃ ᒫᓐᓇ.

“ᐅᓇ ᐱᓕᕆᓂᖅ ᐱᒋᐊᖅᑕᐅᓂᑯ ᓄᓇᕕᒻᒥᐅᑦ ᐱᔪᒪᓯᒪᓂᖏᓐᓄᑦ ᐅᑯᓄᖓ ᑲᑎᕕᒃ ᓄᓇᓕᓕᒫᑦ ᐸᓖᓯᒃᑯᓐᓂ ᓴᖅᑭᔮᒃᑲᓐᓂᕈᓐᓇᕐᓗᑎᒃ ᐱᓕᕆᐊᖏᑦᑎᒍᑦ,” ᓚᕌᔅ ᐅᖃᖅᑐᖅ. “ᑲᑎᕕᒃ ᓄᓇᓕᓕᒫᑦ ᐸᓖᓯᖏᑦ ᑐᕌᒐᖃᕋᓱᖕᒪᑕ ᐃᓄᖕᓂᒃ ᐱᓕᕆᐊᖏᑦᑎᒍᑦ ᐅᐸᒃᑕᐅᔪᓐᓇᑦᐊᕐᓂᖏᓐᓂᒃ ᐊᒻᒪ ᐃᓅᖃᑎᒌᖕᓂᕐᓴᐅᔪᓐᓇᕐᓗᑎᒃ.”

ᑰᔾᔪᐊᖅᒥᑦ ᑲᑎᒪᔨ ᔫᐱ ᑕᒃᑭᐊᐱᒃ ᓂᕆᐅᒋᔭᖃᓚᐅᕐᑐᖅ ᑖᒃᑯᐊ ᐊᔾᔨᓕᐅᕈᑏᑦ ᐃᑲᔪᕈᓐᓇᕋᔭᕐᓂᖏᓐᓂᒃ ᐃᓄᖕᓂᒃ ᑖᒃᑯᓂᖓ ᓈᒻᒪᙱᓕᐅᕈᑎᖃᕐᓯᒪᔪᓂᒃ ᐸᓖᓯᒃᑯᓐᓂᑦ.

“ᑐᓴᖃᑦᑕᕋᑦᑕ ᐸᓖᓯᒃᑯᓐᓂ ᓈᒻᒪᙱᑦᑐᒃᑯᑦ ᐱᓕᕆᐊᖑᕙᒃᑐᓂᒃ ᐊᒻᒪᓗ ᑕᒪᒃᑯᐊ ᐅᖃᕐᓯᒪᔫᒐᓗᐊᑦ ᐅᖃᒻᒪᕆᒍᒪᓇᑎᒃ. ᐸᓖᓯᓄᑦ ᖁᒃᓴᓱᒃᓯᒪᖃᑦᑕᕐᒪᑕ,” ᑕᒃᑭᐊᐱᒃ ᐅᖃᖅᑐᖅ. “ᐅᑯᐊ ᑎᒥᖏᓐᓃᑦᑐᑦ ᐊᔾᔨᓕᐅᕈᑏᑦ ᐊᑐᖅᑕᐅᔭᕆᐊᖃᕐᒪᑕ.”

ᐅᖃᒃᑲᓐᓂᖅᖢᓂ ᐊᑕᐅᓯᑐᐊᕐᓘᓐᓃᑦ ᒪᕐᕉᒡᓘᓐᓃᒃ ᐸᓖᓰᒃ ᐃᓄᖕᓂ ᐱᑦᑎᐊᙱᓐᓂᕈᑎᒃ, ᑕᒪᓐᓇ ᐊᒃᑐᐃᓂᖃᒻᒪᕆᖕᒪᑦ ᐊᖏᔪᒥᒃ, ᐊᒻᒪᓗ ᐃᓱᒫᓘᑎᖃᕈᑎᐅᓕᔭᖢᓂ ᐸᓖᓯᒃᑯᓐᓂᓕᒫᖅ.

ᑕᐃᒪᓕ ᐃᓱᒪᔪᖅ ᑖᒃᑯᐊ ᐊᔾᔨᓕᐅᕈᑎᒃ, ᐊᔾᔨᓕᐅᖅᐸᓪᓕᐊᖃᑦᑕᖅᑐᑦ ᐸᓖᓯ ᖃᓄᐃᓕᐅᖅᐸᓪᓕᐊᓂᖓᓂᒃ, ᖃᓂᑦᑐᒃᑯᑦ ᐊᑐᖅᑕᐅᓕᕈᓐᓇᕐᓗᑎᒃ.

ᓚᕉᔅ ᐅᖃᓚᐅᕐᑐᖅ ᑖᒃᑯᓂᖓ ᐊᔾᔨᓕᐅᕈᑎᓂᒃ ᐊᑐᓕᓛᕐᓂᕋᐃᓪᓗᓂ ᔭᓄᐊᕆᒥᑦ. ᐅᖃᒃᑲᓐᓂᖅᖢᓂ ᐱᑦᑎᐊᙱᓗᐊᕐᓂᐊᓗᒃ ᐊᒻᒪ ᓈᒻᒪᙱᓗᐊᖅᑐᒥᑦ ᖃᓄᐃᓕᐅᕈᑎᐅᔪᑦ ᒪᓂᒪᒍᑎᐅᑐᐃᓐᓇᔾᔮᙱᓐᓂᕋᖅᖢᓂᒋᑦ ᐸᓖᓯᒃᑯᓐᓂᒃ.

“ᐸᓖᓯᒥ ᐃᖅᑲᓇᐃᔭᕈᓐᓃᖅᑎᑦᑎᓵᓚᐅᕐᒥᔪᖓ ᐱᓇᓱᐊᕈᓯᐅᓚᐅᕐᑐᒥᑦ ᐱᓇᓱᐊᒐᑦᑎᓐᓂᒃ ᓄᓇᕕᒻᒥᑦ ᒪᓕᙱᓗᐊᕐᓂᖓᓄᑦ,” ᐅᖃᖅᑐᖅ. “ᐸᓖᓯᓂᒃ ᐱᓗᐊᖅᑐᐊᓗᖕᓂᒃ ᐸᓖᓯᖃᕈᒪᙱᓐᓇᑦᑕ ᓄᓇᕕᒃᒥᑦ.”