ᓄᑖᑦ ᐊᐅᓚᐅᑎᖃᕐᕕᖕᓂ ᑐᒃᓯᕋᖅᑕᐅᔪᑦ ᑰᒑᕐᔪᖕᒥ ᐊᒻᒪ ᐃᒡᓗᓕᒑᕐᔪᖕᒥ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦ, ᓄᓇᕘᑉ ᐆᒪᖅᑯᑎᓄᑦ ᑐᓂᓯᔨᐅᔪᓂ, ᓴᓇᔪᒪᕗᑦ ᓄᑖᓂ ᐅᖅᓱᐊᓗᑐᐃᓐᓇᕐᒧᑦ−ᐃᖏᕐᕋᔪᓂ ᐊᐅᓚᐅᑎᖃᕐᕕᖕᓂ ᑰᒑᕐᔪᖕᒥ ᐊᒻᒪᓗ ᐃᒡᓗᓕᒑᕐᔪᖕᒥ ᐃᓇᖏᖅᓯᓂᕐᒥ ᓄᑕᐅᙱᑦᑐᓂ ᐆᒻᒪᖅᑯᑎᓄᑦ ᐊᐅᓚᐅᑎᖃᕐᕕᓂᑦ ᐊᕐᕌᒍᑦ 40 ᐅᖓᑖᓃᑦᑐᓂ.

ᑰᒑᕐᔪᒃ ᓄᓇᓕᖕᓂ ᐊᐅᓚᑦᑎᔨᐅᔪᖅ ᐃᒦᓕᐋᓄ ᕿᖕᓄᖅ ᐅᖃᖅᐳᖅ “ᖁᕕᐊᕐᔪᐊᖅᐳᖅ” ᑐᒃᓯᕋᖅᑕᐅᔪᒥ ᓄᑖᒥ ᐊᐅᓚᐅᑎᖃᕐᕕᖕᒥ ᓄᓇᓕᖓᓐᓄᑦ.

ᑕᒪᒃᑭᑦ ᓄᑖᖑᔪᓂ ᐊᐅᓚᐅᑎᖃᕐᕕᖕᓂ ᐅᖅᓱᐊᓗᑐᐃᓐᓇᕐᒧᑦ−ᐃᖏᕐᕋᓂᐊᓂᐊᖅᐳᑦ ᑭᓯᐊᓂ ᐱᔪᓐᓇᕐᓂᖃᕐᓂᐊᖅᐳᑦ ᐃᓚᓕᐅᔾᔨᓂᕐᒥ ᓄᓇᒥᙶᖅᑐᒥ ᐆᒻᒪᖅᑯᑎᓂᑦ, ᐅᖃᐅᓯᐅᓪᓗᓂ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦᑕ ᑐᒃᓯᕋᐅᑎᖏᓐᓂ.

ᒫᓐᓇᐅᔪᖅ ᐊᐅᓚᐅᑎᖃᕐᕕᒃ ᑰᒑᕐᔪᖕᒥ 47−ᓂ ᐅᑭᐅᖃᖅᐳᖅ, ᐃᒡᓗᓕᒑᕐᔫᑉ 46−ᓂ ᐅᑭᐅᖃᖅᐳᖅ. ᑕᒪᒃᑭᑦ ᐊᐅᓚᐅᑎᖃᕐᕕᑦ ᓂᕆᐅᒋᔭᐅᔪᒥ ᐃᓅᓯᖃᕐᓂᐊᕋᓱᒋᔭᐅᓚᐅᖅᐳᖅ ᐊᕐᕌᒍᓄᑦ 40−ᓄᑦ ᓴᓇᔭᐅᓚᐅᖅᑎᓪᓗᒋᑦ.

ᓄᑖᑦ ᐊᐅᓚᐅᑎᖃᕐᕕᑦ ᓂᕆᐅᒋᔭᐅᕗᑦ ᐊᑐᓕᕐᓂᐊᕐᓂᖏᓐᓂ 2026−ᒥ ᕿᓚᒻᒥᐅᓛᖓᓂ.

ᐊᐅᓚᑦᑎᐊᕐᓂᖅᓴᐅᔪᒥ ᐊᐅᓚᐅᑎᖃᕐᕕᖕᓂ ᑐᙵᓱᒃᑎᑕᐅᓂᐊᖅᐳᖅ ᑰᒑᕐᔪᖕᒥ, ᒫᓐᓇᐅᔪᒥ ᐆᒻᒪᖅᑯᑎᖃᕐᕕᖓ ᖃᒥᓲᖑᖕᒪᑦ ᐅᑭᐅᕐᒥ ᐱᖅᓯᑐᐊᕌᖓᑦ, ᕿᖕᓄᖅ ᐅᖃᓚᐅᖅᐳᖅ.

ᐃᒡᓗᓕᒑᕐᔪᖕᒥ ᓄᓇᓕᖕᓂ ᐊᐅᓚᑦᑎᔨᖓ, ᔮᓐ ᐊᐃᕕ, ᐅᖃᓚᐅᖅᐳᖅ ᐊᒃᓱᕈᕐᓇᒐᓚᖕᓂᐊᕐᓂᖓᓂ ᐱᓇᓱᐊᕐᓂᕐᒧᑦ ᓈᒻᒪᒃᑐᒥ ᑐᐊᐸᖕᒥ ᑐᙵᕕᒃᓴᖓᓄᑦ ᓄᑖᒧᑦ ᐊᐅᓚᐅᑎᖃᕐᕕᒃᓴᒧᑦ, ᑭᓯᐊᓂ ᑭᒃᑯᓕᒫᑦ ᓄᓇᓕᖕᓂ ᑕᑯᔪᒪᕗᑦ ᓴᓇᔭᐅᓂᖓᓂ.

ᑕᒪᒃᑭᓂ ᓄᓇᓕᐅᔪᓂ, ᐱᑕᖄᓂᒃᑐᑦ ᐊᐅᓚᐅᑎᖃᕐᕕᒧᑦ ᐱᓕᕆᔾᔪᑎᖏᑦ ᐱᐅᔪᓐᓃᖅᐸᓪᓕᐊᓕᖅᐳᑦ ᐋᖅᑭᒐᒃᓴᐅᔪᓐᓃᓕᖅᖢᑎᒃ ᐊᒻᒪᓗ ᐅᖅᓱᐊᓗᖕᓄᑦ ᖃᑦᑖᓗᖏᑦ ᑭᐅᒪᙱᓚᑦ ᒐᕙᒪᑐᖃᒃᑯᑦ ᐱᖁᔭᖏᓐᓂ.

“ᓴᓇᔭᐅᓯᒪᓂᖓᓂ ᖄᖏᖅᓯᒪᓕᖅᑐᓂ ᐊᕐᕌᒍᓂ 50−ᓂ ᒪᓕᑦᑎᐊᖅᓯᒪᓂᖃᙱᓚᖅ ᐊᒃᓱᕈᕈᑕᐅᔪᓂ ᐅᑭᐅᖅᑕᖅᑐᒥ ᒫᓐᓇᑎᑐᑦ,” ᐅᖃᓚᐅᖅᐳᖅ ᐱᐅᓪ ᓂᐹᑦ, ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓᑦᑕ ᑐᑭᒧᐊᒃᑎᑦᑎᔨᖓ ᐊᐅᓚᑕᐅᓂᖓᓂ.

ᑰᒑᕐᔫᑉ ᐊᐅᓚᐅᑎᖃᕐᕕᖓ ᐊᑭᖃᕐᓂᐊᖅᐳᖅ $39 ᒥᓕᐊᓐᐸᓗᖕᓂ ᐊᒻᒪ ᐃᒡᓗᓕᒑᕐᔫᑉ ᐊᑭᖃᕐᓂᐊᖅᐳᖅ $35 ᒥᓕᐊᓐᐸᓗᖕᓂ. ᐊᑐᓂ ᐊᐅᓚᐅᑎᖃᕐᕕᒃ ᐱᓂᐊᖅᐳᑦ $22 ᒥᓕᐊᓐᓂ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᔨᒃᑯᓐᓂ ᑮᓇᐅᔭᖃᖅᑎᑕᐅᓂᖏᓐᓂ, ᒐᕙᒪᑐᖃᒃᑯᑦ ᐱᓕᕆᐊᖑᔪᒥ

ᑭᓯᐊᓂ ᐊᒥᐊᒃᑯᖓ ᐊᑭᖓᓐᓂ ᐊᑐᖅᐸᒃᑐᓂᐅᓂᐊᖅᐳᖅ. ᑰᒑᕐᔪᖕᒧᑦ $16.4 ᒥᓕᐊᓐᐸᓘᓂᐊᖅᐳᖅ ᐊᒻᒪ ᐃᒡᓗᓕᒑᕐᔪᖕᒧᑦ $12.5 ᒥᓕᐊᓐᐸᓘᓂᐊᖅᐳᖅ.

ᓱᓕ ᓇᓗᓇᖅᐳᖅ ᖃᓄᖅ ᐊᑭᓂᑦ ᐊᑭᓖᕙᒃᑐᑦ ᐱᓂᐊᕐᓂᖏᓐᓂ ᐅᑯᓂᖓ ᐊᑭᐅᔪᓂᑦ, ᑭᓯᐊᓂ ᓂᐹᑦ ᐅᖃᓚᐅᖅᐳᖅ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᔨᒃᑯᓐᓂ ᑮᓇᐅᔭᖃᖅᑎᑕᐅᓂᐅᔪᖅ ᐱᓕᕆᐊᒃᓴᐅᔪᓂ ᐊᑭᑭᓐᓂᖅᓴᐅᑎᑦᑎᓲᖑᕗᖅ ᐊᑭᒋᓇᔭᓚᐅᖅᑕᒥᓂᑦ.

ᓇᑉᐸᖅᑎᕆᓂᖅ ᓄᑖᖑᔪᓂ ᐊᐅᓚᐅᑎᖃᕐᕕᖕᓂ ᓴᖅᑭᑎᑦᑎᓂᐊᖅᐳᖅ ᐃᖅᑲᓇᐃᔮᒃᓴᓂ ᑕᒪᒃᑭᓂ ᓄᓇᓕᐅᔪᓂ, ᓂᐹᑦ ᐅᖃᓚᐅᖅᐳᖅ, ᑭᓯᐊᓂ ᒫᓐᓇᐅᔪᒥ ᑐᑭᓯᓇᓚᐅᙱᓚᖅ ᖃᔅᓯᐅᓂᐊᕐᓂᖏᓐᓂ.

ᓄᑖᖑᔪᓂ ᐅᖅᓱᐊᓗᑐᐃᓐᓇᕐᒧᑦ−ᐃᖏᕐᕋᓂᐅᔪᓂ ᐊᐅᓚᐅᑎᖃᕐᕕᖕᓂ ᑐᓂᓯᕗᖅ ᐊᒃᓱᕈᕐᓇᕐᓂᐅᔪᒥ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐊᔭᐅᕆᔪᒥ ᓄᓇᕐᔪᐊᓕᒫᒥ ᓴᖑᓂᕐᒧᑦ ᓄᓇᒥᙶᕐᓂᖅᓴᐅᔪᒥ ᐆᒻᒪᖅᑯᑎᖃᕐᓂᖏᓐᓂ. ᒐᕙᒪᑐᖃᒃᑯᑦ ᐅᖃᖅᓯᒪᕗᑦ ᒥᒃᖠᒋᐊᖅᑎᑦᑎᓂᕐᒥ ᐅᖅᓱᐊᓗᑐᐃᓐᓇᕐᒥ ᐊᑐᖃᑦᑕᕐᓂᖓᓂ ᐅᑭᐅᖅᑕᖅᑐᒥ ᐊᒻᒪ ᑲᓇᑕᒥ ᑎᑭᐅᑎᓂᖓᓂ−0−ᒥ ᐊᓂᐊᑎᑦᑎᓂᐅᔪᓂ 2050−ᒥ. ᑭᓯᐊᓂ ᓄᑖᑦ ᐊᐅᓚᐅᑎᖃᕐᕕᑦ ᑐᒃᓯᕋᖅᑕᐅᕗᑦ ᐊᐅᓚᓂᖏᓐᓂ ᐅᖅᓱᐊᓗᑐᐃᓐᓇᕐᒥ ᐊᕐᕌᒍᒃᑲᓐᓂᕐᓂᕐᓄᑦ 40−ᓄᑦ.

ᓂᐹᑦ ᐅᖃᓚᐅᖅᐳᖅ ᑕᐃᒫᒃ ᓄᑖᖑᔪᑦ ᐊᐅᓚᐅᑎᖃᕐᕕᑦ ᐱᐅᓂᖅᓴᐅᔪᒥ ᐃᓚᓕᐅᔾᔨᓂᖃᕈᓐᓇᕐᓂᐊᖅᐳᑦ ᓄᓇᒥᙶᖅᑐᒥ ᐆᒻᒪᖅᑯᑎᓕᕆᕐᒥ ᓲᕐᓗ ᓯᕿᓂᕐᒥ ᐊᒻᒪ ᐊᓄᕆᒧᑦ ᐆᒻᒪᖅᑯᑎᖃᕐᓂᕐᒥ.

ᓄᑕᐅᙱᑦᑐᓂ ᐊᐅᓚᐅᑎᖃᕐᕕᒃᑎᑐᑦ, ᓄᑖᖑᔪᑦ ᐱᔭᕆᑐᓂᖃᕐᓂᐊᖅᐳᑦ ᐃᓚᓕᐅᔾᔨᓂᕐᒥ ᓄᓇᒥᙶᖅᑐᒥ ᐆᒻᒪᖅᑯᑎᓕᕆᕐᒥ ᑐᓐᓂᖅᓴᐃᓂᕐᒧᑦ ᐱᓕᕆᔾᔪᓯᐅᔪᒧᑦ ᑐᓂᓯᕙᒃᑐᒥ ᐆᒻᒪᖅᑯᑎᓂ ᓄᓇᓕᐅᔪᒧᑦ, ᐅᖃᓚᐅᖅᐳᖅ.

ᓱᓕᓂᐅᔪᖅ ᐆᒻᒪᖅᑯᑎᓂ ᐱᔭᕆᐊᓕᖕᓂ ᐊᑦᑕᓇᓪᓗᐊᙱᓚᖅ, ᐱᔪᓐᓇᑦᑎᐊᕐᓗᓂ ᐊᒻᒪ ᐊᑭᑐᓗᐊᙱᓪᓗᓂ, ᑭᓯᐊᓂ ᐅᖅᓱᐊᓗᑐᐃᓐᓇᑦ ᑭᐅᔪᑑᕗᖅ ᐅᑯᓂᖓ ᐱᔭᕆᐊᖃᕐᓂᐅᔪᓂ ᒫᓐᓇᐅᔪᒥ ᓄᓇᕗᒻᒥ, ᓂᐹᑦ ᐅᖃᓚᐅᖅᐳᖅ.

ᑐᒃᓯᕋᐅᑕᐅᔪᑦ ᑕᒪᒃᑭᓄᑦ ᐊᐅᓚᐅᑎᖃᕐᕕᖕᓂ ᒫᓐᓇᐅᔪᒥ ᕿᒥᕐᕈᔭᐅᕗᑦ ᐆᒻᒪᖅᑯᑎᓕᕆᔨᒃᑯᓐᓂ ᐊᑭᖏᓐᓂ ᕿᒥᕐᕈᔨᐅᔪᓂ ᑲᑎᒪᔨᒃᑯᓐᓂ. ᓄᓇᕗᒻᒥᐅᑦ ᓇᒃᓯᐅᔾᔨᔪᓐᓇᕆᕗᑦ ᑎᑎᕋᖅᓯᒪᔪᓂ ᑐᓂᓯᓂᐅᔪᓂ ᑐᒃᓯᕋᐅᑕᐅᒧᓂ ᐆᒧᖓ ᐃᒻᒥᒃᑰᖅᑐᒥ ᑲᑎᒪᔨᐅᔪᓄᑦ ᕕᕗᐊᕆ 25−ᖑᕋᓱᖕᓂᖓᓂ.