ᓄᑖᖅ ᐅᒥᐊᕐᔪᐊᖅ ᖃᐅᔨᓴᕈᑎᒃᓴᖅ ᖃᐅᔨᓴᕈᑎᐅᓂᐊᕐᑐᖅ ᐃᖃᓗᖕᓂᒃ, ᑕᕆᐅᓪᓗ ᐃᖅᑲᖓᓂᒃ ᓄᓇᙳᐊᓕᐅᕐᓗᑎᒃ ᕿᑭᖅᑖᓘᑉ ᒥᒃᓵᓂ

ᐅᓇ ᑎᐊᑦ ᐃᕐᓂᖅ ᐅᒥᐊᖅᑐᑲᑕᒃᑎᓪᓗᒍ ᓛᐸᑐᐊᑉ ᐅᐊᖕᓇᒻᒪᕆᐊᓂᒃ ᖃᖓᑦᑎᐊᓵᖅ, ᑖᓐᓇ ᐊᒻᒪ ᐱᖓᓱᑦ ᐅᒥᐊᖅᑐᖃᑎᒋᖕᒥᔭᖏᑦ ᑕᑯᓚᐅᕐᓯᒪᔪᑦ ᑐᒥᓕᐊᕆᔭᐅᓯᒪᔪᓂᒃ ᐱᖃᓗᔭᕐᓄᑦ ᑕᕆᐅᑉ ᐃᖅᑲᖓᓂᒃ.

“ᐅᓇ ᑕᑭᒥᓇᓛᖑᓯᒪᔪᖅ ᒫᓐᓇᒧᑦ ᑕᑯᔭᑦᑎᓐᓂ,” ᐅᖃᖅᑐᖅ, ᐊᒻᒪ ᐅᖃᙳᐊᖅᖢᓂ ᓱᓕ ᐅᒥᐊᕐᔪᐊᕕᓂᕐᒥᒃ ᓇᓂᓯᓚᐅᙱᓐᓂᖏᓐᓂᒃ.

ᐃᕐᓂᖅ ᐱᓕᕆᔾᔪᑎᓕᕆᓂᕐᒧᑦ ᐊᔪᕈᓐᓃᖅᓴᖅᑎᐅᔪᖅ ᐅᕙᓂ RV Ludy Pudluk ᐅᒥᐊᕐᔪᐊᕐᒥ, ᓄᑖᖅ $2.6 ᒥᓕᐊᓐ ᑖᓚᑐᕐᑐᖅ ᖃᐅᔨᓴᕐᕕᒃ ᐅᒥᐊᕐᔪᐊᖅ, ᓇᖕᒥᓂᕆᔭᐅᔪᖅ ᕿᑭᖅᑖᓗᒃ ᑯᐊᐳᕇᓴᓐᑯᓐᓄᑦ, ᑖᒃᑯᐊᓗ ᑎᑭᓵᓚᐅᖅᖢᑎᒃ ᑭᙵᓄᑦ.

ᑖᒃᑯᐊ ᐱᓕᕆᔨᐅᔪᑦ ᓄᓇᙳᐊᓕᐅᖅᐸᓪᓕᐊᓚᐅᕐᑐᑦ ᑕᕆᐅᑉ ᐃᖅᑲᖓᓂᒃ ᑕᒪᐅᙵᐅᕙᓪᓕᐊᑎᓪᓗᒋᑦ ᐅᕙᙵᑦ ᓴᐃᓐᑦ ᔮᓐᔅ ᓂᐅᕙᐅᓐᓛᓐᒥ ᑕᒫᓂᓗ ᕿᑭᖅᑖᓘᑉ ᒥᒃᓵᓂᒃ ᐃᖃᓗᒐᓱᒡᕕᐅᕙᒃᑐᓂᒃ ᖃᐅᔨᓴᑲᑕᖕᓂᐊᖅᖢᑎᒃ ᓄᓇᓖᑦ ᖃᓂᒋᔭᖏᓐᓂᒃ ᓄᓇᕗᒥᓐ.

ᐸᕐᓇᒃᓯᒪᖕᒪᑕ ᖃᐅᔨᓴᑲᑕᖕᓂᐊᕐᓗᑎᒃ ᒫᓂ ᑭᖓᐃᑦ ᐊᒻᒪ ᓴᓂᑭᓗᐊᑉ ᖃᓂᒋᔭᖓᓂᒃ ᐊᐅᔭᐅᔪᖅ ᐊᒻᒪᓗ ᑕᐃᒪᓐᓇᑦᑕᐃᓐᓇᖅ ᐱᓕᕆᖕᒥᓗᑎᒃ ᒫᓂ ᓴᓂᕋᔭᒃ ᐊᒻᒪ ᐃᒡᓗᓕᐅᑉ ᓗᒥᒃᓵᓂᒃ ᐊᕐᕌᒍ. ᐱᓕᕆᐊᖏᑦᑎᒍᑦ ᐱᓇᓱᐊᒐᖃᕋᓱᒃᑐᑦ ᐃᓄᐃᑦ ᓄᓇᖃᖅᑐᑦ ᖃᐅᔨᓴᖃᑦᑕᕈᓐᓇᕐᓯᓗᑎᒃ ᓇᖕᒥᓂ ᐅᒥᐊᖏᓐᓂᒃ ᐊᑐᕐᓗᑎᒃ, ᐅᓇ ᐅᖃᓚᐅᕐᑐᖅ ᔨᐅᕆ ᕗᐊᑦ, ᑐᑭᒧᐊᖅᑎᑦᑎᔨ ᐃᖃᓗᓕᕆᓂᕐᒥᒃ ᕿᑭᖅᑖᓗᒃ ᑯᐊᐳᕇᓴᓐᑯᓐᓄᑦ.

ᐃᓱᒪᖕᒪᑕᓕ ᐅᓇ ᐅᒥᐊᕐᔪᐊᖅ ᓘᑎ ᐸᓪᓗᖅ, ᓴᓇᔭᐅᓚᐅᕐᓯᒪᔪᖅ 2018-ᒥ ᐱᓕᕆᖃᑎᖃᖅᖢᑎᒃ ᐅᓄᕈᓘᔭᖅᑐᓂᒃ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓂᒃ ᐊᒻᒪᓗ ᓄᓇᕗᒥᑦ ᒐᕙᒪᒃᑯᓐᓂᒃ, ᑕᒪᑐᒥᖓ ᐱᓕᕆᐊᖃᕐᓂᕐᒥᒃ ᐱᕙᓪᓕᐊᑎᑦᑎᔾᔪᑎᐅᔪᓐᓇᕐᓗᓂ.

ᐅᓇ ᐅᒥᐊᕐᔪᐊᖅ ᐊᑎᖃᖅᑐ ᒪᓕᒐᓕᕆᔨᐅᕙᓚᐅᖅᓯᒪᔪᒥᒃ ᓘᑎ ᐸᓪᓗᖅᒥᓐ, ᒥᑦᑎᒪᑕᓕᖕᒥᐅᑕᕕᓂᖅ, ᐊᒻᒪᓗ ᐊᕐᕌᒍᓂ ᐊᕙᑎᓂᒃ (20) ᓄᓇᑦᓯᐊᕐᒧᑦ ᒪᓕᒐᓕᕆᔨᐅᓂᑰᓪᓗᓂ ᐊᒻᒪᓗ ᐊᑯᓂᐊᓗᒃ ᐃᓚᒋᔭᐅᓚᐅᕐᓯᒪᓪᓗᓂ ᕿᑭᖅᑖᓗᒃ ᑯᐊᐳᕇᓴᓐᑯᑦ ᑲᑎᒪᔨᖏᓐᓄᑦ. ᐸᓪᓗᖅ ᐃᓅᔪᓐᓃᓚᐅᕐᓯᒪᔪᖅ 2018-ᖑᑎᓪᓗᒍ.

ᑖᓐᓇ ᐅᒥᐊᕐᔪᐊᖅ ᖄᖓᒍᑦ ᖃᐅᓪᓗᖅᖢᓂ ᐊᒻᒪᓗ ᑐᖑᔪᖅᖢᓂ ᐊᑎᖓ, ‘ᓘᑎ ᐸᓪᓗᖅ’ ᐃᒪᐃᑦᑑᖂᔨᔪᖅ catamaran, ᐅᒥᐊᖅ ᒪᕐᕉᖕᓂ ᐃᒫᓃᑦᑐᖃᖅᖢᓂ ᓴᓂᓕᕇᖕᓂ. ᕗᐊᑦ ᐅᖃᓚᐅᕐᑐᖅ ᐋᖅᑭᒃᓯᒪᓂᖓ ᓂᕈᐊᕆᔭᐅᓚᐅᕐᓯᒪᓂᖓᓂᒃ ᖃᐅᔨᓴᕈᑎᐅᖃᑦᑕᕐᓂᐊᖅᑐᓂᒃ ᐅᓯᔪᓐᓇᑦᑎᐊᓂᐊᖁᓪᓗᒍ.

ᐃᕐᓂᖅ ᐅᒥᐊᖅᑕᖃᑕᐅᖃᑦᑕᖅᓯᒪᔪᖅ ᑕᐃᒪᙵᑦ ᓄᑕᕋᐅᓚᐅᕐᓯᒪᒐᒥ ᑲᖏᖅᖠᓂᕐᒥᓐ. ᐅᒥᐊᓕᕆᓂᕐᒧᑦ ᐃᓕᓐᓂᐊᒃᑲᓐᓂᐊᓪᓚᓚᐅᖅᖢᓂ ᐃᓚᒋᔭᐅᓕᓚᐅᕐᓯᒪᔪᖅ ᐊᐃᑉᐸᖃᖅᖢᓂ ᐃᓄᖕᒥ ᐊᔪᕈᓐᓃᖅᓴᖅᑐᓂᒃ ‘ᓘᑎ ᐸᓪᓗᖅ’ᒥ.

ᐃᕐᓂᖅ ᐱᖃᑎᖃᖅᑐᖅ ᐃᓄᖕᒥᑦᑕᐅᖅ ᐊᔪᕈᓐᓃᖅᓴᖅᑐᒥᓐ ᒫᑎᐅᓯ ᒫᓂᖕ, ᑭᖓᓂ ᓄᓇᖃᖅᖢᓂ, ᐊᒻᒪᓗ ᐅᑯᓂᖓ ᖃᐅᔨᓴᖅᑎᒥᒃ ᕕᓕᑉ ᕗᐋᔅ ᐊᒻᒪ ᑲᑉᑕᓐ ᑰᒃ ᒐᕈᓗ.

ᐱᓕᕆᐊᖃᖅᖢᑎᒃ ᐃᓄᐃᑦ ᖃᐅᔨᒪᔭᑕᖃᖏᓐᓂᒃ ᐊᑐᖅᖢᑎᒃ, ᕗᐊᑦ ᐅᖃᓚᐅᕐᑐᖅ ᑖᒃᑯᐊ ᐱᓕᕆᔨᐅᔪᑦ ᖃᐅᔨᓴᕋᓱᖕᓂᖏᓐᓂᒃ ᖃᓄᐃᑦᑐᓂᒃ ᐆᒪᔪᖅᑕᖃᕐᒪᖔᑦ ᕿᑭᖅᑕᓂ, ᓲᕐᓗ ᒪᑯᓂᖓ ᑯᕌᑉᔅ, ᒥᖅᑯᓕᒃᓂ, ᓯᑳᓚᑉᔅ, ᐅᕕᓗᐃᑦ ᐊᒻᒪ ᐊᔾᔨᒌᙱᑦᑑᑎᐅᓂᖏᓐᓂᒃ ᐃᖃᓗᐃᑦ.

ᑕᒪᒃᑯᓂᖓ ᖃᐅᔨᓇᓱᒃᖢᑎᒃ, ᐊᑐᖃᑦᑕᖅᑐᑦ ᐊᔾᔨᓕᐅᕈᑎᓂᒃ ᐊᒻᒪᓗ ᐱᓕᕆᔾᔪᑎᖃᖅᖢᑎᒃ ᑕᐃᔭᐅᔪᒥᒃ ᐹᑎᖕ (potting). ᑖᒃᑯᐊᓕ ᐱᓕᕆᔨᐅᔪᑦ ᐃᒫᓄᐊᖅᑎᑦᑎᓪᓗᑎᒃ ᐃᓗᓪᓕᕈᓐᓇᖅᑐᓂᒃ ᓴᕕᕋᔭᖕᓂ — ᑕᐃᔭᖏᓐᓂᒃ pots — ᐃᒫᓅᖅᑕᐅᓪᓗᑎᒃ ᓇᕆᐊᖃᖅᖢᑎᒃ. ᐃᖃᓗᖕᒥ ᐃᓗᐊᓄᐊᖅᑐᖃᖅᐸᑦ ᐊᓂᔪᓐᓇᐃᓪᓕᓇᔭᖅᖢᓂ.

ᐃᕐᓂᖅ ᐅᖃᓚᐅᕐᑐᖅ ᑖᒃᑯᓂᖓ ᑕᕆᐅᕐᒧᐊᖅᑎᑦᑎᑲᑕᖕᓂᖏᓐᓂᒃ ᐃᑎᓂᖃᖅᑐᓂᒃ 60-ᒦᑕᓂᑦ ᒪᐅᖓ 300-ᒦᑕᓄᑦ ᐊᒻᒪ ᓇᕆᐊᖃᖅᐸᒃᖢᑎᒃ ᓯᑯᐃᑦᓂ (squid).

“ᖃᐅᔨᖤᕐᓂᐊᖅᐳᒍ ᖃᓄᐃᑦᑐᓂᒃ ᓇᓂᓯᑲᑕᖕᓂᐊᕐᓂᑦᑎᓐᓂᒃ,” ᐅᖃᖅᑐᖅ.

ᑖᒃᑯᐊᑦᑕᐅᖅ ᐱᓕᕆᔨᐅᔪᑦ ᓄᓇᙳᐊᓕᐅᑲᑕᒃᑐᑦ ᑕᕆᐅᑉ ᐃᖅᑲᖓᑕ ᐃᓚᖓᓂ, ᐊᑐᖅᖢᑎᒃ ᐱᓕᕆᔾᔪᑎᒥᒃ ᑕᐃᔭᐅᔪᒥᒃ transducer, ᐱᓕᕆᔾᔪᑎ ᐊᑦᑕᑕᕈᓐᓇᖅᑐᖅ ᐅᒥᐊᑉ ᓵᖓᓂᒃ ᐊᒻᒪᓗ ᑕᕆᐅᕐᒧᐊᖅᑕᐅᖢᓂ ᐊᒻᒪ ᐊᑐᖅᖢᑎᒃ ᓂᐱᖃᕈᑎᓂᒃ ᖃᓄᐃᑉᐸᓪᓕᐊᔪᓂ ᑲᑎᖅᓱᐃᕙᒃᖢᑎᒃ.

“ᐅᓇ ᑐᑭᓯᕚᓪᓕᕈᑎᒋᖃᑦᑕᖅᑕᕗᑦ ᑕᕆᐅᑉ ᐊᑖᓂ ᑭᓱᑕᖃᕐᒪᖔᑦ ᐊᒻᒪᓗ ᖃᓄᐃᒻᒪ ᑕᕆᐅᖅ ᖃᓄᐃᓕᐅᕈᓯᖓ ᐊᔾᔨᒋᔪᓐᓃᖃᑦᑕᕐᒪᖔᑦ,” ᐃᕐᓂᖅ ᐅᖃᖅᑐᖅ.

ᐅᒥᐊᕐᔪᐊᖅ RV ᓘᑎ ᐸᓪᓗᖅ ᐃᓱᒪᒋᔭᐅᔪᖅ ᐃᖃᓗᖕᓂ ᖃᐅᔨᓴᑲᑕᖕᓂᐊᕐᓂᖓᓂᒃ ᒫᓂ ᑭᙵᐃᑦ ᐊᒻᒪ ᓴᓂᑭᓗᐊᖅ ᐃᒪᖓᓂᒃ ᐊᐅᔭᐅᔪᖅ ᐊᒻᒪ ᐊᕐᕌᒍ ᓴᓂᕋᔭᐅᑉ ᐊᒻᒪ ᐃᒡᓗᓕᐅᑉ ᐃᒪᖓᓂ 2022-ᒥ. (ᐊᔾᔨᙳᐊᖅ ᐅᑯᓇᙵᑦ ᕿᑭᖅᑖᓗᒃ ᑯᐊᐳᕇᓴᓐ)

ᕿᑭᖅᑖᓗᒃ ᑯᐊᐳᕇᓴᓐᑯ ᒪᕐᕈᒃᑲᓐᓃᖕᓂᒃ ᐅᒥᐊᖅᑖᖅᑎᑦᑎᔪᒪᔪᑦ ᕿᑭᖅᑕᓂ ᓄᓇᓕᖕᓄᑦ ᖃᐅᔨᓴᒃᑲᓐᓂᕈᓐᓇᕐᓂᐊᕐᒪᑕ ᑕᒪᑐᒪᓂ ᐊᕐᕌᒍᒥᓐ. ᐊᑐᓂ ᐅᒥᐊᒃ ᐱᓕᕆᔨᖃᕋᔭᖅᑐᑦ ᒪᕐᕉᖕᓂ ᐃᓅᖕᓂ ᓄᓇᓕᖕᓂᙶᖅᑐᓂᒃ ᐊᒻᒪᓗ ᐱᓕᕆᔾᔪᑎᓕᕆᔨᒥᒃ ᐅᕙᙶᖅᑐᒥᒃ ᒪᒨᕆᐅᓪ ᓯᓚᑦᑐᖅᓴᕐᕕᒡᔪᐊᕐᒥᓐ ᑕᕆᐅᕐᒥᐅᑕᓕᕆᓂᕐᒧᑦ ᐃᓕᓐᓂᐊᕐᕕᖕᒥᑦ.

ᐊᑕᐅᓯᖅ ᐱᓕᕆᔨᐅᖃᑕᐅᔪᖅ ᑖᒃᑯᓇᓂ ᓄᓇᓕᖕᓂ ᐅᒥᐊᕆᔭᐅᔪᓂᒃ ᐊᔪᕈᓐᓃᖅᓴᖅᑎᐅᓇᔭᖅᑐᖅ ᐅᕙᓂ ‘ᓘᑎ ᐸᓪᓗᖅ’ ᐅᒥᐊᕐᔪᐊᖅᒥ, ᑕᐃᒪᓐᓇᓗ ᑕᓪᓕᒪᓂᒃ ᐃᓄᖕᓂ ᐃᖅᑲᓇᐃᔭᖅᑐᖃᓕᕋᔭᖅᖢᓂ ᖃᐅᔨᓴᖅᓂᖅᒧᑦ ᐅᒥᐊᕐᔪᐊᓂᒃ. ᐅᓇ ‘ᓘᑎ ᐸᓪᓗᖅ’ ᐊᖓᔪᖅᑳᕆᔭᐅᓇᔭᖅᖢᓂ ᑖᒃᑯᓄᖓ.

ᕗᐊᑦ ᐃᓱᒪᔪᖅ ᐊᔪᕈᓐᓃᖅᓴᖅᑐᑦ ᐆᑐᓇᖅ ᐃᕐᓂᖅᑎᑐᑦ ᐊᖓᔪᖅᑳᖑᔪᓐᓇᕐᓯᓛᕐᓗᑎᒃ ᐅᒥᐊᖏᓐᓂᒃ ᐅᕝᕙᓘᓐᓃᑦ ᖃᐅᔨᓴᖅᑎᐅᔪᓐᓇᕐᓯᓗᑎᒃ, ᐊᒻᒪᓗ ᐊᓯᒃᑲᓐᓂᖏᓐᓂᒃ ᐃᓄᖕᓂ ᐊᔪᕈᓐᓃᖅᓴᖅᑐᖃᕈᓐᓇᕐᓯᖕᒥᓗᓂᔭ

“ᐅᓇ ᓄᓇᓕᖕᓂ ᖃᓄᐃᓕᐅᖅᑎᑦᑎᕙᓪᓕᐊᔾᔪᑎᒃᓴᖅ,” ᐅᖃᖅᑐᖅ.

ᐃᕐᓂᖅ ᐃᓱᒪᖕᒥᔪᖅ ᐃᓄᐃᑦ ᓄᓇᓕᖕᓃᑦᑐᑦ ᑕᐃᒪᓐᓇ ᐱᓕᕆᐊᖃᕈᒪᓇᔭᕐᓂᖏᓐᓂᒃ. ᐅᖃᕆᓪᓗᓂ ᓄᓇᕗᒥᑦ ᐃᓄᐃᑦ ᐸᕐᓇᒃᓯᒪᓕᕐᓂᖏᓐᓂᒃ ᖃᓄᐃᓕᐅᕐᕕᐅᔪᓐᓇᖅᑐᓄᑦ ᒪᐅᓇ ᐅᒥᐊᕐᔪᐊᓄᑦ ᖃᓄᐃᓕᐅᕆᐊᖃᕈᑎᐅᕙᒃᑐᓄᑦ ᓲᕐᓗ ᐅᖅᓱᐊᓗᓕᕆᓂᕐᒥᒃ ᐊᒻᒪ ᐱᖁᑎᒃᓴᓕᕆᓂᕐᒥᒃ ᐊᒻᒪᓗ ᐸᕐᓇᖃᑦᑕᕆᐊᖃᕐᓂᕐᒧᑦ ᐊᑯᓂᕈᓗᒃ ᐊᐅᓪᓚᖅᓯᒪᑲᑕᖕᓂᐊᕐᓗᓂ.

“ᑕᐃᒪᐃᓕᐅᖃᑦᑕᖅᓯᒫᓂᒃᑲᑦᑕ ᐊᕐᕌᒍᒐᓴᒻᒪᕆᐊᓘᓕᕐᑐᓂᒃ,” ᐅᖃᖅᑐᖅ.