ᓄᑖᖅ ᐊᖏᖃᑎᒌᒍᑎ ᓄᓇᕗᒥᑦ ᐃᓕᓴᐃᔨᓂᒃ 7 ᐳᓴᓐᑎᒥ ᐊᑭᑦᑐᕆᐊᕈᑎᑖᖅᑐᑦ ᐊᕐᕌᒍᓄᑦ ᑎᓴᒪᓄᑦ
ᐃᓕᓴᐃᔨᒧᑦ ᖁᑦᑎᖕᓂᖅᐹᖅ ᑮᓇᐅᔭᓕᐊᒃᓴᖅ ᑎᑭᑉᐳᖅ $124,807 ᐊᕐᕌᒍᒧᑦ
ᓴᐅᒥᐊᓂᒃ: ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᐹᒥᓚ ᒍᕉᔅ, ᐃᖅᑲᓇᐃᔮᒃᓴᓕᕆᔨᒃᑯᑦ ᒥᓂᔅᑕᖓ ᐋᑕᒻ ᓚᐃᑦᓯᑑᓐ, ᓄᓇᕗᒥᑦ ᐃᓕᓴᐃᔩᑦ ᑲᑐᔾᔨᖃᑎᒌᖏᑦ ᐊᖓᔪᖅᑳᖓ ᔭᔅᑎᓐ ᒪᑦᓴᑦ ᐊᒻᒪᓗ ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐅᕙᓂ ᓴᖅᑭᔮᖅᑐᑦ ᑐᓴᒐᒃᓴᓕᐅᕐᓇᒥᒃ ᐱᓇᓱᐊᕈᓯᐅᓚᐅᕐᑐᒥ ᑐᓴᒐᒃᓴᓕᖅᖢᑎᒃ ᓄᑖᒥ ᐊᖏᖃᑎᒌᒍᑎᓂᒃ ᐅᑯᐊᓗ ᓄᓇᕗᒥᑦ ᐃᓕᓴᐃᔩᑦ. ᐅᓇ ᓄᑖᖅ ᐊᖏᖃᑎᒌᒍᑎ ᐅᑯᓄᖓ ᓄᓇᕗᒥᑦ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓂᒃ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓂᒃ ᐊᑐᕐᓂᐊᖅᑐᖅ ᑎᑭᓪᓗᒍ ᔫᓂ 30, 2025. (ᐊᔾᔨᓕᐅᕆᔨ ᑕᐃᕕᑦ ᓛᕼᐄᑦ)
For an English version of this story, see COVID-19 relief announced for Nunavut hunters
ᓄᓇᕗᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᖏᑦ ᐊᒻᒪ ᓄᓇᕗᒥᑦ ᒐᕙᒪᒃᑯᑦ ᐊᑎᓕᐅᓚᐅᕐᒪᑕ ᓄᑖᒥᒃ ᐊᕐᕌᒍᓄᑦ ᑐᓴᒪᓂᒃ ᐊᖏᖃᑎᒌᒍᑎᓂᒃ ᐃᓚᖃᖅᖢᓂ 7 ᐳᓴᓐᑎᒥ ᐊᑭᒃᑐᕆᐊᕈᓐᓇᕈᑎᓂᒃ ᐃᓚᒋᔭᐅᔪᓄᑦ ᐊᕐᕌᒍᑦ ᑎᓴᒪᓄᑦ.
ᓄᑖᖅ ᐊᖏᖃᑎᒌᒍᑎ ᑐᑭᖃᖅᑐᖅ ᖁᑦᑎᖕᓂᖅᐹᖅ ᐊᑭᓕᖅᑕᐅᔾᔪᑎᒃᓴᖅ ᐃᓕᓴᐃᔨᒧᑦ ᐊᕐᕌᒍᓂ 11-ᓂ ᐃᓕᓴᐃᔨᐅᓯᒪᓗᓂ ᒫᓃᓐᓂᐊᓕᖅᑐᖅ $124,807 ᐊᕐᕌᒍᒧᑦ.
“ᐃᓱᒪᒐᑦ ᐅᓇ ᐊᖏᕈᑎ ᓈᒻᒪᒃᓯᓕᕐᓯᒪᓂᖓᓂᒃ ᐊᒻᒪ ᖃᓄᐃᙱᖢᓂ,” ᓄᓇᕗᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᖏᑦ ᐊᖓᔪᖅᑳᖓ ᔭᔅᑎᓐ ᒪᑦᓴᑦ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᓇᒥᒃ ᔭᓄᐊᕆ 18-ᖑᑎᓪᓗᒍ.
ᑭᖑᓂᐊᒍᑦ ᐅᖃᒃᑲᓐᓂᓚᐅᕐᑐᖅ ᐊᑭᓕᖅᑕᐅᔾᔪᑎᓄᑦ ᐊᖏᒡᓕᒋᐊᕈᑎ ᐊᖏᕈᑎᓃᑦᑐᑦ ᖁᑦᑎᖕᓂᖅᐹᖑᔪᖅ ᐃᓕᓴᐃᔨᓄᑦ ᑲᑐᔾᔨᖃᑎᒌᓄᑦ ᑕᐅᑐᒃᖢᒋᓪᓗ ᐊᖏᖃᑎᒌᒍᑎᐅᓂᑯᑦ ᐊᑐᓂ ᐳᕌᕕᓐᓯᓂᒃ ᑎᐅᕆᑑᕆᓂᓘᓐᓃᑦ ᑲᓇᑕᒥ.
ᐅᓇ ᐊᖏᕈᑎ ᐱᒋᐊᕐᕕᖃᖅᑎᑕᐅᓂᐊᕐᑐᖅ ᓯᕗᓪᓕᖅ ᐊᖏᕈᑎᐅᓚᐅᕐᑑᑉ ᐃᓱᓕᕝᕕᕕᓂᐊᓄᑦ. ᑕᐃᒪᓕ ᑖᓐᓇ ᓄᑖᖅ ᐊᖏᖃᑎᒌᒍᑎ ᔪᓚᐃ 1, 2021-ᒥᑦ ᔫᓂ 30, 2025-ᒧᑦ ᐊᑐᕐᓂᐊᖅᖢᓂ.
ᐊᑭᑦᑐᕆᐊᕈᑎᒃᓴᐃᑦ ᐊᕐᕌᒍᑕᒫᑦ ᐊᑐᖅᑕᐅᖃᑦᑕᕐᓂᐊᕐᑐᑦ ᔪᓚᐃ 1-ᒥ. ᓯᕗᓪᓕᖅᐹᖅ ᐊᕐᕌᒍ ᐊᑭᑦᑐᕆᐊᕐᓂᖅ 2 ᐳᓴᓐᑎᐅᓂᐊᕐᑐᖅ ᐊᒻᒪᓗ ᐊᐃᑉᐸᖓ ᐱᖓᔪᖓᓪᓗ ᐊᕐᕌᒍ ᐊᑭᑦᑐᕆᐊᕐᓂᖓ 1 ½ ᐳᓴᓐᑎᐅᓇᔭᖅᖢᓂ ᐊᒻᒪᓗ ᑭᖑᓪᓕᖅᐹᖅ ᐊᕐᕌᒍ 2 ᐳᓴᓐᑎᒥ ᐊᑭᒃᑐᕆᐊᕋᔭᖅᖢᓂ ᐃᒪᓐᓇᐅᓕᕐᓗᓂ 1.75 ᐳᓴᓐᑎᒥ ᐊᑭᑦᑐᕆᐊᕐᐸᒡᓗᑎᒃ ᐊᕐᕌᒍᙳᕌᖓᒃ.
ᐃᓕᓐᓂᐊᕐᓯᒪᙱᑦᑐᑦ ᐃᓕᓴᐃᔨᓂᒃ ᐃᓇᖏᖅᑎᐅᕙᒃᑐᑦ ᐊᑭᑦᑐᕆᐊᖅᑕᐅᖕᒥᔪᑦ $175 ᐅᓪᓗᕐᒧᑦ ᐅᕙᙵᑦ $15ᔾ-ᒥ ᐅᓪᓗᕐᒥ.
ᐊᓯᖏᑦ ᐊᖏᕋᑎᐅᔪᑦ ᐃᓚᖃᕐᑐᑦ ᐅᓪᓗᓂ ᐱᖓᓱᓂᒃ ᓄᖃᖓᔪᓐᓇᕐᓗᑎᒃ ᐱᑦᑎᐊᖃᑦᑕᐅᑎᙱᓐᓂᕐᒧᑦ ᐊᒻᒪᓗ ᐊᕐᕌᒍᒥ ᐃᓕᖅᑯᓯᒃᑯᑦ ᕿᑲᓚᐅᑲᒍᓐᓇᕐᓂᖅ ᐊᖑᓇᓱᒍᓐᓇᕐᓂᕐᒥᒃ, ᐃᖃᓗᒐᓱᒍᓐᓇᕐᓂᕐᒥᒃ ᐊᒻᒪ ᑭᓱᒐᓱᖕᓂᕐᒧᑦ ᕿᑲᕈᓐᓇᐅᑎᒥ ᐃᓇᖏᕐᓯᓪᓗᓂ.
ᒫᑦᓴᑦ ᐅᖃᓚᐅᕐᑐᖅ ᐃᓚᐅᑎᑦᑎᓂᖅ ᐊᑭᓕᖅᓱᖅᑕᐅᓂᕐᒥᒃ ᐱᑦᑎᐊᖃᑦᑕᐅᑎᓯᒪᙱᓐᓂᕐᒥᒃ ᓯᕗᒧᑦ ᐱᒋᐊᖅᐹᓪᓕᕈᑎᐅᔪᖅ . “ᖃᐅᔨᒪᒐᑦᑕ ᐱᑦᑎᐊᖃᑦᑕᐅᑎᕙᙱᓐᓂᕐᒥᒃ ᓄᓇᕗᒥᑦ ᐊᒻᒪᓗ ᖃᓄᖅ ᐊᒃᑐᐃᓂᖃᕐᓂᖓᓂᒃ ᐱᓕᕆᐊᖃᕐᓂᕐᒧᑦ,” ᐅᖃᖅᑐᖅ.
ᐅᖃᒃᑲᓐᓂᓚᐅᕐᑐᖅ ᐃᓕᓴᐃᔩᑦ ᑲᑐᔾᔨᖃᑎᒌᖏᑦ ᓄᖃᖓᒃᑲᓐᓂᕆᐊᖃᕐᓯᒪᖕᒪᑕ ᐊᒻᒪᓗ ᐅᓇ ᐊᑐᐊᒐᖅ ᑖᒃᑯᓄᖓ ᓈᒻᒪᙱᓕᐅᕈᑎᐅᖁᙱᑲᓗᐊᖅᖢᓂᐅᒃ. ᐱᔾᔪᑎᒋᔭᐅᔪᕐᓕ ᐊᓯᙳᖅᑎᑦᑎᓂᕐᒥ ᐅᑯᓂᖓ ᐊᖑᓇᓱᖕᓂᕐᒧᑦ, ᐃᖃᓗᒐᓱᖕᓂᕐᒧᑦ ᐊᒻᒪ ᐆᒪᔪᕋᓱᖕᓂᕐᒧᑦ ᐃᓚᐅᓕᖅᑎᑦᑎᓇᓱᒃᖢᑎᒃ ᐃᓄᐃᑦ ᐃᓕᖅᑯᓯᖓᓂᒃ ᕿᑲᕈᓐᓇᕈᑎᖃᕐᓗᑎᒃ ᒪᑯᑎᑐᓇᖅ ᖃᓄᐃᓕᐅᕈᑎᐅᕙᒃᑐᓄᑦ, ᒪᐅᓇ ᒥᕐᓱᕆᐊᖃᕐᓂᕐᒧᑦ ᐅᕝᕙᓘᓐᓃᑦ ᐊᐅᓪᓛᕐᓂᕐᒧᑦ, ᒪᑦᓴᑦ ᐅᖃᖅᑐᖅ.
ᐃᓕᓐᓂᐊᕐᓂᓕᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ ᐊᒻᒪ ᐃᖅᑲᓇᐃᔮᒃᓴᓕᕆᓂᕐᒧᑦ ᒥᓂᔅᑕ ᐋᑕ ᒪᐃᑦᕼᐊᐅᔅ ᐅᐸᒍᑎᓚᐅᖅᑑᒃ ᑐᓴᒐᒃᓴᓕᐅᖅᑎᓪᓗᒋ ᐊᒻᒪ ᐅᖃᓪᓚᖃᑕᐅᓪᓗᑎᒃ ᐊᒻᒪᓗ ᐊᑎᓕᐅᖃᑕᐅᓪᓗᑎᒃ ᐊᖏᕈᑎᓂᒃ.
“ᐃᓱᒪᔪᖓ ᖁᕕᐊᓇᕈᓘᔭᖃᑦᑕᕐᓂᖓᓂᒃ ᓄᑖᒥ ᐊᖏᕈᑎᓂᒃ ᐋᖅᑭᒃᓯᔭᕌᖓᑕ, ᐱᓗᐊᕐᑐᒥ ᐱᒻᒪᕆᖕᓄᑦ ᖃᓄᐃᓕᐅᕈᑎᓄᑦ ᐊᒻᒪᓗ ᑕᒪᐃᓐᓄᑦ ᓄᓇᓕᖕᓂ ᐱᔭᐅᔭᕆᐊᓕᖕᓂᒃ,” ᒍᕉᔅ ᐅᖃᖅᑐᖅ.
ᐅᓇ ᒪᑦᓴᑦ ᑐᙵᓱᒃᑎᑦᑎᑎᓪᓗᒍ ᓄᑖᒥ ᐊᖏᕈᑎᒥᒃ, ᐅᖃᓚᐅᕐᑐᖅ ᐃᓕᓴᐃᔨᓂᒃ ᑕᒫᓃᑎᑦᑎᔾᔪᑎᐅᓇᓱᒃᑐ ᐊᓱᕈᕈᑎᐅᖃᑦᑕᐃᓐᓇᕐᓂᐊᕐᓂᖏᓐᓂᒃ. ᐅᖃᒃᑲᓐᓂᖅᖢᓂ ᐃᓕᓴᐃᔩᑦ ᑲᓇᑕᒥ ᐱᔭᐅᔪᒪᒻᒪᕆᖕᓂᖏᓐᓂᒃ.
ᒪᑦᓴᑦ ᐅᖃᓪᓚᒃᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓯᑎᐱᕆᒥᒃ ᐅᖃᓚᐅᕐᓯᒪᔪᖅ 50-ᓂ ᐃᓕᓴᐃᔨᓄᑦ ᐃᓂᑕᖃᕐᓂᖓᓂᒃ ᐃᓄᖃᙱᑦᑐᓂᒃ.
“ᑕᐃᒪᓕ ᐃᓱᒪᔪᒍ ᐅᓇ ᐊᖏᕈᑎ ᐃᓕᓴᐃᔨᓂᒃ ᑕᒫᓃᑎᑦᑎᔾᔪᑎᐅᔪᓐᓇᕐᓂᐊᓂᖓᓂᒃ, ᑭᓯᐊᓂᓕ ᐃᓱᒪᔪᖓ, ᑕᒪᑐᒧᖓ ᓱᓕ ᐱᓕᕆᐊᖃᕆᐊᖃᒻᒪᕆᒃᑲᑦᑕ ᐃᓕᓴᐃᔨᖃᒃᑲᓐᓂᕈᑎᒃᓴᓂᒃ,” ᒪᑦᓴᑦ ᐅᖃᖅᑐᖅ.
(0) Comments