ᓄᑲᑉᐱᐊᑦ ᓄᓇᒥ ᐱᓕᕆᐊᖑᔪᒥ ᐃᓕᓐᓂᐊᖅᑎᑦᑎᕗᖅ ᒪᒃᑯᒃᑐᓂ ᐆᒪᐃᓐᓇᕈᓐᓇᕐᓂᕐᒧᑦ ᐊᔪᙱᓐᓂᐅᔪᓂ

ᐃᖃᓗᒃᑑᑦᑎᐊᕐᒥ ᑲᑎᙵᓂᐅᔪᑦ ᐱᔭᕇᖅᓯᕗᑦ ᐱᓇᓱᐊᕈᓯᓕᒫᒥ ᐊᐅᓪᓛᕐᓂᐅᔪᒥ ᓄᓇᒥ ᐃᓕᑕᖅᓯᓂᕐᒥ

ᓄᑲᑉᐱᐊᑦ ᓄᓇᒥ ᐱᓕᕆᐊᖑᔪᒥ ᐃᓕᑕᖅᓯᓂᖅ ᓄᓇᕗᒻᒥ ᑎᑎᕋᕈᓐᓇᕐᓂᕐᒧᑦ ᐅᖃᓕᒫᕈᓐᓇᕐᓂᕐᒧᓪᓗ ᑲᑎᒪᔨᐅᔪᓂ ᐃᓕᓐᓂᐊᖅᑎᑦᑎᕗᖅ ᒪᒃᑯᒃᑐᓂ ᐃᖃᓗᒃᑑᑦᑎᐊᕐᒥ ᐱᒋᐊᕐᓂᐅᔪᒥ ᐆᒪᐃᓐᓇᕈᓐᓇᕐᓂᕐᒧᑦ ᐊᔪᙱᓐᓂᐅᔪᓂ ᐊᒻᒪ ᐃᓄᖕᓄᑦ ᐱᖅᑯᓯᑐᖃᖅᑎᒍᑦ ᖃᐅᔨᒪᓂᐅᔪᒥ ᐱᓇᒧᐊᕈᓯᓕᒫᒥ ᐊᐅᓪᓛᕐᓂᐅᔪᓂ ᓄᓇᒧᑦ. ᓴᐅᒥᖕᒥ ᖁᓛᓂ: ᐅᐃᓕᐊᒻ ᑯᒪᒃ, ᐳᕋᐃᑎᓐ ᐊᓗᒃᐱᒃ, ᐱᓕᕆᐊᖑᔪᒥ ᐱᓕᕆᔨ A.J. ᐊᒃᓇᕕᒐᖅ, ᐳᕋᑦ ᐃᕕᑕᓕᒐᖅ ᐊᒻᒪ ᒫᑭ ᐃᕙᒡᓗᒃ. ᐊᑖᓂ: ᐃᓕᓴᐃᔨᐅᔪᑦ ᐹᐱ ᑭᓕᖏᖕᐴᒡ ᐊᒻᒪ ᕌᓐᑎ ᑭᓕᖏᖕᐴᒡ. (A.J. ᐊᒃᓇᕕᒐᖅ ᐊᔾᔨᖁᑎᖓ)

By ᒫᑕᓕᒻ ᕼᐊᐅᕕᑦᒧᑦ

For English version, see Boys on the Land program teaches youths survival skills

ᐃᓕᖅᑯᓯᒧᑦ ᐱᓕᕆᐊᖑᔪᒥ ᐃᖃᓗᒃᑑᑦᑎᐊᕐᒥ ᐃᑲᔪᖅᐳᑦ ᒪᒃᑯᒃᑐᓂ ᐃᓕᑦᑎᓂᖏᓐᓂ ᐊᔪᙱᓐᓂᐅᔪᓂ ᐱᔭᕆᐊᖃᖅᑕᒥᓂ ᐆᒪᐃᓐᓇᕈᓐᓇᕐᓂᕐᒧᑦ ᓄᓇᒥ.

ᓄᑲᑉᐱᐊᑦ ᓄᓇᒥ ᐱᓕᕆᐊᖑᔪᒥ, ᐊᐅᓚᑕᐅᔪᒥ ᐃᓕᑕᖅᓯᓂᖅ ᓄᓇᕗᒻᒥ ᑎᑎᕋᕈᓐᓇᕐᓂᕐᒧᑦ ᐅᖃᓕᒫᕈᓐᓇᕐᓂᕐᒧᓪᓗ ᑲᑎᒪᔨᐅᔪᓂ, ᐊᐅᓪᓚᖅᑎᑦᑎᕗᑦ ᒪᒃᑯᒃᑐᓂ ᓄᓇᓕᖕᓂ ᐱᓇᓱᐊᕈᓯᓕᒫᒥ ᐊᐅᓪᓛᕐᓂᐅᔪᒥ ᓇᐹᖅᑐᖃᕈᓐᓇᙱᑦᑐᒥ ᐃᓚᒋᔭᐅᓪᓗᑎᒃ ᐃᓕᓴᐃᔨᐅᔪᓂ ᐊᒻᒪ ᐊᔪᕆᖅᓱᐃᕙᓪᓕᐊᔨᐅᔪᓂ.

ᕕᕗᐊᕆ 13−ᒥ 17−ᒧᑦ, ᑎᓴᒪᓂ ᒪᒃᑯᒃᑐᓂ ᓄᓇᓕᖕᓂ ᐅᑭᐅᓕᖕᓂ 15−ᓂ 18−ᒧᑦ, ᐃᓚᖃᖅᖢᑎᒃ ᒪᕐᕉᖕᓂ ᐃᓕᓴᐃᔨᐅᔪᓂ ᐊᐅᓪᓚᓚᐅᖅᐳᑦ ᐃᓗᐃᓪᓕᕐᒥ 48 ᑭᓛᒥᑐᓂ ᓂᒋᕐᒥ ᐃᖃᓗᒃᑑᑦᑎᐊᕐᒥ.

“ᑲᑎᙵᓂᐅᓚᐅᖅᐳᖅ ᐱᒋᐊᓕᓵᖅᑐᓄᑦ ᐆᒪᐃᓐᓇᕈᓐᓇᕐᓂᕐᒧᑦ ᐊᔪᙱᓐᓂᐅᔪᓂ, ᓲᕐᓗ ᐸᕐᓇᑦᑎᐊᕈᓐᓇᕐᓂᕐᒧᑦ ᐅᓪᓗᕐᒧᑦ ᐊᐅᓪᓛᕐᓂᐅᔪᒧᑦ ᐊᖑᓇᓱᒋᐊᖅᑎᓪᓗᒋᑦ, ᐃᓕᑦᑎᓂᕐᒥ ᐊᑐᓂᕐᒧᑦ ᐱᒋᐊᓕᓵᖅᑐᓂ ᑕᖕᒫᕈᑎᒃᓴᓄᑦ, ᖃᖓᑦᑕᖅᑎᑕᐅᓯᒪᔪᓂ ᐋᔩᖃᑎᖃᕐᓂᕐᒥ ᐱᓕᕆᔾᔪᑕᐅᔪᓂ, ᐊᒻᒪ ᐱᒋᐊᓕᓵᖅᑐᓄᑦ ᐃᑲᔪᕈᑎᒃᓴᓂ ᐊᒻᒪ ᖃᐅᔨᒪᓂᐅᔪᒥ ᖃᓄᖅ ᐱᓕᕆᑦᑎᐊᕈᓐᓇᕐᓂᖏᓐᓂ ᐊᒻᒪ ᐆᒪᐃᓐᓇᕐᓂᕐᒧᑦ ᓄᓇᒥ,” ᐅᖃᓚᐅᖅᐳᖅ A.J. ᐊᒃᓇᕕᒐᖅ, ᐱᓕᕆᐊᖑᔪᒥ ᐱᓕᕆᔨᐅᔪᖅ ᐃᓕᑕᖅᓯᓂᕐᒧᑦ.

ᐱᓕᕆᐊᖑᔪᖅ, ᑮᓇᐅᔭᖃᖅᑎᑕᐅᔪᒥ ᐃᓚᖓᒍᑦ ᐃᓅᖃᑎᒌᖑᔪᓄᑦ ᒪᓕᒐᓕᕆᔨᒃᑯᓐᓄᑦ ᐅᕘᓇ ᓄᓇᕗᒻᒥ ᒐᕙᒪᒃᑯᓐᓂ, ᐱᓚᐅᖅᐳᑦ ᐱᒋᐊᕐᓂᖓᓂ ᐃᓐᓇᐅᓂᖅᓴᓂ ᐃᓚᒋᔭᐅᔪᓂ ᑲᑐᔾᔨᖃᑎᒌᖑᒧᒥ ᐅᖃᐅᓯᖃᓚᐅᖅᑎᓪᓗᒋᑦ ᐃᓱᒫᓘᑎᒋᔭᖏᓐᓂ ᒪᒃᑯᒃᑐᑦ ᐃᓚᐅᖃᑕᐅᙱᓐᓂᖏᓐᓂ ᐱᖅᑯᓯᑐᖃᖅᑎᒍᑦ ᐃᓄᖕᓄᑦ ᐊᑐᖅᑕᐅᕙᒃᑐᓂ ᓲᕐᓗ ᐊᖑᓇᓱᖕᓂᕐᒥ ᐊᒻᒪ ᐊᓯᐅᔨᓪᓗᑎᒃ ᑲᑎᙵᓂᕆᔭᖏᓐᓂ ᐃᓕᖅᑯᓯᒧᑦ ᐃᑦᑕᕐᓂᓴᐅᔪᓄᑦ, ᐅᖃᓚᐅᖅᐳᖅ.

“ᓴᖅᑭᑎᑦᑎᔪᒪᓚᐅᖅᐳᒍᑦ ᐱᓕᕆᐊᖑᔪᒥ ᑕᑯᑎᑦᑎᓪᓚᕆᒍᓐᓇᕐᓗᑕ ᐅᑯᓂᖓ ᓄᑲᑉᐱᐊᓂ ᐊᔪᕐᓇᙱᓐᓂᖓᓂ ᐱᓕᕆᑦᑎᐊᕈᓐᓇᕐᓂᖏᓐᓂ ᑭᓱᑐᐃᓐᓇᒥᒃ ᕿᒪᐃᑎᑦᑎᔪᒥᒃ ᐅᖃᓘᑎᕋᓛᖏᓐᓂ ᐊᒻᒪ ᑲᑎᑎᕆᓗᓂ ᓄᓇᒥ ᐊᒻᒪ ᐃᑲᔪᕈᑎᒃᓴᖏᓐᓂ,” ᐊᒃᓇᕕᒐᖅ ᐅᖃᓚᐅᖅᐳᖅ. “ᑐᕌᒐᕆᔭᖓ ᐃᑲᔪᕐᓂᕐᒧᑦ ᒪᒃᑯᒃᑐᓂ ᐊᖏᒡᓕᒋᐊᖅᑎᑕᐅᓂᖏᓐᓂ ᐅᒃᐱᕈᓱᖕᓂᕆᔭᖏᓐᓂ ᑭᒡᓕᐅᔪᒥ ᓄᓇᒥ.”

ᐃᓚᒋᐊᖅᓯᓚᐅᖅᐳᖅ, “ᐱᔪᒪᓐᓂᙱᒃᑯᑎᒃ, ᓲᕐᓗ ᐅᖃᕈᑦᑕ, ᐅᓪᓗᒃᑐᑦ ᐃᖃᓪᓕᐊᕆᐊᕐᓂᕐᒥ, ᐃᒃᐱᒍᓱᒃᐳᒍᑦ ᑐᓂᓯᒪᓂᑦᑎᓐᓂ ᐊᔪᙱᓐᓂᐅᔪᒥ ᐊᒻᒪ ᖃᐅᔨᒪᓂᐅᔪᒥ ᑕᐃᒪᐃᑦᑐᓐᓇᕐᓂᕐᒧᑦ. ᑕᐃᒪᑐᖅ ᐅᑯᐊ ᐱᓕᕆᐊᖑᓂᐅᔪᑦ ᑐᓂᓯᓂᐊᖅᐳᑦ ᐅᒃᐱᕈᓱᖕᓂᐅᔪᒥ ᐆᒃᑐᕐᓂᕐᒧᑦ ᐊᒻᒪ ᑎᑭᐅᑎᓇᓱᐊᕐᓂᕐᒧᑦ ᑖᔅᓱᒥᖓ ᐊᒻᒪ ᐃᓚᐅᖃᑕᐅᒃᑲᓐᓂᕐᓂᖏᓐᓂ.”

ᐅᖃᐅᓯᒃᓴᓕᐊᖑᔪᓂ ᒪᒃᑯᒃᑐᓂ ᒫᓐᓇᒧᑦ ᑎᑭᖦᖢᒍ ᐱᐅᓯᒪᕗᖅ, ᐅᖃᓚᐅᖅᐳᖅ, ᒫᓐᓇᓕᓴᐅᓛᖑᔪᒥ ᐃᓚᐅᖃᑕᐅᔪᓂ ᐅᖃᖅᖢᑎᒃ ᑲᒪᓚᐅᖅᐳᑦ ᖃᓄᖅ ᓂᒡᓚᓱᒃᑎᒋᓂᖓᓂ ᓄᓇᓕᖕᓃᙱᑎᓪᓗᒋᑦ ᐊᒻᒪ ᓄᓇᒦᑎᓪᓗᒋᑦ.

ᐊᒃᓇᕕᒐᖅ ᐋᖅᑭᒃᓱᐃᓚᐅᕆᕗᖅ ᐊᔾᔨᐸᓗᐊᓂ ᐱᓕᕆᐊᖑᔪᒥ ᐊᐃᑉᕆᓕᐅᓚᐅᖅᑐᒥ ᐃᓚᐅᖃᑕᐅᔪᑦ ᐃᖃᓪᓕᐊᕆᐊᖅᖢᑎᒃ.

ᑐᒃᓯᕋᖅᓯᒪᕗᖅ ᐋᖅᑭᒃᓱᐃᓂᕐᒥ ᖄᒃᑲᓐᓂᐊᒍᑦ ᐱᓕᕆᐊᖑᔪᓂ ᐃᓚᐅᖃᑕᐅᔪᖅ ᐊᑐᕈᓐᓇᕐᓂᐊᕐᒪᑕ ᐃᓅᓯᐅᔪᒥ ᓄᓇᒥ ᑕᒪᒃᑭᓂ ᐊᕐᕌᒎᑉ ᐃᓚᓕᒫᖏᓐᓂ.

“ᓯᓚ ᐊᐅᓚᑦᑎᕗᖅ ᐊᖏᔪᒻᒪᕆᐊᓗᖕᒥ ᐃᓚᒋᔭᐅᓂᐅᔪᒥ ᐊᐅᓚᑦᑎᑎᓪᓗᑕ ᐱᓕᕆᐊᕆᔭᑦᑎᓐᓂ,” ᐅᖃᓚᐅᖅᐳᖅ.

ᐊᓯᖏᓐᓂ ᐱᓕᕆᐊᖑᓂᐅᔪᓂ, ᓲᕐᓗ ᐱᖅᑯᓯᑐᖃᖅᑎᒍᑦ ᓴᓇᕐᕈᑎᓕᐅᕐᓂᕐᒥ, ᐊᐅᓪᓛᕐᓂᐅᔪᓂ ᓂᕕᐊᖅᓵᓄᑦ ᐊᒻᒪ ᐊᕐᓇᓄᑦ, ᐊᒻᒪ ᐱᓕᕆᐊᓂᖑᔪᓂ ᑐᕌᖓᔪᓄᑦ ᐃᓄᑐᖃᕐᓄᑦ ᑭᐅᓂᕐᒥ ᐊᑐᐃᓐᓇᖃᕐᓂᖏᓐᓂ ᓈᒻᒪᒃᑐᓂ ᓂᕿᒃᓴᖃᖅᑎᑕᐅᓂᐅᔪᒥ ᐱᓕᕆᐊᖑᕙᓪᓕᐊᒋᕗᑦ.

ᐃᖃᓗᒃᑑᑦᑎᐊᖅ ᐊᑐᓚᐅᖅᐳᑦ ᐱᓂᕐᓗᖕᓂᐅᔪᒥ ᒪᒃᑯᒃᑐᒃᑯᕕᖓ ᐃᑭᓚᐅᖅᑎᓪᓗᒍ.

ᐃᓂᒃᓴᖃᙱᓐᓂᕐᒥ ᓄᓇᓕᖕᓂ ᒪᒃᑯᒃᑐᑦ ᑲᑎᙵᖃᑎᒌᒍᓐᓇᕐᓂᕐᒧᑦ ᑐᕌᖅᑎᑦᑎᓯᒪᔪᒃᓴᐅᕗᖅ ᐊᖏᒡᓕᒋᐊᖅᑐᒥ ᐱᔪᒪᓂᐅᔪᒥ ᓄᑲᑉᐱᐊᓄᑦ ᓄᓇᒥ ᐱᓕᕆᐊᖑᓂᐅᔪᓄᑦ, ᐊᒃᓇᕕᒐᖅ ᐅᖃᓚᐅᖅᐳᖅ.

“ᐃᓱᒪᓪᓚᕆᒃᐳᖓ ᑲᑎᙵᓂᖃᕐᓂᖓᓂ ᑖᔅᓱᒧᖓ … ᓄᓇᓕᒃ ᑕᒪᒃᑭᐅᒪᔪᒥ ᐅᔾᔨᕆᕙᓪᓕᐊᕗᑦ ᐱᑕᖃᕐᓂᑦᑎᓐᓂ ᐊᒻᒪ ᐃᓱᒪᕗᖓ ᐃᓚᖃᕐᓂᖓᓂ ᐱᔪᒪᓂᐅᔪᒥ ᐱᓕᕆᐊᖑᔪᓂ ᐊᑐᐃᓐᓇᖃᖅᑎᑦᑎᓂᑦᑎᓐᓂ,” ᐅᖃᓚᐅᖅᐳᖅ.

Share This Story

(0) Comments