ᓄᓇᓕᐸᐅᔭᐃᑦ ᐃᖃᓗᖕᓂ ᐊᑭᓖᓂᐊᖅᑐᑦ 1 ᒥᓕᐊᓐ ᑖᓚᐃ ᖃᓂᒋᔭᖓᓂᒃ ᐅᒃᑑᐱᕆᒥ ᐃᒪᕐᒧᑦ ᐊᑭᓕᐅᑎᕕᓂᕐᓄᑦ

ᐊᑭᓕᐅᑎᕕᓂᕐᓂᒃ ᐅᑎᖅᑎᕝᕕᐅᓂᐊᖅᑐᑦ ᓄᓇᓕᖕᓄᑦ ᐃᒥᖅᑕᕐᕕᒃ ᐱᐅᔪᓐᓃᖅᓯᒪᓚᐅᖅᑎᓪᓗᒍ ᐅᕐᓱᐊᓗᖕᒧᑦ

ᐃᖃᓗᖕᒥᐅᑕᑦ ᐅᑎᖅᑎᕝᕕᐅᓂᐊᖅᑐᑦ ᐃᒪᕐᒧᑦ ᐊᑭᓕᐅᑎᒋᓚᐅᕐᑕᖏᓐᓂᒃ ᐅᒃᑑᐱᕆᒧ ᓄᓇᓕᐸᐅᔭᐃᑦ ᑲᑎᒪᔨᖏᑦ ᓂᕈᐊᖅᑎᓪᓗᒋ ᐅᒃᑑᐱᕆ 26-ᒥ ᓄᓇᖃᖅᑐᑦ ᐅᑎᖅᑎᑕᐅᖁᓪᓗᒋᑦ. (ᐊᔾᔨᙳᐊᖁᑎᒋᔭᐅᔪᖅ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see City of Iqaluit foots almost $1M to cover October water bills

ᐃᖃᓗᖕᒥᐅᑕᑦ ᐊᑭᓖᔭᕆᐊᖃᔾᔮᙱᑦᑐᑦ ᐅᒃᑑᐱᕆᒥ ᐃᒥᖅᑕᖅᑕᐅᔾᔪᑎᕕᓂᖓᓄᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᓂᕈᐊᓚᐅᖅᑎᓪᓗᒋ ᐅᒃᑑᐱᕆ 26-ᒥ ᐅᑎᖅᑎᑦᑎᖁᔨᓪᓗᑎᒃ.

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᒪᕐᒥᒃ ᐃᒥᑲᑕᖁᔨᔪᓐᓃᓚᐅᕐᓯᒪᖕᒪᑕ ᐅᒃᑑᐱᕆ 12-ᒥᑦ ᖃᐅᔨᒐᒥᒃ ᓄᓇᐅᑉ ᐊᑖᓃᑦᑐᖅ ᐃᒪᖃᐅᑎ ᓄᓇᓕᖕᓄᑦ ᐃᒥᖅᑕᖅᕕᖕᒥ ᑎᐹᕿᑲᑕᓕᕐᓂᖓᓂᒃ ᐅᕐᓱᐊᓗᒃᓱᓐᓂᒥᒃ. ᐅᓇ ᐱᐅᔪᓐᓃᖅᑎᑕᐅᓯᒪᓂᖓ ᓇᓗᓇᐃᖅᑕᐅᓚᐅᕐᓯᒪᔪᖅ ᐅᒃᑑᐱᕆ 15-ᒥ.

ᑕᐃᒪᙵᓪᓕ, ᓄᓇᓕᐸᐅᔭᐃᑦ ᐃᒪᖃᐅᑎᒥ ᐃᒪᐃᔭᐃᑲᑕᒃᓯᒪᔪᖅ ᐅᓇ ᐱᐅᔪᓐᓃᖅᑎᓯᒪᔪᖅ ᐃᒪᖃᐅᑎ ᐊᖅᑯᑎᒋᔭᐅᔪᓐᓃᖅᖢᓂ ᐅᑯᐊᓗ ᓄᓇᕗᒥᑦ ᒐᕙᒪᒃᑯᑦ ᐱᓕᕆᖃᑕᐅᓪᓗᑎᒃ.

ᓄᓇᓕᐸᐅᔭᐃᑦ ᐊᓯᐅᔨᓕᒑᔪᑦ $965,677 ᐱᓪᓗᐊᖅᑕᖏᓐᓂᒃ ᐅᒃᑑᐱᕆᒧᑦ ᐊᒻᒪᓗ ᐊᓯᐊᒍᑦ ᑮᓇᐅᔭᓕᐅᕈᑎᖃᙱᖢᑎᒃ ᑖᔅᓱᒥᖓ ᐊᑭᓕᐅᑎᐅᔪᓐᓇᕋᔭᖅᑐᓂᒃ, ᐄᓕ ᐅᕘᓇ ᐱᓕᕆᕝᕕᖕᓄᑦ ᐱᔨᑦᑎᕋᐅᑎᓕᕆᓂᕐᒧᑦ ᑐᑭᒧᐊᖅᑎᑦᑎᔨ ᐋᓕᓴᓐ ᑐᕋᒪᓐ.

ᓄᓇᓕᐸᐅᔭᐃᑦ ᑕᒪᑐᒥᖓ ᐊᓯᐅᔨᔾᔪᑎᖏᓐᓂᒃ ᑮᓇᐅᔭᓂᒃ ᐅᑎᖅᑎᑦᑎᓂᐊᕈᒪᔪᑦ ᐱᓇᓱᒍᑎᑎᒍᑦ ᓄᓇᕗᒥᑦ ᒐᕙᒪᒃᑯᓐᓂ ᓄᓇᓕᖕᓄᑦ ᐃᑲᔫᕈᑎᒃᓴᓄᑦ ᐱᓕᕆᐊᖏᑦᑎᒍᑦ.

ᑲᑎᒪᔨ ᓰᓚ ᕙᓕᐅᕋᑎ ᐊᐱᕆᓚᐅᕐᑐᖅ ᓄᓇᓕᐸᐅᔭᐃᑦ ᐅᑎᖅᑎᑦᑎᔾᔪᑎᖃᕆᐊᒃᓴᖏᓐᓂᒃ ᐃᒪᕐᒧᑦ ᑐᐊᕕᕐᓇᖅᑐᓕᕆᓂᖅ ᐊᓂᒍᕐᓯᒪᓕᖅᐸᑦ, ᐅᒃᑑᐱᕆᐅᑉ ᓄᙳᐊᓄᑐᐊᙳᙱᑦᑐᖅ.

ᓄᕕᐱᕆᒥ ᖃᓄᐃᓐᓂᐊᕐᓂᖏᓐᓄᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᐃᓱᒪᓕᐅᕆᔪᓐᓇᕐᓂᐊᖅᑐᑦ ᐱᓇᓱᐊᕈᓯᕐᒥ, ᒪᕐᕉᖕᓂᓪᓘᓐᓃᑦ ᐱᖓᓱᓂᓪᓘᓐᓃᑦ ᐅᕝᕙᓘᓐᓃᑦ ᑎᓴᒪᓂᒃ ᐅᑎᖅᑎᑦᑎᓂᐊᕆᐊᒃᓴᖏᓐᓂᒃ, ᒪᐃᔭ ᑭᐊᓂ ᐱᐊᓪ ᐅᖃᓚᐅᕐᑐᖅ.

“ᑭᓯᐊᓂᓕ ᒫᓐᓇ ᑕᖅᑭᕐᒧᑦ ᓈᒻᒪᙱᓕᐅᕈᑎᖃᕐᕕᒋᓚᐅᖅᑕᑦᑎᓐᓄᑦ ᐱᓕᕆᐊᖃᕐᓂᐊᖅᑐᒍᑦ,” ᐅᖃᖅᑐᖅ.

ᑲᑎᒪᔩᑦ ᔮᓐ ᕚᓴᑦ ᐊᒻᒪ ᓵᓚᒪᓐ ᐊᕙ ᐊᐱᕆᓚᐅᕐᓯᒪᔪᑦ ᐅᑎᖅᑎᑦᑎᕝᕕᐅᓇᔭᕆᐊᒃᓴᖏᑦ ᑕᐃᒃᑯᐊ ᐃᒥᖃᐅᑎᖏᓐᓂᒃ ᓴᓗᒻᒪᖅᓴᐃᑎᑦᑎᔪᕕᓂᕐᓂ.

“ᓄᓇᓕᐸᐅᔭᐃᑦ ᐃᓄᖕᓂ ᐃᒥᖃᐅᑎᖏᓐᓂᒃ ᓴᓗᒻᒪᖅᓴᐃᖁᔨᓚᐅᕐᓯᒪᖕᒪᑕ ᐊᒻᒪᓗ ᐅᓄᒻᒪᕆᒃᑐᑦ ᑕᐃᒪᐃᑕᐅᑎᑦᑎᓪᓗᑎᒃ ᐊᑭᓖᕙᒃᖢᑎᒃ ᐱᓕᕆᑎᑕᖏᓐᓂᒃ,” ᕚᓴᑦ ᐅᖃᖅᑐᖅ.

ᐊᐃᒥ ᐃᐊᒍᔅᒪ, ᓄᓇᓕᐸᐅᔭᓄᑦ ᐊᐅᓚᑦᑎᔨ ᐅᖃᓚᐅᕐᑐᖅ ᐃᒥᖃᐅᑎᓂᒃ ᓴᓗᒻᒪᖅᓴᐃᔪᓐᓇᓚᐅᕐᓂᖏᓐᓂᒃ ᓲᖃᐃᒻᒪ ᐱᓕᕆᔾᔪᑎᒻᒪᕆᐊᓗᖕᓂ ᐊᑐᖃᑦᑕᙱᒻᒪᑕ.

“ᓄᓇᓕᐸᐅᔭᐃᑦ ᐊᑭᓕᓂᐊᕐᓂᕋᙱᑦᑐᑦ ᓴᓗᒻᒪᖅᓴᖅᑕᐅᑎᑦᑎᓂᕐᒧᑦ ᐃᒥᖃᐅᑎᓂᒃ,” ᐃᐊᒍᔅᒪ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᐊᕐᕌᒍᑕᒫᓐ ᓴᓗᒻᒪᖅᓴᖅᑕᐅᖃᑦᑕᕆᐊᖃᕐᒪᑕ.

ᑲᑎᒪᔨ ᑲᐃᐅᓪ ᓴᐳᑦ ᑕᒪᑐᒥᖓ ᐊᖏᖃᑎᖃᓚᐅᕐᑐᖅ ᓄᓇᓕᐸᐅᔭᐃᑦ ᐃᓱᒪᓕᐊᖓᓂ ᐃᒥᖃᐅᑎᓂᒃ ᓴᓗᒻᒪᕐᓴᐃᓂᕐᒧᑦ ᐊᑭᓖᔪᒪᙱᓐᓂᕐᒥᒃ ᐊᒻᒪᓗ ᐅᖃᖅᖢᓂ ᑐᐊᕕᕐᓇᖅᑐᓕᕿᓂᕐᒧᑦ ᐊᑭᓕᐅᑎᒃᓴᐃᑦ ᐊᓯᖏᓐᓄᑦ ᒐᕙᒪᓄᑦ ᑲᒪᒋᔭᐅᔪᓐᓇᙱᑦᑕᕆᐊᒃᓴᖏᓐᓄᑦ ᓲᕐᓗ ᐅᑯᑎᑐᓇᖅ ᓄᓇᕗᒥᑦ ᒐᕙᒪᒃᑯᓐᓄ.

“ᐃᓱᒪᒐᒪᓕ ᐊᓯᒃᑲᓐᓂᖏᓐᓂᒃ ᐊᑭᓕᐅᑎᐅᓇᔭᖅᑐᓂᒃ ᓄᓇᖃᖅᑐᒥᒃ ᓴᖅᑭᑦᑐᖃᖅᐸᑦ, ᐊᓯᖔᑦᑎᓐᓂ ᒐᕙᒪᓕᕆᔨᓂᒃ ᑕᒪᒃᑯᐊ ᐊᑭᓕᐅᑎᐅᓇᔭᖅᑐᑦ ᑲᒪᒋᔭᐅᔭᕆᐊᖃᕐᒪᑕ — ᐅᕙᒍᑐᐊᖑᙱᑦᑐᖅ ᐊᑭᓕᐅᑎᓕᕆᓗᑕ ᒫᓐᓇ,” ᓴᐳᑦ ᐅᖃᖅᑐᖅ.

ᕚᓴᑦ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᑲᒪᒋᔭᖃᕐᒪᑕ ᓄᓇᖃᖅᑐᓂᒃ ᐃᑲᔪᕆᐊᖃᖅᖢᑎᒃ ᑐᐊᕕᕐᓇᕈᑎᐅᓵᖅᑐᒧᑦ.

“ᐅᓄᕐᑐᑦ ᐃᓄᐃᑦ ᐊᑭᓖᔪᓐᓇᖃᑦᑕᙱᒻᒪᑕ ᐃᒥᖃᐅᑎᖏᓐᓂᒃ ᓴᓗᒻᒪᖅᓴᐃᑎᑦᑎᓂᕐᒧᑦ,” ᐅᖃᖅᑐᖅ. “ᐃᓚᖏ ᓴᓗᒻᒪᖅᓴᐃᕌᓂᒃᑐᒃᓴᐅᕗᑦ ᐊᒻᒪᓗ ᐅᓇ ᐊᐃᑉᐸᕆᓪᓗᓂᐅᒃ ᓄᓇᓕᐸᐅᔭᓂ ᓈᒻᒪᙱᓕᐅᕈᑎᒋᔭᐅᔪᖅ.”

ᐅᖃᓚᐅᕐᑐᖅ ᑕᑯᔪᒪᓂᕋᖅᖢᓂ ᓇᓗᓇᐃᕐᓯᒪᔪᓂᒃ ᓄᓇᓕᐸᐅᔭᐃᑦ ᑭᖑᓪᓕᕐᒥ ᑲᑎᒪᔾᔪᑎᒃᓴᖏᓐᓂᒃ ᐅᖃᐅᓯᐅᓛᕐᒪ ᐅᑎᖅᑎᑦᑎᔭᕆᐊᖃᕆᐊᒃᓴᖏᓐᓂᒃ ᓴᓗᒻᒪᖅᓴᖅᑕᐅᑎᑦᑎᓂᕐᒧᑦ ᐊᑭᓕᐅᑎᕕᓂᕐᓂᒃ ᐃᒪᕐᒧᑦ ᑐᐊᕕᕐᓇᖅᑐᖃᖅᑎᓪᓗᒋᑦ.

Share This Story

(0) Comments

Join the Conversation

Your email address will not be published. Required fields are marked *

*