ᓄᓇᓯᑖᒃᑯᑦ ᐸᕐᓇᒐᓱᒃᑐᒃ ᐊᖏᒡᓕᒋᐊᖅᑎᑦᑎᔪᒪᓪᓗᑎᒃ ᐃᖃᓗᐃᑦ ᖃᖅᑲᔮᕐᒥ ᐃᒡᓗᐊᓗᖕᒥᑦ

ᓄᓇᓯᑖ ᓇᖕᒥᓂᕆᔭᐅᔪᑦ ᐊᖏᒡᓕᒋᐊᖅᑎᑦᑎᔪᒪᔪᑦ ᓂᐅᕕᕐᕕᐅᔪᓐᓇᖅᑐᓂᒃ ᐊᒻᒪ ᑎᑎᕋᕐᕕᐅᔪᓐᓇᖅᑐᓂᒃ ᐊᖏᒡᓕᒋᐊᖅᑎᑦᑎᓂᒃᑯᑦ ᑲᑎᕕᒃ ᖃᖅᑲᔮᕐᒥ ᐃᒡᓗᐊᓗᖕᒥ.

“ᐃᓂᒃᓴᓕᐅᕆᐊᖃᕐᓇᕐᒪᑕ ᐃᓄᐃᑦ ᐱᓕᕆᕝᕕᒋᕙᒃᑕᖏᓐᓂᒃ, ᐃᓄᐃᑦ ᐱᙳᖓᕐᕕᒋᕙᒃᑕᖏᓐᓂᒃ ᐊᒻᒪᓗ ᐃᓄᐃᑦ ᓂᐅᕕᕆᐊᕐᕕᒋᕙᒃᑕᖏᓐᓂᒃ.” ᓄᓇᓯᑖ ᓇᖕᒥᓂᕆᔭᐅᔪᑦ ᐊᖓᔪᖅᑳᖓ ᐃᐊᑦ ᕈᒪᓇᐅᔅᑭ ᐅᖃᓚᐅᕐᑐᖅ.

ᐸᕐᓇᒐᓱᒃᑐᑦ ᐊᖏᒡᓕᒋᐊᖅᑎᑦᑎᔪᒪᓪᓗᑎᒃ ᑲᑎᕕᒃ ᖃᖅᑲᔮᕐᒥ, ᑖᕝᕙᓂᓗ ᑰᔭᓯ ᑲᑎᒪᕕᒃᑕᖃᖅᖢᓂ ᐊᒻᒪᓗ ᓇᑎᒃᑲᓐᓂᕐᒥᒃ ᐃᓚᓯᒋᐊᕐᓗᑎᒃ, ᕈᒪᓇᐅᔅᑭ ᐅᖃᖅᑐᖅ.

ᐊᖏᒡᓕᒋᐊᕐᑕᐅᒍᓂ, ᓯᕗᓪᓕᖅᐹᖅ ᓇᑎᖓᓂ ᑰᔭᓯ ᑲᑎᒪᕕᒃ ᐊᖏᒡᓕᒋᐊᕋᔭᖅᖢᓂ 14,000 ᑭᑉᐹᕆᒃᑑᑎᓂᒃ ᕖᑦᓂ ᐊᖏᓂᖃᓕᕐᓗᓂ ᐅᕙᙵᑦ 10,000 ᑭᑉᐹᕆᒃᑑᑎᓂᒃ ᕖᑦᓂ, ᐊᒻᒪᓗ ᓇᑎᓕᐅᒃᑲᓐᓂᕋᔭᖅᖢᑎᒃ ᑖᔅᓱᑐᓇᖅ ᐊᖏᑎᒋᔪᒥᒃ ᖄᖓᒍᑦ.

ᑕᕝᕙᓂᓕ ᓄᑖᒥ ᐸᕐᓇᐅᑎᒥ, 9,000 ᑭᑉᐹᕆᒃᑑᑎᐅᓕᕐᓯᒪᔪᖅ ᕖᑦ ᓯᕗᓪᓕᕐᒥ ᓇᑎᕐᒥ ᓂᐅᕕᕐᕕᐅᓇᔭᖅᖢᓂ ᐊᒻᒪ 5,000 ᑭᑉᐹᕆᒃᑑᑎᐅᓕᕐᓯᒪᔪᖅ ᑰᔭᓯ ᑲᑎᒪᕕᐅᓂᐊᕐᓗᓂ. ᑐᒡᓕᖅ ᓇᑎᖓ ᑎᑎᕋᕐᕕᒃᓴᖃᐅᕋᔭᕐᑐᖅ.

ᕈᒪᓇᐅᔅᑭ ᐅᖃᓚᐅᕐᑐᖅ ᐊᑐᕈᒪᓇᔭᖅᑐᓂᒃ ᓂᐅᕕᕐᕕᒃᓴᒧᑦ ᐊᒻᒪ ᑎᑎᕋᖅᕕᒃᓴᓂᒃ ᐊᒻᒪᓗ ᐊᖏᒡᓕᒋᐊᖅᑕᐅᓂᖓ ᑰᔭᓯ ᑲᑎᒪᕕᒃᒥᑦ ᒥᒃᖠᕚᓪᓕᖅᑎᑦᑎᓇᔭᖅᑐᖅ.

ᐅᓇ ᐊᖅᓴᕐᓃᑦ ᑐᔪᕐᒥᕕᒃ ᑲᑎᒪᕕᒃᓴᖃᖅᖢᓂ ᐃᒡᓗᕈᓯᕐᓂᒃ ᑕᐃᒪᓕ ᐅᓇ ᓄᓇᓯᑖ ᐊᖏᔪᒥ ᑲᑎᒪᕕᖃᙱᒃᑲᓗᐊᕐᐸᑦ ᓈᒻᒪᖕᓂᕐᓴᐅᓇᔭᕐᑐᖅ, ᕈᒪᓇᐅᔅᑭ ᐅᖃᖅᑐᖅ.

“ᓄᓇᖃᕋᑦᑕ 8,500-ᓂ ᐃᓄᖃᖅᑐᒥ, ᒪᕐᕉᖕᓂ ᑲᑎᒪᕕᐅᖃᑦᑕᕐᓂᐊᖅᑑᖕᓂᒃ ᐊᖏᔪᓂᒃ ᑐᑭᖃᓗᐊᙱᒻᒪᑦ,” ᐅᖃᖅᑐᖅ, ᐅᖃᒃᑲᓐᓂᖅᖢᓂ ᑰᔭᓯ ᑲᑎᒪᕕᒃ ᐊᑐᖅᑕᐅᖃᑦᑕᕋᔭᕐᓂᖓᓂᒃ ᒥᑭᓐᓂᕐᓴᓄᑦ ᖃᓄᐃᓕᐅᕈᑎᐅᓄᑦ ᓲᕐᓗ ᑲᑎᑎᑕᐅᔪᓄᑦ ᑲᑎᒪᑎᑦᑎᓂᐊᖅᑐᓄᓪᓘᓐᓃᑦ.

ᐱᓕᕆᐊᖑᔪᒪᔪᖅ ᐊᑭᖃᕋᔭᖅᑐᖅ ᒫᓂ $12 ᒥᓕᐊᓐ ᑖᓚᓂ.

ᐅᑯᐊ ᓄᓇᓯᑖᑯᑦ ᒫᔅᓯᒧᑦ ᑎᑭᓪᓗᒍ ᐱᔪᓐᓇᐅᑎᑕᕋᓱᖕᓂᐊᖅᑐᑦ ᓄᓇᕗᒥᑦ ᒐᕙᒪᒃᑯᓐᓂᒃ, ᕈᒪᓇᐅᔅᑭ ᐅᖃᓚᐅᕐᑐᖅ. ᐃᓱᒪᔪᕐᓕ ᓴᓇᓕᕆᐊᕋᔭᕐᓂᖏᓐᓂᒃ ᐄᐳᕈᒥᑦ ᒪᐃᒥᓪᓘᓐᓃᑦ.

ᐅᓇ ᑰᔭᓯ ᑲᑎᒪᕕᒃ ᒪᑐᓂᐊᕐᑐᖅ ᑖᓐᓇ ᓴᓇᔭᐅᕙᓪᓕᐊᓕᕐᐸᑦ ᐊᒻᒪᓗ ᒪᑐᐃᒃᑲᓐᓂᓛᖅᖢᓂ 2023 ᐱᒋᐊᓕᓵᖅᓯᒪᓂᖓᓂᒃ, ᑖᒃᑯᐊᓕ ᓂᐅᕕᕐᕕᖃᕐᕕᐅᓂᐊᕐᑐᑦ ᐊᒻᒪ ᑎᑎᕋᕐᕕᒃᓴᐃᑦ ᒪᑐᐃᓛᕋᓱᒋᔭᖏᑦ 2023 ᐃᓱᓕᓕᖅᐸᑦ, ᐅᖃᒃᑲᓐᓂᖅᑐᖅ.

ᐊᓯᐊᒍᓪᓕ ᐱᓕᕆᐊᑎᒍᑦ, ᒪᕐᕉᒃ ᓄᑖᒃ ᓂᐅᕕᕐᕕᐅᓂᐊᕐᑑᒃ ᐃᓚᔭᐅᒃᑲᓐᓂᕐᓂᐊᖅᑐᒃ ᑲᑎᕕᒃᒥ ᖃᖅᑲᔮᕐᒥ.

ᐊᕉᕋ ᓂᔭᓕᕆᔨᒃᑯᑦ ᐊᒻᒪᓗ ᓄᐊᑦᑕᒃ ᓴᓘᓴᓐᔅ, ᐅᐊᔭᓅᒐᓚᒃᑐᓂᒃ ᓂᐅᕕᕐᕕᒃ ᐊᒻᒪ ᐱᔨᑦᑎᕋᕐᕕᒃ, ᐃᓇᖏᕐᓯᓂᐊᖅᖢᑎᒃ ᐃᓂᒋᔭᐅᔪᓂᒃ ᐃᒡᓗᐊᓗᖕᓂ ᑕᕝᕙᓂ ᑯᐃᒃᓯᑖ ᓂᐅᕕᕐᕕᐅᑉ ᐃᓂᒋᓚᐅᕐᑕᖓᓂᒃ.

ᑕᒪᐃᓐᓂ ᓂᐅᕕᕐᕖᒃ ᒪᑐᐃᓪᓗᐊᖅᑑᑦ ᐃᒡᓗᐊᓗᖕᒥ ᒪᐃᖑᓕᕐᐸᑦ.

ᐅᓇ ᓄᓇᓯᑖ ᐊᐅᓚᑕᖏᑦ ᐱᓕᕆᐊᖑᐃᓐᓇᕋᓗᐊᖅᖢᑎᒃ, ᐅᓇ ᐋᓐᓂᐊᕕᒡᔪᐊᕐᓇᖅ ᐊᒃᓱᕈᕐᓇᕈᑎᐅᓯᒪᔪᖅ ᐱᓕᕆᐊᕆᔭᐅᔪᓂᒃ ᑲᔪᓯᑎᑦᑎᓇᓱᖕᓂᒃᑯᑦ.

“ᑭᓱᓕᒫᑦ ᐊᑯᓂᐅᑲᑕᖕᓂᕐᓴᐅᓕᕐᒪᑕ, ᐊᑭᑐᓂᕐᓴᐅᓕᖅᖢᑎᒡᓗ ᐊᒻᒪᓗ ᐱᓕᕆᑲᑕᖕᓇᕐᓂᖅᓴᐅᓪᓗᓂ, ᐊᒻᒪ ᐃᓚᒃᓴᓂᒃ ᓇᓂᓯᑲᐅᕐᑐᕐᓇᙱᖢᓂ, ᑭᓱᓕᒫᓄᑦ,” ᕈᒪᓇᐅᔅᑭ ᐅᖃᖅᑐᖅ.

ᐅᖃᒃᑲᓐᓂᓚᐅᕐᑐᖅ ᓂᕆᐅᖕᓂᕋᖅᖢᓂ ᐊᑭᓕᐅᑎᐅᕙᒃᑐᑦ ᖁᕝᕙᖅᐸᓪᓕᐊᑐᐃᓐᓇᕐᓂᐊᕐᓂᖏᓐᓂᒃ ᐊᑭᑦᑐᖅᐸᓪᓕᐊᔪᓄᑦ.