ᓄᓇᕕᒃᒥᐅᑕᑦ ᐊᕐᕌᒍᒐᓴᖕᓂ ᕿᓚᓗᒐᖅᑕᐃᓕᓂᕐᒥᒃ ᓄᖅᑲᖅᑎᑦᑎᔪᒪᔪᑦ

For English version, see Nunavik group hopes to overturn decades-old beluga hunting ban

ᓄᓇᕕᒃᒥ ᐆᒪᔪᓕᕆᓂᕐᒧᑦ ᐊᐅᓚᑦᑎᔨᒋᔭᐅᔪᑦ ᐊᕐᕌᒍᑦ ᖁᓕᑦ ᐅᖓᑖᓂ ᕿᓚᓗᒐᖅᑕᐃᓕᓂᕐᒥᒃ ᐅᖓᕙᐅᑉ ᐃᓚᖓᓂᒃ ᐊᓯᙳᖅᑎᑦᑎᔪᒪᓕᕐᑐᑦ ᐊᒻᒪᓗ ᑕᐃᒪᐃᓕᐅᕐᓂᐊᕈᑎᒃ ᐊᑐᕐᓂᐊᖅᑐᑦ ᖃᐅᔨᓴᕈᑎᓂᒃ ᒫᓐᓇᓕᓴᕐᓂᒃ ᐊᒻᒪ ᐃᓕᖅᑯᓯᒃᑯ ᐱᓕᕆᔾᔪᓯᕐᓂᒃ.

ᒪᑲᓕᒃ ᑰᖕᒥ ᑕᕆᐅᕐᒧᐊᕐᕕᒃ (Mucalic Estuary), ᒫᓃᑦᑐᖅ ᑲᖏᖅᖢᒃᒥ ᑰᔾᔪᐊᖅᓗ ᐊᒻᒪ ᑲᖏᖅᓱᐊᓗᔾᔪᐊᑉ ᐊᑯᓐᓂᖓᓂᒃ ᕿᓚᓗᒐᕋᓱᒡᕕᐅᕙᓚᐅᕐᓯᒪᖕᒪᑦ ᑎᑭᖢᓂ 1986 ᐅᑯᐊ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᒪᑐᓯᑎᑦᑎᓪᓗᒋᑦ ᕿᓚᓗᒐᕋᓱᖃᑦᑕᕐᓂᕐᒥᒃ ᑕᒫᓂ.

ᑕᐃᒪᓐᓇ ᐃᓱᒪᓕᐅᕆᓚᐅᕐᓯᒪᔪᑦ ᐃᓱᒫᓘᑎᖃᖅᖢᑎᒃ ᕿᓚᓗᒐᐃᑦ ᓄᖑᑐᐃᓐᓇᕐᓂᐊᕋᓱᒋᔭᐅᓪᓗᑎᒃ, ᐅᖃᓚᐅᕐᑐᖅ ᔭᐃᒻᔅ ᒪᐃ, ᐊᖓᔪᖅᑳᖅ ᓄᓇᕕᒃ ᐊᖑᓇᓱᒃᑐᓕᕆᔨᒃᑯᑦ, ᐃᖃᓗᓕᕆᔨᒃᑯᑦ ᐊᒻᒪ ᒥᑭᒋᐊᕐᓂᕐᒧᑦ ᑲᑐᔾᔨᖃᑎᒌᓄᑦ.

ᒪᐃ ᐅᖃᓚᐅᕐᑐᖅ ᐅᑯᐊ ᒐᕙᒪᑐᖃᒃᑯᑦ ᐱᓕᕆᕝᕕᖓ ᐃᓄᖕᓂ ᖃᐅᔨᓇᓱᓚᐅᕐᓯᒪᙱᓐᓂᖏᓐᓂᒃ ᐃᓱᒪᓕᐅᕆᓇᓱᒃᑎᓪᓗᒋᑦ ᒪᑐᓯᔪᒪᓪᓗᑎᒃ ᑕᕆᐅᕐᒧᐊᕐᕕᖕᒥ ᕿᓚᓗᒐᕋᓱᒡᕕᐅᖁᔭᐅᔪᓐᓃᖅᑎᓪᓗᒍ. ᐅᖃᓚᐅᕐᒥᔪᖅ ᑖᒃᑯᐊ ᐱᓕᕆᕝᕕᐅᔪᑦ ᐅᖃᖃᑎᖃᓚᐅᕐᐸᑕ ᖃᐅᔨᓇᔭᓚᐅᕐᓯᒪᔪᑦ ᕿᓚᓗᒐᐃᑦ ᐅᓄᕐᓂᖏᑦ ᑕᒫᓂ ᐊᔾᔨᖃᖃᑦᑕᙱᓐᓂᖏᓐᓂᒃ ᐊᕐᕌᒎᕋᑖᖅᑐᓂ ᒪᓕᒃᖢᒍ ᕿᓚᓗᒐᐃᑦ ᐊᕙᓗᒋᔭᖏᓐᓂᒃ ᓂᕿᖃᑦᑎᐊᕐᓂᖓᓂᒃ ᐊᒻᒪᓗ ᐃᒪᐅᑉ ᐅᖂᓇᕐᓂᖓᓂᒃ.

“ᓴᖅᑭᑎᑦᑎᓇᓱᒃᑲᑦᑕ ᐃᖃᓗᓕᕆᔨᒃᑯᓐᓄᑦ (DFO) ᕿᓚᓗᒐᐃᑦ ᑕᒪᐅᙵᖅᐸᒃᑐᑦ ᐅᓄᙱᓐᓂᖏᑦ ᑕᐃᒪᐃᖏᓐᓇᐅᔭᙱᑦᑐᑦ ᐊᒻᒪᓗ ᐊᖏᓂᖏᑦ ᒪᓕᒃᐸᒃᖢᑎᒃ ᐊᕐᕌᒍ ᖃᓄᐃᓕᖓᓂᖓᓄᑦ,” ᒪᐃ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ.

ᐊᕐᕌᒎᓕᖅᑑᖕᓂ ᒪᕐᕉᖕᓂ ᐊᐅᔭᒃᑯᑦ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᐋᖅᑭᒃᓱᐃᖃᑦᑕᕐᓯᒪᖕᒪᑕ ᐅᓄᕈᓘᔭᕐᑐᓂᒃ ᐱᓕᕆᐊᖃᖅᑐᓂᒃ ᖃᐅᔨᑎᑦᑎᓇᓱᒃᑐᓂᒃ ᐅᖃᕐᓯᒪᔭᖏᓐᓂᒃ.

ᑖᓐᓇ ᑕᕆᐅᕐᒧᐊᕐᕕᐅᔫᑉ ᓯᒡᔭᖓᓂ ᐊᖑᓇᓱᒃᑏᑦ, ᖃᐅᔨᓴᕐᑏᑦ, ᓂᕿᓕᐅᕐᑏᑦ, ᐃᓐᓇᑐᖃᐃᑦ ᐊᒻᒪ ᐃᓅᓱᒃᑐᑦ ᑐᐱᕐᓯᒪᖃᑦᑕᖅᑐᑦ. ᑕᐃᑲᓂᓕ ᑲᑎᑦᑎᕙᓪᓕᐊᓪᓗᑎᒃ ᐊᖑᓇᓱᒃᑐᑦ ᖃᓄᐃᓕᐅᕈᓯᖏᓐᓂᒃ ᐊᒻᒪᓗ ᖃᓄᐃᓕᐅᖅᑕᐅᕙᓪᓕᐊᔪᓂᒃ ᓄᓇᒦᑦᑐᓄᑦ ᑕᑯᔭᐅᕙᓪᓕᐊᔪᓂᒃ ᑎᑎᕋᐅᓯᖃᖅᐸᓪᓕᐊᓪᓗᑎᒃ.

ᑖᒃᑯᓇᓂ ᓯᕗᓪᓕᕐᓂ ᐊᕐᕌᒍᓂ ᖃᓄᐃᓕᐅᕐᓂᐅᔪᓂᒃ ᑖᒃᑯᐊ ᐃᓄᐃᑦ ᕿᓚᓗᒐᐃᕐ ᐅᓄᖃᑦᑕᕐᓂᖏᑦ ᐊᔾᔨᒌᒃᐸᙱᓐᓂᖏᓐᓂᒃ ᖃᐅᔨᓚᐅᕐᑐᑦ ᓯᒡᔭᒥ ᑕᑯᔭᐅᔪᓄᑦ ᒫᙵᑦ 37-ᓂ 2021ᒥ ᐊᒻᒪ ᐱᖓᓱᓂᒃ 2022ᒥ.

ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᑖᒃᑯᓂᖓ ᐊᖏᕈᓐᓇᓚᕐᓯᒪᔪᑦ ᕿᓚᓗᒐᕈᓐᓇᕐᓗᑎᒃ ᐱᖓᓱᓂᒃ ᐊᐅᔭᒥᑦ ᑲᑎᕐᓱᐃᔪᓐᓇᕐᓂᐊᕐᒪᑕ ᖃᐅᔨᓴᖅᑕᐅᔾᔪᑎᐅᓂᐊᖅᑐᓂᒃ. ᐊᒻᒪᓗ ᑖᒃᑯᐊ ᖃᓂᒋᔭᖓᓂ ᓄᓇᖃᖅᑐᓂᒃ ᓂᕿᖃᖅᑎᑦᑎᔪᓐᓇᓚᐅᖅᖢᑎᒃ ᕿᓚᓗᒐᖅᑕᐅᔪᓂᒃ.

“ᐅᓇ ᐊᐅᓪᓛᕐᓯᒪᕝᕕᒃ ᐊᑐᕋᓱᒃᑕᕗᑦ ᑲᑎᕐᓱᐃᓂᕐᒥᒃ ᓇᖕᒥᓂᖅ ᖃᐅᔨᓴᖅᑕᐅᑎᓐᓂᐊᖅᑕᑦᑎᓐᓂ ᑕᐃᒪᓕ ᐊᔾᔨᒌᖃᑦᑕᕐᓯᒪᙱᓐᓂᖏᑦ ᐊᕐᕌᒍᐃᑦ ᖃᐅᔨᒪᓕᕋᑦᑎᒍᑦ, ᐊᒻᒪᓗ ᐃᓄᐃᑦ ᑕᐃᒪᓐᓇ ᐅᖃᖃᑦᑕᕐᓯᒪᐃᓐᓇᐅᔭᖅᖢᑎᒃ,” ᒪᐃ ᐅᖃᓚᐅᕐᑐᖅ.

“ᑕᒪᐅᖔᖓᔪᓄᑦ ᐊᓯᖏᓐᓄᓪᓘᓐᓃᑦ ᐱᓕᕆᕝᕕᐅᔪᓄᑦ, ᐃᓄᐃᑦ ᖃᐅᔨᒪᔭᖏᑦ ᐃᓱᒪᒋᔭᐅᖃᑦᑕᕆᐊᖃᕐᒪᑕ ᐆᒪᔪᓕᕆᓂᕐᒧᑦ ᐊᐅᓚᑦᑎᔾᔪᑎᓕᕆᓂᒃᑯᑦ.”

ᒪᐃ ᐅᖃᓚᐅᕐᑐᖅ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᓱᓕ ᐱᓕᕆᐊᖃᓚᐅᙱᑦᑐᑦ ᑲᑎᑕᕕᓂᖏᓐᓂᒃ ᖃᐅᔨᓴᕈᑎᒋᓂᐊᖅᑕᖏᓐᓂᒃ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᒐᕙᒪᑐᖃᒃᑯᓐᓄᑦ ᐊᐱᖅᑯᑎᒃᓴᖃᐅᓚᐅᕐᑐᑦ ᖃᓄᐃᒻᒪ ᐃᓄᐃᑦ ᐊᖑᓇᓱᒍᓐᓇᐃᓪᓕᓚᐅᕐᒪᖔᑕ ᐊᒻᒪ ᖃᐅᔨᓴᕈᑎᒋᔭᐅᔪᑦ ᒥᒃᓵᓄᑦ.

ᑖᒃᑯᐊᓕ ᐱᓕᕆᕝᕕᐅᔪᑦ ᓱᓕ ᑭᐅᓚᐅᙱᑦᑐᑦ ᑖᒃᑯᓂᖓ ᐊᐱᖅᑯᑎᒋᔭᐅᔪᓂᒃ.

ᒪᐃ ᐅᖃᓚᐅᕐᑐᖅ ᑭᐅᔭᐅᔪᒪᓂᕋᖅᖢᓂ ᐊᒻᒪᓗ ᑕᑯᔪᒪᓂᕋᖅᖢᓂ ᐊᖑᓇᓱᒍᓐᓇᕐᓯᔪᓂᒃ ᒧᑲᓕᒃ ᑰᖕᒥ ᑕᕆᐅᕐᒧᐊᕐᕕᒃᒥ, ᑭᓯᐊᓂᓕ ᑖᒃᑯᐊ ᐱᓕᕆᖃᑎᒌᒃᑐᑦ ᑕᒪᑐᒪ ᒪᑐᐃᕐᑕᐅᓂᖓᑕ ᐅᖓᑖᓅᖅᑐᓂᒃ ᐃᓱᒪᔪᑦ. ᐅᖃᓚᐅᕐᑐᖅ ᐱᓕᕆᖃᑎᒌᑦ ᐃᓅᓱᒃᑐᓂᒃ ᐃᓕᖅᑯᓯᑐᖃᕐᓂᒃ ᐃᓕᓐᓂᐊᖅᑎᑕᐅᖁᔨᓪᓗᑎᒃ ᓄᓇᒦᓐᓂᕐᒥᒃ ᐊᒻᒪᓗ ᖃᐅᔨᓴᕐᓂᕐᒥᒃ ᐆᒪᔪᓂᒃ ᐊᐅᓚᑦᑎᔪᓐᓇᕐᓂᕐᓴᐅᓂᐊᕐᒪᑕ ᓄᓇᖏᓐᓂᒃ.

“ᐃᓅᓱᒃᑐ ᐃᓕᓐᓂᐊᖅᑎᑕᐅᓚᐅᕐᑐᑦ ᐃᓕᖅᑯᓯᑐᖃᒃᑯᑦ ᐊᖑᓇᓱᒍᓐᓇᕐᓂᕐᒥᒃ, ᓂᕿᓂᒃ ᓱᕈᖅᑎᑦᑎᑦᑕᐃᓕᓂᕐᒥᒃ, ᓴᓇᕐᕈᑎᓕᐅᕐᓂᕐᒥᒃ, ᐆᒪᔪᓂᒡᓗ ᐊᑐᕈᓐᓇᕐᓂᕐᒥᒃ ᓇᐅᒃᑯᑐᐃᓐᓇᖅ,” ᒪᐃ ᐅᖃᓚᐅᕐᑐᖅ.

“ᐃᓄᐃᑦ ᐊᒻᒪ ᖃᐅᔨᓴᖅᑏᑦ ᐱᓕᕆᖃᑎᒌᒃᑎᓐᓇᓱᒃᖢᒋᑦ ᐊᒻᒪ ᐃᓱᒪᒋᓇᓱᒃᖢᒍ ᐃᓄᐃᑦ ᖃᐅᔨᒪᔭᑐᖃᖏ ᐃᑲᔪᕈᑎᒻᒪᕆᐊᓘᖕᒪᑦ ᖃᐅᔨᓴᖅᑐᓕᕆᓂᕐᒧᑦ ᐊᒻᒪ ᐅᑭᐅᕐᑕᖅᑐᕐᒥ ᖃᐅᔨᒪᓂᕐᒧᑦ.”