ᓄᓇᕕᒃᒥᑦ ᐅᓂᒃᑳᖑᓂᑯᑦ ᐃᓚᖏᑦ 2020-ᒥᑦ

ᓄᓇᕕᒻᒥᐅᑦ ᓄᖅᑲᕐᔫᒥᕗᑦ ᐋᓐᓂᐊᕕᒡᔪᐊᕐᓇᒧᑦ, ᐱᓕᕆᓕᓚᐅᕐᒪᑕ ᐃᓄᒃᔪᐊᒃᒥ ᐃᒪᕐᒧᑦ ᐆᒻᒪᖅᑯᑎᓕᕆᓂᕐᒥᒃ ᐊᒻᒪᓗ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓂᒃ ᐱᖃᖅᑎᑦᑎᔨᐅᔪᑦ ᐅᓄᓗᐊᕈᔾᔨᓯᕗᖅ

ᐃᖅᑲᓇᐃᔭᕐᑎᐅᔪᑦ ᐋᖅᑭᒃᓱᐃᕗᑦ ᐃᓂᒋᔭᐅᓂᐊᕐᑐᒥᑦ ᓄᑖᒧᑦ ᑐᐱᒃᓴᒧᑦ ᑐᓚᑦᑕᕕᒃ ᐋᓐᓂᐊᕕᐅᑉ ᓯᓚᑎᐊᓂᒃ ᑰᔾᔪᐊᖅᒥᑦ ᓄᕕᐱᕆ 13-ᒥᑦ. ᐅᖅᑰᑎᑦᑐᓐᓇᖅᑐᑦ ᑐᐲ ᐊᑐᖅᑕᐅᓂᐊᕐᑐᑦ ᐋᓐᓂᐊᕕᒃᒥᑦ ᐃᖅᑲᓇᐃᔭᖅᑎᓄᑦ ᓄᕙᓕᕐᓇᙱᑦᑐᒥᒃ ᑲᐱᓯᑲᑕᖕᓂᐊᕐᑐᓄᑦ ᐊᒻᒪᓗ ᓄᕙᒡᔪᐊᕐᓇᖅ-19-ᒥᑦ ᖃᐅᔨᓴᕐᕕᐅᓂᐊᕐᓗᓂ. (ᐊᔾᔨᓕᐅᕆᔨ ᐋᓚᓐ ᒍᐊᑕᓐ)

By ᓄᓇᑦᓯᐊᕐᒥ ᐱᕙᓪᓕᐊᔪᑦ

ᖃᕋᓴᐅᔭᒧᑦ ᐊᑦᑕᑕᕈᓐᓇᐅᑎ ᐃᒐᓛᒦᑉᐳᖅ ᑲᖏᖅᓱᐊᓗᔾᔪᐊᕐᒥᑦ ᐊᖏᕐᕋᕆᔭᐅᔪᒥ. ᐊᒥᓱᑦ ᓄᓇᕕᒻᒥᐅᑦ ᐅᖃᕐᓯᒪᔪᑦ ᓱᒃᑲᐃᓗᐊᕐᑐᒥ ᐊᒻᒪ ᐊᔪᓕᓚᐅᕐᐸᒃᑐᒥ ᖃᕋᓴᐅᔭᒪᑦ ᐊᑦᑕᑕᑐᓐᓇᐅᑎᓂ 2020-ᓕᒫᒥᑦ. ᓄᓇᕕᒥ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᔨᖓ, ᑕᒫᓂ, ᐅᖃᓚᐅᕐᑐᑦ ᐊᑐᕐᓂᖏᓐᓂᒃ 100 ᐳᓴᓐᓗᐊᑲᓴᖕᒥ ᐊᔪᙱᓐᓂᖏᑦᑎᒍᑦ ᖁᒻᒧᒃᑎᑕᐅᓯᒪᔪᒥᑦ. (ᐊᔾᔨᓕᐅᕆᔨ ᕕᓕᒃᔅ ᓴᐃᓐ-ᐋᐱᓐ)

ᐊᕐᕌᒍᒥ ᑐᓴᒐᒃᓴᑎᒍᑦ ᐆᒥᖓ ᓄᓇᕐᔪᐊᒥ ᐋᓐᓂᐊᕕᒡᔪᐊᕐᓇᒥ ᑐᓴᑲᑕᖕᓇᓗᐊᖅᑎᓪᓗᒍ, ᓄᓇᕕᒃ ᐊᒃᑐᖅᑕᐅᓗᐊᓚᐅᙱᓚᖅ. ᑖᒃᑯᐊ ᑕᒫᓃᑦᑐᑦ ᓄᕙᒡᔪᐊᕐᓇᖅ-19-ᒥᑦ ᑎᑭᑎᑦᑎᑲᑕᓚᐅᙱᑦᑐᑦ — ᑭᓯᐊᓂ ᐅᓄᓗᐊᙱᑦᑐᓂ ᐊᑕᐅᑦᑎᒃᑰᙱᑦᑐᓂᒃ — ᐊᐅᓪᓚᑲᑕᖕᓂᕐᒥ ᓄᖅᑲᖓᑎᑦᑎᓂᒃᑯᑦ ᐊᒻᒪᓗ ᐃᓕᓐᓂᐊᕐᕕᖕᓂᒃ ᒪᑐᓯᒪᑎᑦᑎᓪᓗᑎ ᑕᖅᑭᒐᓴᖕᓂᒃ

ᒪᓕᒐᓕᕆᓂᒃᑯᓪᓂ, ᓄᓇᕕᒻᒥ ᑕᒪᐅᓇ ᓂᐱᖃᓗᐊᓚᐅᙱᑦᑐᑦ, ᓄᑖᓂᒃ ᐊᖏᔪᓂᒃ ᐱᓕᕆᐊᒃᓴᓂᒃ ᑐᓴᕐᓇᙱᖢᓂ ᐅᕝᕙᓘᓐᓃᑦ ᑮᓇᐅᔭᑎᒍᑦ ᐃᑲᔫᑎᓕᕆᓂᕐᒥᒃ. ᐊᖏᓂᖅᐹᖑᔪᕐᓕ ᓄᓇᓕᓕᒫᓄᑦ ᒐᕙᒪᖓᓄᑦ ᐱᓕᕆᐊᖑᓂᐊᖅᑐᖅ 2021-ᒥᑦ ᐅᓇ ᐱᔪᒪᔭᐅᓂᖓ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᖅ ᑕᒪᐅᖓ, ᐅᓇ ᖁᒻᒧᒃᑎᑕᐅᓯᒪᔪᒃᑯᑦ ᐊᑐᖅᑕᐅᔪᓐᓇᕐᓂᖓ ᑕᑕᓗᐊᓚᐅᕐᑎᓪᓗᒍ ᐊᕐᕌᒎᓵᖅᑐᒥᑦ.

ᔭᓄᐊᕆ

ᔪᐊᔾ ᐴᑎ ᓂᕈᐊᖅᑕᐅᓚᐅᕐᑐᖅ ᑮᓇᐅᔭᓕᕆᔨᐅᓂᐊᕐᓗᓂ ᒪᑭᕕᒃ ᑯᐊᐳᕇᓴᓐᑯᓐᓄᑦ ᔭᓄᐊᕆ 14-ᖑᑎᓪᓗᒍ, ᓵᓚᖃᖅᖢᓂ ᑮᓇᐅᔭᓕᕆᔨᐅᕋᑖᖅᑐᒥᓐ ᐋᓐᑎ ᐱᕐᑎ. ᐴᑎ ᓯᕗᓂᐊᒍᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᐅᓚᐅᕐᑐᖅ ᑐᓚᑦᑕᕕᒃ ᐋᓐᓂᐊᕐᕕᖕᒥᑦ ᑰᔾᔪᐊᖅᒥᑦ, ᐊᖓᔪᖅᑳᖑᓪᓗᓂ ᑕᕐᕋᒥᐅᑦ ᓂᐱᖓᓄᑦ ᐊᒻᒪᓗ ᐊᖓᔪᖅᑳᖑᑲᐃᓐᓇᖅᖢᓂ ᑲᑎᕕᒃ ᓄᓇᓕᖕᓂᑦ ᐃᒡᓗᓕᕆᔨᒃᑯᓐᓄᑦ.

ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᑎᑦᑎᑲᑕᓚᐅᕐᒪᑕ ᑐᓴᕋᓱᒃᖢᑎ ᓄᓇᕕᒻᒧᑦ ᓄᑖᓂᒃ ᕿᓚᓗᒐᓕᕆᓂᕐᒥ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ. ᑭᓯᐊᓂᓕ ᐅᓇ ᐃᓱᒪᒋᔭᐅᓗᐊᓚᐅᕐᑐᖅ ᐊᖑᓇᓱᒃᑎᓂᒃ ᑭᒡᒐᖅᑐᐃᔨᓄᑦ ᐃᓱᒪᓕᐅᕆᓂᐅᔪᑦ ᐃᓄᖕᓄᑦ ᐋᖅᑭᒃᑕᐅᔭᕆᐊᖃᕐᓂᖏᓐᓂᒃ, ᒐᕙᒪᑐᖃᒃᑯᓐᓅᙱᑦᑐᖅ.

ᓄᓇᕕᒻᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᐅᔪᑦ ᐱᓕᕆᓯᒋᐊᕐᐳᑦ ᐋᓐᓂᐊᕕᒃᓴᒥᑦ ᐱᒋᐊᖅᑎᑦᑎᓂᕐᒥᒃ ᓄᓇᕕᒻᒥᑦ, ᑲᒪᒋᔭᖃᖃᑦᑕᕋᔭᕐᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᑐᖅᑕᐅᙱᓐᓇᖅᐸᙱᑦᑐᓂᒃ ᐱᔨᑦᑎᕋᐅᑎᓕᕆᓂᕐᒥ ᑕᒫᓂ. ᐋᓐᓂᐊᕕᒃᓴᒧᑦ ᐸᕐᓇᐅᓯ ᓯᕗᓪᓕᕐᐹᖑᔪᖅ ᖃᓄᐃᓕᐅᖅᐸᓪᓕᐊᒍᑎᒃᓴᑎᒍᑦ ᑕᐃᒪᓐᓇ ᐅᑯᑎᒎᓈᕈᓐᓇᕐᓂᐊᕐᒪᑦ ᒥᓂᔅᑕᓕᕆᕝᕕᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ.

ᕗᐊᕆ

ᐊᓖᓴ ᐊᕋᒍᑕᒃ ᐃᓕᓴᕆᔭᐅᔾᔪᑎᖃᓚᐅᕐᑐᖅ ᐆᒧᖓ 2020-ᒥᑦ ᐃᓐᑎᓯᐸᐃᔪ ᐃᓄᖕᒧᑦ ᐃᓅᓱᒃᑐᒧᑦ ᐃᓕᓴᕆᔭᐅᔾᔪᑎᒥ — ᓯᕗᓪᓕᕐᐹᖅ ᐃᓄᒃ ᓄᓇᕕᒻᒥᙶᖅᑐᖅ ᐊᖏᕐᕋᐅᔾᔨᓪᓗᓂ ᐃᓕᓴᕆᔭᐅᔾᔪᑎᒥ. ᐊᕋᖑᑕᒃ ᒫᓐᓇ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᐅᔪᑦ ᐃᓱᐊᕐᓯᕕᒃ ᓄᓇᓕᓕᒫᓄᑦ ᒪᒥᓴᕐᕕᒃᒥᑦ ᑰᔾᔪᐊᖅᒥ. ᓯᕗᓂᐊᒍᑦ ᐃᖅᑲᓇᐃᔭᕐᓂᑰᓪᓗᓂ ᑐᑭᒧᐊᖅᑎᑦᑎᔨᐅᓪᓗᓂ ᑐᕐᓱᔪᖅ ᒥᕐᖑᐃᕐᓯᕕᒃᒥᑦ ᐊᒻᒪᓗ ᐱᒋᐊᖅᑎᑦᑎᔨᐅᓪᓗᓂ ᐊᒻᒪ ᓯᕗᓪᓕᕐᐹᖑᓪᓗᓂ ᖃᕐᔪᐃᑦᒥᑦ.

ᐃᕙᒃᑲᒃ, ᓄᓇᕕᒻᒥ ᐊᕐᕌᒍᑕᒫᑦ ᕿᒧᒃᓯᐅᔾᔪᐊᕐᓇᐅᕙᒃᑐᖅ, ᐱᒋᐊᓕᓵᖅᑎᓪᓗᒍ ᓈᒻᒪᙱᓕᐅᕈᑎᖃᓚᐅᕐᓯᒪᕗᖅ ᕕᕝᕗᐊᕆ 25-ᒥᑦ ᐃᓚᖓᑦ ᕿᒧᒃᓯᖃᑕᐅᔪᖅ ᐃᓅᔪᓐᓃᕐᑎᓪᓗᒍ ᑲᖏᕐᓱᒃᒥ ᐊᐅᓪᓚᓵᕐᑎᓪᓗᒋ. ᕿᒧᒃᓯᐅᔾᔪᐊᖅᑎᑦᑎᔪᑦ ᐅᖃᓚᐅᕐᑐᖅ ᐅᓇ 24-ᓂ ᐅᑭᐅᓕᒃ ᕗᐃᓕᐊ ᖁᓪᓕᐊᓗᒃ ᑲᖏᖅᓱᔾᔪᐊᖅᒥᑕ ᐅᕙᓂ ᓄᓇᖃᕐᓂᑯ ᐊᑯᓕᕕᒃᒥᑦ, ᐃᓅᔪᓐᓃᓚᐅᕐᒪᑦ ᕿᒧᒃᓯᐅᑎᔪᑦ ᐱᒋᐊᓕᓵᕐᑎᓪᓗᒋᑦ. ᑕᓐᓇ ᐅᓪᓘᒃ ᒪᕐᕉᒃ ᐊᓂᒍᕐᑎᓪᓗᒍ ᐱᒋᐊᒃᑲᓐᓂᓕᓚᐅᕐᓯᒪᔪᖅ.

ᒫᔅᓯ

ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᕐᑐᑦ ᓴᖅᑭᑉᐸᓪᓕᐊᓕᕐᑎᓪᓗᒋᑦ ᑲᓇᑕᓕᒫᒥᑦ, ᓄᓇᕕᒃ — ᐊᓯᖏᑦᑎᑐᑦ — ᒪᑐᓯᒪᓕᓚᐅᕆᕗᑦ, ᐃᓕᓐᓂᐊᕐᕕᐅᔪᑦ ᐃᖓᓛᖏᓐᓂᒃ ᒪᑐᓯᓪᓗᑎᒃ, ᑭᒃᑯᓕᒫᓄᑦ ᐱᔨᑦᑎᕋᐅᑎᓂᒃ ᐊᑐᖅᑎᑦᑎᙱᓐᓂᕐᓴᐅᓕᕐᖢᑎᒃ ᐊᒻᒪᓗ ᖃᖓᑕᓲᓂ ᓄᖅᑲᖓᑎᑦᑎᓂᕐᓴᐅᓪᓗᑎᒃ ᑕᒪᐅᙵᐅᔪᓂᒃ ᐊᒻᒪ ᑕᕝᕙᙶᖅᑐᓂᒃ. ᒪᕐᕉᒃ ᐅᔭᕋᒃᓯᐅᕐᕕᐅᔫ ᑕᒫᓂ ᓄᖅᑲᖓᓕᓚᐅᕐᒥᔪᑦ. ᓄᓇᕕᒻᒥ ᐊᖓᔪᖅᑳᕆᔭᐅᔪᑦ ᑲᑎᒪᔨᕋᓛᓂ ᐋᖅᑭᒃᓯᓚᐅᕐᑐᑦ ᑐᑭᒧᐊᖅᑎᑦᑎᔨᐅᓂᐊᕐᑐᓂᒃ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒥᑦ, ᑕᐃᔭᐅᓪᓗᑎᒃ ᓄᓇᕕᒻᒥ ᓄᓇᓕᓕᒫᓄᑦ ᑐᐊᕕᕐᓇᖅᑐᓕᕆᓂᕐᒥᒃ ᐸᕐᓇᐅᓯᐅᕐᓂᕐᒧᑦ ᑲᑎᒪᔨᕋᓛᓂᒃ. ᑖᒃᑯᐊ ᑲᑎᒪᔩᑦ ᐅᓐᓄᒃᑯᑦ ᐊᓂᓯᒪᓂᕐᒥ ᓄᖃᖅᑎᑦᑎᔨᐅᓚᐅᕐᑐᑦ ᐊᒻᒪᓗ ᐃᒥᐊᓗᒃᑖᕆᔭᐅᕙᓪᓕᐊᔪᓂᒃ ᐊᐅᓚᑦᑎᔨᐅᓪᓗᑎ ᐃᓚᖏᓐᓂᒃ ᓄᓇᓕᖕᓂ.

ᒫᔅᓯ 28-ᒥᑦ, ᓄᓇᕕᒻᒥ ᓄᓇᓕᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓄᓕᕆᔨᒃᑯᑦ ᑐᓴᖅᑎᑦᑎᓕᓚᐅᕐᑐᑦ ᓯᕗᓪᓕᖅᐹᒥᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᒥ ᑕᓯᐅᔭᕐᔪᐊᑉ ᓯᒡᔭᖓᓂ ᓄᓇᓕᖕᓂᒃ ᓴᓪᓗᐃᑦ.

ᐊᓖᓴ ᐊᕋᒍᑕᒃ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐃᓱᐊᕐᓯᕕᒃᒥ, ᓄᓇᕕᒧᑦ ᒪᒥᓴᕐᕕᒃᒥᑦ, 2020-ᒧᑦ ᐃᓅᓱᒃᑐᖅ ᐃᓄᒃ ᐃᓐᑎᓯᐸᐃᔪᒥᑦ (Indspire) ᓵᓚᒃᓴᐅᓯᐊᕐᐳᖅ. (ᐊᔾᔨᙳᐊᖅ ᐅᑯᓇᙵᑦ ᐃᓱᐊᕐᓯᕕᒃ)

ᐄᐳᕈᓪ

ᓄᓇᕕᒃ ᐅᓄᓗᐊᙱᑦᑐᓂᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᓂᒃ ᑕᑯᓚᐅᕐᑐᑦ ᑕᓯᐅᔭᕐᔪᐊᑉ ᓯᒡᔭᖏᓐᓂᒃ ᓄᓇᓕᖕᓂᒃ, ᐅᓄᓛᖑᓪᓗᑎᒃ ᐅᕙᓂ ᐳᕕᕐᓂᕐᑑᒥᑦ.

ᑯᐸᐃᑦ ᑐᓴᖅᑎᑦᑎᕗ ᐄᐳᕈᓪ 15-ᒥᑦ ᐅᔭᕋᒃᓯᐅᕐᕕᒃᒥᑦ ᖃᓄᐃᓕᐅᕈᑎᐅᔪᑦ ᑯᐸᐃᒃᒥ ᑲᔪᓯᒍᓐᓇᕐᓯᑎᑕᐅᕙᓪᓕᐊᓂᐊᕐᓂᖏᓐᓂᒃ, ᐃᓚᒋᔭᐅᓪᓗᑎᒃ ᒪᕐᕉᒃ ᐱᓕᕆᐊᖑᔫᒃ ᐅᔭᕋᒃᓯᐅᕐᕖᒃ ᓄᓇᕕᒻᒥ. ᒪᑭᕕᒃ ᑯᐊᐳᕇᓴᒃᑯᓐᓄᑦ ᐊᖓᔪᖅᑳᖅ ᓵᓕ ᕗᐊᑦ ᑕᒪᑐᒥᖓ ᓈᒻᒪᒃᓴᙱᑦᑐᖅ ᐅᖃᖅᖢᓂ ᐃᓱᒪᓕᐊᕆᔭᐅᔪᖅ ᓄᓇᕕᒻᒥᐅᓂᒃ ᐅᓗᕆᐊᓇᖅᑐᒦᑎᑦᑎᑐᐃᓐᓇᕆᐊᖃᕐᓂᖓᓂᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐱᓕᕆᔨᒻᒪᕆᐅᔪᑦ ᖃᐅᔨᓇᓱᒃᐳᑦ ᐳᕙᒡᓗᖕᓇᖅᑐᒥᑦ ᖃᐅᔨᓴᕈᑎᓂᒃ ᓄᓇᕕᒻᒦᕌᓂᒃᑐᓂᒃ ᑭᖑᓪᓕᕐᒥᑦ ᑐᐊᕕᕐᓇᖅᑐᒥ ᖃᐅᔨᓇᖅᑐᓄᑦ ᖃᐅᔨᓴᕐᓂᕐᒥᒃ ᓄᕙᒡᔪᐊᕐᓇᖅ-19-ᒥᑦ ᐅᑭᐅᕐᑕᖅᑐᕐᒥ ᐊᑐᕈᓐᓇᕆᐊᒃᓴᖏᓐᓂᒃ. ᒪᑯᐊ GeneXpert ᖃᐅᔨᓴᕈᑎᐅᔪᑦ ᐋᓐᓂᐊᕕᖕᓃᕋᓂᒃᑐᑦ ᑰᔾᔪᐊᕐᒥᑦ ᐊᒻᒪ ᐳᕕᕐᓂᕐᑐᒥ, ᐃᓚᓯᕝᕕᐅᓚᐅᕐᑎ ᐃᓚᒃᓴᓂᒃ ᐊᑐᖅᑕᐅᕙᒃᑐᓂᒃ ᓄᕙᒡᔪᐊᕐᓇᖅ-19-ᒥᑦ.

ᒪᐃ

ᐲᑕ ᐹᓕᓱ, 38, ᐃᓄᒃᒧᐊᒃᒥᐅᑕᖅ, ᑎᒍᔭᐅᓚᐅᕐᑐᖅ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᓂ ᒪᐃ 11-ᒥᑦ ᑐᖁᑎᑦᑎᓂᖓᓂᒃ ᐊᖑᑎᒥᒃ. ᑲᑎᕕᒃ ᓄᓇᓕᓕᒫᑦ ᐸᓖᓯᖏᑦ ᓇᓂᓯᓚᐅᕐᑐᑦ 29-ᓂᑦ ᐊᕐᕌᒍᓕᐅᑉ ᑎᒥᖓᓂᒃ ᐊᒪᕈᑦᑖᖅ ᐅᐃᑖᓗᒃᑐ ᐃᓚᖏ ᐸᓖᓯᓄᑦ ᐊᓯᐅᓂᖓᓂᒃ ᐅᖃᐅᓯᖃᓚᐅᕐᑎᓪᓗᒋᑦ. ᐃᖃᖅᑐᐃᕕᓂᒃ ᑎᑎᕋᕐᓯᒪᔪᓂᒃ, ᐹᓕᓱ ᐸᔭᒋᔭᐅᓚᐅᕐᑐᖅ ᐅᐃᑖᓗᒃᑑᑉ ᐃᓅᔪᓐᓃᕐᓂᖓᓄᑦ ᒫᓂ ᐅᕙᓂᓘᓐᓃᑦ ᐄᐳᕈᓪ 30-ᒥᑦ — ᐅᓪᓗᑦ 7 ᓯᕗᓂᐊᓂ ᓇᓂᔭᐅᓂᐊᓵᖅᑎᓪᓗᒍ  — ᐅᖃᕐᓯᒪᓪᓗᑎᒃ ᐹᓕᓱ ᑎᒥᐊᓂᒃ ᐃᔨᕐᓯᓇᓱᒋᔭᐅᓪᓗᓂ.

ᓄᓇᕕᒻᒥ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᕕᓃᑦ ᖃᓄᐃᑦᑐᓐᓃᕐᑎᓪᓗᒋ ᒪᐃ ᕿᑎᐸᓗᐊᓂ, ᐱᓕᕆᔨᒻᒪᕆᐅᔪᑦ ᓄᓇᕕᒻᒥ ᐊᓃᑲᑕᒃᑕᐃᓕᒪᓂᐅᔪᓂ ᓄᖃᖅᑎᑦᑎᔾᔫᒥᓚᐅᕐᑐᑦ ᐊᒻᒪᓗ ᐃᒥᐊᓗᒃᑖᕋᓱᒃᑐᓂ ᑲᒪᙱᓐᓂᕐᓴᐅᓕᕐᖢᑎᒃ. ᐸᓖᓯᒃᑯᑦ ᑕᒫᓃᑦᑐᑦ ᐅᖃᓚᐅᕐᑐᑦ ᐱᕋᔭᖕᓂᐅᕙᒃᑐᑦ ᑲᑕᒃᓯᒪᕚᓪᓕᓚᐅᕐᓂᖏᓐᓂᒃ ᑕᒪᐅᓇ — ᐅᑯᐊ ᐊᓯᖏᑦ ᐱᑦᑎᐊᙱᑐᐃᓐᓇᕐᓂᕐᒨᖓᔪᓂᒃ, ᑕᐃᒪᐃᑐᓪᓗ ᖁᕝᕙᖅᐹᓪᓕᓚᐅᕐᖢᑎᒃ ᐋᓐᓂᐊᕕᔾᔪᐊᕐᓇᒥ.

ᑭᓯᐊᓂᓕ ᓱᓕ ᓄᓇᓖ ᐋᓐᓂᐊᕕᒡᔪᐊᕐᓇᒥ ᐅᓗᕆᐊᓱᒃᑐᑦ: ᓄᓇᓕᖕᓂ ᐱᓕᕆᔨᒻᒪᕆᐅᔪᑦ ᑲᖏᖅᓱᐊᓗᔾᔪᐊᕐᒥ ᐋᓐᓂᐊᕕᖓᓂᒃ ᓄᑖᙳᕆᐊᖅᑎᑦᑎᔪᒪᓚᐅᙱᑦᑐᑦ ᓲᖃᐃᒻᒪ ᓄᓇᖃᙱᑦᑐᓂᒃ ᑎᑭᑎᑦᑎᔭᕆᐊᖃᕋᔭᕐᒪᑕ ᓴᓇᔭᖅᑐᖅᑐᓂᒃ ᖃᓪᓗᓈᓂᙶᖅᑐᓂᒃ, ᐊᒻᒪᓗ ᐃᓄᑑᓐᓇᖅᑐᒦᙱᒃᑲᓗᐊᕈᑎ ᑎᑭᑎᑕᐅᔪᓐᓇᖅᖢᑎᒃ.

ᑕᕿᖅ ᓄᖑᓕᕐᑎᓪᓗᒍ, ᓄᓇᕕᒻᒥ ᐱᓕᕆᔨᒻᒪᕆᐅᔪᑦ ᖃᓄᐃᑦᑕᐃᓕᒍᑎᐅᔪᓂᒃ ᒪᑐᐃᕐᓯᕙᓪᓕᐊᓕᓚᐅᕐᐳᑦ ᐃᓚᒋᓪᓗᒍ ᓄᓇᓖᑦ ᐊᑯᓐᓂᖓᒍᑦ ᓅᑲᑕᒍᓐᓇᕐᓂᕐᒥᒃ.

ᑲᑎᕕᒃ ᓄᓇᓕᓕᒫᑦ ᐸᓖᓯᖏᑦ ᐅᖃᓚᐅᕐᑐᖅ ᐅᓇ ᐸᓖᓯᓂ ᐊᔾᔨᓕᐅᕈᑎᓂ ᓇᒃᓴᑲᑕᖃᑦᑕᕆᐊᖃᕐᓂᖏᓐᓂᒃ ᐊᓂᒍᐃᑦᑎᐊᕐᓂᕋᐃᓚᐅᕐᑐᑦ. ᑖᓐᓇ ᐱᓕᕆᓂᐅᔪᖅ ᑲᔪᓯᓂᐊᕐᑐᖅ ᑎᑭᓪᓗᒍ 2021, ᐊᒻᒪᓗ ᐊᓂᒍᑦᑎᐊᕈᓂ, ᑲᑎᕕᒃ ᓄᓇᓕᓕᒫᑦ ᐸᓖᓯᖏ ᑕᒪᐃᓐᓂ ᓄᓇᓕᖕᓃᑦᑐᓂᒃ 14-ᓂ ᐸᓖᓯᐅᔪᑦ ᐊᑐᖃᑦᑕᕐᓂᐊᕐᓂᕋᖅᖢᒋᑦ ᐊᔾᔨᓕᐅᕈᑎᓂᒃ.

ᔫᓂ

ᐊᔾᔨᒌᙱᑎᑦᑎᖃᑦᑕᕐᓂᕐᒥ ᓈᒻᒪᒃᓴᖃᑦᑕᙱᓐᓂᖅ ᐅᓄᕐᓯᕙᓪᓕᐊᒍᑎᐅᑎᓪᓗᒍ ᓄᓇᕐᔪᐊᓕᒫᒥᑦ, ᑯᐸᐃᒃ ᒐᕙᒪᖏᑦ ᑐᓴᖅᑎᑦᑎᕗᑦ ᐋᖅᑭᒃᓯᓂᐊᕐᓂᖏᓐᓂᒃ ᐱᓕᕆᔨᐅᓂᐊᕐᑐᓂᒃ ᐊᔾᔨᒌᒃᑎᑦᑎᕙᙱᓐᓂᕐᒥ ᐱᓕᕆᐊᖃᖅᑐᓂᒃ ᑯᐸᐃᒃᒥᑦ. ᑭᓯᐊᓂᓕ ᒪᑭᕕᒃ ᑯᐊᐳᕇᓴᓐᑯᑦ ᓈᒻᒪᒃᓴᓚᐅᙱᑦᑐᑦ ᑖᔅᓱᒥᖓ ᓄᑖᒥ ᑎᒥᒥᑦ — ᐋᖅᑭᒃᑕᐅᓯᒪᓂᖓᓄᑦ ᐅᑯᓄᖓ ᒐᕙᒪᒃᑯᓐᓄᑦ ᒥᓂᔅᑕᓄᑦ ᐊᒻᒪ ᒪᓕᒐᓕᕆᔨᐅᕙᒃᑐᓄᑦ — ᐃᓄᖕᓂ ᓄᓇᖃᖅᑳᖅᑐᓂᓪᓘᓐᓃᑦ ᑭᒡᒐᖅᑐᐃᔨᖃᙱᓗᐊᕐᓂᖏᓐᓄᑦ.

ᓄᓇᕕᒻᒥ ᐊᕙᑕᖅ ᐃᓕᖅᑯᓯᓕᕆᔨᒃᑯᑦ ᐅᖃᓚᐅᕐᑐᑦ ᐃᓱᒪᓂᖏᓐᓂᒃ ᒫᓐᑐᕆᐊᒦᑦᑐᑦ ᐊᐅᓚᑕᐅᔪᑦ ᓄᓇᕕᒻᒧᑦ ᐅᑎᖅᑎᑕᐅᔪᒪᓪᓗᑎᒃ, ᐱᔾᔪᑎᒋᓪᓗᒋ ᑲᒪᒋᔭᖃᕈᓐᓇᕐᓂᕐᓴᐅᓂᐊᕐᒪᑐ “ᐃᓄᐃᑦ ᓯᕗᓪᓕᐅᖁᔭᖏᓐᓂᒃ.” ᐊᕙᑕᖅ ᓴᐃᓐ ᑳᑐᕆᓐ ᐊᖅᑯᑎᒥ ᑎᑎᕋᕐᕕᒃᑖᓚᐅᕐᓯᒪᔪᑦ ᒪᓐᑐᕆᐊᒥᑦ 2013-ᖑᑎᓪᓗᒍ, ᑭᓯᐊᓂᓕ ᐅᓇ ᐊᖓᔪᖅᑳᖃᕐᕕ ᐃᓄᒃᔪᐊᒃᒦᖏᓐᓇᖅᑎᓪᓗᒍ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᓂᒃᑳᓕᐅᕐᐳᑦ ᓄᓇᕕᒃᒥᑦ ᐸᓖᓯ ᐸᓯᔭᒃᓴᙳᖅᑎᑕᐅᓂᖓᓂᒃ ᐋᓐᓂᕐᓯᓂᕐᒧᑦ ᐃᖅᑲᓇᐃᔭᖅᑎᓪᓗᒍ ᐸᓖᓯᐅᓂᕐᒥᒃ. ᑕᒪᓐᓇ ᐊᑯᓂᕈᓗᒃ ᖃᐅᔨᓴᖅᑕᐅᓚᐅᕐᑎᓪᓗᒍ, ᒫᑎᐅ ᐱᐅᕆ, 26, ᐸᓯᔭᒃᓴᙳᖅᑎᑕᐅᓚᐅᕐᐳᖅ ᐋᓐᓂᕐᓯᓂᕐᒥᒃ ᓱᒋᐅᑎᖃᖅᖢᓂ ᐊᒻᒪ ᐋᓐᓂᕐᓯᓂᕐᒥᒃ ᑎᒥᖓᒍᑦ, ᐅᕙᓂ 2019-ᒥᑦ ᖃᓄᐃᓕᐅᕈᓯᕕᓂᕐᒥᒃ ᓴᓪᓗᐃᑦ ᓄᓇᓕᖕᓂ. ᐱᐅᕆ ᐊᐃᑉᐸᕆᔭᐅᔪᖅ ᑲᑎᕕᒃ ᓄᓇᓕᓕᒫᑦ ᐸᓖᓯᓂᒃ ᐸᓯᔭᒃᓴᙳᖅᑎᑕᐅᔪᓂᒃ; ᑎᒧᑎ ᓴᖑᔭ ᐸᓯᔭᒃᓴᙳᖅᑎᑕᐅᓚᐅᕐᓯᒪᖕᒪᑦ ᖁᓄᔪᕐᓂᐊᕐᓯᓂᕐᒥᒃ ᐊᕐᕌᓂᐅᓚᐅᕐᓯᒪᔪᖅ.

ᔫᓂᐅᑉ ᓄᙳᐊᓂ, ᐃᓄᐃᑦ ᖃᖓᑕᔫᖏᑦ (Air Inuit) ᐱᒋᐊᖅᑎᑦᑎᒃᑲᓐᓂᓚᐅᕐᐳᑦ ᖃᖓᑕᓲᒧᑦ ᐃᖏᕐᕋᔾᔪᑎᐅᕙᖕᓂᐊᕐᑐᓂᒃ ᓄᓇᕕᒃᒥᑦ. (ᐊᔾᔨᙳᐊᖁᑎᒋᔭᐅᔪᖅ)

ᔪᓚᐃ

ᑯᐸᐃᒃᒥ ᐃᖃᖅᑐᐃᕕᔾᔪᐊᒧᑦ ᐃᖃᖅᑐᐃᔨᐅᔪᖅ ᐱᔪᓐᓇᖅᑎᑦᑎᕗᖅ ᐸᓯᔭᒃᓴᙳᖅᑎᑦᑎᔪᓐᓇᕐᓂᕐᒥ ᐃᓄᒋᐊᖑᓗᑎᒃ ᐅᑯᓂᖓ ᑯᐸᐃᒃ ᒐᕙᒪᖓᓂᒃ ᐊᑭᓕᖅᑕᐅᔪᒪᓂᕐᒧᑦ ᒪᑯᓄᖓ ᓄᓇᕕᒃᒥᑦ ᑎᒍᔭᐅᓯᒪᔪᓄᑦ. ᐅᓇ ᐸᓯᔭᒃᓴᙳᖅᑎᑦᑎᒍᑎ, ᓯᑎᐱᕆ 2018-ᒥᑦ ᐱᓕᕆᐊᖑᓕᓚᐅᕐᓯᒪᔪᖅ, ᓄᓇᕕᒻᒥᐅᓂᒃ ᑮᓇᐅᔭᖅᑖᖅᑎᑕᐅᖁᔨᓂᕐᒥ ᑎᒍᔭᐅᓯᒪᕙᒃᑐᓂᒃ ᐅᓪᓗᓂ ᐱᖓᓱᓂᒃ ᐃᖃᖅᑐᐃᕕᒃᑰᓚᐅᖅᑎᓐᓇᒋ, ᐃᑲᔪᖅᑕᐅᕕᖃᙱᓗᐊᕐᓂᖓᓄᑦ ᑕᒫᓂ.

ᓴᓇᔭᐅᓂᖓ ᐃᓄᒃᔪᐊᒃᒥ ᐃᒪᕐᒧᑦ ᐆᒻᒪᖅᑯᑎᓕᕆᓂᕐᒧᑦ ᓴᐴᓕᑕᓕᐅᕐᓂ ᐱᒋᐊᖅᑕᐅᑕᐃᓐᓇᓚᐅᕐᐳᖅ. ᐅᓇ 7.5 ᒥᒐᕗᐊᑦ ᓴᙱᓂᓕ ᐃᒪᕐᒧᑦ —  ᐃᓐᓇᕕᒃ ᐆᒻᒪᖅᑯᑎᓕᕆᓂᕐᒧᑦ ᐱᓕᕆᐊᒃᓴᖅ — ᐃᓱᒪᒋᔭᐅᔪᖅ ᐆᒻᒪᖅᑯᑎᖃᖅᑎᑦᑎᔪᓐᓇᕆᐊᒃᓴᖓᓂ ᓄᓇᓕᖕᓂ 1,800-ᓂ ᐃᓄᓕᖕᒥ ᐊᐅᓚᑕᐅᓕᕈᓂ 2022-ᒥᑦ.

ᐋᒐᓯ

ᑯᐸᐃᒃᒥ ᐃᒻᒥᒃᑰᖓᔪᓂ ᖃᐅᔨᓴᖅᑎᓂᒃ ᐅᑯᐊ the Bureau des enquêtes indépendantes, ᑎᑭᑎᑕᐅᓚᐅᕐᓯᒪᔪᑦ ᖃᐅᔨᓴᖁᔭᐅᓪᓗᑎᒃ ᖃᓄᖅ ᓄᓇᕕᒃᒥᐅᑕᖅ ᐸᓯᔭᒃᓴᐅᔪᖅ ᐋᓐᓂᕐᔪᐊᓚᐅᕐᓯᒪᓂᖓᓂᒃ ᑎᒍᔭᐅᑎᓪᓗᒍ ᐋᒐᓯ 13-ᒥᑦ ᑲᖏᖅᓱᐊᓗᔾᔪᐊᖅᒥ. ᐅᓪᓛᖓᓂᒃ, ᑲᑎᕕᒃ ᓄᓇᓕᓕᒫᑦ ᐸᓖᓯᖏᑦ ᑎᒍᓯᓚᐅᕐᒪᑕ 22-ᓂ ᐅᑭᐅᓕᒃ ᐊᖑᑎᒥ ᐋᓐᓂᕐᓯᕆᓂᕋᖅᑕᐅᓚᐅᕐᑎᓪᓗᒍ. ᐸᓖᓯᒃᑯᑦ ᑖᔅᓱᒥᖓ ᐸᓖᓯᒃᑯᓐᓄᑦ ᐊᒡᔭᖅᓯᓕᕐᑎᓪᓗᒋᑦ, ᑖᓐᓇ ᐊᖑᓇ ᖁᖓᓯᕐᒥᒍᑦ ᑐᖅᖢᖓᒍᓪᓗ ᐃᒻᒥᓂᒃ ᐱᓚᓚᐅᕐᓯᒪᖕᒪᑦ ᓴᕕᖕᒧᑦ.

ᑯᐸᐃᒃ ᐸᓖᓯᓂ ᖃᐅᔨᓴᖅᑎᒃᑯᑦ ᐅᑯᐊ the Bureau des enquêtes indépendantes, ᑎᑭᖁᔭᐅᓚᐅᕐᓯᒪᔪᑦ ᖃᐅᔨᓴᖁᔭᐅᓪᓗᑎᒃ ᓄᓇᕕᒻᒥᐅᑕᒥ ᐊᖑᑎᒥ ᐃᓅᔪᓐᓃᖅᑐᖃᖅᑎᓪᓗᒍ ᑎᒍᔭᐅᓯᒪᑎᓪᓗᒍ. 45-ᓂ ᐅᑭᐅᓕᒃ ᐊᖑᑎ ᑎᒍᔭᐅᓚᐅᕐᓯᒪᖕᒪᑦ ᐋᒐᓯ 28-ᒥᑦ ᐊᒻᒪ ᑲᑎᕕᒃ ᓄᓇᓕᓕᒫᑦ ᐸᓕᓯᒃᑯᓐᓄᐊᖅᑕᐅᓪᓗᓂ ᐅᓐᓄᓴᖓᓂᒃ, ᑭᓯᐊᓂᓕ ᐃᓅᔪᓐᓃᕐᓯᒪᔪᖅ ᓇᓂᔭᐅᓚᐅᕐᓯᒪᔪᖅ ᓴᐳᓐᓂᐊᖅᑎᒥᓐ ᖃᐅᔨᔭᐅᒋᐊᕋᒥ ᐃᑲᕐᕋᒐᓴᐃᑦ ᐊᓂᒍᖅᑎᓪᓗᒋᑦ.

ᑲᑎᕕᒃ ᐃᓕᓴᕐᓂᓕᕆᓂᖅ, ᓄᓇᕕᒻᒥ ᐃᓕᓐᓂᐊᕐᓂᓕᕆᔨᒃᑯᑦ, ᐱᒋᐊᓕᓚᐅᕐᑐᑦ ᐅᑎᖅᑎᑦᑎᕙᓪᓕᐊᓪᓗᓂ ᐃᓕᓐᓂᐊᕐᕕᖕᒧᑦ 17-ᓂᒃ ᐃᓕᓐᓂᐊᕕᖕᓂ ᓄᓇᕕᒻᒥ ᐋᒐᓯ 31-ᖑᑎᓪᓗᒍ. ᐃᓕᓐᓂᐊᕐᕕᐅᔪ ᑕᒫᓂ ᒪᑐᓯᒪᓚᐅᕐᒪᑕ ᑕᐃᒪᙵᑦ ᒫᔅᓯ 24-ᖑᑎᓪᓗᒍ.

ᓯᑎᐱᕆ

ᑯᐸᐃᒃ ᒐᕙᒪᒃᑯᓐᓂ ᑭᒡᒐᖅᑐᐃᔨ ᐃᖃᖅᑐᐃᕕᖕᒥ ᐅᑯᓂᖓ ᑲᑎᕕᒃ ᓄᓇᓕᓕᒫᑦ ᐸᓖᓯᖏᓐᓂᒃ ᐸᓯᔭᒃᓴᐅᙱᓐᓂᕋᐃᕗᑦ ᔪᓚᐃ 2019-ᒥᑦ ᖃᓄᐃᓕᐅᕈᑎᐅᓂᑯᒥᑦ ᐃᓅᔪᓐᓃᖅᑐᖃᖅᖢᓂ ᓄᓇᕕᒻᒥᐅᑕᒥᑦ ᐊᖑᑎᒥ. ᐸᓖᓯᒃᑯᑦ ᐅᖄᓚᕝᕕᐅᒐᒥᒃ ᐅᐸᒍᑎᑎᓪᓗᒋ ᐊᖏᕐᕋᕆᔭᐅᔪᒧᑦ ᐅᕙᓂ ᓴᓪᓗᐃᑦ, ᓄᓇᓯᐅᑎᖓ ᓄᖅᑲᖓᑎᑕᖓ, ᐃᓄᖃᙱᖢᓂ ᐊᒃᓴᑳᓕᕐᓂᕐᒪᑦ ᖃᐅᔨᒪᔪᓐᓃᕐᓯᒪᔪᒧᑦ ᐊᖑᑎᒧᑦ ᐃᒡᓘ ᓯᓚᑖᓃᑦᑐᒥᑦ, ᑖᓐᓇᓗ ᐊᓐᓂᒻᒪᕆᒃᖢᓂ.

ᒥᐅᕆᓕᓐ ᒪᓱ ᐊᓂᒍᐃᓚᐅᕐᑐᖅ ᓄᓇᕕᒻᒥ ᐃᕐᓂᓱᒃᓰᓂᕐᒧᑦ ᐃᓕᓐᓂᐊᕐᓂᕐᒥᑦ, ᓯᕗᓪᓕᖅᐹᖑᓪᓗᓂ ᓇᓗᓇᐃᒃᑯᑎᑖᑐᓂ ᐃᓄᖕᓂ ᐃᕐᓂᓱᒃᓰᔪᓐᓇᕐᒧᑦ ᐅᖓᕙᒥ. ᓄᓇᕕᒃᒥᑦ ᑕᓯᐅᔭᕐᔪᐊᑉ ᓯᒡᔭᖓᓃᑦᑐᓂ ᓄᓇᓕᖕᓂ ᐅᓇ ᐃᕐᓂᓱᒃᓰᓂᖅ ᐱᒋᐊᖅᑕᐅᓯᒪᑎᓪᓗᒋ 1987-ᒥᑦ, ᑰᔾᔪᐊᖅ ᑕᑯᑕᐃᓐᓇᓚᐅᕐᑐᑦ ᐃᕐᓂᓱᒃᓰᓂᕐᒥᒃ ᐱᓕᕆᐊᖃᕐᓂᕐᒥᒃ 2009-ᒥᑦ.

“ᐃᕐᓂᕋ ᑕᕿᖃᓕᖅᑎᓪᓗᒍ ᐅᖃᐅᓯᖃᑲᑕᓕᓚᐅᕐᓯᒪᔪᒍᑦ ᕿᓚᓗᒐᐃᑦ ᒥᒃᓵᓄᑦ. ᐅᓪᓗᒥ ᐃᕐᖑᑕᖃᓕᕐᖢᖓ ᓱᓕ ᕿᓚᓗᒐᐃᑦ ᒥᒃᓵᓄᑦ ᐅᖃᑲᑕᒍᑎᖃᖅᐳᒍᑦ,” ᐅᖃᖅᑐᖅ ᖁᐊᖅᑕᖅᒥᐅᑕᖅ ᔮᓂ ᐆᕙᐅᑦ, ᐃᒃᓯᕚᕐᑐᖅ ᐃᕐᓂᖓᑕ ᓴᓂᑦᑎᐊᖓᓂᒃ ᑖᓂᐅᓪ, ᔭᓄᐊᕆ 23-ᒥᑦ ᑲᑎᒪᑎᓪᓗᒋᑦ ᕿᓚᓗᒐᕐᓂᒃ ᐊᐅᓚᑦᑎᓂᕐᒥᒃ ᓄᓇᕕᒃ ᑕᕆᐅᕐᒥᐅᑕᖏᓐᓂᒃ. (ᐊᔾᔨᓕᐅᕆᔨ ᐃᓚᐃᓐ ᐋᓐᓱᒥ)

ᐅᒃᑑᐱᕆ

ᓄᓇᕕᒻᒥ ᓄᓇᓖᑦ ᐅᖃᓚᐅᕐᑐᑦ ᐱᓕᕆᐊᖃᕐᓂᖏᓐᓂᒃ ᐊᔪᓕᕐᓇᖅᑐᕈᓗᖕᒥ ᓱᒃᑲᐃᓐᓂᕐᒧᑦ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᓂᕐᒥᒃ ᐊᒻᒪ ᖃᒥᖃᑦᑕᕐᓂᕐᒥᒃ ᐅᑭᐊᒃᓵᖅ, ᑕᐃᒪᓐᓇᓗ ᐊᔪᕐᓇᕈᓘᔭᓕᖅᐸᒃᖢᓂ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᖃᕐᓂᖅ ᐱᓕᕆᓇᓱᒃᖢᓂ. ᑕᒪᑐᒧᖓᓕ, ᓄᓇᕕᒻᒥ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓕᕆᔨ, ᑕᒫᓂ, ᐅᖃᓚᐅᕐᑐᑦ ᐊᑐᕐᓯᒪᓕᕐᓂᖏᓐᓂᒃ ᖃᓂᒋᔭᖓᓂᒃ 100 ᐳᓴᓐᑎᐅᑉ ᖁᒻᒧᒃᑎᑕᐅᓯᒪᔪᒥ, ᐱᓕᕆᐊᖃᕈᓘᔭᕋᓱᒃᑲᓗᐊᖅᑎᓪᓗᒋ ᑕᒪᑐᒥᖓ ᐱᔪᒪᔪᓂᒃ.

ᐅᒃᑑᐱᕆ ᐊᑯᓐᓂᖓ ᑎᑭᑎᓪᓗᒍ, ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᑦ ᓴᖅᑭᒃᑲᓐᓂᓕᓚᐅᕐᐳᑦ ᑕᒫᓂ, ᓄᓇᕕᒃᒥᑦ ᓄᓇᓕᓕᒫᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᑦ ᑲᑎᒪᔨᖏᑦ ᓄᓇᕕᒻᒥᐅᓂᒃ ᐊᐅᓪᓚᑲᑕᖁᔨᙱᖢᑎ ᐱᒻᒪᕆᐅᙱᑐᐊᕐᐸᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᐅᖃᓚᐅᕐᑐᑦ ᐊᐅᓪᓚᖃᑦᑕᖅᑐᑦ ᒪᕐᕉᐃᖅᑕᐅᓗᑎᒃ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᖅᑕᐅᔭᕆᐊᖃᓂᖏᓐᓂᒃ ᐅᑭᐅᕐᑕᖅᑐᕐᒧᙵᐅᔪ: ᐊᑕᐅᓯ ᐃᑭᓚᐅᙱᓐᓂᖏᓐᓂᒃ ᖃᖓᑕᓲᕐᒧᑦ ᐊᒻᒪᓗ ᐅᓪᓗᑦ 7 ᐊᓂᒍᖅᐸᑕ ᓄᓇᖏᓐᓄᐊᕐᓯᒪᓕᕐᑎᓪᓗᒋᑦ.

ᓄᓇᕕᒃ ᐸᓕᓯᖏᑦ ᑎᒍᓯᕗᑦ ᐱᖓᓱᓂᒃ ᐸᓯᔭᒃᓴᐅᔪᓂᒃ ᓱᕈᓯᕐᓂ ᐊᔾᔨᓕᐅᒐᕐᓂ ᐱᓯᒪᓂᕐᒧᑦ ᐊᒻᒪ ᑐᓂᐅᖃᐃᕙᖕᓂᕐᒧᑦ. ᐸᓯᔭᒃᓴᐅᔪᑦ ᓄᖅᑲᒻᑎᑕᐅᓚᐅᕐᑐᑦ ᐊᖏᕐᕋᕆᔭᐅᔪᓂᒃ ᐅᕙᓂ ᐊᑯᓕᕕᒃ, ᑰᔾᔪᐊᕌᐱᒃ ᐊᒻᒪ ᐅᒥᐅᔭᕐᒥᑦ, ᑭᓯᐊᓂᓕ ᐸᓖᓯᒃᑯᑦ ᐅᖃᓚᐅᕐᑐᑦ ᓱᕈᓰᑦ ᑕᒫᓂᕐᒥᐅᑕᐅᓇᓱᒋᔭᐅᙱᖢᑎᒃ.

ᓄᕕᐱᕆ

ᓄᓇᕕᒻᒥᐅᑕᖅ ᐊᖑᑎ ᑎᒍᔭᐅᕗᖅ ᐊᒻᒪ ᐸᓯᔭᒃᓴᙳᖅᑎᑕᐅᓪᓗᓂ ᐃᓄᐊᓯᓂᕐᒥᒃ ᓄᕕᐱᕆ 1-ᒥᑦ ᐃᓅᔪᓐᓃᖅᑎᓪᓗᒍ 37-ᓂ ᐅᑭᐅᓕᒃ ᒥᐊᓕ ᓴᕕᐊᕐᔪᒃ. ᐸᓖᓯᒃᑯᑦ ᐅᖄᓚᔪᒥ ᑭᐅᓚᐅᕐᓯᒪᖕᒪᑕ ᐃᑭᑦᑐᖃᕐᓂᕋᐃᔪᒥᑦ, ᐊᒻᒪᓗ ᓇᓂᓯᓕᖅᖢᑎᑎᒃ ᐊᕐᓇᐅᑉ ᑎᒥᖓᓂ ᐃᒡᓗᕈᓰᑦ ᐃᓚᖓᓐᓂ. ᐸᓖᓯᒃᑯᑦ ᑭᖑᓂᑦᑎᐊᖓᒍᑦ ᑎᒍᓯᓕᓚᐅᕐᑐᑦ 42-ᓂ ᐊᕐᕌᒍᓕᒃ ᐸᓯᔭᒃᓴᖅ, ᐸᐅᓗᓯ ᐅᓱᐃᑦᑐᐊᔪᒃ.

ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᑲᓇᑕᒥ ᐊᖏᕐᐳᑦ ᕿᓚᓗᒐᕐᓂ ᐊᐅᓚᔾᔪᑎᒃᓴᐅᓚᐅᑲᓐᓂᐊᕐᑐᓄᑦ ᐸᕐᓇᐅᑎᓂᒃ ᓄᓇᕕᒻᒥ, ᐊᖑᓇᓱᒃᑎᓂᒃ ᐅᑭᐅᒃᓵᒃᑯᑦ ᕿᓚᓗᒐᕈᓐᓇᖅᑎᑦᑎᓪᓗᑎᒃ ᓯᑯᓚᐅᙱᓐᓂᖓᓂᒃ. ᑭᓯᐊᓂᓕ ᐆᒪᔪᓕᕆᔨᓄᑦ ᐱᓕᕆᔨᐅᔪᑦ ᐅᖃᓚᐅᕐᑐᑦ ᐃᖃᓗᓕᕆᔨᒃᑯᑦ ᐊᒻᒪ ᑕᕆᐅᕐᒥᐅᑕᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᑎᓚᐅᕐᒪᑕ ᖃᐅᔨᑎᑦᑎᓚᐅᙱᖢᑎᒃ ᐃᓱᒪᓕᐊᕆᔭᐅᔪᓂᒃ ᓄᓇᕕᒻᒥ ᐱᓕᕆᔨᒻᒪᕆᖕᓂᒃ — ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏ ᐊᒻᒪ ᐊᕕᒃᑐᕐᓯᒪᓂᒃᑯᑦ ᐊᖑᔭᐅᔪᓐᓇᖅᑐᓄᑦ ᑲᑐᔾᔨᖃᑎᒌᖑᔪᑦ — ᓈᒻᒪᙱᓕᐅᖁᑎᖃᓕᖅᖢᑎᒃ ᐊᒻᒪ ᓇᓗᓇᕈᓘᔭᕈᑎᐅᓕᖅᖢᓂ ᐅᑭᐅᒃᓵᖅ ᐊᖑᓇᓱᖕᓂᐅᓚᐅᕐᑐᖅ.

ᐃᓐᓇᕕᒃ ᐆᒻᒪᖅᑯᑎᓕᕆᓂᕐᒧᑦ ᐱᓕᕆᐊᒃᓴᖅ ᐃᓄᒃᔪᐊᒃᒥᑦ $92.8 ᒥᓕᐊᓐ ᑖᓚᓂ ᐊᑐᖅᑐᐊᒐᒃᓴᓂᒃ ᐱᔪᓐᓇᕐᓯᓚᐅᕐᐳᑦ ᐅᑯᑎᒎᓇ Manufacturers Life Insurance Company (ᓇᐅᑦᑎᐅᒃᑯᒫᓕᕆᔩᑦ) ᓴᓇᓂᐊᕐᓂᕐᒧᑦ ᐊᒻᒪ ᐱᓕᕆᓂᕐᒧᑦ ᑮᓇᐅᔭᖃᕋᓱᖕᓂᕐᒧᑦ ᐆᒧᖓ $128 ᒥᓕᐊᓐ ᑖᓚᑐᕐᑐᖅ ᐱᓕᕆᕝᕕᒃᓴᖅ. ᐅᓇ 7.5-ᒥᒐᕗᐊᑦ ᓴᙱᓂᓕᒃ ᐃᖏᕐᕋᔪᖅ ᐃᒪᕐᒧᑦ ᐃᓱᒪᒋᔭᐅᔪᖅ ᐆᒻᒪᖁᑎᖃᖅᑎᑦᑎᒍᑎᐅᓇᔭᕆᐊᒃᓴᖓᓂᒃ ᓄᓇᓕᖕᓂ 1,800-ᓂᒃ ᐃᓄᖃᖅᑐᒥ ᒪᑐᐃᕈᓂ 2022-ᒥᑦ.

ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᑐᙵᓱᒃᑎᑦᑎᕗᑦ ᒐᕙᒪᑐᖃᒃᑯᓐᓂᒃ 1.75-ᐱᓕᐊᓐ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᓄᑦ ᐃᑲᔫᑎᒃᓴᓂᒃ, ᐅᖃᖅᖢᑎᒃ ᖃᓄᐃᓕᐅᕈᒪᓂᖏᓐᓂᒃ ᐅᓇ $150 ᒥᓕᐊᓐ ᑖᓚ ᑐᐊᕕᕐᑐᓂ ᑭᐅᑲᐅᕐᑐᕈᑎᓕᕆᓂᕐᒧᑦ ᐃᑲᔫᑎᓂᒃ ᒪᑯᓄᖓ ᐱᔪᒪᔪᓂᒃ ᐱᖃᓕᖅᑎᑦᑎᒃᑲᓐᓂᕈᑎᒃᓴᓂ ᕿᓚᒥᕈᓗᒃ — ᑕᕝᕘᓇᓕ, ᓄᕕᐱᕆ 2021 ᑎᑭᑉᐸᑦ.

ᑎᓯᐱᕆ

ᐅᕌᓐᑎ ᑰᓂᐊᒃ, 22, ᐃᓄᐊᕐᓯᓂᕋᖅᑕᐅᓚᐅᕐᑐᖅ 2018-ᒥᑦ ᑐᖁᑎᑦᑎᓪᓗᓂ ᑯᓗᐃ ᒪᐳᕇᒥᑦ, 28-ᓂᒃ ᐅᑭᐅᓕᒃ ᐋᓐᓂᐊᖅᑐᓕᕆᓂᒃᑯᑦ ᐱᓕᕆᔾᔪᑎᓕᕆᔨ ᐅᕙᓂ ᓄᓇᓕᒃ ᕕᒃᑑᕆᐊᕕᐅᓪ, ᑯᐸᐃᒃᒥᑦ. ᒪᐳᕇ ᐃᓄᑑᓚᐅᕐᓯᒪᔪᖅ ᑰᔾᔪᐊᕐᒥᑦ ᐊᖏᕐᕋᖓᓂᒃ ᐅᓐᓄᕈᓗᒃᑯᑦ ᔫᓂ 11, 2018-ᒥᑦ, ᓂᐊᖁᖓᒍᑦ ᖁᑭᖅᑕᐅᓪᓗᓂ, ᑐᖁᑲᐅᑎᒋᓪᓗᓂᓗ ᐊᒻᒪᓗ ᖁᓄᔪᕐᓂᐊᖅᑕᐅᓕᕐᓂᖅᖢᓂ. ᑰᓂᐊ ᐃᓅᓯᓕᒫᖓᓂᒃ ᑎᒍᔭᐅᓯᒪᓂᐊᕐᑐᖅ.

ᑲᑎᕕᒃ ᐃᓕᓴᕐᓂᓕᕆᓂᖅ ᓄᑖᒥ ᐊᖓᔪᖅᑳᖃᓕᕐᑐᖅ, ᓴᐃᕋ ᐊᓗᐸ, ᐃᓕᔭᐅᑐᐃᓐᓇᕐᓂᑯ ᑲᒥᓯᓇᐅᓂᕐᒧᑦ ᑲᑎᒪᔩᑦ ᑎᓯᐱᕆᒥ ᑲᑎᒪᑎᓪᓗᒋᑦ. ᐊᓗᐸ ᐃᓇᖏᕐᓯᔪᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐊᖓᔪᖅᑳᖓᓂᒃ ᐅᕌᐱ ᕗᐊᑦ.

ᑯᐸᐃᒃᒥ ᑲᑐᔾᔨᖃᑎᒌᑦ Coalition d’Avenir Québec ᒐᕙᒪᒃᑯᑦ ᓴᖅᑭᑎᑦᑎᕗᑦ ᓄᑖᙳᕆᐊᕐᓯᒪᔪᒥᒃ ᐆᒥᖓ Plan Nord, ᐊᑎᖃᓕᖅᖢᓂ ᓄᑖᒥᒃ ᐃᒪᓐᓇ Plan d’action nordique, ᐅᓇ $778 ᒥᓕᐊᓐᑖᓚᑐᕐᑐᖅ ᐋᖅᑭᒃᓱᐃᕚᓪᓕᕐᓂᕐᒧᑦ ᑯᐸᐃᒃ ᐅᐊᖕᓇᖓᓃᑦᑐᓂᒃ. ᑭᓯᐊᓂᓕ ᓯᕗᓪᓕᕐᒥ ᑕᑯᓪᓗᒍ, ᓇᓗᓇᕐᑐᖅ ᖃᓄᖅ ᓄᓇᕕᒃ ᑕᒪᑐᒧᖓ ᐃᑲᔪᖅᑕᐅᓇᔭᕐᒪᖔᑦ.

Share This Story

(0) Comments

Join the Conversation

Your email address will not be published. Required fields are marked *

*