ᓄᓇᕕᒃᒥ ᒪᒥᓴᕐᕕᒃ ᓵᓚᒃᓴᐅᓯᐊᖅᑐᖅ ᒥᓂᔅᑕᒧᑦ ᐃᓕᓴᕆᔭᐅᔾᔪᑎᒥ ᐱᓕᕆᑦᑎᐊᕐᓂᕐᒧᑦ

For an English version of this story, please see Nunavik recovery centre wins minister’s award of excellence.

ᐃᓱᐊᕐᓯᕕᒃ ᒪᒥᓴᕐᕕᒃ ᑰᔾᔪᐊᖅᒥ ᐃᓕᓴᕆᔭᐅᔾᔪᑎᒥ ᓵᓚᒃᓴᐅᓯᐊᓚᐅᕐᑐᑦ ᑯᐸᐃᒃᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᐊᒻᒪ ᐃᓄᓕᕆᔨᒃᑯᓐᓂᒃ.

ᐅᓇ ᒪᒥᓴᕐᕕᒃ ᑮᓇᐅᔭᓕᐅᕈᑎᐅᓇᓱᙱᖢᑎᒃ ᑲᑐᔾᔨᖃᑎᒌᖑᔪᖅ ᐊᒻᒪᓗ ᐊᐅᓚᔾᔪᑎᓄᑦ ᐃᑲᔫᑎᑖᖅᐸᒃᖢᓂ ᓄᓇᕕᒻᒥ ᐃᓄᓯᓕᕆᓂᕐᒧᑦ ᑲᑎᒪᔨᖏᓐᓂᒃ. ᐱᓕᕆᐊᖃᕐᓂᖅᓴᐃᑦ ᒪᒥᓴᖅᑐᓕᕆᓂᕐᒥᒃ ᐊᒻᒪ ᒪᒥᓴᖅᐸᓪᓕᐊᔪᓂᒃ ᑯᐸᐃᒃ ᑕᕐᕋᖓᓃᑦᑐᓂᒃ ᐊᑐᖃᑦᑕᓗᐊᕐᓂᕐᒧᑦ ᐊᒻᒪ ᐊᑐᖃᑦᑕᐃᓐᓇᕈᒪᓗᐊᕐᓂᕐᒧᑦ.

ᑐᓂᔭᐅᓚᐅᕐᓯᒪᔪᑦ ᒥᓂᔅᑕᒧᑦ ᓂᕈᐊᕆᔭᐅᓂᖏᓐᓄᑦ ᐃᓕᓴᕆᔭᐅᔾᔪᑎᒃᑯᑦ ᑎᓯᐱᕆ 10-ᖑᑎᓪᓗᒍ ᐱᓕᕆᐊᖏᓐᓄᑦ ᐊᑐᖅᖢᑎᒃ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᐊᒻᒪ ᐊᑐᖃᑦᑕᖅᑕᖏᓐᓂᒃ ᒪᒥᓴᕋᓱᖕᓂᒃᑯᑦ ᓄᓇᓕᖕᓂ.

ᐱᓗᐊᕐᑐᒥ ᐅᓇ ᐃᓕᓴᕆᔭᐅᔾᔪᑎ ᐃᓕᓴᖅᓯᓯᒪᔾᔪᑎᐅᔪᖅ ᓄᓇᓕᖕᓂ ᐱᔨᑦᑎᕋᐅᑎᓕᕆᓂᕐᒥᒃ ᐱᓇᓱᒻᒪᕆᒃᑐᓂᒃ ᐊᒻᒪᓗ ᐃᖅᑲᓇᐃᔭᖅᑎᓂᒃ ᐃᓚᐅᕙᖕᓂᖏᓐᓂᒃ, ᐅᖃᓚᐅᕐᑐᖅ ᐃᓱᐊᕐᓯᕕᐅᑉ ᐊᐅᓚᑦᑎᔨ ᑐᑭᒧᐊᖅᑎᔨᖓ ᐊᓖᓴ ᐊᔭᕈᑕᒃ.

“ᐅᓇ ᖁᔭᓕᓐᓇᑦᑎᐊᖅᑐᖅ ᐊᒻᒪ ᖁᕕᐊᓇᑦᑎᐊᖅᖢᓂ,” ᐊᔭᕈᑕᒃ ᐅᖃᖅᑐᖅ.

“ᐅᔾᔨᕆᔭᐅᓪᓗᓂ ᐊᓯᒦᑦᑎᓐᓂᒃ ᐃᒪᓐᓇ ᐃᒃᐱᒍᓱᓕᕐᓇᖅᑐᖅ, ‘ᐊᓕᐊᓇᐃᑦ, ᐱᓕᕆᐊᕗᑦ ᓈᒻᒪᒃᑐᒦᑦᑐᖅ, ᐱᓕᕆᑦᑎᐊᖅᑐᒍᑦ.’”

ᐅᓄᓗᐊᙱᑦᑑᒐᓗᐊᑦ ᖁᕕᐊᓲᑎᖃᕈᓐᓇᓚᐅᕐᑐᑦ ᑰᔾᔪᐊᖅᒥᑦ ᑎᓯᐱᕆ 10-ᖑᑎᓪᓗᒍ ᓵᓚᒃᓴᕐᓂᖏᓐᓄᑦ.

ᐊᔭᕈᑕᒃ ᐅᖃᓚᐅᕐᑐᖅ ᓯᕗᓪᓕᖅᐹᖑᓂᕋᖅᖢᓂᐅᒃ ᓄᓇᕕᒃᒥᑦ ᑲᑐᔾᔨᖃᑎᒌᓂᒃ ᐃᓕᓴᕆᔭᐅᔾᔪᑎᑖᖅᑐᖅ ᐊᒻᒪᓗ ᐅᖃᖅᖢᓂ ᐃᑲᔫᑎᒻᒪᕆᐅᓂᐊᕐᓂᖓᓂᒃ ᐱᓕᕆᖃᑎᒌᖃᑦᑕᖅᑐᓄᑦ.

“ᐊᒃᓱᕈᖃᑦᑕᕐᒪᑕ ᐱᓕᕆᐊᖃᖅᖢᑎ ᐊᒻᒪᓗ ᑖᓐᓇ ᐊᒃᓱᕈᕐᓇᖅᑐᐊᓘᓪᓗᓂ ᐱᓕᕆᐊᒃᓴᖅ,” ᐅᖃᑐᖅ.

ᐃᓱᐊᕐᓯᕕᒃ ᒪᒥᓴᕐᕕᒃ ᐱᒋᐊᖅᑕᐅᓚᐅᕐᓯᒪᔪᖅ 1994-ᒥ. ᐅᓇ ᐃᓕᓴᕆᔭᐅᔾᔪᑎ ᑐᓐᓂᖅᑯᓯᐊᖅᑖᕆᔭᐅᓚᐅᕐᑐᖅ ᑖᒃᑯᐊ ᓄᑖᒥ ᐃᒡᓗᓕᐅᖅᐸᓪᓕᐊᓕᖅᑎᓪᓗᒋᑦ ᒪᒥᓴᕐᕕᒃᓴᒥᒃ ᑖᓐᓇᓗ 2022 ᐅᑭᐊᒃᓵᖓᓂ ᐱᐊᓂᒃᑕᐅᓂᐊᕋᓱᒋᔭᐅᓪᓗᓂ.

ᐊᔭᕈᑕᒃ ᐅᖃᓚᐅᕐᑐᖅ ᐊᖏᒡᓕᒋᐊᕐᓯᒪᓂᕐᓴᖅ ᐱᓕᕆᕝᕕᐅᓂᐊᖅᖢᓂ 22-ᓂ ᐃᒡᓕᖃᕐᓗᓂ ᐊᒻᒪᓗ ᐃᓚᒌᓄᑦ ᐊᒻᒪ ᓇᔾᔨᔪᓂᒃ ᐃᓱᒪᒋᔭᖃᕐᓂᖅᓴᐅᒋᓪᓗᓂ ᐊᒻᒪ ᐊᓯᖏᓐᓂᒃ ᐱᔨᑦᑎᕋᐅᑎᓂᒃ.