ᓄᓇᕕᒃ ᐃᓄᖏᑦ ᐊᑎᓕᐅᖃᑎᖃᖅᐳᑦ ᐋᑐᕚᒥᑦ ᐱᒋᐊᕈᑎᐅᓂᐊᕐᑐᒥᒃ ᓇᖕᒥᓂᖅ ᒐᕙᒪᖃᓕᕐᓂᕐᒧᑦ ᐋᔩᕈᑎᒃᓴᓂᒃ

ᓄᓇᕕᒃᒥᑦ ᒪᑭᕕᒃ ᑯᐊᐳᕇᓴᓐᑯ ᐊᑎᓕᐅᓚᐅᕐᑐᑦ ᐊᖏᖃᑎᒌᒍᑎᒥᒃ ᒐᕙᒪᑐᖃᒃᑯᓐᓂᑦ ᐱᒋᐊᕈᑎᒃᓴᐅᓂᐊᕐᑐᒥᒃ ᐋᔩᖃᑎᖃᕈᓇᕐᓂᐊᕐᓂᕐᒥᒃ ᓇᖕᒥᓂᖅ ᐃᓄᐃᑦ ᒐᕙᒪᖃᓕᕈᒪᓂᖏᓄᑦ ᓄᓇᕕᒃᒥᑦ.

ᐊᖏᖃᑎᒌᒍᑎ ᐊᑎᓕᐅᕐᑕᐅᓚᐅᕐᑐᖅ ᐊᐃᑉᐹᓂᑦ, ᔫᓂ 18, ᐅᑯᓇᙵᑦ ᒪᑭᕕᒃ ᐊᖓᔪᖅᑳᖓ ᓵᓕ ᕗᐊᑦ ᐊᒻᒪᓗ ᒐᕙᒪᑐᖃᒃᑯᑦ-ᓄᓇᖃᖅᑳᖅᑐᓄᓪᓗ ᐊᒻᒪ ᐅᑭᐅᕐᑕᖅᑐᕐᒥᐅᓄᑦ ᒥᓂᔅᑕ ᑭᐅᕈᓕᓐ ᐸᓇᑦ.

ᐅᓇ MOU, ᐋᕿᒃᓱᖅᑕᐅᕙᓪᓕᐊᓯᒪᔪᖅ ᐊᑭᐊᒃᓵᖑᓚᐅᕐᑐᒥᑦ, ᓇᓗᓇᐃᔭᐃᓯᒪᕗᖅ ᒪᑭᕕᒃᑯᑦ ᐱᔪᒪᔭᖏᓐᓂᒃ, ᐃᓱᖃᕐᕕᒃᓴᖓᓂᒃ ᐅᖃᓪᓚᑲᑕᖕᓂᐅᑉ, ᐱᓕᕆᓂᕐᒧᑦ ᖃᓄᐃᓕᐅᕈᑎᒃᓴᓂᒃ, ᓈᒻᒪᙱᓕᐅᕈᑎᓂᒃ ᐋᕿᒋᐊᕈᑎᐅᔪᓐᓇᖅᑐᓂᒃ ᐊᒻᒪᓗ ᑮᓇᐅᔭᓂᒃ ᐃᑲᔫᓯᐊᓕᕆᓂᕐᒥᒃ.

ᖃᕋᓴᐅᔭᒃᑯᑦ ᑎᑎᕋᖅᑕᐅᔪᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐅᖃᓪᓚᒃᑎᒋᔭᐅᔪᖅ ᐅᑯᓇᙵᑦ CIRNA-ᑯᓐᓂᑦ ᐅᖃᓚᐅᕐᑐᖅ ᑖᓐᓇ ᑎᑎᖃᖅ “ᐱᒋᐊᓕᕈᑎᐅᓪᓗᓂ ᐅᖃᓪᓚᖃᑎᖃᑲᑕᖕᓂᕐᒥᒃ ᐊᒥᓱᓂᒃ ᐊᔾᔨᒌᙱᑦᑐᓂᒃ ᓇᖕᒥᓂ ᐱᓇᓱᒍᒪᓂᕐᒥᒃ ᐊᒻᒪ ᒐᕙᒪᓕᕆᓂᕐᒥᒃ.”

ᑕᒪᓐᓇ ᐅᑭᐅᖅ ᐱᒋᐊᕐᓯᒪᓕᖅᑎᓪᓗᒍ, ᒪᑭᕕᒃᑯᑦ ᑎᒃᑯᐊᕐᓯᓚᐅᕐᒪᑕ ᐅᖃᓪᓚᖃᑎᖃᑲᑕᖕᓂᕐᒧᑦ ᐊᖓᔪᖅᑳᕆᔭᐅᓂᐊᕐᓗᓂ ᒥᐊᓕ ᓴᐃᒪᓐᒥᑦ, ᐃᒡᓯᕙᐅᑕᐅᓂᐊᕐᓗᓂ ᓄᓇᕕᒃ ᐃᓄᐃᒃ ᒪᓕᒐᓕᕆᓂᕐᒧᑦ ᐱᓕᕆᔨᐅᓂᐊᖅᑐᓂᒃ. ᐱᓇᓱᐊᒐᕆᓂᐊᕐᑕᖓᓕᒃ ᓇᓗᓇᐃᔭᐃᑦᑎᐊᕐᓗᑎᒃ ᓴᕿᑎᑦᑎᕙᓪᓕᐊᓂᕐᒥᒃ ᐊᒻᒪᓗ ᐱᓕᕆᐊᕆᓇᔭᖅᑕᖏᓐᓂᒃ ᐃᓄᐃᑦ ᒐᕙᒪᖓ ᓄᓇᕕᒃᒥᑦ ᑐᙵᕕᖃᕐᓗᓂ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ, ᐱᖃᖅᑎᐅᓂᕐᒥᒃ, ᓇᓗᓇᐃᒃᑯᓯᕐᓂᒃ, ᐃᓕᖁᓯᑐᖃᕐᒥᑦ ᐊᒻᒪ ᐅᖃᐅᓯᕐᒥᑦ.

“ᓂᕆᐅᖕᒪᕆᒃᑐᖓ ᐱᒋᐊᕐᓂᐊᕐᓂᑦᑎᓐᓂᒃ ᐅᖃᓪᓚᑲᑕᓕᕈᑦᑕ ᐊᒻᒪ ᐋᔩᖃᑎᖃᑲᑕᖕᓂᕐᒥᒃ,” ᓴᐃᒪᓐ ᐅᖃᖅᑐᖅ, ᐊᑎᓕᐅᓚᐅᕐᑎᓪᓗᒋᑦ ᐆᒧᖓ MOU-ᒧᑦ.

ᑕᒪᒃᑯᐊ ᐋᔩᖃᑎᒌᒍᑎᐅᓂᐊᕐᑐᑦ ᐱᓕᕆᐊᖃᓗᐊᕐᓂᐊᖅᑐᑦ ᐱᓕᕆᐊᖑᔪᒪᔪᓂᒃ, ᓴᐃᒪᓐ ᐅᖃᒃᑲᓐᓂᕐᑐᖅ, ᐊᕕᒃᑐᕐᓯᒪᓗᑎᒃ ᐊᔾᔨᒌᙱᑦᑐᓄᑦ ᐅᖃᐅᓯᐅᓂᐊᕐᑐᓄᑦ.

“ᐊᖏᖃᑎᒌᓚᐅᕋᑦᑕ ᓄᓇᓖᑦ ᐊᒻᒪ ᐃᓚᒌᖑᔪᑦ ᖃᓄᐃᖁᓇᒋᑦ ᐱᓕᕆᔾᔪᑎᐅᓛᖑᓂᐊᕐᑐᑦ ᐅᑯᐊ ᓄᓇᕕᒃᒥᑦ ᐃᓄᐃᑦ ᐃᑲᔪᖅᑕᐅᔪᓐᓇᖁᓪᓗᒋᑦ ᐋᓐᓂᐊᖃᖅᑕᐃᓕᓂᒃᑯᑦ ᐊᒻᒪ ᐃᓄᓕᕆᓂᒃᑯᑦ ᑕᒪᐃᓐᓂ ᑲᓇᑕᒥᐅᑕ ᓂᕆᐅᒋᓯᒪᔭᖓᒍᑦ ᐊᒻᒪᓗ ᐱᕙᓪᓕᐊᔪᓕᕆᓂᒃᑯᑦ ᐱᕕᖃᕈᑦᓇᓕᕐᓗᑎᒃ ᐱᔭᕆᐊᖃᒻᒪᕆᑕᑦᑎᓐᓂᒃ,” ᐅᖃᖅᑐ ᔫᓂ 19-ᒥᑦ ᑐᓴᒐᒃᓴᓕᐊᑎᒍᑦ.

ᑖᒃᑯᐊ ᒪᑭᕕᒃᑯᑦ ᐋᕿᒃᓯᓯᒪᓕᖕᓂᖏᓐᓂᒃ MOU-ᒥᑦ ᐋᑐᕙᒥᑦ, ᑭᖑᓪᓕᕐᒥᑦ ᐱᓕᕆᐊᒃᓴᕆᓂᐊᕐᑕᖓᓕ ᑕᐃᒪᓐᓇᑦᑕᐃᓐᓇ ᐊᖏᕈᑎᓕᐅᕐᓗᑎᒃ ᑯᐸᐃᒃ ᒐᕙᒪᒃᑯᖏᓐᓂᒃ.

ᓴᐃᒪᓐ ᐅᖃᓚᐅᕐᓯᒪᖕᒪᓐ ᑕᖅᑭᐅᓚᐅᕐᑐᒥᒃ ᐅᑯᐊ ᓄᓇᕕᒃ ᐃᓄᖏᑦ ᒐᕙᒪᒃᑯᓐᓂᑦ ᐱᔪᒪᓯᒪᙱᓐᓂᕋᖅᖢᓂᒋᑦ ᑭᓱᑐᐃᓐᓇᓂ, ᑭᓯᐊᓂᓕ ᐋᔩᖃᑎᖃᕈᒪᓪᓗᑎᒃ “ᐅᑎᖅᑎᑦᑎᔪᒪᓪᓗᑎᒃ ᐱᔪᓐᓇᐅᑎᒋᔭᐅᓚᐅᕐᑐᓂᒃ ᐱᔭᐅᑐᐃᓐᓇᕐᓂᑯᓂᒃ” ᑕᒫᙵᑦ.

ᐱᓕᕆᔨᐅᓂᐊᕐᑐᑦ ᐱᓕᕆᕙᓪᓕᐊᔪᑦ ᐋᕿᒃᓱᐃᕙᓪᓕᐊᓪᓗᑎᒃ ᑎᑎᖃᓂᒃ ᓄᓇᕕᒃ ᐃᓄᐃᑦ ᒐᕙᒪᖓᑕ ᒪᓕᒐᕐᔪᐊᕆᓂᐊᕐᑕᖓᓂᒃ, ᑖᓐᓇᓗ ᓴᖅᑭᑕᐅᓛᖅᖢᓂ ᑲᑐᔾᔨᖃᑎᒌᓕᒫᑦ ᑲᑎᒪᓕᖅᐸᑕ ᐅᑭᐊᒃᓵᖅ.

ᒐᕙᒪᑐᖃᒃᑯᑦ ᒫᓐᓇ ᐱᓕᕆᖃᑎᖃᑲᑕᒃᑯᑦ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓂᒃ ᐅᕙᓂ 80 ᐃᓕᓴᕆᓯᒪᓂᖅ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐱᔪᓇᕐᓂᖏᓐᓂᒃ ᐅᖃᓪᓚᖃᑎᖃᑲᑕᒃᑐᓂᒃ ᑲᓇᑕᓕᒫᒥᑦ, ᑐᕌᒐᖃᖅᖢᑎᒃ “ᓄᑖᓂᒃ ᖃᓄᐃᓕᐅᕈᑎᒃᓴᓂᒃ ᕿᓂᕐᓗᑎᒃ ᐱᓕᕆᖃᑎᒌᒍᑎᐅᓂᐊᕐᑐᓂᒃ ᐃᓕᓴᕆᔭᐅᔾᔪᑎᐅᓇᔭᖅᑐᓂᒃ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐱᓇᓱᒍᒪᓂᖏᑦᑎᒍᑦ,” CIRNA ᐅᖃᓚᐅᕐᑐᑦ.