ᓄᓇᕕᒃ ᐱᕗᑦ $124 ᒥᓕᐊᓐᓂ ᐱᐅᓂᖅᓴᐅᔪᒥ ᖁᑦᑎᒃᑐᒥ−ᓱᒃᑲᓂᖓᓂ ᖃᕋᓴᐅᔭᒃᑰᕈᓐᓇᕐᓂᕐᒥ

ᓄᓇᕕᒃ ᐱᓂᐊᖅᐳᖅ $123.9 ᒥᓕᐊᓐᓂ ᐱᐅᓯᒋᐊᖅᑐᒥ ᖁᑦᑎᒃᑐᒥ−ᓱᒃᑲᓂᖓᓂ ᖃᕋᓴᐅᔭᒃᑰᕈᓐᓇᕐᓂᕐᒥ ᐱᔨᑦᑎᕋᕐᓂᐅᔪᒧᑦ, ᑮᓇᐅᔭᓂ ᐅᕙᙶᖅᑐᒥ ᒐᕙᒪᑐᖃᒃᑯᓐᓂ ᐊᒻᒪ ᑯᐸᐃᒃ ᒐᕙᒪᖏᓐᓂ ᐊᒻᒪ ᑲᑎᕕᖕᒥ ᐊᕕᒃᑐᖅᓯᒪᓂᐅᔪᒥ ᒐᕙᒪᐅᔪᓂ.

ᑮᓇᐅᔭᖃᖅᑎᑕᐅᓂᐅᔪᖅ ᐅᖃᐅᓯᐅᓚᐅᖅᐳᖅ ᔫᓂ 21−ᒥ ᖃᕋᓴᐅᔭᑎᒍᑦ ᑐᓴᒐᒃᓴᓕᐊᖑᔪᒥ ᒐᕙᒪᑐᖃᒃᑯᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᑎᑎᕋᖅᑎᖓ ᓄᓇᓕᖕᓂ ᑮᓴᐅᔾᔭᒃᓴᓂᐅᔪᒧᑦ ᐱᕙᓪᓕᐊᑎᑕᐅᓂᖓᓂ ᔅᑎᕚᓐ ᓚᐅᓴᓐ ᐊᒻᒪ ᑯᐸᐃᖕᒥ ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᒥ ᒥᓂᔅᑕᖓ ᐄᐊᓐ ᓚᕗᕆᓂᐅᕐ.

ᑲᑎᕕᖕᒥ ᐊᕕᒃᑐᖅᓯᒪᓂᐅᔪᒥ ᒐᕙᒪᐅᔪᓂ ᐃᒃᓯᕙᐅᑕᖓᑕ-ᑐᖓᓕᖓ ᓘᓯ ᑯᒪᕐᓗᒃ ᐊᒻᒪ ᑖᓐ ᐱᓕᕆᓐ, ᑐᓴᐅᒪᑎᑦᑎᔾᔪᑎᓂ ᐅᖃᐅᔾᔨᔨᐅᔪᒥ ᑲᑎᕕᖕᒥ ᐊᕕᒃᑐᖅᓯᒪᓂᐅᔪᒥ ᒐᕙᒪᐅᔪᓄᑦ ᐊᒻᒪ ᑕᒫᓂ, ᐅᖃᓪᓚᓚᐅᕆᕗᑦ ᐱᓕᕆᐊᒃᓴᐅᔪᒥ.

ᒫᓐᓇᐅᔪᒥ, ᖃᕋᓴᐅᔭᒃᑰᕈᓐᓇᕐᓂᕐᒥ ᑐᓂᓯᔨᐅᔪᑦ ᑕᒫᓂᒃᑯᑦ ᕙᐃᐸ ᐋᑉᑎᒃ ᑲᓱᖃᑎᒌᒃᓯᒪᔪᓄᑦ ᕿᑎᐊᓃᑉᐳᖅ ᓄᓇᕕᐅᑉ ᐊᑦᑎᖕᓂᖅᓴᐅᔪᒥ ᑲᖏᖅᓱᐊᓘᑉ ᓄᓇᓕᖏᓐᓂ, ᐃᓚᖃᖅᑐᒥ ᐅᐊᐸᒪᒎᔅᑐᐃ, ᑰᔾᔪᐊᕌᐱᒃ, ᐅᒥᐅᔭᖅ, ᐃᓄᒃᔪᐊᖅ ᐊᒻᒪ ᐳᕕᕐᓂᖅᑑᒥ. ᑲᓱᖅᓯᒪᕗᖅ ᐄᔭᐅ ᐋᔩᖃᑎᒌᖕᓂᐅᔪᒥ ᑲᓱᖃᑎᒌᒃᓯᒪᔪᓄᑦ ᓯᓴᓯᐱᒥ.

ᓚᕗᕆᓂᐅᕐ ᐅᖃᓚᐅᖅᐳᖅ ᑮᓇᐅᔭᑦ ᐅᓄᕐᓂᖅᓴᐅᔪᓂ ᐅᐊᖕᓇᒥ ᓄᓇᕕᖕᒥ ᓄᓇᓕᐅᔪᓂ ᑲᓱᖃᑎᖃᕐᓂᖓᓂ ᑲᓱᖃᑎᒌᒃᓯᒪᔪᓄᑦ. ᐅᖃᓚᐅᖅᐳᖅ ᐃᓚᖏᑦ ᐊᑐᖅᑕᐅᓂᐊᖅᐳᑦ ᓄᑖᙳᕆᐊᖅᑎᑦᑎᓂᕐᒥ ᖃᕋᓴᐅᔭᒃᑰᕈᑕᐅᔪᓂ ᐱᔨᑦᑎᕋᕐᓂᕐᒥ ᑰᓪᔪᐊᕐᒥ ᐊᒻᒪ ᐅᖓᕙ ᑲᖏᖅᖢᖓᓂ ᓯᒡᔭᖅᐸᓯᖓᓂ.

ᓚᕗᕆᓂᐅᕐ ᐅᖃᓚᐅᖅᐳᖅ ᑕᐃᒪᑐᖅ ᑕᒪᓐᓇ ᐊᔪᕐᓇᕈᓐᓃᖅᑎᑦᑎᓂᐊᕐᓂᖓᓂ ᓄᓇᕗᒻᒥᐅᓂ ᐊᑐᕐᓂᕐᒥ ᖃᕋᓴᐅᔭᒃᑰᕈᑕᐅᔪᒥ ᖃᕋᓴᐅᔭᑎᒍᑦ ᐱᓪᓚᕆᐅᔪᓄᑦ ᐱᔨᑦᑎᖃᕐᓂᐅᔪᓄᑦ, ᐊᒻᒪᓗ ᑕᐃᒪᓐᓇᑎᒋ ᓱᒃᑲᓂᐅᔪᒥ ᐃᓄᖕᓂ ᖃᓪᓗᓈᑦ ᓄᓇᖓᓐᓂᕐᒥᐅᑕᐅᔪᑎᑐᑦ.

“ᑕᑯᓚᐅᖅᐳᖓ ᓇᖕᒥᓂᖅ ᐃᔨᓪᓗᑦ ᖃᓄᖅ ᐱᒻᒪᕆᐅᓂᖓᓂ ᐅᖃᐅᓯᖃᕐᓂᐅᔪᒥ ᐃᓕᓐᓂᐊᕐᓂᓕᕆᓂᕐᒥ, ᐅᖃᐅᓯᐅᔪᓂ ᒪᓕᒐᓕᕆᓂᕐᒥ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒥ,” ᐅᖃᓚᐅᖅᐳᖅ, ᐅᖃᓪᓚᒃᖢᓂ ᑕᒪᒃᑭᓂ ᖃᓪᓗᓈᑎᑐᑦ ᐊᒻᒪ ᐅᐃᕖᑎᑐᑦ.

“ᖃᐅᔨᒪᕗᖓ ᐅᓇ ᐅᖃᐅᓯᒃᓴᓕᐊᖑᔪᖅ ᐅᓪᓗᒥ ᐊᓯᔾᔩᓂᐊᖅᐳᖅ ᐱᐅᓂᖓᓂ ᐃᓅᓯᐅᔪᒥ ᐃᓄᖕᓄᑦ ᓄᓇᕕᖕᒥ.”

ᑯᒪᕐᓗᒃ ᐅᖃᓚᐅᖅᐳᖅ ᓄᑖᙳᕆᐊᖅᑎᑕᐅᓂᐅᔪᖅ ᑐᙵᓱᒃᑎᑕᐅᓂᐊᖅᐳᖅ ᓄᓇᕕᖕᒥᐅᓂ. ᐅᖃᓚᐅᖅᐳᖅ ᐱᐅᓂᖅᓴᐅᔪᒥ ᖃᕋᓴᐅᔭᒃᑰᕈᑕᐅᔪᒥ ᑭᐅᓂᐊᖅᐳᖅ ᐱᕈᖅᐸᓪᓕᐊᔪᒥ ᐱᔪᒪᓂᐅᔪᒥ ᖃᕋᓴᐅᔭᑎᒍᑦ ᐱᔨᑦᑎᕋᕐᓂᐅᔪᒥ ᐊᕕᒃᑐᖅᓯᒪᓂᐅᔪᒥ, ᐊᒻᒪ ᐊᔪᕐᓇᙱᑎᑦᑎᓗᓂ ᐃᒡᓗᖁᑕᐅᔪᓂ ᑲᓱᖃᑎᒌᒃᓯᒪᔪᓄᑦ ᐃᑲᔪᖅᓱᐃᓂᕐᒥ ᑲᓱᖃᑎᖃᕐᓂᕐᒥ ᖃᔅᓯᒐᓚᖕᓂ ᐱᓕᕆᔾᔪᑕᐅᔪᓄᑦ.

“ᑲᑎᕕᖕᒥ ᐊᕕᒃᑐᖅᓯᒪᓂᐅᔪᒥ ᒐᕙᒪᐅᔪᓂ ᖁᔭᓕᕗᑦ ᓇᓗᓇᐅᖅᑕᐅᓂᖓᓂ ᑮᓇᐅᔭᑎᒍᑦ ᐃᑲᔪᖅᓱᐃᓂᐅᔪᒥ ᒥᒃᖠᒋᐊᖅᑎᑦᑎᓂᕐᒥ ᖃᕋᓴᐅᔭᑎᒍᑦ ᐊᕕᒃᓯᒪᓂᐅᔪᒥ ᐊᕕᒃᑐᐃᓲᒥ ᓄᓇᕕᖕᒥ ᐊᒥᐊᒃᑯᖓᓂ ᑲᓇᑕᓕᒫᒥ,” ᐅᖃᓚᐅᖅᐳᖅ.

“ᐊᑐᐃᓐᓇᖃᕐᓂᕐᒥ ᖁᑦᑎᒃᑐᒥ−ᓱᒃᑲᓂᖓᓂ ᖃᕋᓴᐅᔭᒃᑰᕈᓐᓇᕐᓂᕐᒥ ᐊᒡᕕᐊᕈᑎᖃᓪᓗᐊᙱᓚᖅ ᐅᖓᓯᖕᓂᐅᔪᒥ ᓄᓇᓕᖕᓂ, ᐊᒻᒪ ᖁᕕᐊᑉᐳᒍᑦ ᖃᖓᑭᐊᖅ ᓇᓕᒧᑦᑐᒥ ᐊᑐᐃᓐᓇᖃᕐᓂᕐᒥ ᑕᒪᒃᑭᓄᑦ 14−ᖑᔪᓄᑦ ᓄᓇᕕᖕᒥ ᓄᓇᓕᐅᔪᓂ.”

ᐱᓂᕐᒥ ᓇᓕᒧᑦᑐᒥ ᐊᑐᐃᓐᓇᖃᕐᓂᕐᒥ ᓄᓇᕕᓕᒫᒥ ᐊᑯᓂᐅᔪᒥ ᐱᓕᕆᓂᖃᕐᓂᐊᖅᐳᖅ. ᐱᓕᕆᓐ ᐅᖃᓚᐅᖅᐳᖅ ᐊᕐᕌᒍᓪᓗᐊᓂ ᐱᖓᓱᓂ ᑕᐃᒪᐃᑦᑐᓐᓇᕐᓂᐊᕐᓂᖓᓂ.

ᐅᖃᓚᐅᖅᐳᖅ ᐊᑦᑎᖕᓂᖅᓴᐅᔪᒥ ᑲᖏᖅᓱᐊᓗᖕᒥ ᓯᒡᔭᖅᐸᓯᖓᓂ ᓄᓇᓕᐅᔪᑦ ᓯᕗᓪᓕᐅᓂᐊᖅᐳᑦ ᑲᓱᖃᑎᖃᕐᓂᐅᔪᒥ. ᐊᕐᕌᓂ, ᐱᓕᕆᓂᖃᕐᓂᐊᖅᐳᑦ ᐊᑯᓕᕕᖕᒥ, ᐃᕗᒡᕕᒃ ᐊᒻᒪ ᓴᓪᓗᐃᓂᑦ ᑲᓱᖃᑎᒌᖕᓂᐅᔪᒥ.

ᐱᓕᕆᐊᖑᕙᓪᓕᐊᔪᓂ ᑐᓂᓯᓂᐅᔪᒥ ᐊᑲᐅᙱᓕᐅᕈᑕᐅᔪᓂ ᑰᔾᔪᐊᕐᒥ ᐊᒻᒪ ᐊᒥᐊᒃᑯᖏᓐᓂ ᓄᓇᓕᐅᔪᓂ ᐱᒋᐊᕐᓂᐊᖅᐳᖅ 2024−ᒥ.

“ᒥᑭᑦᑐᒥ ᓯᓐᓇᒃᑑᒪᓂᓐᓂ ᓄᓇᕐᔪᐊᒥ, ᐱᔭᕇᖅᑕᐅᖁᓇᔭᖅᐸᕋ ᖃᐅᒃᐸᑦ ᑭᓯᐊᓂ ᑕᐃᒪᐃᔾᔮᙱᓚᖅ,” ᐱᓕᕆᓐ ᐅᖃᓚᐅᖅᐳᖅ. “ᓇᓗᓇᐃᖅᓯᒪᔪᒥ ᖃᖓᐅᓂᐊᕐᓂᖓᓂ ᐅᖃᐅᓯᖃᖅᓯᒪᙱᓚᒍᑦ, ᑭᓯᐊᓂ ᐱᔭᕇᖅᑕᐅᔪᓐᓇᖅᐳᖅ 2025−ᒥ ᑕᒪᓐᓇ ᐱᔪᒥᓇᑦᑎᐊᖅᐳᖅ.”