ᓄᓇᕕᒃ ᓇᖕᒥᓂᖅ ᒐᕙᒪᑐᖃᑎᒍᑦ ᒪᓕᒐᓕᕆᔨᖃᕆᐊᖃᖅᑐᖅ, ᐅᖃᖅᑐᖅ ᒪᑭᕕᒃᑯᑦ ᐊᖓᔪᖅᑳᖓᑦ

ᒪᑭᕕᒃᑯᑦ ᐊᖓᔪᖅᑳᖓᑦ ᓵᓕ ᕗᐊᑦ ᐅᖃᐅᓯᕆᓚᐅᕐᑕᒥᓂᒃ ᓱᖁᓯᕈᑎᖃᓚᐅᙱᓚᖅ ᓄᓇᕕᒃ ᒪᓕᒐᓕᕆᓂᒃᑯᑦ ᓇᓃᓐᓂᖓᓂᒃ ᖁᕕᐊᓲᑎᖃᕐᓂᕐᒥ ᑐᓴᖅᑎᑦᑎᑎᓪᓗᒍ ᑕᒪᐅᖓ ᒪᓕᒐᓕᐅᖅᑎᐅᓂᐊᓕᖅᑐᒧ, ᓯᐊᕕ ᐸᕉᐱᒥᒧᑦ.

“ᓂᕈᐊᕐᓂᕐᒧᑦ ᓄᓇᐃᑦ ᓇᓗᓇᐃᒃᑯᑎᖏᓐᓄᑦ ᑲᒥᓴᓐᑯᓐᓂᒃ ᖃᐅᔨᓇᓱᖕᓂᐊᖅᑐᒍᑦ ᑕᒪᓐᓇ ᑐᑭᓯᔭᐅᒃᑲᓐᓂᖁᓪᓗᒍ, ᐃᒪᓐᓇ, ᓄᓇᕕᒃ ᓇᖕᒥᓂ ᒐᕙᒪᓕᕆᔨᖃᓕᕐᓗᑎ ᐅᕙᒍᑦ ᓄᓇᑦᑎᓐᓄᑦ ᑐᕌᖓᔪᓂᒃ, ᒫᓐᓇ ᑕᐃᒪᐃᖁᔨᓗᐊᕐᓇᖅᑐᖅ ᐃᓱᒪᒋᓪᓗᒍ ᓇᖕᒥᓂᖅ ᐱᓇᓱᒍᓐᓇᕐᓂᕐᒧᑦ ᐱᓕᕆᐊᕆᔭᑦᑎᓐᓄᑦ,” ᐅᖃᖅᑐᖅ. “ᑕᒪᓐᓇ ᐱᔭᕆᐊᖃᕋᑦᑎᒍᑦ ᐳᕌᕕᓐᓯᑎᒎᖓᓂᒃᑯᑦ.”

ᐊᐱᑎᐱ-ᔭᐃᒻᔅ ᐸᐃ-ᓄᓇᕕᒃ-ᐄᔫ ᐊᖏᓂᖅᐹᖑᔪᖅ ᒐᕙᒪᑐᖃᒃᑯᓐᓂᒃ ᒐᕙᒪᓕᕆᓂᕐᒧᑦ ᐱᓕᕆᐊᖑᔪᓂᒃ ᑯᐸᐃᒃᒥᓐ, ᐱᒋᐊᕐᓯᒪᓪᓗᓂ ᓄᓇᕕᒃ ᓂᒋᐊᓂᒃ ᒪᐅᖓ ᓚ ᕚᓕ-ᑎ-ᐅᐊ ᓄᓇᖅᐸᓯᐊᓄᑦ ᓄᓇᓕᖕᓄᑦ, ᑕᒫᓂᓕ ᑎᓴᒪᒃ 6-ᓂᒃ 2019-ᒥ ᒐᕙᒪᑐᖃᒃᑯᓐᓄᑦ ᓂᕈᐊᒐᒃᓴᐅᔪᑦ ᓄᓇᖃᖅᑐᑦ, ᐃᓚᐅᓪᓗᓂ ᐸᕉᐱ ᐅᑯᓄᖓ ᐸᓛᒃ ᑯᐸᑯᐊᒧᑦ.

ᓄᓇᕕᒃᒥᑦ ᓯᕗᓕᐅᕐᑎᐅᔪᑦ ᓇᖕᒥᓂᖅ ᒐᕙᒪᖃᕈᒪᓯᒪᕗᑦ ᓄᓇᖓᓄᑦ 1972-ᒥ ᐱᒋᐊᖅᖢᑎᒃ.

2002-ᒥ, ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐃᓚᐅᓪᓗᑎᒃ ᒪᑭᕕᒃᑯᑦ ᒐᕙᒪᑐᖃᒃᑯᑦ ᓂᕈᐊᕐᕕᐅᔪᓐᓇᖅᑐᓄᑦ ᐊᕕᒃᑐᖅᓯᒪᓂᕐᒧᑦ ᑲᒥᓴᓐᒧᐊᓚᐅᕐᓯᒪᔪᑦ ᑖᔅᓱᒥᖓ ᐱᔾᔪᑎᖃᖅᖢᑎᒃ ᐊᒻᒪ ᐅᐸᒍᑎᒃᑲᓐᓂᖅᖢᑎᒃ 2011-ᒥ. ᑕᐃᒪᙵᓪᓕ ᐊᕕᒃᓯᒪᔭᐅᓂᖓ ᐊᖏᒡᓕᒋᐊᖅᑕᐅᓚᐅᕐᓯᒪᔪᖅ 2013-ᒥ, ᐃᓚᓯᒋᐊᖅᖢᑎᒃ ᒪᕐᕉᖕᓂ ᓄᓇᓖᖕᓂ ᓂᒋᕐᒦᓐᓂᕐᓴᓂᒃ.

ᐊᕕᒃᑐᕐᓯᒪᓂᐅᔪᑦ ᑎᑎᕋᐅᔭᖅᑕᐅᒃᑲᓐᓂᓚᐅᕐᑐᑦ, ᐅᑯᑎᒎᓇᕐᓕ ᑲᒥᓴᓐᑯᑎᒍᑦ, ᑕᐃᒪᓐᓇ ᐃᓄᐃᑦ ᐅᓄᕐᓂᖏᑦ ᓇᓕᒧᒌᒃᑎᑕᐅᓇᓱᒃᖢᑎᒃ. ᑯᐸᐃᓕᒫᒥᑦ, ᐃᒪᐃᓕᖓᔪᑦ 100,000-ᖑᓪᓗᑎᒃ ᐃᓄᐃᑦ ᐊᕕᒃᑐᕐᓯᒪᓂᒃᑯᑦ, ᐅᑯᐊᓕ ᐊᐱᑎᐱ-ᔭᐃᒻᔅ-ᓄᓇᕕᒃ-ᐄᔫ ᑐᖔᓃᖢᓂ ᒫᓂ 85,000-ᖑᓪᓗᑎ ᐃᓄᖏᑦ.

ᓄᓇᕕᒃ ᐃᓄᒋᐊᕐᓂᖓ ᒫᓃᑎᓪᓗᒍ 13,000-ᓂ, ᓄᓇᕕᒃ ᐊᑖᓃᓗᐊᕐᓯᒪᔪᖅ, ᑭᓯᐊᓂᓕ ᓯᕗᓕᐅᖅᑎᖏᑦ ᑕᒪᑐᒧᖓ ᑭᐅᓘᑎᒍᑎᖃᕐᓯᒪᔪᑦ ᑕᒫᓂ ᓄᓇᕕᒃᒥ ᐃᒻᒥᒃᑯᑦ ᐃᓅᖃᑎᒌᖕᓂᖏᓐᓂᒃ.

ᒥᑭᓐᓂᖅᐹᕐᓕ ᒐᕙᒪᑐᖃᒃᑯᓐᓂ ᒐᕙᒪᖃᕐᕕᐅᔪᖅ ᐅᓇ ᓛᐸᑐᐊ, ᒫᓂ ᐃᓄᖃᖅᖢᓂ 26,000-ᖏᓐᓂᒃ, ᐅᓇᓕ ᓂᐅᕙᐅᓐᓛᓐᒧᑦ ᐃᓄᖃᖅᑎᓪᓗᒍ ᒫᓂ 80,000-ᖏᓐᓂᒃ.

ᐸᕉᐱ ᓵᓚᒃᓴᓚᐅᕐᑐᖅ ᑯᐸᐃᒃ ᐅᐊᖕᓇᖓᓄᑦ, ᓂᕈᐊᕆᔭᐅᓪᓗᓂ 11,000 ᐅᖓᑖᓂ, ᐅᕝᕙᓘᓐᓃᑦ 40 ᐳᓴᓐᑎᒥᑦ, ᑭᖑᓂᑦᑎᐊᖓᓃᓘᑎᒃ ᓕᐳᕈᑯᓐᓄᑦ ᐊᒻᒪ ᑲᓐᓲᕕᑎᕝᑯᓐᓄᑦ ᓂᕈᐊᒐᒃᓴᐅᔪᑦ.

ᕗᐊᑦ ᖁᕕᐊᓱᒍᑎᖃᕐᓂᕋᓚᐅᕐᑐᖅ ᒍᕇᓐ ᐹᑎᒧᑦ ᓂᕈᐊᒐᒃᓴᒥᑦ ᑭᐊᕋ ᑲᐹᓇ-ᐅᐊᐃᑦᓕ, ᐃᓄᒃ ᑰᔾᔪᐊᕐᒥᐅᑕᖅ, ᑖᓐᓇ ᑕᓪᓕᒪᒋᔭᐅᓚᕐᑐᖅ ᓂᕈᐊᖅᑕᐅᓪᓗᓂ 1,000 ᐅᖓᑖᓂᑦ.

ᐅᖃᓪᓚᒃᑎᓪᓗᒍ ᕗᐊᑦ, ᑐᙵᓱᒃᑎᑦᑎᓚᐅᕐᑐᖅ ᐸᕉᐱᒥ ᓄᓇᕕᒃᒧᑦ ᐳᓛᕐᓂᐊᖁᓪᓗᓂᐅᒃ ᐊᔪᕈᓐᓃᑐᐊᕈᓂ.

“ᓂᕆᐅᒃᐳᖓ ᑲᑎᖃᑎᒌᖕᓂᐊᕐᓂᑦᑎᓐᓂᒃ, ᐊᒻᒪ ᐃᑲᔪᖅᑐᐃᓂᖓ ᓇᖕᒥᓂᖅ ᐱᔪᒪᓂᕐᒧᑦ ᐱᓕᕆᐊᖃᖅᑎᓪᓗᑕ ᖁᕕᐊᒋᒻᒪᕆᒃᖢᒍ, ᐊᒻᒪᓗ ᒪᑯᓄᖓ ᐃᓱᒫᓘᑎᓂᒃ ᐆᑐᓇᖅ ᐊᑐᓕᖅᑎᑦᑎᓂᕐᒥ ᔫᓇᐃᑕᑦ ᓇᐃᓴᓐᑯᑦ ᐱᖁᔭᖓᓂ ᐱᔪᓐᓇᐅᑎᖃᕐᓂᖏᑦ ᓄᓇᖃᖅᑳᖅᑐᑦ,” ᕗᐊᑦ ᐅᖃᖅᑐᖅ.

ᑐᓴᒐᒃᓴᖃᒻᒪᕆᓚᐅᕐᑐᖅ ᐸᓛᒃ ᑯᐸᑯᐊᒧ ᐊᖓᔪᖅᑳᒧᑦ ᐄᕝᔅ-ᕗᕌᓐᓱᐊ ᐸᓛᓐᓴᑦᒧᑦ, ᑖᒃᑯᐊ ᐊᕕᒐᓱᖕᓂᕐᒧᑦ ᐹᑎᐅᔪᑦ ᓵᓚᒃᓴᓚᐅᖅᖢᑎᒃ 32-ᓂ ᐃᒃᓯᕙᐅᑕᓂᒃ ᑯᐸᐃᒃᒧᑦ.

“ᓂᕆᐅᒃᐳᒍᓪᓕ ᐅᕙᑦᑎᓐᓂ ᐃᑲᔪᖅᑐᐃᓂᐊᕐᓂᕐᓂ ᐱᕙᓪᓕᐊᓂᕐᒧᑦ ᐱᓕᕆᐊᒃᓴᑦᑎᓐᓂᒃ ᓄᓇᕕᒃᒥᑦ—ᐅᑯᑎᒎᓇᖅ ᒪᓕᒐᓕᕆᓂᒃᑯᑦ ᐊᒻᒪ ᑮᓇᐅᔭᓕᐅᕋᓱᖕᓂᒃᑯᑦ—ᐊᒻᒪᓗ ᒪᓕᒐᓕᕆᓂᒃᑯᑦ ᐋᖅᑭᒃᓯᔪᓐᓇᕐᓗᑕ ᓈᒻᒪᒃᑐᒃᑯᑦ ᐱᓕᕆᖃᑎᒌᖕᓂᕐᒥᑦ,” ᐅᖃᖅᑐᖅ ᕗᐊᑦ.

“ᑭᓯᐊᓂᓕ, ᑯᐸᐃᒃ ᐃᒻᒥᒃᑰᕈᒪᓂᖓᒍᑦ, ᐃᓄᐃᑦ ᐊᑯᓂᐊᓗᒃ ᐃᑲᔪᕐᓯᒪᖕᒪᑕ ᑲᓇᑕᒥᑦ ᑲᑎᓯᒪᔪᒥᑦ.”

ᕗᐊᑦ ᐋᖅᑭᒃᓯᓚᐅᕐᑐᖅ ᓂᕈᐊᕐᓇᐅᓚᐅᕐᑐᒥᑦ, ᑖᒃᑯᓂᖓ ᓕᐳᕈᑯᓐᓂᒃ ᐃᒃᓯᕙᐅᑕᖃᐅᙱᑲᓗᐊᖅᖢᑎᒃ ᒐᕙᒪᐅᓕᕐᑐᓂᒃ, ᐱᕕᖃᕈᑎᒋᔪᒪᓪᓗᓂᐅᒃ ᐊᔾᔨᒌᙱᑦᑐ ᐹᑎᐅᕙᒃᑐ ᑲᑎᑎᓪᓗᒋᑦ ᐊᒻᒪ ᑲᓇᑕᒥᐅᑕ ᑲᑎᖃᑎᒌᒡᓗᑎᒃ.

“ᔭᔅᑎ ᑐᕉᑑ ᓴᙱᔪᒥ ᒐᕙᒪᖃᕐᒪᑦ ᐃᒃᓯᕙᐅᑕᖃᐅᙱᑲᓗᐊᑐᒥ, ᐊᒻᒪᓗ ᐱᓕᕆᖃᑎᖃᕈᓐᓇᖅᖢᓂ ᐊᓯᖏᓐᓂᒃ ᐹᑎᓂ (ᒐᕙᒪᓕᕆᔨᓂᒃ)—ᐊᓐᑏᐲᑯᑦ, ᐸᓛᒃ ᑯᐸᑯᐊ, ᒍᕇᓐ, ᑲᓐᓲᕕᑎᕝᑯᓐᓂᒃ ᐊᒻᒪᓗ ᐃᒻᒥᒃᑯᑦ ᓂᕈᐊᒐᒃᓴᓂᒃ—ᐊᓂᒍᐃᑎᑦᑎᓂᐊᕐᓂᒃᑯᑦ ᒪᓕᒐᕐᓂᒃ ᐊᒻᒪ ᒪᓕᒐᓕᕆᕕᒡᔪᐊᒧᑦ ᓴᖅᑭᑎᓪᓗᒋᑦ, ᐊᒻᒪ ᐱᓕᕆᕙᓪᓕᐊᓂᖓᒍᑦ ᑲᑎᖃᑎᒌᒃᑎᑦᑎᕙᓪᓕᐊᓗᓂ,” ᐅᖃᖅᑐᖅ.

ᓄᓇᕗᒧᓪᓕ ᓂᕈᐊᖅᑕᐅᔪᒧᑦ ᐊᓐᑏᐲᒃᑯᓐᓄᑦ ᒪᓕᒐᓕᐅᖅᑎᐅᓂᐊᓕᖅᑐᒥ, ᒪᒥᓛᖅ ᖃᖅᑲᖅᒥ ᖃᒪᓂᑦᑐᐊᕐᒥᐅᑕᖅ, ᓂᕆᐅᓇᖅᑐᓂᒃ ᐅᖃᐅᓯᖃᓚᐅᕐᑐᖅ.

“ᐃᖅᑲᐅᒪᕗᖓ ᑐᙵᕕᒃᑯᑦ ᑲᑎᒪᑎᓪᓗᒋ ᖃᒪᓂᑦᑐᐊᒥ 1871-ᖑᑎᓪᓗᒍ ᑕᒑᖅ ᑰᓕᓗ,” ᕗᐊᑦ ᐅᖃᖅᑐᖅ. “ᑕᐃᔅᓱᒪᓂ ᒪᒃᑯᒃᑑᑎᐅᓚᐅᕐᓯᒪᒐᑦᑕ. ᐱᓕᕆᑦᑎᐊᕐᓂᐊᕐᑐᑦ, ᒪᒥᓛᖅ, ᐊᒻᒪ ᓂᕆᐅᒃᐳᖓ ᐃᓕᖕᓂ ᑕᑯᓂᐊᕐᓂᓐᓂᒃ ᐊᒻᒪ ᐱᓕᕆᖃᑎᒋᓂᐊᕐᓂᓐᓂᒃ ᒪᑯᓂᖓ ᐃᓄᐃᑦ ᓇᖕᒥᓂᖅ ᐱᓇᓱᐊᕐᕋᓱᖕᓂᖏᓐᓂᒃ ᐊᑕᐅᑦᑎᒃᑯᑦ, ᑭᖑᕚᖑᓂᐊᕐᑐᓄᑦ.”