ᓄᓇᕕᒻᒥ ᕿᓚᓗᒐᕋᓱᖕᓂᖅ ᒪᑐᐃᕐᐳᖅ, ᑭᓯᐊᓂᓕ ᓄᑖᓂ ᐸᕐᓇᐅᑎᖃᙱᑦᑐᑦ 2021-ᒧᑦ
“ᓈᒻᒪᓪᓚᕆᒍᓐᓈᔾᔮᙱᑦᑐᖅ, ᑭᓯᐊᓂᓕ ᑕᐃᒪᐃᑉᐸᓪᓕᐊᓇᓱᒃᑐᖅ”
“ᐅᐱᕐᙶᖑᓕᕐᑐᖅ—ᕿᓚᓗᒐᐃᑦ ᖃᓂᓈᑲᑕᓕᕐᒪᑕ ᐃᓄᐃᓪᓗ ᐊᖑᓇᓱᒍᒪᓪᓗᑎᒃ,” — ᑖᒥ ᐹᓕᓱ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ
For an English version of this story, see Nunavik’s beluga harvest is open, but a new plan won’t come until 2021
ᓄᓇᕕᒻᒥ ᐅᐱᕐᙶᒃᑯᑦ ᕿᓚᓗᒐᕋᓱᖕᓂᖅ ᐱᒋᐊᖅᑐᖅ, ᑭᓯᐊᓂᓕ ᓄᑖᒥ ᑕᒪᑐᒧᖓ ᐊᐅᓚᑦᑎᒍᑎᒃᓴᓂ ᓴᖅᑭᑦᑐᖃᔾᔮᙱᑦᑐᖅ ᑭᓯᐊᓂ ᐊᕐᕌᒍᙳᖅᐸᑦ.
ᐋᑕᒥ ᑎᓚᐃᐅᓪ ᐊᓚᑯ, ᒪᑭᕕᒃᑯᑦ ᐊᕙᑎᓕᕆᓂᕐᒧᑦ, ᐆᒪᔪᓕᕆᓂᕐᒧᑦ ᐊᒻᒪ ᖃᐅᔨᓴᕐᓂᕐᒧᑦ ᐊᖓᔪᖅᑳᑉ ᑐᒡᓕᖓ, ᐅᖃᓪᓚᓚᐅᕐᑐᖅ ᔭᓄᐊᕆ 2020-ᒥᑦ ᕿᓚᓗᒐᕐᓂ ᐊᐅᓚᑦᑎᓂᕐᒧᑦ ᑲᑎᒪᓂᕐᒥᑦ. (ᐊᔾᔨᓕᐅᕆᔨ ᐃᓚᐃᓐ ᐋᓐᓱᒥ)
ᒪᐃ 15-ᒥᑦ, ᒐᕙᒪᑐᖃᒃᑯᑦ ᐃᒪᕐᒥᐅᑕᓕᕆᔨᖏᑦ ᐊᑎᓕᐅᓚᐅᕐᒪᑕ ᐊᑐᖅᑕᐅᓚᐅᑲᖕᓂᐊᖅᑐᒥᑦ, ᐅᖓᕙᕆᐊᖅᑎᑦᑎᒍᑎᒥ ᑭᖑᓪᓕᖅᐹᓂ ᐸᕐᓇᐅᑎᓂᒃ—ᑖᓐᓇ ᐃᓱᖃᓚᐅᕐᒪᑦ ᔭᓄᐊᕆᒥ—ᓄᑖᓂ ᐸᕐᓇᐅᑎᓂᒃ ᐊᖏᖅᑕᐅᔪᖃᓚᐅᙱᓐᓂᖓᓂᒃ ᑖᓐᓇᓗ 2021 ᑎᑭᓪᓗᒍ ᐱᓕᕆᐊᖑᓇᔭᖅᑐᒃᓴᐅᓪᓗᓂ.
ᓄᓇᕕᒻᒥ ᐅᑯᐊ ᕿᓚᓗᒐᕋᓱᒍᓐᓇᕐᓯᔪᑦ: ᑕᓯᐅᔭᕐᔪᐊᑉ ᑲᓇᖕᓇᖓᓂᒃ, ᑕᓯᐅᔭᕐᔪᐊᑉ ᑲᓇᖕᓇᖓᑦ ᐅᐊᖕᓇᖓᓂᒃ, ᐋᑐᕚ ᕿᑭᖅᑕᓂᒃ, ᑕᓯᐅᔭᕐᔪᐊᑉ ᑲᖏᖅᖢᐊᓂᒃ, ᐅᖓᕙ ᐸᐃᒥ, ᓛᖕ ᐊᐅᓚᓐᒥᑦ ᐊᒻᒪ ᔭᐃᒻᔅ ᐸᐃᒥ.
ᐅᕘᓇᓕ ᓄᓇᕕᒃ 2017-20ᒧᑦ ᕿᓚᓗᒐᕋᓱᖕᓂᕐᒧᑦ ᐊᐅᓚᑦᑎᒍᑎᓂᒃ, ᓄᓇᕕᒻᒥᐅᑦ ᕿᓚᓗᒐᕈᓐᓇᖅᑐᑦ ᒫᓂ 200-ᓂ ᑕᓯᐅᔭᕐᔪᐊᑉ ᑲᓇᖕᓇᖓᓃᑦᑐᓂᒃ—ᐅᓄᕈᓐᓃᕐᓯᒪᓂᖏᓐᓄᑦ ᐅᓗᕆᐊᓇᖅᑐᒦᓐᓂᕋᖅᑕᐅᓚᐅᕐᓯᒪᔪᑦ ᑖᒃᑯᐊ ᐸᕐᓇᐅᑎ ᐋᖅᑭᒃᓱᖅᑕᐅᕙᓪᓕᐊᑎᓪᓗᒋᑦ ᑭᓯᐊᓂᓕ ᐅᓄᙱᓗᐊᕐᓂᖏᑦ ᐅᓗᕆᐊᓇᕈᓐᓃᕐᓯᒪᓕᕐᑐᑦ.
ᑕᕝᕘᓇ ᐱᑐᐃᓐᓇᐅᓗᐊᙱᑦᑐᒃᑯᑦ ᖃᓄᐃᓕᐅᕈᑎᑎᒍᑦ, ᕿᓚᓗᒐᖅᑕᐅᔪᖅ ᑕᒪᑐᒪ ᓯᓚᑖᒍᑦ ᓇᓗᓇᐃᖅᑕᐅᕙᓚᐅᕐᑐᑦ ᓇᑭᙶᕈᓯᖓᒍᑦ, ᑭᓯᐊᓂᓕ ᐊᓯᐊᒎᖓᒋᓪᓗᓂ.
ᐊᖑᓇᓱᒃᑎᑦ ᓄᑖᓂᒃ ᐅᑕᖅᑭᒐᓗᐊᖅᑎᓪᓗᒋᑦ ᐸᕐᓇᐅᑎᓂᒃ—ᐸᕐᓇᐅᑎ ᐃᓄᖕᓂ ᓂᐱᖃᖅᑎᑦᑎᒃᑲᓐᓂᕈᓐᓇᖅᑎᑦᑎᔪᖅ—ᑖᒥ ᐹᓕᓱ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ, ᐅᖃᓚᐅᕐᑐᖅ ᒫᓐᓇᓕ ᑐᕌᒐᕆᔭᐅᔪᖅ ᓄᓇᕕᒻᒥᐅᑦ ᐃᓄᐃᑦ ᐊᖑᓇᓱᒍᓐᓇᑦᑎᐊᕐᓕᕐᓗᑎᒃ.
“ᐃᓱᒪᔪᒍᓪᓕ ᒫᓐᓇ ᐊᑐᖅᑕᐅᔪᒃᓴᑦ ᐱᓯᒪᔭᑦᑎᓐᓅᖓᓗᓂ; ᐃᓱᒪᓚᐅᕋᑦᑕᓕ ᑕᕆᐅᕐᒥᐅᑕᓕᕆᔨᒃᑯᑦ ᐅᕙᑦᑎᓐᓂ ᑭᖑᕙᓗᐊᕐᓗᑎᒃ ᑭᐅᓂᐊᕋᓱᒋᓪᓗᑎᒍᑦ,” ᐹᓕᓱ ᐅᖃᖅᑐᖅ, ᐅᖃᐅᓯᖃᖅᖢᓂ ᐊᐅᓚᑦᑎᓂᖅ ᑭᖑᕙᕐᓯᒪᔭᕆᐊᒃᓴᖓᓂᒃ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ-19.
“ᐅᐱᕐᙶᖑᓕᕐᒪᑦ—ᕿᓚᓗᒐᐃᓪᓗ ᐊᖅᑯᓵᑲᑕᓕᕐᖢᑎᒃ ᐊᒻᒪᓗ ᐃᓄᐃᑦ ᐊᖑᓇᓱᒍᒪᓪᓗᑎᒃ,” ᐅᖃᖅᑐᖅ. “ᖁᕕᐊᓱᒃᐳᒍ ᐊᑐᖅᑕᐅᓚᐅᑲᓐᓂᐊᖅᑐᑦ ᐊᐅᓚᑦᑎᒍᑎ ᐋᖅᑭᒃᑕᐅᓂᖏᓐᓂᒃ ᐊᖑᓇᓱᒍᓐᓇᕐᓂᐊᕋᑦᑕ ᐸᕐᓇᐅᑎᑎᒎᖓᔪᒃᑯᑦ.”
ᓯᑯᐃᖅᐸᓪᓕᐊᓕᕐᑐᖅ ᑕᓯᐅᔭᕐᔪᐊᑉ ᓯᒡᔭᖏᑦ, ᐊᒻᒪᓗ ᒪᐃ ᐊᑯᓐᓂᖓᓃᑎᓪᓗᒍ ᕿᓚᒥᐅᓂᕐᓴᐅᓪᓗᓂ ᑕᒫᓂ. ᐊᓄᕌᕐᔪᐊᑲᑕᖕᓂᕐᒧᑦ ᓯᑯᐃᑦ ᓂᒋᕐᒧᐊᖅᐸᓪᓕᐊᖕᒪᑕ ᑕᐃᒪᓐᓇᓗ ᑲᖏᖅᖢᒃ ᐃᒪᖃᓂᖃᐅᓕᖅᖢᓂ.
ᕿᓚᓗᒐᕐᓂ ᑕᑯᔪᖃᕐᓯᒫᓂᓕᕐᑐᖅ ᐃᓄᒃᔪᐊᑉ ᐅᐊᖕᓇᖓᓂᒃ, ᐹᓕᓱ ᐅᖃᖅᑐᖅ, ᑕᒪᐅᓇᓗ ᐊᐅᔭᕐᓯᐅᕐᕕᒋᓂᐊᖅᑕᖏᓐᓄᙵᐅᕙᓪᓕᐊᖃᑦᑕᖅᖢᑎᒃ.
ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᑐᓂᓯᓂᐊᕈᒪᔪᑦ ᐊᐅᓚᑦᑎᔾᔪᑎᒃᓴᓄ ᐸᕐᓇᐅᑎᒃᓴᓂᒃ ᑕᒪᑐᒪᓂ ᐱᓇᓱᐊᕈᓯᕐᒥ, ᐊᒻᒪ ᒐᕙᒪᑐᖃᒃᑯᑦ ᑕᕆᐅᕐᒥᐅᑕᓕᕆᔨᖏ ᑭᐅᔭᕆᐊᖃᕐᓂᐊᖅᖢᑎᒃ ᐅᓪᓗ 60 ᐃᓗᐊᓂ. ᐹᓕᓱ ᓴᖅᑭᑎᑦᑎᓚᐅᙱᑦᑐᖅ ᖃᓄᐃᓕᖓᓂᖏᓐᓂᒃ ᑖᒃᑯᐊ ᓄᑖᑦ ᐸᕐᓇᐅᑎᑦ ᑭᓯᐊᓂᓕ ᐅᖃᕈᓐᓇᓚᐅᕐᑐᖅ “ᐱᕙᓪᓕᐊᒍᑎᑦ.”
ᐸᕐᓇᐅᑎᐅᔪᖅ ᐋᖅᑭᒃᑕᐅᓯᒪᓇᓱᒃᑐᑦ ᐅᖃᐅᓯᐅᓂᑯᓂᒃ ᑲᑐᔾᔨᖃᑎᒌᑦ ᑲᑎᒪᑎᓪᓗᒋ ᔭᓄᐊᕆ 2020 ᑐᓴᖅᑎᑦᑎᓂᕐᒧᑦ ᑲᑎᒪᓂᖓᓂᒃ, ᑕᕝᕙᓂᓗ ᒪᑭᕕᒃᑯᑦ ᐊᒻᒪ ᐊᓯᖏᑦ ᑲᑐᔾᔨᖃᑎᒌᖑᔪᑦ ᐅᖃᓚᐅᕐᑐᑦ ᑕᑯᔪᒪᓂᕋᖅᖢᑎᒃ ᑕᕆᐅᕐᒥᐅᑕᓕᕆᔨᒃᑯᑦ ᖃᔅᓯᓂᒃ ᕿᓚᓗᒐᕈᓐᓇᕐᓂᖏᓐᓂᒃ ᐋᖅᑭᒃᓯᒪᓂᖓᑦ ᐊᓯᙳᕐᑕᐅᓗᓂ ᓂᕈᐊᕐᓂᕐᓴᐅᓕᕐᓗᑎᒃ ᐃᓄᖕᓄᑦ ᐊᐅᓚᑕᐅᔪᓂᒃ ᐱᓕᕆᔾᔪᓯᕐᓂᒃ.
ᐅᑯᓄᖓᓂ ᒐᕙᒪᑐᖃᒃᑯᑦ ᑕᕆᐅᕐᒥᐅᑕᓕᕆᔨᖏᓐᓄᑦ, ᒫᓐᓇᐅᔪᖅ ᖃᓄᐃᓕᐅᕈᓯᖅ ᑲᔪᓯᖁᓪᓗᒍ ᐊᕐᕌᒍᒃᑲᓐᓃᖕᓂ ᒪᕐᕉᖕᓂᒃ, ᑕᐃᒪᓐᓇ ᐊᓯᙳᖅᑎᑦᑎᕙᓪᓕᐊᒍᓐᓇᕐᓂᐊᕐᒪᑕ ᓄᑖᓂ ᐱᓕᕆᔾᔪᓯᕐᓂᒃ ᐋᖅᑭᒃᓱᖅᑕᐅᔪᓂᒃ.
“ᐅᓇ ᐱᓕᕆᐊᖃᕐᓇᕐᒪᑦ ᓇᓕᒧᒌᒃᑎᑦᑎᒐᓱᖕᓂᕐᒥᒃ ᒐᕙᒪᑐᖃᒃᑯᑦ ᑕᕆᐅᕐᒥᐅᑕᓕᕆᔨᖏᑦᑕ ᖃᐅᔨᓴᕐᓂᒃᑯᑦ ᐱᓕᕆᔾᔪᓯᖏᓐᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦᑎᒎᖓᔪᓂᒃ,” ᐹᓕᓱ ᐅᖃᖅᑐᖅ. “ᐱᓕᕆᐊᖃᕋᓱᒃᑲᑦᑕ ᑕᒪᐃᓐᓄᑦ ᓈᒻᒪᒋᔭᐅᔪᒃᑰᕋᓱᒃᖢᑕ. ᓈᒻᒪᓪᓚᕆᒍᓐᓈᔾᔮᙱᑦᑐᖅ, ᑭᓯᐊᓂᓕ ᑕᐃᒪᐃᑉᐸᓪᓕᐊᓇᓱᒃᑐᖅ.”
ᐋᖅᑭᒃᓱᐃᕙᓪᓕᐊᑎᓪᓗᒋᑦ ᓄᑖᓂᒃ ᐸᕐᓇᐅᑎᒃᓴᓂᒃ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏ ᐱᓕᕆᖃᑎᖃᖃᑦᑕᖅᑐᑦ ᒐᕙᒪᑐᖃᒃᑯᑦ ᑕᕆᐅᕐᒥᐅᑕᓕᕆᔨᖏᓐᓂᒃ ᖃᔅᓯᓂᒃ ᕿᓚᓗᒐᕈᓐᓇᕐᓂᕐᒥᑦ (TAT).
ᓄᓇᕕᒻᒥ ᐆᒪᔪᓕᕆᔩᑦ ᑲᑐᔾᔨᖃᑎᒌᖓ (RNUK) ᐋᖅᑭᒃᓱᐃᓕᖃᑦᑕᖅᑐᑦ ᓄᓇᓖᑦ ᐊᑐᓂ ᖃᔅᓯᓂ ᕿᓚᓗᒐᕈᓐᓇᕐᒪᖔᖏᓐᓂᒃ.
(0) Comments