ᓄᓇᕗᑦᒥᑦ ᐋᓂᐊᕕᒃ ᒥᑭᓛᒃᑯᑦ ᐱᔨᑦᑎᕋᖅᐳᑦ

ᑕᒪᓐᓇᓕ ᑕᐃᒪᐃᓕᓵᙱᑦᑐᖅ ᖃᒪᓂᑦᑐᐊᕐᒥᐅᓄᑦ, ᑕᕝᕙᓂ ᐋᓐᓂᐊᕕᒃ ᐊᒥᒐᖅᓰᓐᓇᕐᒪᑕ ᐋᓐᓂᐊᓯᐅᕐᑎᓂᒃ, ᐃᖅᑲᓇᐃᔭᖅᑐᓂᒃ ᐃᓂᖃᑦᑎᐊᙱᑦᑐᒥᒃ ᐊᒻᒪ ᓄᑕᐅᔪᓐᓃᕐᓯᒪᓪᓚᕆᒃᑐᒥᑦ.

ᑭᓯᐊᓂᓕ ᓄᓇᖃᖅᑐᑦ ᐅᖃᕐᓯᒪᔪᑦ ᐋᓐᓂᐊᕕᒃ ᒪᕐᕉᖕᓂ ᐋᓐᓂᐊᓯᐅᖅᑎᖃᕐᓯᒪᓂᖓᓂᑦ ᑕᕿᒐᓴᐅᓕᕐᑐᓂᒃ—ᑕᕝᕙᓂ ᖁᓕᐅᓪᓗᐊᖅᖢᑎᒃ—ᑕᐃᒪᐃᓐᓂᖓᓄᓪᓗ ᐋᓐᓂᐅᓯᐅᖅᑎᑦ ᒥᑭᓛᒃᑯᑦ ᐱᓕᕆᐊᖃᖅᖢᑎᒃ.

“ᒫᓐᓇ ᐊᒃᓱᕈᕐᓇᖅᑐᒦᓐᓇᑦᑕ ᖃᒪᓂᑦᑐᐊᕐᒥᑦ,” ᐅᖃᖅᑐᖅ ᓄᓇᓕᖕᓄᑦ ᒪᓕᒐᓕᐅᕐᑎ, ᓯᒥᐅᓐ ᒥᑭᙳᐊᒃ.

“ᐊᒥᓲᙱᓗᐊᕈᔾᔨᓂᖅ ᐊᕐᕌᒍᓂᒃ ᐱᖓᓱᓂᒃ ᑕᐃᒪᐃᓕᕐᑐᖅ. ᐊᒻᒪᓗ ᑐᐊᕕᕐᓇᖅᑐᓂᑐᐃᓐᓇᖅ ᐱᓕᕆᐊᖃᕐᓯᒪᓕᖅᖢᑕ ᐱᓇᓱᐊᕈᓯᕐᓂᒃ ᑕᓪᓕᒪᓂᒃ ᐊᕐᕕᓂᓕᖕᓂᓪᓘᓐᓃᑦ,” ᐅᖃᖅᑐᖅ.

“ᐅᓪᓗᒥ ᐅᖄᓚᒍᕕᑦ ᓯᐅᑏᑦ ᐃᒡᒋᐊᓪᓘᓐᓃᑦ ᓈᒻᒪᙱᓐᓂᖓᓄᑦ, ᑕᑯᔭᐅᓇᔭᖅᑐᒃᓴᐅᕗᑎᑦ ᐅᓪᓗᓂᒃ ᐱᖓᓱᓂᒃ ᑎᓴᒪᓂᒡᓘᓐᓃᑦ.”

ᑕᒪᓐᓇ ᓈᒻᒪᙱᓕᐅᕈᑎᐅᖕᒪᑦ ᐅᑭᐅᖑᔪᖅ, ᓄᓇᓖᑦ ᑭᕙᓪᓕᕐᒥᑦ ᐳᕙᖏᑦᑎᒍᑦ ᐋᓐᓂᐊᖃᑲᑕᖕᓂᕐᓴᐅᑎᓪᓗᒋᑦ.

ᑭᓯᐊᓂᓕ ᒥᑭᙳᐊᒃ ᐅᖃᓚᐅᕐᑐᖅ ᐋᓐᓂᐊᕕᖕᒧᐊᕈᓐᓇᖏᓐᓂᖅ ᓈᒻᒪᙱᓕᐅᕈᑎᐅᒻᒪᕆᖕᓂᖓᓂᒃ ᓄᓇᓕᖕᓄᑦ 2,000-ᓂ ᐃᓄᖃᖅᑐᓂᒃ, ᐱᓇᓱᐊᕈᓯᑦ ᐱᖓᓱᑦ ᐃᓗᐊᓂ ᐱᖓᓱᓂᒃ ᐃᒻᒥᓃᖅᑐᖃᕐᓯᒪᓪᓗᓂ.

2018-ᒥᑦ, ᒥᑭᙳᐊᒃ ᐅᖃᓚᐅᕐᑐᖅ ᓄᓇᓖᑦ ᐋᖕᓕᑲᓐᑯᑦ ᑐᒃᓯᐊᕐᕕᖓ 50-ᓂᒃ ᐃᓗᕕᕐᓯᐅᕐᓯᒪᔪᑦ ᖃᒪᓂᑦᑐᐊᕐᒥ ᐃᓅᔪᓐᓃᕐᓯᒪᔪᓂᒃ ᐊᔾᔨᒌᖏᑦᑐᓄᑦ.

ᐊᒻᒪᓗ ᑲᒪᒋᔭᐅᔭᕆᐊᖃᕐᓂᖅ ᐱᓂᕐᓴᒻᒪᕆᐅᓕᖅᖢᓂ, ᐅᓇ ᒪᑐᔭᐅᓚᐅᕐᑎᓪᓗᒍ ᖃᒪᓂᑦᑐᐊᕐᒥᑦ ᒫᑕ ᑕᓕᕈᖅ ᐃᒡᓗ, ᐃᓐᓇᑐᖃᐃᑦ ᐅᐸᒡᕕᖓᑦ ᒪᑐᓚᐅᕐᓯᒪᖕᒪᑦ ᐊᕐᕌᓂᐅᓚᐅᕐᑐᖅ.

ᐋᓐᓂᐊᕕᒃ ᐊᓯᐅᔨᔭᐅᑲᓴᓚᐅᕐᓯᒪᔪᖅ ᑎᓯᐱᕆᒥᑦ, ᑖᓐᓇ ᐃᑭᓕᕋᓗᐊᖅᑎᓪᓗᒍ ᐱᖁᑎᖃᕐᕕᖏᓐᓂᒃ, ᐊᒻᒪᓗ ᐃᓄᖏᑦ ᐊᓂᑦᑕᕆᐊᖃᓕᖅᖢᑎᒃ ᐅᓐᓄᐊᒃᑯᑦ. ᐋᓐᓂᐊᕕᒃ ᐳᔪᕐᒧᑦ ᐱᐅᔪᓐᓃᕈᔪᓚᐅᕐᑐᖅ ᐊᒻᒪ ᒪᑐᐃᖅᑕᐅᒃᑲᓐᓂᖅᖢᓂ ᖃᐅᒃᐸᙳᖅᑎᓪᓗᒍ.

ᐃᖅᑲᓇᐃᔭᖅᑎᑦ ᐊᒥᓲᙱᓗᐊᕐᓂᖏᓐᓄᑦ ᐊᐱᕆᔭᐅᑎᓪᓗᒋᑦ, ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᐅᖃᓚᐅᕐᑐᑦ 7-ᓂ ᐃᓄᖃᕐᓂᕋᐃᓪᓗᑎ ᖁᓕᐅᔭᕆᐊᖃᖅᑎᓪᓗᒋᑦ ᖃᒪᓂᑦᑐᐊᕐᒥᑦ-6 ᐃᖅᑲᓇᐃᔭᖅᖢᓂ ᐊᒻᒪ ᐊᑕᐅᓯᖅ ᐃᖅᑲᓇᐃᔭᓚᐅᑲᒃᐸᒃᖢᓂ.

ᑳᓖᓐ ᐋᔅᑕᓐ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᑲᔪᖅᑎᖓ ᒥᓂᔅᑕᐅᑉ ᑐᒡᓕᖓᓄᑦ, ᐅᖃᓚᐅᕐᑐᖅ ᒪᕐᕉᖕᓂᑦ ᐃᓱᒪᓕᕆᓂᕐᒧᑦ ᐋᓐᓂᐊᓯᐅᖅᑎᑕᖃᓚᐅᕐᓂᖓᓂᒃ ᐱᓇᓱᐊᕈᓯᐅᓚᐅᕐᑐᒥᒃ, ᐱᖓᔪᖓᑦ ᑎᑭᓪᓗᐊᖅᖢᓂ ᔭᓄᐊᕆ 17-ᒥᑦ.

“ᐋᓐᓂᐊᓯᐅᖅᑎᓂᒃ ᐊᒥᒐᖅᓯᓂᖅᑕᖃᕐᒪᑦ ᑲᓇᑕᒥ ᐊᒻᒪ ᓄᓇᕗᒥᑦ ᐊᒃᑐᐃᒍᑎᐅᓯᒪᓪᓗᓂ ᓇᓃᓐᓂᖏᓐᓄᑦ, ᑮᓇᐅᔭᑲᓪᓚᖕᓂᒃ ᐊᑐᖃᑦᑕᕆᐊᖃᕐᓂᕐᒧᑦ ᐃᓅᓇᓱᖕᓂᕐᒧᑦ ᐊᒻᒪ ᐃᒡᓗᒃᓴᖃᙱᓐᓂᖓᓄᑦ,” ᐋᔅᑎᓐ ᐅᖃᓚᐅᕐᑐᖅ ᔭᓄᐊᕆ 17-ᒥ ᐅᖃᐅᓯᒃᓴᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

“ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᐅᔨᒪᔫᒐᓗᐊᑦ ᐊᒥᒐᖅᓯᑲᑕᒃᑐᓂᒃ ᐱᔨᑦᑎᕋᐅᑎᓕᕆᓂᒃᑯᑦ, ᐊᒻᒪᓗ ᐃᖅᑲᓇᐃᔭᖅᑎᒃᓴᓂ ᐱᓇᓱᐊᕐᓯᒪᓪᓗᑎᒃ.”

ᐱᓕᕆᐊᖃᕋᓱᖕᓂᖅ ᐃᓚᖃᖅᑐᖅ ᐃᖅᑲᓇᐃᔭᓕᖅᑎᑦᑎᒐᓱᖕᓂᕐᒥᑦ ᐊᒻᒪ ᐊᑯᓂᐊᓗᒃ ᐃᖅᑲᓇᐃᔭᕋᔭᖅᑐᓂᒃ ᐱᓇᓱᐊᕐᓂᕐᒥᑦ ᐊᒻᒪᓗ ᖃᓄᖅ ᑕᒫᓃᑎᑦᑎᒃᑲᓐᓂᕈᓐᓇᕐᓂᕐᒥᑦ ᐃᓱᒪᒋᓪᓗᒋ ᐃᖅᑲᓇᐃᔭᖅᑎᐅᔪᑦ ᒫᓐᓇ, ᐅᖃᖅᑐᖅ.

ᑭᓯᐊᓂᓕ ᒥᑭᙳᐊᒃ ᐅᖃᓚᐅᕐᑐᖅ ᓄᓇᓖ ᐱᑖᕆᐊᖃᕐᓂᖏᓐᓂᒃ ᓈᒻᒪᒃᑐᓂᒃ ᑲᒪᒋᔭᖃᕈᓐᓇᖅᑐᓂᒃ.

“ᐃᓱᒪᒋᔭᒃᑯᓪᓕ, ᐃᓄᒋᐊᓕᖅᐸᓪᓕᐊᔪᖅ ᓄᓇᓖ ᖃᓂᒋᔭᖃᖅᖢᑎᒃ ᒎᓗᓯᐅᕐᕕᒃᒥᑦ. ᐅᓇ ᐋᓐᓂᐊᕕᒃ ᐃᖅᑲᓗᓇᐃᔭᖅᑎᖃᑦᑎᐊᕆᐊᖃᕐᒪᑦ,” ᐅᖃᖅᑐᖅ.

“ᑕᑯᓪᓗᒋ ᖄᓄᐃᑦᑕᐃᓕᒪᓂᖅ ᓄᓇᑦᑎᓐᓂᒃ, ᐊᒃᓱᕈᕈᑎᐅᓯᒪᕗᖅ.”

ᒥᑭᙳᐊᒃ ᐅᖃᓚᐅᕐᑐᖅ ᑖᓐᓇ ᐋᓐᓂᐊᕕᒃ ᒥᑭᓗᐊᕐᓂᖓᓂᒃ. ᐅᑕᖅᑭᕕᖓ ᑕᑕᓴᕋᐃᖢᓂ ᐊᒻᒪ ᐃᓚᖏᑦ ᑕᑯᔭᐅᔭᖅᑐᖅᑐᑦ ᐃᒡᓗᕈᓯᕐᒦᖃᑎᖃᕆᐊᖃᖅᐸᒃᖢᑎᒃ ᖃᐅᔨᓴᖅᑕᐅᓂᖏᓐᓂᒃ.

ᒪᓕᒐᓕᐅᕐᑎ ᐅᖃᓚᐅᕐᑐᖅ ᐊᔪᙱᓐᓂᕐᒥᒍᑦ ᐅᖃᕐᓯᒪᓂᕋᖅᖢᓂ ᓄᓇᕗᑦ ᒐᕙᒪᒃᑯᓐᓄᑦ ᓄᑖᒥᑦ ᐋᓐᓂᐊᕐᕕᖃᕆᐊᖃᕐᓂᖏᓐᓂᒃ, ᑭᓯᐊᓂᓕ ᖃᒪᓂᑦᑐᐊᖅ ᐅᑕᕿᖃᑕᐅᖕᒥᔪᖅ ᐊᓯᖏᓐᓂᒃ ᓄᓇᕗᒥᑦ ᓄᓇᓕᖕᓂᑦ ᐱᔭᕆᐊᖃᕐᒥᔪᓂᒃ.

ᒪᑐᕙᓪᓕᐊᔪᓂᑦ, ᖃᒪᓂᑦᑐᐊᕐᒥᐅᑕ ᐅᖃᖅᑐᑦ ᐋᓐᓂᐊᓯᐅᖅᑎᑦ ᑕᒫᓃᓐᓂᖏᓐᓂᒃ ᐱᔨᑦᑎᕋᐅᑎᓂᒃ ᑲᔪᓯᑎᑦᑎᓯᒪᓂᖏᓐᓂᒃ.

ᖃᒪᓂᑦᑐᐊᕐᒥᐅᑕᖅᑕᐅᖅ, ᐃᒻᒥᕐᓱᖅᑕᐅᑲᑕᒃᓯᒪᔪᖅ ᐋᓐᓂᐊᕕᒃᒥᑦ ᐅᓪᓗᖅ ᐱᖓᓱᐃᖅᑕᐅᕙᒃᖢᓂ, ᐅᖃᓚᐅᕐᑐᖅ ᑕᑯᔭᐅᑲᑕᖕᓂᖓᓂ ᓇᓪᓕᕌᖓᑦ ᑕᑯᔭᐅᕝᕕᒃᓴᖓ, ᑭᓯᐊᓂᓕ ᐃᓛᓐᓂᑦ ᐊᓯᐊᓂ ᐃᓄᖃᖅᐸᒃᖢᓂ ᖃᐅᔨᓴᖅᑕᐅᕝᕕᒋᔭᖓ.

“ᐅᕙᓐᓄᑦ ᐱᑦᑎᐊᑲᑕᒃᑐᑦ, ᐊᒥᒐᕐᓯᒐᓗᐊᖅᑎᓪᓗᒋᑦ ᐋᓐᓂᐊᓯᐅᖅᑎᓂᒃ,” ᐅᖃᖅᑐᖅ ᐊᖑᑎ ᑖᓐᓇᓗ ᑕᐃᔭᐅᔪᒪᓚᐅᙱᖢᓂ.

ᒪᕐᕉᑐᐃᓐᓇᐅᒐᓗᐊᖅᑎᓪᓗᒋᑦ ᐋᓐᓂᐊᓯᐅᕐᑏᒃ, ᒥᑭᙳᐊᒃ ᐅᖃᓚᐅᕐᑐᖅ ᖃᐅᒪᖃᑦᑕᐃᓐᓇᕐᓂᖓᓂᒃ ᐋᓐᓂᐊᕕᒃ ᐅᓐᓄᑕᒫᓐ.

“ᐅᒃᐱᕈᓱᒃᐳᖓ ᑕᖃᓯᒪᒻᒪᕆᒃᑐᑦ,” ᐅᖃᖅᑐᖅ. “ᑲᒪᓇᙱᓚᖅ ᐊᐅᓪᓚᖃᑦᑕᕐᓂᖏᑦ; ᓴᓇᕝᕕᖃᑎᐊᕆᐊᖃᕐᒪᑕ.”