ᓄᓇᕗᑦᒥ ᐊᒃᓱᕈᖅᑐᑦ ᐃᓄᖕᓂ ᐋᓐᓂᐊᖃᖅᑕᐃᓕᓂᕐᒥ ᐱᓕᕆᐊᖃᕋᔭᖅᑐᓂᒃ

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐱᓕᕆᖃᑎᖃᖅᖢᑎᒃ ᓄᓇᕗᑦ ᓯᕗᓂᒃᓴᕗᑦᒥ ᐋᑐᕚᒥ ᐅᑭᐅᖅ ᑐᓴᒐᒃᓴᓂᒃ ᑎᑎᕋᐅᓯᖃᕐᓂᕐᒥ ᐃᓕᓐᓂᐊᖅᑎᑦᑎᓚᐅᕐᒪᑕ ᓯᕗᓪᓕᕐᒥ ᐊᐃᑉᐸᖓᓂᒡᓗ ᐊᕐᕌᒍᒥ ᐃᓕᓐᓂᐊᖅᑐᓂᒃ. ᐃᓚᖏᑦ ᑐᓴᒐᒃᓴᓕᐅᖅᑎᕗᑦ ᐊᒻᒪ ᐋᕿᒃᓱᐃᔨᑦ ᐱᖓᑦᓯᐅᑉ ᐅᓐᓄᒃᓴᖓᓂ ᐱᓕᕆᖃᑎᖃᖃᑦᑕᖅᖢᑎᒃ ᐱᖓᓱᓂᒃ ᐃᓕᓐᓂᐊᖅᑐᓂᒃ, ᑖᒃᑯᐊ ᐃᑲᔪᓕᓚᐅᕐᒪᑕ ᐊᒻᒪ ᑐᓴᒐᒃᓴᓕᐅᖅᖢᑎ ᓇᖕᒥᓂᖅ ᑐᓴᒐᒃᓴᖏᓐᓂᒃ ᐊᒻᒪ ᐅᓂᒃᑲᐅᓯᖃᖅᖢᑎᒃ.

ᐋᑦ ᓴᑎᐊᓇ ᐃᖅᑲᐅᒪᔪᖅ ᓯᕗᓕᖅᐹᒥᑦ ᐋᓐᓂᐊᕕᖕᒥ ᑲᒪᒋᔭᐅᓕᖅᑎᓪᓗᒍ ᓄᓇᕗᒥᑦ ᐋᓐᓂᐊᖅᑐᓕᕆᔨᓄᑦ ᐃᖢᐊᖅᓴᓚᐅᕐᓯᒪᙱᓐᓂᕐᒥᓂᒃ.

“ᓯᕗᓪᓕᖅᐹᒥ ᑕᐃᒪᓐᓇ ᐃᒃᐱᒋᓚᐅᕐᓯᒪᔪᖓ 14-ᓂ ᐊᕐᕋᒍᖃᖅᖢᖓ ᐊᒻᒪᓗ ᐅᖃᓪᓚᒡᕕᖃᕈᒪᑐᐃᓐᓇᖅᖢᖓ ᑐᑭᓯᔪᓐᓇᖅᑐᒥ,” ᐅᖃᖅᑐᖅ ᓴᑎᐊᓇ ᐃᖅᑲᐅᒪᑎᓪᓗᒍ ᐋᓐᓂᐊᕕᖕᒥ ᑕᑯᔭᐅᕝᕕᒃᓴᖃᖅᖢᓂ ᐊᖏᕐᕋᖓᓂ ᑲᖏᖅᖠᓂᕐᒥ.

ᐃᓅᓱᒃᑑᓪᓗᓂᓘᓐᓃ, ᓴᑎᐊᓇ ᐃᓱᒪᓚᐅᕐᓯᒪᔪᖅ ᐋᓐᓂᐊᓯᐅᕐᑎ ᐊᒻᒪ ᓘᒃᑖᖅ ᑖᔅᓱᒥᖓ ᑕᑯᔪᐃᑦ ᓇᓗᓇᐃᕐᓯᒻᒪᕆᙱᖢᑎᒃ ᐋᓐᓂᐊᕆᔭᖓᓂᒃ ᐊᒻᒪᓗ ᖃᓄᖅ ᐱᓕᕆᐊᖑᔭᕆᐊᖃᕐᓂᖓᓂᒃ ᐅᖃᖅᖢᑎᒃ.

ᐃᓄᖕᓂ ᓘᒃᑖᖃᙱᖢᓂ ᓄᓇᕗᒥ ᐊᒻᒪᓗ ᐃᓄᐃᑦ ᐃᖢᐊᕐᓴᐃᔨᐅᔪᑦ ᐅᓄᙱᑦᑐᑯᓘᓪᓗᑎᒃ.

ᓴᑎᐊᓇ ᑕᒪᑐᒥᖓ ᐊᓯᙳᖅᑎᑦᑎᔪᒪᓕᓚᐅᕐᑐᖅ. ᒫᓐᓇ 23-ᖑᓕᖅᖢᓂ, ᐃᓕᓐᓂᐊᕆᐊᖃᑦᑕᖅᑐᖅ ᐋᓐᓂᐊᖃᖅᑕᐃᓕᓂᕐᒧᑦ ᐃᖅᑲᓇᐃᔮᒃᓴᓄᑦ ᐸᕐᓇᐅᑎᓄᑦ ᓯᓚᑦᑐᖅᓴᕐᔪᐊᕐᕕᖓᓂᒃ ᒫᓂᑑᐸᒥ, ᐊᒻᒪᓗ ᐊᕐᕌᒍ ᐃᓕᓐᓂᐊᓕᕈᒪᓪᓗᓂ ᐋᓐᓂᐊᖅᑐᓕᕆᓂᕐᒥ.”

“ᑕᑯᔭᐅᔪᒪᒻᒪᕆᓚᐅᕐᑐᖓ ᑭᓇᑐᐃᓐᓇᕐᒧᑦ ᑐᑭᓯᓯᒪᔪᒥᒃ ᐃᓅᓯᓐᓂᒃ, ᑭᖑᕚᑦᑕ ᖃᓄᐃᒍᓯᖏᓐᓂᒃ,” ᐅᖃᖅᑐᖅ. “ᑐᑭᓯᔪᓐᓇᖅᑐᒥᑦ ᐃᓅᖃᑎᒌᖕᓂᕐᒧᑦ ᑮᓇᐅᔭᓕᐅᕋᓱᖕᓂᕐᒧᑦ ᖃᓄᐃᓕᐅᕈᑎᐅᔪᑦ ᐋᓐᓂᐊᕐᓂᕐᒧ ᐱᒋᐊᕈᑎᐅᓕᔭᑦᑐᓂᒃ ᐅᑭᐅᕐᑕᖅᑐᕐᒥ.”

ᐅᓄᙱᑦᑐᑯᓗᖕᓂ ᐃᓅᓱᒃᑐᓂᒃ ᐃᓄᖕᓂ ᐃᓚᒋᔭᐅᓪᓗᓂ ᐋᓐᓂᐊᖅᑐᓕᕆᓂᕐᒧᑦ ᐸᕐᓇᐅᑎᓂᒃ ᐃᓕᓐᓂᐊᖅᑐᓂᒃ ᑲᓇᑕᒥ, ᑕᒪᓐᓇ ᐃᓱᒪᓕᐅᕆᓂᖅ ᓴᑎᐊᓇᒥ ᓯᕗᒧᑦ ᐱᓇᓱᒍᑎᒌᓐᓇᓚᐅᕐᑕᖓ ᐊᒻᒪᓗ ᒪᓕᒍᒥᓇᕈᒪᓪᓗᓂ ᐊᓯᖏᓐᓄ ᐃᓅᓱᒃᑐᓄᑦ ᓄᓇᕗᒻᒥᐅᓂᒃ.

ᒫᓐᓇ ᓄᓇᕗᑦ ᒐᕙᒪᒃᑯ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᐅᖃᖅᑐᑦ ᐅᓄᕐᓯᒋᐊᖅᑎᑦᑎᓂᖅ ᐃᓄᖕᓂ ᓄᓇᕗᑦ ᐋᓐᓂᐊᖃᕐᓇᙱᑦᑐᓕᕆᓂᖓᓄᑦ ᓯᕗᓪᓕᐅᔭᕆᐊᓕᒃ.

ᒫᓐᓇ, ᓇᑉᐸᓪᓗᐊᖏ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏ ᐃᓅᔪᑦ, ᐅᓄᖏᑦᑐᕈᓘᒐᓗᐊᑦ ᑲᒪᒋᔭᖃᓕᖄᕐᓂᕐᒥᒃ ᐱᓕᕆᐊᖃᖅᖢᑎᒃ.

“ᐅᒃᐱᕈᓱᒃᐳᒍᑦ ᐱᒻᒪᕆᐊᓘᓂᖓᓂ ᐅᓄᕐᓂᕐᓴᐃᑦ ᐃᓄᐃᑦ ᐃᖅᑲᓇᐃᔮᖃᓕᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ,” ᐅᖃᖅᑐᖅ ᔪᐊᓐ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᐅᓚᑦᑎᔨ ᐃᓄᖕᓂ ᐃᖅᑲᓇᐃᔮᖃᓕᖅᑎᑦᑎᓂᕐᒥᒃ. “ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔮᒃᓴᓂᒃ ᓴᕿᔮᖅᑎᑦᑎᓇᓱᐃᓐᓇᖃᑦᑕᖅᑐᒍᑦ.”

ᓕᐋᓇ ᕗᐃᐊᓴᓐ ᐊᐃᑉᐸᖓᓂ ᐊᕐᕌᒍᒥ ᐃᓕᓐᓂᐊᖅᑎ ᓄᓇᕗᑦ ᓯᕗᓂᒃᓴᕗᑦᒥ. ᐃᖃᓗᖕᓂ ᓄᓇᖃᖅᑐᖅ. (ᐊᔾᔨᙳᐊᒥᒃ ᑐᓂᓯᓂᑯ)

ᑕᐃᒪᐃᓕᐅᕐᓂᐊᕐᓗᓂ, ᐳᓛᑲᑕᒃᑐᖅ ᐃᓕᓐᓂᐊᕐᕕᐊᓗᐃᑦ ᐃᓕᓐᓂᐊᕐᕕᖏᓐᓄᑦ ᓄᓇᕗᒥᑦ, ᑐᓂᐅᖃᐃᕙᒃᖢᓂ ᐃᖅᑲᓇᐃᔮᒃᓴᓄᑦ ᐸᕐᓇᒍᑎᐅᔪᓐᓇᖅᑐᓂᒃ ᑐᑭᓯᑎᑦᑎᓯᒪᔪᓂᒃ ᐃᓕᓐᓂᐊᕐᑎᓄᑦ ᖃᓄᐃᑦᑐᓂᒃ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔮᒃᓴᓂᒃ ᕿᓂᕐᒪᖔᑕ ᐃᓕᓐᓂᐊᖅᑏᑦ ᐃᓕᓐᓂᐊᕌᓂᒃᑯᑎᒃ ᐃᓕᓐᓂᐊᒃᑲᓐᓂᕈᓐᓇᕋᔭᖅᑕᖏᓐᓂᒃ.

ᐃᓪᓚᐅᑦ ᐅᖃᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᓂᒻᒪᐃᓯᒪᓂᖏᓐᓂᒃ ᐊᔪᕈᓐᓃᕐᓴᕈᑎᐅᔪᓐᓇᖅᑐᓂᒃ ᐊᒻᒪ ᐃᖅᑲᓇᐃᔭᖅᑎᙳᓪᓚᕆᖕᓂᕐᒧᑦ ᐃᓕᓐᓂᐊᒐᒃᓴᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᐅᓚᑦᑎᓂᕐᒧᑦ ᐱᓕᕆᐊᖃᕈᒪᔪᓄᑦ.

“ᐱᒻᒪᕆᐊᓘᖕᒪ ᐃᓄᐃᑦ ᐱᕙᓪᓕᐊᓗᑎᒃ ᐃᖅᑲᓇᐃᔮᒃᑯ, ᐱᒋᐊᑐᐃᓐᓇᕋᓗᐊᕈᑎᒃ ᐊᐅᓚᑦᑎᓂᕐᒧᑦ ᐃᖅᑲᓇᐃᔮᒃᓴᓄᑦ ᐊᒻᒪᓗ ᑕᑯᔪᓐᓇᕐᓗᑎᒃ ᐊᐅᓚᑦᑎᓂᕐᓴᓂᒃ ᐃᖅᑲᓇᐃᔮᖃᕈᓐᓇᕐᓂᕐᒥᒃ ᐊᕐᕌᒍᓂ ᖃᓂᑦᑐᒃᑯᑦ,” ᐅᖃᖅᑐᖅ. “ᐃᓱᒪᒐᑦᑕ ᐱᒻᒪᕆᐊᓘᓂᖓᓂ ᑖᒃᑯᓄᖓ ᐃᓕᓐᓂᐊᕐᓯᒪᓗᑎᒃ ᐃᖅᑲᓇᐃᔮᖏᑦᑎᒍᑦ ᖁᕝᕙᖅᐸᓪᓕᐊᔪᓐᓇᖁᓪᓗᒋᑦ.”

ᑭᓯᐊᓂᓕ ᓄᓇᕗᒻᒥᐅᑦ ᐃᓕᓐᓂᐊᖅᑎᐅᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑐᓕᕆᓂᕐᒥᒃ ᐱᔭᒃᓴᖃᕈᓘᔭᕋᔭᖅᑐᑦ.

ᓴᑎᐊᓇ, ᐊᓂᒍᐃᓂᑯ ᒫᓂ ᐅᓗᔪᒃ ᐃᓕᓐᓂᐊᕐᕕᐊᓗᒃᒥ, ᐅᖃᓚᐅᕐᑐᖅ ᓄᓇᕗᑦ ᐃᓕᓐᓂᐊᖅᑎᑦᑎᒍᓯᖓ ᐃᑲᔪᓗᐊᓚᐅᙱᑦᑐᖅ ᐋᓐᓂᐊᖅᑐᓕᕆᓂᕐᒥ ᐃᓕᓐᓂᐊᕈᒪᑎᓪᓗᒍ.

“ᐃᓕᓐᓂᐊᕐᕕᐊᓗᖕᒦᖢᖓ, ᐃᓕᓐᓂᐊᓚᐅᕐᓯᒪᙱᑦᑐᒍᑦ ᐆᒪᔪᓕᕆᓂᕐᒥᒃ, ᖃᓄᐃᑉᐸᓪᓕᐊᒍᓯᕐᓂᒃ, ᐊᒻᒪ ᓇᐃᓴᐅᓯᕆᓂᕐᒥᒃ,” ᐅᖃᖅᑐᖅ.

“ᑕᐃᒪᓕ ᓯᕗᓕᖅᐹᒃ ᐊᕐᕌᒎᒃ ᔫᓂᕘᓯᑎᒥ, ᐃᓕᓐᓂᐊᕆᐊᖃᓚᐅᕐᓯᒪᔪᖓ ᐃᑲᕐᕋᓂᒃ 14-ᓂ 16-ᓄ ᐅᓪᓗᕐᒥ … ᐊᔪᕈᓐᓃᕈᓐᓇᕐᓂᐊᕋᒪ ᐱᓕᕆᐊᕆᓕᕈᒪᔭᓐᓄ.”

ᓴᑎᐊᓇ ᐃᓕᓐᓂᐊᕐᑎᐅᓂᕐᒥ ᐃᓅᓯᖃᓕᕋᓗᐊᖅᖢᓂ ᕗᐃᓂᐱᒡᒥ, ᓱᓕ ᖃᓄᐃᓕᐅᕆᐊᖃᕈᓘᔭᕐᓇᖅᑐᖅ.

ᓴᑎᐊᓇ ᒫᓐᓇ ᐃᖅᑲᓇᐃᔮᖃᖅᑐᖅ ᑕᑯᔭᐅᔭᕆᐊᓕᖕᓂ ᐊᐅᓚᑦᑎᔨᒧᑦ ᐃᑲᔪᖅᑎᐅᓪᓗᓂ ᑭᕙᓪᓕᖅᒥᑦ ᐋᓐᓂᐊᕕᒃᒥᑦ, ᖃᕋᓴᐅᔭᒃᑯᑦ ᐃᓕᓐᓂᐊᖅᐸᓪᓕᐊᕙᒃᖢᓂ.

ᑕᐃᑲᓂᓕ, ᓴᑎᐊᓇ ᖃᐅᔨᓚᐅᕐᑐᖅ ᐃᓚᖏᑦ ᐋᓐᓂᐊᖅᑐᑦ ᑲᒪᒋᔭᐅᔪᒪᑦᑎᐊᓚᐅᙱᓐᓂᖏᓐᓂᒃ ᐋᓐᓂᐊᕕᖕᒦᑎᓪᓗᒍ.

“ᑕᑯᔭᐅᖃᑦᑕᓚᐅᕋᒪ ᖃᖏᖅᖠᓂᕐᒥᐅᑕᐅᓂᓐᓂ ᐊᔪᕈᓐᓃᕐᓯᒪᓪᓚᕆᖕᓂᕐᒥᐅᙱᑦᑐᖅ,” ᐅᖃᖅᑐᖅ. “ᑕᒪᓐᓇ ᑕᐃᒪᓐᓇ ᑕᑯᔭᐅᓕᒪᙱᓗᐊᒧᑦ ᐊᒥᓱᓄᑦ. ᑕᐃᒪᓕ ᐊᔪᙱᓐᓂᓐᓂ ᓴᕿᑎᑦᑎᔭᕆᐊᖃᖃᑦᑕᓚᐅᕐᐳᖓ, ᑖᓐᓇᓗ ᐊᒃᓱᕈᕈᓘᔭᕐᓇᖅᖢᓂ.”

ᓴᑎᐊᓇ ᐃᓱᒪᒋᔭᐅᕈᓘᔭᕐᑐᖅ ᐊᓯᖏᓐᓂ, ᑖᓐᓇ ᐋᓐᓂᐊᖃᖅᑕᐃᓕᓂᕐᒧᑦ ᐸᕐᓇᒍᑎᓂᒃ ᐃᓕᓐᓂᐊᕐᑎ ᑲᒪᒋᔭᐅᖕᒥᔪᖅ ᒪᕐᕈᒃᑲᓐᓃᕐᓄ ᑲᓇᑕᒥ ᓯᓚᑦᑐᖅᓴᕐᕕᒡᔪᐊᓂᒃ ᐊᒻᒪ ᐊᑕᐅᓯᕐᒥ ᔫᓇᐃᑕᑦ ᓯᑕᐃᑦᔅᒥ, ᑖᒃᑯᐊᓗ ᑐᙵᓱᒃᑎᑦᑎᔪᐃᓐᓇᐅᓯᒪᓪᓗᑎᒃ ᐃᓕᓐᓂᐊᒐᒃᓴᖏᓐᓂ ᐃᓕᓐᓂᐊᖁᔨᓪᓗᑎᒃ ᓯᑎᐱᕆᐅᓕᕐᐸ.

ᐋᓐᓂᐊᖃᖅᑕᐃᓕᓂᓕᕆᓂᕐᒥ ᐃᓕᓐᓂᐊᕈᒪᖅᑳᕐᓯᒪᓂᖓᓄᑦ, ᓴᑎᐊᓇ ᐅᖃᓚᐅᕐᑐᖅ ᓄᓇᕗᒧᑦ ᐅᑎᓛᕈᒪᓪᓗᓂ ᓘᒃᑖᖑᓕᕐᓗᓂ, ᐱᓕᕆᐊᖃᕐᓂᕐᓴᐅᓗᓂ ᓱᕈᓯᓕᕆᓂᕐᒥᒃ.

ᑭᓯᐊᓂᓕ ᒫᓐᓇ ᖃᓄᐃᓕᖓᓂᖓᓄᑦ, ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᑦᑎᕙᙱᒻᒪᑕ ᓴᑎᐊᓇᐅᑉ ᐊᔪᕈᓐᓃᕐᓴᕐᓯᒪᔭᖓᓄᑦ, ᓱᕈᓯᓕᕆᓂᕐᒥ, ᑭᕙᓪᓕᕐᒥ. ᐅᓇᓕ ᓱᕈᓯᕐᓄᑦ ᑐᕌᖓᓗᐊᕐᑐᓄᑦ ᐋᓐᓂᐊᖅᑐᓕᕆᓂᕐᒥᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᑐᑦ ᒫᓐᓇ ᐃᖅᑲᓇᐃᔭᖅᑎᑦᑎᓂᖏᓐᓂᒃ ᒪᕐᕉᖕᓂ ᐊᒻᒪ ᐊᑕᐅᓯᕐᒥ ᐅᓪᓘ ᐃᓚᐃᓐᓇᖓᒍᑦ ᓱᕈᓯᓕᕆᓂᕐᒥᑦ ᓄᓇᕗᒥᑦ, ᑕᒪᕐᒥᒡᓗ ᐃᖃᓗᖕᓃᖢᑎᒃ, ᑖᒃᑯᐊᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑎᓴᒪᒋᔭᐅᓂᐊᕐᑐᒧᑦ ᐱᓕᕆᐊᖃᖅᐸᓪᓕᐊᔪᑦ.

ᓱᕈᓯᓕᕆᔨᐅᔪᑦ ᓄᓇᕗᑦ ᓄᓇᓕᖏᓐᓄᐊᖃᑦᑕᖅᑐᑦ ᑎᑭᑎᑕᐅᓚᐅᑲᑐᐃᓐᓇᕐᓂᕐᒨᖃᑦᑕᖅᑐᑦ.

“ᐃᓄᒋᐊᖕᓂᐅᑉ ᓄᓇᕗᑦ ᓇᑉᐸᓪᓗᐊᖏᑦ ᐊᕐᕌᒍᖃᕐᒪᑕ 25 ᑐᙶᓂ, ᑕᐃᒪᓕ ᐱᑕᖃᕆᐊᖃᕐᓂᖓ ᓇᓗᓇᙱᑦᑎᐊᕐᑐᖅ,” ᓴᑎᐊᓇ ᐅᖃᖅᑐᖅ.