ᓄᓇᕗᑦ ᐃᓅᓱᒃᑐᖏᑦ ᐅᖃᓪᓚᒃᑎᑕᐅᔪᑦ ᐃᓱᒪᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐊᑐᐃᓐᓇᖃᕐᓂᕐᒥᒃ
“ᑕᐃᒪᐃᑦᑐᓂᒃ ᐃᑲᔪᕈᓯᐅᔪᑦ ᐊᒻᒪ ᐊᓯᙳᕐᓂᖅᑕᖃᙱᑉᐸᑦ, ᑕᐃᒪᓕ ᑲᒪᖃᑦᑕᕈᓐᓃᕋᔭᖅᑐᒍ ᐃᓅᓱᒃᑐᐃᑦ ᐃᒻᒥᓃᖃᑦᑕᓗᐊᕐᓂᖏᓐᓄᑦ ᓇᓗᓇᐃᔭᖅᑕᐅᓯᒪᔪᓂᒃ”
ᓄᓇᕗᒧᑦ ᑭᒡᒐᖅᑐᐃᔨᑦ ᓱᕈᓯᕐᓂᒃ ᐊᒻᒪ ᐃᓅᓱᒃᑐᓂᒃ ᑎᑎᕋᕐᕕᒃ ᓴᕿᑎᑦᑎᓚᐅᕐᑐᖅ ᓯᕗᓕᖅᐹᖓᓂᒃ ᖃᓄᐃᓕᐅᕈᓯᕐᒥᑦ ᕿᒥᕐᕈᐊᖅᑕᐅᒍᑎᓂᒃ ᐱᖓᑦᓯᖅ, ᒪᐃ 22-ᒥ. ᐅᓂᒃᑳᑦ ᓴᕿᔮᖅᑎᑦᑎᓗᐊᓚᐅᕐᑐᖅ ᐅᖃᐅᓯᖏᓐᓂᒃ ᓱᕈᓰᑦ ᐊᒻᒪ ᐃᓅᓱᒃᑐᑦ ᓄᓇᕗᒦᑦᑐᓂᒃ ᐊᒻᒪᓗ ᐃᓱᒪᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑏᑦ ᐊᑐᐃᓐᓇᐅᔪᓐᓇᕐᓂᖏᓐᓂᒃ.
For an English version of this story, see Nunavut youth speak out about access to mental health services in new report
ᐃᓅᓱᒃᑐᑦ ᓄᓇᕗᒻᒥᐅᑕᑦ ᐅᖃᓪᓚᖕᓂᕐᓴᐅᓕᕐᑐᑦ ᐃᓱᒪᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᕐᒥ ᐱᔨᑦᑎᕋᐅᑎᓂᒃ ᓄᓇᕗᒥᑦ ᐅᕘᓇ ᓄᑖᓂᒃ ᐅᓂᒃᑳᓂᒃ ᐅᑯᓇᙵᑦ ᓄᓇᕗᑦ ᑭᒡᒐᖅᑐᐃᔨᖏᓐᓂᒃ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ.
ᐱᖓᑦᓯᐅᑎᓪᓗᒍ, ᑭᒡᒐᖅᑐᐃᔨᑦ ᓱᕈᓯᕐᓂᒃ ᐊᒻᒪ ᐃᓅᓱᒃᑐᓂᒃ ᑎᑎᕋᕐᕕᒃ ᓴᕿᑎᑦᑎᓚᐅᕐᑐᖅ 54-ᓂ ᒪᒃᐱᒐᓕᖕᓂᒃ ᕿᒥᕐᕈᐊᕈᑎᓂᒃ ᑕᐃᒎᓯᖃᖅᖢᓂ “ᐃᓱᒪᕗᑦ ᐊᑐᕐᒥᔪᑦ: ᐃᓅᓱᒃᑐᓂᒃ ᑐᓴᐅᒪᑎᑦᑎᓂᕐᒧᑦ ᕿᒥᕐᕈᐊᕐᓂᖅ ᐃᓱᒪᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᔨᑦᑎᕋᐅᑎᓂᒃ ᓄᓇᕗᒻᒥᐅᑦ ᐃᓅᓱᒃᑐᖏᓐᓄᑦ.”
ᑖᓐᓇ ᐅᓂᒃᑳᖅ, ᓯᕗᓪᓕᖅᐹᖑᓪᓗᓂ ᐱᓕᕆᔾᔪᓯᕐᓂᒃ ᕿᒥᕐᕈᐊᕐᓂᖅ ᐊᐅᓚᑕᐅᔪᖅ ᐅᑯᓇᙵᑦ RCYO, ᐊᒻᒪ ᐅᖃᐅᓯᖃᓚᐅᕐᒥᔪᖅ 15-ᓂᒃ ᐃᓱᒪᓕᐅᕈᑎᒃᓴᓄᑦ ᓄᓇᕗᑦ ᒐᕙᒪᒃᑯᓐᓄᑦ ᐋᕿᒃᓱᐃᓂᐊᕐᓂᕐᒥᒃ ᐃᓱᒪᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᓂᒃ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ ᓄᓇᕗᒥ.
“ᐊᑐᓂᑦ ᐃᓱᒪᓕᐅᕈᑎᐅᔪᑦ ᐅᓂᒃᑳᓂᑦ ᑐᕌᖓᓇᓱᒃᑐᑦ ᐱᐅᓯᕚᓪᓕᖅᑎᑦᑎᓂᕐᒥᒃ ᓈᒻᒪᙱᓗᐊᖅᑐᐊᓗᖕᓂᒃ ᖃᓄᐃᓕᖓᓂᕐᒥᒃ ᐃᓱᒪᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᔨᑦᑎᕋᐅᑎᓂᒃ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ ᓄᓇᕗᒥᑦ,” ᐅᖃᖅᑐᖅ ᓯᐅᕆ ᒪᒃᓂᐅᓪ-ᒧᓚᒃ, ᓄᓇᕗᑦ ᑭᒡᒐᖅᑐᐃᔨᖓᑦ ᓱᕈᓯᕐᓂᒃ ᐊᒻᒪ ᐃᓅᓱᒃᑐᓂᒃ, ᑐᓴᒐᒃᓴᓕᐅᕐᓇᖅᑎᓪᓗᒍ.
ᐅᑯᐊ RCYO ᐃᒻᒥᒃᑰᖓᓪᓗᓂ ᐱᓕᕆᔨᐅᔪᖅ ᐅᑯᓄᖓ ᓄᓇᕗᑦ ᒪᓕᒐᓕᕆᕝᕕᐊᓄᑦ ᐱᓕᕆᐊᖃᖅᖢᑎᒃ ᓄᓇᕗᑦ ᒐᕙᒪᒃᑯᑦ ᐃᑲᔪᖅᑐᐃᓯᒪᒐᓗᐊᕆᐊᒃᓴᖏᓐᓂᒃ ᐊᒻᒪ ᓴᐳᔾᔨᓯᒪᒐᓗᐊᕆᐊᒃᓴᖏᓐᓂᒃ ᐱᔪᓐᓇᐅᑎᒋᔭᐅᔪᒃᑯᑦ ᓄᓇᕗᒻᒥᐅᑦ ᐃᓅᓱᒃᑐᖁᑎᖏᑦ.
ᑎᑎᕋᕐᕕᒃ ᑐᑭᒧᐊᖅᑕᐅᓯᒪᔪᖅ ᔫᓇᐃᑕᑦ ᓇᐃᓴᓐ ᑲᑎᒪᕕᒡᔪᐊᕐᓇᒥᒃ ᐱᔪᓐᓇᐅᑎᒋᔭᐅᔪᓄᑦ ᓱᕈᓯᕐᓄᑦ, ᐃᓄᐃᑦ ᐃᓅᖃᑎᒌᖕᓂᒃᑯᑦ ᐱᒻᒪᕆᖏᓐᓂᒃ ᐊᒻᒪᓗ ᑲᓇᑕᒥ ᐱᓕᕆᖃᑎᒌᖕᓂᕐᒧᑦ ᒪᓕᒋᐊᓕᖕᓄᑦ, ᐅᓂᒃᑳᑦ ᐅᖃᕐᓯᒪᔪᑦ.
ᑎᑎᕋᕐᕕᒃ ᐊᐱᕐᓱᕐᓯᒪᖕᒪᑦ 475-ᓂ ᐃᓄᖕᓂ ᓄᓇᕗᒦᑦᑐᓂᒃ, ᐃᓚᐅᓪᓗᑎᒃ 225 ᐃᓅᓱᒃᑐᑦ. ᐊᐱᕐᓱᕐᓂᖅ ᐊᐅᓚᑕᐅᓚᐅᕐᑐᖅ ᐅᐸᒃᓯᓯᒪᓪᓚᕆᒃᖢᑎᒃ 11-ᓂᒃ ᓄᓇᓕᖕᓄᑦ ᓄᓇᕗᑦ 25-ᖏᓐᓂᒃ ᓄᓇᓕᖏᓐᓂᒃ ᐊᒻᒪᓗ ᖃᐅᔨᒪᓇᙱᑎᓯᒪᓪᓗᑎᒃ, ᒪᒃᓂᐅᓪ-ᒧᓚᒃ ᐅᖃᖅᑐᖅ.
ᒪᒃᓂᐅᓪ-ᒧᓚᒃ ᐅᖃᓚᐅᕐᒥᔪᖅ ᐊᐱᕐᓱᑲᑕᖕᓇᓕᒫᒥᑦ, ᑎᑎᕋᕐᕕᒃ ᑐᓴᖃᑦᑕᐃᓐᓇᓚᐅᕐᓂᖓᓂᒃ ᐱᑕᖃᕆᐊᖃᕐᓂᖓᓂᒃ ᐃᓱᒪᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᓂᒃ ᐊᑐᐃᓐᓇᖅᑕᖃᕐᓗᓂ ᐃᓕᓐᓂᐊᕐᕕᒃᓂᑦ. ᐊᒥᓱᑦ ᐃᓕᓐᓂᐊᕐᕖᑦ ᐃᓕᓐᓂᐊᕕᒻᒥ ᐃᓅᓯᓕᕆᔨᖃᕋᓗᐊᖅᖢᑎᒃ, ᐱᓕᕆᐊᒃᓴᕆᙱᒻᒪᔾᔪᒃ ᐋᓐᓂᐊᖃᖅᑕᐃᓕᓂᕐᒥᒃ ᐱᔨᑦᑎᕋᐅᑎᓕᕆᓂᕐᒥᒃ, ᐅᓂᒃᑳᑦ ᐅᖃᕐᓯᒪᔪᑦ.
ᐅᓂᒃᑳᑦ ᐋᕿᒃᓯᓯᒪᓚᐅᕐᑐᑦ ᐅᑯᓂᖓ 15-ᓂᒃ ᐃᓱᒪᓕᐅᕆᔾᔪᑎᖏᓐᓂᒃ ᑕᓪᓕᒪᐅᓕᖅᑎᖢᒋᑦ: ᐃᓱᒪᒧᑦ ᐋᓐᓂᐊᖃᖅᑕᐃᓕᓂᖅ ᐃᓕᓐᓂᐊᕐᕕᖕᓂ: ᐊᖏᕐᕋᕆᔭᐅᔪᓂᒃ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᓕᕆᔨᒃᓴᑦ; ᐅᔾᔨᕈᓱᓕᖅᑎᑦᑎᓂᖅ ᐊᒻᒪ ᑐᓗᖅᑕᕈᑎᐅᔭᑦᑐᑦ; ᐊᒻᒪᓗ ᐱᙳᐊᖅᑐᓕᕆᓂᒃᑯᑦ, ᐃᓕᖅᑯᓯᓕᕆᓂᒃᑯᑦ ᐊᒻᒪ ᓴᐃᓕᓂᕐᒧᑦ ᖃᓄᐃᓕᐅᕈᑎᒃᓴᑦ.
ᐃᓱᒪᓕᐅᕆᔾᔪᑎᐅᔪᑦ ᐃᓚᖃᕐᒥᔪᑦ ᓄᓇᕐᔪᐊᒃᑯᑦ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒥᑦ ᖃᓄᐃᓕᐅᕈᑎᒃᓴᓂᒃ ᐃᓕᓐᓂᐊᕐᕕᒃᓂᑦ, ᓯᓚᑦᑐᖅᓴᕐᕕᒃᑯᑦ ᖃᓄᐃᓕᐅᕈᑎᒃᓴᑦ ᓄᓇᕗᒥᑦ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᓕᕆᔨᒃᓴᓄᑦ ᐊᒻᒪᓗ ᐃᓕᖅᑯᓯᑐᖃᒃᑯᑦ ᐊᔪᕈᓐᓃᕐᓴᕈᑎᒃᓴᓂᒃ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᓕᕆᔨᐅᓂᐊᕐᑐᓄᑦ.
ᐊᓯᒃᑲᓐᓂᖓ ᐃᓱᒪᓕᐅᕆᔾᔪᑎᐅᔪᖅ ᐱᔪᒪᓂᖃᖅᑐᖅ ᓄᓇᕗᒦᑦᑐᒥᒃ ᐃᓱᒪᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᓕᕆᕝᕕᒃᓴᒥᒃ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ, ᑕᐃᒪᐃᑦᑐᒥᑦ ᒫᓐᓇ ᐱᑕᖃᙱᒻᒪᑦ ᓄᓇᕗᒥ.
“ᑕᐃᒪᐃᑦᑐᓂᒃ ᐃᑲᔪᕈᓯᐅᔪᑦ ᐊᒻᒪ ᐊᓯᙳᕐᓂᖅᑕᖃᙱᑉᐸᑦ, ᑕᐃᒪᓕ ᑲᒪᖃᑦᑕᕈᓐᓃᕋᔭᖅᑐᒍ ᐃᓅᓱᒃᑐᐃᑦ ᐃᒻᒥᓃᖃᑦᑕᓗᐊᕐᓂᖏᓐᓄᑦ ᓇᓗᓇᐃᔭᖅᑕᐅᓯᒪᔪᓂᒃ ᐊᒻᒪᓗ ᓂᙵᑲᑖᓗᒃ ᐋᓐᓂᕐᓯᒪᓂᕐᒧᑦ ᐊᒻᒪ ᓴᐱᓕᕐᓯᒪᓂᕐᒧᑦ ᐊᑐᖅᑕᐅᙶᓕᕌᖓᑕ ᓈᒻᒪᙱᓗᐊᖅᑐᒃᑯᑦ ᓄᓇᑦᑎᓐᓄᑦ ᐊᒃᑐᐃᒍᑎᐅᓇᔭᖅᑐᓂᒃ,” ᒪᒃᓂᐅ-ᒧᓚᒃ ᐅᖃᖅᑐᖅ.
ᐃᓚᒋᓂᐊᕐᓗᒍ ᓇᒧᙵᐊᑲᑕᒍᓐᓇᖅᑐᑦ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᓕᕆᔨᐅᔪᑦ, ᐅᓂᒃᑳ ᐅᖃᕐᓯᒪᖕᒥᔪᖅ ᐃᓅᓱᒃᑐᑦ ᑐᓗᖅᑕᕐᕕᖃᒃᑲᓐᓂᕐᓂᖏᓐᓂᒃ ᐊᑐᐃᓐᓇᖃᕐᓂᕐᒥᒃ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᔨᑦᑎᕋᐅᑎᓂᒃ ᑖᓐᓇᓗ ᓈᒻᒪᙲᓐᓇᐅᔭᖅᖢᓂ ᐃᓄᖕᓄᑦ ᐃᓱᒪᒃᑯᑦ ᐋᓐᓂᐊᓕᖕᓄᑦ.
ᐊᑕᐅᓯᖅ ᐃᓅᓱᒃᑐᖅ ᐊᐱᖅᓱᖅᑕᐅᖃᑕᐅᓂᕐᒥᒃ ᐃᓚᐅᔪᖅ ᑎᑎᕋᓚᐅᕐᑐᖅ ᖃᓄᐃᒃᓴᕋᔭᙱᓐᓂᖓᓂᒃ ᐃᑲᔪᖅᑕᐅᔪᒪᓗᓂ, “ᖃᐅᔨᒪᒍᒪ ᐱᔨᑦᑎᕋᐅᑎᑕᖃᕐᓂᖓᓂᒃ ᐊᒻᒪᓗ ᐃᑲᔪᖅᑕᐅᓂᕋ ᐃᓚᓐᓄᑦ ᓈᒻᒪᙱᓕᐅᕈᑎᐅᓕᔾᔮᙱᑉᐸᑦ.”
ᐅᓂᒃᑳᑦ ᑎᑎᕋᕐᓯᒪᖕᒥᔪᑦ 60 ᐳᓴᓐᑎᐅᔪᑦ ᒪᑯᓇᙵᑦ ᑕᒪᐃᓐᓂ ᐋᓐᓂᐊᖃᖅᑕᐃᓕᓂᕐᒧᑦ ᐊᒃᑐᐊᔪᓂᒃ ᐱᓕᕆᐊᖑᓕᕐᓯᒪᔪᓂᒃ ᐅᑯᓇᙵᑦ RCYO ᐊᒃᑐᐊᓯᒪᔪᑦ ᐊᒃᓱᕈᕈᑎᐅᓯᒪᔪᓂᒃ ᐃᓅᓱᒃᑐᓄᑦ ᓄᓇᕗᒥᑦ ᐅᓇ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᔨᑦᑎᕋᐅᑎᖃᕈᓐᓇᙱᓐᓂᖅ.
ᕕᕝᕗᐊᕆ 2018-ᒥᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᓴᖅᑎᑦᑎᓚᐅᕐᑐᖅ ᐊᑕᐅᓯᕐᒥᒃ ᒪᕐᕉᖕᓄᑦ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐊᒻᒪ ᐊᑐᓗᐊᖅᑐᓕᕆᓂᕐᒥᒃ ᐱᓕᕆᔨᐅᔪᑦ, ᐅᕝᕙᓘᓐᓃ ᑦ MHAs, ᐊᑐᓂᑦ ᓄᓇᓕᖕᓂᑦ ᐃᓂᖃᖅᑎᑕᐅᓇᔭᖅᑐᑦ. ᑖᔅᓱᒪ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐊᒻᒪ ᐊᑐᓗᕐᓂᕐᒧᑦ ᐱᓕᕆᐊᒃᓴᐃᑦ ᑐᕌᖓᑎᑕᐅᓚᐅᕐᓯᒪᔪᑦ ᓄᓇᓕᖕᓂ ᓄᓇᖃᖅᑐᓂᒃ ᐃᖅᑲᓇᐃᔮᖅᑖᕆᔭᐅᓗᑎᒃ, ᓂᕈᐊᕐᓂᕐᓴᐅᓪᓗᑎᒡᓗ ᐃᓄᒃᑐᑦ ᐅᖃᕈᓐᓇᖅᑐᓂᒃ ᐊᒻᒪ ᐃᖅᑲᓇᐃᔭᓯᓐᓈᑦ ᐊᔪᕈᓐᓃᕐᓴᖅᐸᓪᓕᐊᓗᑎᒃ, ᐅᓂᒃᑳᑦ ᐅᖃᕐᓯᒪᔪᑦ.
ᐃᓕᓐᓂᐊᕈᑎᒃᓴᓂᒃ ᐱᔪᒪᓯᒪᒐᓗᐊᖅᑎᓪᓗᒋᑦ ᑕᐃᒪᐃᑦᑐᓄᑦ ᐃᖅᑲᓇᐃᔭᕋᔭᖅᑐᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ, ᐅᓂᒃᑳᑦ ᐅᖃᕐᓯᒪᔪᑦ ᑎᑎᕋᐅᓯᕕᓂᖅ ᐋᕿᒋᐊᖅᑕᐅᓕᓵᖅᓯᒪᔪᑎᑑᕐᓂᖓᓂᒃ ᐊᒻᒪᓗ ᐊᔪᕈᓐᓃᕐᓴᕈᑎᒃᓴᖅᑕᖃᙱᓐᓂᕋᐃᓪᓗᑎᒃ ᑕᐃᒪᓐᓇ ᐃᖅᑲᓇᐃᔮᖃᕋᔭᖅᑐᓄᑦ.
ᐊᓯᒃᑲᓐᓂᐊᒍᓪᓕ ᕿᒥᕐᕈᐊᕈᑎᐅᔪᑦ, 82 ᐳᓴᓐᑎᐅᔪᑦ ᓄᓇᕗᑦ ᒐᕙᒪᒃᑯᑦ ᐱᔨᑦᑎᕋᐅᑎᓕᕆᔨᖏᑦ ᐅᖃᕐᓯᒪᔪᑦ ᐃᓅᓱᒃᑐᓄᑦ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᓕᕆᓂᕐᒧᑦ ᐱᔨᑦᑎᕋᐅᑎᑕᖃᙱᓐᓂᖓᓂᒃ ᐱᔭᐅᔭᕆᐊᖃᖅᑐᒃᑯᑦ. ᐊᒻᒪᒃᑲᓐᓂᕐᓗ, 72 ᐳᓴᓐᑎᐅᔪᑦ ᐃᓱᒪᔪᑦ ᑕᒪᒃᑯᐊ ᐱᔨᑦᑎᐅᔪᑦ ᐊᑐᖅᑕᐅᔾᔪᓯᖏᑦ ᓈᒻᒪᙱᓗᐊᕐᓂᖏᓐᓂᒃ.
ᖃᐅᔨᓴᕈᑎᑎᒍᓪᓕ ᑭᒃᑯᓕᒫᓂᒃ ᐊᐱᕐᓱᕐᓂᒃᑯᑦ, ᐅᓂᒃᑳᑦ ᓴᕿᑎᑦᑎᓯᒪᔪᑦ ᒪᑯᐊ 91 ᐳᓴᓐᑎᐅᔪᑦ ᐊᐱᖅᓱᖅᑕᐅᔪᓂᒃ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᔨᑦᑎᕋᐅᑏᑦ ᐃᓅᓱᒃᑐᓅᖓᔪᓂᒃ ᓄᓇᕗᒥᑦ ᓈᒻᒪᙱᓗᐊᕐᓂᖏᓐᓂᒃ ᐱᔭᕆᐊᖃᓪᓚᕆᒃᑕᖏᓐᓄᑦ.
ᒪᒃᓂᐅᓪ-ᒧᓚᒃ ᐅᖃᓚᐅᕐᑐᖅ ᑎᑎᕋᕐᕕᖓ ᐅᔾᔨᕈᓱᒃᓯᒪᓂᖓᓂᒃ ᐃᓚᖏᑦ ᐅᓂᒃᑳᓂᒃ ᐃᓱᒪᓕᐊᕆᔭᐅᔪᑦ ᓴᕿᑕᐅᓂᑰᕌᓂᖕᓂᖏᓐᓂᒃ.
“ᑭᓯᐊᓂ ᓱᕈᓰᑦ ᐊᒻᒪ ᐃᓅᓱᒃᑐᑦ ᓄᓇᕗᒥᑦ ᐊᑐᐃᓐᓇᖃᕈᓐᓇᕐᓯᒃᐸᑕ ᐃᓱᒪᒧᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᔨᑦᑎᕋᐅᑎᓂᒃ ᐱᔭᕆᐊᖃᖅᑕᖏᓐᓂᑦ, ᐱᔪᓐᓇᐅᑎᖏᑦᑎᒍᑦ ᐱᔭᕆᐊᖃᖅᑕᖏᓐᓂᒃ, ᓄᓇᖓᓐᓂᒃ, ᑕᐃᒪᓕ ᑲᔪᓰᓐᓇᕐᓂᐊᖅᑐᒍ ᓄᓇᕗᑦ ᒐᕙᒪᒃᑯᓐᓂᒃ ᐃᓱᒪᓕᐊᕆᔭᐅᔪᓂᒃ ᐊᑐᓕᖅᑎᑦᑎᓇᓱᖕᓗᑕ,” ᐅᖃᖅᑐᖅ.
ᒪᓕᒐᓕᕆᓂᒃᑯᓪᓕ, ᒐᕙᒪᒃᑯ ᐅᓪᓗᓂᒃ 40-ᓂᒃ ᑭᐅᔭᕆᐊᖃᖅᑐᑦ ᐅᓂᒃᑳᓂᒃ, ᑕᐃᒪᓕ ᑭᐅᓂᐊᕐᕕᖓᑦ ᐃᓱᖃᖅᖢᓂ ᓯᑎᐱᕆ 30-ᒥᒃ.
“ᐊᑐᓂ ᐃᓱᒪᓕᐅᕆᔭᐅᓯᒪᔪᑦ ᖃᐅᔨᓴᖅᑕᐅᕙᓪᓕᐊᓂᐊᖅᑐᑦ, ᐊᒻᒪᓗ ᖃᓄᐃᓕᐅᕈᓯᐅᔪᑦ ᑎᑎᕋᕐᕕᑦᑎᓐᓄᑦ ᐅᓂᒃᑲᐅᓯᐅᖃᑦᑕᕐᓂᐊᕐᖢᑎᒃ,” ᒪᒃᓂᐅᓪ-ᒧᓚᒃ ᐅᖃᖅᑐᖅ.
(0) Comments