ᓄᓇᕗᑦ ᐃᙱᕐᑎᖏᑦ ᐃᑲᔪᖅᑕᐅᕗᑦ ᓄᕙᒡᔪᐊᕐᓇᖅ-19 ᐋᓐᓂᐊᕐᓇᒧᑦ ᖃᓄᐃᓕᐅᖅᑕᐃᓕᑲᑕᒃᑎᓪᓗᒋᑦ
ᑎᑕᑲᑕᖕᓂᐊᖅᑐᑦ ᓄᖅᑲᖅᑎᑕᐅᓪᓗᑎᒃ, ᖁᕕᐊᓱᓗᒡᕕᒃᓴᑦ ᐅᖓᕙᕆᐊᖅᑕᐅᓪᓗᑎᒃ, ᐃᙱᖅᑏᑦ ᖃᕋᓴᐅᔭᒃᑯᑦ ᑕᐅᑐᒃᑕᐅᓂᕐᓴᐅᕗᑦ.
ᔮᓱᐊ ᖃᐅᒻᒪᕆᐊᖅ ᑎᑕᒃᑎᐅᖃᑎᖏᓪᓗ, The Trade-Offs, ᑎᑕᒃᑎᓪᓗᒋᑦ ᓈᓴᓄᓪ ᐋᑦᔅ ᓴᓐᑐᒥ ᐋᑐᕚᒥ ᓯᑎᐱᕆ 2019-ᒥᑦ. ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐅᑯᓄᖓ ᖃᐅᒻᒪᕆᐊᕐᒧᑦ ᐊᒻᒪ ᐊᓯᖏᓐᓄᑦ ᓄᓇᕗᒥᑦ ᑎᑕᒃᑎᓄᑦ ᓄᖅᑲᖅᑎᑦᑎᒍᑎᐅᓕᓚᐅᕐᐳᑦ ᐅᐸᒍᓐᓇᕐᓗᑎᒃ ᖁᙱᐊᖅᑕᐅᓂᐊᕐᓗᑎᒃ. ᑭᓯᐊᓂᓕ ᑖᓐᓇ ᐊᒻᒪ ᐃᖃᓗᖕᒥᐅᑕᖅ ᐅᕌᒍ Fxckmr ᕙᐃᔅᐳᒃᑯᑦ ᓴᖅᑭᔮᖅᖢᑎᒃ ᑎᑕᑲᑕᓚᐅᕐᑐᑦ ᑕᓪᓕᕐᒥᐅᑎᓪᓗᒍ ᐄᐳᕈᓪ 3, ᐋᖅᑭᒃᑕᐅᓯᒪᓪᓗᓂ ᐊᓕᐊᓇᐃᑦᑯᓐᓄᑦ. ᑕᑯᔪᓐᓇᖅᑐᓯ ᑎᑕᑲᑕᒃᑐᓂᒃ ᐅᕙᓂ ᐊᓕᐊᓇᐃᑦ ᕙᐃᔅᐳᒃᑯᑦ ᓴᖅᑭᔮᒐᖓᓂ www.facebook.com/alianait. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Nunavut artists get support during COVID-19 restrictions
ᓄᓇᕗᒥᐅᑕᖅ ᐃᙱᕐᑎ-ᐃᙱᐅᓯᐅᕐᑎ ᔮᓱᐊ ᖃᐅᒻᒪᕆᐊᖅ ᖁᙱᐊᖅᑕᐅᓕᒪᕗᖅ ᑎᑕᒃᑎᖏᓪᓗ The Trade-Offs. ᑭᓯᐊᓂᓕ ᐃᓄᒋᐊᓄᑦ ᐅᐸᒃᑐᓄᑦ.
ᑭᓯᐊᓂᓕ ᖃᖓᑦᑎᐊᓂ ᖃᐅᒻᒪᕆᐊᖅ ᑎᑕᑲᑕᒃᑐᖅ ᐃᓄᑑᓪᓗᓂ, ᖁᙱᐊᖅᑎᖃᕋᓂ. ᖁᙱᐊᖅᑎᖏᓪᓕ ᐃᒡᓗᐊᓃᙶᖅᑐᑦ ᖁᒻᒧᒃᑎᑕᐅᓯᒪᔪᒃᑲᑦ ᐊᑦᑕᑕᐅᑎᓂᒃ ᐊᒻᒪᓗ ᐅᖄᓚᐅᑎᕋᓛᒃᑯᑦ ᓴᖅᑭᔮᖅᖢᓂ.
“ᐃᓄᑑᑐᐃᓐᓇᖅᐳᖓ ᐃᒡᓗᕈᓯᕐᒥ, ᑎᑕᒃᖢᖓ ᐊᔾᔨᓕᐅᕈᑎᒧᑦ. ᖃᓄᐊᓗᒃᓕᑭᐊᖅ ᔫᑑᑉᐸᒃᑐᑦ ᑕᐃᒪᐃᓕᐅᖃᑦᑕᐃᓐᓇᖃᑦᑕᕐᒪᑕ,” ᖃᐅᒻᒪᕆᐊᖅ ᐃᒡᓚᖅᖢᓂ ᐅᖃᖅᑐᖅ.
ᖃᐅᒻᒪᕆᐊᖅ ᐅᖃᓚᐅᕐᑐᖅ ᑲᑎᕐᖓᔪᓐᓇᙱᒃᑲᓗᐊᖅᑎᓪᓗᒋᑦ, ᐃᓅᑑᑲᑕᖕᓂᖅ ᑖᔅᓱᒧᖓ ᑎᑕᒃᑎᐅᖃᑎᖏᓐᓄᓪᓗ ᐃᙱᐅᑎᒃᓴᓂᒃ ᐱᓕᕆᒍᑎᐅᓐᓇᐳᖅ.
ᑕᒪᒃᑯᓄᖓ ᑎᑕᒃᑎᓄᑦ ᓄᓇᕗᒦᑦᑐᓂᒃ ᐃᒃᐱᒋᔭᖃᒻᒪᕆᒃᑐᓂᒃ ᓄᕙᒡᔪᐊᕐᓇᖅ-19-ᒧᑦ ᖃᓄᐃᑦᑕᐃᓕᓂᕐᒧᑦ, ᖃᕋᓴᐅᔭᒃᑯᑦ ᓴᖅᑭᔮᕐᓗᓂ ᑎᑕᑲᑕᒍᑎᐅᓂᕐᓴᐅᓕᕐᐳᖅ. ᖁᙱᐊᖅᑕᐅᓂᒃᓴᑦ ᓄᖅᑲᖅᑎᑕᐅᓯᒪᓕᕐᑐᑦ, ᖁᕕᐊᓱᖃᑎᒌᖕᓂᐅᔪᑦ ᐅᖓᕙᕆᐊᖅᑕᐅᓪᓗᑎᒃ ᐊᒻᒪᓗ ᖁᙱᐊᖅᑕᐅᕝᕕᒃᓴᑦ ᒪᑐᔭᐅᓪᓗᑎᒃ.
ᑭᓯᐊᓂᓕ ᕕᒃᑑᕆᐊ ᐱᐅᕋᓐ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐊᓕᐊᓇᐃᑦᒧᑦ, ᐅᖃᓚᐅᕐᑐᖅ ᐃᑲᔫᓯᐊᓄᑦ ᓄᓇᕗᑦ ᐱᕙᓪᓕᐊᔪᓕᕆᔨᖏᓐᓂᑦ ᐊᒻᒪ ᐃᖏᕐᕋᔾᔪᑎᓕᕆᔨᖏᓐᓂᒃ, ᐊᓕᐊᓇᐃᑦ ᐃᑲᔪᕐᖢᑎᒃ ᐋᖅᑭᒃᓱᐃᓕᓚᐅᕐᐳᑦ ᐅᑭᐅᕐᑕᖅᑐᕐᒥ ᑎᑕᒃᑎᓂ ᖃᓄᐃᓕᐅᕈᓐᓇᕈᑎᒃᓴᖏᓐᓂᒃ ᐊᒻᒪ ᐊᑭᓕᕐᓱᖅᑕᐅᓗᑎᒃ ᐋᓐᓂᐊᕐᓇᖅᑐᖃᓗᐊᕐᓇᕐᒥᑦ.
ᐊᓕᐊᓇᐃᑦ ᐊᕐᕌᒍᑕᒫᓐ ᑲᑎᓪᓗᑎᒃ ᑎᑕᑲᑕᖕᓂᐅᔪᖅ, ᑖᓐᓇᓗ ᑲᑎᑎᑦᑎᒍᑎᐅᓪᓗᓂ ᑎᑕᒃᑎᒐᓚᖕᓂ ᓄᓇᕗᒥᑦ ᐊᒻᒪ ᓄᓇᕐᔪᐊᒥᑦ, ᐅᖓᕙᕆᐊᖅᑕᐅᓚᐅᕐᐳᖅ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ-19 ᐃᓱᒫᓘᑎᐅᓪᓗᓂ. ᖁᙱᐊᖅᑕᐅᔪᒃᓴᕕᓃᑦ ᐊᒻᒪ ᓄᖅᑲᖅᑎᑕᐅᖕᒥᔪᑦ.
“ᐅᕙᑦᑎᓐᓄᓪᓕ, ᐱᕕᖃᕈᓐᓇᕐᓂᑦᑎᓐᓂ ᖃᐅᔨᓕᓚᐅᕋᑦᑕ ᖁᙱᐊᖅᑕᐅᓂᒃᓴᖅᑕᖃᔾᔮᙱᑎᓪᓗᒍ ᐱᕕᖃᕈᓐᓇᓕᓚᐅᕐᓂᑦᑎᓐᓂᒃ ᖁᕕᐊᓱᖃᑎᒌᖕᓂᒃᓴᖅ ᐅᖓᕙᕆᐊᖅᑕᐅᓂᖏᓐᓄᑦ,” ᐱᐅᕋᓐ ᐅᖃᖅᑐᖅ.
ᑕᐃᒪᐃᓐᓂᖓᓄᑦ ᐊᓕᐊᓇᐃᑦ ᐱᒋᐊᕈᒪᓕᓚᐅᕐᑐᑦ ᖃᕋᓴᐅᔭᒃᑯᑦ ᖁᙱᐊᖅᑕᐅᔪᒃᓴᓕᐅᕈᒪᓪᓗᑎᒃ, ᓴᖅᑭᔮᑲᐅᑎᒋᔪᓂ ᑎᑕᒃᑐᖃᖅᐸᒡᓗᓂ ᑕᓪᓕᕐᒥᑕᒫᓐ. ᐱᐅᕋᓐ ᐅᖃᓚᐅᕐᑐᖅ ᐊᓕᐊᓇᐃᑦ ᐊᑕᐅᓯᕐᒥᑦ ᒪᕐᕉᖕᓂᓪᓘᓐᓃᑦ ᖁᙱᐊᖅᑕᐅᑎᑦᑎᓗᑎᒃ ᐱᓇᓱᐊᕈᓯᕐᒥ ᐊᒻᒪᓗ ᑎᑕᒃᑎᓄᑦ ᖃᓄᐃᓕᐅᕈᑎᒃᓴᓂᒃ ᐋᖅᑭᒃᓯᖃᑕᐅᓗᑎᒃ.
“ᑎᑕᐅᓰᑦ ᐱᒻᒪᕆᐊᓘᖕᒪᑕ ᐊᒻᒪᓗ ᑐᓴᕐᓈᕐᓇᖅᑐᑦ ᐱᒻᒪᕆᐊᓘᓯᒪᓪᓗᑎ ᐱᓇᓱᐊᕈᓰᒃ ᒪᕐᕉᓕᕐᑑᖕᓂᒃ.”
ᐊᒻᒪᓗ ᑎᑕᒃᐸᒃᑐᑦ ᖁᙱᐊᖅᑕᐅᓪᓗᑎᒃ ᑮᓇᐅᔭᖅᑖᖅᑎᑕᐅᕙᒃᖢᑎᒃ, ᑕᐃᒪᓐᓇᑦᑕᐃᓐᓇ ᐅᐸᒃᑕᐅᔪᑎᑐᑦ ᖁᙱᐊᖅᑕᐅᔭᕐᑐᕐᓗᓂ, ᐱᐅᕋᓐ ᐅᖃᕐᒥᔪᖅ.
ᐅᓇ ᓯᕗᓪᓕᖅᐹᖑᙱᑦᑐᖅ ᐊᓕᐊᓇᐃᑦ ᐊᑦᑕᑕᖅᑎᑦᑎᔪᒪᓂᖓ ᓄᓇᕗᒥᑦ ᓄᓇᓕᖕᓂ ᖃᕋᓴᐅᔭᒃᑯᑦ, ᐱᐅᕋᓐ ᐅᖃᖅᑐᖅ.
“ᖃᕋᓴᐅᔭᒃᑯᑦ ᑭᖑᓪᓕᐹᖕᓂ ᒪᕐᕉᖕᓂ ᓴᖅᑭᔮᑲᐅᑎᒋᑎᑦᑎᓯᒪᓕᕋᑦᑕ ᖁᕕᐊᓱᖃᑎᒌᒍᑎᑦᑎᓐᓂ ᐊᒻᒪᓗ ᖁᙱᐊᖅᑕᐅᔪᖁᑎᑦᑎᓐᓂᒃ. ᖃᕋᓴᐅᔭᒃᑯᑦ ᐊᑦᑕᑕᐅᑎᑦ ᓱᒃᑲᓗᐊᙱᒻᒪᑕ ᓄᓇᓕᓕᒫᓂᒃ ᑭᓯᐊᓂᓕ ᓱᒃᑲᓂᕐᓴᐅᓕᕐᑐᖅ ᑕᐃᒪᓐᓇᓗ ᐅᐸᒍᑎᔪᓐᓇᙱᑦᑐᑦ ᐃᖃᓗᖕᓄ ᖁᙱᐊᕆᐊᕐᓗᑎ ᐱᓇᓱᐊᕈᓯᐅᑉ ᓄᙳᐊᓂ ᐃᓚᐅᖃᑦᑕᕈᓐᓇᖅᑐᑦ ᑕᐅᑐᒡᓗᑎᒡᓗ ᑎᑕᑲᑕᒃᑐᓂᒃ.”
“ᑕᒪᓐᓇ ᐊᓯᙳᐃᕙᓪᓕᐊᓂᐅᔪᖅ ᑭᓯᐊᓂᓕ ᐊᓯᙳᖅᐸᓪᓕᐊᓂᖅ ᓱᒃᑲᓂᕐᓵᓘᖕᒪᑦ ᐃᓱᒪᒋᓚᐅᕐᑕᑦᑎᓐᓂ.”
ᑕᓪᓕᕐᒥᖅ, ᒫᑦᓯ 27-ᒥᑦ, ᐊᓕᐊᓇᐃᑦ ᑐᙵᓱᒃᑎᑦᑎᔨᐅᓚᐅᕐᑐᑦ ᐊᑭᖃᙱᑦᑐᒥ ᖃᕋᓴᐅᔭᒃᑯᑦ ᖁᑎᐊᖅᑕᐅᑎᑦᑎᓪᓗᑎᒃ ᐃᒡᓗᓕᒃᒥᐅᑕᒥ ᐃᙱᕐᑎ-ᐃᙱᐅᓯᐅᕐᑎᒥ ᔮᓱᐊ ᕼᐊᐅᓕᒥ, ᐱᐅᕋᓐᓗ ᐅᖃᓚᐅᕐᖢᓂ 350-ᖏᓐᓂ ᐃᓄᖕᓂ ᖁᙱᐊᖅᑐᖃᓚᐅᕐᓂᖓᓂᒃ ᖃᕋᓴᐅᔭᒃᑯᑦ.
“ᑎᑕᒃᑎᐅᒍᕕᑦ ᑮᓇᐅᔭᓕᐅᕈᑎᒋᕙᒡᓗᒍ ᐊᒻᒪ ᐃᑲᔪᖅᑕᐅᔪᒪᒍᕕ ᐊᓕᐊᓇᐃᑦᑯᓐᓂ ᐊᒻᒪ ᖃᕋᓴᐅᔭᒃᑯᑦ ᓴᖅᑭᔮᒐᓕᐅᕐᓗᑎ, ᑕᐃᒪᓕ ᐅᕙᑦᑎᓐᓂ ᖃᐅᒋᐊᖅᑎᑦᑎᓗᓯ ᖃᕋᓴᐅᔭᒃᑯᑦ ᑎᑎᕋᕐᓗᓯ ᕙᐃᔅᐳᒃᑯᓪᓘᓐᓃᑦ,” ᐱᐅᕋᓐ ᐅᖃᖅᑐᖅ.
“ᐃᓄᐃᑦ ᐊᑦᑕᑕᕐᓯᒪᖁᒐᑦᑎᒍᑦ. ᒫᓐᓇ ᑲᑉᐱᐊᓇᖅᑐᐊᓘᖕᒪᑦ. ᐃᓱᒫᓗᖕᓇᖅᖢᓂ ᐊᒻᒪ ᐱᒻᒪᕆᐅᓪᓗᓂ ᓄᓇᓖᑦ ᐃᓕᖕᓂ ᖃᐅᔨᒪᒍᑎ.”
ᖃᒡᒋᐊᕘᑦ, ᐃᖃᓗᖕᓂ ᐃᑲᔪᖅᑏᑦ ᐃᑲᔪᖅᑎᐅᖕᒥᔪᑦ ᑎᑕᒃᑎᐅᕙᒃᑐᓂᒃ ᓄᓇᕗᒥᑦ, ᖃᖓᑦᑎᐊᓵᖅ ᐃᑲᔫᓯᐊᒃᓴᓕᐅᕈᑎᖏ ᑐᕌᖓᑎᑕᐅᓕᓚᐅᕐᑐᑦ ᑎᑕᑦᑎᓄᑦ ᐱᓕᕆᔪᓐᓇᐃᓪᓕᔪᓂᒃ ᓄᕙᒡᔪᐊᕐᓇᖅ-19-ᒧᑦ ᓇᒧᙵᐅᑲᑕᒋᐊᖃᙱᓐᓂᖏᓐᓄᑦ.
ᐊᓚᓐ ᕼᐋᒧᑕᓐ, ᖃᒡᒋᐊᕘᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᐅᖃᓚᐅᕐᑐᖅ ᐊᒃᑐᖅᑕᐅᑲᐅᑎᒋᓚᐅᕐᓂᖏᑦ ᑎᑕᒃᑎᐅᕙᒃᑐᑦ.
“ᐃᓄᐃᑦ ᐃᒪᓐᓇᑳᓪᓛᓗᒃ ᑕᐅᓴᖏᓐᓃᓗᐊᕐᑐᓂᒃ ᐊᓯᐅᔨᓪᓗᑎᒃ ᑮᓇᐅᔭᓂᒃ. ᑲᑎᒪᓂᖅᑕᖃᑲᑕᓚᐅᕐᑐᖅ ᒫᑦᓯᒥ ᐊᒻᒪ ᐄᐳᕈᒥ, ᖁᕕᐊᓱᓕᒡᕕᒃᓴᐃᑦ, ᑎᑕᑲᑕᖕᓂᐅᓂᐊᕐᑐᑦ ᑕᖅᑭᒐᓴᖕᓂ ᖃᐅᔨᒪᔭᐅᕌᓂᒃᑐᓂᒃ. ᑕᒪᒃᑯᐊ ᓄᖅᑲᑳᓪᓚᒃᖢᑎᒃ ᐊᒻᒪᓗ ᓇᖕᒥᓂᖅ ᓂᕆᔭᒃᓴᓂᒃ ᕿᑐᕐᖓᖏᓐᓄᑦ ᐃᓚᖏᓐᓄᓪᓗ ᐱᓇᓱᒋᐊᖃᓕᕐᖢᑎᒃ. ᑕᒪᕐᒥ ᑎᑕᒃᑎᐅᕙᒃᑐᑦ ᐊᒃᓱᕈᖃᑦᑕᕐᒪᑕ. ᓇᓕᐊᑐᐃᓐᓇᖅ ᑮᓇᐅᔭᓕᐅᕌᓗᖃᑦᑕᒋᒻᒪᑦ ᐊᒻᒪᓗ ᐅᑕᖅᑭᐊᓗᑐᐃᓐᓇᓕᖅᐸᒃᖢᑎᒃ,” ᕼᐋᒧᑕᓐ ᐅᖃᖅᑐᖅ.
ᖃᒡᒋᐊᕘᑦ ᐱᓕᕆᓯᑲᐅᑎᒋᓚᐅᕐᑐᑦ ᑐᐊᕕᕐᓇᖅᑐᓂᒃ ᐃᑲᔫᑎᒃᓴᓕᕆᓂᕐᒥ ᐃᓄᖕᓄᑦ ᐊᒻᒪ ᓄᓇᕗᒥᑦ ᑎᑕᒃᑎᐅᕙᒃᑐᓄᑦ.
ᒫᓐᓇᒧ, ᖃᒡᒋᐊᕘᑦ ᑐᓂᔭᐅᓯᒪᓕᕐᑐᑦ $15,000-ᓂ ᐃᑲᔫᑎᒃᓴᓂᒃ, ᑖᓐᓇᓗ ᐃᑲᔪᕈᑎᐅᓯᒪᓕᕐᖢᓂ 17-ᓂᒃ ᐃᙱᕐᑎᓂᒃ, ᕼᐋᒧᑕᓐ ᐅᖃᓚᐅᕐᑐᖅ.
“ᓴᐳᔾᔭᐅᑎᓯᒪᔪᒪᒐᑦᑎᒍᑦ. ᑲᔪᓯᖁᓪᓗᑎᒍᓪᓗ ᐃᙱᐅᓯᐅᕐᐸᒡᓗᑎ ᐊᒻᒪ ᐊᔪᕈᓐᓃᕐᓴᐃᓐᓇᕐᓗᑎᒃ ᐃᓄᑑᒐᓗᐊᕐᓗᑎ ᐱᑐᐃᓐᓇᕆᐊᖃᓕᕐᓂᐊᕐᒪᑕ ᑕᒪᓐᓇ ᐊᓂᒍᐊᓂᒃᐸᑦ. ᐅᓂᒃᑳᖏᓐᓂᒃ ᐱᔪᒪᒐᑦᑕ ᐃᙱᐅᓯᖏᓐᓂᒡᓗ ᓂᐱᖏᓐᓂᒡᓗ.
ᐃᑲᔫᑎᒃᓴᓂ ᐱᓇᓱᖕᓂᐊᕐᓗᓂ, ᕼᐋᒧᑕᓐ ᐅᖃᓚᐅᕐᑐᖅ ᐃᙱᖅᑎᐅᔪᑦ ᑎᑎᕋᕈᓐᓇᕐᓂᖏᓐᓂᒃ ᖃᒡᒋᐊᕘᑦ ᕙᐃᔅᐳᒃᑯᑦ ᒪᒃᐱᒐᖓᓂ ᐅᑯᓂᖓ ᑎᑎᕋᐅᓯᖃᕐᓗᑎᒃ: ᖃᓄᖅ ᓄᕙᒡᔪᐊᕐᓇᖅ-19-ᒧᑦ ᓄᖅᑲᕈᑎᐅᔪᑦ ᐊᒃᑯᐃᓯᒪᖕᒪᖔᑕ ᐃᙱᖅᑎᐅᓂᖏᓐᓄᑦ, ᖃᔅᓯᓂᒃ ᑮᓇᐅᔭᖅᑖᕆᓇᔭᖅᑕᖏᓐᓂᒃ ᐊᓯᐅᔨᓯᒪᖕᒪᖔᑕ ᐊᒻᒪᓗ ᒫᓐᓇᑲᐅᑎᒋ ᐱᔭᕆᐊᖃᖅᑕᖏᓐᓂᒃ ᑮᓇᐅᔭᑎᒍᑦ.
ᕼᐋᒧᑕᓐ ᐅᖃᓚᐅᕐᑐᖅ ᑐᐊᕕᕐᓇᖅᑐᓄᑦ ᐃᑲᔫᑎ ᐋᖅᑭᒃᑕᐅᓯᒪᓚᐅᕐᓂᖏᓐᓂᒃ ᐃᙱᖅᑎᓂᒃ ᐃᑲᔪᕈᑎᐅᓂᐊᕐᓗᑎᒃ ᑭᓯᐊᓂ ᐅᓇ ᒐᕙᒪᑐᖃᒃᑯᓐᓂ ᐃᑲᔫᑎᒃᓴᖅ ᐅᕘᓇ ᑲᓇᑕᒥ ᑐᐊᕕᕐᓇᖅᑐᓕᕆᓂᕐᒧᑦ ᐃᑲᔫᓯᐊᒃᓴᖅ ᐊᑐᐃᓐᓇᐅᓕᕐᐸᑦ ᓇᒡᒐᔾᔭᐅᒥᑦ, ᐄᐳᕈᓪ 6-ᒥᑦ.
ᒐᕙᒪᑐᖃᒃᑯᑦ ᐃᑲᔫᑎᖏᓐᓂᒃ ᐱᓇᓱᒍᒪᒍᕕᑦ, ᑎᑕᒃᑏᑦ ᐊᑎᖃᓕᕆᐊᖃᕐᓂᐊᖅᑐᑦ ᐅᑯᓇᓂ ᑲᓇᑕᒥ ᑮᓇᐅᔭᖅᑖᓕᕆᕝᕕᖕᒥᑦ (Canada Revenue Agency), ᓴᓇᔪᓐᓇᐅᑎᖃᕐᓗᑎ ᓇᐃᓴᐅᑎᒥ, ᓇᓗᓇᐃᕈᓐᓇᕐᓗᓂ ᑮᓇᐅᔭᓕᐅᕐᓯᒪᓂᖓᓂᒃ $5,000-ᓂ ᐃᙱᕐᓂᕐᒧᑦ ᐅᕝᕙᓘᓐᓃᑦ ᐱᓕᕆᑎᑕᐅᓂᐊᕐᓂᕐᒧᑦ ᐊᒻᒪ ᑮᓇᐅᔭᒃᑯᕕᖃᕐᓗᑎᑦ.
(0) Comments