ᓄᓇᕗᑦ ᐅᖃᖅᑐᑦ “ᐅᕙᑦᑎᓐᓂ ᐅᒃᐱᕈᓱᒋᑦᑎ” ᐃᑲᔪᖃᑦᑕᕐᓂᕐᒧᑦ ᖃᖓᑕᓲᓂᒃ

ᖃᖓᑕᓲᑦ ᐅᖃᖅᑐᑦ ᑲᔪᓯᔪᓐᓇᕋᔭᓚᐅᙱᓐᓂᖏᓐᓂᒃ ᒐᕙᒪᒃᑯᑦ ᐃᑲᔪᓚᐅᙱᑉᐸᑕ

ᐋᓐᓂᐊᕕᒡᔪᐊᕐᓇᒥᓐ ᓄᓇᕗᑦ ᖃᖓᑕᓲᖏᑦ ᐃᖏᕐᕋᖃᑦᑕᐃᓐᓇᖅᑐᑦ ᐱᔨᑦᑎᕋᖅᖢᑎᒃ ᐃᑭᒪᔪᒪᔪᓂᒃ ᐊᒻᒪ ᐋᓐᓂᐊᕐᕕᓕᐊᕆᐊᓕᖕᓂᒃ ᐊᒻᒪᓗ ᐃᖅᑲᓇᐃᔭᖅᑎᓂᒃ ᐊᑐᖅᑕᐅᔭᕆᐊᖃᒻᒪᕆᒃᑐᓂᒃ ᐊᒻᒪᓗ ᐱᖁᑎᓂᒃ ᐅᓯᑲᑕᒃᖢᑎᒃ. (ᐊᔾᔨᓕᐅᕆᔨ ᒦᒐᓐ ᑎᐅᓕᖕ)

By ᒦᒐᓐ ᑎᐅᓕᖕ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Nunavut says “trust us” when it comes to subsidizing airlines

ᐃᑭᒪᔪᒪᕙᒃᑐᑦ ᓄᖃᑳᓪᓚᖕᓂᖏᓐᓄᑦ ᓄᕙᒡᔪᐊᕐᓇᖅ-19-ᒧᑦ, ᓈᒻᒪᙱᓛᖑᔪᖅ ᖃᖓᑕᓲᓕᕆᓂᕐᒧᑦ, ᐅᖃᖅᑐᖅ ᑯᕆᔅ ᐄᕗᕆ, ᐊᖓᔪᖅᑳᖅ ᐊᒻᒪ ᐊᖓᔪᖅᑳᖅ ᐊᐅᓚᑦᑎᔨ ᑲᓃᑎᐊᓐ ᓄᐊᑦᑯᓐᓄᑦ, ᐅᖃᕆᓪᓗᓂ “ᐱᐅᙱᓐᓂᕐᓴᕐᓘᓐᓃᑦ 9/11-ᒥ”.

ᖃᖓᑕᓲᓕᒫᑦ ᓄᓇᕐᔪᐊᒥ ᑕᒪᑐᒧᖓ ᓈᒻᒪᙱᓕᐅᕈᑎᖃᖅᑐᑦ ᐊᒻᒪᓗ ᐱᐅᓂᕐᓴᐅᓪᓗᓂ ᓄᖅᑲᖓᑎᓚᐅᑲᒡᓗᒋᑦ ᐊᒻᒪ “ᐅᑕᖅᑭᑐᐃᓐᓇᕐᓗᑎ ᐊᓂᒍᕐᓂᐊᕐᓂᖓᓂᒃ,” ᐄᕗᕆ ᐅᖃᖅᑐᖅ.

“ᑭᓯᐊᓂᓕ ᐊᔾᔨᐅᙱᔾᔪᑎᖃᖅᑐᒍᑦ ᓄᖃᖅᑎᑦᑎᔪᓐᓇᙱᓐᓂᑦᑎᓐᓂᒃ ᐊᐅᓚᑦᑎᔾᔪᑎᑦᑎᓐᓂᒃ,” ᐅᖃᖅᑐᖅ.

ᖃᖓᑕᓲᑦ ᓄᓇᕗᒥᑦ ᐊᖅᑯᑎᑐᐊᖑᖕᒪᑕ, ᐄᕗᕆ ᐅᖃᖅᑐᖅ. ᑎᐅᕆᑑᕆᒥ ᐊᖅᑯᑎᖃᑕᖃᙱᑎᓪᓗᒍ ᓄᓇᓕᖕᓂ ᐊᒃᑐᐃᖃᑦᑕᐅᑎᒍᑎᓂᒃ, ᐊᐅᓚᑦᑏᓐᓇᕆᐊᖃᕐᒪᑕ ᐱᔨᑦᑎᕋᐅᑎᖏᓐᓂᒃ ᐃᓄᖕᓄᑦ ᐋᓐᓂᐊᕐᕕᓕᐊᕆᐊᖃᖅᑐᓄᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᐊᑐᖅᑕᐅᔭᕆᐊᖃᒻᒪᕆᒃᑐᓄᑦ ᐊᒻᒪᓗ ᐱᖁᑎᓂᒃ ᐅᓯᑲᑕᖕᓂᕐᒧᑦ, “ᒪᑯᐊᖑᒐᓗᐊᖅᐸᑕ ᑯᕕᖅᑕᐅᑎᒧᑦ ᐃᓚᒃᓴᓂᒃ ᐅᕝᕙᓘᓐᓃᑦ ᓂᕿᒃᓴᓂᒃ,” ᐅᖃᖅᑐᖅ.

ᐊᒻᒪᓗ, ᖃᖓᑕᓲᖑᔪᑦ ᐃᖏᕐᕋᖃᑦᑕᐃᓐᓇᕆᐊᖃᖅᖢᑎᒃ ᐋᓐᓂᐊᕖᑦ ᐱᖁᑎᒃᓴᖏᓐᓄᑦ ᐊᒻᒪᓗ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᕈᑎᓂᒃ, ᓲᖃᐃᒻᒪ ᐊᑭᑐᓗᐊᖅᑐᐊᓘᓕᕋᔭᕐᒪᓐ ᖃᖓᑕᓲᓂᒃ ᓵᑕᕐᓯᑲᑕᖃᑦᑕᕈᑎ ᖃᐅᔨᓴᕈᑎᓂᒃ ᐊᐅᓪᓚᖅᑎᑦᑎᔭᕆᐊᖃᓕᕌᖓᑕ.

ᖃᖓᑕᓲᖅ ᑮᓇᐅᔭᖅᑐᔪᓄᑦ ᐊᑐᖃᑦᑕᙱᓐᓂᕐᓴᐅᓕᕐᑐᑦ ᐊᒻᒪ ᑮᓇᐅᔭᓕᐅᕈᑎᒃᓴᓕᕆᓂᕐᒥᑦ, ᐄᕗᕆ ᐅᖃᖅᑐᖅ, ᑭᓯᐊᓂᓕ ᐱᖁᑎᖓᓂ ᑲᒪᒋᔭᖃᐃᓐᓇᕆᐊᖃᕐᒪᑕ ᐅᑭᐅᕐᑕᖅᑐᕐᒥᐅᓂᒃ ᐱᔨᑦᑎᕋᕈᓐᓇᖁᓪᓗᒋᑦ.

“ᐅᕙᑦᑎᓐᓂ ᐅᒃᐱᕈᓱᒋᑦᑎ”

ᓄᓇᕗᑦ ᒐᕙᒪᒃᑯᑦ ᐊᑐᕐᓯᒪᓕᕐᑐᑦ $24 ᒥᓕᐊᓐ ᑖᓚᓂ ᒫᑦᓯ 30-ᒥ ᐱᒋᐊᖅᖢᑎᒃ ᒪᑯᓄᖓ ᑳᒻ ᐃᐅᑯᓐᓄ ᐊᒻᒪ ᑲᓃᑎᐊᓐ ᓄᐊᑦᑯᓐᓄᑦ, ᑖᒃᑯᐊ ᓄᓇᕗᒥᑦ ᐱᔨᑦᑎᕋᖃᑦᑕᕐᓂᖏᓐᓄᑦ ᐊᒻᒪᓗ “ᐱᑕᖃᐃᓐᓇᕈᓐᓇᖁᓪᓗᒋᑦ,” ᐅᖃᓚᐅᕐᑐᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᑦ ᔪᐊᔾ ᕼᐃᒃᔅ.

“ᖃᐅᔨᒪᔪᒍᑦ ᐊᓯᙳᑳᓪᓚᒍᑎᒻᒪᕆᐅᓂᖓᓂᒃ … ᑭᓯᐊᓂᓕ ᐊᓯᐊᒎᕐᕕᖃᓚᐅᙱᓐᓇᒃᑕ,” ᐅᖃᖅᑐᖅ.

ᒫᑦᓯ 30 ᐊᒻᒪ ᐄᐳᕈᓪ 30 ᐊᑯᓐᓂᖓᓂᒃ, ᓄᓇᕗᑦ ᒐᕙᒪᒃᑯᑦ ᐊᑭᓖᓚᐅᕐᑐᑦ $9.6 ᒥᓕᐊᓐ ᑖᓚᓂ ᖃᖓᑕᓲᓄᑦ, ᐋᖅᑭᓱᕐᓯᒪᓂᖏᑦᑎᒍᑦ ᖃᔅᓯᓂ ᐃᒃᓯᕙᐅᑕᖃᕋᔭᕐᓂᕐᒥᑦ ᐊᑐᖅᑕᐅᖃᑦᑕᕋᔭᖅᑐᓂᒃ ᐋᓐᓂᐊᕐᕕᓕᐊᖅᑐᓄᑦ ᐊᒻᒪ ᐱᓕᕆᐊᖏᓐᓄᑦ ᐃᖏᕐᕋᔭᕆᐊᖃᖅᐸᒃᑐᓄᑦ.

ᑕᖅᑭᓄᑦ ᐄᐳᕈᓪ, ᒪᐃ ᐊᒻᒪ ᔫᓂ, ᓄᓇᕗᑦ ᒐᕙᒪᒃᑯᑦ ᑐᓂᓯᓚᐅᕐᑐᑦ $16.2 ᒥᓕᐊᓐᑖᓚᓂ ᑐᕌᖓᓪᓗᓂ ᑖᒃᑯᓄᖓ ᒪᕐᕉᖕᓄᑦ ᖃᖓᑕᓲᓄᑦ.

ᓄᓇᕗᑦ ᒐᕙᒪᒃᑯᑦ “ᕿᓂᒃᑲᓐᓂᓚᐅᕐᑐᑦ” ᐃᑲᔫᑎᒃᓴᒃᑲᓐᓂᐅᓇᔭᖅᑐᒥᓐ, ᕼᐃᒃᔅ ᐅᖃᖅᑐᖅ. ᒪᐅᓇ ᓴᖅᑭᔮᓗᐊᙱᑦᑐᒃᑯᑦ ᐊᖏᕈᑎᑎᒍᑦ ᑖᒃᑯᐊᒃ ᖃᖓᑕᓲᒃ ᑮᓇᐅᔭᓕᐅᕈᑎᖏᑦ ᐃᓚᖏᑦ ᒐᕙᒪᒃᑯᓐᓄᐊᕋᔭᖅᖢᓂᔾᔪᒃ.

ᐃᒪᐃᓕᐅᓚᐅᕐᑐᑦ “ᐅᑎᖅᑕᕋᑲᑕᒃᖢᑎᒃ ᑮᓇᐅᔭᓕᕆᔨᖏᓪᓗ ᐊᒻᒪ ᐅᕙᒍᑦ ᑮᓇᐅᔭᓕᕆᔨᕗᑦ ᐋᖅᑭᒃᓱᐃᓇᓱᒃᖢᑎ ᒫᓐᓇᑲᐅᑎᒋ ᐊᑐᕋᔭᖅᑕᖏᓐᓄᑦ ᑮᓇᐅᔭᓕᕆᓂᕐᒥᑦ,” ᕼᐃᒃᔅ ᐅᖃᖅᑐᖅ.

“ᒪᓕᒐᓕᕆᔨᒃᑯᑦ ᑲᑎᒪᓕᕐᐸᑕ ᐅᑭᐊᒃᓵᖅ ᑕᒪᒃᑯᐊ ᓇᐃᓴᐅᑏ ᓴᐳᑎᓯᒪᔭᕆᐊᖃᕐᓂᐊᖅᑕᒃᑲ,” ᕼᐃᒃᔅ ᐅᖃᖅᑐᖅ, “ᑕᒪᒃᑯᐊ ᐊᒋᕈᑎᑦᑎᓐᓃᑦᑐᑦ ᓱᕋᒃᑎᑦᑕᐃᓕᒪᓗᒋ.”

ᑕᒪᓐᓇᓕ ᓄᓇᕗᑦ ᒐᕙᒪᒃᑯᑦ ᐊᑐᖃᑦᑕᕋᓗᐊᖅᖢᑎᒃ ᑭᒃᑯᓕᒫᓄᑦ ᑮᓇᐅᔭᓂ ᐃᑲᔪᕋᓱᒃᖢᑎᒃ ᐃᒻᒥᒃᑰᖓᔪᓂᒃ ᑲᒻᐸᓂᓂᒃ, ᑭᓇᑐᐃᓐᓇᖅ ᖃᓄᖅ ᐅᓇ $24 ᒥᓕᐊᓐᑖᓚ ᐃᑲᔫᑎ ᑲᒻᐸᓂᓄᑦ ᐋᖅᑭᒃᑕᐅᓯᒪᓂᖓᓂᒃ.

ᐃᓚᒋᔭᐅᓪᓗᑎᒃ ᓄᓇᕗᑦ ᒐᕙᒪᑯᓐᓄᑦ, ᐱᓕᕆᔨᒻᒪᕆᐅᔪᑦ ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᐊᑐᐃᓐᓇᖃᖅᑐᑦ ᑲᓃᑎᐊᓐ ᓄᐊᑦ ᐊᒻᒪ ᑳᒻ ᐃᐅ ᑮᓇᐅᔭᓕᕆᔾᔪᓯᖏᓐᓂᒃ, ᑕᒪᑯᒧᖓᓗ ᕼᐃᒃᔅ ᐅᖃᓚᐅᕐᑐᖅ ᑮᓇᐅᔭᓂ ᐊᑐᖃᑦᑕᕐᓂᕐᒧᑦ ᐃᓱᒪᓕᐅᕆᓂᖅ ᓴᖅᑭᔮᕐᓂᖓᓂᑦ “ᒐᕙᒪᓕᕆᓂᓕᒫᒃᑯᑦ, ᒐᕙᒪᑐᖃᒃᑯᑎᒍᑦ ᐊᒻᒪ ᓄᓇᕗᑦᑎᒍᑦ.”

“ᐅᕙᑦᑎᓐᓂ ᐅᒃᐱᕈᓱᒋᑦᑎ,” ᕼᒃᔅ ᐅᖃᖅᑐᖅ, “ᐊᒻᒪᓗ ᐅᒃᐱᕈᓱᒋᐊᖃᖅᖢᖓ ᐱᓕᕆᐊᖃᕐᓂᕐᒧᑦ ᐱᓕᕆᔨᒻᒪᕆᐅᔪᑦ ᒐᕙᒪᒃᑯᓐᓄᑦ ᓈᒻᒪᒐᓱᒋᔭᖏᓐᓂ ᐱᓕᕆᓯᒪᓂᖏᓐᓂᒃ … ᐅᒃᐱᕈᓱᒋᐊᖃᕋᒪ ᐃᓱᒪᓕᐊᖏᓐᓂᒃ. ᑕᐃᒪᐃᖢᖓᓗ.”

ᖃᖓᑕᓲᑦ ᓇᓗᓇᐃᕐᑕᐅᓯᒪᙱᒃᑲᓗᐊᖅᑎᓪᓗᒋᑦ ᐱᓪᓚᕆᒃᑯᑦ ᐱᔨᑦᑎᐅᑎᐅᓂᖓᓂᒃ, “ᖃᖓᑕᓲᓕᕆᓂᕐᑕᖃᙱᑉᐸᑦ ᑕᒫᓂ ᓇᒧᓕᒫᖅ ᐊᒃᑐᐃᓂᖃᕋᔭᙱᓐᓇᑦᑕ ᓄᓇᕐᔪᐊᒥ,” ᐅᖃᖅᑐᖅ ᕼᐃᒃᔅ.

ᖃᖓᑕᓲᓕᕆᔨᒃᑯᑦ ᐱᓕᕆᔾᔪᑎᖃᖃᑦᑕᕐᒪᑕ ᐱᓇᓱᐊᒻᒪᒃᖢᑎᒃ ᐃᓛᓐᓂᒃᑯᑦ, ᐄᕗᕆ ᐅᖃᖅᑐᖅ.

“ᐃᑲᔪᖅᑕᐅᙱᑉᐸᑕ ᓄᖅᑲᑐᐃᓐᓇᕆᐊᖃᕋᔭᒻᒪᕆᖕᒪᑕ,” ᐅᖃᖅᑐᖅ.

$49.3 ᒥᓕᐊᓐ ᑖᓚᐃᑦ ᐊᖏᖅᑕᐅᔭᕆᐊᖃᓛᖅᑐᑦ

ᓄᓇᕗᑦ ᒐᕙᒪᒃᑯ ᐊᑐᕐᒪᑕ ᒐᕙᒪᑐᖃᒃᑯᑦ ᓄᕙᒡᔪᐊᕐᓇᖅ-19-ᒧᑦ ᐃᑲᔫᑎᒃᓴᖏᓐᓂᒃ ᐆᒧᖓ ᐋᖅᑭᒃᑕᐅᓯᒪᓂᑰᙱᑦᑐᒧᑦ $50 ᒥᓕᐊᓐ ᑖᓚᓂ ᐊᑐᕐᓯᒪᓕᕐᑕᖏᓐᓂ ᐄᐳᕈᒥ ᐱᒋᐊᖅᖢᒍ.

ᓄᓇᕗᑦ ᒐᕙᒪᒃᑯᑦ ᐱᑖᓚᐅᕐᓯᒪᖕᒪᑕ $30.8 ᒥᓕᐊᓐ ᑖᓚᓂᒃ ᒐᕙᒪᑐᖃᒃᑯᓐᓂᑦ ᒪᐃ ᓄᙳᐊᓂᒃ, ᑖᓐᓇᓗ ᑮᓇᐅᔭᖅᑖᕈᑎᑎᒎᖓᓪᓗᓂ, ᕼᐃᒃᔅ ᐅᖃᖅᑐᖅ.

“ᓇᓗᓇᙱᑦᑐᖅ ᓈᒻᒪᙱᓗᐊᕐᓂᖓᓂᒃ,” ᐅᖃᖅᑐᖅ.

ᑮᓇᐅᔭᓕᕆᓂᕐᒧᑦ ᐊᐅᓚᑦᑎᔨᒃᑯᑦ ᑲᑎᒪᔨᖏᑦ, ᐊᐅᓚᑕᐅᓪᓗᑎᒃ ᕼᐃᒃᔅᒧᑦ, ᐊᖏᕐᓯᒪᖕᒪᑕ 7-ᓂᒃ ᐊᑐᖃᑦᑕᐃᓐᓇᙱᑦᑐᒧᑦ ᐊᒃᑐᐊᔪᓄᑦ ᓄᕙᒡᔪᐊᕐᓇᖅ-19-ᒧᑦ ᐊᑐᕈᑎᒃᓴᓂᒃ ᑕᐃᒪᙵ ᐄᐳᕉᓚᐅᕐᑐᒥᑦ, ᐅᑯᑎᒎᓇᕐᓕ ᓄᓇᕗᑦ ᒐᔭᑦ. ᑕᒪᒃᑯᐊ ᐊᑐᖅᑕᐅᖃᑦᑕᐃᓐᓇᙱᑦᑐᓄᑦ ᐊᖏᕈᑎᐅᔪᑦ ᐱᔪᓐᓇᕈᑎᐅᔪᑦ ᒐᕙᒪᒃᑯᑦ ᐊᑐᕈᓐᓇᕐᓗᑎᒃ 2020/21 ᐊᕐᕌᒍᒧ ᐊᐅᓚᑦᑎᔾᔪᑎᓂᒃ ᐊᑐᖅᑕᐅᓇᔭᙱᑦᑐᓂᒃ.

ᑖᒃᑯᐊ 7 ᐊᖏᖅᑕᐅᒍᑎᐅᓯᒪᔪᑦ ᑲᑎᖢᑎᒃ $49.3 ᒥᓕᐊᓐ ᑖᓚᐅᔪᑦ, ᐊᒻᒪᓗ ᐊᖏᖅᑕᐅᔭᕆᐊᖃᕐᓂᐊᖅᖢᑎᒃ ᐊᑐᖅᑕᐅᖏᓐᓇᖅᐸᒋᑦᑐᑎᑐᑦ ᑭᖑᓪᓕᕐᒥ ᑲᑎᒪᔨᕐᔪᐊᑦ ᑲᑎᒪᓕᕐᐸᑕ, ᑖᓐᓇᓗ ᐃᓱᒪᒋᔭᐅᔪᖅ ᓯᑎᐱᕆᒥ ᐊᑐᖅᑕᐅᓂᐊᕐᓂᖓᓂᒃ.

ᓄᓇᕗᑦ ᒐᕙᒪᒃᑯᑦ ᐊᑐᓚᐅᕐᒪᑕ ᑖᒃᑯᓂᖓ ᑮᓇᐅᔭᓂ ᓂᕿᓄᑦ ᖃᓄᐃᓕᐅᕈᑎᓄᑦ ᐊᒻᒪᓗ ᐃᓄᑑᕝᕕᐅᔭᕆᐊᓕᖕᓄᑦ, ᒪᑯᐊ ᐃᓚᐅᓪᓗᑎᒃ ᐃᒡᓗᓕᐅᕐᑏᑦ ᓴᓇᔭᖅᑐᖅᓯᒪᔪᑦ ᐊᐅᔭᐅᓂᖓᓂ.

ᑭᓯᐊᓂᓕ ᓇᑉᐸᓪᓗᐊᖓ ᑮᓇᐅᔭᑦ ᐅᑯᓄᖓ ᑳᒻ ᐃᐅ ᐊᒻᒪ ᑲᓃᑎᐊᓐ ᓄᐊᑦᒧᑦ ᑐᓂᔭᐅᓯᒪᓕᕐᑐᑦ.

ᐊᒻᒪᓗ $24 ᒥᓕᐊᓐ ᑖᓚᐃ ᐊᑐᖅᑕᐅᓯᒪᔪᑦ ᖃᖓᑕᓲᓄᑦ ᐃᓱᖃᖅᖢᑎᒃ ᔫᓂᐅᑉ ᓄᙳᐊᓄᑦ ᐊᑐᖅᑕᐅᓇᔭᖅᑐᓄᑦ.

ᒐᕙᒪᑐᖃᒃᑯᑦ ᖃᖓᑕᓲᓂᒃ ᑐᓂᓯᓚᐅᕐᓯᒪᔪᑦ $5 ᒥᓕᐊᓐ ᑖᓚᓂ ᐄᐳᕉᑎᓪᓗᒍ, ᖄᖓᒍᑦ $30.8 ᒥᓕᐊᓐ ᑖᓚᐃᑦ ᓄᓇᕗᑦ ᒐᕙᒪᒃᑯᓐᓄᑦ ᑐᓂᔭᐅᓯᒪᔪᓂᒃ. ᐊᒻᒪᓗ, ᐄᕗᕆ ᐅᖃᓚᐅᕐᑐᖅ ᑲᓃᑎᐊᓐ ᓄᐊᑦᑯᑦ ᐃᑲᔫᑎᒃᓴᖅᑖᕐᓯᒪᓂᖏᓐᓂᒃ ᑯᐸᐃᒃ ᒐᕙᒪᒃᑯᖏᓐᓂᒃ ᐊᒻᒪ ᓄᓇᑦᓯᐊᕐᒥ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᖃᐅᔨᓇᓱᒃᓯᒪᔪᑦ ᑳᒻ ᐃᐅᑯᓐᓂᒃ ᐅᖄᓚᐅᑎᒃᑯᑦ ᐊᒻᒪ ᖃᕋᓴᐅᔭᒃᑯᑦ ᑎᑎᕋᕐᓯᒪᓪᓗᑎᒃ ᐊᒻᒪᓗ ᕙᐃᔅᐳᒃᑯᑦ ᑭᓯᐊᓂᓕ ᑭᐅᔭᐅᓚᐅᙱᑦᑐᑦ ᓱᓕ.

ᕼᐃᒃᔅ ᒐᕙᒪᑐᖃᒃᑯᓐᓄ ᓈᒻᒪᙱᓕᐅᕈᑎᖃᕐᓯᒪᓚᐅᕐᑐᖅ ᐄᐳᕉᑎᓪᓗᒍ ᑮᓇᐅᔭᖅᑖᖅᑎᑦᑎᓯᒪᙱᓗᐊᕐᓂᖏᓐᓂᒃ ᓄᓇᕗᑦ ᒐᕙᒪᒃᑯᓐᓂᒃ.

“ᑐᑭᓯᑎᓐᓇᓱᐃᓐᓇᐅᔭᕋᓗᐊᕋᑦᑎᒍᑦ ᓄᓇᕗᑦ ᐊᔾᔨᐅᙱᓗᐊᕐᓂᖓᓂᒃ,” ᕼᐃᒃᔅ ᐅᖃᖅᑐᖅ.

ᑖᓐᓇ ᐊᒻᒪ ᐊᓯᖏᑦ ᒐᕙᒪᒃᑯᓐᓄᑦ ᐱᓕᕆᔨᒻᒪᕆᐅᔪᑦ ᐅᖃᓪᓚᖃᑎᖃᑲᑕᒃᓯᒪᔪᑦ ᒐᕙᒪᑐᖃᒃᑯᓐᓂᒃ ᐱᓕᕆᖃᑎᒋᕙᒃᑕᖏᓐᓂᒃ, ᐊᒻᒪᓗ ᐃᒪᓐᓇ ᑐᑭᓯᓯᒪᓪᓗᓂ ᐅᓇ $30.8 ᒥᓕᐊᓐ ᑖᓚ ᓯᕗᓪᓕᖅᐹᖑᓚᐅᕐᓂᖓᓂᒃ ᒐᕙᒪᑐᖃᒃᑯᑦ ᐃᑲᔫᑎᖏᓐᓂᒃ ᐊᒻᒪᓗ ᑭᖑᓪᓕᒃᓴᖅ ᐊᒡᒋᖅᐸᓪᓕᐊᓪᓗᓂ. ᑭᓯᐊᓂᓕ ᖃᑯᒎᓇᔭᕐᓂᖓ ᖃᐅᔨᒪᙱᑦᑐᖅ.

“ᑐᖑᔪᕈᒧᔪᒃᑐᓂᒃ ᑐᓐᓂᔭᐅᓂᖅ” ᓂᕆᐅᓇᖅᑐᓂᒃ

ᐊᐅᓪᓚᖃᑦᑕᕐᓂᕐᒧᑦ ᓄᖅᑲᖅᑎᑕᐅᓯᒪᔪᑦ ᓱᒃᑲᐃᑦᑐᒥ ᒪᑐᐃᕐᑕᐅᕙᓪᓕᐊᓯᔪᑦ ᓄᓇᕗᒥᑦ—ᐊᓯᖏᓐᓄᑦ ᓄᓇᓕᖕᓄᑦ ᐊᐅᓪᓚᕈᓐᓇᕐᓯᓪᓗᑎᒃ, ᐊᒻᒪ ᐄᕗᕆ ᐅᖃᓚᐅᕐᑐᖅ ᖃᖓᑦᑕᐅᑎᑖᕋᓱᒃᑐᑦ ᐅᓄᕐᓯᕚᓪᓕᕐᓂᖏᓐᓂᒃ.

“ᓂᕆᐅᒃᐳᒍᑦ ᑕᑯᓵᓕᓂᕐᓴᐅᓂᐊᕐᓂᑦᑎᓐᓂᒃ ᑐᖑᔪᕈᔪᒃᑐᓂᒃ ᑐᓂᔭᐅᖃᑦᑕᕐᓂᐊᕐᓂᒥᓐ,” ᐅᖃᖅᑐᖅ, “ᑭᓯᐊᓂᓕ ᒥᑭᖢᓂ.”

ᕼᐃᒃᔅ ᐅᖃᒃᑲᓐᓂᓚᐅᕐᑐᖅ ᑐᓴᒐᒃᓴᓕᐅᕐᓇᒥᑦ ᔫᓂ 11-ᐅᑎᓪᓗᒍ ᑕᒪᒃᑯᐊ ᐊᑑᑎᖃᓪᓚᕆᙱᑦᑐᑦ ᓄᓇᕗᑦ ᓯᓚᑖᓄ ᐊᐅᓪᓚᖃᑦᑕᙱᒃᑯᑎ ᐱᐅᓂᕐᓴᐅᓂᖓᓂᒃ.

ᑭᓯᐊᓂᓕ ᑕᒪᒃᑯᐊ ᖃᖓᑦᑕᐅᑎᑖᕈᑏᑦ ᐅᓄᕐᓯᕙᓪᓕᐊᑎᓪᓗᒋᑦ, ᓄᓇᕗᑦ ᒐᕙᒪᒃᑯ “ᑲᔪᓰᓐᓇᕐᓂᐊᖅᑐᑦ ᖃᐅᔨᓴᕐᓗᑎᒃ ᓇᐅᒃᑯᑦ ᐃᑲᔫᑎᖃᕈᓐᓇᕆᐊᒃᓴᖏᓐᓂᒃ ᖃᖓᑕᓲᓂᒃ … ᑮᓇᐅᔭᓕᐅᕈᑎᒋᕙᓪᓕᐊᔭᖏᓐᓄᓪᓗ ᒫᓐᓇ,” ᐅᖃᖅᑐᖅ.

ᐄᕗᕆ ᐅᖃᓚᐅᕐᑐᖅ ᓇᓗᓇᕐᓂᖏᓐᓂᒃ ᐃᑲᔫᑎᒃᓴᖃᕋᔭᕆᐊᒃᓴᖏᓐᓂᒃ ᔫᓂ ᐊᓂᒍᓚᐅᕐᑎᓪᓗᒍ.

“ᓴᒡᓗᓇᔭᕋᒪ ᐅᖃᐅᑎᒍᒃᑭᑦ ᐊᔪᕐᓇᙱᑦᑐᑯᓘᓂᖓᓂᒃ,” ᐅᖃᖅᑐᖅ. “ᖃᐅᔨᒪᔪᒪᒐᑦᑕᓕ ᖃᓄᑎᒋ ᐃᑲᔪᖅᑐᖅᑕᐅᓯᒪᖕᒪᖔᑦ ᓯᕗᒧᑦ ᐱᓕᕆᔪᓐᓇᖁᓪᓗᑕ.”

ᓇᓗᓇᕈᓘᔭᕋᓗᐊᖅᑎᓪᓗᒍ, ᐄᕗᕆ ᐅᖃᓚᐅᕐᑐᖅ ᖃᖓᑕᓲᖅ ᐅᔾᔨᕈᓱᑦᑎᐊᕐᓂᖓᓂ ᑕᒪᒃᑯᖓ ᐃᑭᒪᔪᒪᔪᑦ ᐅᓄᕐᓯᕙᓪᓕᐊᓕᕐᐸᑦ ᑖᒃᑯᐊ ᐸᕐᓇᓯᒫᓂᓕᕐᑐᑦ ᖃᖓᑕᓲᑦ.

1,500 ᐃᖅᑲᓇᐃᔭᖅᑎᓂᒃ 10 ᐳᓴᓐᑎᖓᓂ ᓄᖅᑲᖅᑎᑦᑎᔭᕆᐊᖃᓚᐅᕐᑐᑦ ᐃᖅᑲᓇᐃᔭᖅᑐᓂᒃ, ᐄᕗᕆ ᐅᖃᖅᑐᖅ ᐊᒻᒪᓗ ᐃᓚᖏ ᓄᖅᑲᖅᑎᑕᐅᑲᐃᓐᓇᕐᓯᒪᓪᓗᑎᒃ.

“ᐅᑎᖅᑎᓐᓂᐊᖅᑕᕗᑦ ᐊᐅᓚᑦᑎᔪᓐᓇᕐᓯᑦᑎᐊᕈᑦᑕ ᖃᖓᑕᓂᐅᕙᒃᑐᓂᒃ.”

Share This Story

(0) Comments

Join the Conversation

Your email address will not be published. Required fields are marked *

*