ᓄᓇᕗᑦ ᐱᒋᐊᖅᑎᑦᑎᓂᐊᕐᑐᑦ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᕈᑎᒃᓴᓂᒃ ᑕᓪᓕᒪᓂ ᕼᐋᒻᒪᓚᓂ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑕᑯᓇᓱᒃᐳᑦ ᐋᐸᑦ ID NOW ᖃᐅᔨᓴᕈᑎᒥᒃ

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᒋᐊᖅᑎᑦᑎᔪᒪᔪᑦ ᓄᑖᒥᒃ ᖃᐅᔨᓴᕈᑎᒃᓴᒥᒃ ᐆᒧᖓ ᓄᕙᒡᔪᐊᕐᓇᖅ-19 ᑕᓪᓕᒪᒃᑲᓐᓂᕐᓂᒃ ᓄᓇᕗᒥᑦ ᓄᓇᓕᖕᓂ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕᐅᑉ ᑐᒡᓕᖓ, ᕉᐱ ᐳᕋᐅᓐ, ᐅᖃᓚᐅᔾᔨᓚᐅᕐᑐᖅ ᒪᓕᒐᓕᐅᖅᑎᓂᒃ ᐱᓇᓱᐊᕈᓯᐅᓚᐅᕐᑐᒥ ᑲᑎᒪᑎᓪᓗᒋᑦ ᑕᒪᒃᑭᖅᖢᑎᒃ. (ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᔾᔨᙳᐊᖁᑎᖓ)

By ᔨᒻ ᐱᐊᓪ

For an English version of this story, see Nunavut to deploy COVID-19 testing devices in 5 more hamlets

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᐸᕐᓇᓕᕐᑐᑦ ᐱᒋᐊᖅᑎᑦᑎᔪᒪᓪᓗᑎᒃ ᓄᑖᒥ ᕿᓚᒥᕈᓗ ᖃᐅᔨᓴᕈᑎᓄᑦ ᐱᓕᕆᔾᔪᑎᒥᒃ ᐆᒥᖓ ᓄᕙᒡᔪᐊᕐᓇᖅ-19 ᑕᓪᓕᒪᓂ ᓄᓇᓕᖕᓂ, ᒥᓂᔅᑕᐅᑉ ᑐᒡᓕᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᕉᐱ ᐳᕋᐅᓐ, ᐅᖃᓚᐅᕐᑐᖅ ᒪᓕᒐᓕᐅᖅᑎᓄᑦ ᑲᑎᒪᑎᓪᓗᒋ ᕕᕝᕗᐊᕆ 25-ᒥ.

ᐅᑯᐊᖑᔪᑦ ᓄᓇᓖ ᐱᑎᑕᐅᓂᐊᕐᑐᑦ ᐊᕐᕕᐊᑦ, ᐅᖅᓱᖅᑑᖅ, ᐃᒡᓗᓕᒃ, ᓴᓂᑭᓗᐊᖅ ᐊᒻᒪ ᐃᖃᓗᒃᑑᑦᑎᐊᖅ ᐊᒻᒪᓗ ᑖᓐᓇ ᖃᐅᔨᓴᕈᑎᓄᑦ ᐱᓕᕆᔾᔪᑎ ᐊᑎᖃᖅᖢᓂᒃ Abbott ID NOW, ᐳᕋᐅᓐ ᐅᖃᓚᐅᕐᑐᖅ.

“ᐅᑯᐊ ᓄᓇᓖᑦ, ᑕᐅᑐᒃᖢᒋᑦ ᐃᖏᕐᕋᕝᕕᐅᕙᖕᓂᖏ ᐊᓯᖏᓐᓂᒡᓗ, ᑖᒃᑯᓂᖓ ᐱᓕᕆᔾᔪᑎᓂᒃ ᐊᑐᕈᓐᓇᕐᓂᐊᕐᒪᑕ,” ᐳᕋᐅᓐ ᐅᖃᓚᐅᕐᑐᖅ.

ᐅᑯᑎᒎᓇᕐᓕ ᐊᐹᑦ ᖃᐅᔨᓴᖅᕕᒃᓂᑦ, ᐱᓕᕆᔾᔪᑎᒥᒃ ᓴᓇᔨᐅᔪᑦ, ᐅᓇ ID NOW ᐱᓕᕆᔾᔪᑎ ᐆᒥᖓ   ᓄᕙᒡᔪᐊᕐᓇᖅ-19 ᖃᐅᔨᓴᖅᑕᐅᓂᖓ ᖃᐅᔨᔭᐅᒍᓐᓇᕋᔭᕐᑐᖅ 13 ᒥᓂᔅᓂᒃ ᑐᖔᓂᓪᓘᓐᓃ.

ᑭᓯᐊᓂᓕ ᐊᑐᙱᓐᓂᕐᓴᐅᖕᒥᔪᖅ ᐅᑯᓇᙵᑦ BioFire ᐊᒻᒪ GeneXpert ᐱᓕᕆᔾᔪᑎᓂᒃ ᑲᖏᖅᖠᓂᕐᒦᑦᑐᒥᓐ ᐊᒻᒪ ᐃᖃᓗᖕᓂ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑖᒃᑯᓂᖓ ᐊᑐᖃᑦᑕᖅᑐᑦ ᖃᐅᔨᓴᕈᑎᒋᓪᓗᒍ ᕿᖓᐅᑉ ᐃᓗᐊᓂ ᑲᒃᑭᓂᒃ ᐱᔭᐅᖃᑦᑕᖅᑐᓂᒃ ᓄᓇᕗᒥᑦᐅᓂᒃ, ᑖᒃᑯᐊᓗ ᐊᐅᓪᓚᖅᑎᑕᐅᓕᖅᐸᒃᖢᑎᒃ ᑖᒃᑯᓄᖓ ᖃᐅᔨᓴᕐᕕᖕᓄᑦ.

ᑭᓯᐊᓂᓕ ᑕᒪᓐᓇᓕ ᑐᑭᖃᖅᑐᖅ ᑕᒪᒃᑯᐊ ᖃᐅᔨᓴᖅᑕᐅᔪᑦ ᐅᕘᓇ ᓄᑖᒃᑯᑦ Abbott ID NOW ᖃᐅᔨᓴᕈᑎᑎᒍᑦ ᓱᓕ ᐊᐅᓪᓚᖅᑎᑕᐅᖃᑦᑕᕆᐊᖃᕋᔭᕐᑐᑦ ᑲᖏᖅᖠᓂᕐᒧᑦ ᐊᒻᒪ ᐃᖃᓗᖕᓂ ᑕᐃᒪᐃᓪᓚᕆᒃᑲᓗᐊᕐᒪᖔᑕ, ᐅᖃᖅᑐᖅ.

ᑕᐃᒪᓐᓇᐅᑎᓪᓗᒍ, ᐅᑯᐊ ᖃᐅᔨᕈᑎᐅᔪᑦ ᐅᕙᙵᑦ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᕈᑎᐅᔪᓂᒃ ᐱᓕᕆᐊᖑᖃᑦᑕᖅᑐᑦ ᑲᖏᖅᖠᓂᕐᒥᒃ ᐅᕝᕙᓘᓐᓃᑦ ᐃᖃᓗᖕᓂ ᖃᐅᔨᔭᐅᔪᓐᓇᕐᓂᐊᓕᕐᑐᑦ ᐃᖃᕐᕋᑦ 36 ᑐᖔᓂ, ᐳᕋᐅᓐ ᐅᖃᕐᒥᔪᖅ.

ᐅᓇ ᑕᐅᑐᒃᖢᒍ ᐱᐅᓂᕐᓴᐅᔪᖅ ᑲᓇᑕᒥᐅᑕᓄᑦ, ᑕᒫᓂ ᖃᐅᔨᓴᖅᑕᐅᔪᑦ ᖃᐅᔨᔭᐅᔪᓐᓇᖃᑦᑕᕐᒪᑕ ᐅᓪᓗᓂ ᑕᓪᓕᒪᓂᒃ 6-ᓄᑦ.

“ᐃᓱᒪᒐᑦᑕ ᑕᒪᑐᒧᖓ ᐊᙳᑎᓯᒪᓂᑦᑎᓐᓂᒃ” ᐅᖃᖅᑐᖅ, ᐅᖃᖅᖢᓂ ᐅᑯᐊ BioFire ᐊᒻᒪᓗ GeneXpert ᖃᐅᔨᓴᕈᑎᐅᔪᑦ ᐱᐅᓛᖑᓂᕋᖅᑕᐅᓂᕋᖅᖢᓂᒋ ᒫᓐᓇ ᑲᓇᑕᒥ.

ᑭᓯᐊᓂᓕ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᐅᔨᒪᓇᓱᖕᒥᔪᑦ ᓄᑖᓂᒃ ᐱᓕᕆᔾᔪᑎᓂᒃ ᓴᖅᑭᑉᐸᓪᓕᐊᒐᔭᕐᑐᓂᒃ.

“ᓄᑖᓂ ᖃᐅᔨᓴᕈᑎᒃᓴᓂᒃ ᓴᓇᔭᐅᔪᖃᕐᐸᓪᓕᐊᑎᓪᓗᒍ ᐊᒻᒪᓗ ᐊᖏᖅᑕᐅᓯᒪᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑲᓇᑕᒥ, ᑕᐃᒪᓕ ᐃᓚᒋᔭᐅᒐᑦᑕ ᑲᑎᒪᔨᐅᓂᒃᑯᑦ ᖃᓄᖅ ᑕᒪᒃᑯᓂᖓ ᐊᑐᕈᓐᓇᓕᕈᓐᓇᕋᔭᕐᒪᖔᑦᑕ ᐊᔾᔨᒌᙱᑦᑐᓄ ᖃᓄᐃᓕᕈᑎᓄᑦ,” ᐅᖃᖅᑐᖅ.

ᐳᕋᐅᓐ ᐅᖃᐅᓯᖃᓚᐅᕐᑐᖅ ᐊᐱᕆᔪᖃᖅᑎᓪᓗᒍ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᕐᔪᐊᕐᒧᑦ ᒪᓕᒐᓕᐅᕐᑎᒥᒃ ᔮᓐ ᒪᐃᓐ, ᑖᓐᓇ ᐊᐱᕆᓪᓗᓂ ᐳᕋᐅᓐᒧᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᖁᐊᓴ ᖁᓱᒐᕐᒧᑦ ᒪᑯᓂᖓ ᖃᓄᖅ ᐸᕐᓇᐅᑎᖃᕐᒪᖔᑦ ᐊᖏᒡᓕᒋᐊᕈᑎᐅᓇᔭᖅᑐᓄᑦ ᐆᒧᖓ ᓄᕙᒡᔪᐊᕐᓇᖅ-19 ᖃᐅᔨᓴᕈᑎᓂᒃ ᐱᓕᕆᔪᓐᓇᕐᓂᖏᑦᑎᒍᑦ.

ᓄᓇᕗᒥᑦ ᒪᓕᒐᓕᐅᕐᑎᑦ ᐊᐱᖅᓱᑲᑕᓚᐅᕐᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᐅᓚᔾᔪᑎᒃᓴᖏᓐᓂ 2021/22-ᒧᑦ $471-ᒥᓕᐊᓐ ᒥᒃᓵᓄᑦ ᑲᑎᒪᑎᓪᓗᒋᑦ ᑕᒪᒃᑭᖅᖢᑎᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᕐᓂᐊᕐᑐᑦ 25.4 ᐳᓴᓐᑎᖓᓂ ᓄᓇᕗᒥᑦ ᒐᕙᒪᒃᑯᑦ ᐊᐅᓚᑦᑎᔾᔪᑎᒃᓴᖏᓐᓂᒃ ᐊᕐᕌᒍᒧᑦ.

Share This Story

(0) Comments

Join the Conversation

Your email address will not be published. Required fields are marked *

*