ᓄᓇᕗᑦ ᐱᒋᐊᖅᑎᑦᑎᔨᖓᑦ ᑲᑐᔾᔨᖃᑎᒌᑦ ᐱᓂᐊᕐᓂᕋᖅᐳᑦ ᐃᓄᒃᑐᑦ ᐅᖃᐅᓯᕐᒥ ᐊᑐᕐᓗᑎᒃ ᐃᖅᑲᓇᐃᔭᕐᕕᐅᓂᐊᓂᖏᓐᓂᒃ

ᓄᓇᕗᑦ ᑐᙵᕕᒃ ᑎᒥᖓ ᓇᓗᓇᐃᓚᐅᕐᐸᖓ ᓄᓇᕗᑦ ᐅᓪᓗᖓᓂ ᐱᓂᐊᕐᓂᕋᖅᖢᑎᒃ ᐃᓄᒃᑐᑦ ᐅᖃᐅᓯᕐᒥ ᐊᑐᕐᓗᑎᒃ ᐃᖅᑲᓇᐃᔭᕐᕕᐅᓂᐊᕐᓂᕐᒥᒃ.

ᓄᓇᕗᑦ ᑐᙵᕕᒃ ᑎᒥᖓᑕ ᐊᐅᓚᑦᑎᔨᒻᒪᕆᖏᑦ ᑐᓴᖅᑎᑦᑎᓚᐅᕐᑐᑦ ᑖᒃᑯᓂᖓ ᐸᕐᓇᐅᑎᓂᒃ ᖃᓄᐃᓕᐅᕐᓇᐅᑎᓪᓗᒍ ᖁᒡᓗᖅᑑᒥᑦ ᐱᖓᑦᓯᕐᒥᑦ, ᔪᓚᐃ 9-ᒥ.

“ᐃᓚᖓᓕ ᐃᓱᒪᒋᔭᐅᓚᐅᕐᓯᒪᔪᖅ ᓄᓇᕗᒧᑦ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᓛᖑᓗᓂ ᐊᒻᒪ ᐃᖅᑲᓇᐃᔭᕐᕕᖕᓂᑦ, ᐃᓕᓐᓂᐊᕐᕕᖕᓂᑦ ᐊᒻᒪ ᑕᒫᓂᑐᐃᓐᓇᖅ,” ᐅᖃᖅᑐᖅ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᒡᓕᖓ ᔭᐃᒥᓯ ᐃᑦᑐᓗᒃ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᓂᒃᑯᑦ.

“ᑕᒪᓐᓇ ᐱᒋᐊᕈᑎᒋᓂᐊᕋᑦᑎᒍ ᖃᓄᐃᓕᐅᕐᓂᒃᑯᑦ ᐊᒻᒪᓗ ᐱᓇᓱᒻᒪᕆᒡᓗᑕ ᐃᓄᒃᑐᑦ ᐅᖃᐅᓯᖅ ᐊᑐᕐᓗᒍ ᐃᖅᑲᓇᐃᔭᕐᕕᐅᓂᐊᕐᓂᕐᒥᒃ.”

ᑕᒪᓐᓇ ᐱᒋᐊᕐᑎᓐᓂᐊᕐᓗᒍ, ᑲᑐᔾᔨᖃᑎᒌᑦ ᐃᑲᔪᖅᑕᐅᔪᒪᓚᐅᕐᑐᑦ ᐃᓐᓇᑐᖃᕐᓄᑦ, ᓄᓇᕗᑦ ᑐᙵᕕᒃᑯᑦ ᐅᖃᖅᑐᖅ.

ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ ᓄᓇᕗ ᐃᓕᓐᓂᐊᖅᑐᓕᕆᓂᖓ ᑐᙵᕕᖃᓗᐊᕐᓂᖓᓂᒃ ᖃᓪᓗᓈᑎᑑᕐᓂᕐᒥᒃ ᐊᒻᒪ ᐅᐃᕖᑎᑐᑦ ᐊᒻᒪᓗ ᑕᐃᒪᐃᓐᓂᖓᓄ ᐃᓄᒃᑯᑦ ᐊᑐᖅᑕᐅᙱᓐᓂᕐᓴᐅᓕᖅᖢᓂ.

ᑲᑐᔾᔨᖃᑎᒌᖑᔪᑦ ᓇᓗᓇᐃᕐᓯᓚᐅᕐᒥᔪᑦ ᐊᔾᔨᒌᙱᑦᑑᑎᐅᓂᖏᓐᓂᒃ ᐅᖃᐅᓰ ᐅᑯᓇᙵᑦ ᔫᓇᐃᑕᑦ ᓇᐃᓴᓐᑯᑦ ᐱᔪᓐᓇᐅᑎᖏᓐᓂᑦ ᓄᓇᖃᖅᑳᖅᑐᓄᑦ ᐱᔾᔪᑎᖃᖅᖢᑎᒃ, ᑕᐃᒪᓐᓇᓗ ᐱᔪᓐᓇᐅᑎᓂᒃ ᐱᔪᒪᓂᕐᒨᖓᓪᓗᑎᒃ ᐊᒻᒪ ᐊᑐᖃᑦᑕᕐᓂᕐᒥᒃ ᐃᓕᖁᓯᒃᑯᑦ ᐊᑐᖅᑕᐅᕙᒃᑐᓂᒃ.

ᐅᖃᐅᓯᕐᓂᒃ ᖃᐅᔨᓴᕈᑎᐃᐅᔪᑦ ᐱᐊᓂᒃᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑦ ᐃᖅᑲᓇᐃᔭᖅᑎᖏᓐᓄᑦ, ᑲᑐᔾᔨᖃᑎᒌᑦ ᐅᖃᓚᐅᕐᑐᑦ. ᐅᖃᐅᓯᕐᒥ ᐅᖃᓪᓚᒍᓐᓇᕐᓂᖅ ᐊᔾᔨᒌᙱᑦᑑᑎᐅᕗᑦ ᑎᓴᒪᓂᒃ ᑎᑎᕋᕐᕕᖕᓂ ᐅᕙᓂ ᐃᖃᓗᐃᑦ, ᑲᖏᖅᖠᓂᖅ, ᐃᖃᓗᒃᑑᑦᑎᐊᖅ ᐊᒻᒪ ᐋᑐᕚᒥ.

ᒫᓐᓇᒧᓪᓕ ᓄᓇᕗᑦ ᑐᙵᕕᒃᑯ ᐃᓄᐃᑦ ᐃᖅᑲᓇᐃᔭᖅᑎᖏᑦ ᐃᑲᕐᕋᓂ 200-ᓂ ᐃᓄᒃᑐᑦ ᐃᓕᓐᓂᐊᕐᓯᒪᓕᕐᐳᑦ ᐊᕐᕌᒎᓕᖅᑑᖕᓂ ᒪᕐᕉᖕᓂᑦ.

ᑭᖑᓂᑦᑎᐊᖓᒍᓪᓕ ᐃᖅᑲᓇᐃᔭᖅᑎᐅᔪᑦ ᐃᓕᓐᓂᐊᖅᑎᑕᐅᒃᑲᓐᓂᓛᕐᒥᔪᑦ ᒪᓕᒡᓗᑎᒃ ᐊᔪᕈᓐᓃᕆᐊᖃᖅᑕᖏᓐᓂᒃ ᐊᒻᒪ ᐱᓕᕆᐊᖏᑦᑎᒎᖓᔪᓂᒃ.

ᐃᓕᓐᓂᐊᖅᑎᑕᐅᓐᓇᔭᖅᑐᑦ ᐱᖓᓱᐃᓕᖓᓕᖅᑎᑕᐅᓗᑎᒃ, ᒪᓕᒡᓗᑎᒃ ᐅᖃᕈᓐᓇᕐᓂᖏᑦ—ᐱᒋᐊᕈᑎᐅᔪᑦ ᐃᓄᒃᑐᑦ ᐅᖃᕈᓐᓇᖅᑐᓂᒃ, ᐃᓄᒃᑐᑦ ᐅᖃᕈᓐᓇᓗᐊᙱᑦᑐᓂᒃ ᐊᒻᒪ ᐱᒋᐊᓕᓵᕐᓂᑯᓂᒃ.

ᐅᖃᐅᓯᕐᒥ ᐃᓕᓐᓂᐊᕐᑎᑦᑎᓂᖅᑕᖃᕐᓂᐊᖅᑐᑦ ᐅᑯᓇᙵᑦ ᐱᕈᕕᒃᑯᓐᓂᑦ, ᓄᓇᕗᑦ ᑐᙵᕕᒃᑯᑦ ᐅᖃᕐᓯᒪᖏᑦᑐᑦ ᓱᓕ ᖃᖓᐅᓂᐊᕆᐊᒃᓴᖓᓂᒃ.

ᐅᕙᓂᓕ ᓄᓇᕗᑦ ᐃᓄᐃᑦ ᐅᖃᐅᓯᖓᓂᒃ ᓴᐳᔾᔨᓯᒪᓂᕐᒧᑦ ᐱᖁᔭᖅᔪᐊᓂᒃ, ᐃᓄᒃᑐᑦ ᓇᓗᓇᐃᖅᑕᐅᓯᒫᓂᒃᑐᖅ ᐅᖃᐅᓯᐅᓂᖓᓂᒃ ᓄᓇᕗᑦ ᓴᓇᕝᕕᖏᓐᓂᒃ; ᐃᒪᓐᓇᖃᐃ, ᓄᓇᕗᒻᒥᐅᑦ ᓴᐳᔾᔭᐅᓯᒪᓂᖃᖅᐳᑦ ᐅᖃᓪᓚᒍᓐᓇᕐᓗᑎᒃ ᑎᑎᕋᕈᓐᓇᕐᓗᑎᒡᓘᓐᓃᑦ ᐃᓄᒃᑐᑦ ᐃᖅᑲᓇᐃᔭᕐᕕᖏᓐᓂᒃ.

ᓇᐃᓴᐃᔨᒃᑯᑦ ᑲᓇᑕᒥ ᖃᐅᔨᓴᕈᑎᖏᑦ ᓴᕿᑕᐅᓂᑯᑦ 2017-ᒥᑦ ᓴᕿᑎᑦᑎᒍᑎᐅᓚᕐᐳᑦ ᖁᓕᑦ 6-ᖑᔪᑦ ᐃᖅᑲᓇᐃᔭᖅᑏᑦ ᓄᓇᕗᒥᑦ (59.1 ᐳᓴᓐᑎ) ᐅᖃᕐᓯᒪᓂᖏᓐᓄᑦ ᐃᓄᒃᑐᑦ ᐊᑐᖃᑦᑕᕐᓂᖏᓐᓂᒃ ᐃᖅᑲᓇᐃᔭᕐᕕᒃᒥᑦ.

ᐅᓇ ᐱᖁᔭᕐᔪᐊᖅ ᐃᒪᐃᖁᔨᓯᒪᖕᒥᔪᖅ ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᐊᒻᒪᓗ ᐃᒻᒥᒃᑯᑦ ᐱᓕᕆᕝᕕᐅᔪᑦ ᐱᓇᓱᖁᔭᐅᓯᒪᓪᓗᑎᒃ ᐅᖃᓪᓚᖃᑎᖃᖃᑦᑕᕐᓂᕐᒥᒃ ᐊᒻᒪ ᐱᔨᑦᑎᕋᐅᑎᓕᕆᓂᕐᒥᒃ ᑭᒃᑯᑐᐃᓐᓇᕐᓄᑦ ᐃᓄᒃᑐᑦ.

ᑭᓯᐊᓂᓕ ᓄᓇᕗᑦ ᑐᙵᕕᒃ ᑎᒥᖓ ᐅᖃᓚᐅᕐᑐᑦ ᓄᓇᕗᑦ ᐅᖃᐅᓯᓕᕆᓂᕐᒧᑦ ᐱᖁᔭᕐᔪᐊᖅ ᐊᑐᕐᓂᖃᖃᑦᑕᕐᓯᒪᙱᓐᓂᖓᓂᒃ.

“ᐅᑕᕿᔪᓐᓇᐃᓪᓕᒐᑦᑕ ᒐᕙᒪᐅᔪᓂᒃ ᐱᓂᐊᕐᓂᕋᖅᑕᖏᓐᓂᒃ ᐊᑐᓕᖅᑎᑦᑎᓂᐊᕐᓂᖏᓐᓂᒃ,” ᐅᖃᖅᑐᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑐᖅ. “ᖃᓄᐃᓕᐅᕆᐊᖃᓕᕋᑦᑕ.”