ᓄᓇᕗᑦ ᐸᓖᓯᖏᑦ, ᓄᓇᕗᑦ ᒐᕙᒪᒃᑯᑦ ᑲᑎᖃᑎᖃᖅᐳᑦ ᑭᙵᐃᑦ ᒪᐃᔭᖓᓂᒃ ᑲᑎᒪᔨᓂᒡᓗ

ᐊᖓᔪᖅᑳᖅ ᓄᓇᕗᑦ ᐸᓖᓯᑯᓐᓄᑦ ᒪᒥᐊᓚᐅᕐᐳᖅ ᒪᐃᔭᒧᑦ ᐊᒻᒪ ᑲᑎᒪᔨᓄᑦ ᐊᖑᑎ ᑭᙵᓂ ᐅᕐᕈᑎᑕᐅᓚᐅᕐᑎᓪᓗᒍ ᐸᓖᓯᒧ

ᐸᓖᓯᒃᑯᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᑭᒡᒐᖅᑐᐃᔨᖏ ᑲᑎᒪᖃᑎᖃᓚᐅᕐᑐᑦ ᑭᙵᐃᑦ ᒪᐃᔭᖓᓂ ᐊᒻᒪ ᑕᓪᓕᒪᓂᒃ ᑲᑎᒪᔨᓂᒃ ᐊᐃᑉᐹᖑᑎᓪᓗᒍ, ᔫᓂ 9-ᒥᑦ, ᐅᖃᐅᓯᖃᖅᖢᑎ ᐊᖑᑎᒥ ᐅᕐᕈᑎᑕᐅᓂᑯᒥ ᐸᓖᓯᒧᑦ ᓄᓇᓯᐅᑎᐅᑉ ᐹᖓᓄᑦ ᐊᒻᒪᓗ ᑭᖑᓂᐊᒍᑦ ᐋᓐᓂᕐᓱᖅᑕᐅᕐᔪᐊᓕᕐᓂᕐᖢᓂ, ᐱᓂᕋᖅᑕᐅᓪᓗᓂ ᐊᓯᐊᓄᑦ ᐊᖑᑎᒧᑦ ᑎᒍᔭᐅᓯᒪᖕᒥᔪᒧᑦ. (ᐊᔾᔨᙳᐊᖁᑎᒋᔭᐅᔪᖅ)

By ᐃᐊᒪ ᑐᕌᓐᑐ

For an English version of this story, see Nunavut RCMP, GN meet with Kinngait mayor and council

ᑭᙵᐃᑦ ᒪᐃᔭᖓ, ᑎᒧᓐ ᑐᓄ ᐅᖃᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ “ᒪᓕᒐᓕᕆᓂᒃᑯᑦ ᐱᓕᕆᐊᖑᓂᐊᕐᓂᖓᓂᒃ” ᐊᐃᑉᐹᓂ, ᔫᓂ 9 ᑲᑎᒪᖃᑎᖃᓚᐅᕐᑎᓪᓗᒋᑦ ᓄᓇᕗᑦ ᐸᓖᓯᒃᑯᑦ ᐊᖓᔪᖅᑳᖓᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᐱᓕᕆᔨᒻᒪᕆᖏᓐᓂᒃ.

ᐊᒫᓐᑕ ᔫᓐᔅ, ᐊᖓᔪᖅᑳᖅ ᑲᑎᒪᔨᐅᔪᖅ ᓄᓇᕗᑦ ᐸᓖᓯᑯᓐᓄᑦ; ᓯᑏᕙᓐ ᒫᓐᓱᓪ, ᒥᓂᔅᑕᐅᑉ ᑐᒡᓕᖓ ᒪᓕᒐᓕᕆᔨᒃᑯᓐᓄᑦ; ᑭᙵᐃᑦ ᐸᓖᓯᒃᑯᑦ ᐊᖓᔪᖅᑳᖓᑦ ᐊᒻᒪᓗ ᑕᐃᕕᑎ ᔪᐊᓇᓯ, ᒪᓕᒐᓕᐅᕐᑎ ᕿᑭᖅᑖᓘᑉ ᓂᒋᐊᓄᑦ, ᑲᑎᖃᑎᖃᓚᐅᕐᐳᑦ ᑐᓄᒥᑦ ᐊᒻᒪᓗ ᑕᓪᓕᒪᓂᒃ ᕼᐋᒻᒪᓚᒃᑯᑦ ᑲᑎᒪᔨᖏᓐᓂᒃ ᐊᐃᑉᐹᓂ, ᔫᓂ 9-ᒥᑦ ᑭᙵᓂᑦ.

ᑲᑎᒪᓕᓚᐅᕐᓯᒪᔪᑦ ᐊᔾᔨᓕᐅᕐᑕᐅᓂᑯ ᓴᖅᑭᑕᐅᑎᓪᓗᒍ ᐱᓇᓱᐊᕈᓯᐅᓚᐅᕐᑑᑉ ᓯᕗᓂᐊᓂ ᑭᙵᐃᑦ ᐸᓖᓯᖓ ᐊᖑᑎᒥ ᐸᓖᓯᒃᑯᑦ ᓄᓇᓯᐅᑎᖓᑕ ᐹᖓᓄᑦ ᐅᕐᕈᑎᑦᑎᑎᓪᓗᒍ ᑎᒍᓯᓇᓱᒃᑎᓪᓗᒋᑦ. ᐊᖑᑎ ᐊᔾᔨᓕᐅᕐᑕᐅᓯᒪᔪᖅ ᑭᖑᓂᐊᒍᑦ ᐋᓐᓂᕐᓱᖅᑕᐅᓗᐊᒧᑦ ᑎᒍᔭᐅᓯᒪᖕᒥᔪᒥ ᐃᖃᓗᖕᓄᑦ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᔭᕆᐊᖃᓕᓚᐅᕐᓯᒪᔪᖅ.

ᑐᓄ ᐅᖃᓚᐅᕐᑐᖅ ᔫᓐᔅ ᒪᒥᐊᕐᓂᕋᖅᖢᓂᐅᒃ ᑭᒡᒐᖅᑐᐃᓪᓗᓂ ᐸᓖᓯᒃᑯᓐᓂ ᑕᒪᐃᓐᓄᑦ ᐸᓖᓯᐅᑉ ᖃᓄᐃᓕᐅᕐᓂᖓᓄᑦ ᐊᒻᒪᓗ ᐊᖑᑎ ᖃᓄᐃᑎᑕᐅᓂᑰᓂᖓᓄᑦ ᑎᒍᔭᐅᓯᒪᓕᕐᑎᓪᓗᒍ.

“ᒪᒥᐊᔾᔪᑎᐅᔪᖅ ᓈᒻᒪᒋᕙᕗᑦ,” ᑐᓄ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑐᓄ ᐅᖃᓚᐅᕐᒥᔪᖅ ᑲᑎᒪᓂᖅ, ᑖᓐᓇᓗ ᐃᑲᕐᕌᖕᓂ ᒪᕐᕉᖕᓂ ᐊᑯᓂᐅᓂᖃᖅᖢᓂ, ᐃᑲᔫᑎᖃᕐᓂᕋᓚᐅᕐᑕᖓ, ᑭᓯᐊᓂᓕ ᑲᑎᒪᔨᐅᔪᑦ ᓄᑖᓂ ᑐᓴᖅᑎᑕᐅᓚᐅᙱᑦᑐᑦ ᖃᓄᐃᓕᐅᕈᑎᕕᓂᐅᑉ ᒥᒃᓵᓄᑦ.

“ᐅᖃᓪᓚᑲᑕᑦᑎᐊᓚᐅᕋᑦᑕ. ᑐᓴᕐᑕᕗᓪᓕ ᒪᑯᓇᙶᕐᓯᒪᓂᑰᓪᓗᑎᒃ ᐊᓯᖏᓐᓂᙶᖅᑐᓂᒃ ᑐᓴᒐᒃᓴᓕᐅᕕᓂᕐᓂᒃ… ᐊᒫᓐᑕ ᔫᓐᔅ ᐅᖃᐅᓯᖃᑐᐃᓐᓇᓚᐅᕐᑐᖅ ᑐᓴᒐᒃᓴᑎᒍᑦ ᐅᖃᐅᓯᐅᓂᑯᓂᒃ ᐊᒻᒪᓗ ᑲᑎᒪᔨᓂᒃ ᖃᐅᔨᑎᑦᑎᓪᓗᓂ … ᖃᓄᐃᑦᑐᕕᓂᕐᓂᒃ,” ᑐᓄ ᐅᖃᖅᑐᖅ.

ᒪᕐᕈᐃᓂᒃ ᖃᐅᔨᓴᖅᑐᖃᓕᓚᐅᕐᑐᖅ ᖃᓄᐃᓕᐅᕈᓯᕕᓂᕐᓂᒃ—ᐊᑕᐅᓯᖅ ᐸᓖᓯᒃᑯᓐᓂᑦ ᐱᓕᕆᐊᖑᓪᓗᓂ ᐊᒻᒪ ᐊᑕᐅᓯᖅ ᐋᑐᕚᒥ ᐸᓖᓯᒃᑯᓐᓄᑦ.

ᑲᑎᒪᑎᓪᓗᒋᑦ, ᔫᓐᔅ ᑭᙵᐃᑦ ᑲᑎᒪᔨᖏᓐᓄᑦ ᖃᐅᔨᓴᕈᑎᐅᔪᓂᒃ ᑐᓂᓯᓂᐊᕐᓂᕋᓚᐅᕐᑐᖅ, ᑐᓄ ᐅᖃᖅᑐᖅ.

““ᒪᓕᒐᓕᕆᓂᒃᑯᑦ ᐱᓕᕆᐊᖑᓂᐊᕐᓂᖓᓂᒃ ᖃᐅᔨᒪᔪᖓ,” ᑐᓄ ᐅᖃᖅᑐᖅ.

ᑭᙵᐃᑦ ᐸᓖᓯᒃᑯᑦ ᑎᓴᒪᓂᒃ ᑎᒍᔭᐅᓯᒪᕝᕕᖃᖅᑐᑦ. ᐅᓐᓄᖓᓂᒃ ᑖᓐᓇ ᐊᖑᑎ ᐊᔾᔨᓕᐅᕐᑕᐅᓂᑯ ᐅᕐᕈᑎᑕᐅᓪᓗᓂ ᐊᒻᒪ ᑎᒍᔭᐅᓪᓗᓂᓗ, ᓴᕙᐅᓚᐅᕐᑐᑦ ᑎᒍᔭᐅᓯᒪᔪᑦ ᑕᒪᕐᒥᒡᓗ ᐋᖓᔮᖅᖢᑎᒃ ᐸᓖᓯᒃᑯ ᐅᖃᓚᐅᕐᑐᑦ. ᑕᐃᒪᐃᓐᓂᖓᓄᑦ ᑖᓐᓇ ᐊᖑᑎ ᐃᓄᖄᓂᒃᑐᒧᐊᖅᑕᐅᓚᐅᕐᑐᖅ.

ᑕᒪᕐᒥ ᐊᖑᑎ ᐊᔾᔨᓕᐅᕐᑕᐅᓯᒪᔪᖅ ᐊᒻᒪᓗ ᑖᓐᓇ ᐊᖑᑎ ᑎᒍᔭᐅᓯᒪᔪᖅ ᐋᖓᔮᓚᐅᕐᒪᑎᒃ, ᐸᓖᓯᑎᒍᑦ.

“ᑎᒍᔭᐅᓯᒪᕝᕕᐅᔪᖅ ᐃᓄᖃᐅᓚᐅᕐᑐᖅ ᐱᔾᔪᑎᖃᓗᐊᖅᖢᓂ ᐅᓄᓗᐊᕐᑐᓂᒃ ᐃᒥᐊᓗᖕᓂ ᑎᑭᑦᑐᖃᕐᓂᖓᓄᑦ.” ᑐᓄ ᐅᖃᖅᑐᖅ.

ᑭᖓᐃᑦ ᐃᒥᐊᓗᓕᕆᔨᖃᖅᑐᖅ ᑲᒪᔨᐅᕙᒃᑐᓂᒃ ᐃᒥᐊᓗᖕᓂ ᑎᑭᓴᖅᑕᐅᔪᒪᔪᓂᒃ. ᕼᐋᒻᒪᓚᒃᑯᑦ ᑲᑎᒪᔨᖏ ᐊᓂᒍᐃᑎᑦᑎᓚᐅᕐᒪᑕ ᐃᒥᐊᓗᖃᖁᔨᙱᖢᑎᒃ ᒪᐃ 11-ᒥᑦ ᒪᐃ 24-ᒧᑦ ᒪᓕᒍᓐᓇᖁᓪᓗᒋ ᓄᓇᕗᒥᑦ ᐊᑐᖁᔭᐅᔪᒥ ᐃᓄᒋᐊᖃᑦᑕᕆᐊᖃᙱᓐᓂᕐᒥᒃ, ᑐᓄ ᐅᖃᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑭᓯᐊᓂᓕ ᑐᓄ ᐅᖃᓚᐅᕐᑐᖅ ᐃᒥᐊᓗᒃ ᐱᔾᔪᑎᐅᔭᕆᐊᖃᙱᓐᓂᖓᓂᒃ ᖃᓄᐃᓕᐅᕈᑎᐅᓚᐅᕐᑐᒧᑦ ᑕᐃᔅᓱᒪᓂ.

“ᐃᒥᐊᓗᒃ ᓈᒻᒪᙱᓕᐅᕈᑎᐅᙱᒻᒪᑦ; ᒪᑯᐊᓕ ᓈᒻᒪᙱᓕᐅᕈᑎᐅᔪᑦ ᓴᖅᑭᓕᖃᑦᑕᖅᑐᑦ ᐋᖓᔮᓕᕌᖓᑕ ᐃᓄᐃᑦ,” ᐅᖃᖅᑐᖅ.

ᑕᒪᑐᒧᖓᓕ ᑐᓄ ᐅᖃᓚᐅᕐᑐᖅ ᓄᓇᓖᑦ ᐃᓱᒪᓕᕆᓂᕐᒧᑦ ᐃᑲᔪᖅᑕᐅᓂᕐᓴᐅᔭᕆᐊᖃᕐᓂᖏᓐᓂᒃ.

“ᑕᒪᑐᒧᖓ ᑲᑎᒪᔨᖃᙱᓐᓇᑦᑕ ᐱᓕᕆᐊᖃᕋᔭᖅᑐᓂᒃ. ᐊᒻᒪᓗ ᓄᓇᕗᒥᑦ ᑕᐃᒪᐃᑦᑐᖅᑕᖃᙱᑦᑎᐊᖅᖢᓂ ᒫᓐᓇ, ᐸᓃᕐᓰᕕᒃᑕᖃᙱᖢᓂ. ᑕᐃᒪᐃᑦᑐᓂᒃ ᐱᑕᖃᖅᐸᑦ ᐃᑲᔫᑎᐅᓇᔭᖅᑐᑦ ᐃᓄᖕᓄᑦ ᓈᒻᒪᙱᓕᐅᕈᑎᖃᕐᓯᒪᔪᓂᒃ ᐊᒻᒪᓗ ᑕᐃᒪᐃᓕᐅᕈᓘᔭᓕᖅᐸᒃᖢᑎᒃ,” ᑐᓄ ᐅᑲᖅᑐᖅ.

ᐋᒐᓯ 2019-ᒥᑦ, ᑲᓇᑕ ᐊᒻᒪ ᓄᓇᕗᑦ ᐱᓂᐊᕐᓂᕋᓚᐅᕐᓯᒪᔪᑦ ᒪᒥᓴᕐᕕᒃᓴᒥᑦ, ᑖᓐᓇᓗ ᐊᕐᕌᒍᓂᒃ ᑎᓴᒪᓂ ᒪᑐᐃᕋᔭᖅᖢᓂ.

ᒪᒥᓴᕐᕕᒃᓴᖅ ᓯᕗᓪᓕᖅᐹᖑᓂᐊᕐᑐᖅ ᓄᓇᕗᒥᑦ ᑕᐃᒪᙵᑦ ᐃᓄᓯᖅᓯᐅᕐᕕᒃ ᓂᐊᖁᙴᓂ ᒪᑐᓚᐅᕐᓯᒪᑎᓪᓗᒍ   1998-ᒥᑦ.

ᑕᐃᒪᙵᓂᓪᓕ ᔭᓄᐊᕆ 1-ᖑᓚᐅᕐᑐᒥᑦ, ᓯᒃᓯᓂᒃ (6) ᖃᓄᐃᓕᐅᕈᑎᖃᕐᓯᒪᔪᖃᓕᕐᒪᑦ ᐅᑯᐊ ᐋᑐᕚᒥ ᐸᓖᓯᒃᑯᑦ ᐱᔨᑦᑎᕋᐅᑎᓕᕆᔨᖏ ᑎᑭᖁᔭᐅᓯᒪᓪᓗᑎᒃ ᖃᐅᔨᓴᕆᐊᕐᓗᑎᒃ. ᐱᖓᓱᑦ ᑖᒃᑯᓇᙵᑦ ᐸᓖᓯᒃᑯᑦ ᖁᑭᒃᓴᕐᓯᒪᓂᖏᓐᓄᑦ ᐊᒻᒪ ᑖᒃᑯᓇᙵᑦ ᒪᕐᕉᖕᓂ ᑐᖂᑦᑎᓯᒪᓪᓗᑎᒃ.

Share This Story

(0) Comments