ᓄᓇᕗᑦ ᑐᙵᕕᒃᑯᑦ ᐊᖏᖅᑕᐅᙱᓚᑦ ᑲᒪᒋᔭᖃᖃᑕᐅᓂᕐᒥᒃ ᒐᕙᒪᑐᖃᒃᑯᑦ ᐃᓕᓐᓂᐊᕆᐊᖅᑎᑦᑎᕙᓚᐅᕐᓂᖏᓐᓄᑦ
ᐃᓄᐃᑦ ᑲᑐᔾᔨᖃᑎᒌᖑᔪ ᐅᖃᖅᑐᑦ ᑮᓇᐅᔭᖅᑖᕋᓱᒃᐸᓪᓕᐊᓂᖅ ᐊᒻᒪ ᐃᓱᖃᖅᑎᑕᐅᔾᔪᑏᑦ ᑐᓗᖅᑕᕐᕕᐅᑲᑕᒐᔭᕐᓂᖏᓐᓂᒃ ᐱᓇᓱᖕᓂᕐᒧᑦ
ᐃᓕᓐᓂᐊᕐᑎᐅᔪᑦ ᐅᕙᓂ ᑭᙵᐃᑦ ᑐᔪᕐᒥᕕᖓᑦ (Cape Dorset Federal Hostel), ᐄᐳᕈᓪ 1964-ᒥ. ᑲᓇᑕᓕᒫᒥᑦ ᐊᑕᐅᑦᑎᒃᑯᑦ ᐃᖅᑲᖅᑐᐃᕕᒃᑰᖅᑎᑦᑎᓇᓱᖕᓂᖅ ᑲᓇᑕᐅᑉ ᒐᕙᒪᖓᓂᒃ ᒪᑯᓄᖓ ᐊᓪᓚᓄ ᐃᓕᓐᓂᐊᕆᐊᖅᑎᑦᑎᕙᓚᐅᕐᑐᓄᑦ ᐊᖏᖃᑎᒌᒍᑎᖃᓕᕐᐳᑦ ᖃᔅᓯᐅᓂᐊᕐᓂᖓᓂᒃ ᐊᑭᓕᐅᑕᐅᓇᔭᖅᑐᖅ, ᑖᓐᓇᓗ ᐊᖏᖅᑕᐅᓂᐊᕋᓱᒋᔭᐅᓪᓗᓂ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᖓᓂᑦ ᑕᖅᑭᐅᓂᐊᕐᑐᒥ. (ᐅᖃᓕᒫᒐᓕᕆᔨᒃᑯᑦ ᐊᒻᒪ ᑲᑎᕐᓱᐃᒐᓕᕆᔩᑦ ᑲᓇᑕᒥ)
For an English version of this story, see NTI denied intervenor status in federal day schools class action
ᒐᕙᒪᑐᖃᒃᑯᑦ ᐊᖏᓚᐅᙱᑦᑐᑦ ᐃᓄᐃᑦ ᑲᑐᔾᔨᖃᑎᒌᑦ ᐱᒋᐊᕈᑎᒋᒋᐊᖅᑕᖓᓂᒃ ᐱᓕᕆᖃᑕᐅᓕᕈᒪᓂᕐᒥᒃ ᐃᖅᑲᖅᑐᐃᕕᒃᑰᖅᑎᑦᑎᓂᕐᒥᒃ ᐊᓪᓚᐃᑦ ᒐᕙᒪᑐᖃᒃᑯᓐᓂᑦ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓂᒃ.
ᓄᓇᕗᑦ ᑐᙵᕕᒃ ᐃᓚᒋᔭᐅᓚᐅᕐᑐᖅ 6-ᓂ ᑲᑐᔾᔨᖃᑎᒌᓂᒃ ᐊᒻᒪ ᐸᓯᔭᒃᓴᙳᖅᑎᑦᑎᔪᓂᒃ ᐱᓇᓱᒃᑐᓂᒃ ᐅᕙᓂ ᒪᒃᓖᓐ ᐅᓪᓗᒃᑯᑦ ᐃᓕᓐᓂᐊᕐᕕᒃ (McLean Day Schools Class Action) ᑲᑎᓯᒪᓪᓗᑎᒃ ᐃᖅᑲᖅᑐᐃᕕᒃᑰᖅᑎᑦᑎᓇᓱᒃᑐᓂᒃ, ᑖᓐᓇ ᐱᒋᐊᖅᑕᐅᓚᐅᕐᓯᒪᔪᖅ 2009-ᒥᑦ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓂᒃ ᐃᓚᐅᑎᑕᐅᓐᓂᙱᑦᑐᓂᒃ ᐊᓪᓚᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᑦ ᐊᖏᖃᑎᒌᒍᑎᖏᓐᓂᒃ.
ᒐᕙᒪᑐᖃᒃᑯᓐᓄᑦ ᐃᖅᑲᖅᑐᐃᔨ ᒪᐃᑯᓪ ᕕᓇᓐ ᐊᙱᓚᐅᙱᑦᑐᖅ ᓄᓇᕗᑦ ᑐᙵᕕᒃᑯᑦ ᐱᒋᐊᕈᑎᒋᒋᐊᖅᑕᖓᓂᒃ ᐄᐳᕈᓪ 25-ᖑᑎᓪᓗᒍ, ᐊᒻᒪᓗ ᐅᑯᓂᖓ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓂᒃ, ᑲᑎᒪᔨᕐᔪᐊᓂᒃ ᐊᓪᓚᓄᑦ ᑯᕇᓄᑦ ᐊᒻᒪᓗ ᐃᒻᒥᒃᑰᖓᔪᓂᒃ ᐱᖓᓱᓂᒃ ᐸᓯᔭᒃᓴᙳᖅᑎᑦᑎᔪᓂᒃ.
ᐱᓇᓱᒍᑎᖏᑦᑎᒍᑦ, ᓄᓇᕗᑦ ᑐᙵᕕᒃᑯᑦ ᐅᖃᕐᓯᒪᓚᐅᕐᒪᑕ ᖃᓄᑎᒋ ᐊᖏᑎᒋᓂᖓ ᐊᒻᒪᓗ ᐃᓱᖃᖅᑎᑕᐅᓂᖓ ᑐᒃᓯᕋᐅᑎᒧᑦ ᑮᓇᐅᔭᓂᒃ “ᓈᒻᒪᓚᐅᙱᓐᓂᖓᓄᑦ” ᐊᒻᒪ ᐅᖃᐅᓯᖃᙱᖢᑎ ᓄᓇᕗᑦ ᐃᓄᐃᑦ ᒥᒃᓵᓄᑦ.
ᑕᐃᒪᐃᒍᑎᖃᓚᐅᕐᑐᕐᓕ ᑐᒃᓯᕋᐅᑎ ᑮᓇᐅᔭᖅᑖᕐᓂᕐᒧᑦ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᑎᑕᐅᓕᓚᐅᕐᓂᖓᓂᒃ ᒫᑦᓯ 14-ᒥᑦ, ᒪᑯᐊ ᐃᓕᓐᓂᐊᖅᑐᕕᓃᑦ ᓈᒻᒪᒃᓴᙱᔾᔪᑎᖏᓐᓂᒃ ᑎᑎᕋᕐᓯᒫᓂᒋᐊᖃᖅᖢᑎᒃ ᒪᐃ 3-ᒥᑦ, ᐃᓄᐃᑦ ᓄᓇᑖᕐᓂᕐᒧᑦ ᑲᑐᔾᔨᖃᑎᒌᖑᔪᑦ ᐅᖃᓚᐅᕐᑐᑦ.
“ᐃᓄᐃᑦ ᓄᓇᕗᒥᑦ ᑐᓴᐅᒪᒍᑎᒃᓴᖃᓗᐊᕐᐸᙱᒻᒪᑕ ᐊᒻᒪᓗ ᐅᔾᔨᕆᓗᐊᙱᖢᑎᒃ ᐃᓕᓐᓂᐊᕆᐊᖃᑦᑕᓚᐅᕐᓂᕐᒧᑦ ᐅᓪᓗᒃᑯᑦ ᐊᑲᐅᙱᓕᐅᕈᑎᓂᒃ, ᐊᒻᒪᓗ ᐊᔪᕈᑎᖃᖅᖢᑎᒃ ᑐᑭᖃᓪᓚᕆᒃᑐᒥᑦ ᐱᓕᕆᖃᑕᐅᔭᕆᐊᒃᓴᖅ ᐃᓱᖃᕕᖓᓄᑦ,” ᓄᓇᕗᑦ ᑐᙵᕕᒃᑯᑦ ᐅᖃᕐᓯᒪᓚᐅᕐᑐᑦ ᑐᒃᓯᕋᐅᑎᖏᑦᑎᒍᑦ.
“ᐱᓇᓱᒐᓱᒃᐸᓪᓕᐊᓂᖅ ᐊᒻᒪ ᐱᓇᓱᒐᓱᖕᓂᕐᒧᑦ ᐃᓱᖃᕐᕕᐅᔪᖅ ᐃᓱᒪᒋᔭᐅᓯᒪᔪᖅ ᐊᖏᖃᑎᒌᒍᑎᓄᑦ ᐊᔾᔨᖃᙱᒻᒪᑦ ᖃᓄᐃᓕᐅᕈᓯᕐᒥᑦ ᓄᓇᕗᒥᑦ ᐊᒻᒪᓗ ᑐᓗᖅᑕᕐᕕᖃᒻᒪᕆᒃᖢᓂ ᒪᓕᒐᓕᕆᓂᒃᑯᑦ ᐃᑲᔪᖅᑕᐅᒍᓐᓇᕈᑎᓂᒃ ᐊᒻᒪ ᐋᕿᖃᑎᒌᒐᓱᖕᓂᕐᒧᑦ ᐱᑕᖃᙱᓗᐊᕐᓂᖓᓄᑦ.”
ᐃᖅᑲᖅᑐᐃᕕᒃᑰᖅᑎᑦᑎᓂᐅᔪᖅ ᐊᑭᓖᒍᑎᐅᓇᔭᖅᑐᖅ ᐃᓕᓐᓂᐊᕐᑎᓂᒃ ᒫᙵᑦ $10,000 ᓈᒻᒪᙱᓕᐅᕈᑎᖃᕐᓂᕐᒧᑦ ᐊᒃᑐᐃᔪᓂᒃ ᐃᓕᓐᓂᐊᕐᕕᓕᐊᖃᑦᑕᕐᓂᕐᒧᑦ ᐊᖏᓂᖅᐹᖑᓗᓂ $200,000 ᖁᓄᔪᕐᓂᐊᖅᑕᐅᖃᑦᑕᕐᓯᒪᓂᑯᓄᑦ ᐅᕝᕙᓘᓐᓃᑦ ᐋᓐᓂᕐᓱᖅᑕᐅᕙᖕᓂᕐᒧᑦ ᑖᒃᑯᓄᖓᓗᑦ ᐊᑯᓂᐊᓗᒃ ᐋᓐᓂᐊᖃᕈᑎᐅᓗᑎᒃ.
ᓄᓇᕗᒥᑦ, 25-ᖑᖕᒪᑕ ᐅᓪᓗᒃᑯᑦ ᐃᓕᓐᓂᐊᕆᐊᕐᕕᐅᕙᒃᑐᑦ ᐅᖃᐅᓯᐅᔪᑦ ᐊᖏᕈᑎᓂᒃ. ᖃᔅᓯᐅᓂᖏᑦ ᐃᓕᓐᓂᐊᕐᑏᑦ ᓱᖅᑯᐃᓇᓗᐊᙱᖢᑎᒃ; ᓄᓇᕗᑦ ᑐᙵᕕᒃᑯᑦ ᑭᐅᓚᐅᙱᒻᒪᑕ ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᐱᖅᓱᕈᒪᑎᓪᓗᒋᑦ.
ᑕᒪᓐᓇ ᐅᑭᐅᖅ ᐱᒋᐊᓕᓵᕐᓯᒪᑎᓪᓗᒍ, ᓄᓇᓕᕆᔨᒃᑯᑦ ᑲᑐᔾᔨᖃᑎᒌᖏᑦ, ᐃᓚᖃᖅᖢᑎᒃ ᓄᓇᕕᒃᑯᑦ ᒪᑭᕕᒃᑯᓐᓂᑦ ᐊᒻᒪᓗ ᐃᓄᕕᐊᓗᐃᑦ ᑲᑐᔾᔨᖃᑎᒌᖏᑦ ᐃᓱᒫᓘᑎᖃᓚᐅᕐᒪᑕ ᑮᓇᐅᔭᑦ ᐅᖃᐅᓯᐅᔪᑦ ᐊᑭᓕᕐᓱᖅᑕᐅᓂᐊᕐᓗᑎᒃ ᐊᐅᓚᑕᐅᓗᑎᒡᓗ ᑲᑐᔾᔨᖃᑎᒌᓄᑦ ᐃᓄᖕᓂᒃ ᑭᒡᒐᖅᑐᐃᔨᖃᙱᑦᑐᓂᒃ.
ᒪᓕᒐᓕᕆᓂᕐᒧᑦ ᐱᓕᕆᔨᐅᔪᑦ ᐅᑯᐊ Gowling WLG (ᑲᓇᑕ) LLP ᑐᓂᔭᐅᑐᐃᓐᓇᕆᐊᖃᓕᕐᓯᒪᔪᑦ $55 ᒥᓕᐊᓐ ᑖᓚᓂ ᐊᑭᓕᐅᑎᒃᓴᓂᒃ ᐊᒻᒪᓗ ᑭᒡᒐᖅᑐᐃᔨᐅᙱᓐᓇᕐᓂᐊᖅᖢᑎᒃ ᐱᑖᕋᓱᒃᑎᐅᔪᓂᒃ ᐃᒪᓐᓇ ᐃᓚᒃᑲᓐᓂᖃᕐᓗᓂ $7 ᒥᓕᐊᓐ ᑖᓚᓂᒃ ᐊᑭᓕᐅᑎᒃᓴᓂᒃ ᐱᓕᕆᔨᐅᓂᕐᒧᑦ.
ᔭᓄᐊᕆᒥ ᑎᑎᖃᓂᒃ ᒐᕙᒪᒃᑯᑦ-ᓄᓇᖃᖅᑳᖅᑐᓄᓪᓗ ᒥᓂᔅᑕ ᑭᐅᕈᓕᓐ ᐸᓇᑦ, ᓄᓇᕗᑦ ᑐᙵᕕᒃᑯᑦ, ᒪᑭᕕᒃ ᐊᒻᒪ ᐃᓄᕕᐊᓗᐃᑦ ᑲᑐᔾᔨᖃᑎᒌᖏᑦ ᐊᐱᕆᓚᐅᕐᓯᒪᖕᒪᑕ ᒥᓂᔅᑕᒥ ᑕᒪᒃᑯᐊ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᖃᑕᐅᖁᔭᐅᓪᓗᑎ ᐱᓕᕆᕙᓪᓕᐊᓂᕐᒥᒃ.
ᐃᓚᖓᑦ ᑲᑐᔾᔨᖃᑎᒌᖑᔪᓂᒃ ᐅᖃᓚᐅᕐᑐᖅ ᒥᓂᔅᑕᐅᑉ ᑎᑎᕋᕐᕕᖓᓂᒃ ᑭᐅᔭᐅᓚᐅᕐᓂᖏᓐᓂᒃ ᓄᓇᖃᕐᓂᕐᒧᑦ ᑲᑐᔾᔨᖃᑎᒌᓄᑦ ᑕᒪᑐᒪᓂ ᑕᕿᒥ, ᓇᓗᓇᕋᓗᐊᖅᖢᓂ ᐋᑐᕚᒥ ᐃᓱᒫᓘᑎᐅᔪᑦ ᐅᖃᐅᓯᐅᓂᐊᕆᐊᒃᓴᖏᓐᓂᒃ.
ᓄᓇᕕᒃᒥ, ᐃᓱᒪᒋᔭᐅᔪᖅ ᒫᓂ 3,000-ᖏᓐᓃᓐᓂᖏᓐᓂᒃ ᐃᓕᓐᓂᐊᓚᐅᕐᓯᒪᓂᑯᑦ 11-ᓂᒃ ᐃᓕᓐᓂᐊᕐᕕᖕᒥᙶᖅᑐᓂᒃ ᑖᒃᑯᑎᒎᓇᖅ ᐊᔪᙱᑎᑕᐅᓇᔭᕐᒥᔪᑦ ᐊᖏᕈᑎᑎᒍᑦ ᐅᓪᓗᒃᑯᑦ ᐃᓕᓐᓂᐊᕆᐊᖅᐸᓚᐅᕐᑐᓄᑦ.
ᒪᑭᕕᒃ ᐅᖃᓚᐅᕐᑐᖅ ᐃᓕᓐᓂᐊᕐᑎᐅᔪᑦ ᐃᓕᓐᓂᐊᕆᐊᖃᑦᑕᓚᐅᕐᑐᑦ ᐃᓕᓐᓂᐊᕕᖕᓄᑦ ᓇᓗᓇᐃᖅᑕᐅᓯᒪᙱᑦᑐᑦ ᓱᓕ ᐊᖏᕈᑎᑎᒍᑦ ᐊᐱᕆᔪᓐᓇᖅᑐᑦ ᐊᖏᕈᑎᓂᒃ ᐅᖃᖃᑎᖃᕐᓗᑎᒃ ᐃᓕᓐᓂᐊᖅᑎᓂᒃ ᑭᒡᒐᖅᑐᐃᔨᒧᑦ ᐅᕗᖓ lessard@gowlinggwlg.com ᐅᕝᕙᓘᓐᓃᑦ ᐅᕗᖓ 1-844-539-3815.
ᓄᓇᕕᒻᒥᐅᑦ ᐊᐱᖁᑎᒃᓴᖃᖅᑐᑦ ᐊᔪᙱᑦᑕᕆᐊᒃᓴᖏᓐᓂᒃ ᒪᑭᕕᒃᑯᑦ ᒪᓕᒐᓕᕆᓂᕐᒧᑦ ᐱᓕᕆᕝᕕᐊᓄᑦ ᐅᖄᓚᒍᓐᓇᖅᑐᑦ ᐅᕗᖓ 418-522-2224, ᐊᑦᑕᑕᐅᑎ 4.
ᑐᒃᓯᕋᐅᑎᐅᓯᒪᔪᖅ ᑮᓇᐅᔭᖅᑖᕈᑎᒃᓴᖅ ᐅᑯᐊ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᓕᕆᔨᖏᓐᓄᑦ ᐊᖏᖅᐸᑕ ᑭᓯᐊᓂ ᐱᓕᕆᓂᐅᓂᐊᖅᑐᒥᒃ ᒪᐃ 13-ᒥᑦ 15-ᒧᑦ ᕗᐃᓂᐱᒡᒥᑦ.
(0) Comments