ᓄᓇᕗᑦ ᑐᙵᕕᒃᑯᑦ ᐋᑐᕚᒥ ᐱᓕᕆᐊᕆᔭᐅᖁᔨᒻᒪᕆᓕᕐᑐᑦ ᓄᓇᕗᒥᑦ ᐃᒃᓯᕋᕐᔪᐊᖑᓚᐅᖅᓯᒪᔪᒥᒃ

ᐊᑖᑕ ᔪᐊᓇᔅ ᕆᕗᐊ, 90-ᖏᓐᓂ ᐅᑭᐅᖃᓕᖅᑐᖅ ᐊᒻᒪ ᕗᕌᓐᔅᒥ ᓄᓇᖃᖅᖢ, ᐅᓇᓕ ᖃᖓᑲᓪᓚᓕᓴᖅ ᐃᒡᓗᓕᒑᕐᔪᒃᒥᑦ ᐊᔾᔨᓕᐅᖅᑕᐅᓯᒪᔪᖅ. (ᐊᔾᔨᙳᐊᖅ ᐅᕙᙵᑦ ᓖᕕ ᕼᐋᔅᐳᒡ)

ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ ᐸᓯᔭᒃᓴᐅᔾᔪᑎᕕᓂᐅᔪᓂᒃ ᐱᒋᐊᖅᑕᐅᑎᒃᑲᓐᓂᕋᓱᖕᓂᖏᓐᓂᒃ ᐃᑲᔪᕋᓱᒃᖢᑎᒃ ᐃᓄᖕᓂ ᐱᑦᑎᐊᖅᑕᐅᕙᙱᓗᐊᖅᑐᕕᓂᕐᓂᒃ ᓄᓇᕗᒥ ᐃᒃᓯᕋᕐᔪᐊᕕᓂᕐᒧᑦ.

ᓄᓇᕗᒥᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑕᒪᓐᓇ ᑕᖅᑭᖅ ᐱᒋᐊᓕᓵᖅᑎᓪᓗᒍ ᑎᑎᕋᒪᐅᕐᑐᖅ ᒐᕙᒪᑐᖃᒃᑯᑦ ᒪᓕᒐᓕᕆᓂᕐᒧᑦ ᒥᓂᔅᑕᖓᓄᑦ, ᑕᐃᕕᑦ ᓚᒪᑎᒧᑦ ᐱᓕᕆᐊᖃᖁᔨᓪᓗᓂ ᐸᓯᔭᒃᓴᐅᔾᔪᑎᐅᔪᓂᒃ ᐆᒧᖓ ᐃᒃᓯᕋᕐᔪᐊᖅ ᔪᐊᓇᔅ ᕆᕗᐊᒧᑦ ᑖᓐᓇ ᓄᓇᕗᒥᑦ ᐃᒃᓯᕋᕐᔪᐊᖑᓚᐅᕐᓯᒪᔪᖅ 1960-ᖏᓐᓂᒃ.

ᕆᕗᐊ ᐸᓯᔭᒃᓴᐅᑎᑕᐅᓚᐅᕐᓯᒪᖕᒪ ᖁᓄᔪᕐᓂᐊᖃᑦᑕᖅᓯᒪᓂᖓᓂᒃ ᐃᓄᖕᓂ ᓄᑕᕋᕐᓂᒃ, ᑭᓯᐊᓂᓕ ᑖᓐᓇ ᓄᖅᑲᖅᑎᑕᐅᓚᐅᖅᓯᒪᔪᖅ ᐸᓯᔭᒃᓴᐅᔾᔪᑎ ᑎᓴᒪᑦ ᐊᕐᕌᒍᑦ ᑭᖑᓂᑦᑎᓐᓂᒃ..

ᖃᖓᑦᑎᐊᓵᖅ ᐃᓗᕕᕈᓘᔭᕐᓂ ᓇᓂᓯᑲᑖᓪᓚᓚᐅᖅᖢᑎᒃ ᐃᓕᓐᓂᐊᕆᐊᖅᕕᐅᕙᓚᐅᖅᓯᒪᔪᑦ ᓄᓇᖁᑎᖏᓐᓂᒃ ᑲᓇᑕᒥ ᐅᓄᕈᓘᔭᕐᑐᓂᒃ ᐱᖁᔨᔪᖃᕐᓯᒪᓕᕐᒪ ᑕᒪᒃᑯᐊ ᑐᒃᓯᐊᕐᕕᒋᔭᐅᔪᑦ ᐊᒻᒪᓗ ᐊᐅᓚᑦᑎᔨᐅᓂᑯᑦ ᑖᒃᑯᓂᖓ ᐃᓕᕐᓂᐊᖅᕕᖕᓂ ᐃᖃᖅᑐᐃᕕᒃᑰᖅᑎᑕᐅᖁᔭᐅᓪᓗᑎᒃ.

“ᐊᕐᕌᒍᒐᓴᒻᒪᕆᐅᓕᕐᑐᓂᒃ ᓄᓇᕗᑦ ᑐᙵᕕᒃᑯᑦ ᐊᒻᒪ ᐃᓄᐃᑦ ᓄᓇᕗᒥᐅᑕᑦ ᐅᑕᖅᑭᓯᒪᖕᒪᑕ ᑲᓇᑕ ᑕᒪᑐᒥᖓ ᐱᓕᕆᐊᖃᓕᕐᓂᐊᕐᓂᖓᓂᒃ ᐊᒻᒪ ᐅᕙᑦᑎᓐᓂ ᐅᖃᓪᓚᖃᑎᖃᕐᓗᑎ ᖃᓄᖅ ᑲᓇᑕ ᑕᒪᒃᑯᓂᖓ ᐱᐅᙱᓗᐊᖅᑐᒻᒪᕆᐊᓗᖕᓂ ᐋᓐᓂᓯᕆᔾᔪᑎᕕᓂᐊᓗᐃᑦ ᐃᓄᐃᑦ ᓄᑕᕋᖏᓐᓄ .. ᐆᒧᖓ ᔪᐊᓇᔅ ᕆᕗᐊ, ᐃᒃᓯᕋᕐᔪᐊᖑᓚᐅᖅᓯᒪᔪᖅ ᐅᕙᓂ ᓲ ᔫᓴᕝ ᐴᓂᐄ ᐃᓕᓐᓂᐊᕐᕕᒃᒥᑦ (Turquetil Hall) ᐃᒡᓗᓕᒑᕐᔪᒃᒥᓐ,” ᑰᑦᑎᖅ ᑎᑎᕋᓚᐅᕐᑐᖅ ᔪᓚᐃ 7-ᒥ ᒥᓂᔅᑕ ᓚᒪᑎᒧᑦ, ᓄᓇᑦᓯᐊᕐᒥ ᐱᕙᓪᓕᐊᔪᑦ ᖃᐅᔨᔪᓐᓇᖅᓯᓚᐅᖅᑕᖓ.

“ᑲᓇᑕᒥ ᐃᓱᒫᒋᔭᖃᑦᑎᐊᙱᓗᐊᕐᓂᖏᑦ ᐃᓄᖕᓂ ᒪᑯᓂᖓ ᐊᕐᕌᒍᒐᓴᒻᒪᕆᖕᓂ ᐃᖅᑲᖅᑐᐃᕕᒃᑰᖅᑎᑦᑎᓇᓱᒃᑐᓂᒃ ᓄᖅᑲᕆᐊᖃᓕᕐᒪᑦ.”

ᐅᓇ ᑎᑎᕋᖅᑕᐅᓯᒪᔪᖅ ᑐᓐᓂᖅᑯᑎᐅᓚᐅᕐᑐᖅ ᒥᓂᔅᑕᒧᑦ ᐅᓪᓗᖅ ᓯᕗᓂᐊᓂᒃ ᐅᑯᐊ ᓂᐅ ᑎᒧᑯᕌᑎᒃ ᐹᑎᒃᑯᑦ (NDP), ᓄᓇᕗᒧᑦ ᒪᓕᒐᓕᐅᖅᑎᖓ ᒪᒥᓛᖅ ᖃᖅᑲᖅ ᒐᕙᒪᒃᑯᓐᓂ ᖃᐅᔨᓴᖁᔨᓂᐊᖅᑎᓪᓗᒍ ᑕᒪᒃᑯᓂᖓ ᐱᕋᔭᒍᑎᒻᒪᕆᕕᓂᐊᓗᖕᓂᒃ ᓄᓇᖃᖅᑳᖅᑐᓄᑦ ᐅᑯᓇᓂ ᐃᓕᓐᓂᐊᕆᐊᖅᕕᐅᖃᑦᑕᓚᐅᖅᓯᒪᔪᓂᒃ ᐊᒻᒪᓗ ᑖᒃᑯᓄᖓ ᑲᒪᒋᔭᖃᓚᐅᖅᑐᓂᒃ.

ᑰᑦᑎᖅ ᐃᓱᒪᓕᐅᕆᓚᐅᕐᑐᖅ ᐋᑐᕚᒥ ᐱᒋᐊᖅᑎᑦᑎᒃᑲᓐᓂᕈᓐᓇᕐᓂᖏᓐᓂᒃ ᐸᓯᔭᒃᓴᙳᖅᑎᑦᑎᔾᔪᑎᕕᓂᐅᔪᓂᒃ ᐆᒧᖓ ᕆᕗᐊᒥ ᑕᒪᒃᑯᓂᖓ ᓄᑖᓂ ᖃᓄᐃᓕᐅᕈᑎᕕᓂᐊᓗᖕᓂ ᓴᖅᑭᑦᑐᖃᓚᐅᖅᓯᒪᑎᓪᓗᒍ, ᐊᑐᐃᓐᓇᐅᔪᓐᓇᕐᓂᐊᖅᖢᑎᒃ ᓇᓗᓇᐃᒃᑯᑎᒋᔭᐅᓗᑎᒃ ᑕᒪᒃᑯᓄᖓ ᐃᓅᔪᓐᓃᕐᓯᒪᓕᖅᑐᓄᑦ ᐊᒻᒪᓗ ᐅᖃᐅᓯᕆᔭᐅᓯᒪᔪᓂᒃ ᓱᓕ ᐆᒪᔪᓂᒃ.

“ᓄᓇᕗᑦ ᑐᙵᕕᒃᑯᑦ ᐃᓱᒪᒋᔭᖃᕐᒥᖕᒪᑕ ᒪᓕᒐᓕᕆᓂᒃᑯᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐃᑲᔪᕈᑎᐅᓂᐊᖅᑐᓂᒃ ᐱᑦᑎᐊᖅᑕᐅᓯᒪᙱᓗᐊᕐᓂᑯᓂᒃ ᑕᒪᒃᑯᐊ ᐅᖃᐅᓯᕆᓯᒪᔭᖏᑦ ᑐᓴᐅᒪᔭᐅᔪᓐᓇᖁᓪᓗᒋᑦ ᐸᓯᔭᒃᓴᙳᖅᑎᑦᑎᓂᐊᖅᐸᑕ,” ᑎᑎᕋᓚᐅᕐᑐᖅ.

ᐸᓯᔭᒃᓴᐅᔾᔪᑎᐅᔪᑦ ᕆᕗᐊᒥ ᓄᖅᑲᖅᑎᑕᐅᓚᐅᖅᓯᒪᖕᒪᑦ 2017-ᒥᓐ ᐅᑯᐊ ᑭᒃᑯᓕᒫᓄᑦ ᐸᓯᔭᒃᓴᓕᕆᔨᒃᑯᑦ ᑲᓇᑕᒥ ᖃᐅᔨᓂᕋᖅᑎᓪᓗᒋ “ᐱᑕᖃᒻᒪᕆᒍᓐᓃᕐᒪᒃ ᐃᖅᑲᖅᑐᖅᑕᐅᔾᔪᑎᓕᕆᓂᖅ ᑲᔪᓯᑎᓐᓂᐊᕐᓗᒍ” ᐆᒧᖓ ᕆᕗᐊᒧᑦ.

ᑰᑦᑎᖅ ᑲᓇᑕᒥ ᐱᖁᔨᓯᒪᒻᒪᕆᒃᑐᖅ ᕆᕗᐊ ᕗᕌᓐᔅᒥ ᑕᒪᐅᙵᖅᑎᑕᐅᖁᓪᓗᓂᐅᒃ, ᓄᓇᒋᔭᐅᓂᕋᖅᑕᐅᔪᒥᒃ ᑖᔅᓱᒧᖓ 90-ᓂ ᐊᕐᕌᒍᖃᖅᑐᒧᑦ.

ᑕᒪᓐᓇ ᐱᓕᕆᐊᖑᔭᕆᐊᖃᓪᓚᕆᖕᒪᓐ, ᑰᑦᑎᖅ ᐅᖃᖅᑐᖅ, ᓲᖃᐃᒻᒪ ᐅᓄᖅᑐᑦ ᕆᕗᐊᑉ ᖃᓄᐃᓕᐅᖃᑦᑕᖅᑕᕕᓂᖏᑦ ᐃᓐᓇᕈᖅᐸᓪᓕᐊᖕᒪᑕ ᐊᒻᒪᓘᓐᓃᑦ ᐃᓅᔪᓐᓃᖅᓯᒪᓕᖅᖢᑎᒃ.

ᐅᓇ ᓯᕗᓪᓕᖅᐹᖑᙱᑦᑐᖅ ᓄᓇᕗᑦ ᑐᙵᕕᒃᑯᑦ ᒐᕙᒪᑐᖃᒃᑯᑦ ᒪᓕᒐᓕᕆᔨᒃᑯᖏᓐᓄᑦ ᕆᕗᐊᒥ ᐱᓕᕆᐊᖃᖁᔨᓪᓗᑎᒃ.

ᑰᑦᑎᖅ ᑎᑎᕋᓚᐅᖅᓯᒪᔪᖅ ᒫᔅᓯ 2017-ᒥ ᑕᐃᔅᓱᒪᓂ ᒪᓕᒐᓕᕆᓂᕐᒧᑦ ᒥᓂᔅᑕᐅᓚᐅᖅᑐᒧᑦ ᔫᑎ ᕗᐃᐊᓴᓐ-ᕇᐴᒧᑦ ᓕᐳᕈᓪ ᒐᕙᒪᒃᑯᓐᓂᒃ 2014-ᒥᑦ ᑎᒍᔭᐅᖁᔨᔾᔪᑎᓂᒃ ᐊᑐᖁᔨᓪᓗᑎᒃ ᕆᕗᐊᒧᑦ.

ᔪᓚᐃ 2019-ᖑᑎᓪᓗᒍ, ᑰᑦᑎᖅ ᑎᑎᕋᒃᑲᓐᓂᓚᐅᖅᓯᒪᔪᖅ ᒪᓕᒐᓕᕆᔨᒃᑯᓐᓄᑦ ᖃᐅᔨᔪᒪᓪᓗᓂ ᖃᓄᐃᒻᒪ ᑎᒍᔭᐅᑎᑦᑎᔾᔪᑎᑦ ᓄᖃᖅᑎᑕᐅᓯᒪᔭᕆᐊᒃᓴᖏᓐᓄᑦ ᐆᒧᖓ ᕆᕗᐊᒧᑦ.

ᑰᑦᑎᖅ ᐅᖃᓚᐅᕐᑐᖅ ᑖᒃᑯᓄᖓ ᑭᐅᔭᐅᓚᐅᕐᓯᒪᙱᓐᓂᖓᓄᑦ ᑎᑎᕋᖅᑕᕕᓂᖏᓐᓄᑦ.

ᐅᖃᓚᐅᕐᑐᖅ ᑕᒪᐃᓐᓂ ᓄᓇᕗᒧᑦ ᓯᕗᓕᐅᕐᑎ ᔫ ᓴᕕᑲᑖᖅ ᐊᒻᒪ ᐃᓇᖏᓚᐅᖅᓯᒪᔭᖓ ᓯᕗᓕᐅᖅᑎᐅᓂᑯ ᐹᓪ ᖁᐊᓴ ᑎᑎᕋᓚᐅᖅᓯᒪᖕᒥᖕᒪᑎᒃ ᒐᕙᒪᑐᖃᒃᑯᓐᓄᑦ ᕆᕗᐊ ᖃᓄᐃᓕᐅᕈᑎᒋᔭᐅᖁᔭᐅᓪᓗᓂ ᑭᓯᐊᓂᓕ ᑭᐅᔭᐅᓚᐅᕐᓯᒪᙱᑦᑑᒃ.

“ᖃᓄᒃᑲᓐᓂᖅ ᐅᖃᒃᑲᓐᓂᕈᓐᓇᙱᓐᓇᒪ ᖃᓄᑎᒋ ᐅᑯᐊ ᑲᓇᑕᒥ ᒐᕙᒪᒃᑯᑦ ᓄᓇᕗᒥᑦ ᐃᓄᖕᓂᒃ ᑕᒪᑐᒧᖓ ᐊᒃᓱᐊᓗᒃ ᐃᓱᒪᒋᔭᐅᑦᑎᐊᙱᓗᐊᕐᓂᖏᓐᓂᒃ,” ᑰᑦᑎᖅ ᑎᑎᕋᖅᑐᖅ.

“ᑕᒪᑐᒧᖓ ᑲᒪᒋᔭᖃᙱᓗᐊᕐᓂᖅ ᐅᑯᓂᖓ ᑎᑎᕋᖅᑕᐅᓯᒪᔪᓂᒃ ᐃᓱᒫᓘᑎᒋᔭᐅᓯᒪᔪᓂᒃ ᐱᑦᑎᐊᙱᔾᔪᑎᐅᓗᐊᓂᑯᓂᒃ ᓄᓇᕗᒻᒥᐅᓄᑦ ᓈᒻᒪᙱᓗᐊᕐᒪᓐ ᐊᒻᒪᓗ ᐋᖅᑭᒋᐊᒃᑲᓐᓂᕋᓱᖕᓂᕐᒧᑦ ᐊᑐᖅᑕᐅᓇᓱᒃᑐᓄᑦ ᒪᓕᙱᓗᐊᒻᒪᕆᒃᖢᓂ.”

ᓇᓕᐊᒃ ᓄᓇᕗᑦ ᑐᙵᕕᒃᑯ ᐅᑯᐊᓘᓐᓃᑦ ᒪᓕᒐᓕᕆᔨᒃᑯᑦ ᑭᐅᓚᐅᙱᑦᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᑕᒪᑐᒧᖓ ᑐᓴᕐᕕᒋᔭᐅᔪᒪᑎᓪᓗᒋᑦ.