ᓄᓇᕗᑦ ᑐᙵᕕᒃᑯ ᐋᔩᖃᑎᖃᕈᒪᔪᑦ ᐋᑐᕚᒥ ᐃᓄᐃᑦ ᓇᖕᒥᓂᖅ ᒐᕙᒪᖃᓕᕈᓐᓇᖁᓗᒋᑦ
ᑲᑐᔾᔨᖃᑎᒌᖑᔪᑦ ᐅᖃᓚᐅᕐᑐᑦ ‘ᐃᓄᐃᑦ ᐃᓅᓯᖏᑦ ᐊᒃᓱᐊᓗᒃ ᑲᑕᒃᓯᒪᕚᓪᓕᕐᒪᑕ’ ᐅᑯᑎᒎᓇᖅ ᓄᓇᕗᒥᑦ ᑭᒃᑯᓕᒫᓄᑦ ᒐᕙᒪᓕᕆᔨᓄᑦ
ᓄᓇᕗᑦ ᑐᙵᕕᒃᑯ ᐅᖃᓚᐅᕐᑐᑦ ᐅᖃᓪᓚᖃᑎᖃᕋᓱᖕᓂᐊᖅᑐᑦ ᒐᕙᒪᑐᖃᒃᑯᓐᓂ ᐃᓄᐃᑦ ᓇᖕᒥᓂᖅ ᒐᕙᒪᖃᓕᕐᑎᓐᓇᓱᒡᓗᒋ. ᐊᓗᑭ ᑰᑦᑎᖅ, ᓴᖅᑭᔮᖅᑐᖅ ᐅᕙᓂ ᐊᖅᓴᕐᓃᑦ ᑐᔪᕐᒥᕕᒃᒥ ᐃᖃᓗᖕᓂ ᐋᒐᓯ 13-ᖑᑎᓪᓗᒍ, ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ “ᐱᓕᕆᔾᔪᓯᑐᐃᓐᓇᐃᑦ ᐃᑲᔪᖅᑐᐃᙱᖢᑎᒃ ᐅᕙᑦᑎᓐᓂᒃ ᐊᒻᒪᓘᓐᓃᑦ ᐊᓂᒍᐃᖁᔨᙱᖢᑎᒃ ᑕᐅᑐᙳᐊᖅᑕᐅᓯᒪᔪᓂᒃ ᐊᔪᙱᑦᑐᓂᒃ ᐊᒻᒪ ᐱᕙᓪᓕᐊᔪᓐᓇᖅᑐᓂᒃ ᓄᓇᕗᒥᐅᓂ.” (ᐊᔾᔨᙳᐊᖁᑎᖓ ᑰᕆ ᓚᐅᕌᒃ)
For an English version of this story, see NTI says it will seek to negotiate Inuit self-government with Ottawa
ᓄᓇᕗᑦ ᑐᙵᕕᒃᑯᑦ ᐅᖃᕐᑐᑦ ᐋᔩᖃᑎᖃᕋᓱᖕᓂᐊᕐᓂᕋᖅᖢᑎᒃ ᐋᑐᕚᒥ ᐃᓄᐃᑦ ᓇᖕᒥᓂᖅ ᒐᕙᒪᖃᕈᓐᓇᖁᓗᒋᑦ.
ᓄᓇᕗᑦ ᑐᙵᕕᒃᑯ ᐅᖃᓚᐅᕐᑐᑦ ᑎᑎᕋᐅᓯᐅᓯᒪᔪᓂ ᖃᕋᓴᐅᔭᒃᑯᑦ ᐃᒪᓐᓇ, ᑕᐃᒪᙵᑦ ᓄᓇᕗᒥᑦ ᑭᒃᑯᓕᒫᓄᑦ ᒐᕙᒪᖓ ᐱᒋᐊᖅᑕᐅᓚᐅᕐᓯᒪᖕᒪᑦ ᐊᕐᕌᒎᓕᖅᑐᓂᒃ 22ᓂ, “ᐃᓄᐃᑦ ᐃᓅᓯᕆᕙᒃᑕᖏᑦ ᐊᒃᓱᐊᓗᒃ ᑲᑕᒃᐹᓪᓕᕐᓯᒪᖕᒪᑦ.”
ᐅᖃᕐᓯᒪᓪᓗᓂ ᓄᓇᕗᒥ ᒐᕙᒪᒃᑯᑦ ᐱᑦᑕᐃᓕᒪᖕᒪᑕ “ᐊᑐᐊᒐᕐᓂᒃ, ᖃᓄᐃᓕᐅᕈᑎᒃᓴᓂᒃ ᐊᒻᒪ ᐱᔨᑦᑎᕋᐅᑎᓂᒃ ᐃᓄᖕᓄᑦ ᐃᑲᔪᕈᑎᐅᔪᓐᓇᕋᔭᖅᑐᓂᒃ, ᓄᓇᕗᒥᐅᑕᓕᒫᓄ” ᐃᒪᐃᓕᐅᖅᖢᑎᒃ “ᐃᒻᒪᓕᓴᕐᓂ ᓄᓇᖃᑎᒌᓕᕐᓂᕐᒧᑦ ᐊᑐᐊᒐᐃᑦ, ᐱᓕᕆᐊᒃᓴᐃᑦ ᐊᒻᒪ ᐱᔨᑦᑎᕋᐅᑏ ᓴᐳᔾᔭᐅᓯᒪᖕᒪᑕ ᐅᕝᕙᓘᓐᓃᑦ ᓴᙱᓂᕐᓴᐅᑎᑕᐅᓪᓗᑎᒃ ᒐᕙᒪᒃᑐ ᑕᐅᑐᖕᓂᕐᓴᐅᓂᖏᓐᓂᒃ ᐃᓅᙱᑦᑐᓂᒃ ᐅᓄᙱᓐᓂᕐᓴᐅᔪᓂᒃ.”
ᐅᓇ ᑐᓴᖅᑎᑦᑎᔾᔪᑎ ᓴᖅᑭᑕᐅᓕᓚᐅᕐᑐᖅ ᐱᖁᔨᕗᖔᕈᑎᒥᒃ ᐊᓂᒍᐃᑎᑦᑎᓚᐅᖅᑎᓪᓗᒋᑦ ᓄᕕᐱᕆ 16-ᒥ ᑲᑐᔾᔨᖃᑎᒌᑦ ᑲᑎᒪᔨᖏᓐᓄᑦ ᐊᕐᕌᒍᒧᑦ ᑲᑎᒪᕕᒡᔪᐊᖅᑎᑦᑎᑎᓪᓗᒋᑦ ᑲᖏᖅᖠᓂᖅᒥ ᐱᓇᓱᐊᕈᓯᐅᓚᐅᕐᑐᒥ.
ᓄᓇᕗᑦ ᑐᙵᕕᒃᑯ ᐅᖃᓚᐅᕐᑐᑦ ᐱᓕᕆᐊᖃᕐᓂᐊᕐᓂᕋᖅᖢᑎᒃ ᐋᔩᖃᑎᒌᒍᓐᓇᕈᑎᒃᓴᓂᒃ, ᑖᓐᓇᓗ ᐱᒋᐊᕈᑎᐅᓕᕋᔭᖅᖢᓂ ᐅᖃᓪᓚᖃᑎᒌᖕᓂᕐᒥᒃ ᐅᑯᓂᖓ ᑲᓇᑕᒥ ᒐᕙᒪᒃᑯᓐᓂ ᐃᓱᒪᒃᓴᕐᓯᐅᕋᓱᒡᓗᑎᒃ “ᐱᐅᓂᕐᓴᐅᓇᔭᖅᑐᓂᒃ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐃᓄᐃᑦ ᓇᖕᒥᓂᖅ ᐊᐅᓚᑦᑎᔪᓐᓇᓂᕐᓴᐅᓕᕐᓗᑎᒃ ᓇᖕᒥᓂᖅ ᒐᕙᒪᓕᕆᓂᒃᑯᑦ.”
“ᐊᔪᕐᓇᓕᒑᖕᒪᑦ ᑲᔪᓯᓇᓱᒋᐊᒃᓴᖅ … ᐱᓕᕆᔾᔪᓯᖅᑎᒍᑦ ᐅᕙᑦᑎᓐᓂ ᐃᑲᔪᖅᑐᐃᙱᓗᐊᖅᑐᓂᒃ ᐅᕝᕙᓘᓐᓃᑦ ᐊᓂᒍᐃᖁᔨᙱᑦᑐᓂ “ᐱᓕᕆᔾᔪᓯᑐᐃᓐᓇᐃᑦ ᐃᑲᔪᖅᑐᐃᙱᖢᑎᒃ ᐅᕙᑦᑎᓐᓂᒃ ᐊᒻᒪᓘᓐᓃᑦ ᐊᓂᒍᐃᖁᔨᙱᖢᑎᒃ ᑕᐅᑐᙳᐊᖅᑕᐅᓯᒪᔪᓂᒃ ᐊᔪᙱᑦᑐᓂᒃ ᐊᒻᒪ ᐱᕙᓪᓕᐊᔪᓐᓇᖅᑐᓂᒃ ᓄᓇᕗᒥᐅᓂ.”, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᕐᑐᖅ.
“ᐋᖅᑭᒃᓱᐃᒃᑲᓐᓂᕋᓱᒡᓗᑎᒃ ᓂᕆᐅᒋᔭᐅᓚᐅᕐᓯᒪᔪᓂᒃ ᐊᒻᒪ ᑕᐅᑐᙳᐊᖅᑕᐅᓚᐅᕐᓯᒪᔪᓂᒃ ᐃᓄᖕᓄᑦ ᐊᒻᒪ ᓯᕗᓂᒃᓴᖏᓐᓄᑦ, ᐅᓇ ᐅᖃᓪᓚᖃᑎᒌᖕᓂᖅ ᓇᖕᒥᓂᖅ ᒐᕙᒪᖃᓕᕐᓂᕐᒧᑦ ᐱᒋᐊᒃᑲᓐᓂᕆᐊᖃᓕᕐᒪᑦ,” ᑰᑦᑎᖅ ᐅᖃᖅᑐᖅ. “ᐃᓄᐃᑦ ᑭᒡᒐᖅᑐᑦᑎᐊᕆᐊᖃᕋᑦᑎᒍᑦ ᐊᔪᙱᓐᓂᓕᒫᖏᓐᓄᑦ.”
ᐅᒃᑑᐱᕆᐅᑎᓪᓗᒍ ᓄᓇᕗᑦ ᑐᙵᕕᒃᑯ ᓄᓇᕗᒥᑦ ᒐᕙᒪᒃᑯᓐᓂ ᐸᓯᔭᒃᓴᙳᖅᑎᑦᑎᓚᐅᕐᓯᒪᖕᒪᑕ, ᐅᖃᖅᖢᑎᒃ ᒪᓕᒐᖅᑎᒍᑦ ᐱᓕᕆᐊᒃᓴᖏᓐᓂᒃ ᐊᑐᙱᓐᓂᖏᓐᓂᒃ ᐆᒥᖓ ᐃᓄᒃᑐᑦ ᐅᖃᐅᓯᕐᒥ ᐃᓕᓐᓂᐊᖅᑎᑦᑎᓂᖅ ᐊᑐᖅᑕᐅᓕᕐᓯᒪᙱᓐᓂᖓᓂᒃ ᓄᓇᕗᒥᑦ ᐃᓕᓐᓂᐊᖅᕕᓕᕆᓂᒃᑯᑦ.
(0) Comments