ᓄᓇᕗᑦ ᑐᙵᕕᒃ ᐃᒪᐃᑕᐅᖁᔨᔪᖅ ᑕᒪᒃᑯᐊ ᐃᖅᑲᓇᐃᔭᖅᑎᒋᔭᐅᔪᑦ ᓄᖅᑲᖓᔪᓐᓇᕐᓗᑎᒃ ᐊᑭᓕᖅᓱᖅᑕᐅᓗᑎᒃ ᐋᓐᓂᐊᕐᓂᖅᒧᑦ ᐊᑐᖅᑕᐅᓇᔭᖅᑐᒃᑯᑦ

ᓄᓇᕗᑦ ᑐᙵᕕᒃᑯᑦ ᓄᓇᕗᒥᑦ ᒐᕙᒪᒃᑯᓐᓂᒃ ᐋᖅᑭᒃᓯᖁᔨᔪᑦ ᑕᒪᐃᓐᓂᓕᒫᖅ ᐃᖅᑲᓇᐃᔭᖅᑎᐅᔪᓂᒃ ᓄᓇᕗᒥᑦ ᐋᓐᓂᐊᖅᓂᕐᒧᑦ ᐃᖅᑲᓇᐃᔭᙱᑎᓪᓗᒋᑦ ᐊᑭᓕᖅᑕᐅᖃᑦᑕᖁᔨᓪᓗᓂ.

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᓯᒪᔪᖅ ᑕᐃᒪᓐᓇ ᒪᐃ 13-ᒥᑦ ᑐᓴᒐᒃᓴᓕᐅᕐᓇᒃᑯᑦ, ᐅᖃᖅᖢᓂ ᐃᓱᒫᓘᑎᖃᕐᓂᕋᖅᖢᓂ ᐅᓄᕐᓯᕙᓪᓕᐊᔪᓂᒃ ᓄᕙᒡᔪᐊᕐᓇᖅ-19-ᒧᑦ ᐋᓐᓂᐊᖅᑖᖅᐸᓪᓕᐊᔪᓂᒃ ᓄᓇᕗᒥᑦ ᐊᒻᒪᓗ ᐊᒃᑐᐃᓯᒪᑐᐃᓐᓇᕆᐊᖃᕐᓂᖏᓐᓂᒃ ᐱᓕᕆᔨᒻᒪᕆᒋᔭᐅᔪᓄᑦ.

“ᐊᕐᕌᒍᒥ ᓄᓇᕐᔪᐊᖅ ᐋᓐᓂᐊᕕᒡᔪᐊᕐᓇᖅᑕᖃᓕᖅᑎᓪᓗᒍ, ᓈᒻᒪᙱᓗᐊᕐᒪᓐ ᐃᖅᑲᓇᐃᔭᖅᑎᐅᔪᑦ ᐋᓐᓂᐊᖅᑐᑦ ᐊᖏᕐᕋᖏᓐᓃᑐᐃᓐᓇᕈᓐᓇᙱᓐᓂᖏᓐᓂᒃ,” ᑰᑦᑎᖅ ᐅᖃᓚᐅᖅᑐᖅ ᑐᓴᒐᒃᓴᓕᐅᖅᑎᓪᓗᒍ.

“ᑕᒪᑦᑕᑦᑎᐊᖅ ᐱᓕᕆᓂᖃᕆᐊᖃᕋᑦᑕ ᓄᕙᒡᔪᐊᕐᓇᖅ-19 ᓄᖅᑲᖅᑎᓐᓇᓱᒡᓗᒍ ᐊᒻᒪᓗ ᐅᒃᐱᕈᓱᒃᖢᑕ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐊᒃᑐᐃᔾᔪᑎᖃᕈᓐᓇᕐᓂᖏᓐᓂᒃ ᓈᒻᒪᒃᑐᒃᑯᑦ ᑕᒪᐅᓇ ᐊᒻᒪᓗ ᐊᑐᕈᓐᓇᕋᔭᖅᖢᓂ ᓯᕗᓂᒃᓴᖃᓪᓚᒃᑎᓐᓄᑦ ᑎᑭᓪᓗᓂ.”

ᑰᑦᑎᖅ ᐅᖃᓚᐅᖅᑐᖅ ᓄᓇᕗᒥᑦ ᒐᕙᒪᒃᑯᑦ ᐋᖅᑭᒃᓯᔭᕆᐊᖃᕐᓂᖏᓐᓂᒃ ᒪᓕᒐᐅᓂᐊᖅᑐᒥᓐ ᐋᓐᓂᐊᕐᓂᖅᒧᑦ ᒥᑭᓛᒃᑯᑦ ᐊᑭᓕᖅᓱᖅᑕᐅᔪᓐᓇᖅᑎᑦᑎᓇᓱᒃᖢᓂ ᑕᒪᐃᓐᓂ ᓄᓇᕗᒥᑦ ᐃᖅᑲᓇᐃᔭᖅᑎᓂᒃ, ᐅᕝᕙᓘᓐᓃᑦ ᐋᓐᓂᐊᖅᑐᓂᒃ ᐊᑭᓕᐅᑎᓄᑦ ᐅᑎᖅᑎᑕᐅᑎᑦᑎᔾᔪᑎᓂᒃ ᐃᖅᑲᓇᐃᔭᖅᑎᑦᑎᔨᓄᑦ ᓄᓇᕗᒥᑦ, ᑕᐃᒪᓐᓇᑦᑕᐃᓐᓇ ᔫᑳᓐ ᒪᓂᒪᓯᒪᔭᖓᓂᒃ.

ᓯᕗᓕᐅᖅᑎ ᔫ ᓴᕕᑲᑖᖅ ᑭᐅᓚᐅᕐᑐᖅ ᐊᐱᕆᔪᖃᖅᑎᓪᓗᒍ ᓄᓇᕗᒥᑦ ᒐᕙᒪᒃᑯᑦ ᐱᔪᒪᓂᕆᔭᖏᓐᓂᒃ ᐊᑐᓕᖅᑎᑦᑎᓂᖅᒥᒃ ᐋᓐᓂᐊᖅᑐᓂᒃ ᐊᖏᕐᕋᕐᓯᒪᓂᖏᓐᓂᒃ ᐊᑭᓕᖅᓱᖅᑕᐅᖃᑦᑕᖕᓂᖏᓐᓂᒃ ᒪᐃ 14-ᒥᑦ ᑐᓴᒐᒃᓴᓕᐅᖅᑎᓪᓗᒋᑦ, ᐅᖃᖅᖢᓂ ᒐᕙᒪᖓ ᓱᓕ ᐃᓱᒪᒃᓴᖅᓯᐅᕈᑎᖃᕆᐊᖃᕐᒪᑕ ᖃᓄᖅ ᑕᒪᓐᓇ ᐱᓕᕆᐊᖑᓂᐊᕐᓂᖓᓂᒃ.

“ᕿᒥᕐᕈᐊᓕᖅᑐᒍᑦ ᐊᓯᐊᒎᕈᑎᐅᔪᓐᓇᕐᓂᐊᖅᑐᓂᒃ ᒫᓐᓇ,” ᐅᖃᓚᐅᖅᑐᖅ ᑐᓴᒐᒃᓴᓕᐅᖅᑎᓄᑦ. “ᒐᕙᒪᑐᖃᒃᑯᑦ ᐋᓐᓂᐊᖅᑐᓄᑦ ᐊᑭᓕᐅᑎᒋᕙᒃᑕᖏᓐᓂᒃ ᕿᒥᕐᕈᐊᕆᐊᖃᕐᒥᒐᑦᑕ, ᑕᐃᒪᓕ ᖃᓄᓪᓚᕆᒃ ᐃᓱᒪᓕᐅᕆᓚᐅᙱᑦᑐᒍᑦ ᓱᓕ.”

ᓴᕕᑲᑖᖅ ᐅᖃᒃᑲᓐᓂᓚᐅᖅᑐᖅ: “ᐋᓐᓂᐊᕈᕕᑦ, ᑕᐃᒪᓕ ᐊᖏᕐᕋᖅᓯᒪᔭᕆᐊᖃᖅᐳᓯ.”

ᐋᓐᓂᐊᕕᒡᔪᐊᕐᓇᖅ ᐱᒋᐊᓕᓵᖅᑎᓪᓗᒋ, ᒪᕐᕈᑐᐊᒃ ᑲᓇᑕᒥ ᐳᕌᕕᓐᓯᐅᔫᒃ ᒪᓂᒻᒪᐃᑎᑦᑎᓯᒪᓚᐅᕐᑐᑦ ᐋᓐᓂᐊᖅᑐᓂᒃ ᐊᑭᓕᖅᓱᐃᖃᑦᑕᕐᓂᐊᕐᓂᖅᒥᒃ: ᑯᐸᐃᒃ ᐊᒻᒪ ᐳᕆᓐᔅ ᐃᐊᑦᕗᑦ ᐊᐃᓚᓐ. ᐋᓐᑎᐅᕆᐅᒥᑦ ᐱᓇᓱᓕᑕᐃᓐᓇᖅᑐᑦ ᐋᓐᓂᐊᕐᓂᖅᒧᑦ ᐊᑭᓕᖅᑕᐅᔪᓐᓇᕐᓂᖅᒥᒃ.

— ᐃᓚᖃᖅᖢᓂ ᑎᑎᖃᖁᑎᒋᔭᐅᔪᓂᒃ ᑕᔅᑎᓐ ᐸᑖᕐᒧᑦ