ᓄᓇᕗᑦ ᒐᕙᒪᒃᑯᑦ ᐃᓚᐅᑎᑦᑎᔭᕆᐊᖃᖅᑐᑦ ᐃᓄᖕᓂ ᐆᒧᖓ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᕐᔪᐊᕐᒥᒃ ᐋᕿᒃᓱᐃᓂᕐᒥᒃ: ᓄᓇᕗᑦ ᑐᙵᕕᒃ ᑎᒥᖓᑦ

ᐱᔾᔪᑖ: ᒥᓂᔅᑕ ᔪᐊᓇᓯᐅᑉ ᑎᑎᖅᑲᖓ ᓄᓇᑦᓯᐊᖅ ᓅᔅ ᐱᕙᓪᓕᐊᔪᓂᒃ ᑐᓴᕈᑎᓄᑦ ᐱᖁᔭᒃᓴᖅ 25 ᑐᓴᕆᐊᖃᑦᑕᓂᕐᒧᑦ

ᒥᓂᔅᑕ ᔪᐊᓇᓯ ᑎᑎᕋᓚᐅᖅᑐᖅ ᓴᖅᑭᖅᑕᐅᓪᓗᑎᒃ ᓄᓇᑦᓯᐊᖅ ᓅᔅᑯᓐᓄᑦ ᓅᕙᐃᒻᕙ 25, 2019 ᐅᖃᐅᓯᓕᓐᓂᒃ ᐅᖃᖃᑎᒌᖃᑦᑕᕐᓯᒪᓂᖏᓐᓂᒃ ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᒡᕕᐊ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓ ᐱᖁᔭᒃᓴᖅ 25 ᐱᔾᔪᑎᒋᓪᓗᒍ, ᓇᓗᓇᐃᕐᓯᓪᓗᓂ ᑖᒃᑯᐊ ᐅᖃᖃᑎᒌᓐᓂᕆᖃᑦᑕᓚᐅᖅᑕᖏᑦ ᐊᐅᓚᓂᖃᓚᐅᕐᓂᖏᓐᓂᒃ ᐅᑉᐱᕆᖃᑦᑕᐅᑎᓂᒃᑯᑦ ᐊᒻᒪᓗ ᒪᓂᒪᑎᑦᓯᕕᐅᓪᓗᑎᒃ ᑐᓐᖓᕕᒃᑯᑦ ᐱᕕᒃᓴᖃᖅᑎᑕᐅᑦᓯᐊᖅᑐᑎᒃ ᐅᖃᐅᓯᖃᖁᓪᓗᒋᑦ ᐃᓱᒫᓘᑎᒥᓂᒃ.

ᒥᓂᔅᑕ ᑕᑯᓐᓇᖅᑕᒥᒍᑦ ᐃᓇᑦᓯᓂᕐᒥᓂᒃ ᑐᓐᖓᕕᒃᑯᓐᓂᒃ ᐃᓄᓕᒫᖅᑎᑦᓯᓂᒃᑯᑦ ᑲᑎᒪᓂᐅᖃᑦᑕᖅᑐᓄᑦ ᐊᒻᒪᓗ ᑐᓐᖓᕕᒃᑯᓐᓂᒃ ᓈᓚᒋᐊᖅᑐᑎᑦᓯᖃᑦᑕᕐᓂᖓ ᓄᓇᕗᑦ ᒐᕙᒪᒃᑯᑦ ᑕᑯᓐᓇᖅᑕᖓ ᐃᖅᑲᓇᐃᔭᖃᑎᖃᖃᑦᑕᓚᐅᕐᓂᕐᒥᒃ ᑲᑎᒪᓂᐅᖃᑦᑕᓚᐅᖅᑐᓂᒃ. ᑕᐃᒪᐃᓐᖏᒻᒪᑦ. ᐃᓄᐃᑦ ᐱᔪᓐᓇᐅᑎᓖᑦ ᐃᓛᒃᑯᑦ 32 ᓄᓇᕗᑦ ᐊᖏᕈᑎᖏᓐᓂ ᐃᓚᒋᔭᐅᒋᐊᖃᕐᓂᕐᒧᑦ ᐱᕙᓪᓕᐊᑎᑕᐅᓂᖏᓐᓂ ᐃᓅᓯᕐᒧᑦ ᐃᓕᖅᑯᓯᕐᒧᓪᓗ ᐊᑐᐊᒐᐃᑦ, ᐊᒻᒪᓗ ᐋᖅᑭᓱᖅᑕᐅᑎᓪᓗᒋᑦ ᐃᓅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐱᓕᕆᐊᒃᓴᑦ ᐱᔨᑦᓯᕈᑏᓪᓗ, ᐃᓚᒋᔭᐅᓪᓗᑎᒃ ᐊᐅᓚᑕᐅᔾᔪᓯᖏᑦ. ᐊᔾᔨᒋᓐᖏᑕᖓ ᑐᓐᖓᕕᒋᔭᐅᒋᐊᖃᕐᓂᖓ.

ᐱᖁᔭᒃᓴᖅ 25 ᐋᖅᑭᒋᐊᕆᖁᔨᔾᔪᑕᐅᒻᒪᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᖁᔭᖓᓄᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᒧᑦ ᐋᖅᑭᑦᓯᒪᒍᑕᐅᓗᓂ ᐊᑐᐊᒐᕐᓄᑦ ᐊᒻᒪᓗ ᐊᐅᓚᑕᐅᔾᔪᓯᖓᓄᑦ ᐃᓄᐃᑦ ᐅᖃᐅᓯᖓᒍᑦ ᐃᓕᓴᐃᓂᖅ. ᑖᓐᓇ ᑐᓐᖓᕕᒋᔭᐅᒋᐊᖃᕐᓂᖓᓄᑦ ᐊᑐᐊᒐᕐᒧᑦ ᐊᓯᔾᔨᕈᑕᐅᓂᖓ ᐊᒃᑐᐃᓂᖃᕐᓂᐊᖅᑐᖅ ᐅᓄᖅᑐᓂᒃ ᐃᓄᓐᓂᒃ ᕿᑐᕐᖓᓕᓐᓂᒃ ᐊᒻᒪᓗ ᐃᓄᓐᓂᒃ ᕿᑐᕐᖓᕆᔭᐅᔪᓂᒃ ᓄᓇᕗᒻᒥ. ᑕᐃᒪᐃᑎᓪᓗᒍ, ᐃᓄᐃᑦ ᐱᔪᓐᓇᐅᑎᓖᑦ ᐃᓚᒋᔭᐅᔪᓐᓇᓂᕐᒧᑦ ᐱᕙᓪᓕᐊᑎᑕᐅᓂᖏᓐᓂ ᐋᖅᑭᓱᖅᑕᐅᕙᓪᓕᐊᓂᖏᓐᓂᓗ.

ᑐᓐᖓᕕᒃᑯᑦ ᐱᕕᒃᓴᓕᐅᖅᑕᐅᓯᒪᓚᐅᓐᖏᑦᑐᑦ ᐃᓚᒋᔭᐅᓂᕐᒧᑦ ᐱᕙᓪᓕᐊᑎᑕᐅᓂᖏᓐᓄᑦ ᐊᑐᐊᒐᕐᓄᑦ ᐱᔪᒪᔭᐅᔪᑦ ᓇᓗᓇᐃᔭᕐᓯᒪᔪᑦ ᒪᓕᒐᑦᓴᓕᐊᖑᒍᒪᔪᒥ ᐱᖁᔭᒃᓴᖅ 25. ᓯᖁᒥᑦᓯᑐᐃᓐᓇᖏᑦᑐᖅ ᒐᕙᒪᒃᑯᑦ ᐱᓇᓱᐊᒐᑦᓴᖏᓐᓂᒃ ᓇᓗᓇᐃᔭᕐᓯᒪᔪᓂ ᓄᓇᕗᑦ ᐊᖏᕈᑎᖏᓐᓂ, ᐊᑐᖅᑕᐅᖃᑦᑕᕐᓯᒪᓂᖓᒍᑦ ᓴᖅᑭᔮᖅᑎᑦᑎᔪᖅ ᐱᓇᓱᐊᖃᑎᒌᓐᓂᐅᓯᒪᔪᑦ ᑎᑭᐅᑎᓯᒪᓂᖏᓐᓂᒃ ᑲᔪᓯᑎᑦᓯᓂᕐᒧᑦ ᒪᖠᒐᑦᓴᓂᒃ ᐃᓚᓕᐅᔾᔨᓯᒪᑦᓯᐊᓂᕐᓴᓂᒃ ᐃᓄᐃᑦ ᑐᕌᒐᖏᓐᓂᒃ ᑐᕌᒐᑦᓴᖏᓐᓂᓪᓗ.

ᑐᓐᖓᕕᒃᑯᑦ ᐋᖅᑭᑦᓱᐃᖃᑎᖃᖃᑦᑕᕐᓯᒪᔪᑦ ᒪᓕᒐᑦᓴᓂᒃ ᓄᓇᕗᑦ ᒐᕙᒪᒃᑯᖏᓐᓂᒃ, ᓲᕐᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᖅ, ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐱᖁᔭᖓ ᐊᒻᒪᓗ ᐆᒪᔪᓕᕆᓂᕐᒧᑦ ᐱᖁᔭᖅ. ᖃᐅᔨᒪᓪᓗᑕ ᑲᔪᓯᔪᓐᓇᕆᐊᖓ, ᑐᓐᖓᕕᒃᑯᑦ ᖃᐅᔨᒃᑲᐃᓚᐅᖅᑐᑦ ᓯᕗᓕᖅᑎᒥᒃ ᐊᒻᒪᓗ ᓂᕈᐊᖅᑕᐅᕋᑖᖅᑎᓪᓗᒋᑦ ᒐᕙᒪᒃᑯᑦ ᐊᐅᓚᑦᓯᓗᑎᒃ ᐃᖅᑲᓇᐃᔭᖃᑎᒌᓐᓂᒃᑯᑦ ᐊᒻᒪᓗ ᑲᑐᔾᔨᖃᑎᒌᓐᓂᕐᒧᑦ ᐃᓄᐃᑦ ᓯᕗᓪᓕᐅᔾᔭᐅᔭᕆᐊᓕᖁᑎᖏᓐᓂᒃ,ᐃᓚᒋᔭᐅᓪᓗᑎᒃ ᐃᓕᓐᓂᐊᕐᓂᓕᕆᓂᖅ, ᐅᖃᐅᓯᓕᕆᓂᖅ ᐊᒻᒪᓗ ᐃᓕᖅᑯᓯᖅ.

ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᒡᕕᐊ ᑐᓂᓯᓚᐅᓐᖏᑦᑐᖅ ᒪᓕᒐᑦᓴᓕᐊᖑᒍᒪᔪᒥᒃ ᑐᓐᖓᕕᒃᑯᓐᓄᑦ ᐊᐅᒡᒍᓯ 31, 2018− ᒧᓄᑦ, ᑕᐃᑲᓂ ᐱᓕᕆᒡᕕᒃ ᑐᓂᓯᓚᐅᖅᑐᖅ ᑎᑎᕋᕐᓯᒪᔪᓂᒃ ᐸᕐᓇᓯᒪᔪᓂᒃ ᓄᓇᓕᓐᓂᒃ ᑐᓴᕆᐊᖃᑦᑕᕐᓂᐅᓂᐊᖅᑐᓂᒃ. ᑐᓐᖓᕕᒃᑯᑦ ᐱᓇᓱᐊᕈᓯᐅᓐᖏᑦᑐᒥᓪᓘᓐᓃᑦ ᐱᕕᖃᖅᑎᑕᐅᓚᐅᖅᑐᑦ ᖃᐅᔨᓴᕐᓂᕐᒧᑦ ᐱᖁᔭᒃᓴᖅ 25-ᒥ ᐊᒻᒪᓗ ᐸᕐᓇᓂᕐᒧᑦ ᐊᒻᒪᓗ ᐸᕐᓇᒋᐊᖃᖅᑐᑎᒃ ᓄᓇᕗᒻᒥ ᑐᓴᕆᐊᖃᑦᑕᓂᕐᒧᑦ ᐳᓚᕋᕐᓂᐅᓂᐊᖅᑐᒥᒃ. ᑖᓐᓇ ᐃᖅᑲᓇᐃᔭᖃᑎᒌᓐᓂᐅᖏᑦᑐᖅ.

ᐱᓕᕆᒡᕕᒃ ᐊᐅᓚᑦᓯᓚᐅᖅᑐᖅ ᑐᓴᕆᐊᖃᑦᑕᓂᕐᓂᒃ ᐅᕗᖓᑦᓯᐊᖅ ᑕᑯᓐᓇᖅᑐᒥᒃ, ᐊᒻᒪᓗ ᐋᖅᑭᒍᑎᒃᓴᕐᓯᐅᓚᐅᕋᑎᒃ ᐅᑉᕙᓘᓐᓃᑦ ᐃᓂᒃᓴᖃᖅᑎᓯᓂᕐᒧᑦ ᐃᓱᒫᓘᑕᐅᔪᓂᒃ ᓴᖅᑭᑕᐅᔪᓂᒃ ᐃᓄᓐᓄᑦ, ᑐᓐᖓᕕᒃᑯᑦ ᐊᒻᒪᓗ ᐊᓯᖏᑦ ᑲᑐᔾᔨᖃᑎᒌᑦ ᓲᕐᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ (DEA) ᐊᒻᒪᓗ ᑲᑐᔾᔨᖃᑎᒌᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ (CNDEA) ᑕᐃᑲᓃᖃᑕᐅᓚᐅᕐᒥᔪᑦ.

ᐃᖅᑲᓇᐃᔭᑎᒋᐊᒃᑲᓂᖅᑕᕋ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓄᓇᕗᑦ ᐊᖏᕈᑎᖏᓐᓂ ᑐᑭᓯᓇᑦᓯᐊᖅᑐᑦ ᐱᓇᓱᐊᒐᑦᓴᑦ ᑲᔪᓯᑎᑕᐅᖁᓪᓗᒍ ᐃᓛᒃᑯᑦ 32, ᐊᒻᒪᓗ ᐱᓕᕆᑉᕕᒃ ᐊᐅᓚᑦᓯᑦᓯᐊᕆᐊᓕᒃ ᐱᔾᔪᑎᖃᑦᓯᐊᕐᓗᓂ,

ᐱᓇᓱᐊᖅᑕᐅᒋᐊᓕᑦᑎᒍᓪᓗ ᐊᒻᒪᓗ ᐱᓕᕆᐊᖑᒋᐊᖃᕐᓂᖏᑎᒍᑦ ᐊᒻᒪᓗ ᑎᒍᒋᐊᕐᓯᒪᓗᑎᒃ ᐅᐱᒋᔭᐅᒍᑎᖓᓂᒃ ᑯᐃᓐ ᑲᑐᔾᔨᖃᑎᖃᓕᕋᐃᑉᐸᑦ ᐃᓄᓐᓂᒃ.

ᑐᓐᖓᕕᒃᑯᑦ ᐅᑉᐱᕆᔭᖓ ᑎᑎᕋᖅᑕᐅᑲᓐᓂᕆᐊᖃᕐᓂᖓ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅ ᑲᔪᓯᑎᑕᐅᓗᓂ ᐃᓄᐃᑦ ᐱᖠᕆᖃᑕᐅᓗᑎᒃ ᐱᓇᐊᒐᑦᓴᑎᒍᑦ ᑐᓐᖓᕕᓕᐊᖑᔪᒧᑦ ᐊᓯᔾᔨᕈᑕᐅᒋᐊᓕᒃ ᐱᓕᕆᑉᕕᐅᑉ ᐊᐅᓚᑦᓯᓂᖓᒍᑦ, ᐊᒻᒪᓗ ᐃᓘᓐᓈᒍᑦ ᐃᓕᓴᕆᔭᐅᓗᑎᒃ ᐃᓄᐃᑦ ᐱᔪᓐᓇᐅᑎᖏᑦ.

ᑎᑎᕋᖅᑐᖅ,

ᐊᓗᑭ ᑰᑦᑎᖅ
ᐊᖓᔪᖅᑳᖅ, ᓄᓇᕗᑦ ᑐᓐᖓᕕᒃ ᑎᒥᖓ