ᓄᓇᕗᑦ ᒐᕙᒪᒃᑯᑦ ᐸᕐᓇᐅᓯᐅᕈᒪᔪᑦ ᓄᑖᒥ ᑎᒥᐅᓂᐊᕐᑐᒥ ᐸᓖᓯᒃᑯᑦ ᖃᓄᐃᓕᐅᕐᓂᕌᖓᑕ ᖃᐅᔨᓴᖅᑎᐅᓇᔭᖅᑐᓂᒃ

ᒪᓕᒐᓕᕆᔨᒃᑯᑦ ᒥᓂᔅᑕᖓ ᐅᖃᕐᑐᖅ ᑭᙵᓂ ᐊᔾᔨᓕᐅᕐᑕᐅᓂᑯ “ᑕᐃᒪᐃᑦᑐᑐᐊᖑᔪᖅ”

ᐊᐅᓚᔪᖅ ᐊᔾᔨᓕᐅᕐᑕᐅᓂᑯ ᓴᖅᑭᑎᑕᐅᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ ᐸᓖᓯ ᑭᙵᓂᑦ, ᐅᕙᓂ ᓴᖅᑭᔮᖅᑐᖅ, ᐊᖑᑎᒥ ᐅᕐᕈᑎᑦᑎᓪᓗᓂ ᓄᓇᓯᐅᑎᖓᑕ ᐹᖓᓄᑦ ᓈᒻᒪᒃᓴᙱᔾᔪᑎᐅᓚᐅᕐᐳᖅ ᐅᓄᕐᑐᓄᑦ. ᔩᓂ ᐃᕼᐊᓗᐊᒃ, ᓄᓇᕗᑦ ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᐅᖃᓚᐅᕐᑐᖅ ᐊᔾᔨᓕᐅᕐᓯᒪᔪᖅ “ᑕᐃᒪᐃᑦᑐᑐᐊᖑᓂᕋᖅᖢᓂᐅ” ᐊᒻᒪᓗ “ᐸᓖᓯᒃᑯᑦᐱᓕᕆᕙᒃᑐᑦ ᓄᓇᓕᖕᓄᑦ ᐱᐅᔪᓂᒃ.” (ᐊᔾᔨᙳᐊᖁᑎᒋᔭᐅᔪᖅ)

By ᐃᐊᒪ ᑐᕌᓐᑐ

For an English version of this story, see Nunavut government planning new oversight body for police-involved incidents

ᓄᑖᒥ ᖃᓄᐃᓕᐅᕈᑎᒃᓴᓂ ᖃᐅᔨᓴᖃᑦᑕᕋᔭᖅᑐᒥ ᐸᓖᓯᖏᑦ ᓄᓇᕗᒥ ᑐᓴᖅᑎᑦᑎᒍᑎᐅᓛᖅᑐᖅ ᐅᑭᐊᒃᓵᖅ ᒪᓕᒐᓕᕆᔨᕐᔪᐊᒃᑯᑦ ᑲᑎᒪᓕᕐᐸᑕ, ᐅᖃᓚᐅᕐᑐᖅ ᓄᓇᕗᑦ ᒪᓕᒐᓕᕆᔨᒃᑯᑦ ᒥᓂᔅᑕᖓᑦ.

ᓄᓇᕗᑦ ᐸᓖᓯᖏᑦ ᒫᓐᓇ ᐊᖏᖃᑎᒌᒍᑎᖃᕐᒪᑕ ᐋᑐᕚᒥ ᐊᒻᒪ ᒑᒍᕆᒥᑦ ᐸᓖᓯᒃᑯᑦ ᖃᐅᔨᓴᖃᑦᑕᕐᓗᑎᒃ ᐱᖓᔪᒋᔭᐅᓂᒃᑯᑦ ᖃᓄᐃᓕᐅᕈᑎᐅᔪᓂᒃ ᐸᓖᓯᒃᑯᑦ ᐱᓕᕆᐊᖃᖅᑎᓪᓗᒋᑦ ᐋᓐᓂᖅᑐᖃᕐᓂᕐᒧᑦ ᐅᕝᕙᓘᓐᓃᑦ ᑐᖁᔪᖃᖅᑎᓪᓗᒍ.

“ᐱᓕᕆᐊᖃᕋᓱᒃᓯᒪᒐᑦᑕ ᕿᓂᕋᓱᒃᖢᑕ ᐱᓕᕆᕝᕕᐅᔪᒥ ᕿᒥᕐᕈᐊᕈᓐᓇᕋᔭᖅᑐᓂᒃ ᐅᕙᑦᑎᓐᓄᑦ. ᐊᒻᒪᓗ ᖃᓂᑦᑐᒃᑯᑦ ᑐᓴᖅᑎᑦᑎᔪᓐᓇᕐᓂᐊᕋᓱᒋᓪᓗᑕ. ᐅᑭᐊᒃᓵᖃᐃ ᑲᑎᒪᕕᒡᔪᐊᓕᕐᐸᑕ. ᓄᓇᕗᒻᒥᐅᓄᑦ ᑐᓴᒐᒃᓴᖃᕐᓂᐊᕈᒪᔪᖓ,” ᔩᓂ ᐃᕼᐊᓗᐊᒃ, ᓄᓇᕗᑦ ᒪᓕᒐᓕᕆᔨᒃᑯᑦ ᒥᓂᔅᑕᖓᑦ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

2018-ᒥᑦ ᐅᑭᐊᒃᓵᒃᑯᑦ ᑲᑎᒪᑎᓪᓗᒋ ᐃᕼᐊᓗᐊᒃ ᐅᖃᓚᐅᕐᓯᒪᔪᖅ ᒪᓕᒐᓕᕆᔨᒃᑯᑦ ᕿᒥᕐᕈᐊᕐᓂᕋᖅᖢᓂᒋᑦ ᕿᒥᕐᕈᐊᖅᑎᒃᓴᐅᓇᔭᖅᑐᓂᒃ ᑕᒫᙵᒥᐊᖅ—ᐸᓖᓯᒃᑯᓐᓄᑦ ᐊᐅᓚᑕᐅᙱᓪᓗᓂ—ᕿᒥᕐᕈᐊᖃᑦᑕᕋᔭᖅᑐᓂᒃ ᓈᒻᒪᙱᓕᐅᕈᑎᐅᓯᒪᔪᓂᒃ ᐸᓖᓯᒃᑯᓄᑦ ᐱᓗᐊᖅᑐᐊᓘᕙᖕᓂᖏᓐᓂᒃ ᓄᓇᕗᒥᑦ.

ᔭᓄᐊᕆ 1 ᐱᒋᐊᓚᐅᕐᑎᓪᓗᒍ, 6-ᖑᓕᕐᑐᑦ ᓄᓇᕗᒥ ᐅᑯᐊ ᐋᑐᕚᒥᑦ ᐸᓖᓯᓕᕆᔨᒃᑯᑦ ᑎᑭᖁᔭᐅᓯᒪᓪᓗᑎᒃ ᖃᐅᔨᓴᕐᓂᐊᕐᒪᑕ. ᐱᖓᓱᑦ ᐸᓖᓯᒃᑯᑦ ᖁᑭᓴᕐᓯᒪᓂᖏᓐᓄᑦ, ᒪᕐᕉᖕᓂ ᑐᖂᑦᑎᓯᒪᓪᓗᑎᒃ.

6-ᒋᔭᐅᔪᖅ ᖃᐅᔨᓴᕐᓂᖅ ᐱᒋᐊᓕᓚᐅᕐᑐᖅ ᑕᕐᕆᔭᒐᓕᐊᖑᔪᖅ ᓴᖅᑭᑕᐅᓚᐅᖅᑎᓪᓗᒍ ᐊᐃᑉᐹᓂ, ᔫᓂ 2-ᒥᑦ, ᐊᖑᑎ ᑭᙵᓂ ᐸᓖᓯᒧᑦ ᐅᕐᕈᑎᑕᐅᑎᓪᓗᒍ ᓄᓇᓯᐅᑎᐅᑉ ᐹᖓᓄᑦ ᒪᑐᐃᕐᕕᐅᓪᓗᓂ. ᑖᓐᓇ ᑕᕐᕆᔭᒐᒃᓴᖅ ᓴᖅᑭᑕᐅᓚᐅᕐᑎᓪᓗᒍ, ᐸᓖᓯ ᓄᓇᓕᖕᓂᑦ ᐊᐅᓪᓚᖅᑎᑕᐅᓕᓚᐅᕐᑐᖅ ᐊᒻᒪ ᖃᐅᔨᓴᖅᑕᐅᓕᕐᖢᓂ.

ᑖᓐᓇ ᐊᖑᑎ ᐊᔾᔨᓕᐅᕐᑕᐅᔪᖅ ᐋᖓᔮᓚᐅᕐᑐᖅ ᐊᒻᒪᓗ ᑎᒍᔭᐅᓪᓗᓂ ᐅᕘᓈᖓᔪᓄᑦ ᓄᓇᕗᒥᑦ ᐃᒥᐊᓗᖕᒧᑦ ᐱᖁᔭᕐᔪᐊᓂ, ᐸᓖᓯᒃᑯᑦ ᐅᖃᓚᐅᕐᑐᑦ. ᑖᓐᓇᓗ ᐱᕋᔭᖕᓂᕐᒧᑦ ᐸᓯᔭᒃᓴᙳᖅᑎᑕᐅᓚᐅᙱᑦᑐᖅ.

ᑖᓐᓇ ᐊᖑᑎ ᐊᔾᔨᓕᐅᕐᑕᐅᓯᒪᔪᖅ ᐅᖃᓚᐅᕐᒥᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐊᐱᖅᓱᖅᑕᐅᑎᓪᓗᒍ ᐱᖓᔪᐊᓂᑦ, ᔫᓂ 3-ᒥ, ᑖᓐᓇ ᐸᓖᓯ ᐸᓯᔭᒃᓴᙳᖅᑎᑕᐅᖁᓪᓗᓂᐅᒃ.

ᐊᐱᕆᔭᐅᑎᓪᓗᒍ ᐸᓖᓯ ᐱᓕᕆᐊᖃᕐᓯᒪᔪᖅ ᐸᓯᔭᒃᓴᙳᖅᑎᑕᐅᔭᕆᐊᖃᕆᐊᒃᓴᖓᓂᒃ, ᐃᕼᐊᓗᐊᒃ ᐅᖃᓚᐅᕐᑐᖅ ᐅᖃᕈᓐᓇᙱᓐᓂᖓᓂ ᑕᒪᓐᓇ ᖃᐅᔨᓴᖅᑕᐅᕙᓪᓕᐊᑎᓪᓗᒍ.

ᒪᓕᒐᓕᕆᔨᒃᑯᑦ ᒥᓂᔅᑕᖓ ᐅᖃᕐᑐᖅ ᑭᙵᓂ ᐊᔾᔨᓕᐅᕐᑕᐅᓂᑯ “ᑕᐃᒪᐃᑦᑐᑐᐊᖑᔪᖅ”

ᐃᕼᐊᓗᐊᒃ ᐅᖃᓚᐅᕐᑐᖅ ᑕᐃᒪᐃᑉᐸᓗᐊᙱᓐᓂᖏᓐᓂᒃ ᐊᔾᔨᓕᐅᕐᓯᒪᔪᑎᑐᑦ ᓄᓇᕗᒥᑦ.

“ᑕᐃᒪᐃᓕᐅᕐᐸᓗᐊᕋᓱᒋᙱᑕᕋ… ᐸᓖᓯᒃᑯᑦ ᓄᓇᑦᑎᓐᓂ ᐱᓕᕆᐊᖏᑦᑎᒍᑦ ᐃᑲᔪᖃᑦᑕᕐᒪᑕ ᐱᐅᔪᓂᒃ… ᐅᓇ ᑕᐃᒪᐃᑦᑐᑐᐊᖑᔪᖅ ᐊᒻᒪᓗ ᖃᓄᐃᓕᐅᕈᑎᐅᓯᒪᓪᓗᓂ ᖃᓄᐃᓕᖓᓂᖓᒍᑦ,” ᐃᕼᐊᓗᐊᒃ ᐅᖃᖅᑐᖅ.

“ᖃᓄᐃᓕᐅᕈᓘᔭᕐᓯᒪᑎᓪᓗᒋᑦ ᑕᒪᑐᒪᓂ ᐅᑭᐅᖑᔪᒥ, ᐊᐃᑦᑖᖑᒐᓗᐊᖅ ᐊᒻᒪᓗ ᑕᐃᒪᐃᓕᐅᑲᓐᓂᖁᓐᓇᙱᖢᓂ,” ᐅᖃᒃᑲᓐᓂᕐᑐᖅ.

ᐅᑯᑎᒎᓇᕐᓕ ᓄᓇᕗᑦ ᑐᙵᕕᒃᑯᑎᒍᑦ, 15 ᐃᓄᐃᑦ ᑐᖁᑕᐅᓯᒪᓕᕐᑐᑦ ᐸᓖᓯᒃᑯᓐᓄᑦ ᓄᓇᕗᒥᑦ ᑕᐃᒪᙵ ᓄᓇᕗᑦ ᐱᒋᐊᓚᐅᕐᓯᒪᑎᓪᓗᒍ 1999-ᒥᑦ. ᒪᕐᕉᒃ ᐸᓖᓯᓄᑦ ᖁᑭᖅᑕᐅᓪᓗᑎᒃ ᑐᖁᑕᐅᓂᑰᒃ ᑕᒪᑐᒪᓂ ᐅᑭᐅᒥ ᓄᓇᕗᒥᑦ.

“ᖃᓄᐃᓕᐅᖃᑦᑕᕐᓯᒪᓂᐅᔪᑦ ᐊᒻᒪ ᐱᕙᓪᓕᐊᓪᓗᓂ ᐱᑦᑎᐊᙱᕐᔪᐊᕐᓂᐅᔪᑦ ᐸᓖᓯᒃᑯ ᐃᓚᐅᓪᓗᑎᒃ ᓇᓗᓇᙱᓚᑦ ᑕᐃᒪᐃᑦᑐᑑᓯᒪᙱᓐᓂᖏᓐᓂᒃ, ᑕᒪᒃᑯᐊᓕ ᐊᑐᖅᑕᐅᖃᑦᑕᕐᓯᒪᐃᓐᓇᖅᑐᑦ ᒪᓕᒐᓕᕆᓂᒃᑯᑦ. ᓇᓗᓇᙱᑦᑎᐊᖅᑐᖅ ᓈᒻᒪᙱᓕᐅᕈᑎᑕᖃᕐᓂᖓᓂᒃ ᒫᓐᓇ ᐊᒻᒪᓗ ᓇᓗᓇᐃᖅᑕᐃᔭᕆᐊᖃᖅᖢᓂ ᐊᓯᙳᖅᑎᑕᐅᔪᓐᓇᕐᓂᐊᕐᒪᑦ,” ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᓕᐊᑎᒍᑦ ᐅᖃᓚᐅᕐᑐᑦ ᑎᓴᒻᒥᕐᒥᑦ, ᔫᓂ 4.

ᓄᓇᕗᑦ ᑐᙵᕕᒃᑯᑦ ᐱᖁᔨᓚᐅᕐᒥᔪᑦ ᖁᕕᐊᓇᙱᓗᐊᖅᑐᓂ ᖃᐅᔨᒪᓂᒃᑯᑦ ᐱᓕᕆᐊᖃᖅᐸᒡᓗᑎᒃ ᐸᓖᓯᓕᕆᓂᒃᑯᑦ ᐊᒻᒪᓗ ᐃᒻᒥᒃᑰᖓᔪᓂ ᑲᒪᔨᐅᓇᔭᖅᑐᓂᒃ ᐸᓖᓯᒃᑯᓐᓄᑦ (ᐳᑭᖅᑕᓕᓄᑦ).

“ᓄᓇᕗᑦ ᑐᙵᕕᒃᑯᑦ ᐃᓅᖃᑎᖏᓐᓂᒃ ᑐᓴᖃᑦᑕᖅᑐᑦ ᐃᓄᐃᑦ ᑲᑉᐱᐊᓱᖃᑦᑕᕐᓂᖏᓐᓂᒃ ᐸᓖᓯᒃᑯᓐᓂᒃ ᐊᒻᒪᓗ ᐸᓖᓯᑦ ᐱᓗᐊᖅᑐᐊᓘᕙᖕᓂᖏᓐᓂᒃ ᐅᓄᕐᑐᐃᖅᖢᑎᒃ ᑲᒪᒋᔭᖃᓕᕌᖓᒥᒃ. ᓄᓇᕗᑦ ᑐᙵᕕᒃᑯᑦ ᐱᖁᔨᓕᕐᑐᑦ ᓄᓇᕗᑦ ᒐᕙᒪᒃᑯᑦ ᐊᒻᒪᓗ ᐸᓖᓯᒃᑯᑦ ᐱᓕᕆᓂᖏᑦ ᐊᓯᙳᖅᑎᑕᐅᓗᓂ ᐱᑦᑎᐊᙱᓗᐊᕐᓂᐊᓗᖕᒥᑦ ᒪᐅᖓ ᓄᓇᓕᖕᓂ ᐱᕈᖅᑎᑦᑎᕙᓪᓕᐊᒐᓱᖕᓂᕐᒥᑦ ᖃᓄᐃᑎᑦᑎᑦᑕᐃᓕᒥ ᐊᒻᒪ ᖁᕕᐊᓇᙱᓗᐊᖅᑐᓂᒃ ᖃᐅᔨᒪᓂᒃᑯᑦ ᐱᓕᕆᐊᖃᖔᓕᕐᓗᑎᒃ,” ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ.

“ᐱᓕᕆᐊᕆᔭᐅᔪᒧᑦ ᖃᓄᐃᓕᐅᕈᑎᒃᓴᐃᑦ ᒪᓕᒐᓕᕆᓂᕐᒧᑦ ᐱᓕᕆᐊᒃᓴᓄᑦ ᐱᐅᓛᒃᑯᑦ ᐃᓚᒋᔭᐅᑐᐃᓐᓇᕐᒪᑦ ᒪᓕᒐᓕᕆᓂᕐᒧᑦ ᐊᑲᐅᙱᓕᐅᕈᑎᐅᕙᒃᑐᓄᑦ ᐊᒻᒪᓗ ᐱᕋᔭᒍᑎᐅᓕᖅᐸᒃᑐᑦ ᐊᒻᒪ ᓱᕋᒃᑎᕆᔪᒪᒍᑎᐅᕙᒃᑐᑦ … ᐱᔾᔪᑎᖃᓗᐊᕐᑐᑦ ᐱᑕᖃᙱᓗᐊᕐᓂᖓᓂᒃ ᐃᓅᖃᑎᒌᖕᓂᕐᒧᑦ ᖃᓄᐃᓕᐅᕈᑎᒃᓴᓂᒃ, ᑮᓇᐅᔭᓕᐅᕈᑎᒃᓴᓂᒃ ᐊᒻᒪᓗ ᐃᓕᖁᓯᓕᕆᓂᕐᒥ ᐃᓄᖕᓄᑦ ᓄᓇᕗᒦᑦᑐᓄᑦ.”

ᐃᕼᐊᓗᐊᒃ ᐅᖃᓚᐅᕐᑐᖅ ᑭᓇᑐᐃᓐᓇᖅ ᓈᒻᒪᙱᓕᐅᕈᑎᖃᕈᓂ ᐸᓖᓯᒃᑯᓐᓂᒃ, ᐅᖃᖃᑎᖃᕈᓐᓇᕐᓂᕋᖅᖢᓂᒋᑦ ᑭᒃᑯᑐᐃᓐᓇᕐᓄᑦ ᓈᒻᒪᙱᓕᐅᕈᑎᓄᑦ ᑲᒥᓴᓐᓄᓐᓄᑦ ᐸᓖᓯᓄᑦ ᑐᕌᖓᔪᓄᑦ ᐅᕝᕙᓘᓐᓃᑦ ᑖᔅᓱᒪ ᑎᑎᕋᕐᕕᖓᓄᑦ ᐅᕗᖓᓘᓐᓃᑦ ᒥᓂᔅᑕᐅᑉ ᑐᒡᓕᖓᑕ, ᓯᑏᕙᓐ ᒫᓐᓱᓪ, ᑎᑎᕋᕐᕕᖓᓄᑦ.

“ᖃᐅᔨᒪᔪᖓ ᑕᒪᓐᓇ ᑐᓴᒐᒃᓴᓕᐅᕈᑎᐅᓯᒪᓂᖓᓂᒃ, ᐱᓗᐊᕐᑐᒥ ᖃᓄᐃᓕᐅᕐᓯᒧᓂᖏᓐᓂᒃ ᔫᓇᐃᑕᑦ ᓯᑕᐃᑦᔅᓂᑦ ᐊᒻᒪ ᑲᓇᑕᐅᑉ ᓂᒋᐊᓂᒃ. ᖃᐅᔨᒪᖁᔨᕗᖓ ᓄᓇᕗᒥᐅᓂᒃ ᓄᓇᑦᑎᓐᓂᒃ ᑕᐃᒪᐃᓕᐅᕐᑐᓂᒃ ᒪᓂᑐᐃᓐᓇᔾᔮᙱᓐᓂᑦᑎᓐᓂᒃ,” ᐃᕼᐊᓗᐊᒃ ᐅᖃᖅᑐᖅ.

7 ᐃᓄᐃᑦ ᑎᒍᔭᐅᓯᒪᔪᑦ ᐊᑕᐅᓯᕐᒥ ᑎᓴᒪᓄᑦ ᐋᖅᑭᒃᓯᒪᔪᒥᓐ

ᐸᓖᓯᑯᑦ ᓄᓇᓯᐅᑎᖓᑕ ᐹᖓᓄᑦ ᑐᓗᖅᑕᐅᓚᐅᕐᑎᓪᓗᒍ, ᑖᓐᓇ ᑎᒍᔭᐅᓯᒪᓚᐅᕐᑐᖅ ᐅᓐᓄᖓᓂ ᑭᙵᐃᑦ ᑎᒍᔭᐅᓯᒪᕝᕕᐊᓂᒃ ᑕᕝᕙᓂᓗ ᐋᓐᓂᕐᓱᖅᑕᐅᒋᓪᓗᓂ ᑎᒍᔭᐅᓯᒪᖃᑕᐅᔪᒥ ᐊᐅᓪᓚᖅᑎᑕᐅᔭᕆᐊᖃᖅᐸᓵᓕᖅᖢᓂ ᐃᖃᓗᐃᑦ ᐋᓐᓂᐊᕕᖓᓄᑦ.

ᑖᓐᓇᓕ ᐅᖃᐅᓯᐅᓚᐅᕐᓯᒪᙱᑦᑐᖅ ᓯᕗᓪᓕᕐᒥ ᑐᓴᒐᒃᓴᓕᐊᖑᑎᓪᓗᒍ ᐸᓖᓯᓄᑦ ᖃᓄᐃᑕᐅᓂᖓ ᐱᖓᔪᐊᓐᓂᑦ, ᔫᓂ 3-ᒥᑦ.

ᐊᒫᓐᑕ ᔫᓐᔅ, ᐊᖓᔪᖅᑳᖅ ᓄᓇᕗᑦ ᐸᓖᓯᓄᑦ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᒪᓐᓇ ᑐᓴᒐᒃᓴᓕᐅᓕᕐᑎᓪᓗᒍ ᑐᓴᐅᒪᓚᐅᙱᓐᓂᕋᖅᖢᓂᐅᒃ ᑖᓐᓇ ᐊᖑᑎ ᑐᐊᕕᕐᓇᖅᑐᒃᑯᑦ ᐃᖃᓗᖕᓄ ᑎᑭᑎᑕᐅᓚᐅᕐᓂᖓᓂᑦ.

“ᖃᐅᔨᒪᓚᐅᙱᓐᓇᒪ ᑐᐊᕕᕐᓇᖅᑐᒃᑰᖅᑎᑕᐅᓂᖓᓂ ᑭᓯᐊᓂ ᐅᓪᓗᑐᖃᐅᓕᖅᑎᓪᓗᒍ,” ᐅᖃᖅᑐᖅ.

ᑭᙵᐃᑦ ᐸᓖᓯᖏᑦ ᑎᓴᒪᓂᒃ ᑎᒍᔭᐅᓯᒪᕝᕕᖃᖅᑐᑦ. ᑖᓐᓇ ᐊᖑᑎ ᑎᒍᔭᐅᑎᓪᓗᒍ 7-ᓂ ᑎᒍᔭᐅᓯᒪᔪᖃᓚᐅᕐᒥᔪᖅ, ᑕᒪᕐᒥ ᐋᖓᔮᖅᖢᑎ ᐸᓖᓯᒃᑯ ᐅᖃᓚᐅᕐᑐᑦ ᑐᓇᒐᒃᓴᓕᐅᕐᑎᓪᓗᒋᑦ. ᑎᓴᒪᑦ ᐊᖑᑏᑦ ᐊᑕᐅᓯᕐᒦᖢᑎᒃ, ᒪᕐᕉᒃ ᐊᕐᓈᒃ ᐊᑐᓂ ᐴᕐᓯᒪᔭᐅᓪᓗᑎ ᐅᓇᑕᖅᑐᕕᓂᐅᓂᖏᓐᓄᑦ ᐊᒻᒪᓗ ᐊᑕᐅᓯᖅ “ᓈᒻᒪᒃᓴᕐᓯᒪᙱᒻᒪᕆᒃᑐᖅ ᐊᖑᑎ” ᑎᓴᒪᖓᓂ ᑎᒍᔭᐅᓯᒪᕝᕕᖓᓃᖢᓂ. ᐸᓖᓯᒃᑯ ᐊᕐᓇᐅᑉ ᐱᖃᑖᓂ ᐊᓂᑎᑦᑎᓪᓗᑎᒃ ᐊᒻᒪᓗ ᑖᓐᓇ ᐊᔾᔨᓕᐅᕐᑕᐅᓯᒪᔪᖅ ᐊᖑᑎ ᐃᓄᑑᑎᑕᐅᓪᓗᓂ ᑎᒍᔭᐅᓯᒪᕝᕕᖕᒥᑦ.

ᐅᖄᓚᕝᕕᐅᒃᑲᓐᓂᓚᐅᕐᑎᓪᓗᒋᑦ ᐸᓖᓯᒃᑯᑦ ᐊᖑᑎᒥ ᑎᒍᓯᒃᑲᓐᓂᕐᖢᑎᒃ ᑖᓐᓇᓗ ᑕᕝᕗᖓᑦᑕᐃᓐᓇ ᐴᖅᑕᐅᓪᓗᓂ.

“ᐃᓱᒪᓕᐅᕆᔭᕆᐊᖃᖃᑦᑕᕐᒪᑕ. ᑖᒃᑯᓄᖓ ᓈᒻᒪᒋᔭᐅᓗᐊᙱᒃᑲᓗᐊᖅᖢᓂ, ᐅᕙᓐᓄᑦᑕᐅᖅ ᓈᒻᒪᓗᐊᙱᖢᓂ, ᑭᓯᐊᓂᓕ ᑎᒍᔭᐅᔪᑦ ᐃᓂᖃᕆᐊᖃᕐᒪᑕ ᐊᒻᒪᓗ ᑖᒃᑯᐊ ᓇᓕᐊᒃ ᓇᓂᑎᑦᑐᒥᓇᓚᐅᙱᖢᑎᒃ,” ᔫᓐᔅ ᐅᖃᖅᑐᖅ.

ᐊᖑᑎᓪᓗ ᐊᕐᓇᐃᓪᓗ ᑎᒍᔭᐅᔪᑦ ᐊᑕᐅᓯᕐᒧᐊᖅᑕᐅᖃᑦᑕᙱᒻᒪᑕ, ᔫᓐᔅ ᐅᖃᖅᑐᖅ.

ᐊᐱᕆᔭᐅᒐᒥ ᖃᓄᐃᒻᒪ ᑭᓇᒧᑦ ᓄᖅᑲᖅᑎᑕᐅᓇᓱᓚᐅᙱᑦᑕᕆᐊᒃᓴᖓᓂ ᐋᓐᓂᕐᓯᕆᓕᕐᑎᓪᓗᒍ ᓄᓇᓯᐅᑎᒧᑦ ᑐᓗᖅᑕᐅᖃᐅᔪᒥᒃ, ᔫᓐᔅ ᐅᖃᓚᐅᕐᑐᖅ ᐸᓖᓯᒃᑯᑦ ᐊᑐᐊᒐᖃᕐᓂᖏᓐᓂᒃ ᑕᒪᒃᑯᐊ ᓇᐅᑦᑎᖅᓱᖅᑎᑦ ᒪᑐᐃᕐᓯᖃᑦᑕᕆᐊᖃᙱᓐᓂᖏᓐᓂᒃ ᑖᒃᑯᐊ ᐹᖏᓐᓂᒃ.

ᓄᓇᕗᒥᑦ, ᓇᐅᑦᑎᖅᓱᖅᑎᑦ (commissionaires), ᐸᓖᓯᒃᑰᙱᑦᑐᑦ ᑲᒪᔨᐅᖃᑦᑕᕐᒪᑕ ᑎᒍᔭᐅᓯᒪᔪᓂᒃ ᐸᓖᓯᒃᑯᓐᓂᑦ.

“ᐊᔪᕈᓐᓃᕐᓴᕐᓯᒪᕙᙱᒻᒪᑕ … ᓄᖅᑲᖅᑎᑦᑎᓂᕐᒥᒃ ᐅᓇᑕᖅᑐᓂᒃ ᑕᐃᒪᓐᓇ. ᐃᖅᑲᓇᐃᔭᑦᑎᓐᓂᒃ ᐊᓄᓪᓚᒃᓰᕕᖕᒦᑎᑦᑎᖃᑦᑕᙱᓐᓇᑦᑕ. ᑕᐃᒪᓐᓇ ᐱᔾᔪᓯᐅᖕᒪᑦ, ᓈᒻᒪᙱᓕᐅᕐᓂᖅᑕᖃᖅᐸᑦ ᑖᓐᓇ ᑲᒪᔨᐅᔪᖅ ᖃᐅᔨᑎᑦᑎᔭᕆᐊᖃᖅᑐᖅ ᐸᓖᓯᓂᒃ ᐊᒻᒪᓗ ᐅᑎᑲᐅᑎᒋᓗᓂ ᐅᓇᑕᖅᑐᓂᒃ ᓄᖅᑲᖅᑎᑦᑎᓇᓱᓕᕐᓗᓂ,” ᔫᓐᔅ ᐅᖃᖅᑐᖅ.

ᑕᐃᔅᓱᒪᓂ ᐅᓐᓄᖓᓂ ᑕᓪᓕᒪ ᑭᙵᐃᑦ ᐸᓖᓯᖏᓐᓂᒃ 7-ᓂ ᐃᖅᑲᓇᐃᔭᓚᐅᕐᓯᒪᔪᑦ. ᐃᒪᓐᓇᐅᓂᕐᓴᐅᕙᒃᖢᓂᓕ ᐱᖓᓱᑦ ᐊᑕᐅᑦᑎᒃᑯᑦ ᐃᖅᑲᓇᐃᔭᖅᐸᒃᖢᑎᒃ. ᔫᓐᔅ ᐅᖃᓚᐅᕐᑐᖅ ᑭᙵᐃᑦ ᐊᑕᐅᓯᒃᑲᓐᓂᕐᒥ 8-ᒋᔭᐅᓂᐊᖅᑐᒥ ᐸᓖᓯᑖᒃᑲᓐᓂᕐᓂᐊᕐᓂᕋᖅᖢᓂᒋᑦ.

ᑕᕝᕙᓂ ᐅᓐᓄᖕᒥ ᐸᓖᓯᑦ ᑐᓗᕐᓯᓚᐅᕐᑎᓪᓗᒋ ᐊᖑᑎᒥ ᐊᔾᔨᓕᐅᖅᑕᐅᓯᒪᔪᒥᑦ, ᐅᖄᓚᕝᕕᐅᓚᐅᕐᓯᒪᔪᑦ 28-ᓂ, ᐊᒻᒪ ᐊᑕᐅᓯᕐᒥ ᖁᑭᐅᑎᒥ ᐅᖃᐅᓯᖃᖅᑐᒥᓐ. ᐅᓐᓄᒃᑯᑦ 10:46-ᓗ 12:44-ᓗ ᐊᑯᓐᓂᖓᓂ 11-ᓂ ᐅᖄᓚᕝᕕᐅᓚᐅᕐᒥᔪᑦ ᐃᒥᐊᓗᖕᒧᑦ ᐊᒃᑐᐊᔪᓂᒃ, ᔫᓐᔅ ᐅᖃᓚᐅᕐᒥᔪᖅ.

“ᐊᓯᖔᖏᓐᓂᒃ ᐱᔭᒃᓴᖅᑕᖃᓚᐅᙱᑉᐸᑦ, ᑖᒃᑯᐊ ᐸᓖᓯᒃᑯᑦ ᑎᑎᕋᕆᐊᓕᖕᓂ ᐱᓕᕆᐊᖃᓪᓗᐊᓚᐅᕐᑐᑦ ᐊᒻᒪᓗ ᐅᖄᓚᔪᓄᑦ ᑭᐅᓵᓕᓂᕐᓴᐅᕙᒡᓗᑎᒃ,” ᔫᓐᔅ ᐅᖃᖅᑐᖅ.

ᔫᓐᔅ ᐅᖃᓚᐅᕐᑐᖅ ᑕᒪᐃᓐᓂ ᓄᓇᕗᑦ ᓄᓇᓕᖏᑦᑕ ᐸᓖᓯᖏᓐᓂᒃ ᐅᐸᑲᑕᒍᒪᓪᓗᓂ ᐊᒻᒪᓗ ᕼᐋᒻᒪᓚᒃᑯᓐᓂᑦ ᑲᑎᖃᑎᖃᑲᑕᒡᓗᓂ ᐱᒋᐊᕈᒪᓪᓗᓂ ᐱᓇᓱᐊᕈᓯᐅᓂᐊᕐᑐᒥ ᖃᓂᓛᒃᑯᑦ.

ᑎᒍᔭᐅᓯᒪᔪᖅ ᐋᓐᓂᕐᓱᐃᔪᕕᓂᖅ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᐊᒻᒪᓗ ᐊᓂᑎᑕᐅᓪᓗᓂ ᐊᑭᓖᓂᒃᑯᑦ ᐅᖄᓚᐅᑎᒃᑯᑦ ᐃᖃᖅᑐᐃᔨᕋᓛᒥ ᔫᓴᕝ ᒨᑕᒃ-ᕙᓚᐅᕙᔅ ᐱᖓᔪᐊᖑᑎᓪᓗᒍ, ᔫᓂ 3-ᒥᑦ

ᔫᓐᔅ ᐅᖃᓚᐅᕐᑐᖅ ᐱᖁᔨᓪᓗᓂ “ᐊᐅᓚᑦᑎᓂᕐᒥ ᕿᒥᕐᕈᐊᖁᔨᓪᓗᓂ ᐊᓄᒡᓚᒃᓰᕕᖕᒥ ᖃᓄᐃᓕᐅᕈᓯᕕᓂᕐᒥᑦ ᐊᒻᒪ ᐆᒥᖓ ᐸᓖᓯ ᖃᐅᔨᓴᖅᑕᐅᓗᓂ ᖃᓄᐃᓕᐅᕐᓂᕕᓂᖓ ᓴᖅᑭᔮᖅᑎᑕᐅᓚᐅᕐᓂᖓᓄᑦ ᐊᔾᔨᓕᐅᕐᓯᒪᔪᒥᑦ.”

ᔫᓐᔅ ᐅᖃᓚᐅᕐᑐᖅ ᑕᐃᓯᔪᓐᓇᙱᓐᓂᕋᖅᖢᓂ ᐸᓖᓯᒥ ᑐᓗᕐᓯᔪᕕᓂᕐᒥ ᐊᔾᔨᓕᐅᕐᓯᒪᔪᒥ, ᑭᓯᐊᓂᓕ ᐅᖃᕈᓐᓇᕋᔭᓚᐅᕐᑐᕉᖅ ᐸᓯᔭᒃᓴᙳᖅᑎᑕᐅᓚᐅᕈᓂ.

ᓄᑖᖑᓛᓂ ᑖᓱᒧᖓ ᐅᓂᒃᑳᒨᖓᔪᓂ ᑕᑯᔪᒪᒍᕕᑦ, ᑕᑯᒋᐊᕐᓗᑎ ᐅᕗᖓ nunatsiaq.com

Share This Story

(0) Comments