ᓄᓇᕗᑦ ᒐᕙᒪᖓ ᐅᖃᐅᓯᖃᕐᐸᓪᓕᐊᓯᕗᑦ ᐊᑯᓂᐊᓗᒃ ᐅᑕᖅᑭᔭᐅᓯᒪᔪᓂᒃ, ᐋᕿᒋᐊᕐᓯᒪᔪᖅ ᐱᕋᔭᒃᑐᓕᕆᓂᕐᒧᑦ ᐱᖁᔭᕐᔪᐊᕐᒥᒃ

“ᐱᐅᓯᕚᓪᓕᕐᓯᒪᔪᖅ ᑎᒍᔭᐅᓯᒪᔪ ᐅᓄᕐᓂᖏᓐᓄᑦ”

ᓴᓇᕙᓪᓕᐊᓯᕗᑦ ᐃᖃᓗᖕᓂᑦ ᐆᒥᖓ ᓄᑖᒥᑦ ᕿᑭᖅᑕᓂᒃ ᐃᑲᔪᖅᑕᐅᕕᒃᒧᑦ ᒪᒥᓴᕐᕕᒃᓴᕐᒥᒃ, ᕿᑭᖅᑖᓗᒃᒥᑦ ᐃᑲᔪᖅᑕᐅᕕᒃ ᐊᑐᖅᑕᐅᔪᓐᓃᙶᕐᓂᐊᕐᓗᒍ. (ᐊᔾᔨᓕᐅᕆᔨ ᓴᐃᕋ ᕌᔾᔪᔅ)

By ᓴᐃᕋ ᕌᔾᔪᔅ

For an English version of this article, see Government of Nunavut touts its long-awaited, revised Corrections Act

ᓄᓇᕗᑦ ᒐᕙᒪᖓ ᐅᖃᖅᑐᖅ ᐅᓇ ᓄᑖᖅ ᐱᕋᔭᒃᓯᒪᔪᓕᕆᓂᕐᒧᑦ ᐱᖁᔭᖅ ᓴᕿᔮᕐᑐᒃᑰᕐᓂᕐᓴᐅᓗᓂ, ᐃᓄᖕᓄᑦ ᑐᕌᖓᓂᕐᓴᐅᓗᓂ ᐊᒻᒪᓗ ᑎᒍᔭᐅᓯᒪᔪᑦ ᐱᔭᕆᐊᖃᖅᑕᖏᓐᓂᒃ ᑲᒪᒋᔭᖃᕐᓂᕐᓴᐅᓗᑎᒃ ᓄᓇᕗᒥᑦ.

ᐱᖁᔭᕐᔪᐊᖅ 1, ᓄᓇᕗᒥᑦ ᐱᕋᔭᒃᑐᓕᕆᓂᕐᒧᑦ ᐱᖁᔭᕐᔪᐊᖅ, ᐊᖏᖅᑕᐅᓕᓚᐅᕐᑐᖅ ᑕᒪᓐᓇ ᑕᖅᑭᐅᓚᐅᕐᑐᒥ.

ᐃᓚᒋᔭᐅᒻᒪᕆᒃᑐᕐᓕ ᐱᖁᔭᕐᔪᐊᒧᑦ ᐋᕿᒃᓯᓂᕐᒥᒃ ᓄᑖᒥᒃ ᖃᐅᔨᓴᖅᑎᐅᓂᐊᕐᑐᒥᒃ, ᑲᒪᒋᔭᖃᕐᓗᓂ ᕿᒥᕐᕈᐊᒃᑲᓐᓂᖃᑦᑕᕐᓂᕐᒥᒃ ᐊᒻᒪ ᕿᒥᕐᕈᐊᖅᑕᐅᓯᒪᙱᓗᐊᕐᑐᓂᒃ.

ᐱᖁᔭᕐᔪᐊᖅ ᓄᑖᓂᒃ ᐃᓱᖃᕈᑎᓂᒃ ᐊᕕᑎᑦᑎᓇᓱᖕᓂᕐᒥ ᐊᔾᔨᒋᔭᐅᙱᓐᓂᕐᒧ (ᓲᕐᓗ ᐃᓕᓴᕋᐃᙱᓐᓂᖅ), ᐃᓅᓯᓕᕆᔨᖃᕐᓂᖅ ᑎᒍᔭᐅᓯᒪᔪᓄᑦ ᐃᓐᓇᑐᖃᕐᓂᒃ ᐊᒻᒪᓗ ᐅᓂᒃᑳᓕᐅᖃᑦᑕᕆᐊᖃᕐᓂᕐᒥᒃ ᐃᖃᖅᑐᐃᕕᒃᑰᓂᕐᒨᖓᔪᓂᒃ.

ᓄᓇᕗᒧᑦ ᓄᑖᖅ ᐱᕋᔭᒃᓯᒪᔪᓕᕆᓂᕐᒧᑦ ᐱᕈᔭᕐᔪᐊᖅ ᐊᑯᓂᐊᓗᒃ ᐅᑕᕿᔭᐅᓯᒪᔪᖅ; ᑖᓐᓇᓗ ᓄᓇᑦᓯᐊᕐᒥ ᐊᑐᖅᑕᐅᓂᑰᓪᓗᓂ, ᐊᒻᒪ ᑎᑎᕋᖅᑕᐅᓕᕆᐊᓚᐅᕐᓯᒪᓪᓗᓂ 1970-ᖏᑦ ᐱᒋᐊᓕᓵᕐᓯᒪᑎᓪᓗᒋᑦ.

ᓄᓇᕗᑦ ᒐᕙᒪᒃᑯᑦ ᖃᐅᔨᓇᓱᒃᐸᓪᓕᐊᓕᓚᐅᕐᓯᒪᔪᑦ 2016-ᒥᑦ ᖃᑎᕐᓱᐃᓇᓱᒃᖢᑎᒃ ᒪᓕᒐᖓᓂᒃ ᑎᑎᕋᖅᐸᓪᓕᐊᔭᖓᓄᑦ.

ᑭᓯᐊᓂᓕ ᑖᓐᓇ ᒪᓕᒐᒃᓴᐅᖁᔭᐅᔪᖅ ᓴᖅᑭᑕᐅᓚᐅᕐᑎᓪᓗᒍ ᒪᓕᒐᓕᕆᕝᕕᒃᒥᑦ 2017-ᖑᑎᓪᓗᒍ, ᐊᓯᐅᑐᐃᓐᓇᓚᐅᕐᓯᒪᔪᖅ ᐱᒋᐊᕈᑎᓕᕆᓂᒃᑯᑦ ᑖᒃᑯᐊ ᒪᓕᒐᓕᕆᔨᒃᑯᑦ ᓄᖅᑲᖅᑎᓪᓗᒋ ᓄᓇᕗᒥᑦ ᓂᕈᐊᕐᓚᐅᓕᕐᓂᖓᓄᑦ ᑕᕝᕙᓂ ᐊᕐᕌᒍᒥᑦ.

ᑖᓐᓇ ᓴᖅᑭᑕᐅᒃᑲᓐᓂᕐᓯᒪᔪᖅ ᐱᖁᔭᖅ ᐊᔾᔨᑐᐃᓐᓇᐸᓗᐊ ᐊᕐᕌᓂ ᐅᖓᓪᓕᕐᒥᑦ ᓴᖅᑭᑕᐅᓚᐅᕐᓯᒪᔪᒥᑦ, ᓇᓗᓇᐃᕐᓯᒃᑲᓐᓂᕐᓯᒪᓪᓗᓂ ᐃᓚᐃᕐᑐᓄᑦ ᖃᓄᐃᓕᐅᕈᑎᒃᓴᓂᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐅᖃᖅᑐᖅ ᐱᐅᓪ ᒪᑲᐃ, ᒥᓂᔅᑕᐅᑉ ᑐᒡᓕᖓ ᒪᓕᒐᓕᕆᓂᕐᒧᑦ.

“ᐱᓕᕆᕙᓪᓕᐊᓂᐅᔪᖅ ᐊᑯᓂᕈᓗᒃ ᐱᓕᕆᐊᖑᓂᖓ, ᑭᓯᐊᓂᓕ ᐃᓚᓯᒪᔭᕗᑦ ᐊᕐᕌᒍᓂ ᐱᓕᕆᐊᕆᓂᑦᑎᓐᓂᒃ,” ᒪᑲᐃ ᐅᖃᖅᑐᖅ.

“ᐅᓪᓗᖅ ᐱᐊᓂᒃᑎᓪᓗᒍ, ᐱᐅᓂᕐᓴᐅᓕᖅᑎᑕᐅᔪᖅ ᑎᒍᔭᐅᓯᒪᔪᑦ ᐅᓄᕐᓂᖏᓐᓄᑦ ᐊᒻᒪᓗ ᓄᓇᕗᒻᒥᐅᓄᑦ ᑕᒪᐃᓐᓄᑦ.”

ᑭᓯᐊᓂᓕ ᐅᑕᕿᔭᕆᐊᖃᕐᓂᐊᕐᒥᔪᒍ ᖃᓄᐃᓕᖓᓂᐊᕐᓂᖓ ᓄᑖᖅ ᐱᖁᔭᒃᓴᖅ, ᑖᓐᓇᓗ ᐊᑐᓕᖅᑎᑕᐅᔾᔮᙱᖢᓂ ᑭᓯᐊᓂ ᓄᑖᖅ ᖃᐅᔨᓴᖅᑎᒃᓴᖅ ᐊᒻᒪ ᑐᒡᓕᕆᓂᐊᖅᑕᖓᑕ ᐃᓂᒃᓴᖏᑦ ᐃᓄᖃᓕᖅᐸᑕ. ᑕᒪᓐᓇᓕ ᐊᕐᕌᒍᓕᒫᖅ ᐱᓕᕆᐊᖑᓂᐊᖅᑐᒃᓴᐅᔪᖅ, ᐅᖃᖅᑐᖅ ᒪᑲᐃ.

ᑕᒪᐃᓐᓂ ᐃᖅᑲᓇᐃᔮᒃᓵᒃ ᕿᒥᕐᕈᐊᕐᓇᕈᑎᒃᑲᓐᓂᐅᓂᐊᕐᑐᑦ ᓄᓇᕗᑦ ᒐᕙᒪᒃᑯᓐᓂᒃ ᑲᒪᒋᔭᐅᙱᓪᓗᑎᒃ, ᑭᓯᐊᓂᓕ ᐃᓱᒪᓕᐊᖏᑦ ᑐᓐᓂᖁᑎᐅᖃᑦᑕᕋᔭᖅᑐᑦ ᑐᑭᒧᐊᖅᑎᑦᑎᔨᒧᑦ ᐱᕋᔭᒃᓯᒪᔪᓕᕆᓂᕐᒥᒃ ᑕᒪᓐᓇ ᐱᓕᕆᐊᕆᓕᕋᔭᕐᒪᒍ.

ᖃᐅᔨᓴᕐᑎᐅᔪᑦ ᕿᒥᕐᕈᐊᕈᓐᓇᖃᑦᑕᕋᔭᕐᑐᑦ ᐊᒻᒪ ᐃᓱᒪᓕᐅᕆᓗᑎᒃ ᖃᓄᖅ ᑎᒍᔭᐅᓯᒪᔪᑦ ᐊᐅᓚᑦᑎᓂᒃᑯᑦ ᖃᓄᐃᑕᐅᔭᕆᐊᖃᕐᓂᖏᓐᓂᒃ, ᐃᒪᓐᓇᐅᑐᐃᓐᓇᕆᐊᖃᕋᔭᖅᖢᓂ ᐃᑲᔪᖅᑕᐅᕝᕕᒃᒥᑦ ᐃᖅᑲᓇᐃᔭᖅᑎᔪᑦ ᑕᐃᒪᐃᖁᔭᐅᓯᒪᔪᒥᑦ ᐅᕝᕙᓘᓐᓃᑦ ᑎᒍᔭᐅᓯᒪᔪᓄᑦ ᖁᐊᕐᓵᕐᓴᖅᑐᒦᑦᑕᐃᓕᓂᕐᒧᑦ, ᐊᒻᒪᓗᑦᑕᐅᖅ ᒪᑯᑎᒎᓇᕐᓕ ᐃᑲᔪᖅᑕᐅᓇᓱᖕᓂᕐᒧᑦ ᐊᓯᐊᒎᖅᑎᑦᑎᓂᒃᑯᓪᓗ, ᑕᒪᓐᓇᓕ ᐋᕿᒃᑕᐅᒻᒪᕆᒃᑲᔭᖅᖢᓂ ᐃᖃᖅᑐᐃᕕᓕᕆᓂᒃᑯᑦ.

ᑎᒍᔭᐅᓯᒪᔪᑦ ᐊᐱᕆᔪᓐᓇᖅᑐᑦ ᑭᖑᓂᐊᒍᑦ ᕿᒥᕐᕈᐊᕈᒪᓂᕐᒥᒃ ᐃᓱᒪᓕᐊᕆᔭᐅᔪᓂᒃ. ᐋᕿᒃᓯᓯᒪᙱᒃᑲᓗᐊᕐᑎᓪᓗᒋ ᖃᓄᖅ ᐊᑯᓂᐅᑎᒋᔪᖅ ᐅᑕᖅᑭᔾᔪᑎᐅᓇᔭᕆᐊᒃᓴᖓᓂᒃ, ᖃᐅᔨᑎᑦᑎᓇᔭᖅᑐᑦ ᐃᑲᕐᕋᑦ 24 ᐃᓗᐊᓂᑦ ᖃᐅᔨᔪᒪᕝᕕᖓᑕ.

ᐃᓚᒋᔭᐅᖕᒥᔪᑦ ᐋᕿᒋᐊᕈᑎᑦ ᓴᖅᑭᑕᐅᔪᑦ ᓄᑖᒥᑦ ᐱᖁᔭᕐᔪᐊᕐᒥ ᐃᒪᐃᓕᖓᔪᑦ:

  • ᖃᐅᔨᓴᕈᓐᓇᕐᓗᑎ ᑎᒍᔭᐅᓯᒪᔫ ᐃᓱᒪᖓᒍᑦ ᐋᓐᓂᐊᕈᑎᖏᑦ ᐋᓐᓂᐊᕐᓂᓪᓚᕆᐅᓂᖓᓂᒃ (ᖁᐊᓵᕐᓇᕋᔭᕐᓂᕐᒨᙱᑦᑐᖅ) ᐊᒻᒪᓗ ᑎᒍᔭᐅᓯᒪᔪᑦ ᐃᓱᒪᖏᒍᑦ ᐋᓐᓂᐊᖃᖅᑐᑦ ᑲᒪᒋᔭᐅᑎᑉᐸᒡᓗᒋᑦ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᓄᑦ
  • ᐋᕿᒃᓯᒪᔪᑦ ᐃᓚᐃᕐᓂᕐᒧᑦ ᖃᓄᐃᓕᐅᕈᑎᒃᓴᑦᔭ
  • ᐱᔭᕆᐊᖃᕐᓗᑎᒃ ᐊᕐᕌᒍᒧᑦ ᐅᓂᒃᑳᓕᐊᒐᒃᓴᓂᒃ, ᐃᓚᖃᕐᓗᑎᒃ ᖃᓄᐃᓐᓂᕐᒧᑦ ᐃᖃᖅᑐᐃᕕᒃᑰᕈᑎᓂᒃ
  • ᐃᓄᖕᓄᑦ ᑐᕌᖓᔪᓂᒃ ᖃᓄᐃᓕᐅᒐᒃᓴᓂᒃ, ᐃᓚᖃᕐᓗᓂ ᐃᓐᓇᑐᖃᕐᓂᒃ ᐅᖃᓪᓚᐅᔾᔨᔪᓐᓇᖅᑐᓂᒃ ᐊᑐᐃᓐᓇᖅᑕᖃᖃᑦᑕᕐᓂᕐᒥᒃ ᑕᐃᒪᐃᒃᑐᖃᕈᒪᓐᓇᕈᓂ
  • ᐋᕿᒃᓱᐃᓗᑎᒃ ᐃᓄᐃᑦ ᑲᑐᔾᔨᖃᑎᒌᑦ ᐱᒻᒪᕆᐅᒋᔭᖏᓐᓄᑦ ᑲᑎᒪᔨᕋᓛᓂᒃ, ᑲᑎᒪᔨᒃᓴᑦ ᑎᒃᑯᐊᕐᑕᐅᓯᒪᕙᒡᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐅᓇ ᐃᓄᐃᑦ ᖃᐅᔨᒪᔭᑐᖃᖓ ᒪᓕᒃᑕᐅᖃᑦᑕᐃᓐᓇᖁᓪᓗᒍ

ᐱᔾᔪᑎᒋᓪᓗᒍ ᓯᕗᓪᓕᐅᓚᐅᕐᑐᖅ ᐱᖁᔭᕐᔪᐊᖅ ᓄᓇᑦᓯᐊᕐᒥᙶᕐᓂᖓᓂᒃ, ᐃᓄᖕᓄᑦ ᑐᕌᖓᓯᒪᓚᐅᙱᒻᒪᑦ, ᒪᑲᐃ ᐅᖃᖅᑐᖅ. ᒫᓐᓇᓕ ᑕᒪᐃᓐᓂ ᐱᕋᔭᒃᓯᒪᔪᓕᕆᓂᕐᒧᑦ ᐊᑐᐊᒐᐃᑦ ᒪᓕᒐᒃᓴᐃᓪᓗ ᕿᒥᕐᕈᐊᖅᑕᐅᔭᕆᐊᖃᕐᓂᐊᖅᖢᑎᒃ ᑖᒃᑯᓇᙵᑦ ᑲᑎᒪᔨᕋᓛᓄᑦ.

“ᑖᓐᓇ ᐱᒻᒪᕆᐅᑎᑦᑐᒪᒐᑦᑎᒍᑦ ᑖᔅᓱᒧᖓ ᐱᖁᔭᕐᔪᐊᒧᑦ ᐃᓚᒋᔭᐅᓗᓂ,” ᐅᖃᖅᑐᖅ.

Share This Story

(0) Comments