ᓄᓇᕗᑦ ᒥᓂᔅᑕᖓ ᓴᐳᔾᔨᕗᖅ ᖃᓪᓗᓈᓂᑦ ᐃᓄᑑᓐᓇᖅᑐᒦᕝᕖᑦ ᐊᑭᖏᓐᓂᒃ

ᓄᓇᕗᑦ ᑮᓇᐅᔭᓕᕆᓂᕐᒧᑦ ᒥᓂᔅᑕᖓ ᐅᖃᖅᑐᖅ $4 ᒥᓕᐊᓐ ᑖᓚᐃᑦ ᖃᓂᒋᔭᖓᓃᑦᑐᑦ ᓄᓇᕗᑦ ᒐᕙᒪᒃᑯ ᐊᑭᓕᐅᑎᒋᓯᒪᓕᖅᑕᖏᑦ ᖃᓪᓗᓈᓂᑦ ᑐᔪᕐᒥᕕᖕᓄᑦ ᐃᓅᑑᕕᖃᖅᑎᑦᑎᔪᓄᑦ ᐊᑑᑎᖃᖅᑎᐊᕐᓂᖓᓂᒃ.

ᑮᓇᐅᔭᓕᕆᓂᔨᒃᑯᓐᓄᑦ ᒥᓂᔅᑕ ᔪᐊᔾ ᕼᐃᒃᔅ ᐅᖃᐅᓯᖃᖅᑐᖅ ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᔪᑦ ᓇᐅᑦᑎᐅᒃᑯᒫᖑᓂᖏᓐᓂᒃ.

“ᐊᒻᒪ ᐃᓱᒪᔪᖓᓕ ᑕᐃᒪᓐᓇ ᐃᓕᕆᓂᑦᑎᓐᓄᑦ ᓲᕐᓗ ᐅᑎᕐᑎᕕᐅᔾᔪᑎᖃᕐᑐᒍᑦ ᐅᓇ ᓄᕙᒡᔪᐊᕐᓇᖅ-19 ᓄᓇᕗᑦ ᓯᓚᑖᓃᑏᓐᓇᕐᓂᖓᒍᑦ,” ᐅᖃᓚᐅᕐᑐᖅ ᑕᓪᓕᕐᒥᖅ, ᒪᐃ 8-ᖑᑎᓪᓗᒍ.

ᒪᐃ 6-ᒥ, 314 ᐃᓄᐃᑦ ᐃᓄᑑᓐᓇᖅᑐᒦᑎᑕᐅᓯᒪᔪᑦ ᖃᓪᓗᓈᓂᑦ ᑐᔪᕐᒥᕕᖕᓂ ᐊᒻᒪᓗ 708-ᑲᓐᓃᑦ ᐊᓂᒍᐃᕌᓂᓚᐅᕐᖢᑎᒃ ᐃᓄᑑᒋᐊᖃᕐᓂᖏᓐᓂᒃ. ᑲᑎᖢᑎ ᐃᓱᒪᒋᔭᐅᔪᖅ ᐊᑭᓖᓯᒪᓕᕐᓂᖏᓐᓂᒃ ᒪᑯᓄᖓ ᑐᔪᕐᒥᕕᖕᓄᑦ, ᐅᔾᔨᕐᓱᖅᑎᓄᑦ, ᓂᕿᓄᑦ, ᐊᓐᓄᕌᓂ ᐅᐊᓴᖃᑦᑕᕐᓂᕐᒧᑦ, ᐋᓐᓂᐊᓯᐅᕐᑎᓄᑦ ᐊᒻᒪ ᓄᓇᓯᐅᑎᓄᑦ ᑐᔪᕐᒥᕕᖕᒥᑦ ᒥᑦᑕᕐᕕᓕᐊᕐᓂᕐᒧᑦ ᒫᓃᓚᐅᕐᑐᖅ $3,982,673.

ᑖᔅᓱᒪ ᖃᔅᓯᐅᓂᖓ ᑲᒪᓇᙱᑦᑐᖅ, ᐅᖃᖅᑐᖅ ᕼᐃᒃᔅ.

ᓄᓇᕗᑦ ᒐᕙᒪᒃᑯ ᒫᑦᓯ 23-ᒥ ᐱᒋᐊᖅᑎᑦᑎᑎᓪᓗᒋ ᓄᓇᕗᒥᐅᑕᑦ ᓄᓇᕗᑦ ᓯᓚᑖᓃᑦᑐᑦ ᐃᓄᑑᓐᓇᖅᑐᒦᑦᑕᕆᐊᖃᕐᓂᖏᓐᓂᒃ ᑐᔪᕐᒥᕕᖕᓂ ᐅᑯᓇᓂ ᐊᑦᒪᓐᑕᓐ, ᐅᐃᓂᐱᒡ, ᐋᑐᕚ ᐅᕝᕙᓘᓐᓃᑦ ᔭᓗᓇᐃᒥ ᓄᓇᕗᒧᑦ ᐅᑎᓚᐅᙱᓐᓂᖏᓐᓂᒃ, ᕼᐃᒃᔅ ᐅᖃᓚᐅᕐᑐᖅ ᖃᐅᔨᒪᓚᐅᙱᓐᓂᕋᖅᑐᖅ ᖃᔅᓯᐅᖕᒪᖔᑦ ᐃᓄᐃᑦ ᓄᓇᕗᑦ ᓯᓚᑖᓃᑦᑐᑦ.

ᐃᓱᓕᕝᕕᒃᓴᖃᙱᑦᑐᖅ ᓱᓕ ᖃᑯᒍ ᐅᓪᓗᓂ 14-ᓂ ᐃᓄᑑᓐᓇᖅᑐᒦᑦᑕᕆᐊᖃᕐᓂᖅ ᖃᓪᓗᓈᓂᑦ ᑐᔪᕐᒥᕕᖕᓂ. ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐅᖃᓚᐅᕐᑐᖅ ᐊᑭᓕᐅᑎᒃᓴᑦ ᐅᓄᖅᑐᐊᓘᒐᓗᐊᑦ. ᑭᓯᐊᓂᓕ ᐅᖃᓚᐅᕐᒥᔪᖅ ᐊᑭᑐᓂᕐᓴᐅᓇᔭᕐᓂᖓᓂ ᓄᓇᕗᒻᒥᐅᑕ ᓄᓇᓕᒐᓚᖕᓂ ᐋᓐᓂᐊᖅᑖᕈᑎᒃ ᓄᕙᒡᔪᐊᕐᓇᖅ-19-ᒥᑦ.

“ᐅᖃᐅᔾᔭᐅᓚᐅᕋᒪ ᐱᒋᐊᕐᓂᖓᓂ ᐃᓱᒫᓘᑎᖃᓗᐊᖁᔭᐅᙱᖢᖓ ᑮᓇᐅᔭᓂ, ᑭᓯᐊᓂᓕ ᓄᓇᕗᒻᒥᐅᓂᒃ ᓴᐳᔾᔨᓯᒪᒐᓱᖕᓂᕐᒥᑦ ᐋᓐᓂᐊᖃᖅᑕᐃᓕᑎᑦᑎᓂᒃᑯᑦ,” ᐹᑐᓴᓐ ᐅᖃᖅᑐᖅ.

“ᐃᒃᐸᒃᓴᖅ ᐅᖓᓕᐊᓂ” ᑐᔪᕐᒥᕕᖕᒧᐊᕐᕕᒃᓴᒥ ᐃᓄᑑᕕᒃᓴᐅᓂᐊᖅᑐᒥ ᐅᑕᖅᑭᔪᖃᓚᐅᙱᑦᑐᖅ, ᐹᑐᓴᓐ ᐅᖃᓚᐅᕐᓯᒪᔪᖅ ᒪᐃ 8-ᖑᑎᓪᓗᒍ.

ᓄᓇᕗᒻᒥᐅᑕᑦ ᐅᓄᕐᓂᕐᓴᐃᑦ ᐅᑎᕐᓯᒪᓕᕋᓗᐊᖅᑎᓪᓗᒋᑦ ᓄᓇᕗᒧᑦ ᐅᕝᕙᓘᓐᓃᑦ ᐃᓂᒡᓚᒃᓯᒪᒐᓗᐊᖅᖢᑎᒃ ᐊᓯᐊᓂ, ᕼᐃᒃᔅ ᐅᖃᓚᐅᕐᑐᖅ ᓄᓇᕗᑦ ᒐᕙᒪᒃᑯ ᐊᓯᙳᖅᑎᑦᑎᔾᔮᙱᓐᓂᖏᓐᓂᒃ ᐊᑐᐊᒐᒥ ᑕᐃᒃᑯᐊ ᑕᒪᐅᙵᕋᓱᒃᑐᑦ ᓄᓇᓕᖕᓂ ᐃᓄᑑᓐᓇᖅᑐᒦᒋᐊᖃᓕᕐᓗᑎᒃ ᐅᑎᕌᖓᑕ.

“ᑐᙵᓱᒃᑎᑦᑎᓂᕐᒧᑦ ᐱᓕᕆᐊᖃᖅᑐᑦ ᓄᓇᕗᒥᑦ ᑕᒪᑐᒧᖓ ᐊᒃᑐᖅᑕᐅᔫᒐᓗᐊᑦ, ᑕᐃᒪᓕ ᐃᓱᒪᓐᓇᖅᑑᒐᓗᐊᖅ ᐃᑲᔪᕈᓐᓇᕐᓗᒋᑦ ᑕᒪᒃᑯᓂᖓ ᐱᓕᕆᐊᖃᖅᑐᑦ,” ᕼᐃᒃᔅ ᐅᖃᖅᑐᖅ.

ᑭᓯᐊᓂᓕ ᐅᓇ ᓈᒻᒪᙱᓕᐅᕈᑎᐅᓇᔭᕐᒥᖕᒪᑦ ᐃᓄᐃᑦ ᓄᕙᒡᔪᐊᕐᓇᖅ-19-ᒥᑦ ᓄᓇᕗᒧᐊᕈᔾᔨᑐᐃᓐᓇᕆᐊᖃᕐᒪᑕ ᐅᕝᕙᓘᓐᓃᑦ ᑕᒪᐅᙵᐅᕙᓪᓕᐊᑎᓪᓗᒋ ᐊᓯᖏᓐᓂ ᐊᐃᑦᑐᕐᓗᒃᓯᓗᑎᒃ.

ᐊᒻᒪᒃᑲᓐᓂᖅ, ᓄᓇᕗᒻᒥᐅᑕᑦ ᐱᖃᙱᖢᐊᕐᒪᑦ ᑲᒪᒍᓐᓇᖅᑐᓂᒃ ᐋᓐᓂᐊᖅᑖᖅᑐᖃᕐᓂᕐᐸᑦ ᓄᕙᒡᔪᐊᕐᓇᖅ-19-ᒥ ᑖᒃᑯᐊ ᐅᓪᓗᓂ 14-ᓂ ᐃᓄᑑᒋᐊᖃᖅᑎᓪᓗᒋᑦ—ᖃᓪᓗᓈᓄᑦ ᐊᐅᓪᓚᖅᑎᑕᐅᔭᕆᐊᖃᕋᔭᕐᒪᑕ ᑲᒪᒋᔭᐅᓂᐊᕐᒪᑕ, ᕼᐃᒃᔅ ᐅᖃᖅᑐᖅ.

ᑮᓇᐅᔭᑦ ᒐᕙᒪᑐᖃᒃᑯᓐᓂᑦ

ᐄᐳᕈᓪ 14-ᒥ, ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᓯᒪᔪᑦ ᑐᓂᓯᓂᐊᕐᓂᕋᖅᖢᑎᒃ $30.8 ᒥᓕᐊᓐ ᑖᓚᓂ ᓄᓇᕗᒧᑦ ᐃᑲᔫᑎᐅᓂᐊᕐᓗᑎ ᐊᑭᓕᐅᑎᒃᓴᓄᑦ ᐊᒃᑐᐊᔪᓂᒃ ᓄᕙᒡᔪᐊᕐᓇᖅ-19-ᒧᑦ. ᑕᐃᔅᓱᒪᓂᓕ, ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ ᐅᖃᓚᐅᕐᓯᒪᔪᖅ ᓄᓇᕗᑦ ᒐᕙᒪᒃᑯᑦ “ᒥᑭᓗᐊᕐᑐᒥ ᑐᓂᔭᐅᓂᖏᓐᓂᒃ.”

ᒪᐃ 8-ᒥᑦ, ᕼᐃᒃᔅ ᐅᖃᓚᐅᕐᑐᖅ ᓄᓇᕗᑦ ᒐᕙᒪᒃᑯᑦ ᓇᓗᓂᕋᖅᖢᓂᒋᑦ ᖃᑯᒍ ᑖᒃᑯᓂᖓ ᑮᓇᐅᔭᓂ ᐱᓂᐊᕆᐊᒃᓴᖏᓐᓂᒃ ᐅᕝᕙᓘᓐᓃᑦ ᖃᓄᐃᓕᖓᓗᓂ.

ᑕᒪᐅᓇᑦᑕᐃᓐᓇᖅ ᑐᓴᖅᑎᑦᑎᔾᔪᑎᐅᑎᓪᓗᒋ $30.8 ᒥᓕᐊᓐ ᑖᓚᓂ ᐃᑲᔫᑎᒃᓴᓂᑦ, ᒐᕙᒪᑐᖃᒃᑯᑦ ᐅᖃᓚᐅᕐᒥᔪᑦ $5 ᒥᓕᐊᓐ ᑖᓚᐃᑦ ᑐᕌᖓᓂᐊᕐᓗᑎᒃ ᖃᖓᑕᓲᓄᑦ ᓄᓇᕗᒥᑦ.

“ᑮᓇᐅᔭᐃᑦ ᓱᓕ ᑮᓇᐅᔭᒃᑯᕕᑦᑎᓐᓃᙱᑦᑐᖅ,” ᐅᖃᖅᑐᖅ ᕼᐃᒃᔅ, “ᑭᓯᐊᓂᓕ ᐃᓱᒪᒋᓇᓱᒃᑕᕗᑦ ᑮᓇᐅᔭᒃᓴᑎᑐᑦ ᑎᑎᖃᒃᑯᕕᒃᑯᑦ ᑎᑭᓕᒑᔪᑎᑐᑦ.”

ᐄᐳᕈᒥ, ᓄᓇᕗᑦ ᒐᕙᒪᒃᑯᑦ ᑐᓂᓯᖃᑦᑕᓚᐅᕐᑐᑦ $2.25 ᒥᓕᐊᓐ ᑖᓚᓂ ᐱᓇᓱᐊᕈᓯᑕᒪᓐ ᑲᓃᑎᐊᓐ ᓄᐊᑦᑯᓐᓄᑦ ᐊᒻᒪ ᑳᒻ ᐃᐅᑯᓐᓄᑦ—ᑖᓐᓇ ᐃᓱᒪᒋᔭᐅᓪᓗᓂ ᐊᑐᖅᑕᐅᓇᔭᖅᑐᓅᖓᓯᒪᓪᓗᓂ ᒪᑯᓄᖓ ᐱᖁᔭᓄᑦ ᐊᒻᒪ ᐋᓐᓂᐊᕐᕕᓕᐊᕐᓂᕐᒧᑦ ᐋᓐᓂᐊᕕᒡᔪᐊᕐᓇᖅᑕᖃᓚᐅᙱᑉᐸᑦ—ᖃᖓᑕᔪᓐᓇᐃᓐᓇᖁᓪᓗᒋᑦ.

ᒫᓐᓇᓕ, ᓄᓇᕗᑦ ᒐᕙᒪᒃᑯᑦ ᐅᖃᓚᐅᕐᑐᑦ ᐅᖃᓪᓚᖃᑎᖃᑲᑕᖕᓂᖏᓐᓂᒃ ᖃᖓᑕᓲᓕᕆᔨᓂ ᖃᓄᑎᒋ ᑮᓇᐅᔭᓂ ᐱᓯᒪᔭᕆᐊᖃᕐᓂᖏᓐᓂᒃ ᐊᐅᓚᐃᓐᓇᕐᓂᐊᕈᑎ ᐱᔨᑦᑎᕋᐅᑎᓕᕆᓂᕐᒧᑦ.

ᕼᐃᒃᔅ ᐅᖃᓚᐅᕐᑐᖅ ᐅᓇ $5 ᒥᓕᐊᓐ ᑖᓚ ᒐᕙᒪᑐᖃᒃᑯᓐᓂᙶᕐᓂᐊᖅᑐᖅ ᐃᑲᔫᑎᒃᓴᖅ ᖃᖓᑕᓲᓂ “ᓯᕗᓪᓕᖅᐹᖅ ᐱᓕᕆᓂᕐᒧᑦ ᓇᓪᓕᐅᒃᑯᒫᖃᕐᓂᕐᒧᑦ,” ᓈᒻᒪᙱᓗᐊᕐᓂᕋᖅᖢᓂᐅᒃ.

ᓄᓇᕗᑦ ᒪᑐᐃᕐᑕᐅᕙᓪᓕᐊᓂᖓ

ᐹᑐᓴᓐ ᐅᖃᓚᐅᕐᑐᖅ ᓄᓇᕗᑦ ᒪᑐᐃᕐᑕᐅᐸᓪᓕᐊᓂᐊᕐᓂᖓ ᒪᕐᕈᐃᓂᒃ ᐱᖓᓱᓂᙶᖅᑐᓂ ᖃᓄᐃᓕᐅᕐᓂᖃᕆᐊᖃᕐᓂᖓᓂᒃ: ᐋᓐᓂᐊᖃᖅᑐᖃᕆᐊᖃᙱᑦᑐᖅ ᓄᕙᒡᔪᐊᕐᓇᖅ-19-ᒥᑦ ᓄᓇᕗᒥᑦ; ᓄᕙᒡᔪᐊᕐᓇᖅ 19-ᒥᑦ ᖃᐅᔨᓴᕈᑎᑕᖃᕆᐊᖃᖅᑐᖅ ᓄᓇᕗᒥᑦ; ᐊᒻᒪᓗ ᖃᓪᓗᓈᓂᑦ ᐋᓐᓂᐊᖃᖅᑐᑦ ᐅᓄᕈᓐᓃᖅᐹᓪᓕᕐᓯᒪᓗᑎᒃ.

ᒪᐃ 11-ᒥᑦ, ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᖃᓚᐅᙱᑦᑐᖅ, ᐊᒻᒪᓗ ᓄᕙᒡᔪᐊᕐᓇᖅ-19-ᒥᑦ ᖃᐅᔨᓴᕈᑎᑕᖃᓕᖅᖢᓂ ᐃᖃᓗᖕᓂᑦ. ᓘᒃᑖᖅ ᐹᑐᓴᓐ ᐅᖃᓚᐅᕐᒥᔪᖅ ᒪᐃ 8-ᒥᑦ ᖃᐅᔨᓴᕈᑎᒃᓴᖅᑕᖃᕆᐊᖃᕐᓂᖓᓂᒃ ᑲᖏᖅᖠᓂᕐᒥᑦ ᐊᐃᑉᐸᖓ ᐱᓕᕆᓂᒃᓴᖅ ᐱᒋᐊᖅᑕᐅᓚᐅᖅᑎᓐᓇᒍ.

ᖃᐅᔨᓴᕈᑎᑕᖃᖅᑐᖅ ᑲᖏᖅᖠᓂᕐᒥ, ᐹᑐᓴᓐ ᐅᖃᖅᑐᖅ—ᐃᒪᐃᑦᑐᒥ a GeneXpert, ᐊᔾᔨᖓ ᐃᖃᓗᖕᓃᑦᑑᑉ, ᐊᒻᒪᓗ “ᐱᓕᕆᐊᖑᕙᓪᓕᐊᓕᕐᖢᑎᒃ ᐊᑐᖅᑕᐅᔪᓐᓇᕈᑎᒃᓴᖏᑦ ᒫᓐᓇ.”

ᒪᑯᓄᖓᓂ ᐊᐃᑦᑐᖅᑕᐅᓯᒪᔪᑦ ᐅᓄᕐᓂᖏᑦ ᖃᓪᓗᓈᓃᑦᑐᑦ, ᐹᑐᓴᓐ ᐅᖃᓚᐅᕐᑐᖅ ᓄᑖᓂ ᖃᐅᔨᔭᐅᕙᓪᓕᐊᔪᓂ ᒪᓕᖕᓂᕐᓴᐅᓂᖏᓐᓂᒃ ᐊᒻᒪᓗ ᐅᓄᖃᑦᑕᕐᓂᖏᑦ ᓱᒃᑲᐃᒡᓕᕚᓪᓕᖅᖢᑎᒃ.

ᑭᓯᐊᓂᓕ, ᐅᖃᓚᐅᕐᑐᖅ ᓇᐃᓴᐅᑎᓂ ᐱᓯᒪᙱᓐᓂᕋᖅᑐᖅ ᐅᑕᖅᑭᒍᑎᒋᔭᖏᓐᓂᒃ.

ᒪᕐᕉᖕᓂ ᐊᑐᕆᐊᖃᖅᑐᓂᒃ ᐊᑐᐊᓂᒃᑯᑎᒃ ᐱᖓᓱᓂᙶᖅᑐᓂᒃ, ᐸᐃᕆᕝᕕᐅᔪᑦ ᒪᑐᐃᖅᑳᕋᔭᖅᑐᒃᓴᐅᔪᑦ “ᐃᓄᒋᐊᙱᓐᓂᕐᓴᐅᓯᒪᓗᑎᒃ,” ᐹᑐᓴᓐ ᐅᖃᓚᐅᕐᒥᔪᖅ.

ᐱᔨᑦᑎᕋᕐᓂᕐᒧᑦ ᓴᓇᓂᖅ, ᓲᕐᓗ ᐊᑕᐅᓯᑦᑕᐃᓐᓇᐅᓐᓇᕐᑐᓂᒃ, ᐊᒻᒪ ᐃᓱᒪᒋᔭᐅᓂᐊᕐᒥᔪᖅ ᐊᒻᒪᓗ ᐃᓄᒋᐊᒍᓐᓇᕐᓯᔾᔫᑎᓗᑎᒃ ᑲᑎᓯᒪᔪᑦ ᓯᓚᒦᓪᓗᑎᒃ.