ᓄᓇᕗᑦ ᒪᓕᒐᓕᕆᔨᓂᒃ ᐊᕕᒃᑐᖅᓯᒪᔪᓂᒃ ᒐᕙᒪᓕᕆᔨᐅᔪᓂᒃ ᐊᑭᓕᕐᓱᐃᔪᓐᓇᕋᔭᕐᐹ?

ᑮᓇᐅᔭᖃᑦᑎᐊᙱᑦᑐᖅ ᓄᓇᕗᑦ ᒪᓂᑐᐃᓐᓇᕆᐊᖃᖅᐳᖅ ᓈᒻᒪᙱᓕᐅᕈᑎᓄᑦ ᐊᒻᒪ ᓱᕋᐃᒍᑎᒃᓴᓄᑦ

7-ᐅᔪᑦ ᓄᓇᕗᒥᑦ ᒥᓂᔅᑕᐃ ᓂᕈᐊᖅᑕᐅᓯᒪᔪᑦ ᐱᒋᐊᓕᖅᑎᓪᓗᒋᑦ ᐱᖓᔪᖓᓐᓂᒃ ᒪᓕᒐᓕᕆᓂᕐᒥᒃ 2008-ᖑᑎᓪᓗᒍ ᐅᑕᖅᑭᕗᑦ ᐊᖏᖅᑎᑕᐅᓂᐊᕐᓂᖏᓐᓂᒃ ᓄᕕᐱᕆ 19, 2008-ᒥ. ᑖᒃᑯᐊ ᒪᓕᒐᓕᕐᔪᐊᑦ 8-ᒋᔭᐅᓂᐊᕐᑐᒥᑦ ᒥᓂᔅᑕᒥ ᓂᕈᐊᓚᐅᕐᓯᒪᔪᑦ 2009 ᐱᒋᐊᓕᓵᕐᓯᒪᑎᓪᓗᒍ. (ᐊᔾᔨᙳᐊᖁᑎᒋᔭᐅᔪᖅ)

By ᔨᒻ ᐱᐅᓪ

For an English version of this story, see Can Nunavut afford to pay for political parties?

ᑕᐃᒃᑯᓄᖓ ᐅᒃᐱᕈᓱᒃᑐᓄᑦ ᓄᓇᕗᑦ ᐱᑐᐃᓐᓇᕆᐊᖃᓕᕐᓂᖓᓂᒃ ᓂᕈᐊᕐᓗᑎᒃ ᓯᕗᓕᐅᕐᑎᒃᓴᒥᓐ, ᓄᓇᕗᓕᒫᒥ ᓂᕈᐊᖅᑕᐅᓂᒃᑯᑦ, ᐃᒪᓐᓇᐅᙱᖔᖅᑐᖅ ᓂᕈᐊᖅᑕᐅᓗᓂ ᒪᓕᒐᓕᐅᖅᑎᓄᑦ, ᑕᐃᒪᓕ ᐃᓱᒪᔪᒃᓴᐅᖕᒪᑕ ᐊᔾᔨᒌᙱᑦᑑᑎᒃᑯᑦ ᓴᕿᒍᓐᓇᕆᐊᒃᓴᖓᓂᒃ.

ᓄᓇᕗᒥ ᐊᑐᓕᖅᑎᑕᐅᕙᓪᓕᐊᑎᑦᑎᓂᕐᒧᑦ ᑲᒥᓴᓐ ᑕᒪᓐᓇ ᖃᐅᔨᓇᓱᓚᐅᕐᓯᒪᔭᖓᑦ 1996-ᒥ ᐊᒻᒪ, ᖃᖓᓕᓴᐅᒐᓗᐊᖅᑎᓪᓗᒍ ᐊᒥᓱᓄᑦ ᐃᓱᒪᒋᔭᐅᓂᑯᑦ ᓱᓕ ᐊᑐᕈᑎᖃᖅᐳᑦ.

ᑭᓯᐊᓂᓕ ᐊᓯᐊᒎᕈᑎᒃᓴᐅᔪᑦ ᐱᔭᕆᑐᔪᒃᑯᑦ ᐊᓯᔾᔨᕐᓯᒍᑎᐅᓇᔭᖅᑐᖅ ᒪᓕᒐᕐᓂᒃ ᐊᒻᒪ ᐊᑐᖅᑕᐅᓂᕐᓴᐅᕙᒃᑐᓂ ᐅᓇ ᓄᓇᕗᑦ ᒪᓕᒐᓕᕆᕝᕕᖓ ᓇᓗᓇᐃᕐᓯᓯᒪᓪᓗᓂ ᖃᓄᐃᓕᐅᕈᓯᐅᔪᓂᒃ ᒪᓕᒐᓕᐅᕐᑎᓄᑦ, ᓯᕗᓕᐅᕐᑎᒧᑦ ᐊᒻᒪᓗ ᐊᐅᓚᑦᑎᓂᕐᒧᑦ ᑲᑎᒪᔨᓄᑦ.

ᐅᓇ ᐃᒪᐃᓕᖓᙱᑦᑐᖅ ᐊᔪᕐᓇᕋᔭᕐᓂᖓᓂᒃ. ᑭᓯᐊᓂᓕ ᐃᓚᖏᑦ ᐅᒃᐱᕈᓱᖕᒪᑕ ᐊᔪᕐᓇᙱᑦᑐᒃᑯᑦ ᑎᑭᐅᑎᔪᓐᓇᕆᐊᒃᓴᖓᓂᒃ.

ᐅᕘᓇᓕ ᓄᓇᕗᑦ ᐊᑐᓕᖅᑎᑦᑎᓇᓱᒃᑯᓂ ᐊᒻᒪ ᐱᒻᒪᕆᐅᑎᑦᑎᒍᓂ ᓄᓇᕗᒥᑦ ᐊᕕᒃᑐᖅᓯᒪᔪᓂᒃ ᒪᓕᒐᓕᕆᓂᖃᓕᕐᓗᑎᒃ.

ᑖᓐᓇᓕ ᐊᔾᔨᒋᓗᐊᕋᔭᙱᑕᖓ ᓂᕈᐊᕐᖠᓂᕐᒥᑦ ᓯᕗᓕᐅᕐᑎᒃᓴᓂᑦ ᓄᓇᕗᓕᒫᒥᑦ ᓂᕈᐊᖅᑎᑦᑎᓂᒃᑯᑦ. ᑕᐃᒪᓐᓇᓕ ᑭᓯᐊᓂ ᐃᓱᒪᒋᔭᐅᖕᒪᑦ, ᐊᒻᒪᓗ ᒪᑯᑎᒎᓇᕐᓕ ᒪᓕᒐᓕᕆᓂᒃᑯᑦ ᐱᔪᓐᓇᕐᓂᖃᕐᓂᒃᑯᑦ, ᐃᓱᒪᒋᔭᐅᓂᕐᓴᐅᕙᖕᒪᑦ ᐃᓱᒪᒋᔭᐅᓂᐅᔪᑦ ᐊᑐᕐᓂᖃᕐᓂᖏᓐᓂᒃ.

ᓲᕐᓗ ᐃᒪᓐᓇ, ᐊᒥᓱᑦ ᑲᓇᑕᒥᐅᑕ ᐅᒃᐱᕈᓱᒃᑐᒃᓴᐅᓚᐅᕐᒪᑕ 2015-ᒥᑦ ᓂᕈᐊᕐᓂᐊᕈᒪᓪᓗᑎᒃ ᔭᔅᑎᓐ ᑐᕉᑑᒥ ᑲᓇᑕᒧᑦ ᐊᖓᔪᖅᑳᒻᒪᕆᐅᓂᐊᕐᓗᓂ.

ᑭᓯᐊᓂᓕ ᑕᐃᒪᐃᓚᐅᙱᑦᑐᑦ. ᓂᕈᐊᓚᐅᕐᓯᒪᔪᑦ 338 ᒪᓕᒐᓕᐅᕐᑎᓂᒃ ᐊᒻᒪᓗ ᔭᔅᑎᓐ ᑐᕉᑑ ᐃᓚᒋᔭᐅᓪᓗᓂ. ᑲᓇᑕᒧᑦ ᐊᖓᔪᖅᑳᙳᓚᐅᕐᓯᒪᔪᖅ ᒪᕐᕉᖕᓂᒃ ᐱᔾᔪᑎᑎᒍᑦ. ᐊᑕᐅᓯᖅ, 2013-ᒥ ᐃᒻᒥᒃᑰᖓᔪᑦ ᒪᓕᒐᓕᕆᓂᕐᒧᑦ ᑲᑐᔾᔨᖃᑎᒌᑦ ᑕᐃᔭᐅᔪᑦ ᓕᐳᕈᓪ ᐹᑎ ᑲᓇᑕᒥ ᓂᕈᐊᓚᐅᕐᓯᒪᖕᒪᑕ ᑖᓐᓇ ᓯᕗᓕᐅᕐᑎᒋᓂᐊᕐᓗᓂᔾᔪᒃ. ᐊᐃᑉᐸᖓ, 2015-ᒥ, 184 ᑖᒃᑯᓄᖓ ᒪᓕᒐᓕᕆᔨᐅᔪᓄᑦ ᐱᓇᓱᐊᖏᓐᓇᐅᔭᖅᑐᑦ ᓂᕈᐊᖅᑕᐅᓚᐅᕐᓯᒪᖕᒪᑕ, ᑭᒡᒐᖅᑐᐃᓪᓗᑎᒃ ᐅᓄᓛᓂᒃ ᒪᓕᒐᓕᕆᕕᒡᔪᐊᕐᒥ 338-ᓂᒃ ᐃᒃᓯᕙᐅᑕᖃᖅᖢᑎᒃ.

ᑕᐃᒪᓖ ᑖᒃᑯᐊ ᓕᐳᕈᓪ ᐅᓄᓛᖑᓂᖏᓐᓂᒃ ᒪᓕᒐᓕᕆᕕᒡᔪᐊᕐᒥ—ᒫᓐᓇ 177-ᓂ ᒪᓕᒐᓕᐅᕐᑎᖃᖅᖢᑎᒃ—ᑖᒃᑯᓇᙵᓪᓗ ᐱᓕᕆᐊᖃᖅᑎᑕᐅᖢᓂ, ᐊᒃᓱᓪᓘᓐᓃᑦ ᑭᖑᓪᓕᕐᒥ ᓂᕈᐊᕐᓇᐅᓛᖅᑐᒧᑦ. ᑎᑎᕋᖅᓯᒪᙱᒃᑲᓗᐊᖅᑐᒃᑯᑦ ᒪᓕᒐᓕᕆᓂᕐᔪᐊᒃᑯᑦ, ᑐᕉᑑ ᒐᕙᒪᐅᕗᖅ ᐃᑲᔪᖅᑎᖏᓐᓄᑦ ᐃᓕᔅᓯ ᐃᑲᔪᕐᓂᔅᓯᓐᓅᙱᑦᑐᖅ.

ᑭᓯᐊᓂᓕ ᐊᕕᒃᑐᕐᓯᒪᓂᖅ ᐃᓱᒪᒋᒍᑎᐅᔪᖅ ᓂᕈᐊᕐᓯᒪᓂᖏᓐᓂᒃ ᑐᕉᑑᒥ ᑲᓇᑕᒥ ᒐᕙᒪᒃᑯᓐᓂᒃ ᓯᕗᓕᐅᕐᑎᐅᓂᐊᕐᓗᓂ, ᐊᒻᒪᓗ ᑖᓐᓇ ᐃᓱᒪᓂᐅᔪᖅ ᐊᑐᕐᐳᖅ.

ᑕᐃᒪᓗ ᓄᓇᕗᒧᐊᖔᕐᓗᑕ, ᑕᒫᓂ ᐱᑕᖃᙱᑎᓪᓗᒍ ᒪᓕᒐᓕᕆᓂᕐᒧᑦ ᐅᕝᕙᓘᓐᓃᑦ ᐊᕕᒃᑐᕐᓯᒪᓂᒃᑯᑦ ᑐᓗᕐᑕᕈᑎᓂᒃ ᒪᓕᒐᓕᕆᓂᕐᒨᖓᔪᓄᑦ. ᑕᐃᒪᓕ ᐋᕿᒃᓱᐃᔪᒪᒍᔅᓯ ᓄᓇᕗᒥᑦ ᐊᕕᒃᑐᕐᓯᒪᔪᓂᒃ ᒪᓕᒐᓕᕆᔨᒃᓴᓂᒃ ᓄᓇᕗᒧᑦ, ᐊᑏ ᐱᑐᐃᓐᓇᕆᑦᑎ.  ᑲᑎᕐᓱᐃᓗᓯ 22-ᓂ ᓂᕈᐊᒐᒃᓴᐅᔪᒪᓇᔭᖅᑐᓂᒃ ᐃᕝᕕᑦ ᒪᓕᒐᓕᕆᓂᕐᒧᑦ ᐅᒃᐱᕆᔭᕐᓄᑦ ᑭᖑᓪᓕᕐᒥ ᓄᓇᕗᒥᑦ ᓂᕈᐊᕐᓇᐅᓕᕐᐸᑦ.

ᑭᓯᐊᓂᓕ ᓯᕗᓂᐊᒍᑦ ᓈᒻᒪᙱᓕᐅᕈᓕᖃᓕᕋᔭᖅᐳᑎᑦ ᐊᖏᔪᕈᓗᖕᒥᑦ. ᖃᓄᕐᓕ ᑖᓐᓇ ᐊᑭᓕᕋᔭᕋᕕᐅᒃ?

ᐱᓗᐊᕐᑐᒥ, ᖃᓄᕐᓕ ᐊᑭᓖᓇᔭᕋᕕᑦ ᓂᕈᐊᒐᒃᓴᐅᒐᓱᓕᕐᑎᓪᓗᑎ? ᖃᓄᖅ ᐊᑭᓕᕐᓱᐃᓇᔭᕋᕕᑦ ᖃᕋᓴᐅᔭᒃᑯᑦ ᓴᕿᔮᒐᓂᒃ, ᐅᖄᓚᐅᑎᓄᑦ ᐃᑐᓂᐊᑦᒧᑦ, ᐊᑭᓐᓇᒥ ᐊᔾᔨᙳᐊᓂᒃ, ᑎᑎᖃᓂᒃ, ᖃᑭᖅᑯᐊᓂᒃ, ᐅᖃᓕᒫᒐᕋᓛᓄᑦ ᐊᒻᒪ ᒪᓂᓴᐅᑎᓕᐅᕐᓂᕐᒧᑦ?

ᐅᓇᓗᐊᕐᓕ, ᖃᓄᕐᓕ ᐊᑭᓖᓇᔭᕐᐱᑦ ᐊᑭᑐᔪᐊᓗᖕᒥ ᒪᓕᒐᓕᕆᓂᕐᒧᑦ ᓯᕗᓕᐅᕐᑎ ᐳᓚᕋᑲᑕᒃᑎᓪᓗᒍ ᓄᓇᕗᒥᑦ ᑕᒪᐃᓐᓄᑦ ᐃᓚᐃᓐᓇᖏᓐᓄᓪᓘᓐᓃᑦ?

ᑕᒪᐃᓐᓂ ᐊᑐᓂ ᒪᓕᒐᓕᕆᓂᕐᒧᑦ ᐃᓕᕆᐊᖃᖅᑐᑦ ᑲᓇᑕᒥ ᓇᐅᒃᑯᑐᐃᓐᓇᖅ, ᒪᑭᑕᒍᑎᖓᑦ ᑮᓇᐅᔭᖅ, ᑮᓇᐅᔭᑦ ᑐᓐᓂᖅᑯᓯᐊᖏᑦ ᖃᔅᓯᒐᓴᒻᒪᕆᖕᓂᒃ ᐃᓄᖕᓂᑦ, ᐱᓕᕆᕝᕕᐅᔪᓂᒃ ᐊᒻᒪ ᑲᑐᔾᔨᖃᑎᒌᓂᒃ.

ᔫᑳᓐ ᐊᑐᕈᓐᓇᕐᑐᒥᑦ ᑕᐅᑐᙳᐊᕈᑎᒥᑦ ᒪᓂᒻᒪᐅᔪᖅ. ᐄ, ᐃᓕᖁᓯᖃᕐᓂᒃᑯᑦ ᐊᒻᒪ ᓇᓃᓐᓂᖓᒍᑦ, ᔫᑳᓐ ᐊᔾᔨᒋᙱᑕᖓ ᓄᓇᕗᑦ. ᑭᓯᐊᓂᓕ ᐅᓄᕐᓂᖏᑦ, ᒫᓂ 40,000 ᐅᖓᑖᓄᑦ, ᐊᔾᔨᓪᓗᐊᐸᓗᒋᕚ ᓄᓇᕗᑦ, ᐊᒻᒪᓗ ᒪᓕᒐᓕᕆᕝᕕᖓ 19-ᓂ ᒪᓕᒐᓕᐅᖅᑎᖃᖅᖢᓂ, ᐅᓄᙱᓐᓂᕐᓴᓪᓘᓐᓃᑦ ᓄᓇᕗᒥᑦ.

ᔫᑳᓐ ᒪᓕᒐᓕᕆᔨᖏ ᐋᕿᒃᓯᒪᕗᑦ ᒪᓕᒐᓕᕆᓂᕐᒧᑦ ᐱᓕᕆᐊᖃᖅᑐᓂᒃ. ᐅᓇ ᑐᑭᓕᒃ ᑮᓇᐅᔭᒧᑦ ᐊᑐᖅᑕᖏᑦ, ᓴᕿᑕᐅᓯᒪᔪᖅ ᓂᕈᐊᖅᑐᓕᕆᔨᒃᑯᓐᓂᑦ ᔫᑳᓐᒥ, ᖃᐅᔨᒪᔾᔪᑎᒋᐸᓗᒍᓐᓇᖅᐸᕗᑦ ᖃᔅᓯᓂ ᐊᑐᕋᔭᕐᓂᕐᒥᒃ ᐃᒻᒥᒃᑰᖓᓗᓂ ᓂᕈᐊᒐᒃᓴᐅᓇᓱᖕᓂᕐᒥᒃ ᑎᐅᕆᑑᕆᒥ ᑖᓐᓇ ᑕᐅᑐᒃᖢᒍ ᓇᓕᒧᐸᓗᐊ ᐅᓄᕐᓂᖏᑦᑎᒍᑦ ᐊᒻᒪ ᐱᔪᓐᓇᕈᓐᓇᕐᓂᒃᑯᑦ ᓄᓇᕗᑎᑐᑦ.

ᑭᖑᓪᓕᖅᐹᒥ ᔫᑳᓐᒥ ᓂᕈᐊᕐᓇᐅᑎᓪᓗᒍ 2016-ᒥ, ᔫᑳ ᓕᐳᕈᒃᑯᑦ ᓵᓚᖃᓚᐅᕐᓯᒪᕗᑦ ᓂᕈᐊᖅᑕᐅᓪᓗᑎ 11-ᓄ ᐃᒃᓯᕙᐅᑕᓄᑦ 19-ᓂᑦ. ᑕᐃᒪᐃᑐᓐᓇᓚᐅᕐᑐᑦ ᐊᑐᖅᖢᑎᒃ$254,774.93,ᓂᕈᐊᖅᑐᓕᕆᔨᒃᑯᑦ ᔫᑳᓐᒥ ᐅᓂᒃᑳᓕᐅᓚᐅᕐᑐᑦ.

ᑐᒡᓕᕆᔭᐅᔪᑦ ᔫᑳᓐᒥ ᒪᓕᒐᓕᕆᓂᕐᒧᑦ ᐱᓕᕆᐊᖃᖅᑐᑦ, ᑖᒃᑯᐊᓗ 6-ᓂ ᐃᒃᓯᕙᐅᑕᖅᑖᖅᖢᑎᒃ, ᐊᑐᓚᐅᕐᑐᑦ

$215,139.14-ᓂ.ᒪᕐᕉᖕᓂ ᐃᒃᓯᕙᐅᑖᖕᓄᑦ ᓵᓚᖃᕐᖢᑎᒃ, ᐱᖓᔪᒋᔭᐅᔪᑦ ᔫᑳᓐᒥ ᓂᐅ ᑎᒧᑯᕌᑎᒃ ᐹᑎ ᐊᑐᓚᐅᕐᑐᑦ $229,455.77. ᐅᑯᐊᓕ ᐅᓄᙱᑦᑐᑯᓗᐃ ᔫᑳᓐᒧᑦ ᒍᕇᓐ ᐹᑎᑯᑦ, ᓂᕈᐊᖅᑕᐅᓚᐅᙱᑦᑐᑦ, ᐊᑐᓚᐅᕐᑐᑦ ᒫᓂᑐᐃᓐᓇᖅ $4,118.50.

ᐅᓇ ᖃᐅᔨᒍᑎᒋᕙᕗᑦ ᐱᔪᓐᓇᕈᓐᓇᖅᑐᒥᑦ ᓄᓇᕗᒥᑦ ᓂᕈᐊᒐᒃᓴᐅᓇᓱᖕᓂᕐᒥ ᐃᓄᖃᖅᑐᒧᑦ 40,000-ᖏᓐᓂᒃ, ᑕᐃᒪᓕ ᑮᓇᐅᔭᓂᒃ ᐱᕈᖅᑎᑦᑎᒋᐊᖃᕋᔭᖅᐳᑎᑦ ᒫᓂᑦ $200,000-ᓂᑦ$250,000-ᓄᑦ.

ᑕᐃᒪᓕ ᖃᓄᖅ ᔫᑳᓐᒥ ᒪᓕᒐᓕᕆᔨᐅᔪᑦ ᐱᕈᖅᑎᑦᑎᔪᓐᓇᓚᐅᕐᐸᑦ ᑖᒃᑯᓂᖓ ᑮᓇᐅᔭᓂ? ᐃᑲᔫᓯᐊᑎᒍᑦ—ᐱᓕᕆᔾᔪᓯᑎᒍᑦ ᐅᓄᙱᑦᑐᑯᓗᖕᓂ ᒪᓕᒐᕐᓂᒃ ᐊᑐᖅᑎᑦᑎᓂᒃᑯᑦ.

ᓄᓇᕗᒥᑦ, ᑭᓇᑐᐃᓐᓇᖅ, ᓇᖕᒥᓂᕆᔭᐅᔪᖅ ᐅᕝᕙᓘᓐᓃᑦ ᑲᑐᔾᔨᖃᑎᒌᖑᔪᑦ ᑐᓂᓯᔭᕆᐊᖃᙱᑦᑐᑦ $2,500 ᐅᖓᑖᓂᒃ ᓂᕈᐊᕐᓇᐅᔪᒧᑦ ᒐᕙᒪᓕᕆᓂᕐᒧᑦ. ᐊᒻᒪᓗ, ᐃᑲᔫᑎᓂᒃ ᑐᓂᓯᔪᓐᓇᖅᑐᑦ ᓄᓇᕗᒦᒃᑯᑎᒃ ᑭᓯᐊᓂ. ᓄᓇᕗᑦ ᓯᓚᑖᓂᑦ ᐃᑲᔫᑎᒃᓴᓂᒃ ᐱᖁᔭᐅᙱᑦᑎᐊᒻᒪᕆᒃᑐᑦ.

ᑭᓯᐊᓂᓕ ᔫᑳᓐᒥ, ᑕᒪᐅᓇ ᒪᑐᐃᖓᑦᑎᐊᖅᑐᖅ. ᓲᕐᓗ ᐃᒪᓐ, ᕚᓐᑯᕗᒥ ᑐᙵᕕᓕᒃ ᐅᔭᕋᒃᓴᖅᓯᐅᕐᕕᒃ ᑲᒻᐸᓂ ᑕᐃᔭᐅᔪᖅ ᑳᐳ ᓄᐊᑦ ᐅᔭᕋᒃᓯᐅᕐᕕᒃ ᑯᐊᐱᕇᓴᓐ, ᑐᓂᓯᓚᐅᕐᑐᑦ ᔫᑳᓐ ᓕᐳᕈᑯᓐᓄᑦ $50,000ᐃᑲᔫᑎᒃᓴᓂᒃ 2016-ᖑᑎᓪᓗᒍ. ᑖᓐᓇ ᐊᑕᐅᓯᖅ ᐃᑲᔫᓯᐊᖅ ᓲᕐᓗ ᑕᓪᓕᒪᐅᓕᖓᒍᓂ ᐊᑕᐅᓯᖅ ᑖᒃᓇᙵᑦ ᓂᕈᐊᒐᒃᓴᐅᓂᕐᒧ ᐊᑐᕐᓂᑯᖓ.

ᐊᓯᒃᑲᓐᓂᖓᓕ ᐳᕆᑎᔅ ᑲᓚᒻᒥᐊᒥ ᑐᙵᕕᓕᒃ ᐱᓕᕆᕝᕕᒃ, ᑕᐃᔭᐅᔪᖅ ᕕᒃᑑᕆᐊ ᒎᓗ ᑯᐊᐳᕇᓴᓐ, ᑐᓂᓯᓚᐅᕐᓯᒪᔪᑦ ᔫᑳᓐᒧᑦ ᒐᕙᒪᓕᕆᓂᕐᒧᑦ ᐱᓕᕆᔨᓄᑦ$10,000-ᓂ.ᐅᑯᖓ ᔫᑳᓐ ᒐᕙᒪᓕᕆᓂᕐᒧ ᐱᓕᕆᔩ ᑐᓂᔭᐅᓚᐅᕐᓯᒪᖕᒥᔪᑦ $6,400ᐅᑯᓇᙵᑦ ᓵᐳᔅ ᑐᕋᒃ ᒫᑦ ᐄᔭᒐᖅᑖᕐᕕᓕᕆᔨᒃᑯᓐᓂᑦ ᑐᕌᓐᑐᒦᑦᑐᓂᒃ.

ᐅᑯᐊᓕ ᔫᑳᓐ ᐊᓐᑏᐲᑯᑦ, ᑐᓂᔭᐅᓚᕐᓯᒪᔪᑦ ᐊᖏᔪᕈᓗᖕᓂ ᐃᑲᔫᑎᒃᓴᓂᒃ ᑲᑐᔾᔨᖃᑎᒌᓂᒃ: $10,000ᐅᑯᓇᙶᖅᑐᓂᒃ ᑐᕌᓐᑐᒦᑦᑐᓂᒃ UNIFOR, $7,000 ᐋᑐᕚᒦᑦᑐᓂᒃ ᑲᓇᑕᒥ ᐃᖅᑲᓇᐃᔭᖅᑎᓄᑦ ᑲᑎᒪᔨᕐᔪᐊᓄᑦ ᐊᒻᒪ $5,000ᐅᑯᓇᙵᑦ ᓴᕕᕋᔭᒃᓴᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ ᐅᕙᓃᑦᑐᓂᒃ ᐴᓇᐱ, ᐳᕆᑎᔅ ᑲᓚᒻᐱᐊᒥ.

ᓄᓇᕗᒥᑦ, ᑕᒪᒃᑯᐊ ᐃᑲᔫᓯᐊᑦ ᓱᕋᐃᒍᑎᐅᓇᔭᖅᑐᑦ ᐱᖁᔭᓂᒃ. (ᓱᕋᐃᒍᑎᐅᒐᔭᕐᒥᔪᖅ ᒐᕙᒪᑐᖃᑎᒍᑦ, ᓲᖃᐃᒻᒪ ᓂᕈᐊᖅᑐᓕᕆᔨᑦ ᑲᓇᑕᒥ ᐃᒪᐃᑎᑦᑎᓕᕐᒪᑕ ᐃᑲᔫᑎᓂᒃ ᐃᓱᖃᖅᑎᑦᑎᓪᓗᑎᒃ ᒪᐅᖓ $1,600 ᑕᒪᐃᓐᓄᑦ ᒐᕙᒪᑐᖃᒃᑯᑦ ᒐᕙᒪᓕᕆᔨᖏᓐᓄᑦ ᐊᒻᒪ ᓂᕈᐊᒐᒃᓴᓄᑦ.)

ᓂᕈᐊᖅᑐᓕᕆᔨᒃᑯᑦ ᓄᓇᕗᒥᑦ ᐱᖁᔭᖃᖅᑐᑦ, ᓲᖃᐃᒻᒪ, ᑐᕌᖓᑐᐃᓐᓇᕐᓂᕋᖅᖢᒍ ᐊᑕᐅᓯᕐᒧᑦ ᒐᕙᒪᓕᕆᔨᓅᖓᙱᑦᑐᓄᑦ ᓂᕈᐊᒐᒃᓴᓄᑦ ᐱᓇᓱᒐᓱᒃᑐᓂᒃ ᐃᒻᒥᒃᑰᖓᔪᓂᒃ ᓂᕈᐊᕐᕕᐅᔪᓐᓇᖅᑐᓂᒃ. ᓄᓇᕗᒥᑦ ᓂᕈᐊᖅᑐᓕᕆᔨᒃᑯᑦ ᐱᖁᔭᖅᔪᐊᖓᑦ ᐱᖁᔭᖃᙱᒻᒪᑕ ᐋᕿᒃᓯᒪᒍᑎᐅᓂᐊᖅᑐᓂᒃ ᒐᕙᒪᓕᕆᔨᓂᒃ ᐊᕕᒃᑐᕐᓯᒪᔪᓂᒃ—ᓲᖃᐃᒻᒪ ᑕᐃᒪᐃᑦᑐᖅᑕᖃᙱᑦᑐᖅ. ᑭᓯᐊᓂᓕ ᓄᓇᕗᒥᑦ ᒪᓕᒐᖏᑦ ᓱᖅᑯᐃᓇᑦᑎᐊᕐᒪᑕ: $2,500-ᒥ ᐃᓱᖃᖅᖢᓂ ᐊᒻᒪᓗ ᐃᑲᔫᓯᐊᕆᐊᖃᙱᖢᑎᒃ ᓄᓇᕗᑦ ᓯᓚᑖᓂᙶᖅᑐᓂᒃ.

ᐱᒻᒪᕆᖕᒥᑦᑕᐅᖅ ᐃᓱᒪᒋᐊᖃᕐᓇᕐᒪᑦ. ᔫᑳᓐᒥ ᐃᓄᒋᐊᖕᓂᖏᑦ, ᐱᒋᐊᖅᖢᓂ ᑎᓯᐱᕆ 2018-ᒥᑦ, ᒫᓃᐸᓗᖕᒪᑦ 40,700. ᓲᕐᓗ ᑎᓴᒪᓂ ᐱᖓᓱᐃᑦ ᕗᐊᐃᑦᕼᐅᐊᔅᒥ ᓄᓇᖃᕐᒪᑕ ᐊᒻᒪᓗ ᖃᓂᒋᔭᖏᓐᓃᑦᑐᓂᒃ. ᑕᒪᐃᓐᓂᐸᓗ ᓄᓇᓖᑦ ᐊᖅᑯᑎᒃᑯᑦ ᑎᑭᑕᒃᓴᐅᔪᐃᓐᓇᐸᓘᓪᓗᑎᒃ. ᐊᖅᑯᑎᖃᙱᑦᑐᑐᐊᕐᓕ ᖃᖓᑕᓲᒃᑯᑦ ᑭᓯᐊᓂ ᐅᐸᒐᒃᓴ ᐅᓇ ᐆᑦ ᑯᕉ, ᔫᑳᓐ ᐅᐊᖕᓇᖓᓂᑦ.

ᑖᓐᓇᓕ ᑐᑭᓕᒃ ᐅᓇ ᓕᐳᕈᓪᑯᑦ ᐊᖓᔪᖅᑳᖓ ᓵᓐᑎ ᓯᐅᕗ ᐅᕝᕙᓘᓐᓃᑦ ᔫᑳᓐ ᒐᕙᒪᓕᕆᔨᒃᑯᑦ ᐊᖓᔪᖅᑳᖓ ᑎᐅᕈᓪ ᐸᔅᓛᔅᑭ ᓂᕈᐊᒐᒃᓴᐅᓪᓗᑎᒃ ᐳᓚᕋᑲᑕᓚᐅᕐᓯᒪᓂᖏᓐᓂᒃ 2016-ᒥᑦ, ᓄᓇᓯᐅᑎᒥᓄᑦ ᐃᑭᒐᒥᒃ ᐃᖏᕐᕋᑲᑕᒃᖢᑎᒃ.

ᑭᓯᐊᓂᓕ ᐊᕕᑐᕐᓯᒪᓂᒃᑯ ᒐᕙᒪᓕᕆᓂᕐᒧᑦ ᓂᕈᐊᒐᒃᓴᐅᔪᑦ ᐊᑭᑐᓗᐊᙱᑦᑐᒦᑐᖅ ᐆᑐᓇᖅ ᔫᑳᓐᑎᑐ ᐊᑭᖃᕈᓂ ᒫᓂ $250,000-ᓂᒃ, ᖃᔅᓯᑐᕋᔭᕐᐸᓕ ᑕᐃᒪᓐᓇ ᓂᕈᐊᒐᒃᓴᐅᓗᓂ ᐊᑭᖓ ᓄᓇᕗᒥᑦ?

ᖃᐅᔨᒫᓂᙱᓗᐊᕋᑦᑕ ᐅᖃᒻᒪᕆᒃᓯᒪᔪᓐᓇᓪᓚᕆᒃᑐᓂᒃ ᓇᐃᓴᐅᑎᓂᒃ. ᑭᓯᐊᓂᓕ ᐅᓇ ᖃᐅᔨᒪᓇᕐᓂᖓ ᖃᖓᑕᓲᑉ ᐃᖏᕐᕋᕝᕕᒋᕙᒃᑕᖏᑦ ᐊᒻᒪ ᓵᑕᒐᒃᓴᐃᑦ ᐊᑭᖏᑦ, ᑕᐃᒪᓕ ᖁᑦᑎᖕᓂᕐᓴᒻᒪᕆᐊᓘᔪᒃᓴᐅᕗᖅ.

ᓂᕈᐊᖅᑐᓕᕆᔨᒃᑯᑦ ᔫᑳᓐᓂ ᐅᓂᒃᑳᓕᐅᕐᓯᒪᔪᑦ ᑕᒪᒃᑯᐊ ᑕᒪᕐᒥ ᔫᑳᓐᒥᑦ ᒐᕙᒪᓕᕆᓂᕐᒧᑦ ᐱᓕᕆᔪᑦ, ᑲᑎᖢᑎᒃ, ᑐᓂᔭᐅᓯᒪᔪᑦ $641,023.78 ᑮᓇᐅᔭᖅᑖᕐᐸᓪᓕᐊᓂᒃᑯᑦ 2016-ᒥᑦ ᓂᕈᐊᕐᓇᒥᓐ. ᑕᐃᒪᓕ ᐊᑭᑐᓂᕐᓴᒥᑦ ᓄᓇᕗᒥᑦ, ᐃᓱᒪᓇᕐᐳᖅ ᐱᖓᓱᑦ ᒐᕙᒪᓕᕆᐅᔨᓇᔭᖅᑐᑦ ᒫᓂᑦ $1 ᒥᓕᐊᓐᓂᑦ $2 ᒥᓕᐊᓐᓄᑦ ᑐᓐᓂᖁᓯᐊᖃᑦᑕᕆᐊᖃᕋᔭᖅᑐᑦ ᓂᕈᐊᕐᓇᐅᓕᕌᖓᑦ.

ᐅᓇ ᐃᓱᒪᒋᓪᓗᒍ ᐊᔪᕐᓴᕐᓂᖅ ᓄᓇᕗᒥᑦ ᐊᑐᖅᑕᐅᔪᖅ, ᓇᑉᐸᓪᓗᐊᖏᓪᓗ ᐃᓄᖏᑦᑕ ᐃᒡᓗᖃᖅᑎᑕᐅᔭᕆᐊᖃᖅᖢᑎᒃ ᐊᒻᒪᓗ ᐊᒃᓱᓪᓘᓐᓃᑦ ᐊᕐᕌᒎᑉ ᐃᓗᐊᒍᑦ ᐃᓄᓕᕆᔨᒃᑯᓐᓂᑦ, ᑕᐃᒪᓕ ᐃᑲᔫᓯᐊᒃᓴᑦ ᓇᑭᙶᕋᔭᕐᒪᑕ?

ᒐᕙᒪᓕᕆᓂᐅᔪᖅ ᐊᔪᕐᓇᕐᓂᕐᓴᖅ ᐃᓱᒪᒋᔭᕐᓂᑦ. ᐃᑲᔫᑎᓪᓚᕆᒃᑕᖃᙱᒃᑯᓂ ᐊᒻᒪᓗ ᐊᑐᕆᐊᓕᖕᓄᑦ ᒪᓕᒐᓂᒃ, ᒐᕙᒪᓕᕆᓂᕐᒧ ᖃᓄᐃᓕᐅᕈᓯ ᓄᓇᕗᒥᑦ ᒪᓂᑐᐃᓐᓇᕆᐊᓕᒃ ᓈᒻᒪᙱᓕᐅᕈᑎᓄᑦ ᐊᒻᒪ ᓱᕋᐃᒍᑎᒃᓴᓄᑦ. ᑭᓇᑐᐃᓐᓇᖅ, ᑭᓯᐊᓂ ᐱᔪᒪᓂᖃᖅᑐᑦ, ᐱᓕᕆᔾᔪᓯᖃᕈᒪᙱᒻᒪᑕ ᐊᖏᔪᐊᓗᐃᑦ ᑲᑐᔾᔨᖃᑎᒌᖑᔪᑦ ᐊᒻᒪ ᑯᐊᐳᕇᓴᓐᔪᐊᑦ, ᐃᓚᐅᓪᓗᑎᒃ ᐃᓄᐃᑦ ᑯᐊᐳᕇᑯᖏᑦ, ᓂᕈᐊᖅᑕᐅᓇᓱᒃᑐᒥ ᓂᐅᕕᕈᓐᓇᕐᓗᑎᒃ.

ᐃᓱᒪᓇᕐᐳᕐᓕ, ᐋᕿᒃᓱᕐᓯᒪᑦᑎᐊᙱᓗᐊᕈᑎᒃ ᓄᓇᕗᒻᒥᐅᑕᓕᒫᑦ ᓂᕈᐊᕈᓐᓇᖅᑎᑕᐅᓂᖓ ᓯᕗᓕᐅᕐᑎᒃᓴᒥᒃ ᓴᕿᑎᑦᑎᔾᔪᑎᐅᓇᔭᕆᐊᒃᓴᖓᓂᒃ ᓈᒻᒪᙱᓕᐅᕈᑎᓂᒃ ᐊᒻᒪ ᓱᕋᐃᒍᑎᐅᓇᔭᖅᑐᓂᒃ.

ᐃᓱᐊᒍᓪᓕ, ᓂᕈᐊᖅᑕᐅᓯᒪᔪᑦ ᑭᒡᒐᖅᑐᐃᔨᑦ ᓄᓇᕗᑦ ᒐᕙᒪᖓᓄᑦ ᐃᓱᒪᓕᐅᕆᔨᐅᓇᔭᖅᑐᑦ. ᑭᓯᐊᓂᓕ ᐅᔾᔨᕈᓱᑦᑎᐊᕆᐊᖃᕐᐳᓯ. ᐅᖃᓚᐅᕋᑦᑕ ᑕᖅᑭᐅᓚᐅᕐᑐᒥᑦ, ᑕᑯᒋᐊᓚᐅᕐᓗᓯ ᕿᒡᒋᓚᐅᙱᓐᓂᔅᓯᓐᓂ.

Share This Story

(0) Comments