ᓄᓇᕗᑦ ᓯᕗᓂᒃᓴᕗᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᓕᓐ ᕿᓚᐸᒃ, 50, ᐋᑐᕚᒥ ᓄᓇᖃᖃᑦᑕᖅᓯᒪᔪᖅ ᐃᓅᓯᖓᓂᒃ ᐊᒻᒪᓗ ᒫᓐᓇ ᐊᖓᔪᖅᑳᖑᓕᖅᖢᓂ ᐃᓕᓐᓂᐊᕐᕕᒃᒥᑦ ᐃᖅᑲᐅᒪᔭᖓ ᐃᓅᓱᒃᖢᓂ ᐅᐸᖃᑦᑕᓚᐅᕐᓯᒪᔭᖓᓄᑦ. (ᐊᔾᔨᓕᐅᕆᔨ ᒫᑕᓕᓐ ᕼᐊᐅᕕᑦ)

ᓄᓇᕗᑦ ᓯᕗᓂᒃᓴᕗᑦ ‘ᓂᕆᐅᒍᑎᐅᔪᓐᓇᖅᑐᑦ’ ᐃᓄᖕᓄᑦ ᐃᓕᓐᓂᐊᖅᑎᓄᑦ, ᐅᖃᖅᑐᖅ ᓄᑖᖅ ᑐᑭᒧᐊᖅᑎᑦᑎᔨ

ᓕᓐ ᕿᓚᐸᒃ ᐅᖃᓚᐅᕐᑐᖅ ᐊᓈᓇᖓᓄ ᐃᑲᔪᖅᑕᐅᓚᐅᕐᓂᖓᓄᑦ ᐃᓄᐃᑦ ᑲᑐᔾᔨᖃᑎᒌᓄᑦ ᐃᖅᑲᓇᐃᔮᖃᕈᒪᓂᕐᒥᒃ ᐆᑐᓇᖅ ᐋᑐᕚᒥ ᐃᓕᓐᓂᐊᕐᕕᒃᒥᑦ

By ᒫᑕᓕᓐ ᕼᐊᐅᕕᑦ

For an English version of this story, see Nunavut Sivuniksavut a ‘ray of hope’ for Inuit students, says new director

ᓕᓐ ᕿᓚᐸᒃ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᐅᓕᕐᑐᖅ ᓄᓇᕗᑦ ᓯᕗᓂᒃᓴᕗᒧᑦ ᑕᕿᓂᒃ ᐅᓄᓗᐊᙱᑦᑐᓂᒃ, ᑭᓯᐊᓂᓕ ᐅᖃᓚᐅᕐᑐᖅ ᐋᑐᕚᒥ ᐃᓕᓐᓂᐊᕐᕕᒃᒧᑦ ᐊᒃᑐᐃᓂᖃᕐᓂᖓᓂᒃ ᐊᕐᕌᒍᒐᓴᒻᒪᕆᖕᓂᒃ.

“ᐃᓕᓐᓂᐊᕆᐊᖃᑦᑕᖅᑎᓪᓗᖓ, ᓄᓇᕗᑦ ᓯᕗᓂᒃᓴᕗᑦ ᐃᒃᓯᕙᐅᑖᓗᖓᓃᖃᑦᑕᓚᐅᕐᓯᒪᔪᖓ,” ᐃᒡᓚᖅᖢᓂ ᐅᖃᖅᑐᖅ, ᐅᖃᓪᓚᖃᑎᒋᔭᐅᓪᓗᓂ ᑎᑎᕋᕐᕕᖓᓂᒃ ᐅᕇᑑ ᐊᖅᑯᑎᒥ ᑎᑎᕋᖅᕕᒃᒥᑦ.

“ᖃᐅᔨᒪᓚᐅᕐᑕᒃᑯᑦ ᐃᓕᓐᓂᐊᖅᑏᑦ ᑕᕝᕗᖓᖃᑦᑕᖅᑐᑦ … ᐊᖓᔪᒐ ᐃᓕᓐᓂᐊᖃᑕᐅᓚᐅᕐᓯᒪᖕᒪᑦ ᑕᐃᒪᓕ ᓄᓇᕗᑦ ᓯᕗᓂᒃᓴᕗᒻᒦᖃᑦᑕᓚᐅᕐᓯᒪᔪᖓ, ᐃᑲᔪᖅᐸᒃᖢᖓ, ᑕᕝᕙᓃᖃᑕᐅᑐᐃᓐᓇᖅᖢᖓ.”

ᑕᐃᒪᓕ ᑭᓚᐸᒃ ᐃᓇᖏᕐᓯᓂᖓ ᓈᒻᒪᑐᐃᓐᓇᓕᑐᖅ ᐆᒥᖓ ᐊᑯᓂᐊᓗᒃ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᒥᒃ ᒧᐊᓕ ᕼᐋᓐᓴᓐᒥ, ᑖᓐᓇᓗ ᑭᓚᐸᐅ ᖃᐅᔨᒪᓪᓗᓂᐅᒃ ᑕᕝᕙᓃᖃᑦᑕᓚᐅᕐᓯᒪᓂᖓᓄᑦ ᐃᓕᓐᓂᐊᕐᕕᒃᒥᑦ.

ᐱᒋᐊᖅᑎᑕᐅᓚᐅᕐᓯᒪᓪᓗᓂ 1985-ᒥᑦ ᓄᓇᕗᒥᐅᑕᑦ ᐃᓄᐃᑦ ᐃᓕᖅᑯᓯᓕᕆᓂᕐᒥᒃ ᐊᔪᕈᓐᓃᓴᖅᑎᑕᐅᓇᓱᒃᖢᑎᒃ ᐊᒻᒪᓗ ᐃᓄᖕᓄᑦ ᑐᕌᖓᔪᓂᒃ ᐃᓕᓐᓂᐊᕈᑎᒃᓴᒃᑲᓐᓂᕐᓂᒃ, ᐅᓇ ᐃᓕᓐᓂᐊᕐᕕᒃ ᐃᓕᓐᓂᐊᒐᒃᓴᖃᖅᑐᑦ ᐃᓕᓐᓂᐊᕈᑎᓂ ᐃᓕᓴᕆᔭᐅᓯᒪᔪᓂᒃ ᐋᒑᓐᑯᐃᓐ ᓯᓚᑦᑐᖅᓴᕐᕕᒃᒥ.

“ᐃᖅᑲᓇᐃᔮᕆᔭᒃᑯᓪᓕ ᐅᓇ ᐃᑲᔪᕈᑎᒋᔪᓐᓇᕐᓂᐊᕋᒃᑯᑦ ᐃᓅᓱᒃᑐᓂᒃ ᖃᓄᐃᓕᐅᕈᒪᓕᖅᑎᑦᑎᓂᒃᑯᑦ ᐊᒻᒪ ᐱᓕᕆᖃᑎᖃᒻᒪᕆᒡᓗᖓ ᐃᓄᖕᓂ ᐃᓐᓇᕈᓕᓵᖅᑐᓂᒃ,” ᑭᓚᐸᒃ ᐅᖃᖅᑐᖅ ᐃᓕᓐᓂᐊᕐᕕᖕᒥ ᐊᖓᔪᖅᑳᖑᓕᕐᓂᖓᓄᑦ.

ᐸᖕᓂᖅᑑᒥᐅᑕᕕᓂᐅᓪᓗᓂ, ᑭᓚᐸᒃ, 50, ᐃᖅᑲᓇᐃᔭᓚᐅᕐᓯᒪᔪᖅ ᕿᑭᖅᑖᓗᒃ ᑯᐊᐳᕇᓴᓐᑯᓐᓄᑦ, ᐅᑯᓄᖓᓗ NCC ᑮᓇᐅᔭᓕᕆᔨᓄᑦ, ᑲᑭᕙᒃᑯᓐᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪᓗ ᐃᖅᑲᓇᐃᔮᖃᓚᐅᖅᖢᓂ ᓛᒐᒥ ᑖᒃᑯᓄᖓ ᐊᖓᔪᖅᑳᕆᔭᐅᓪᓗᓂ.

ᐅᖃᓚᐅᕐᑐᖅ ᐱᓕᕆᐊᖃᕋᓱᖃᑦᑕᕐᓂᖓᓂ ᐃᓄᐃᑦ ᑲᑐᔾᔨᖃᑎᒌᓐᓄ ᐱᔾᔪᑎᖃᕐᓂᕋᖅᖢᓂᐅᒃ ᐊᓈᓇᒋᓚᐅᕐᓯᒪᔭᖓᓂᒃ ᒦᑲ ᑭᓚᐸᒃᒥ. ᓄᓇᕗᒧᑦ ᐊᖏᕈᑎᓂᒃ ᐋᔩᖃᑎᑕᐅᖃᑦᑕᕐᓂᑯ ᐊᒻᒪ ᖃᐅᔨᒪᔭᐅᑦᑎᐊᖅᑐᖅ ᐃᓄᖕᓄ ᓯᕗᓕᐅᕐᑎᐅᓂᑰᓂᖓᓂᒃ, ᒦᑲ ᓯᕗᓪᓕᖅᐹᖑᓪᓗᓂ ᓂᕈᐊᖅᑕᐅᓚᐅᕐᓯᒪᔪᑦ ᑎᑎᕋᖅᑎ ᑮᓇᐅᔭᓕᕆᔨᐅᓂᐊᕐᓗᓂ ᑲᑐᔾᔨᖃᑎᒌᓄᑦ ᑭᖑᓂᐊᒍ ᐊᑎᖃᓕᓚᐅᕐᓯᒪᔪᓄᑦ ᐃᓄᐃᑦ ᑕᐱᕇᑦ ᑲᓇᑕᒥ. 1990-ᖏᓐᓂ ᐃᑲᔪᓚᐅᕐᓯᒪᖕᒥᔪᖅ ᓄᓇᕗᑦ ᖃᓄᐃᓕᖓᓂᐊᕐᓂᖓᓂᒃ ᐃᓚᒋᔭᐅᓂᖓᓄᑦ ᓄᓇᕗᒥᑦ ᐊᑐᓕᖅᑎᑦᑎᓂᕐᒧᑦ ᑲᒥᓴᓐᑯᓐᓄᑦ.

“ᐱᕈᓚᐅᕐᓯᒪᒐᒪ ᐅᖃᐅᓯᖃᖃᑦᑕᖅᖢᓂ ᓄᓇᑖᕋᓱᖕᓂᕐᒥᒃ ᐊᒻᒪ ᐃᓄᐃᑦ ᐱᔪᓐᓇᐅᑎᖏᓐᓂᒃ… ᑕᒪᓐᓇ ᓲᕐᓗ ᐅᕙᓐᓃᒻᒪ ᑖᔅᓱᒧᖓ,” ᑭᓚᐸᒃ ᐅᖃᖅᑐᖅ ᐊᓈᓇᖓᓄᑦ ᐃᖅᑲᓇᐃᔮᖃᖃᑦᑕᕐᓂᖓᓂ.

ᒫᔅᓯᐅᓚᐅᕐᑐᒥᓪᓕ ᑐᑭᒧᐊᖅᑎᑦᑎᔨᙳᖅᑎᓪᓗᒍ, ᑭᓚᐸᒃ ᐱᓕᕆᐊᖃᕐᓯᒪᔪᖅ ᐃᓕᓐᓂᐊᖅᑐᓕᕆᓂᕐᒥᒃ ᐅᓇ ᐋᓐᓂᐊᕕᒡᔪᐊᕐᓇᖅ ᐊᐃᑉᐸᖓᓂ ᐊᕐᕌᒍᒦᓕᕐᑎᓪᓗᒍ

“ᐃᓱᒫᓗᒍᑎᖃᒻᒪᕆᓚᐅᕐᑐᒍᑦ ᐃᓕᓐᓂᐊᕈᒪᓇᔭᖅᑐᓂᒃ ᐊᒻᒪ ᖃᔅᓯᑦ ᖃᕋᓴᐅᔭᒃᑯᑦ ᐃᓕᓐᓂᐊᕈᒪᔭᕆᐊᒃᓴᖏᓐᓂᒃ, ᓲᖃᐃᒻᒪ ᐊᒃᓱᕈᕐᓇᕈᓘᔭᕐᓇᖅᒪᑦ ᐊᔪᕐᓇᐸᓗᒃᖢᓂᓗ ᐅᖓᓯᒃᑐᒥ ᐱᓕᕆᐊᖃᖅᖢᓂ ᓄᓇᕗᒦᖢᓂ — ᖃᕋᓴᐅᔭᐃᑦ ᓈᒻᒪᙱᓕᐅᕈᑎᐅᓛᙳᓪᓗᑎᒃ,” ᐅᖃᖅᑐᖅ.

ᐅᓄᕈᓐᓃᖅᐹᓪᓕᕐᓯᒪᔪᑦ ᑕᒪᑐᒪᓂ ᐊᕐᕌᒍᒥ — ᑭᓚᐸᒃ ᐅᖃᓚᐅᕐᑐᖅ ᒫᓐᓇ 28-ᓂ ᐃᓕᓐᓂᐊᖅᑎᖃᖅᑐᑦ ᐊᕐᕌᒍ ᓯᕗᓪᓕᐹᖓᓂ ᐃᓕᓐᓂᐊᒐᒃᓴᐅᑉ 45-ᖑᙱᖢᑎᒃ — ᑭᓯᐊᓂᓕ ᕿᓚᐸᒃ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᒋᔭᐅᔪᑦ “ᒫᓐᓇ ᑕᕝᕙᓃᑦᑐᑦ ᓱᓕ ᐱᓕᕆᐊᖃᕈᒪᖕᒪᑕ.”

ᐃᓕᓐᓂᐊᕐᕕᐅᓪᓕ ᓯᕗᓂᒃᓴᖓᓄᑦ, ᕿᓚᐸᒃ ᐅᖃᓚᐅᕐᑐᖅ ᒫᓐᓇ ᐊᑐᖅᑕᐅᑲᑕᖕᓂᐊᖅᑐᓂᒃ ᐃᓱᒪᒋᔭᖃᓚᐅᑲᖕᓂᖓᓂᒃ.

“ᐱᓕᕆᐊᕆᔪᒪᔭᕋᓕ ᐃᓄᖕᓂᒃ ᐃᓕᓐᓂᐊᖅᑎᑦᑎᒃᑲᓐᓂᕐᓂᕐᒥᒃ, ᐊᒻᒪᓗ ᐃᓄᖕᓂ ᐃᖅᑲᓇᐃᔭᖅᑎᖃᕐᓂᕐᓴᐅᓗᑕ ᐊᒻᒪᓗ ᑕᐃᒪᐃᖃᑦᑕᐃᓐᓇᕐᓗᓂ.” ᐅᖃᖅᑐᖅ. “ᐊᒻᒪᓗ ᐃᓕᓐᓂᐊᕐᕕᒃ ᐱᕙᓪᓕᐊᒍᑎᐅᖏᓐᓇᕐᓗᓂ ᐊᐅᓚᑕᐅᓯᒪᓂᖓᒍᑦ ᐊᕐᕌᒍᓖᖅᑐᓂᒃ 30 ᐅᖓᑖᓂ.”

“ᐅᓇ ᐱᒃᑯᓕᒍᑎᐅᕙᒃᑐᖅ, ᑐᓴᖅᑕᒃᑯᓪᓕ, ᐅᕙᓐᓄ ᖁᕕᐊᓇᖅᑐᐊᓘᒻᒪ — ᐊᔪᕈᓐᓃᕐᓴ­ᕈᑎᐅᔪᓂᒃ ᐋᖅᑭᒃᐸᓪᓕᐊᒍᑎᖃᓕᕐᓗᓂ ᐃᓕᖅᑯ­ᓯᕐᓂᒃ,” ᐅᖃᖅᑐᖅ ᐃᓕᓐᓂᐊᖅᑎᓄᑦ ᐃᓕ­ᑕᐅ­ᓯᒪᔪᓂᒃ.

ᑭᓚᐸᒃ ᐅᖃᓚᐅᕐᑐᖅ ᐃᓕᓐᓂᐊᖅᑎᓂᒃ ᑕᑯᖁᔨᓯᒪᓪᓗᓂ ᐅᓇ ᓄᓇᕗᑦ ᓯᕗᓂᒃᓴᕗᑦ ᓂᕆᐅᒍᑎᐅᔪᓐᓇᕐᓂᕐᒥᒃ ᓯᕗᓂᒃᓴᒥᒃ ᐊᒻᒪᓗ “ᐊᑐᖅᑕᐅᓗᓂ ᑐᑭᓯᕙᓪᓕᐊᓂᕐᒥᒃ ᐃᓄᖕᓂᒃ ᐊᒻᒪ ᐃᓕᖅᑯᓯᖏᓐᓂᒃ ᓯᕗᒧᒃᐸᓪᓕᐊᑎᓪᓗᒋᑦ.”

Share This Story

(0) Comments

Join the Conversation

Your email address will not be published. Required fields are marked *

*