ᓄᓇᕗᑦ ᓯᕗᓕᐅᕐᑎᖓ ᓴᖅᑭᑎᑦᑎᕗᖅ ᒥᓂᔅᑕᐃᑦ ᐱᓇᓱᐊᒐᖏᓐᓄᑦ ᑎᑎᖃᓂᒃ

For English version, see Nunavut premier releases ministers’ mandate letters

ᓄᓇᕗᑦ ᓯᕗᓕᐅᕐᑎᖓ ᐸᐅᓗᓯ ᐊᕿᐊᕈᖅ ᓴᖅᑭᑎᑦᑎᔪᖅ ᒥᓂᔅᑕᖏᓐᓄᑦ ᐱᓕᕆᐊᕆᔭᐅᓂᐊᖅᑐᓂᒃ.

ᐊᕿᐊᕈᖅ ᓴᖅᑭᑎᑦᑎᓚᐅᕐᑐᖅ ᒥᓂᔅᑕᖏᑦᑕ ᐱᓇᓱᐊᒐᖏᓐᓂᒃ ᑎᑎᖃᓂᒃ ᓄᕕᐱᕆ 28-ᖑᑎᓪᓗᒍ, ᓯᕗᓪᓕᖅᐹᒥ ᓄᓇᕗᒥᑦ ᓯᕗᓕᐅᕐᑎ ᑕᐃᒪᐃᓕᐅᕐᑐᖅ ᓴᖅᑭᔮᖅᑐᒃᑯᑦ. ᑖᒃᑯᐊ ᑎᑎᖃᐃᑦ ᓇᓗᓇᐃᔭᐃᓯᒪᔪᑦ ᐊᑐᓂ ᒥᓂᔅᑕᐃᑦ ᐱᐊᓂᒋᐊᖃᕐᓂᐊᖅᑕᖏᓐᓂᒃ ᐱᓕᕆᐊᖃᕐᓂᖏᓐᓂᒃ ᑖᓐᓇᓗ ᐃᓱᓕᓛᖅᖢᓂ 2025-ᒥ, ᐃᓚᖃᖅᖢᑎᒃ ᑖᒃᑯᐊ ᐱᓕᕆᐊᖏᑦᑎᒍᑦ ᖃᓄᐃᓕᐅᕆᐊᖃᕐᓂᖏᓐᓂᒃ..

“ᐃᓱᒪᓚᐅᕋᒪ ᐅᓇ ᐅᕙᑦᑎᓐᓄᑦ ᐃᑲᔪᕈᑎᐅᔪᓐᓇᕐᓗᓂ ᓴᖅᑭᔮᕐᓂᑦᑎᓐᓂᒃ ᐱᓕᕆᐊᑦᑎᒍᑦ ᐊᒻᒪᓗ ᐱᓕᕆᐊᕆᓂᕐᒧᑦ ᑭᐅᔨᐅᒻᒪᒋᐊᖃᕐᓂᕐᒥᒃ,” ᐊᕿᐊᕈᖅ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

“ᐃᓱᒪᓚᐅᕋᒪ ᐱᒻᒪᕆᐅᓂᖓᓂᒃ ᐱᒋᐊᕐᓂᖓᓂᒃ ᑖᒃᑯᐊ ᓂᕈᐊᖅᑕᐅᓯᒪᔪᑦ ᓂᐱᖏᑦ ᑐᓴᖅᑕᐅᖃᑦᑕᕐᓂᐊᕐᒪᑕ.”

ᑖᒃᑯᐊ ᑎᑎᖃᑦ ᐃᓗᓕᖃᕐᑐᑦ ᓯᕗᓪᓕᐅᑎᔭᕆᐊᓕᖕᓂ ᐱᓕᕆᐊᒃᓴᕆᔭᐅᔪᓂᒃ ᐊᑐᓂ ᒥᓂᔅᑕᓄᑦ, ᓲᕐᓗ ᐱᐊᓂᒃᓯᓂᖅ ᑭᕙᓪᓕᖅᒥᑦ ᐊᑯᓂᐊᓗᒃ ᑲᒪᒋᔭᐅᔭᕆᐊᓕᖕᓄᑦ ᐃᒡᓗᒃᓴᒥᒃ 2023-ᒥ ᐊᒻᒪᓗ ᐋᖅᑭᒃᓱᐃᓗᑎᒃ ᐱᓕᕆᐊᒃᓴᓂᒃ ᓄᓇᓕᖕᓂ ᐱᓕᕆᐊᕆᔭᐅᑎᑦᑎᓂᕐᒥᒃ 2023-ᒥ.

ᐊᕿᐊᕈᖅ ᐅᖃᓚᐅᕐᑐᖅ ᐅᖃᓪᓚᖃᑎᖃᕐᓯᒪᓂᖓᓂᒃ ᓴᖅᑭᑎᑦᑎᔪᒪᓪᓗᓂ ᐱᓕᕆᐊᒃᓴᓄᑦ ᑎᑎᖃᓂᒃ ᐊᑯᓂᐸᓗᒃ, ᑖᒃᑯᐊ ᒐᕙᒪᖏᑦ ᐋᖅᑭᒃᓯᓚᐅᕐᑎᓪᓗᒋᑦ ‘ᑲᑐᔾᔨᓗᑕ’ ᐱᓕᕆᐊᒃᓴᓂᒃ ᒫᔅᓯᒥ, ᐋᖅᑭᒃᓯᓯᒪᓪᓗᑎᒃ 6-ᒋᔭᐅᔪᑦ ᒪᓕᒐᓕᕆᔩᑦ ᓯᕗᓪᓕᐅᑎᓯᒪᔭᕆᐊᖃᖅᑕᖏᑦ ᐊᒻᒪ ᖃᓄᐃᓕᐅᖅᐸᓪᓕᐊᔾᔪᑎᒃᓴᓂᒃ.

ᐅᑯᐊ ᐱᓇᓱᐊᒐᕐᓄᑦ ᑎᑎᖃᑦ ᐃᓚᒋᔭᐅᔪᑦ ᐆᒧᖓ ‘ᑲᑐᔾᔨᓗᑕ’ ᐱᓇᓱᐊᒐᒃᓴᓂ, ᐊᒻᒪᓗ ᐋᖅᑭᒃᑕᐅᓚᐅᕐᓯᒪᓪᓗᑎᒃ ᑲᑎᒪᔨᓕᒫᑦ ᑕᒪᑐᒧᖓ ᐅᖃᐅᓯᖃᖅᑎᑕᐅᓪᓗᑎᒃ. ᑕᒪᒃᑯᐊ ᑭᒃᑯᓕᒫᓄᑦ ᑐᓴᖅᑕᐅᑎᑕᐅᖃᑦᑕᙱᑦᑐᑦ ᑭᓯᐊᓂᓕ ᒪᓕᒐᓕᕆᔨᐅᔪᑦ ᑐᑭᒧᐊᕈᑎᒋᖕᒪᒋᑦ ᑕᒪᒃᑯᐊ ᒥᓂᔅᑕᐃᑦ ᑭᐅᔨᐅᔪᓐᓇᕐᓂᐊᕐᓗᑎᒃ ᐱᓕᕆᐊᖏᓐᓄᑦ.

“ᐱᓕᕆᖃᑎᒃᓴᒃᑲ ᓂᕈᐊᕆᕙᙱᓐᓇᒃᑭᑦ, ᑕᐃᒪᓕ ᐃᓱᒪᓕᓚᐅᕋᒪ ᐅᓇ ᖃᓄᐃᓕᐅᕐᓂᕋ ᖃᐅᔨᒪᔭᐅᔾᔪᑎᐅᓂᐊᕐᒪᓐ ᖃᓄᖅ ᐱᓕᕆᐊᖃᕆᐊᖃᕐᓂᖏᓐᓂᒃ,” ᐅᖃᕐᑐᖅ.

ᐊᕿᐊᕈᖅ ᐅᖃᓚᐅᕐᒥᔪᖅ ᑲᒪᒋᔭᒃᓴᖃᕐᓂᕋᖅᖢᓂ ᓯᕗᓕᐅᖅᑎᐅᓂᒃᑯᑦ ᒥᓂᔅᑕᖏᓐᓂᒃ ᑭᐅᔨᐅᒋᐊᖃᕐᓂᖏᓐᓂᒃ ᐱᓇᓱᐊᒐᒃᓴᓂᒃ ᑎᑎᖃᓃᑦᑐᓂᒃ.

“ᑕᐃᒪᓕ ᓇᓗᓇᙱᓚᖅ ᐱᓕᕆᕈᓘᔭᕆᐊᖃᕐᓂᐊᖅᑐᑦ ᐱᓕᕆᕝᕕᖏᓐᓂᒃ ᖃᓄᐃᓕᐅᕈᑎᐅᕙᓪᓕᐊᔪᑦ ᖃᐅᔨᒪᕙᓪᓕᐊᓗᑎᒍᑦ,” ᐅᖃᕐᑐᖅ. “ᐅᓇ ᐊᔾᔨᒋᙱᑕᖓ ᒐᕙᒪᐅᑲᑕᓚᐅᕐᑐᓂᒃ, ᑕᐃᒃᑯᐊᓕ ᖃᓄᖅ ᐱᓕᕆᐊᖏᑦᑎᒍᑦ ᓂᕆᐅᒋᔭᐅᓯᒪᔭᕆᐊᒃᓴᖏᓐᓂᒃ ᓇᓗᓚᐅᕐᒪᑕ.”

ᐱᓇᓱᐊᒐᕐᓄᑦ ᑎᑎᖃᑦ ᓴᖅᑭᑕᐅᓚᐅᕐᑐᑦ ᓄᓇᕗᒥᑦ ᒪᓕᒐᓕᐅᖅᑎᑦ ᓂᕈᐊᓚᐅᖅᑎᓪᓗᒋᑦ ᒥᓂᔅᑕᐅᔪᑦ ᐅᖃᐅᔾᔪᖅᑕᐅᓚᐅᖅᑎᓪᓗᒋᑦ ᐃᓚᒋᔭᐅᔪᓄᑦ ᐅᖃᖅᖢᑎᒃ ᓴᖅᑭᔮᖅᑎᑦᑎᙱᓗᐊᕐᓂᖏᑦ ᒥᓂᔅᑕᐃᑦ.

ᐊᕿᐊᕈᖅ ᐅᖃᓚᐅᕐᑐᖅ ᐱᓇᓱᐊᒐᕐᓄᑦ ᑎᑎᖃᑦ ᓴᖅᑭᑕᐅᓂᖏᑦ ᐱᒋᐊᕈᑎᒨᖓᓚᐅᙱᑦᑐᖅ.

“ᓴᖅᑭᑎᑦᑎᔪᒪᓚᐅᕋᑦᑕᓕ ᐱᓇᓱᐊᒐᒃᓴᓂᒃ ᖃᐅᔨᒪᙱᖢᑕ ᐱᖁᔨᕗᖔᕈᑎᒥᒃ. ᑕᒪᓐᓇ ᐊᒃᑐᐊᓂᖃᙱᑦᑐᖅ,” ᐅᖃᕐᑐᖅ.

ᐊᕿᐊᕈᖅ ᐅᖃᓚᐅᕐᒥᔪᖅ ᑲᑎᖃᑎᖃᓚᐅᕐᓂᖓᓂᒃ ᐊᐃᕕᓕᒃᒧᑦ ᒪᓕᒐᓕᐅᖅᑎᒥᒃ ᓵᓚᒪᓐ ᒪᓕᑭᒥᒃ, ᐃᒃᓯᕙᐅᑕᖅ ᑲᑎᒪᔨᓄᑦ ᑖᔅᓱᒥᖓ ᐱᒋᐊᕈᑎᒥᒃ ᐱᒋᐊᖅᑎᑦᑎᓂᑯᒧᑦ.

“ᐃᓱᒫᓘᑎᑕᖃᕈᓂ ᐅᕙᓐᓄᑦ ᐅᖃᐅᓯᐅᖁᔭᒃᑯᑦ ᐃᓱᒫᓘᑎᖏᑦ ᑲᒪᒋᔪᓐᓇᕐᓂᐊᕋᒃᑭᑦ ᑲᒪᒋᔭᐅᓇᓱᒋᙱᑕᖏᑦ,” ᐊᕿᐊᕈᖅ ᐅᖃᕐᑐᖅ.

ᐅᖃᓚᐅᕐᒥᔪᖅ ᐱᓕᕆᐊᒃᓴᐃᑦ ᐋᖅᑭᒃᓯᒪᔪᑦ ᐱᓇᓱᐊᒐᕐᓄᑦ ᑎᑎᖃᓂᒃ ᕿᒥᕐᕈᐊᖅᑕᐅᓂᐊᖅᑐᑦ ᕿᒥᕐᕈᐊᖅᑕᐅᓂᐊᕐᓂᕋᖅᓯᒪᓂᖓᒍᑦ ᒐᕙᒪᒃᑯᑦ ᖃᓄᐃᑉᐸᓪᓕᐊᓂᖏᓐᓂᒃ ᓄᕕᐱᕆ 2023-ᒥ.